新加坡馬拉南部5天自駕遊【PART 1 – 新加坡篇 】

新加坡位於馬來西亞半島的南端,只是一個六百多平方公里的小國,在世界地圖上只是一個小紅點兒吧了。她的南面和印尼隔海相望,北面和馬來西亞只隔著柔佛海峽,由新柔長堤連接起來。其實新加坡在1965年8月9日獨立之前都係同馬來西亞(我的家鄉)同屬於英國的殖民地。所以無論種族語言、宗教信仰、飲食文化方面都十分之相似。新加坡的人民約七成是華人,兩成馬來人,剩下一成的是印度裔。不過因為新加坡的生活指數和貨幣匯率都比只隔咗一條柔佛海峽的馬來西亞都高好多好多,所以新加坡的食物、住宿、交通等都比馬來西亞貴好多倍。因為工作的關係,我曾到訪過新加坡超過20次了。呢個地方俾我既感覺係……..國家很小但很富裕,周圍環境好乾淨,治安良好,交通好方便,不過就比較缺乏大自然風景的吸引力。亦都係因為我工作的關係令我接觸了很多不同類型的新加坡人,多年來很大部分的新加坡人俾我既感覺係高傲、凡事怕輸、樣樣要爭第一、諸多挑剔,而且什麼芝麻綠豆之事都要投訴一番,所以俾人感覺佢地啲人好麻煩、好難相處。新加坡地方雖好但因為啲人既問題,所以令到我既印象分都已經大打折扣了。我覺得,新加坡人如果能謙虛一點,也許不致於令人這麼反感。

咁既然講到咁討厭新加坡人,咁又點解會再同朋友去新加坡旅行架呢?

話說我有2個我視同弟弟一樣的好朋友(豪和蘿記),在去年的12月有一日蘿記突然間WhatsApp我,話如果我下次返馬來西亞的話佢好想帶家人跟我去玩、去食果王「榴槤」同試下地道美食。咁我過幾日之後睇過今年應該仲可以拎到幾日假期所以就答應咗佢,而且立即邀請埋豪一齊去玩,順便拜託佢呢位機票格價專家幫我地手買平機票嘛。咁要食榴槤當然要揀榴槤季節(6月-8月)去啦,不過因為要就蘿記個仔放暑假,所以最後揀咗8月中出發。其實個行程原本只有馬來西亞的地方既,不過佢地從來都冇去過東南亞旅行,而且馬來西亞南部的柔佛新山又有阿豪很想去的Hello Kitty Town,咁既然去到南部咯,咁不如順便去埋新加坡啦,當見識多一個國家囉!

以下呢2張係馬來西亞的地圖,而南部嗰個小島就係新加坡喇 ~~

新加坡呢個地方我因為去過太多次所以感覺麻木了,導致我沒有興趣寫呢次的遊記。所以今次我非常榮幸可以邀請到團友之一的阿豪代筆,為大家帶來一篇精彩的遊記。以下所有的藍色字都是阿豪的遊記文字部分,而紫色字是我後加的補充資料 ~~

新加坡馬拉南部5天自駕遊的行程 :

【Day 1】 香港 》新加坡章宜機場 》Maxwell Food Market 》聖淘沙島  》魚尾獅公園 》 Outram Park 海鮮晚餐 》克拉碼頭。   宿 : The Plot Hostels

【Day 2】 小印度 》牛車水 》馬來西亞柔佛州「新山」》Danga Bay 新山荔園看日落 》新山夜市食榴槤。   宿 : KSL Hotel & Resort

【Day 3】 Hello Kitty Land 》Lego Hotel Pulau Kukup漁村 》肉骨茶 》 KSL Mall 》宵夜食榴槤。  宿 : KSL Hotel & Resort

【Day 4】 Johor Premium Outlet 》馬六甲 》雞場街 》馬六甲古城遊 》沙嗲碌碌 》宵夜食榴槤。   宿 : Hatten Hotel Melaka

【Day 5】 馬六甲古城遊 》娘惹博物館 》吉隆坡KLIA2機場 》香港

 

一個期待已久既星馬之旅終於要開始喇!呢個旅程真係期待咗好耐好耐,由上年一位好朋友”喱姐”的邀請,直到出發等咗超過半年,所以呢個旅程真係多麼令人期待^^由計劃行程到出發所有野都唔需要我操心,所有準備工作由喱姐代勞,十分十分感謝!而我做既就只係準備一個愉快心情,期待呢個又食又玩既愉快旅程到來!

