新加坡馬拉南部5天自駕遊【PART 2 – 新山、馬六甲篇 】

由新加坡過橋,唔洗幾分鐘已經到達馬來西亞新山喇 !! yxh56

新加坡同新山距離就好似香港同深圳,大家都係一橋之隔非常近,所以好多到新加坡玩既遊人都會順路到新山走走,不過我地就特別啲係調轉,因為到馬來西亞所以先順路到新加坡玩吓。 在新山入咗馬來西亞境之後,落到地下就係一個好大既巴士總站JB Sentral,可以搵到前往酒店既巴士Causway Link bus S1,車票每人RM1.50 ~~

前面就係今晚住既酒店KSL Hotel & Resort,酒店下面係一個大商場,買嘢食嘢都好方便~~

 

去到酒店就要兵分兩路,一方面要係酒店拎房,另一方面要趕在租車公司關門之前去到攞車~~

而緣人同蘿記亦都順利喺租車公司拎到車,呢部又新又舒服既Hyundai Grand Starex8人車將會陪住我地之後嘅四日旅程 ~~

返酒店接埋我地其他人後首先去到位於海邊既新荔園( Danga Bay),呢道係睇日落同食海鮮既好地方~~

但我都唔食海鮮而蘿記又唔太喜歡食海鮮,所以大家唯有只係來呢道睇日落囉 ~~

由呢道望過去對面海就係新加坡喇~~

但今日多雲所以與日落無緣喇….. 唔緊要啦,有機會再睇過吖 !!

離開新荔園,去搵地方食我地喺馬來西亞嘅第一餐;好多人都話新山呢道治安唔好,而我地又拎住太多貴重野暫時都唔敢隨便周街行搵嘢食,所以去咗一個大商場City Square,商場入面感覺比較安全而且有好多餐廳選擇 ~~

我地揀咗「龍的傳人」,呢餐好好食而且比起新加坡啲嘢食平好多好多~~

食飽就返酒店喇 ~~

今晚酒店的房間都算大,只係衛生做得麻麻地,洗手間有異味,wifi訊號弱,而且我地訂4間房,只有一間房嘅保險箱無壞而操作正常 ~~

喱姐選擇酒店好細心,選呢間酒店其中一個原因係今晚酒店對出會有一個一星期一次既夜市(pasar malam);但萬萬都估唔到大約九點半返到酒店既時候夜市已經完結啦!大家都以為夜市會好似吉隆坡的夜市咁一般會開到半夜,但新山呢道夜市實在太早太早結束!去到時已人去樓空!我地好好彩係榴槤檔走之前趕到,成功買到最後五個榴槤 ~~

呢啲蘇丹榴槤細細個好得意,而且好好食!! 今次大家成團起因就係因為榴槤,今日終於可以品嚐到正宗馬來西亞榴槤啦,好好好食!!

食完五個小榴槤大家當然唔會咁易滿足啦,再四出找尋榴槤,好彩喺酒店另一邊發現到一個小小榴槤攤檔,而且係賣更靚既名種榴槤!

榴槤大大個好肥美,而且全部都係名種;從榴槤釘上可以分到唔同品種,有啲釘大粒啲有啲釘細粒啲~~

見到都覺得好食 onion-head68最後食咗一個貓山王,一個甜黑刺,一個苦黑刺;唔洗講都知道馬來西亞榴槤比起香港買到既榴槤好食好多好多啦,唔知點形容好,去食過就會知道嗰分別架喇。今晚食咗咁多個榴槤食到我食唔落咁滯,哈哈!!

食到咁飽最好就係返上房休息啦 ,嘻嘻….!!

onion-head100 onion-head100 onion-head100

 

Day 3 (19Aug2014) —

我在馬來西亞嘅第一個早上,要食個靚早餐先得,酒店樓下有好多餐廳選擇,不過難得去到馬來西亞緊係食啲特色嘢啦,所以就唔喺餐廳食,出去搵地道嘢食 ~~

去到酒店旁邊嘅大排檔,食一個地道早餐先 !!

蝦麵 ~~ 

我第一次食白咖哩麵,呢個白咖哩麵第一啖食落去比想像中淡左少少,原來要加多啲醬落去先有味道嘅!!

