張家界是湖南一個地級市，位於湖南西北部，屬武陵山脈腹地。張家界國家森林公園是中國第一個國家森林公園，景區集神奇、鐘秀、雄渾、峭拔、原始於一體，以岩稱奇。園内連綿重疊着數以千計的石峰，千姿百態，或孤峰獨秀，或群峰相依，造型完美，形神兼備。 據說阿凡達電影的一部份是在張家界取景拍的，而自從2009年看過阿凡達之後，我就將張家界加了入去我自己定下的那個「中國必遊的風景區名單」之中。
大家心目中的張家界 ， 可能單單指「張家界武陵源地質公園（武陵源世界自然遺產）」，其實，除了「張家界國家森林公園」以外，還有「天子山自然保護區」和「索溪峪自然保護區」，一共是三大塊組成的，統稱為武陵源風景名勝區。 其中「張家界國家森林公園」包含了：袁家界，楊家界，金鞭溪，黄石寨，砂刀溝，鷂子寨等多個小景區；「天子山自然保護區」包含了：大觀台，老屋場，鴛鴦瀑布，神堂灣，賀龍公園，卧龍嶺等遊覽車線；「索溪峪自然保護區」包含了：十里畫廊，黄龍洞，宝峰湖景區。 由於整個景區範圍實在太大，地形亦比較複雜，如果想全部都遊一遍至少需要六、七天時間，把經典走一遍的話至少也要三天時間。 但因為我只有5天的假期，扣除了交通時間頭尾2天，其實只有3天時間遊覽張家界。 所以遊覽的景點或行程就一定要取捨。 在網上找到了當地的一名陳姓導遊 (陳黎明)，跟他在微信聯絡上之後，經過多日的商量然後就定下了他建議遊覽張家界的3天精華路線。 記得2013年遊黃山時我選擇了4月春天的時候去，是想順便去看看安徽和江西地區的油菜花田。而這次選擇了冬天遊張家界是希望能看到張家界山上的漂亮雪景、過一個白色的聖誕。 確實了出發日期之後我們就買機票準備出發了 ~~
我們的張家界5天行程 :
Day 1 — 深圳直飛張家界
宿：梅洛水晶酒店
Day 2 — 金鞭溪 》白龍天梯 》袁家界景區 》老屋場
宿 : 大觀台潘多拉客棧
Day 3 — 天子山大觀台景區 》神堂灣 》賀龍公園 》天子山索道
宿：梅洛水晶酒店
Day 4 — 天門山國家森林公園 》長沙太平街
宿：長沙錦江之星（五一廣場店）
Day 5 — 長沙回香港
Day 1 (26Dec2014) —
今次我們選擇了由深圳寶安機場直飛張家界荷花機場的南方航空，因為遇正聖誕旺季而且這班南方航空的班機係唯一嘅一班直航機，所以貴啲都要俾佢賺喇。
班機起飛時間是晚上1935， 預計到達時間是晚上2115，我們一早約好咗1730喺機場集合。 今次參加張家界之旅嘅團友一共有13人，大部份都係10月先同我去過四川稻城亞丁的隊友，其中包括May、Cat Cat、牛哥、發哥、大幫哥、珊姐、Jane，而Jane今次帶埋佢個妹Minnie同行，另外仲有我喺旅遊谷認識嘅朋友Carrie，又有剛由三藩市回港渡假嘅Jack，再加上我個相識多年嘅老朋友Leo，更加唔會少咗我蝦子餅同我啦 !!
深圳機場新航站喺2013年11月28號正式開始啟用，今次都係我第一次由呢個機場搭飛機出發去旅行，感覺個機場都好新好靚吖，最鍾意係佢個天花，好特別喎 !!
登機前時間尚早，各團友喺快餐店先食少少嘢，然後再行去登機閘口 ~~
「搭乘南方航空CZ3991的旅客，請準備登機 !!」我們的旅程開始了 ~~
我們13人的座位原來就係商務艙後面的頭3行，就係所謂的優質經濟艙 (Premium Economy Class Cabin)，所以團友們都表現得好開心囉，嘻嘻 ~~ 
呢一程嘅飛行時間好短，只係1小時又25分鐘，我們晚上9時07分就降落咗張家界荷花機場喇，比原定嘅抵達時間2115仲要早咗8分鐘添 ~~
取完寄艙行李清咗關之後，就見到我哋嘅導遊 “黎明” 喺接機大堂等緊我哋喇。 而呢幾日喺張家界嘅行程佢安排咗呢架15人座位嘅旅遊巴接載我哋 ~~
咁短程嘅飛機餐只係派咗一啲餅乾同飲品咋，我哋呢班為食鬼一去到張家界市區的第一件事當然要去食餐宵夜先啦 !!
