走進世界文化遺產【白川鄉】

白川鄉位於岐阜縣西北部白山山麓,是四面環山、水田縱橫、河川流經的安靜山村。 那裏“合掌造”(茅草的人字形木屋頂)式的民宅,114棟連成一片,是日本一種特殊的建築 , 特色是以茅草覆蓋屋頂,呈人字型的屋頂像如雙手合十祈禱般,於是就被稱為「合掌」。 合掌造的屋頂呈近60度傾斜,使積雪容易滑落、不易堆積,能避免大雪將屋頂壓垮。 1995年被列爲聯合國教科文組織的世界文化遺産。 今年2015白川合掌村點燈的7日分別是17/1,24/1,25/1,31/1,1/2,7/2 以及 14/2。 難得我的6天假期又能遇上是點燈祭的其中一個日期,所以今次就專程去了一趟白川鄉。 其實白川鄉的點燈祭一如往年每年只有七回,集中在一月底至二月中,通常定在周末或周日,不過每年均會變更,要以官方網站公佈的資料作準 

先給一張perview照片大家看一看點燈日的白川鄉合掌村有多麼的迷人!!yxh54

而且日本一年有2次大減價的季節,1月的冬季大減價和7月的夏季大減價。 既然我1月21日出發又遇啱冬季大減價,咁就一於順便去名古屋先購物掃貨,然後再租車自駕去白川鄉啦!!

以下是今次名古屋、白川鄉和高山的行程 :

Day 1 (21/1/15) —

香港 — 名古屋

Nagoya Station

Day 2 (22/1/15) —

– 榮町

– 榮 、錦三丁目

Day 3 (23/1/15) —

– 大須觀音寺

– 大須購物小路

Day 4 (24/1/15) —

– 金澤兼六園

– 白川鄉

– 高山市

Day 5 (25/1/15) —

– 飛驒高山老街

– 名古屋

Day 6 (26/1/15) —

名古屋 — 香港

 

Day 1 (21/1/15) — 我和蝦子餅2人早上乘搭國泰CX530的航班,途經台北然後再飛往名古屋,下午3時05分抵達名古屋國際機場(Central Japan International Airport) ~~

好快地過了關取了行李之後我們就照著機場的指示牌走去搭電車出名古屋市區 ~~

我們乘搭下午15:52班次的名鐵線前往名古屋站 (Nagoya Station), 車票870 yen~~

16:40到達名古屋車站 。名古屋車站是名古屋的交通樞紐。各種電車,包括JR、名古屋鐵道、近畿日本鐵道和名古屋地鐵都在此站停車。

我們住的酒店Nagoya Marriott Associa , 7612 yen ,連稅大約600港幣一晚雙人房,但無包早餐。 選擇住呢間係因為經我公司訂房有折頭,原價或上網經Agoda.com訂要2千幾港幣一晚,而且酒店位於名古屋車站上蓋,交通或吃飯都非常方便 ~~

名古屋車站除了是重要的交通樞紐之外,它更與各大商業區和百貨商場相連,JR櫻通口(東側)連接JR高島屋Takashimaya百貨公司,由高島屋百貨店往南,便是名鐵百貨店、近鐵PASSE以及商店街等購物中心。所以住在Nagoya Marriott Associa 真是超級方便呀 !!

由酒店望落去的街景 ~~

名古屋車站內與JR站直接相連的「JR Central Tower」內有「高島屋」百貨公司等受年青人喜愛的流行時尚服飾店、大型書店、唱碟店等 。 12樓和13樓仲有好多餐廳以供選擇 ~~

我們當晚都喺12樓揀咗其中一間食日本料理的餐廳 ~~

日本料理的賣相永遠都咁精美嘅,就算唔食得都睇得吖,哈哈…!!  不過都算好啱我哋2人嘅口味嘅 !! onion-head23

食飽之後喺名古屋車站附近隨便逛吓,然後就返房休息喇……!!

onion-head24 onion-head24

 

Day 2 (22/1/15) —

昨天的天氣不錯,不過天氣預報話今日會有雨,所以我唯有將觀光行程改為明天才出發,將今日的行程改為主要逛街掃大減價的貨品,就算遇著落雨或落雪都唔怕,可以逛地下街吖嘛 !!

今次係hea遊所以唔需要太早出發,我們早上10點先由酒店出發,搭乘地下鐵到Sakae「榮」站去shopping ~~ yxh55

我們搭「東山線」直接去到「榮」站,200 yen一程,唔需要轉車,好簡單!!