今次我既星馬之旅可以分為兩部份,頭五日由新加坡到吉隆坡有一大班朋友一齊玩,之後會自己一個去檳城,不過檳城亦都有檳城朋友等緊我,所以全個旅程都有朋友照顧,哈哈 ^^ 早於14/2已經買好新加坡機票,30/6買好馬來西亞回程機票,再book好檳城來回火車票同住宿,我既準備工作都差唔多啦,安心等出發!新加坡、馬來西亞我黎喇!

yxh50


Day 1 (17Aug2014)

今朝乘搭晨早6:55飛去新加坡既航班,半夜未夠三點就出門口,大約四點半已經去到機場喇;半夜機場旅客唔多,難得見到機場咁寧靜 ~

今次乘搭Scoot酷航,如果唔係去新加坡我都未聽過呢間航空公司,佢係上年先有香港航線,價錢好吸引架 ~

酷航係廉價航空公司,由香港飛去新加坡只係$328,真係好廉價呢 !  而且所有飛機都係用B772大機,比起其他大多數廉價航空用細機舒服得多,坐位都更加闊 ~

我第一次坐咁大部飛機!

團友們等上飛機時一一填好新加坡入境紙備用 ~~

上機喇,愉快之旅正式開始喇 ~ yxh91

機上冇電視機,要靠靚靚空姐真人做安全示範 ~~

三個多小時嘅航程好快就到喇!不過去到新加坡機場感覺比想像中差好遠,唔係想像之中咁新咁靚,可能係T2比較舊?而最唔鐘意既就係新加坡關員個個都黑口黑面,好似得罪佢咁,相反進入馬來西亞時關員友善得多,兩個地方第一個感覺差太遠喇 ~~

過關係要落返一層嘅,前面呢班著制服的空姐正是我們剛才TZ221嘅機組人員喇 ~~

以下呢位就係幫我手寫呢篇遊記嘅阿豪喇,豪哥多謝你 !!  

團友們在等行李中 ~~

我地有8個人,坐兩部的士就啱啱好;唔好以為坐的士就好貴,如果有四個人坐的士同坐地鐵差唔多價錢,有時候仲會比坐地鐵更平,因為呢道既地鐵好貴下架 ~~

新加坡綠化做得好好,沿路兩旁都係樹 ~~

喺新加坡我地住喺一間青年旅舍,唔好以為hostel就係一定好簡陋呀,呢間hostel設備好豪華架,拍得住酒店架,係我住過最靚既青年旅舍 ~~

而咖喱妹我就係第一次住hostel咋,而且仲要係床位,這樣的體會對我黎講好有新鮮感呀 !!

Hostel大廳同公用地方好寬倘好靚,職員都親切好好人添 ~~

食早餐嘅地方 ~~

辦理好入住手續之後就首先上房安頓咗啲行李先,部升降機都好型吓 ~~ 

我地住嘅係6人房,呢道一晚大約$300港幣 (SGD45) 一個床位 ~~

張床又軟又大張,訓得好舒服, 所以覺得咁嘅價錢都值得比嘅~~

每張床位都有個私人密碼儲物櫃,我諗呢道唯一一個唔好既地方就係上格床冇欄杆,搞到我好驚會跌落地 ~~ yxh78

洗手間好乾淨;每間房都有獨立洗手間,而每層出面仲有三個公用洗手間,真係好多丫 ~~

房間出面仲有個露台仔添 ~~

放低行李休息咗一陣就出發去食午餐喇,由hostel出黎轉右直行大約10分鐘去到Outram Park地鐵站 ~~

第一次買地鐵飛時有小小問題想請教職員,不過入面個職員勁串又好似唔想答你咁款 ~~

坐一個站去到Tanjong Pagar落車 ~~

目的地就係前面既Maxwell Food Centre(斯威爾熟食中心)

呢道號稱「五大最佳熟食中心」之一,吸引咗好多人到來,遊客更加係必來 ~~

當中最出名就係”天天海南雞飯”,睇下條人龍就知有幾咁受歡迎,唔排返一個鐘都唔洗旨意有得食 ~~

得一個師傅負責斬雞,斬雞都斬到手軟啦 ~~

好多人都話呢檔海南雞飯好食,但之前屋企人食過又話唔掂,信邊個好呢?