黎明帶我哋去到南庄坪的一條食街，然後我哋自行揀咗一間餐廳，咁因為我哋13人又費時分開坐，所以就揀咗以上呢間 ~~
餐廳的隔離就係水果店，啲團友們都一齊入去買咗少許水果準備帶上山食 ~~
去到酒店取房都已經晚上11點，今晚我哋住喺張家界市的梅洛水晶酒店 ~~
好新淨、寬倘又舒適的一間房，如果自己上網訂房的話係大約港幣400左右一間雙人豪華房 ~~
大家都要早啲休息喇，準備明天一早要上山去袁家界景區玩 ~~ 
Day 2 (27Dec2014) —
今早約好咗8點45分準時由酒店出發，所以我同蝦子餅一早8點鐘執好行李之後就先落樓下食個酒店自助早餐 ~~
今次係請黎明幫我哋全程安排咗一個小型的張家界團，行程係跟出發之前傾好咗嘅路線，價格係每位 ¥1150 ~~
費用包含：
(1) 張家界森林公園景區淡季套票 ￥136
(2) 天門山門票連來回索道 ￥258
(3) 張家界3晚住宿（山上潘多拉客棧1晚，我指定的市中心梅洛水晶酒店2晚）
(4) 全程3天導遊
(5) 行程內車費
(6) 行程內的2個午餐、1個晚餐、3個早餐，還有保險
費用不包：
(1) 百龍天梯72元 /人，景區内的索道67元 /人
(2) 從市內到景區或景區到市內的行李托運費用。
(3) 山上到老屋場的車費
各團友交齊晒保護費(團費)之後當然要點點數先再交俾黎明啦 !! 
出發喇…..!! 以下呢位細心兼好人嘅後生仔就係我哋呢3日嘅導遊黎明喇 !!
早上8時45分從酒店出發到張家界森林公園景區，大概要30至40分鐘的車程 ~~
大件嘅行李黎明佢會幫大家安排托運上山，運送到去今晚入住的客棧，每件行李收費￥20，而我哋啲貴重物品同行山必需嘅用品跟身即可~~
咁大家就可以輕輕鬆鬆只帶個背囊行山就ok啦 ~~
張家界森林公園景區門票。 為了防止3天門票外流作為不肖用途，呢張係指紋晶片咭，第一次入景區會要求刷指紋，之後每次進入景區讀卡時都要刷指紋確認是否為持票人 ~~
早上9點50分由森林公園門票站進入景區就正式開始此次的張家界行程，首先是徒步遊覽「金鞭溪 」~~
沿路順溪向北走，不時會碰上彌猴群，它們已習慣地呆在沿路等待遊人。 如果手中拿住裝食物的膠袋咁就要注意喇，一不小心啲猴子隨時會迅速將你個膠袋扯走㗎 !!
金鞭溪沿線是國家森林公園內景緻非常優美的一段，因溪水流經金鞭巖而得名。金鞭溪全長6.5公里，溪谷周邊的樹木繁茂，溪水四季清澈，自西向東貫通森林公園，流穿行于絕壁奇峰之間，即使久旱也不會斷流 ~~
金鞭溪之美，在於它引人入勝的峽谷風光，僅6.5公里長的金鞭溪，居然聳立着200多座直立的奇峰，奇峭俊秀，千姿百態 ~~
入口之處無幾遠有一個巨大的同心鎖 ~~
冬天屬於淡季所以遊人不算多 ~~
黎明一路行就一路為大家介紹景點，有時又為大家講解一下景點背後的神話或歷史故事 ~~
而牛哥就成日搞爛gag氹啲女團友開心，你睇吓牛哥扮神鵰氹得May、Cat Cat、 Carrie同珊姐佢哋笑得幾開心 !! (有圖有真相呀，呵呵!! )
到金鞭溪，最主要是看它多個著名的景點，包括：閨門迎賓、大氧吧廣場、健身道、母子峰、豬八戒背媳婦、長征路、金鞭岩、神鷹護鞭、醉羅漢、師徒取經（西游記拍摄地）、劈山救母、蠟燭峰、長壽泉、文星岩、雙龜探溪、秀才藏書、紫草潭、千里相會等……。 各個奇峰怪石僅為形似，需要遊人們自己去仔細欣賞。 好老實講我已經唔太記得睇過邊幾個景點， 印象最深刻的有以下幾個，因為有啲真係要好考大家想像力同眼力先睇到㗎 ~~ 
以上係“母子峰”~~
以上係“豬八戒抱媳婦”~~
以下係“蠟燭峰”~~
呢個就係“長壽泉”喇 !!
黎明叫大家試飲，我都飲咗一啖 ，好清涼的山水 ~~ 
至於其它嘅奇峰怪石就你話似乜嘢咁就係乜嘢啦………….哈哈….!! 
