【檳城】4天地道美食遊「美食資料和照片分享」

 

這一輯小遊記只能夠算是我一個小小的檳城美食資料和旅遊照片分享吧了,亦是我一貫的風格「多圖少字」,希望有緣看到這一輯小遊記的朋友們不會太失望啦….monkeys23

話說9月初嘅時候見香港快運機票做特價而我又咁啱有4日假期,所以就邀請咗我2位好朋友同我一齊去檳城hea吓食吓啲地道美食咁囉....今次我地一行4人,Roy、 Leo、蝦子餅同我,而行程方面我基本上只安排咗一啲我未去過嘅地方。  其實檳城我以前同屋企人已經去過多次,不過每次同屋企人自駕遊都只係主要去食嘢同留喺沙灘渡假酒店玩,完全無去啲旅遊景點遊覽過,所以今次趁有機會我想去行吓一啲我未去過嘅地方 ~~

以下係今次檳城4天地道美食遊的行程與簡介: 

 

Day 1  

– 香港直飛檳城 

 – New Lane食街

 – 檳城的小上海區Nagore Road  

 

Day 2  

– Lorong Selamat食早餐 

 – 去尋找檳城街頭的藝術壁畫系列(Street Art) 

 – 康乃馨肉骨茶 

 – 前往姓周橋Chew Jetty水上棚屋 

 – 汕頭街Kimberly Street   

 

Day 3 

– 印度薄餅早餐 

 – 參觀相機博物館Camera Museum

 – Perut Rumah娘惹菜 

 – Batu Ferringhi峇都丁宜海灘 

 – Gurney Drive 新關仔角大排檔   

 

Day 4  

– Ghee Hiang義香買手信 

 – Gurney Paragon Mall 

 – 緬甸廟 

 – Teluk Kumbar公巴海灣 

 – 檳城飛回香港 

 

Day 1 (12Sep2014 Friday) —

我地今次乘搭香港快運(Hong Kong Express) UO747班機前往檳城,亦都係我地4人第一次乘搭香港快運,因為佢當時做特價,來回機票連稅都只不過係港幣$877,好抵呀 !! 

下午1430我地一行上條登機樓梯時,咁啱見到個機長望過黎,立即同佢打個招呼先,然後佢仲好識做咁擺番個甫士俾我影相添呀,嘻嘻……!!

 Free Monkey Emoticons Part2

一見到隻飛機時俾我嘅第一個感覺係 “乜咁鬼新淨嘅 !!”

架A320飛機嘅引擎望落都好新淨,個機身新到連Hong Kong Express個logo都未噴上去,真係白雪雪的一架新機喎 ~~ 

一踏入機艙仲聞到一陣陣嘅新皮味,莫非係真皮座椅咁正 ?? yxh54

Roy旁邊仲坐咗個長髮美女添,唔怪之得佢個樣咁風騷啦,哈哈!!

仲有靚女空姐為乘客們做安全示範呀 !! yxh63

班機唔滿,我地每個人都可以自己坐晒一排3個位,爽呀!!yxh56

下午1515準時起飛,旁晚1830天黑之前抵達檳城,開始降落檳城嘅時候由飛機影到嘅窗外景觀 ~~

落機嘅時候個天色已經開始黑喇 ~~

因為想節省時間而且我地有4人坐一架的士啱啱好,所以由機場直接搭的士去酒店就快、靚、正 !!

一出到機場之後右轉,就會見到售賣的士票的櫃枱,只需話俾職員知道個目的地同乘搭人數 ,然後俾錢之後就排隊上的士 ~~

呢程的士係馬幣RM44.70,半個鐘嘅車程我地就到咗檳城喬治市喇 ~~

今次我地主要玩檳城喬治市(Penang George Town) 。喬治市具有非常豐富的人文色彩,包括留存著濃厚的華人文化,檳城與馬六甲這二個地方同樣於2008年7月7日被聯合國教科文組織列為世界文化遺產,而且出名多地道小食,所以個人覺得非常值得一遊 ~~

以下係我地今次檳城之行入住嘅小型酒店Heliconia Hotel~~

酒店大堂~~

雙人房,港幣330一晚,酒店房雖然細小,但位置好方便,步行 5分鐘可到達食街。附近有好多食肆和便利店,酒店距離Komtar光大巴士總站亦都係15分鐘左右的路程 ~~