等咗好耐隻雞終於出場喇,一食落口真係好滑好滑 !! 
不過我同朋友覺得呢隻雞係冇雞味,就好似食軟淋淋既冰鮮雞一樣,唔覺得有幾好食!同馬來西亞食既雞比較呢道差太多喇,有點名過於實;如果唔係見到自己食緊雞,只憑味道我諗我真係食唔出自己食緊乜呀……

其他野食就不過不失啦,我比較鐘意食芽菜,呢道既芽菜肥肥矮矮幾好食架 ~~

叫咗一隻半雞咁多食唔晒添!  食到飽飽之後就坐地鐵去下一個目的地Sentosa Island「聖淘沙島」 ~~

地鐵唔係直接去到聖淘沙,要先係Harbour Front站落車,呢道可以選擇行過去定坐Sentosa Express去;另外仲可以坐纜車過去,不過就好貴啦 ~~

我地想坐Sentosa Express所以就要上返幾層去L3 ~~

坐列車入島每位SG$4,坡幣$1大約係港幣$6.2,即係呢程車成25蚊港幣都唔算平架 ~~

排隊入站喇 !!!! 

聖淘沙島輕軌列車總共有四站 : 聖淘沙站(怡豐城)、濱海站(名勝世界飯店)、英澳比站(魚尾獅)、海灘站。 而喺島上啲列車係可以隨意坐唔收費嘅 ~~

我地就係坐呢啲小小既單軌列車喇 ~~

上咗車喇…….沿途望出去旁邊係貨櫃碼頭 ~~

其實都可以自駕或坐的士入島 ~~

亦都可以坐纜車 ~~

幾分鐘的車程就去到啦 ~~

第一個感覺係環境唔錯丫 ~~

聖淘沙島入面呢個環球影城係東南亞首個環球影城(Universal Studios ),影城佔地 20 公頃,共分 7 區,各有不同的主題,包括科幻城市、失落的世界、遙遠王國、古埃及、好萊塢、馬達加斯加和紐的主題不過可惜我地冇人有興趣入去玩 ~~

以下係蘿記一家5口 ~~

就連賭場我地都冇興趣入去 ~~

其實我地無入去賭場嘅原因有以下4個 :

(1) 同行有小朋友 (2) 著短褲不准入場 (3)我同蝦子餅無帶護照喺身,由於新加坡政府不鼓勵賭博,所以新加坡人如果要進入賭場,要繳交SGD 100, 一次可待24小時, 如果真的太愛賭的可以買年票 SGD 2000, 至於外國人只要帶護照就可以免費入場 (4)我們對賭錢興趣不大

繼續四圍行吓逛吓參觀吓 ~~

呢隻魚尾獅好得意丫 !!

呢隻都好可愛 ~~

不過真嘅呢隻我就唔係咁like啦 !!

今朝班飛機太早喇,太家都冇乜點訓過就出門口去機場,所以下午5點大家就先返去hostel休息一陣叉叉電先 ~~

呢程我地決定坐的士返去hostel,因為計過原來仲平過坐地鐵,而且又快又唔洗轉車兼唔洗行路,正呀!! 

的士搭到返酒店都只不過係坡幣SGD6.80,每人夾SGD1.70,證實咗仲平過我地搭地鐵呀 !!

休息咗2小時之後我地夜晚8點喺hostel旁邊既餐廳食晚飯,見到有唔少人專登揸車來呢道食飯,所以我諗呢間一定唔會差得去邊既,好彩喱姐已經訂好枱,咁就唔怕冇位啦 ~~

今晚仲有另一位住喺新加坡嘅香港朋友加入我地一齊食飯,叫咗超多好野食(太多好餸啦,冇影晒出來)!大家都話海鮮好正,可惜我唔食海鮮架,不過其他餸都係好正!而且今餐價錢唔係好貴,賣單SGD218,比起香港更抵食呢!

飯後我同喱姐坐地鐵去咗Clarke Quay站,遊覽克拉碼頭 、欣賞一下新加坡河的夜景;呢道夜晚五光十色多姿多采,一定好啱啲喜歡夜遊既朋友喇 ~~

有時間既話可以坐船遊覽,不過我地就冇坐啦 ~~

路過見到呢間新加坡好出名嘅”珍寶海鮮”,呢間就坐滿人喎…..我估佢一定貴好多喇 ~~

克拉碼頭有好多酒吧,環境氣氛都唔錯架!可惜我唔飲酒,如果唔係一定唔捨得走!