千里相會左邊有條山路上山，從這條路上山就不用花錢坐百龍天梯。大概花一個小時左右就可以到達山頂。 唔趕時間而體能都應付得到的朋友可能會選擇自己行上去 ~~
如果再繼續往前走就是重歡樹、跳魚潭、楠木坪、駱駝峰、萬歲牌、張良墓等……!!
看完這些景點之後，下午1點就到了水繞四門 (金鞭溪的盡頭)，黎明安排了車載我哋去食農家菜午飯 ~~
土家大坑屋 ~~
雖然係好簡單的農家菜，肉類不多，蔬菜為主，但大家都食得津津有味喎 !!
食飽午飯之後就行去搭景區環保車，然後準備乘百龍天梯直接上到張家界國家森林公園的另一個景區「袁家界」 ~~
百龍天梯，擁有世界最高全暴露的觀光電梯、世界載重最大、世界最快的客運電梯三項世界紀錄；電梯垂直高差335米，運行高度326米，全程只需1 分58 秒 ~~
百龍天梯票價 ￥72/人
聽講解嘅時間又到了，只有8個肯企定定聽書，其他5個去咗邊呀 ?? 
未坐百龍天梯之前我影吓呢邊嘅風景先…..今日天氣麻麻地，灰朦朦又無陽光，但黎明話咁嘅天氣我哋先有機會睇到雪景喎，唔通藍天白雲會突然間有大雪落咩 ? 諗吓又係喎….不過未出發之前佢都叫我哋唔好抱咁大希望，因為張家界嘅雪景係可遇不可求嘅，因為一般都係要一月或2月先開始有雪落，所以都係隨緣啦 !!
乘搭百龍天梯過程中張家界奇岩異石景觀盡入眼簾，美不勝收 ~~ 
不過Jane突然間畏高唔敢再望 ~~ 
￥72才搭嗰2分鐘電梯，肯定貴過搭飛機坐商務艙呀 !! 
話咁快就上到去世界自然遺產的核心「袁家界景區」喇 !!
袁家界是張家界森林公園山頂觀景最為奇特的觀景區之一，它位於張家界國家森林公園西北地帶，是鑲嵌在武陵源核心風景區中心的閃耀明珠，周邊景觀林立，山石經過長時間的侵蝕風化所以地貌突出。 主要景點包括後花園、迷魂台、神龜問天、五女出征、乾坤柱、天下第一橋等 ~~
神龜問天 ，我覺得呢個形態最神似 ~~
從袁家界鳥瞰群峰，南天一柱為張家界「三千奇峰」中的一座，位於世界自然遺產武陵源風景名勝區袁家界景區南端，海拔高度1074米，垂直高度約150米，頂部植被鬱鬱蔥蔥，峰體造型奇特，垂直節理切割明顯，仿若刀劈斧削般巍巍屹立於張家界，有頂天立地之勢，故又名「乾坤柱」。 據悉，2008年12月份，好萊塢攝影師漢森在張家界進行了為期四天的外景拍攝，大量風景圖片後來成為美國科幻大片《阿凡達》中「潘多拉星球」各種元素的原型，其中「南天一柱」圖片就成為「哈利路亞山」即懸浮山的原型。 阿凡達還有很多取景分別在中國各名山拍的~~
以下就係阿凡達電影中的 「哈利路亞山」原型 「乾坤柱」~~
天下第一橋 ~~
Jane兩姊妹的合照 ~~ 
我哋去到呢個位置就突然間飄起了雪，雖然持續的時間很短，很快就變成了雨夾雪，因為現在氣溫還不夠低，今晚如果氣溫夠低時，冰晶落到地面仍是雪花時，就是下雪了 ~~
之後因為落雨所以我收起了相機，一路行到去坐景區環保車到天子山大觀台。沿途就開始落雪喇…..我哋好興奮好開心呀 !! 因為願望成真嘛 !! 
我哋一路行一路祈求場雪可以再落大啲，咁明早就一定可以觀賞到白色一片的山上雪景喇 ~~
環保車去到天子山時已經係傍晚5點就快天黑了，所以黎明就安排咗2部包車載我哋趕去未開發嘅景區「老屋場風景區」， 都是崎嶇的山上小路，來回車費每人￥40 ~~
落咗車之後要先經一條小村，再沿著台階行落去老屋場的一個觀景台 ，主要係睇「神兵聚會」和「空中田園」呢2個景 ~~
老屋場景區奇峰密布，我好喜歡張家界一根根神奇的山峰，所以我認為最靚嘅景觀大都在天子山范圍內，以老屋場的山峰最為奇特，在深谷中，聳立著密密麻麻數十座的石峰，根根筆直沖天，
而且同峰石群的距離係算最接近的 ~~
遇著今日天氣如此更加顯得仿佛置身於仙境之中一樣 ~~
話明係未開發嘅景點，如果我哋跟一般的旅行團就更加唔可能帶我哋來啦，咁難得來到，就算天氣麻麻地影唔到 “空中田園”，但點都要影返幾張 “神兵聚會” 啦，嘻嘻 !!