喱姐大力推薦既枯仔酸梅,呢個真係好好飲~~

品嚐完一個地道馬來西亞早餐,可以出發喇,go go go !!!

由新山市區去Hello Hitty Town有一段距離,車程差唔多一個鐘 ~~

呢張Touch n Go充值咭方便每次俾路費只需要啪一啪張咭就會自動扣錢 ~~

路邊見到一部Hello Hitty車,啱晒今日嘅主題,而家就出發去Hello Hitty Town喇,Yeah!

新山最出名最多人去既地方應該係Legoland,可惜我地唔會去Legoland啦,反而揀去Hello Kitty Town,夠晒低B,哈哈!

Hello Hitty Town就隱藏係呢座大廈之內~~

咁多卡通好易就可以搵到個入口啦 ~~

門口有間Hello Hitty Cafe ~~

入口處周圍都係Sanrio卡通~~

門票RM75一位算唔算貴呢?(1RM大約係2.5HKD)不過呢道馬來西亞人入場係平過旅客,唔似得係香港做旅客係著數過自己香港人嘅 ~~

入埸時會獲派一張遊戲卡,方便玩遊戲用~~

主場門口

入到來全部嘢都係同Hello Kitty有關嘅 ~~

好多人排隊等住同Kitty影相 ~~

排隊嘅人包括喱姐同我 ~~

唔同地方都可以發現Kitty嘅縱影 ~~

 

入面有一間好靚既Kitty屋(我唔記得入去所以要借用喱姐二嫂影既相)

我同喱姐2人玩咗個叫Hello Kitty Black Wonder既遊戲;08年時呢個遊戲都有來過香港,當年我都有去玩過,而家又可以玩多次啦!!

遊戲要拎住盞燈,目標係從Kuromi手上拯救Hello Kitty & Dear Daniel

首先經過一個小迷宮,當年係香港全個遊戲都唔比影相,呢道點影都得,要影返夠本先 ~~

迷宮之後就見到Kitty & Daniel喇~~

我地要喺唔同地方搵出屬於自己圖案既字母出來~~

搵齊五個字母就可以估到拯救Hello Kitty and Dear Daniel的密碼,咁個遊戲就成功完成咗喇 !!

我地嘅遊戲證書,清楚寫住今次的密碼 “MAGIC” ~~

Melody都同遊客影緊相噃 ~~

如果預啱表演時間就正啦,可惜我地預唔到表演時間所以冇得睇 ~~

入面仲有其他野玩,不過我地唔想蘿記佢地等得太耐所以玩唔晒所有野,好快就要離開咗;出口必需先經過Hello Kitty商店,全部商品都係Sanrio出品 ~~

如果係Hello Kitty迷我相信會喜歡呢道,之前妹妹來過都玩得好開心 ~~

離開Hello Kitty Town好快就去到附近既legoland,不過因為大多數朋友都無興趣玩theme park,所以泊咗車喺門口之後我地首先入去Legoland酒店參觀一下先 ~~

Legoland酒店入面所有擺設都係同legoland有關嘅,lego迷一定會好喜歡架 ~~

蘿記同佢個仔家俊都玩得好開心喎 ~~

Legoland酒店旁邊就係Legoland;到Legoland門口之前會先經過一排商店和餐廳 ~~

商店和餐廳嘅盡頭就係Legoland嘅入口喇,我地影張到此一遊大合照之後就走人喇,哈哈!!

之後就係午餐時間喇 ~~
Legoland附近好荒蕪,想搵食有小小難度,所以我地就先返去新山市搵地方開餐;琴日我地食過印度早餐之後大家都話好食,今日大家都想再試多次,咁岩係路邊見到一間印度餐廳,所以立刻將車開到門口 ~~

嘩…好多咖喱吖,見到都流晒口水
係香港好少機會食到咁正宗既印度咖喱,今次可以食返夠本啦 !!