我覺得不足之處係佢個洗手間,玻璃浴屏中間係少咗個門嘅,所以一沖完涼之後整個浴室/洗手間好似水浸咁 ~~

安頓好啲行李之後我地就馬上出發去New Lane覓食,由酒店門口轉左直行5分鐘就係夜晚非常熱鬧同好多地道美食嘅New Lane大排檔食街喇 ~~

我地喺檳城的第一餐我地試咗燒雞翼、

蝦麵、

大蝦蟹肉炒貴刁、

沙爹串燒、

白咖喱麵、

金香炒啦啦(蜆)、

燒魔鬼魚、

蠔仔煎、

同埋桔仔酸梅,簡直好味到無朋友呀~~yxh75

食飽之後我地行咗去檳城的小上海區Nagore Road閒逛,睇吓啲檳城舊建築 ~~

呢一區夜晚著咗燈都幾靚吓,而且又有好多間裝修得幾有特色嘅餐廳 ~~

我覺得個走廊啲地磚保存得好好,啲花紋靚得黎又好有味道 ~~ 

啲門鉸都好特別 ~~

路經一間懷舊茶室,佢地又試咗碗水餃同小雲吞 ~~

然後就返酒店好好休息,準備迎接明天嘅單車之旅喇~~Monkey Emoticons

 

Day 2 (13/9 星期六) —

昨晚取房時個天已黑所以未睇得清楚窗外嘅景觀,一早起身再望出去睇吓酒店周圍嘅環境先 ~~

以下呢座圓柱形嘅大廈就係George Town嘅地標光大大廈(Komtar)~~

檳城有好多舊建築嘅外牆都翻新成五顏六色咁,好搶眼,而呢個紫色我二嫂好喜歡,所以影低俾佢睇 ~~

早上9點半我地出發行去Lorong Selamat食早餐,呢間「興發茶室」的炒貴刁好有名氣㗎,可惜佢未開檔所以我地幫襯咗隔離嗰間 ~~

喺檳城去呢啲舊式茶室先至會食到最地道最正宗嘅粉麵和小食㗎  ~~ yxh86

福建蝦麵

粿條湯

炒貴刁

再加杯冰凍涼茶和凍咖啡 (當地嘅叫法係kopi冰),咁個早餐就好完美喇...!!

然後就係今日主要嘅行程 —  【踩單車尋找檳城街頭壁畫 & 鐵線畫的藝術之旅】,酒店門口轉右行10分鐘去到Jalan Burma,然後再轉左就會搵到出租單車的舖頭 ~~

每部單車日租RM20,夜晚7點之前還車,不過唔算有太多單車款式選擇 ~~

試車中!!yxh94

今日我們尋找檳城街頭壁畫和鐵線畫的路線係從情人巷(Love Lane)開始,姓周橋(Chew Jetty)作結,路上只要你細心留意的話,就會喺啲大街小巷之中見到以下呢啲富有特色嘅壁畫和鐵線畫。其實只要用心發掘,能搵到嘅壁畫可能會更加多㗎 ~~

無乜方向感而又係路痴一名嘅我,就算開住手機一路跟住Google Map去踩都會迷路囉,以免大家再次中伏,所以決定將帶路呢個咁重要嘅任務交俾Roy喇 ~~ yxh55

前往愛情巷(Love Lane)的途中,我地首先經過Armenian Street ~~

以下係我地今日見到嘅第一幅牆壁鐵線畫 ~~

踩吓踩吓終於到咗Love Lane喇 ~~

Love Lane是一條長不過一里的小巷,據說是因為呢道曾經係水手下船後尋覓速食愛情的地方,因而得名。這條小巷充滿濃郁的南洋風情,同樣都係背包客嘅天堂,因為呢道有好幾間好有特色的娘惹客棧~~

白色衫嗰個就係我喇 ~~ Monkey Emoticons

我地有幸獲得其中一間娘惹客棧「柚樂園」嘅老闆同意所以入咗裡面參觀一下 ~~

裡面啲擺設,傢俬全部都古色古香,喜歡懷舊嘅朋友入住呢啲客棧就一定啱晒佢地口味喇 ~~

檳城其實有好多間寺廟,以下只係我地路過嘅其中一間~~

聖佐治教堂 (St. George Church)

然後繼續穿插在George Town嘅大街小巷中搵唔同嘅街頭壁畫 & 鐵線畫,以下條巷叫做”豬肉巷” ?? yxh46

下一站我地黎到姓周橋 (Chew Jetty),姓氏橋坐落在檳城東北部海邊,如果你乘搭渡輪前來檳城的話,抵達檳城的碼頭之後,向左轉就看到姓氏橋在你的眼前了 ~~

水上木屋的淳樸生活 ~~

再向前繼續行就係姓陳橋 (Tan Jetty), 姓林橋 (Lim Jetty) 等……..旅遊書一般都只介紹姓周橋,不過我反而覺得姓陳橋更加寧靜更加美,而且商業味道無咁重添 ~~

一條長長的木橋配上一間水上高腳紅屋仔,再加上個靚靚海景簡直係配櫬得天衣無縫呀 ~~yxh06

最攪笑係呢個露天廁所呀, 正嗎?? yxh58

好特別嘅義務消防車,大開眼界呀!!