影完相就原路行返上去，然後再坐返同一架車返天子山自然保護區大觀台的丁香榕 ~~
嘩……..入夜之後氣溫一降低就開始落雪喇…….好嘢 !!! 好嘢 !!! 
一般遊客在遊覽武陵源景區的時候都會選擇住在山上的旅館 ， 雖然沒有景區外面或張家界市的條件好，但是住在山上可以節省不少的時間和金錢，避免來回出入景區走很多的冤枉路，非常適合深度遊的人士。 目前景區裡面的旅館分別在楊家界，袁家界及天子山大觀台三處地方，因為我們跟黎明提出要求好一點點條件的旅館，所以黎明就幫我們安排了住在大觀台的 “潘多拉客棧” 。 大觀台景區的旅館基本上都是2009、2010嗰幾年建好的，設施比較新一點 ~~
路面漸漸開始變白色了 ~~
今晚山上的住宿 – 丁香榕的潘多拉客棧 ~~
我今晚住呢間房間，雖然床都有張電氈，但係山上實在太凍喇，打算住山上嘅朋友記得帶多幾件衫呀 ~~ 
山上的膳食通常都係多菜少肉嘅農家菜為主，所以我哋呢班為食鬼、食肉獸就一早已經拜托黎明叫客棧今個晚餐多加2隻土雞，一隻土雞用來煮雞湯，另一隻就煮雞煲。
真係好好味呀，喺香港肯定食唔到咁好味嘅山上走地雞囉……………今餐認真豐富呀，個個團友食得好滿足又開心 ~~ 
話說嗰晚全張飯枱都擺滿晒一碟碟菜，但因為飯枱大，如果大家坐低食就比較難夾到另外一邊啲菜，但枱面又冇轉盤方便將對面啲菜轉到自己面前，所以牛哥就突然間發明咗一個好搞笑嘅「人肉轉盤」。 呢個人肉轉盤就係每人拎住對筷子同飯碗一齊企住食，然後每次牛哥一叫「轉！」咁大家就一齊咁順住時鐘方向一路圍住個飯枱轉半個圈，咁咪人人都有機會夾到唔同嘅菜囉！咁搞笑嘅夾餸菜食飯方式我都係第一次試咋，嗰晚大家食得勁開心囉，好好玩呀！
食飽晚飯先係8點幾，出面又落緊雪，啲團友無無聊聊就一於搵啲嘢玩吓。 發哥帶咗骰盅而我哋又帶咗幾支酒，Jack又帶咗一大包開心果，又有昨晚山下買的龍眼，咁就一於玩大話骰啦 ~~
大家睇吓佢哋玩得幾投入幾開心吖!! 尤其係發哥玩得最為投入，發哥的拜四角神功，團友們你們懂的 !!
結果清晒枱面嗰幾支酒之後我同蝦子餅就返房休息喇，準備迎接明天一早醒來會見到嘅雪景，而且又有天子山景區的行程等住我哋去玩㗎，晚安 !!
而May、Jane、Minnie同埋發哥4人就繼續出咗去客棧門口玩雪，以下係佢哋堆砌嘅雪人……乜咁似外星人嘅….哈哈!!
Day 3 (28Dec2014) —
黎明安排我哋住喺天子山大觀台景區就係想方便大家如果遇到好天氣的情況之下，可以凌晨出發去觀日出。 不過落咗一晚的雪，以為應該睇到日出嘅機會都好微啦，而且冬天山上又咁凍 所以我就無打算凌晨起身出去影日出。 原來13個人之中只有Jane一人凌晨起到身跟咗客棧其它啲住客出咗去大觀台觀日出喎。 以下就係Jane影到嘅靚靚雲海 + 日出喇 !!
Jane妳好叻叻呀 !!
同我去過旅行嘅朋友都可能知道我住酒店時有一個小小的習慣， 就係離開酒店之前都盡量會喺附近行一陣 ，睇吓周圍嘅環境 ， 因為好多時候晚上到達酒店時已經天黑，周圍環境睇得唔清楚，咁早上可以補影返一兩張相放喺遊記又當記錄一下嘛……
今次住山上的客棧一樣唔例外㗎 ~~
我哋終於願望成真，今次到張家界真的咁好運氣可以見到山上靚靚的雪景，非常感恩呀 !!
雖然我凌晨懶起身去觀日出，但早上7點40分仲依然俾我見到咁靚的晨曦景色，我已經好心足啦，做人唔能夠太貪心㗎 !! 
雞公大哥早晨呀 !! 都係我哋衰，昨晚一到步就食咗你2隻同胞落肚，真係唔好意思呀 !!