「榮」地下街位於久屋大通街底下,是日本最大的地下街,大多數遊客來名古屋都必會來此逛。 整個地下商街都與多家百貨公司相連接,而且地下街都係啲小店,賣嘅嘢品種都算好廣, 吃、穿、用的、藥粧通通都有 ~~

呢個月份來日本,周圍都見到冬季大減價、大割引、Sale等等吸引死人嘅字眼,搞到我兩眼都發光,但又擔心今次荷包會大出血呀 !! onion-head72

不過首先都係要醫咗肚先有氣力血拼㗎嘛…..都係去嘆個早餐先 !!  onion-head29

地下街又搵到我鍾意食嘅綠茶泡芙 (Green Tea Crème Puff) & 朱古力心太軟 (Fondant Chocolate) ,又忍唔住買咗2個 ~~ onion-head73

食飽飽就開始今日嘅掃貨行動喇……因為專心shopping所以無乜點影相,只有以下用手機影嘅幾張相咁大把咋 ~~

除咗四通八達嘅地下街之外,路面上仲有三越百貨、又有售賣個性時裝、家居飾品的LACHIC、松坂屋、PARCO 等百貨公司。 仲有好多唔錯嘅餐廳和咖啡店,所以榮町這個商圈都算係名古屋最熱鬧的地方了 ~~

一直逛到下午,然後我們來到OASIS 21「綠洲21」 ~~

這裡是一個很環保的車站、廣場、公園、購物中心覆合式建築,外型十分特別。屋頂是透明的,再加上開放式的建築結構,大量引進自然光源 ~~

地面中間係個溜冰場 ~~

午餐時間,喺Oasis 21我們搵到呢間超好味的拉麵店「豚神 」~~

早聽聞日本是自動販賣機的王國,無諗到徹底得連美食都可以販賣 ~~

自動販賣機入錢再選擇想食的拉麵之後,就搵位坐低等食喇 ~~

湯底、叉燒、麵的口感以及溫泉蛋都正到無朋友呀 !! onion-head68

食飽再繼續去血拼過 !!  咦…..真係落雨喎……咁就行吓百貨公司避吓雨啦 !!

血拼的一天,買嘢買到天黑,行街行到腳軟,真誇張,哈哈 !!

簡直就好似杜如風上身一樣呀,哈哈!

今日行得太攰喇,懶得再搭車所以返到名古屋站就喺車站內的美食街食晚飯,今晚試咗名古屋名物,味噌豬排  ( 味噌カツ ) ~~

食飽又係叉電的時候喇,明天又繼續有新的行程,晚安 !!  onion-head100onion-head100onion-head100

 

Day 3 (23/1/15) —

今日比較遲起床,hea遊當然係睡到自然醒㗎啦 !!  早上10點喺樓下名古屋站食咗碗Kishimen ~~

Kishimen 係一種扁身的板條烏冬麵,只係名古屋比較容易食得到,滑得黎又煙韌,我都幾鍾意呢種口感 ~~

然後11點鐘我們搭乘地下鐵鶴舞線去到「大須觀音」站下車。 從二號出口出來,照著指示走幾分鐘就會見到大須觀音寺( Osu Kannon Temple) 在左手邊了 ~~

「大須觀音寺」是大須商店發展的起點,廟宇正式的名稱為「北野山真福寺寶生院」,原本位於「大洲」這個地方,自從德川家康在名古屋建城之後,派人將整座寺廟建築搬移到大須這裡來 ~~

我覺得一心來到大須觀音寺點樣都要燒香參拜一下的 ~~

在大須觀音寺我發現咗一個其它國家的寺廟未曾見過的現象, 就係日本信眾會企喺冒煙的香爐旁邊,然後將啲煙往自己的臉同身上撥,感覺似乎係沐浴在這些煙之下就能受到觀音菩薩的庇護同保佑一樣 ~~

咁我就一於都入鄉隨俗啦 !!