印度咖哩真係好好味,只係用咖哩汁撈飯都可以食得一餐。印度米同我地食開既好唔同,印度米係長條型嘅basmati rice,唔同我地平時食開嘅絲米,口感好唔同架。除左咖哩雞之外,仲叫左咖哩牛肉﹑咖哩魚、菜等等,其實印度餐都可以食得好豐富架~~

午餐之後再繼續今日嘅行程,大約個半鐘嘅車程去到目的地Pulau Kukup(龜喀漁村),龜喀漁村有好多華人聚居,四圍都可以見到中文字 ~~

 

天氣熱最好就係食雪糕喇,整返條榴槤雪條先~~

龜喀漁村呢道遊客唔多,我相信大部份人同我一樣聽都未聽過呢個地方,事關呢道好偏遠,坐車來真係好難架,如果唔係今次玩自駕遊嘅話我一定去唔到呢道;參觀漁村最好既方法就係坐船,又舒服又可以睇到漁村風景,呢個時間一個遊人都冇,船家見我地來就專程開船載我地八個人出海,每人船票只係RM5,當係遊船河都非常抵啦!!

八個人就變成包船出海啦,哈哈 !! 有海風吹好舒服呀~~

龜喀漁村感覺同大澳有小小似,建築物都係建築係水上,由一枝枝長腳撐起~~

海上有好多漁排 ~~

而船家俾我地上漁排去參觀一下 ~~

呢道養左好多唔同嘅海洋生物,魚蝦蟹咩都有;我第一次上漁排特別開心,四圍睇四圍影 ~~

龜喀漁村對出有一個小島龜喀島,島上以紅樹林而聞名,而且龜喀島係馬來西亞其中一個國家公園,龜喀島上午開放比遊人參觀,可惜我地下午到就無緣上去,只可以遠觀到紅樹林啦~~

停留半小時左右就由漁排離開~~

坐船去到漁村的另一邊,都係一樣有好多高腳屋~~

黃色呢座係天后廟~~

好快就返到碼頭喇,碼頭呢道除左可以坐船遊覽,原來仲可以坐船去對岸既印尼,睇返地圖見到原來印尼只係一海之隔,由漁村呢道都可以望到過去印尼~~

黃昏時間離開漁村開車返新山嘅途中見到一個榴槤園,一於停車俾大家入去果園睇睇,不過已經過左榴槤收成季節所以樹上冇晒榴槤喇 ~~

不過有火龍果樹同木瓜樹 ~~

返到新山時,見到路邊有好多生果檔,全部都又平又新鮮又靚,昨晚食左咁多榴槤要食返多啲山竹下下火先~~

馬來西亞好多地方都有生果賣,五顏六色好靚吖,有啲生果好特別 ~~

以下紅色長毛嘅係紅毛丹 ~~

我地買咗好多山竹返房間慢慢食,多到食唔晒,哈哈!!

返到酒店時天已經黑啦,周圍去想搵一間好出名既「順興肉骨茶」,來到馬來西亞唔試試正宗肉骨茶點得呢!可惜搵左好耐又問當地人,搵到之後原來又搬走咗,咁都冇辦法啦……唯有係酒店對面是但入一間食,呢間多左個「順」字,即係「順順興肉骨茶」。但係今朝大排檔老闆娘都話呢間肉骨茶麻麻地好食,係冇其他選擇之下都要試下,希望佢有驚喜啦!!

肉骨茶出場啦,我係第一次食肉骨茶架~~
以前有諗過肉骨茶係唔係飲既茶呢?咁當然唔係啦,肉骨茶係用肉用骨再加上中藥煲成既湯,當係餸菜又得當係湯飲都得,再加上油炸鬼點黎食就正啦!不過呢碗肉骨茶味道比較淡,喱姐話唔夠正宗…其它餸菜都ok,特別喜歡馬來西亞既芽菜,又肥又短好脆口,而香港嗰啲芽菜又長又瘦又韌,口感完全唔一樣~~

食飽之後大家又出動去食榴槤,不過我食得太飽今晚暫時唔食住啦,睇大家食,佢地繼續買貓山王 & 黑刺,不過大家都話今晚冇昨晚個啲咁好食,就算係同一個品種但如果來自唔同的樹種啲味道都會有分別 ~~