原來大觀台附近仲有好多家客棧選擇嘅 ~~
補返一張潘多拉客棧外貌 ，下面第一間格仔窗嗰間就喺我昨晚的睡房 ~~
影完幾張相之後我就返客棧同團友們一齊食早餐了 ~~
最穩陣都係番薯加白粥 ~~
今早輪到我同May和Carrie喺門口玩雪喇…….哈哈……….!!
原本今早的行程係楊家界景區 (金雞報曉、烏龍寨、三道鬼門關、楊門女將、回音壁、情人峰、五指山、天波府、等景點)。 黎明話楊家界風景主要都係原始風光自然美，不過楊家界和張家界、天子山、索溪峪比較，除地質地貌與一部分山峰基本相同以外，又有其獨特之處，又係一般旅行團好少會安排前往的絕佳景區……. 可惜事與願違，因為呢場雪令到路面有少許積雪同結冰所以景區環保車今早暫時停駛，所以唯有更改行程，8點45分出發行去天子山大觀台 ~~
不過更改咗今早嘅行程我都完全無覺得唔開心喎 ，因為12月張家界氣溫一般未夠凍所以好難睇到雪景嘅，但今次運氣已經好到咁，想睇山上雪景的願望已經成真， 好滿足喇 !! 
世事嘅嘢好多時係唔可能咁完美嘅 ，楊家界景區同山上雪景只可揀其一，魚與熊掌兩者不能兼得，如果要我揀咁我當然揀山上雪景啦 !! 仲要今日有藍天加雪景添，望見咁靚嘅景色點可能會唔開心呢 ??
我真係好鍾意呢啲山上雪景呀 !!
一路走一路沿路影吓相， 9點20分終於行到去大觀台睇日出嘅景點喇…..!!
有雲海呀 !! 
拉近啲睇真係好似一幅水墨畫一樣 ，可惜太遠所以影得唔夠清楚 ~~
再向前行就去到一個下坡台階，一共有597級 ~~ 
太陽伯伯出來之後天氣立即回暖，呢張相之後我哋今日都再睇唔到雪喇….. 所以張家界的雪景真係可遇不可求，而且今次仲係好短暫添 ~~ 
無雪景但係有陽光，沿途風景一樣咁靚 ~~
隻羊羊被扯住條頸拉上去好可憐呀 !! 
走完597級台階之後就來到天子山的一個觀景台 ~~
置身天子山觀景台，放眼四望，視野遼闊，四周景觀盡收眼底 ~~
呢啲金黃色的 “蜻蜓葉子”，將啲葉片摘落來向天上拋嘅話，佢會好似風扇咁不停轉動，好得意㗎 !!
睇完呢個景區，要原路行返上去坐景區環保車，喺呢個位先來張大合照先 !! 乜雞公大哥又入咗鏡嘅? 我哋食咗佢啲兄弟，唔通係想搵我哋尋仇 ??
今日如果要遊覽整個天子山自然保護區就會好趕，走馬看花又無乜意思，所以我哋只要求黎明帶我哋去佢認為最靚最值得睇嘅景區，咁今日下午的行程就由佢決定啦。上午 11點我哋上咗景區環保車前往下一個景點「神堂灣」~~
只係短短的10分鐘車程就到咗了 ~~
神堂灣這個景區一樣係奇峰密布，但獨特之處係周圍嘅綠色松樹為張家界生色不少 ，構成咗一幅美麗嘅畫面~~
果然係大自然的鬼斧神工 ，好靚呀 ~~
點都要影返一兩張 “到此一遊” 相片嘅．．．嘻嘻！！
行完呢個景點又夠鐘食午飯喇．．．．不過唔係食麥當勞 ~~
而係食農家菜呀 ~~
簡簡單單的一餐，味道都算ok吖 ~~
午餐後黎明就繼續帶我哋遊覽「擴大的盆景，縮小的仙境」有峰林之王稱號的天子山，再去遊覽其它的精華景區。首先我哋去到賀龍公園 ~~
賀龍公園為紀念十大元帥之一的賀龍元帥轉戰天子山而建的。公園內有數處觀景台，是天子山觀景最集中的地方。 以下就係「賀龍銅像」~~
經過「無底洞」的路口~~
下一個景點係「西海峰林」，西海峰林位於索溪峪西北，是整個張家界國家森林公園峰林最為集中的地方，也是最漂亮的地方之一，可分別從神堂灣、賀龍公園和下山途中等幾個不同角度欣賞。 站在雲青岩觀景台這裡就可以觀賞到整個西海峰林 ~~
在雲青岩觀景台我哋又來多一張大合照先 !!
離開咗西海峰林之後我哋就行到去另一個景點「仙女散花」~~
以下係「仙女散花」，呢個不必太多的想像力都能夠睇得到，因為真的很神似！！ 仙女向右望的側面，胸前手捧一盆花，係唔係好似呢 ??