然後我地沿著Jalan Sultan Ahmad Shah一直踩到去Gurney Drive食晏~~

今日選咗呢間檳城朋友推介的「康乃馨肉骨茶」地址﹕63, Gurney Drive, 10250 Penang(Evergreen Laurel Hotel 旁)

營業時間﹕早上7:30至下午2:30

不過我地下午3點先去到,眼見嗰老闆已經準備收檔中,所以唯有叫佢做埋我地最後一單生意先收檔啦 ~~

4人份量的一大煲肉骨茶 都幾多料喎,而檳城同吉隆坡或巴生的肉骨茶唔一樣風味, 但都一樣有好濃嘅藥材味, 唔錯喎 ~~ 

又叫啲其它小食,包括Lobak (炸蝦餅 五香肉卷 炸魚餅等….)

薑葱炒蜆

油菜

檳城喇沙 (亞參喇沙)

椰青,仲有每日都飲嘅 “桔仔酸梅” yxh77

食飽之後我地往Kimberley Street嘅方向踩去 ~~

途中會經過一個專賣土產同手信嘅市場 “Pasar Chowrasta”, 呢個市場一定啱晒想買手信返香港嘅朋友喇 ~~

既然踩到呢區就順便去Penang Road食番碗檳城最出名嘅珍多冰 (Cendol) 啦 ~~

呢碗cendol有好香嘅椰糖、椰汁再加上軟綿綿嘅刨冰,一食落去簡直係透心涼呀 !! yxh81

下午4點我地又再繼續今日嘅行程,前往亞美尼安街(Armenian Street)之前先經過位於Chulia Street的椰腳街清真寺(Kapitan Keling Mosque),喬治市最大且最古老的清真寺, 建於1801年~~

Armenian Street這條街都好熱鬧,兩邊有好多小攤檔,無論衣物 、手工藝品、 餐廳、 咖啡店、 小食店都一應俱全 ~~

仲有一間 “貓咪主題咖啡屋”添,愛貓人士一定唔好錯過喇 ~~

不過我地係為咗尋找其它幾幅街頭壁畫 & 鐵線畫而黎Armenian Street嘅 , 嘻嘻…..!!

呢幅貓捉老鼠壁畫我覺得好有趣呀 !!

大家睇吓Roy幾咁受當地啲回教馬拉妹歡迎 ,有圖有真相呀,呵呵呵……!! Monkey Emoticons

乜街邊個環保垃圾桶咁靚嘅 !!

以下係今日最後嘅景點「張弼士故居」 ,又稱「藍屋」,係中國清朝末期富商的故居 ,它獲得聯合國教科文組織亞太區文物古跡保護獎 ~~

而今日最後搵到嘅壁畫應該係下面呢幅最近才新畫㗎喇 ,就位於我地住嘅酒店正對面,剛好結束今日踩單車尋找檳城街頭壁畫 & 鐵線畫(Street Art)的藝術之旅,好嘢 !!!

晚上7點還完單車返到酒店驚覺原來今日喺烈日當空之下踩咗8小時之後我地啲手手腳腳係會變成咁樣兩節色㗎….真誇張呀!! yxh28

返上房間梳洗一輪之後又出發去搵嘢食喇 ~~ yxh91

由酒店行返去Jalan Burma,然後轉右就會先經過嘅 “亞洲相機博物館” ~~

過咗馬路之後,轉左入去檳榔律中段的汕頭街(Kimberly Street),著名嘅當地潮洲傳統小吃例如 :鴨粥粿汁、杏人茶、炒粿條、粿條湯就喺晒呢條食街喇~~

而今晚要試嘅係「權記鴨粥粿汁專賣店」 嘅粿汁, 味道好似鹵水鴨,不過啲粿汁口感好特別, 滑得黎又有啲彈牙~~

橙色嗰杯係紅蘿蔔加鮮奶嘅地道飲品,聽落好怪咁,但我覺得好飲喎~~

 