呢道食榴槤服務好好架,如果開到唔好食嘅榴槤就會換一個新既比你,包你食到滿意為止,呢個小榴槤係老闆請我地食嘅 ~~

 

Day 4 (20Aug2014) —

上午一早執齊晒啲行李,早餐都未食就退房離開,前往馬六甲前順路去咗新山最後一個目的地Johor Premium Outlet,話明係Outlet當然有好多嘢賣啦 ~~

可能時間尚早,Outlet人影都唔多個 ~~

 

呢罐100 Plus香港冇得賣,但飲落唔太特別(俾蘿仔老師呃咗話好好飲添)

Outlet裡面有間大餐廳,我地就喺道舒舒服服咁開餐啦 ~~

今餐就係食馬來西亞地道美食Nasi Lemak (辣死你媽),即係椰漿飯,呢個香港好難食得到 ~~

我除咗唔食啲魚仔之外,呢個飯好啱我食,個辣醬(sambal)味道好特別~~

離開Outlet就北上向馬六甲出發,今日有藍天白雲天氣好好~~

由新山到馬六甲大約需時兩個半鐘,好快就可以去到一個全新既地方喇!! 


未到馬六甲古城,已經可以感受到古舊氣息,馬路兩旁全都係舊建築,望見騎樓有一種熟悉感覺,冇錯啦香港舊區都可以搵到好多相類似既舊建築~~

可能置身外國,呢道既舊建築感覺帶有外國feel~~ 

「2008年被列入世界文化遺產的馬六甲,英文名稱為Malacca,馬來文為Melaka。於西元1511年淪為葡萄牙殖民地,1641年後改由荷蘭人接管,1785 年起則為英國所統治,1957 年時脫離殖民統治,成為馬來西亞第一個宣告獨立的地區。」

馬六甲受過咁多國家管治,唔多唔少都可以反映出唔同國家特色,係建築上就可以睇得比較清楚,紅色建築就係當年由荷蘭人興建嘅 ~~

遊馬六甲古城最輕鬆就係坐三輪車,古城周圍都可以見到遊人坐住三輪車到處遊覽 ~~

但我覺得三輪車裝飾得太誇張喇,成部粉紅色搞到我都唔好意思坐上去,而且車頭掛咗個大花圈,中間放隻公仔,唔知大家係唔係同我諗緊同一樣野呢? 

好多美女來到馬六甲古城

遇見有位外國人由歐洲開部電單車來到馬來西亞,一邊玩一邊賣小飾物籌集旅費,唔可以唔佩服佢既毅力,加油呀!

THIS IS MY DREAM!四個字已經講出左重點,人冇夢想同條鹹魚有咩分別!人唔單只要有夢想,實踐夢想先係最重要,佢已經做到啦,好厲害!

來到馬六甲首要任務就係搵食,見到呢隻大船就知道我已經到咗華人居住既社區Jonker Street雞場街(雞場街個名好似奇怪咗少少,不過真係有雞食架^^)

由喱姐帶領之下,直衝去一間又出名又好食既餐廳「古城雞飯粒」午餐,呢道連旅遊節目都有介紹過,我相信一定好好食!

間屋已經過百歲~~ 

有好多好嘢食 ~~

傳說中既雞飯粒出現啦,只有馬六甲先可以食到架 !!
飯同雞融合一齊變成雞飯粒,一啖就可以食到雞同飯,口感都幾特別㗎 !因為佢圓圓地成個波咁所以我地幫佢改咗個名做「波波雞飯」(不過呢個名唔可以亂講,俾人聽到會笑死架 ,哈哈!! )

仲叫咗好多餸,全部都好好味!之前我話過新加坡天天海南雞飯啲雞唔好食,呢道隻雞就好食好多啦,起碼食雞有雞味先啦,比起天天好食100倍呀!

食飽後就係漫遊古城,呢道建築色彩繽紛好靚~~ 

隻Hello Kitty好假

對上一次見到福建會館係喺四川,估唔到喺馬六甲都可以見到 ~~

路過一間特產店,大家就入去shopping一下;A1肉骨茶包好出名,幾位馬來西亞朋友都推薦,我都買咗兩包返香港,煲出來好香藥材味道,應該係真材實料!!