以下又係另一個著名嘅景點「禦筆峰」，禦筆峰是上銳下削，棱角分明，幾座細薄堅挺的山峰非常有型，形似幾隻倒插的毛筆 ~~
下午3點欣賞完天子山的精華景點之後我哋就打算離開天子山景區喇…..!!
行到去天子山索道乘車入口處 ~~
然後再坐景區環保車去到天子山索道入口 ~~
天子山索道票價 ￥67 ~~
淡季遊人少真好，乘搭天子山索道或白龍天梯都基本上無需要排隊，真爽呀 !!
從天子山景區下山最好是坐索道，如果唔坐索道嘅話，需要經過近6000級臺階，耗時3個小時左右，對人的體力是一種考驗。 天子山索道的建成開通確實係極大地改善了武陵源風景區的旅遊交通環境，而且坐喺索道上沿途仲可以欣賞到天子山迷人嘅景色 ~~
6分鐘左右就已經落到去喇……..
上旅遊巴之前我哋先經過一條「武陵源標志門紀念品街」，我同May二人用9秒9的時間就買咗2條特色披肩，￥20一條做手信好抵啦 ~~
下午4點半時間尚早而且又未夠鐘食晚飯，所以我哋就叫黎明帶大家去做足浴，行咗2日山做返個腳底按摩舒緩一下雙腳嘅疲勞嘛 ~~
呢間「湘府足浴」啲技師手勢都算ok ~~
因為係黎明佢老細嘅公司規定，所以無奈地例牌都要帶啲鴨仔去一個指定購物景點，所以我哋好合作咁坐低咗，不過15分鐘之內每人試完2杯茶之後我哋就走人啦……水魚係無咁容易捉到嘅 !!
之後我哋就去咗May嘅同事推介嘅「湘和記」食晚飯 ~~
呢餐豐富到不得了，13道菜加一個湯，埋單才￥450，每人才￥34.50，真係抵食夾好味呀 !!
食飽就返去我哋喺張家界市第一晚的住宿「梅洛水晶酒店」，昨晚在山上的客棧無得沖涼，今晚就可以洗白白同舒舒服服咁休息一晚啦 !!
Day 4 (29Dec2014) —
今日主要嘅行程係「天門山國家森林公園」，約好了今早8點半由酒店出發 。所以7點半先食個酒店自助早餐，然後上房執行李退房 ~~
8點45分到達了天門山國家森林公園的售票處，￥258一張的門票已包括來回索道。 我哋將所有行李寄存在遊客中心，打算今日遊覽完畢之後就直接由天門山坐長途巴士去長沙 ~~
天門山的入口 ~~
天門山國家森林公園風景區，占地面積96平方公里，為四面絕壁的台形孤山，屬典型的喀斯特岩溶地貌。 天門山海拔1518公尺，是張家界的文化聖地，被稱為 「張家界之魂」，還有「湘西第一神山」的美譽 ~~
遊客遊覽天門山時，上山必須坐觀光索道。它是世界最長的高山觀光客運索道，全長7454米，高差1277米，共有轎廂98個，單程運行時間約30分鐘 ~~
天門山觀光索道運行時間大約30分鐘，沿途可以慢慢欣賞靚風景，肯定抵坐過2分鐘嘅白龍天梯啦….!!
底下彎彎曲曲的道路是2015年5月才完工的天門山盤山公路，取名為「通天大道」。它一共有99個彎，似玉帶環繞、層層疊起，借山勢扶搖直上，如巨龍翔起般，堪稱「天下第一公路奇觀」~~
我哋好快就上到去位於覓仙奇境景區的「鬼谷棧道」了。 鬼谷棧道因懸于鬼谷洞上側的峭壁沿線而得名。鬼斧神工的倚垂直峭壁而建，幾十公分寬的棧道下是萬丈深淵，不是說笑，膽量少點都會被嚇至腳軟，非常刺激。棧道全長1600米，平均海拔為1400米 ~~
鬼谷棧道上部份路面因為昨天落雪所以結了冰，走在冰上真係好跣腳，所以要一步一步慢慢地小心行 ~~
今天風和日麗，天氣好到不得了呀 !!
一步步都是美，一彎彎都是景，一聲聲都是“嘩”，我不禁多次停下腳步影相 ~~
終於行到去今日的亮點「天門山玻璃棧道」喇 !!
玻璃棧道建在山頂西線雲夢仙頂至倚虹關之間~~
為了讓遊客繼續可以透過潔淨的玻璃看到美麗的風景，所有走玻璃棧道的遊客均被要求穿上鞋套，以保持玻璃面的清潔 ~~
走在玻璃棧道上，我哋的腳下就係筆直的懸崖峭壁，整個過程都透過玻璃一覽無遺 ，不過我突然又諗起「萬丈深淵」呢4個字。 其實唔洗諗咁多，萬一真的不幸跌咗落去的話，相信屍骨都應該好難搵得返喇！!