有機動遊戲可以玩噃 ~~

克拉碼頭咁豐富既夜生活都係唔適合我架喇,行左一圈之後我地就跳上咗架的士返hostel,總算係見識過新加坡夜晚嘅一面;琴晚冇訓過覺,依家最想就係跳上張床訓一個靚覺,呢張床咁舒服咁今晚當然會好好訓啦 !!

晚安啦!

onion-head100 onion-head100 onion-head100 onion-head100

 

Day 2 (18Aug2014)

訓到八點起身,好滿足 !!
Hostel早上好寧靜,其他住客仲未起身,而外面繁忙既街道已經車來車往,我諗大家都要趕住返工返學 ~~

Hostel有簡單早餐供應,多士﹑粟米片等等可以隨意享用,我都係第一次住hostel有早餐提供咋;雖然只係小小簡單既早餐,但有咁貼心既服務感覺特別開心 ~~

我仲要留肚出去食好野,所以只食左一片多士,好好味 ~~

放低背囊係hostel,然後就坐車出發搵食;原來新加坡的士係唔同車款唔同收費,部車新啲靚啲就會收貴少少,不過都係相差唔遠,但遇上大型房車就貴好多,都係坐普通的士實際一啲!

路過shopping嘅好地方烏節路,不過我地全部人對於買野都興趣不大,所以就唔洗來行呢條百貨公司和商店林立的街啦 ~~

的士話咁快就來到小印度喇 ~~

 

話明係小印度就當然好有印度特色;呢道有好多印度人居住,所以店鋪亦都係印度人經營,專門售賣印度相關既野;每次經過店鋪門外都會聞到一陣好香既香料味道,好特別!

有好多喺香港我未曾見過既野 ~~

用黎拜印度神嘅的花環 ~~

賣印度雜誌的攤檔 ~~

同小印度一街之隔就係新加坡既組屋(公屋),突然覺得有一種熟悉感覺,係唔係好似香港呢?

外面睇都估到橙色既建築係街市或者熟食中心,行過去見到果然冇估錯,呢道係新加坡另一個好出名既熟食中心Tekka Centre(竹腳中心) ~~

竹腳中心位於小印度,當然會有好多印度美食品嚐,我地因為多人所以就唔係熟食中心出面食,選擇咗一間座位多既印度餐廳,咁大家就可以舒舒服服坐埋一齊開餐啦 ~~

今餐大家都食得好開心,而且仲食過返尋味,下餐仲想食印度咖喱,咁就可以證明呢餐有幾好食啦,哈哈 ^^ 明天我地喺馬來西亞都會繼續食咖喱,而且仲平好多呢!

第一次品嚐印度美食,好期待 !!
選擇咗呢個印度拉餅Roti Prata(新加坡叫法)/Roti Canai(馬來西亞叫法),配合魚咖哩汁或者豆咖哩汁(Dal Curry)一齊食,好正架!真係又特別又好食既一餐!平時我都好鐘意食咖喱,呢餐正宗印度咖喱完全啱晒我口味,like x 100!

仲叫咗另一個印度烤餅Chapati試試,呢個烤餅係用米製造嘅,食落口有少少酸既感覺,味道好特別 ~~

我地仲有試咖喱魚﹑咖喱雞肉﹑乾咖喱羊肉(Rendang Mutton),呢啲咁正宗既印度菜喺香港唔係咁易可以食得到;而因為新加坡有大約10%人口係印度裔,所以有好多印度美食呢 ~~

享受完一個美味印度早餐之後就要開始今日嘅行程喇,竹腳中心旁邊就係小印度地鐵站,我地就一於坐地鐵向新加坡最著名既地標「魚尾獅」像出發 ~~

緣人,難得有靚女喺你後面呀, 唔該你正常啲啦 !!

坐地鐵到Raffles Place站,一出來就係新加坡河,環境好靚吖~~

呢區係商業區,有好多高樓大廈 ~~

一有靚女出現又輪到蘿記變得失常喇,呵呵呵…….. !!

喺河邊見到新加坡最吸引我地既甜品「雪糕三文治」呀 ~~

香港應該冇雪糕三文治卦?其實雪糕三文治好簡單咋,就係用兩塊餅乾夾住一舊厚雪糕,雪糕三文治就係咁完成咗喇 ~~

有好多唔同口味選擇,芒果&榴槤好似最受歡迎。 新加坡天氣咁熱,食雪糕三文治個人即刻清涼晒,而且我揀既芒果雪糕仲係好好食呢,我覺得來到新加坡一定要試下呢個 ~~

食完雪糕後沿河邊向前行,目的地係魚尾獅公園 ~~ 

新加坡河邊環境ok靚架 ~~

過埋呢條馬路就到達目的地喇 ~~

來到新加坡最著名地標「魚尾獅像」,身為遊客當然要來影返張相啦 !!