再用御手洗流下的聖水洗吓手先,希望可以帶來好運 ~~

大須是個很特別的地方,跟東京的淺草一樣,以一座觀音寺為地標,並以其為中心點開始繁榮,發展出各式各樣的商店街。大須商店街「觀音通」就是以大須觀音為中心的繁華街道,是各式各樣的文化集散地,集時尚服飾、演藝以及御宅族文化等等,包羅萬有。 同時都是「女僕咖啡店」(Maid café)和復古和服飾潮流的發祥地 ~~

Osu Shopping Street 大須購物小路,官方網站:http://www.osu.co.jp/

呢串類似綠茶味的糯米糍我就真係覺得麻麻地喇….!!

大須觀音的東面有三條大街,分別是「門前町通」、「裏門前町通」和「北新天地通」。三條大街都是南北貫通,仲有好多條橫街窄巷係值得一逛㗎  ~~

行行吓又行到去「 榮」站嗰區,不過今日天氣比昨天好得多喇 ~~

喺大津通我們搵到一間食海鮮丼的餐廳,所以就決定食完晏先再繼續 ~~

有我最愛的海膽,新鮮而且又唔貴 !!

之後再去埋PARCO & Loft,逛到傍晚就返酒店喇 ~~

喺房稍作休息之後我們晚上7點又落咗去名古屋車站的拉麵食街,每人食咗碗九州拉麵 ~~

咁今日Day 3好快又過咗喇……明天就係今次名古屋之行最主要的自駕遊行程「白川鄉」喇,所以要早啲休息準備明天一早出發 !!

 

Day 4 (24/1/15) —

我們今早8點出發去取車,將其它行李寄存喺酒店,因為今晚我們住喺高山市一晚,明天又會返黎名古屋Marriott Associa 再住多一晚先飛返香港 ~~

因為今日要趕路去金澤兼六園然後再去白川鄉,所以行去Times Car租車店時順路去便利店買咗啲壽司、手卷之類方便午餐喺車上食 ~~

見仲有少許時間先夠鐘取車,所以就喺租車店對面的餐廳食個早餐嘆返杯咖啡先 ~~

點解有3份早餐嘅 ?? 其實係因為我有個香港朋友Michelle專程飛過黎同我們一齊玩㗎,佢昨晚才抵達名古屋但明天下午就要飛返香港喇,專程係為咗一齊去一趟白川鄉睇燈祭㗎咋 ~~

今日上午9點取車,明天下午3點還車,30小時的租車費用係HK$1245,但因為怕路上有積雪所以要求轉了4條雪胎(snow tire),再補多 2160Yen ~~

呢架就係我們今次嘅戰車喇,靚仔嗎 ??

今日首先要去的係金澤兼六園,由名古屋出發向北行,從愛知縣前往歧阜縣,路程大約233公里 。 金澤兼六園離白川鄉只係1小時左右的車程,所以今次順便去遊覽一下,因為如果今次唔去的話,我下次亦唔會再專登自駕去金澤兼六園囉 ~~

Set好個GPS導航就開始出發喇……!!

沿路上天氣都算唔錯,藍天白雲 ~~

中途停低喺補給站順便去吓洗手間 ~~

補給站的海景都好靚 ~~

為免耽誤今日嘅行程,我們只逗留咗10分鐘就繼續開車前往金澤兼六園喇 !!

係喎,其實我都一直唔記得今次來日本都有帶埋鬆弛熊佢返家鄉㗎,原來放咗喺手袋裡面唔記得拎佢出來添,快啲俾佢坐返個靚位欣賞沿路風景先,嘻嘻 !!

將架車泊咗喺兼六駐車場之後,就向兼六園的方向行過,大約10分鐘的路程 ~~

兼六園門票 ¥310

如果時間充裕的話可以順便去埋金澤城公園 ~~

但我們今天時間有限,所以就無入去參觀,只在門前影咗一張到此一遊相片咋 ~~

繼續往兼六園的方向行去 ~~

以下就係Michelle喇 !!

到啦到啦 !! onion-head29

兼六園位於日本石川縣金澤市,是江戶時期的池泉回遊式庭園,是個被稱為日本三個最美麗的風景花園之一, 佔地總面積為8萬平方米 ~~

真係幾靚喎 !!

欣賞完兼六園的風景之後又係時候出發去白川鄉了 ~~

由呢度出發仲有大約77公里的路程 ~~

慢慢的接近群山,越接近白川鄉的時候個天就變得越來越多雲 ~~

開始出現了第一條隧道,這裡的隧道確實有些特色,首先係多,從第一個隧道開始,一直到我們抵達白川鄉,一共經過咗整整54個隧道。第二個特色係長,有其中一條隧道係長達11公里㗎  ~~

終於來到呢條11公里長的隧道,過了呢絛隧道就到白川鄉了 ~~

開始見到道路兩旁有厚厚的積雪了 ~~

望落真係有啲似立山黑部雪壁,又或者似蛋糕上面一層層的白色icing cream呀 !!