呢條睇見就讓我腿軟的玻璃棧道實在為我帶來刺激感，哈哈 !!
上到來咁靚嘅天門山，當然又唔少得影返張大合照啦 !!
鬼谷天塹位于鬼谷棧道中段，海拔1400余米，是一個迂回的峽谷，兩側為陡峭絕壁。平常遊客走在這裏都覺得膽戰心驚，連扶著欄桿往下望一眼都需要勇氣 ~~
繼續前往天門山的最高點「雲夢仙頂」~~
登上雲夢仙頂能讓遊人從更高的角度，更寬的視野欣賞山頂的風光 ~~
喺雲夢仙頂拍的全景 ~~
以下係從張家界的主峰雲夢仙頂直達天門山寺櫻桃灣廣場的天門山森林觀光纜車 ，全長800米~~
因為今日下午3點我哋要搭長途巴士去長沙，所以並無逗留喺天門山太耐，都係遊覽咗幾個精華景點之後中午12點就搭索道離開了 ~~
站在呢個位置我哋能夠清楚望見自然奇觀「天門洞」，天門山因天門洞而得名，天門洞高131.5米，寬57米，深60米 。 1999年12月，世界特技飛行大師駕駛飛機穿越天門洞，實現人類首次駕飛機穿越自然溶洞的壯舉，轟動了全球 ~~
下午1點25分落咗山之後我哋行咗去附近食午飯 ~~
因為3點鐘要由呢道坐長途巴士去長沙，所以無時間再搭車去張家界市區食飯，所以就喺附近求其揀咗呢間宰客嘅餐廳，埋單 ￥713，係全程最貴嘅一餐呀 !! 
下午3點08分我哋就上咗長途巴士離開張家界前往長沙了，車費每人￥100 ~~
以下係牛哥同大幫哥的開心合照 ~~ (以下藍色字的一段係牛哥寫的遊後感，謝謝你牛哥 
)
在川西遊有幸認識喱姐等人，往後在一次在元朗的聚會中(喱姐嗰次冇份去）在大幫哥偶然提起下，喱姐吹雞聖誕張家界之行，力邀參加。 老妻(牛嫂)高呼弊因佢當日遊台灣未返，趕不及參加這趟旅行。(牛嫂常看喱姐油雞，知佢吹雞必屬精品) 故我唯有獨自跟往。 眨下眼又出發了，不過勢估唔到係喜出望外咁過癮好玩。 首先一行十三人，真喺有老有嫩，全部自願，真係乜人都有。
團友有多咀唔抹咀但攝影技術跨啦啦嘅大幫哥及相對沉默寡言嘅Leo和我 
又有話雙腳打柴但又跟上跟落嘅珊姐，仲有旅行似移民拖大箧嘅CatCat，加上酒量食量驚人嘅Maymay，另有身型嬌小但行動敏捷嘅Carrie，再有擅拜四角酒量隨意嘅發哥，更有外表柔弱但內裡硬淨非常嘅真妹和佢嘅小妖好姊妹Minnie， 又加埋唔怕凍嘅美國豪，唔少得嘅領隊喱姐同佢嗰個外表斯文其實好身痕嘅老公緣人，最後係當地我哋譽佢為張家界最後一個處男導遊黎明，呢個組合在整個行程中果然起了想不到的化學作用。 其實旅遊除了地點和風景重要之外，最緊要是一起玩的旅行腳，這群人是我旅遊記憶中超好玩的，因講得笑，襟得瘀，無投诉，易商量，唔計較。 這旅程中實在太完美了，喱姐話希望有雪景，第二晚即應驗，而且雪後翌日喜見驕陽普照，落雪造就團友夜裡相擲雪嬉戲。雪人雖似狗多啲但大家都玩得好開心。我哋想睇的風景全都在可能情況下一一應驗了，夫復何求 ? 總之整個行程充滿著歡笑在完美中結束，唯一遺憾係時間太短。 希望在不久嘅將來再一齊去玩過 ~~
呢架長途巴士係幾舒服㗎，唯一激氣嘅係司機老點咗我哋落車。 
話說當日黎明幫我哋訂車時已經講明要送到我哋去位於長沙五一大道的錦江之星酒店 (五一廣場店)。 上車之前我已經再提了司機我哋要喺五一大道的錦江之星落車。 點知架車一去到長沙錦江之星(長沙東風路店)嗰司機就叫我哋落車，我見到間酒店外形唔多似我網上睇到嘅圖片，所以落咗車取行李時我再問多司機一次到底呢道係唔係五一大道，佢竟然又話係喎，咁就唯有落車啦，後來一開Google map研究一吓就發覺佢真係老點咗我哋囉．．．．結果我哋仲要再坐多一程￥14嘅的士去酒店呀 ！！
錦江之星酒店 (五一廣場店)雙人房1晚 HK$252，房間雖小但平平哋住一晚都可以接受啦 ！！選擇住錦江之星酒店 (五一廣場店)主要係因為佢位於長沙五一商圈的鑽石地段，前朝五一廣場，後擁長沙步行街和酒吧一條街，緊鄰長沙著名的小吃街 “坡子街”，方便我哋今晚行街食飯嘛 ~~
