加拿大自駕遊 – 【PART 1】黃刀極光的舞姿

2014計劃這次加拿大自駕遊之前我考慮了很久,到底什麼月份去看北極光最合適呢? 相信我這次做了一個最正確的選擇,看看以下這幅我在黃刀拍的北極光大爆發圖片就知道了 !! yxh75

其實要看北極光真是要碰運氣的,因為北極光很受天氣影響,如多雲就會未能碰上。但是如果運氣好的話,走到黃刀鎮的街上都能夠看到北極光,由於黃刀鎮的地理和天氣的關係每年可能觀賞到北極光機會多達250次。不過一般夏天都不建議去黃刀看極光,因為Yellowknife靠近北極圈,夏天接近極晝,能看到極光的時間少多了。每年的8月和9月就開始可以看到北極光,而且8月和9月還未開始下雪所以氣溫不會太凍,晚上最凍的氣溫都是在零下幾度左右。 10月和11月就開始落雪了,不過如果有雪的時候除了可以看北極光之外,還可以玩狗拉車和冰上電單車(SKIDOO)的活動,但還沒可以冰上釣魚,因雪還不夠厚。 而冬天12月和1月所有活動都可以了,但是天氣最凍,可能到零下三十多度,不過也是很好的體驗。但是因為氣溫太凍了,禦寒物品加裝備要帶好多,而且估計相機安裝在腳架上面幾分鐘之後就開始結霜了。 集合了那麼多網上的資料,個人認為9月底10月初最合適。而且這段時間正是加拿大的秋天,可以順便欣賞到黃葉紅葉的大自然美景,一石二鳥,所以我決定了2015年的九月出發。 除了黃刀看極光之外,我這次選擇的自駕路線主要的景點集中在洛磯山的範圍,包括最受歡迎的Banff National Park等等,這些地區的住宿選擇不太多,所以我在2014年12月就把所有的酒店住宿都訂好了。

一切都計劃好之後就安心地等出發了!!

 

以下是我們今次加拿大15天的行程 :

DAY 0 (19/9/2015) –

Hong Kong fly to Vancouver

(Accommodation : Sheraton Richmond Hotel)

 

DAY 1 (20/9/2015) –

– McArthur Glen Designer Outlet

– Steveston Fisherman’s Wharf

 

DAY 2 (21/9/2015)

Vancouver (YVR) fly to Yellowknife (YZF)

– Jackfish Lake

– Frame Lake

(Accommodation : Narwal B&B )

 

DAY 3 (22/9/2015) –

– Kam Lake

Grace Lake

– Range Lake Trail

– Aurora explorer tour

(Accommodation : Narwal B&B)

 

Day 4 (23/9/2015) –

– Yellowknife (YVR) fly to Edmonton (YEG)

– From Edmonton airport drive to Jasper (365km)

(Accommodation : Rockaboo Inn)

 

Day 5 (24/9/2015) –

– Jasper Patricia & Pyramid Lakes

– Jasper Town

(AccommodationRockaboo Inn)

 

Day 6 (25/9/2015) –

Jasper >> Banff

– Icefield Parkway

– Sunwapta Falls

– Canmore Town

(Accommodation Platinum Suite Resorts)

 

Day 7 (26/9 Sat/2015) –

– Banff National Park

– Two Jack Lake

– Lake Minnewanka Trail

– Banff Town

(Accommodation Platinum Suite Resorts)

 

Day 8 (27/9/2015) –  

– Bow River

– The Fairmont Banff

– Sulphur Mountain

(Accommodation : Spring Creek Vacation – Rundle Cliffs Lodge)

 

DAY 9 (28/9/2015) –

– Lake Louise

– Plain of Six Glaciers

(Accommodation : Spring Creek Vacation – Rundle Cliffs Lodge)

 

DAY 10 (29/9/2015)

– Bow River

– Yoho National Park

– Field

– Golden

– Revelstoke

– Salmon Arm

(Accommodation : Comfort Inn & Suites Salmon Arm) 

 

DAY 11 (30/9/2015)

– Adams River Salmon Arm

– Shuswap Lake

– Kamloops

(Accommodation : Scott’s Inn & Restaurant @ Kamloops)

 

DAY 12 (1/10/2015 ) –

– Kamloops Aberdeen Mall

– Walmart at Merritt

 – Vancouver

(Accommodation : Sheraton Richmond Hotel)

 

DAY 13 (2/10/2015) –

– Vancouver Chinatown

– Gastown

– Granville Island Public Market

– Richmond Centre

(AccommodationSheraton Richmond Hotel)

 