Day 3 (14Sep2015) —

今早嘅早餐係我好鍾意嘅地道印度薄餅 (Roti Canai) 配咖喱雞,既然Leo未試過就一於同佢去試吓啦,結果大家都話好好味又抵食 ~~

煎得香脆嘅Roti Canai ~~

配咖喱雞一齊食就無得頂喇~~

昨天踩咗一日單車, 今日又試吓搭巴士遊檳城先 ,以下的網址係檳城中心地區免費穿梭巴士服務和路線資料 :

http://www.penang-traveltips.com/cat.htm

http://www.penang-traveltips.com/sightseeing-with-cat-free-shuttle-bus.htm

我地行去Komtar 巴士總站等CAT 免費穿梭巴士~~

呢張相我覺得好攪笑囉 , 呢兩個巴打好似約好咗一齊著藍色格仔短褲襯淺黃色T-shirt咁 ,簡直情侶裝一樣, 連表情都咁夾 , 想笑死人咩 !!! 

 

搭到去到尾站碼頭落車 ,再慢慢行過去位於 Muntri Street嘅相機博物館~~

這是全馬首家,也是東南亞第一家相機博物館~~

由7名創意無限的年輕人合力創辦起來,展出近300台各式各樣的古董相機,讓大家更瞭解早在十六世紀就於歐洲萌芽的相機,這一路走來的變化與歷史由來~~

博物館內除了有來自歐美日本等國家生產的古董相機外,還有日本為二戰而特別設計的戰爭相機、007占士邦電影裡常見的間諜微型相機、珍藏版的玩具相機,以及各種古董級相機的零件和配件等,都可在這相機博物館內一覽無遺~~

在這戰前雙層老屋打造出來的相機博物館裡,除了參觀二樓的古董相機需要購買入門票外,樓下的紀念品販賣部、咖啡廳,以及活動展覽廳都是免費進入的~~

樓上收費參觀的相機博物館目前有近三百台古董相機、珍藏版玩具相機,以及古老相機器材配件等。此外,在二樓的走廊上,也有相關的相機歷史解說,讓大家可以進一步瞭解相機一路走來的變化。不過大家無太大興趣所以無買門票上去參觀二樓展覽館~~

鏡頭杯都幾得意,買黎做手信都應該會啱啲相機迷啩!!

一出門口見落雨所以就截咗部的士去一早訂咗位嘅Perut Rumah娘惹餐廳食娘惹菜 ,如果餐前沒有預約,好大可能會滿座㗎~~

Adress : 17, Jalan Kelawei , Penang

Tel : 04-2279917

Opening Hours : Daily 11am-3pm, 6pm – 10pm

檳城有許多英國殖民時期留下的老洋房,這家娘惹餐廳的建築物保留了原來的英式洋房輪廓,又中和了華人建築的古式風格,內裡卻是一間娘惹廚具博物館呢!!

咁到底乜嘢係娘惹呀?? 其實峇峇娘惹係指十五世紀初期定居在馬六甲的中國明朝移民後裔,亦包括少數在唐宋時期定居此地的唐人。 男性稱為峇峇,女性稱為娘惹,大部分的原籍是福建或廣東潮州地區,小部分係廣府和客家籍,很多都與馬來人混血,但峇峇文化具有中國傳統文化色彩,服飾則是從明代的漢服演變而成的「Kebaya」,而語言稱為峇峇話~~

店裡頭有許多中國生活用品的古董收藏 ,舊式圓桌、雕花餐具等……..

娘惹菜的烹調方式以煎炸和酸辣咖喱為主,用上多種地道香料入饌,如南薑、香茅、亞參膏、斑蘭葉等。以下脆脆的Pai Tee米餅皮裡頭包著炒到熟透的白蘿蔔絲和香料,好味!!

娘惹咖喱雞 (Chicken Kapitan)

娘惹式洋葱豬肉

這飯的味道因為充滿香草所以好特別~~

參峇羊角豆 (秋葵)

仲有馬拉盞炒通菜和炒芽菜,喺咁有特色嘅娘惹餐廳用餐又試咗咁多樣菜式連甜品 ,賣單才不過RM140 ,一啲都唔貴喎!!

最鍾意係呢碗娘惹渣渣糖水,好好好味呀!!

不過呢杯豆寇冰嘅味道好怪~~yxh07

然後我地喺Gurney Paragon Mall 門口搭公共巴士(Penang Rapid bus) 101號 to Batu Ferringhi Plaza, 車票RM2 ~~

去呢道嘅目的係想做馬殺雞(massage), 反正下晝天氣咁熱最好係搵個冷氣地方嘆一下啦 , 咁先係hea遊嘛….嘻嘻!!