因為去到酒店都差唔多９點喇，所以上房安置好啲行李之後我哋就嗱嗱臨行去三王街食晚飯 ~~
終於揀咗呢間”熱鹵劉”試吓長沙湘菜 ~~
叫到成枱滿晒，１４樣菜埋單才￥381，每人￥29，餐飯真係又平又好食呀！！
食飽再行逛多一陣酒店旁邊的太平老街，然後我哋就返酒店休息了 ~~
以下就係昨晚住的錦江之星(沙五一廣場店) ~~
Day 5 (30Dec2014) —
今早約好咗大家７點４５分喺酒店大堂等，我早咗２０分鐘落到去太平老街行咗一陣 ~~
見到有賣早點嘅車仔檔所以就每樣買咗啲俾佢哋試吓 ~~
我安排咗一架１５座位的車早上８點準時喺酒店載我哋去長沙機場。４５分鐘的車程我哋８點４５分到達咗長沙機場喇，亦都代表咗今次的張家界之旅已經接近尾聲喇 ~~
各位團友再見喇，下次有機會再一齊玩過 ~~ 
港龍KA721由長沙直飛香港的航班因為飛機遲咗到達長沙所以導至延誤咗２０分鐘 ~~
喺飛機上俾我見到好靚好靚嘅雲海呀，使今個旅程變得更加的完美！！
下午１點０８分安全降落香港機場了~~ 喜迎瑞雪【張家界】全篇完，多謝收看！！
全程洗費 :
第一晚飯價錢￥596：￥45.80/人
百龍天梯 ： ￥72/人
2程行李托運費￥480，每件￥20一程共12件 ：￥40/人
老屋場來回車費 ：￥40/人
山上2隻土雞 ￥400：￥38/人
天子山索道￥67/人
湘和記￥450：￥34.50/人
張家界長沙車錢 ：￥100/人
長沙機場車錢￥300：￥23
導遊Tips ￥30
天門山行李寄存￥0
天門山午餐￥713：￥55/人
熱鹵劉（長沙湘菜） ￥381 : ￥29.50 /人
全程洗費 = ￥575 /人
導遊團費 = ￥1160 /人
機票 = HK$1700 /人
長沙酒店1晚 = HK$126
總共 = 每人 HK$3994
除了一般旅行必需品之外，以下是今次張家界之行的溫馨提示：
– 帶備有效的回鄉証，打印e-ticket機票一份。
– 帶備足夠的人仔。
– 如有需要沿途上網，內地電話3G上網卡可以出發前預先購買，内地3G電話可上網的電訊公司，最好選用中移動。
– 冬天山上天氣寒冷，有機會下雪。
– 衣著方面建議風褸、保暖打底衫、打底褲、羽絨、雪褲、行山鞋、羊毛襪。
– 帶備行山仗、雪爪、雨具和小電筒一支。
– 必備冷帽（一定要戴）、耳套、手套、頸巾、暖包、保濕霜、暖水壺、毛巾。
– 帶備行山能量補充零食（朱古力、餅乾、杯麵等）
– 因為山上的一晚住宿條件欠佳，請自備牙膏牙刷、沖涼液、洗頭水、小型風筒、日常用品等。
– 必備藥包（必理痛、止屙丸等）
– 如有潔癖的可以自備睡袋。
– 插頭是二腳插頭，和美加、日本、台灣插頭一樣。
– 相機和電話充電器、後備SD card、萬能插蘇。
– 所有後備鋰電池或尿袋都必須放於手提行李之中親自帶上飛機，所有電池都不能寄艙。
– 手提行李中的所有液體、凝膠狀物體及壓縮氣體須以不超過100毫升的容器，分別盛載及整齊地放入容量不超過1公升的透明膠袋內，如果超過100毫升就一定要寄艙。
山頂環保車資料：
山上袁家界，楊家界，大觀台，天子山依次成U字形。包括小站點：望橋台，天池，丁香榕村口（老屋場），神堂灣，點將台。到任何景區都可在相應的站點乘坐景區環保車去。若無導遊，需要跟司機師傅說明在哪里下車即可。環保車正常的上班時間是08：00 — 17 : 30，旺季有加班車直到主流人群運送完畢為止，人數較多或者其他特殊情况也可以直接打電話給環保車公司，可以在工作時間外安排車！
導遊陳黎明的聯絡電話：13397444789