加拿大自駕遊 – 【PART 3】洛磯山脈之完結篇

 

DAY 9 (28Sep2015) —

今天一早我趁早咗起床就出去附近走走,參觀一下Rundle Cliff Lodge周圍嘅環境 ~~

呢個住宿環境真係一流呀,前面有雪山湖景,湖上又有一條小木橋,呢個係我小時候睇童話故事或者係卡通片才會出現嘅畫面,今日發覺原來喺現實世界中都竟然存在㗎 !!  yxh06

早上7點鐘左右,湖水平靜得好似鏡面一樣,洛磯山脈及樹木嘅倒影清晰可見 ~~ onion-head16

今日個天色比昨天仲更加好,只見藍色一片,萬里無雲,咁今日應該唔會落雨卦 !!  洛磯山脈自駕遊嘅三日重點行程都幸運地遇到好天氣,我非常的感恩 !!! onion-head76

咁嘅住宿環境,除咗2個字「靚、正」之外,我真係唔識得形容,詞窮呀 !! yxh43

位於2樓呢個就係我哋昨晚到過嘅戶外按摩熱水池,一整天嘅行程、玩咗一日之後晚上來浸吓熱水可以消除疲勞嘛,我好鍾意浸溫泉㗎,去旅行時如果無溫泉池但有熱水池都唔錯吖 ~~

浸喺戶外按摩熱水池一樣可以望到洛磯山脈,正唔正呢? onion-head23

行完一圈之後8點半返到酒店就開始煮我同蝦子餅2人嘅早餐,因為只係簡單地用返昨晚嘅海鮮湯去煮即食麵,所以佢哋3個女人話自己搞掂自己嘅早餐喎,咁我今早就可以煮少啲喇 ~~ yxh16

食飽早餐就起程出發去今日另外一個Banff National Park範圍內嘅著名景點,路易斯湖 (Lake Louise),今日的行程都非常讓人期待 ~~

我哋9點30分起程,由Canmore的Rundle Cliff Lodge出發開車去Lake Louise,路程係77公里 ~~

路經Lake Louise的一個補給站,我哋就停咗一陣去上洗手間、順便逛吓啲賣手信同零食嘅小店 ~~

然後再繼續15分鐘嘅車程我哋就來到Lake Louise湖區了 ~~

Lake Louise是湖名亦都係鎮名,此為湖名的Lake Louise,得名自維多利亞女王的女兒”路易絲”。Lake Louise的湖水水源來自冰川融化了的水,也因此夾帶了大量冰山的礦物質而散發出翡翠嘅顏色 ~~

Lake Louise比起呢幾日我哋去過的幾個湖區景點算係遊客最多的一個,湖邊見到好多旅行團和遊客,而好多遊客或豪華旅行團都會選擇入住呢間湖邊的The Fairmont Chateau Lake Louise 城堡酒店 ~~

今日嘅天色真係好藍 ~~ onion-head29  (相片無PS過的)

Plain of Six Glaciers Trail係洛磯山脈很著名而且係其中最優美的徒步路線之一,呢條路線係從Lake Louise的Fairmont Chateau Lake Louise酒店開始,沿著湖邊一直行到山上的Teahouse,一程係5.3公里,來回差不多11公里路,徒步時間約4~6小時。 而另外仲有2條同樣的經典路線,分別係Lake Agnes Trail以及Big Beehive Trail,如果住喺湖邊酒店嘅遊客,有時間又有體力嘅話可以首先選擇行Lake Agnes Trail,然後再接上Big Beehive Trail,最後還可以接上Plain of Six Glaciers Trail 。 不過我哋今次只係選擇咗一條最值得行嘅Plain of Six Glaciers Trail ~~

開始嘅時候係沿著Lake Louise湖邊行人徑走約2.5公里,全程平坦易行,一直走到Lake Louise的盡頭,然後才開始向上爬升 ~~

回頭欣賞Lake Louise和城堡 ~~ onion-head16

沿路可以望到嘅係Mount Lefroy (拉夫勞易山)以及Mount Victoria(維多利亞山),Lake Louise三面雪山環抱,湖水碧綠,美得令人窒息 ~~ yxh06

今日天朗氣清,太陽高掛,太陽曬到湖面閃閃發光,好似翡翠面加咗無數粒鑽石、閃吓閃吓一樣 ~~ onion-head25

一直走到Lake Louise的盡頭,呢一段嘅湖面非常平靜,我哋可以清楚地見到雪山的倒影 ~~

來到Lake Louise的盡頭其實是她的源頭所在,冰川融雪正是從這裡流下注入湖中 ~~

個湖灘配合咗早上嘅光線都顯得好特別 ~~

再向前走一小段,然後穿過一片樹林,開始慢慢咁爬升 ~~

和冰川嘅距離越來越近了 ~~

繼續加油 !! monkeys54

呢一段路程令我憶起2014年10月的四川稻城亞丁之旅,呢一段路線有啲似我上去五色海嘅徒步路線,又係一樣咁望住個雪山嘅方向一路往上走,不過呢一段路唔係高原地區所以唔會有高原反應, 最高嘅位置都係2100米,而且路線又唔算太長,所以行得舒服得多喇……..!!