DAY 14 (3/10/2015) –

– Stanley Park

– English Bay

– Vancouver fly back to Hong Kong

 

DAY 15 (4/10/2015) – Arrive Hong Kong

 

 

DAY 0 (19Sep2015) –

我們乘搭國泰航空CX888直飛溫哥華的班機,凌晨1時15分起飛,因為有16小時的時差關係,溫哥華嘅時間係GMT-8,即係慢香港16小時,所以我們抵達溫哥華係9月19號的晚上9時30分。 接近12小時的飛行時間,再加上喺飛機上又瞓得唔好,所以落咗機之後就直接搭酒店的免費機場穿梭巴士去酒店休息。 以下就係Sheraton、 Hilton 和Marriott酒店嘅免費機場穿梭巴士 ~~

其實今次的自駕遊有我、蝦子餅、Jane、Swing 和Wing,一共5人。 不過Swing 和Wing她們2人會比我們早2天先去到黃刀。 而Jane就會明晚才到達溫哥華,等Jane到咗溫哥華之後我們3人會一齊坐內陸機前往黃刀同Swing 和Wing 2人匯合,然後先正式開始我們嘅自駕遊行程。 今晚喺溫哥華我同蝦子餅2人住喺位於Richmond嘅Sheraton Vancouver Airport Hotel,距離機場只係7公里的路程,不過附近有Skytrain站、食肆和商場,都算好方便。 加幣$121一間雙人房,不過唔包早餐 ~~

 

DAY 1 (20Sep2015) —

今早瞓到自然醒,之後我們就行過去酒店對面嘅呢間White Spot嘆個美式早餐先 ~~

今日溫哥華主要係hea遊而且今日又冇打算租車,主要係搭skytrain同巴士去附近啲景點逛一下。 中午無無聊聊就出發去新開嘅McArthur Glen Designer Outlet參觀一下,睇下有咩抵買嘅貨品先 !!

由酒店出發行去Richmond-Brighouse站搭skytrain,路程大約10分鐘左右 ~~

我同蝦子餅2人買了2張一般Adult的Day Pass,CAD$9.75一張,使用日票的話可以當天在溫哥華三個區內無限次任搭 ~~

然後搭4個站去到Templeton站落車,跟住個路牌行過去就係了 ~~

今日溫哥華天氣真係麻麻地,密雲而且無乜陽光,希望明天去到黃刀會有好天氣啦……..!!

McArthur Glen Designer Outlet原來有好多我想睇嘅牌子例如Columbia等等…都仲未開張,依然仲係裝修中,要下個月先開始營業 ~~

不過喺呢間專賣戶外用品嘅店舖,我蝦子餅買到一件平靚正嘅羽絨,我又買咗幾對wool嘅厚襪 ~~

而其他牌子又冇乜嘢啱心水,所以行咗一陣下午2點鐘我們就離開了,繼續去下一個景點Steveston Fisherman’s Wharf 。 搭Skytrain返到去Richmond-Brighouse站之後我們轉坐402號巴士,大約20分鐘的車程我們就到咗Steveston Fisherman’s Wharf漁人碼頭了 ~~

Steveston Fisherman’s Wharf曾為Richmond列治文市的發源地,雖然是個小小漁港,但現已發展為觀光區及住宅區 ~~

突然間烏雲密布,天色開始轉暗,好似就快開始要落雨咁 ~~

喺呢度仲可以參加觀鯨之旅 ~~

唔止遊客會前來觀光,當地人都會帶啲愛犬來散步同買海鮮㗎 ~~

這邊就是賣魚貨的船隻集中的碼頭 ~~

雖然天氣麻麻,但水面的鴨子海鷗們也都在悠遊 ~~

呢度有啲似三藩市嘅漁人碼頭,一樣好值得去,三藩市嘅漁人碼頭餐廳選擇就比呢度多,不過最大嘅分別同特色就係Steveston Fisherman’s Wharf可以向停靠喺碼頭邊上的漁船直接買海鮮 ~~

海膽真係便宜,3個才賣10蚊加幣咋 ~~

逛咗一圈突然間開始落雨了…….所以搵咗間雪糕店食杯雪糕避一避雨先 !! 等到啲雨無咁密就搭巴士返去酒店 ~~

晚上6點幾我們又再出發行去酒店對面嘅呢間Ebisu Japanese Restaurant食壽司 ~~

晚飯後我們去溫哥華機場接我們的其中一個團友Jane的機 ,佢一樣係搭國泰CX888嗰班機到溫哥華,然後就返酒店執拾行李準備明天一早搭早機飛去黃刀鎮 ~~

 