買完嘢就到甜品時間喇,食呢個馬六甲著名既珍多冰 ~~

我地叫咗原味珍多冰同榴槤珍多冰(Durian Cendol)

呢個睇上去就好似一碗普通刨冰,咁當然冇咁普通啦!刨冰上啡色既係馬六甲先有既馬六甲椰糖(Gula Melaka),食落口好香好香椰子味,一碗普通刨冰因為椰糖就變成好好食既椰糖珍多冰啦^^ 而珍多冰入面仲有紅豆、珍多等等配料,好特別!

食完珍多冰再叫多碗娘惹叻沙,都幾好食 ~~

係古城隨意參觀,古城建築又特別又靚 ~~

街上見有人賣榴槤就買咗個來試試,不過呢個唔新鮮所以唔好食既 ~~ 

好快就喺古城行左一圈,然後先去酒店放低啲行李,然後再出發去食晚餐,今日好多時間都係食食食! 馬來西亞最出名就係食嘢嘛,哈哈…..!!

呢間就係全個旅程最靚既酒店Hatten Hotel Melaka,比起昨晚個間靚好多;一間房大約港幣640一晚,唔算好貴~~

梳化呢道都有電視可以睇,不過都睇唔晒兩部電視喎 ~~

房間下面就係泳池,可惜冇準備衫褲游水,喺熱帶地方游水應該好正吖 ~~ 

房間向外望 ~~

呢間酒店實在太舒服喇,大家喺道休息咗好耐,到出去既時候已經天黑了,又係時間出去食晚餐喇 ~~

成架三輪車都發光,洗唔洗整到咁型吖~~

今晚去食既就係馬六甲其中一樣特色美食沙爹串燒火鍋,就係好出名既沙爹碌碌(Satay Celup),而沙爹碌碌之中最出名就係老字號”佳必多”,長期都排滿人….我地落咗車穿過黑暗既街道,尋找佳必多嘅蹤影 ~~

搵咗一陣終於搵到佳必多,不過去到門口見到咁既樣…唉…!! 六合彩又唔見中竟然撞中佢冇開門……

佢冇開門都冇辦法…見對面有另一間沙爹碌碌咁就入去啦 !! 一場去到唔通咩都唔食就走人咩…不過呢間冇咩人心諗都唔方好食……

食沙爹碌碌方法好簡單,先出去雪櫃揀自己想食既串燒,拎返來然後放入中間沙爹湯底碌熟就ok,最後埋單時點算竹籤數目來比錢(個個都食咁多心諗數少幾枝老闆都唔會發覺架啦,哈哈^^ 不過我地唔會咁衰既)

呢個沙爹湯底唔係我地平時打邊爐用既沙爹湯底,而係沙爹醬湯底,睇上去唔係咁好睇,但就香噴噴,食起來有好香沙爹味道;有沙爹醬啲野食當然好食啦,不過食咁多沙爹醬會非常口喝,飲多幾枝可樂都補唔返 ~~

拎咗好多嘢食 ~~

原來沙爹串燒呢道係小印度地區 ~~

食完沙爹又到甜品時間喇,去到酒店附近一間Secret Recipe食芝士蛋糕 ~~

真係好好味 !!

慢慢歎左半個鐘,離開時見到有張告票係車頭
好多人都話馬來西亞警察出名工作效率低,今日又會咁勤力抄牌……

食完甜品仲未返酒店住,仲有榴槤時間吖 !! 

今晚試咗兩個唔同品種,食咗D24同紅蝦,都係好好食架 !!

剩返好多榴槤殼 ~~

食完榴槤就返酒店訓覺啦^^今日喺馬六甲食咗好多餐,又重左幾磅,唔肥死才怪,哈哈^^

 

Day 5 (21Aug2014) —

呢間酒店訓得好舒服,訓醒時見到出面落緊雨,今日天氣唔多好 ~~

酒店包咗自助早餐,我都有好耐冇食過酒店既早餐啦,所以一於去試下先 ~~

一般早餐有既嘢食都有齊,算係唔錯啦 ~~ 

拎咗少少嘢食咋,幾好食架 ~~

食完就返上房拎行李check out,見到天氣好似好返啲,停咗雨喇,好嘢! 