呢間Zen嘅全身按摩價錢係RM125 (90分鐘) 其實都幾貴吓,不過手勢都算唔錯, 按得好舒服~~

ZEN Reflexology & Wellness Center http://zen-wellness-spa.com

按完剛好係傍晚時分 ,最好就係去海邊散吓步吹吓海風喇~~

今日天氣麻麻地 , 無乜太陽 , 就連香港今日都掛緊一號颱風戒備訊號~~

見到好多遊客玩得好開心呀!!yxh55

呢道因為係遊客區所以都有好多靚餐廳係附近 ~~

而呢間船餐廳( The Ship)都算係Batu Ferringhi海灘區嘅地標喇 ~~

但係我地始終想食嘅係地道嘢 , 所以揀咗大排檔 「金河煮炒」~~

晚餐叫咗幾碟普通嘅小菜加炒粉就已經好啱我地口味喇,賣單才RM76 (大約港幣190),好平呀 !!

返酒店之前再專程去位於Gurney Drive嘅呢間 「松花江餐室」試吓我一位同事極力推介嘅燒雞翼~~

椰青好香甜 + 燒雞翼果然好好味喎~~

終於晚上10點半飽到捧住個肚返酒店去做豬喇!! onion-head24

 

Day 4 (5SEP2015) —

因為Roy今早好想試吓New Lane嘅豬什粥 , 所以早上 10點我地首先一齊行去Macalister Road嘅義香(Ghee Hiang)買手信 , 然後等到11點半鐘豬什粥開檔我地先再去食~~

義香嘅小豆沙餅裡面其實係鹹鹹地甜甜地嘅綠豆蓉,我去親檳城都會買,因為我自己同好朋友都鍾意食,做手信就啱晒喇,我屋企用開嘅蔴油都係義香嘅出品黎㗎~~

11點半鐘我地就返酒店退房先,然後拎埋啲背囊同少量手提行李一齊去食晏,而豬什粥都剛好開檔喇~~

佢話同香港嘅粥唔一樣,豬腸係炸過所以口感係脆嘅,粥底又好好味喎,等我下次去都試吓先~~

檳城喇沙

依然都係桔仔酸梅,可想而知我地有幾愛飲佢啦~~  onion-head16

食飽之後我地搭咗的士去Gurney Drive 的Paragon Mall,不過唔係去濕平而係去睇戲喎,咁嘅行程都夠晒hea喇啩?

值得我極力推薦嘅係位於Paragon Mall地庫嘅呢間榴槤泡夫專賣店,喜歡食榴槤嘅朋友一定要試吓呀~~

唔食榴槤的話就可以試吓呢個意大利gelato手工雪條~~

點解會去檳城嘅戲院睇戲?因為平過喺香港戲院睇戲好多囉,情侶雙人梳化座位都只係RM12一張戲飛咋,而且啲座位仲比香港一般啲戲院嘅座位闊啲同舒服啲㗎 ~~

睇完戲之後見仲有啲時間,所以就行咗去位於檳城緬甸巷Brumah Lane裡嘅緬佛寺(Dhammikarama Burmese Temple),緬佛寺係於公元1803在檳城建立的第一間佛教寺廟~

然後5:30pm我地就搭102號機場巴士先去檳城機場,車票每人RM3.40

辦理好登機手續取咗登機證之後就可以趁未上機之前爭取時間去公巴海灣食海鮮。由機場搭的士出發,沿着Teluk Kumbar的路牌,穿越了小小的甘榜(鄉村),大約30分鐘的車程我地於晚上7:15pm就到達公巴海灣喇~~

「公巴好友海鲜」係一間座落於海灘上嘅海鮮大排檔,日落時分喺道食晚飯都幾好feel嘅,RM138食咁多樣菜都算好抵食,不過我就覺得啲海鮮唔係太新鮮~~

地址:84, Mk 9, Teluk Kumbar,11920 Pulau Pinang 营業時間:5.30pm ~ 10pm ( 星期二休息)