DAY 2 (21Sep2015) —

今早天未光我們就退房了,因為我們要搭酒店最早嗰班5點半嘅shuttle bus去機場 ~~

晨咁早,機場人影都唔多隻 ~~

今早飛去黃刀我們係乘搭西捷航空 (Westjet) ,來回機票價錢要CAD505但竟然唔包括寄艙行李費,寄艙行李係要另外收費嘅,我同蝦子餅2人只得1件寄艙行李,唔超過30kg收費係CAD26.25 ~~

昨天試過WhiteSpot啲waffle覺得唔錯,反正機場terminal 2又唔太多早餐選擇,結果就帶咗Jane去試吓 ~~

溫哥華(Vancouver) 飛去黃刀(Yellowknife) 的WS108班機並唔係直航,要先經埃德蒙頓(Edmonton) ,不過2程機嘅飛行時間加埋都係2個小時又30分鐘,都好快啫!!

今次加拿大之行要坐2程長途飛機,所以除咗我私人伴遊蝦子餅之外我仲帶咗豬小姐去陪我,嘻嘻.....!!

0805準時起飛,下午1時20分就抵達黃刀機場喇 !!

非常迷你嘅Yellowknife 機場,一落機行到去行李輸送帶就會見到呢隻北極熊和海豹㗎喇 ~~

取咗行李之後喺機場的National租車公司租咗架5座嘅車,方便我們呢2日喺黃刀到處自駕去遊覽,2天嘅車租係CAD100 + CAD65保險費 ~~

離開咗溫哥華來到黃刀鎮明顯天氣變得晴朗,有藍天呀!!! yxh06

呢架就係我們嘅黃刀紅色戰車喇……..準備出發…..go!!!

最正係個車尾嘅北極熊車牌,好特別而且又有代表性 ~~ onion-head68

起程之前介紹一下黃刀鎮呢個地方先!!

黃刀鎮位於加拿大西北領地(Northwest Territories),地處世界第十大湖Great Slave Lake,是加拿大西北地區的首都,更有【北極光之都】的稱號。黃刀鎮正好被北極光橢圓環狀區(Aurora Oval)所涵蓋,加上冬季晝短夜長光害少,所以能見到極光的機率也就相對提高。 而且看極光並不是越北邊越好,它只會出現在一條極光帶(Aurora Oval)裡面。而Yellowknife就座落於極光帶的正中間,加上Yellowknife是所有能看到極光的城市中,最少視覺阻礙,因為山並不多,所以這裡被譽為是全世界觀賞極光最棒的地方。

極光是由於太陽所釋放的帶電粒子射向地球,與北極上空極地高層大氣中的原子和分子碰撞時,帶電粒子的能量在瞬間被激發釋放,而產生的燦爛眩目光芒。 追尋極光是許多人一生的夢想,這於天河之上的絢麗光芒,千百年來不斷勾起人們的猜測和幻想,古代的中國人、日本人、希臘人、羅馬人都有關於極光的文字描述,愛斯基摩人將之視為鬼神引導死者靈魂上天堂的火炬,其他民族也有不同的極光傳說。如今科學界雖已提出解釋,但對這道幸福之光的追尋,卻仍深深烙印在人們的靈魂深處,令到追尋極光成為了許多人一生之中必須去體驗一次的夢想 ~~

上圖清楚見到黃刀的道路其實好簡單,黃刀鎮個範圍亦都好細,而我們今次2天黃刀的遊覽景點主要包括幾個湖景,Great Slave Lake,Jackfish Lake,Frame Lake,Kam Lake,Grace Lake以及Range Lake 。我們就由黃刀機場(Yellowknife Airport)出發去呢2晚入住嘅民宿先 ~~

一出機場的Old Airport Road右邊就會見到呢個牌「Welcome to Yellowknife」同埋呢架小型戰機 。來到黃刀鎮又要再調較個時間先,溫哥華嘅時間係GMT -8,而黃刀係GMT -7,即係慢香港15個小時 ~~

話咁快就到達民宿了…….Narwal B&B民宿座落在大奴湖岸邊 ,距離黃刀機場只係5.7km的路程,這是一間家庭經營的湖邊民宿 ~~

我同蝦子餅租嘅係湖景家庭套房,間房好大間而且有個pantry同飯廳仔,2晚嘅房租係CAD$250 ~~

民宿好抵住,不過缺點係房間收唔到wifi訊號,要上去2樓個寫字樓對住部router先勉強收到微弱嘅wifi訊號,另外就係要節約用水,因為民宿啲水係要靠水車供應嘅 ~~