首先去到紅屋附近泊低架車,附近有部舊飛機同舊火車 ~~

繼續向前行就到A’FAMOSA(聖地牙哥城堡),呢座葡萄牙城堡係1511年興建,可惜荷蘭人來到馬六甲時破壞咗城堡,而家只係剩返見到呢小部份咋…!!

大砲係荷蘭人修補城堡時加上去嘅 ~~

城堡旁邊停咗啲車比人參觀 ~~

睇完城堡就返到去雞場街旁邊既馬六甲河 ~~

馬六甲既屋真係好大間,雖然門面唔闊,但啲屋其實好長好深 ~~

呢間係賣咩雞架?咁搞笑嘅 !! 

沿住馬六甲河邊行吓 ~~

前面有隻鄭和寶船,記念鄭和下西洋時多次去到馬六甲(真既鄭和寶船比呢隻大得多)

有班小朋友坐船遊馬六甲河,來回都好開心同我揮手 ~~

馬六甲河美景 ~~

離開馬六甲河又返入去古城區 ~~

下一個要參觀嘅地方係呢間「峇峇娘惹古跡博物館」~~

峇峇﹑娘惹係明朝中國移民同馬來族人通婚混血既後裔,男叫峇峇,女叫娘惹;峇峇娘惹除左帶有傳統中國文化色彩之外,又帶有馬來西亞文化,將馬來人既語言﹑服飾﹑飲食等等習慣融入自己日常生活,所以呢個文化幾特別架 ~~

博物館呢道係以前有錢人住既屋,融合咗中國、英國維多利亞同荷蘭風格;不過博物館唔可以影相,只係唔小心影左幾張咋…

參觀完博物館,又到開餐時間喇 ~~

Geographer Cafe係一間好靚既餐廳,電影「夏日的麼麼茶」都係喺呢道取過景;呢道設計得好有特色,環境好舒服 ~~

叫咗一個椰青,第一次飲呢種椰青咋 !!
不過呢個椰青唔太好飲,酸酸地飲落去好怪,唔啱我口味 ~~

其他嘢食賣相唔錯,不過我冇食,唔知味道係點喇 ~~

食飽後馬六甲之旅亦都去到尾聲,我地要起程向吉隆坡機場出發喇 ~~

由馬六甲去機場有百幾公里路程,所以要早啲起程,再見喇馬六甲!

馬來西亞油價比香港平好多,港幣5個幾一公升咋 ~~

吉隆坡呢道好好天,藍天白雲陽光普照 ~~

我地來到吉隆坡最新既KLIA2,當時只係用咗三個幾月咋,設施好新好靚,所有Airasia航班都已經由之前既LCCT搬到KLIA2運作喇 ~~

KLIA2有個大商場,喜歡shopping既朋友可以係呢道作最後衝刺 ~~

都係超級市場最吸引我地,可以喺上機之前買到好多馬來西亞特產~~

仲可以清楚睇到飛機升降 ~~

入到客運大樓都係咁靚 ~~

check in時問職員可唔可以俾我地影張相,佢地就笑得咁開心,哈哈(一定唔係我問啦,我邊敢問呢!)

check in後仲有啲時間,又可以開餐啦,機場有幾十間餐廳選擇 ~~

我地揀左呢間娘惹餐廳 ~~

呢餐超好食,色香味俱全,價錢又唔貴 ~~

喱姐仲準備咗娘惹糕比大家作為甜品,都係好好食丫,好細心呢,多謝

食完呢餐時間都差唔多啦,夠鐘入閘喇;不過我暫時仲未離開馬來西亞,我地八個人會分開三路,蘿記一家5口會返香港,喱姐同緣人會返吉隆坡屋企,而我將會自己一個繼續北上檳城^^同佢地嘅五日星馬愉快旅程好快就咁結束咗喇,希望之後幾日我嘅吉隆坡 + 檳城旅程都係一樣咁愉快啦^^

 

onion-head19 onion-head19 onion-head19 onion-head19

 

新加坡馬拉南部5天自駕遊【PART 1 – 新加坡篇 】