白川鄉的一般停車場於點燈期間不開放俾私家車停放,而會安排同指揮啲私家車停泊去比較遠的停車場,並提供免費接駁巴士前往白川鄉的聚落中心 ~~

停車費用係每架車500yen ~~

乘坐免費接駁巴士入到村,落咗車之後我們首先向「和田家」的方向行去 ~~

白川鄉的屋就是以日本一種特殊的建築「合掌造」而聞名 , 特色是以茅草覆蓋屋頂,呈人字型的屋頂就如雙手合十祈禱般,於是就被稱為「合掌」。 合掌造的屋頂呈近60度傾斜,使積雪容易滑落、不易堆積,能避免大雪將屋頂壓垮 ~~

這裡是和田家的門前 ~~

和田家是白川鄉現存最古老的合掌造建築,至今已有400年以上的建造歷史,在1995年聯合國教科文組織將白川鄉登錄為世界文化遺產時,日本政府也同時將和田家列為「國家指定重要文化財」。和田家的祖先是前村長,也是合掌村的領導者,房屋建築自然也是最雄偉、最具氣派的,現在對外開放成博物館 ~~

參觀和田家要買門票㗎 ,每人300yen ~~

再上2樓參觀 ~~

中二階也放置很多器具 ~~

合掌屋建築,數百年不用鐵釘,只靠木頭與木頭之間的卡榫接合和結繩來結成。 而屋頂則是以茅草來覆頂,但每隔約30多年就要更換 因為申請世界遺產,範圍包括岐阜白川鄉、 富山五箇山、相倉這一帶合掌建築是不能變更建築結構, 也不可以用現代科技翻新合掌屋。所有的規定都必須保護合掌造原樣。 前一次的翻修動員村裡人手,與外包商合力進行修繕工程, 耗時2天才能完成。總維修費用花去4000萬日幣。 幸好因為登錄於世界文化遺產,日本政府會補助修膳整棟建築 ~~

建築結構依然保存得相當完整,而從和田家裡頭保存良好的古文書、鑑禮等古代傳承下來的用品, 可以窺見以前的合掌村民生活方式 ~~

從2樓的窗口望出去的雪景都好靚 ~~

俾Michelle偷影到我個背影添, 哈哈 !!

這裡感覺就像到了一個“千與千尋”的世界裡面,你係無法想像這裡的一切是如此完好和真實的存在著的,而且是那麼的美。古老的尖頂式草棚建築比比皆是,老實說隨便站在這個村落中的任何地方都是一副美好的風景畫 ~~

然後又往「相逢橋」的方向行去 ~~

經過幾間小商店之後進入狄町大街就會見到「相逢橋」了 ~~

站在相逢橋上望過對面的景真係好靚呀 !! onion-head16

荻町古城遺址的瞭望台,5點開始好多人,不過如果一定要set相機腳架的話,咁就一定要4點之前上到去瞭望台霸定個靚位喇 ~~

臨天黑前的半個小時,所謂的magic moment就是我最期待見到的畫面,那時候呈現的是深藍而未入黑的天空,深藍色的背景,迷人的夜景終於出現了 ~~

每逢大雪過後,合掌造屋頂蓋滿厚厚積雪,再加上燈祭的日子萬家燈火,如此畫面令我頓覺詞窮呀 ~~

可惜我未能霸到好的位置,所以影到嘅角度都只係好一般,但係總好過完全影唔到啦 !!

聖誕薑餅屋 (Ginger Bread House) 而屋頂的雪就好似啲聖誕薑餅屋啲 icing sugar ~~

天色漸漸地黑了,影出來的效果都唔同了 ~~

入夜之後我們就準備離開白川鄉了,落山行去坐免費接駁巴士返去停車場取車時突然間落起雪來 ~~

晚上開車再加上落雪路滑所以仲更加要小心駕駛 ~~

沿途都見到有剷雪車一路在清理路上的積雪 ~~

原本有打算訂白川鄉裡面的民宿,但係遇著點燈日子加上我們太遲決定出發,白川鄉啲民宿幾個月前已經一早爆滿喇 !!  所以今晚我們會入住高山市的酒店,由白川鄉去高山市大約係50公里 ~~

雪越落越大,車速開始減慢 ~~

晚上7點50分我們到達了高山市的一番街 ~~

去酒店之前一定要食返餐好嘢先 !!