講真呢道真係冇咩特別,純粹到此一遊,唔來呢道就好似冇來過新加坡一樣 ~~ 

星馬之行團友大合照, 哈哈…….!!

對岸既Marina Bay Sands Hotel ~~ 

世界最大摩天輪Singapore Flyer ~~

話咁快到此一遊完畢,沿河邊行返去地鐵站,坐地鐵再去最後一個位於Chinatown站的新加坡景點「牛車水」~~


地鐵站一出到來就人山人海,呢道都係遊客必來既其中一個地方~~

我地都喺度換咗啲新加坡幣 ~~

不過我地冇入商場,而係過馬路去咗對面既商店街逛逛 ~~

牛車水是早期中國人移居新加坡的聚居地,亦是當地著名的唐人街。「牛車水」呢個名字的由來係因為早期當地居民每天都用牛車來運載用水,久而久之,該地便取其名為「牛車水」。這裏保留了豐富的華人歷史和文化,到處都是傳統店屋、中菜館和廟宇 ~~

在牛車水的小巷中,可以看到各式各樣傳統的手工藝品,如書法、雕刻、木偶、佛像等 ~~

呢道係遊客買手信買記念品既好地方,我都有幫襯買postcard ~~ 

新加坡其中一樣出名既手信就係藥油,差唔多每個到新加坡既人或多或少都會買啲走,見同行朋友十樽十樽買咁誇張,我都唔執輸見佢地話好就買左兩樽返屋企,係唔係咁有效就唔知啦因為仲未用,前幾個月媽媽係新加坡都買到返來仲未用晒,哈哈^^

除咗買藥油之外大家都對shopping冇太大興趣,所以又到咗搵食時間喇,行去牛車水美食街Smith Street找尋美食縱影 ~~

牛車水的 Smith Street 更是一條露天美食街,你可以在這裏品嚐地道新加坡小食 ~~

有天幕就唔怕落雨啦!不過就擋唔到太陽,好多位置都好曬 ~~

呢道都有好多野食選擇 ~~

其實我地今次星馬之旅最主要既目的係到馬來西亞食榴槤,大家都係為咗榴槤而黎架,所以我地決定留肚唔食咁多野住,等今晚開榴槤大餐!最後我地就食呢個刨冰當午餐,哈哈 !!

熱辣辣既時候食刨冰簡直透心涼呀 !!
呢碗刨冰味道ok啦,不過就冇之後喺馬六甲嗰碗咁好食,作為消暑甜品食刨冰好正架 ~~

又再見到啲組屋喇 ,住呢區啲居民超方便呀 ~~

食完之後就打道回hostel攞行李準備過境去馬來西亞新山,我地既新加坡之旅亦都接近尾聲喇…….回程經過見到條街掛咗啲好靚嘅中秋花燈 ~~

拎好行李就向馬來西亞出發喇…….!!


原本計劃係先坐地鐵,再轉巴士去Woodlands過關,但諗落坐的士都係差唔多錢,而且唔需要又上又落,仲慳唔少時間,所以我地就搭的士去Woodlands啦;呢個時間比較少的士經過,hostel一位姨姨好好人咁幫我地叫的士,佢仲好好傾架,我地好鐘意呢間hostel ~~

大約半個鐘的車程就去到Woodlands關口 ~~

如果唔係坐的士,就要喺地鐵站轉呢啲巴士來,都幾轉接 ~~

Woodlands可以坐巴士,亦都可以坐火車過關,由呢道上火車可以去到吉隆坡、檳城等等地方,有機會既話我都想試試坐火車由一個國家去另一個國家,好有週遊列國嘅感覺 ~~

我見到火車啦 !!

我地去新山就唔需要坐火車,坐巴士就可以,前面就係離境大堂,準備離開新加坡喇…….

過關之後就坐巴士過海,對岸就係馬來西亞的新山喇 ~~

就係呢部巴士帶我地來到馬來西亞,車費SGD$1;而家我地已經企喺馬來西亞國土之上,正式開始我地既馬拉之旅喇 !! 

新加坡再見!後會有期!

onion-head19 onion-head19 onion-head19

 

 

新加坡馬拉南部5天自駕遊【PART 2 – 新山、馬六甲篇 】