不過值得一讚嘅係個老闆知道我地趕時間上機,所以代為安排私家車載我地返機場,私家車收費RM20~~

我地乘搭嘅香港快運UO 0748係晚上2120開出,但係其實九月十五日嗰日我地全日都擔心緊唔知可唔可以預期返到香港。因為當日香港正在打緊颱風,下午12時40分已經發出三號強風信號,當時強風「海鷗」位於香港之東南偏南約510公里。由於海鷗繼續移近華南沿岸,天文台於晚上10時30分發出八號東南烈風或暴風信號,而我地班機係預計16號凌晨0130到達香港。而海鷗於9月16號凌晨時分係最接近香港喎,所以是否可以安全著陸香港或者需要轉飛其它機場都係未知之數囉~~

起飛時拍攝到嘅檳城大橋~~

我地都做好心理準備可能會轉飛同降落係其它鄰近嘅機場,例如台北或馬尼拉機場,亦都準備好降落之前架飛機可能會拋到好似坐緊過山車咁....不過好好彩班機喺凌晨1點53分安全地降落喺香港機場,都算係有驚無險啦!! 

可惜返到香港之後所有公共交通工具都因為8號風球已停駛,包括巴士、機場快線同的士,所以我地唯有喺機場坐到早上6點再搭第一班機場快線返屋企啦!雖然喺機場呆坐咗成晚,但我覺得總好過滯留喺其它地方啦,8號風球之下都可以安全地順利地返到香港我已經感覺非常之幸運同感恩喇~~ 

onion-head19

 

(全篇完)

 

今次檳城之行每人嘅全程洗費(港幣):

香港快運來回機票連稅:$877

3晩酒店雙人房:$495

一日單車租金:$50

全身按摩:$312

其它費用(食&交通):$688

合共$2422

 

 

 

 

24 thoughts on “【檳城】4天地道美食遊「美食資料和照片分享」

  1. 做第一個支持先~~ 睇完你隻油雞我覺得自己好似冇去過檳城咁…@.@ 原來檳城仲有咁多好野玩~~ 睇到D美食相又流哂口水…T.T
    下次我同屋企人去檳城又可以抄考你既精彩油雞~~ 多謝哂~~ hehehe~~

    • 今次輪到美少女咁快手第一個留言支持我,叻叻豬呀,釘橋!
      希望我呢隻小油雞可以幫到你手計劃你明年的檳城之旅啦 ~ (^◇^)

  2. 地方對我來講,好陌生但有新鮮感覺,環境,我好鍾意,牆壁畫好靚,地方亦好靚,食物相影得好吸引,仲有棟紫色樓係我最鍾意顏色黎,踩住單車周圍去真好寫意.多謝喱姐咁好地方.

    • 多謝你的留言呀!
      其實紫色我都好鍾意,不過如果係建築物我就喜歡白色多一啲。
      Erica你下次都可以試下去旅行時踩單車周圍去遊覽,真係好寫意架!

  3. 第一餐就食燒雞翼,最開心一定係Roy BB啦 😀
    今次又係好好好多好野食bor~
    蝦麵喇沙我都有食,不過都唔岩食@@
    貴刁cendol呢啲就岩我食啦 😀
    姓陳橋我都有去丫,個時一天光就去仲更加寧靜,哈哈~
    不過情人巷係呃人既,又冇情人又冇速食愛情…
    $2422就可以玩咁多日食咁多好野,又玩得咁開心,超值丫 😀

  4. 看完這篇油雞,簡直就是虐待一個還未吃晚飯的我,咖喱批姐姐除了拍風景有一手外,替食物拍遺照都有一手呢,這旅程非常便宜,我窮遊花的錢比咖喱姐姐更多,希望有一日可以去檳城走走,咖喱批姐姐的遊記現在只能在這裡看真是可惜,不過香討就算罷了,我也不會去貼油雞。

  5. Penang is a nice place to travel but also MUST really becareful with the security.. Specially don’t bring hand beg..

    • Thanks JunJun for your kind advise! But actually I’m a Malaysian and my hometown is in KL, so I do know how bad the safety and security is in Malaysia, but frankly speaking, the security standard is much better in Penang if compared to KL.

  6. 嘩!好豐富的行程呀。
    食物好多好地道,有得踩單車,行沙灘,行博物館,
    又有好有特式的壁畫。
    咖哩,睇完妳這篇遊記,令我好期待我們六月份的檳城遊呀。
    咦!是否已過了榴槤季節,見唔到妳食榴槤嘅?

    • 我深信你哋六月的檳城之行一定會食得好豐富兼且玩得好開心架!

      我九月去嘅時候已經係榴槤季尾了,不過主要原因係佢哋三個都完全唔食榴槤嘅,所以如果叫我一個人自己食榴槤,我覺得好冇癮囉!

Leave a Reply

Your email address will not be published. Required fields are marked *