民宿門前與周圍環境 ~~

而我最喜歡嘅係民宿對住的呢個大奴湖泊(Great Slave Lake),晚上只要天氣好的話,唔需要去太遠都可以喺湖邊欣賞到極光  ~~

個湖景確係好靚呀!! yxh06

喺民宿同另外2個團友Swing和Wing匯合咗之後我們5人團隊終於齊腳可以正式開始自駕遊行程了 ~~

首先經過嘅係杰克菲什湖 (Jackfish Lake) ~~

原來黃刀鎮9月中已經開始進入深秋了,公路兩旁已是處處黃葉,秋意正濃 ~~

然後就向長湖 (Long Lake)嘅方向駛去 ~~

自駕遊嘅樂趣就係想去咩景點都比較自由,而路上見到任何靚景嘅話就隨時可以搵地方停車影相。黃刀鎮真係好少好少人,呢2日去嘅景區連同遊人打招呼嘅機會都無,喜歡影風景相片嘅朋友簡直會開心死呀, 因為唔會出現「人頭相片」嘛,哈哈!!

問當地人有咩好食嘅推介,他們一定會推介呢間專門食炸魚薯條的BULLOCK BISTRO,咁我們今日4點嘅午、晚餐就一於試吓呢間炸魚啦!

餐廳佈置非常有格調,牆壁及天花全寫滿名人旅客的留言及相片~~

餐廳每天只供應幾款魚(northern fish) 及麝牛(muskox)。一看餐牌,每款炸魚套餐都要加幣$20-$30,如點最出名的北極鮭 (Arctic Char),更要40元加幣。 它不是普通的炸魚薯條,由於廚房是即釣即炸的,而且炸魚裏是不會找到一根刺骨,難怪價錢都不便宜。 但餐廳啲餐具係好奇怪嘅,每隻碟啲款式一樣一個,而我們5人啲10隻刀叉都隻隻唔同款式,奇奇怪怪咁,唔通係餐廳嘅特色? 又或者所有餐具都係回收返來的2手貨或者係街坊啲贈品?

最離譜係我叫佢加薯條俾我,佢竟然用舊報紙來裝住啲薯條俾我囉!!所以我覺得佢咁好生意同咁多遊客幫襯係主要因為黃刀鎮無乜其它好嘅餐廳俾大家選擇囉 ~~

等枱嘅時候我們喺餐廳門口嘅湖邊玩咗一陣 ~~

食飽之後我們就開車去Frame Lake,架車就泊咗喺City Hall前面個停車場 ~~

在陽光下啲銀杏樹變得金黃色真係好靚呀!!

當時已經係傍晚接近6點鐘,但太陽依然未落山 ~~

回民宿嘅路上再次經過Jackfish Lake,但光線已經同下午嘅唔同了,所以又停車補多幾張相 ~~

回民宿之前我們去咗超市買咗啲乾糧、杯麵、即食意粉、水果等做宵夜....準備今晚半夜留守喺民宿捕極光 ~~

因為今晚9月22號嘅極光活躍預測指數(Aurora Forecast) 只係中等或一般(Moderate) ,並沒有21號咁活躍,所以當時都有啲擔心會見唔到 ~~

返到民宿休息咗一陣,入夜之後就開車出發去湖邊,打算搵啲光害少啲嘅地方捕極光。差不多晚上9時左右,開始見到一條眩目嘅綠色極光,開始出現喺我們身處嘅湖邊屋頂上空 ~~

然後漸漸出現了另外第2條,變成綠色加紫色嘅極光 ~~

後來啲極光開始慢慢減弱我們就決定先返民宿食啲嘢先,夜少少再出去民宿前面嘅湖邊再捕過 ~~

我今晚嘅宵夜係即食白汁意粉 ~~

食飽之後我行出去民宿門前望上天空,又清楚見到極光出現了 ~~

我們立即穿好晒啲保暖衣物,然後帶埋相機加腳架就行出去湖邊了 ~~

接近深夜十二時全個天空就連續上演幾幕大型嘅極光舞動場面,我們5人的讚嘆聲此起彼落,興奮到不停咁嘩..!! 嘩...聲咁大叫...!!