來到飛驒高山地區,除了古街的觀光之外,大部份人的目標都包含了一嚐知名飛驒牛肉的美味,但是在高山地區販賣飛驒牛肉料理的餐廳何其多,到底要選那一家是個令人頭痛的問題。

飛驒牛是飛驒人用滿懷愛心養育出的上等黑毛和牛。 其肉質軟,味道醇,就像溶透在口中般,真可稱是味中的藝術品,非常好吃 ~~

介紹咗咁多關於飛驒牛,但最可笑嘅係小妹我係因為宗教嘅原因所以係唔食牛嘅,咁就唯有搵一間除咗有飛驒牛之外仲有比較多其它肉類或食物選擇嘅餐廳囉 ~~

嘩…….!! 睇見Michelle同我蝦子餅2個叫的飛驒牛餐個賣相,我唔需要親自試都已經覺得好好味喇 ~~

而我就試咗下圖左上角的湯烏冬以及右下角的飛驒豬肉飯,味道都唔錯喎,好滿足的一餐 ~~

今日玩咗成日咁攰,真係要去溫泉酒店浸吓溫泉休息吓喇,今晚入住的酒店 Spa Hotel Alpine Hida Takayama ~~

酒店大堂 ~~

標準雙人房的週末價格係 12600 Yen一晚,包早餐 ~~

喺酒店泡完溫泉就上床早啲休息喇………!! onion-head100

 

Day 5 (25/1/15) —

一早7點鐘起床望出窗外,嘩…….!! 昨晚的一場大雪令高山市啲屋頂都堆咗一層厚厚嘅雪,而且天色仲麻麻地添,希望今晚去白川鄉睇點燈的遊客們唔會失望而回啦………我們昨晚睇完點燈離開時先開始落雪真係算好好運氣㗎喇 ~~

8點鐘落樓下餐廳嘆返個酒店早餐先 ~~

食飽早餐之後我們要準備開車返去名古屋了。Michelle今日下午會一個人先返香港,而我和蝦子餅會再多留一日喺名古屋,明天一早才搭飛機返香港 ~~

離開酒店之前我又補返一張酒店外觀的相片先 ~~

雖然落咗場大雪,但馬路上的積雪好快已經被清理了,開車就唔會咁容易跣胎咁危險喇 ~~

返去名古屋之前我們順便去咗高山地區最有人氣的旅遊景點「 高山古街」~~

我們架車就泊咗喺三川屋本店的左邊過咗橋之後嘅一個小型停車場 ~~

自古以來,一直是飛驒地區(現在的岐阜縣北部)經濟重地的高山古街有著「飛驒的小京都」之稱。 樸素的老街兩旁盡是日本江戶時代風味的街屋宅第,屋簷下的清晰小水道更加點綴了這歷史文化街區 ~~

沿路味噌店、雜貨店、咖啡廳、餐廳、紀念品店等現代商店林立,但絲毫不損老街的歷史風情 ~~

高山古街保留著傳統日式風格,走在日本江戶時代原色古味的建築當中,幽雅的氣氛,展現了日本文化的傳統美 ~~

如果有時間的話又可乘坐人力車代步遊玩,可惜今次比較趕時間,所以到此一遊影返幾張相我們就走了 ~~

飛驒高山的吉祥物 ~~

離開時路過見到國分寺的三重塔 ~~ yxh40

然後我們就正式起程返名古屋市了 ~~

由高山回名古屋大約係157公里 ~~

雖然今日天色麻麻地,但沿路上兩旁啲雪景好靚呀 !! onion-head16

中午返到去名古屋就放低咗Michelle喺名古屋車站,佢趁搭電車去機場之前仲有少少時間可以順便買啲手信先,而我同蝦子餅還完車之後就去咗大須觀音通食午餐 ~~

再來大須觀音通一次係因為今次日本之行原來無食過我們2個都咁鍾意嘅鰻魚飯,所以專程來呢間食蒲燒鰻魚飯 ~~

真係好好味,啲鰻魚真係入口即化,尤其係啲鰻魚汁配上一粒粒柔軟的飯,我唔識寫亦好少寫食評嘅,總之呢間鰻魚飯真係無得輸囉 ~~

食飽之後就周圍行吓,因為明早要返香港喇,所以今個下午係購物嘅最後機會了 ~~

亦都係最後買手信嘅時間喇,因為下個月初要返吉隆坡過農曆新年,所以就趁今次機會順便買一盒盒日本出產嗰啲精美食物禮品返家鄉同親朋戚友們拜年嘛 ~~

晚上返到酒店附近食晚飯,竟然喺對面街俾我們搵到一間平價餐廳,到底有幾抵食呢 ?