今晚簡直係超級極光大爆發呀,有紫色同綠色,午夜過後在滿天飛舞,太震撼太壯觀了,好感動呀!! yxh06 現場嘅感覺係整個天空都係被一大片極光包圍住咁,好似UFO快要從天而降咁,啲極光個移動速度都幾快,每幾秒個天空嘅畫面都變得不一樣,變幻無窮……..而我個頭同個身就跟隨住啲極光嘅移動方向係咁轉,成晚目不轉睛地不斷望住啲滿天飛舞嘅極光,而我隻手就好忙咁不斷按下相機快門。 我部相機一早已經set好咗喺腳架上面,咁難得一遇嘅機會,當然希望可以多影幾張極光相片啦! 我每8秒影一張所以今次真係影咗好多張極光相片,只揀選咗以下幾張我最喜歡嘅同大家分享一下 ~~

咁精彩嘅極光大匯演一直到凌晨三點幾才落幕 ~~

我們其實只逗留黃刀鎮2晚,即係話我們只有2次見到極光嘅機會,但今晚已經好幸運地碰上非常震憾嘅極光大爆發,民宿前面湖畔的上空整晚上演了一幕又一幕動人的極光飛舞場面,都算係不枉此行喇.....今次雖然山長水遠來到黃刀鎮,但當見到漫天極光飛舞之時,就咩都變得值回票價喇!!

我帶住滿足又幸福滿載嘅心情返房去休息喇,晚安!!

 

 

DAY 3 (22Sep2015) – 今早女屋主Cathy為我們準備咗一盤肉桂麵包(cinnamon roll)做早餐,可惜唔啱我口味,好彩買多咗杯麵同即食意粉做早餐 ~~

今日天氣一樣係晴朗,中午出發去黃刀嘅其它2個湖遊覽,就係Kam Lake and Grace Lake。 路經一個寫住「Curry Drive」咖喱路嘅路牌,咖喱立刻停車同個咖喱路牌影返張合照先,嘻嘻!!

之後話咁快轉個灣就到咗Kam Lake了 ~~

好平靜嘅湖面,藍天白雲嘅倒影清晰地出現喺水中,好靚呀!!

Kam Lake嘅隔離就係另一個比較細嘅Grace Lake ~~

我們偷偷地上咗架遊艇仔影相,嘻嘻...!!

見到呢排咁齊整咁靚嘅樹,忍唔住要影返幾張跳跳相先!!

1 …… 2….. 3……  跳 !!  yeah !! 得咗!!

跟住又開車去Kam Lake嘅另一邊,因為唔同嘅角度可以欣賞到唔同嘅湖景嘛 ~~

乜個大車輪咁污糟㗎??咁我條牛仔褲咪黑晒囉...!! 貪玩之過!!

午餐嘅時候我們返去黃刀鎮嘅大街搵嘢食,見到間A&W,突然間好懷念A&W嘅Ice-Cream Float,係我小時候嘅小小情意結。 因為香港無A&W,而且黃刀鎮又無乜其它好嘢食,所以就一於帶大家試下呢間快餐啦,我覺得好味過麥記囉!!

下圖嗰幾杯就係Ice-Cream Float喇,真係幾好味㗎!! 佢嘅炸蕃薯都唔錯㗎 !! onion-head68

食飽又係郁動吓嘅時間喇,我們揀咗一條既輕鬆而且風景又漂亮嘅湖邊步道Range Lake Trail散吓步 ~~

嘩.....!! Range Lake 好靚呀!!

返到民宿晚餐時間又到了,不過黃刀鎮真係好細,而且餐廳得嗰幾間快餐店,真係無乜選擇,好彩Narwal B&B民宿有簡單嘅廚房和微波爐可供煮簡單嘢食咋 ~~ yxh16

今晚我們參加咗一個Aurora Ninja嘅極光追蹤團,團費每人CAD110。帶團嘅David同Wayne係住喺黃刀鎮嘅香港人,佢地2公婆各揸一部車,一人照顧一部車嘅人數,揀佢地個團係因為希望可以到市郊不同的湖畔,在無光害、漆黑環境之下欣賞壯麗的極光,而且大家都講廣東話,同聲同氣,感覺親切啲嘛!!

晚上11點來到民宿接我們,開車去到郊外嘅湖邊停低架車,我們全組人落車set好腳架,企喺度捱凍,等呀等… 等呀等…. 熱朱古力都喝咗兩杯了,仲係乜都唔見 ~~

其實可能有極光,只不過今晚實在雲層太厚所以無辦法見到,呆等咗一小時後,我們開始唔敢抱任何希望了 ~~

之後再轉咗幾個捕極光地點,結果都係食白果,所以極光係可遇不可求㗎!! 昨晚咁幸運遇到咁強嘅極光已經好滿足了,就算今晚見唔到我都唔會有任何怨言,知足常樂吖嘛…….onion-head29

我朋友上次去芬蘭6日都完全睇唔到極光,我已經好好彩㗎喇 ~~

都係早啲打道回府大覺瞓吧啦!!

 

 

 

加拿大自駕遊 – 【PART 2】洛磯山脈之國家公園篇

加拿大自駕遊 – 【PART 3】洛磯山脈之完結篇