一個豚肉炒野菜定食,一份炸雞,再加一個玉子雞肉飯定食,總共才¥1380 (大約港幣86),價錢真係仲抵過食香港的大家樂呀 !!

 

Day 6 (26/1/15) —

今早要回程返香港喇,我們乘搭早上9點50分開出的國泰CX533班機,所以要一早7點就退房然後搭電車去機場喇 ~~

7點42分到達名古屋國際機場,有圖有真相,嘻嘻 !!

辦理了登機手續之後我們就去了機場的美食廣場食早餐 ~~

一於就食碗豬骨拉麵吧 ~~

再試埋另一個名古屋名物「手羽唐」,其實就係中式芝麻雞翼,甜的但味道唔錯~~

鬆弛熊我們要返屋企喇,Bye Bye Japan !!  onion-head19

難得係日本上嘅飛機餐,果然質數好過香港上嗰啲飛機餐多多聲,最起碼個賣相同啲飯都好味得多喇 ~~

以下係我今次日本之行嘅戰利品,哈哈 !! onion-head105

 

全篇【完 】 多謝觀看 !!

 

 

白川鄉地圖:

http://rturing.web.infoseek.co.jp/Kankou/takayama/sirakawagou.JPG

官方網站

http://lightup.asia/schedule/

Weather Forecast:

http://www.jnto.go.jp/weather/chc/area_detail.php?sight_id=12

 

 

 

 

 

 

 

 

 

 

 

29 thoughts on “走進世界文化遺產【白川鄉】

    • 一般通常由日本晨早開出嘅航班啲餐都係喺日本上嘅,如果係下午或晚上開出嘅機就應該通常係香港上嘅,隻飛機一飛到日本就原機飛返香港,所以一次過上晒2餐平好多嘛…哈哈!!

  1. 白川鄉超級變態靚喎!喱姐又煮大毒雞!實在太可惡啦!哈哈!希望我都有機會去啦!T.T

    • 你只要明年唔去大陸而改去日本就一定有機會去啦!! 其實去日本一定平過你上次的川西或西藏之行呀,認真㗎!! ^^

  2. 兼六園好靚丫,好正宗既日式園林,有花有水 😀
    不過唔係自駕應該好難去到@@
    白川鄉平時已經好靚啦,成個童畫世界一樣
    晚上點左燈就變得更加靚,全年最靚就係呢個時間~

    • 我覺得兼六園個倒影好靚,不過如果唔係自駕係比較難去到。 而點咗燈嘅白川鄉簡直係靚到嘩嘩聲呀,你一定要去一次呀!! ^^

    • 因為我係好遲先決定出發去白川鄉㗎,所以無辦法訂到白川鄉合掌村的民宿,所以未能在白川鄉住上一晚~~

    • 咁又唔使sorry喎!! 就算唔得閒睇或者係無興趣睇都無問題㗎,大家都無義務一定要上黎支持我嘅,不過肯抽時間上黎留言支持我嘅朋友們我係非常感激㗎 !! ^^

    • 恭喜馮兄終於攪掂咗隻元陽油雞!! ^^
      係呀,冬天舖滿雪嘅白川鄉我已經覺得好靚好有童話feel喇,晚上點咗燈之後就更加係靚到殺死晒所有遊客啦 ~~

  3. 今日至得閒睇喱姐油雞,一貫靚相靚人靚景,我好喜歡兼六園,典型日式公園布局,小橋流水,植物剪形青蔥綠翠,影得好靚,一個字[正]

    • 妳好期待下次去白川鄉都見到厚厚嘅積雪? 唔好意思 !! 我依家先有時間回妳,但妳已經去完白川鄉返來了,深信妳呢次去仲大雪過我上年去嗰時,一定係全個白川鄉都變成白色一片喇……

Leave a Reply

Your email address will not be published. Required fields are marked *