見我笑住行就知幾輕鬆啦 !! yxh75

沿途風景靚到感覺就好似喺明信片裡頭旅行一樣 ~~

Plain of Six Glacier(六冰河平原)曾經係六條冰川匯聚的地方,我哋經過的其中一個Lefroy Glacier ( 拉夫勞易冰川 ),幾乎快要成為冰川遺迹了。

冰川已經退縮到山上很遠的地方,只留下一道長長的砂石“河流”~~ onion-head30

一步一步,漸漸地,Lake Louise已經遠遠的在我們身後了。回頭遠眺Lake Louise ~~

再往上爬,我哋離冰川越來越近了,感覺就喺我旁邊一樣 ~~

再走多10分鐘就終於到了山頂的Plain of Six Glaciers Teahouse,呢個Teahouse係主要提供登山人士嘅一個歇腳地方 ~~

我哋有自備補充能量嘅零食同飲品,所以就坐咗喺Teahouse前對住個靚景開餐同休息咗一陣 ~~

↓↓ 我同蝦子餅的午餐 ~~ onion-head2

前面呢個就係維多利亞冰川 (Victoria Glaciers) ~~

其實到咗Teahouse未算係盡頭的,離冰川最近的地方還需要在向上多走1.6公里,不過最後呢段路大多都係走在光禿禿的山脊上,而且多走3.2公里路的話我哋落山之後開車返到去Canmore會太夜了,所以我們去到Teahouse就決定原路落山 ~~

回程的路上我哋見到一組騎馬的女士 ~~

襯上cowboy帽好有以前萬保路廣告嗰feel ,好型!!

又再路經同一個位置,因為太靚所以忍唔住又停低腳步影多幾張相 ~~

Plain of Six Glaciers Trail 上, “人路” 與 “馬路” 大部分路段係分開的,人走在山崖上,而騎馬就走在山谷底 ,所以唔似上亞丁山咁人馬爭路 ~~

去到中段仲有另一個登山步道入口,呢條路線可以去到Lake Agnes 和Lake Mirror ~~

又見到松鼠仔出沒 ~~ onion-head25

過咗湖灘之後,兩旁都有巨大的岩壁,呢道應該係攀岩愛好者的天堂喇 ~~

輕輕鬆鬆就完成咗個Plain of Six Glaciers Trail了,下午3點45分我哋返到去Lake Louise嘅停車場攞車,然後起程返去Canmore鎮 ~~

途中我哋又見到野生鹿 ~~

傍晚5點05分返到去Rundle Cliffs Lodge就準備我哋嘅晚餐「香煎魚柳白汁蘑菇長通粉」 ~~

今晚係農曆八月十六,食飽之後我哋又有出去追月,可惜今晚連月亮都完全見唔到一面 ~~ yxh28

等咗一陣我哋就放棄了,寧願將今晚嘅寶貴時間用來再去浸多一次按摩熱水池,因為明早要退房了 ……… onion-head39浸完真係好舒服,好容易入睡而且可以一覺到天光 ~~ onion-head24

 

DAY 10 (29Sep2015) —

去到今日Day 10總算係順利完成咗今次Alberta省洛磯山脈自駕遊嘅主要5天行程與景點了 !!  onion-head105

我哋嘅下一個目的地係位於British Columbia (BC省) 嘅Salmon Arm。由Rundle Cliff Lodge出發去Salmon Arm要409公里,途中會路經幾個小鎮。今日路程比較長而且唔知道中途有無啱食嘅餐廳,所以我多準備咗幾份牛角包三文治 ~~

除咗堂食仲可以外賣添 ~~ yxh55

我哋早上9點20分起程離開Canmore ~~ yxh11

 

 

正式同洛磯山脈講再見喇!!  onion-head19onion-head19

行駛咗90公里之後我哋去到Yoho National Park附近嘅小鎮,Field (菲爾德)  ~~

Field係一個被群山包圍嘅小鎮,係當年修太平洋鐵路時築路工人的工棚區,現在轉變為一個旅遊小鎮,鎮上的屋除咗部份係自住之外,好多已經變為家庭旅館。小鎮的入口處有Yoho National Park (幽鶴國家公園)遊客中心 ~~

無諗過呢個地方會咁靚,因為網上嘅資料唔多,真係一大驚喜 !! onion-head68

當時係早上10點半左右,佢哋就對住個靚景坐咗喺一張戶外枱食我今早準備多咗嘅幾份牛角包三文治 ~~

食完三文治又再繼續行程,58公里之後我哋又經過另外一個 Golden 小鎮~~

今日無主要嘅景點要去,所以大家喺Golden小鎮閒逛咗一陣 ~~

逛吓啲戶外用品店以及精品店等等.....

然後再繼續148公里嘅路程.....yxh11 下一個地方我哋來到Revelstoke小鎮 ~~

當時係下午2點40分,原本打算搵間餐廳食個下午茶,點知行咗一圈都無乜邊間啱心水,突然見到有間好有親切感嘅Hong Kong Restaurant喎,仲以為有港式下午茶餐或者係甜品雪糕食啦,點知一入到去見到係做旅行團體餐嘅餐廳一間,而且擺放喺櫃面嘅食物我哋見到一啲都唔開胃囉 ~~

yxh49

下午4點離開Revelstoke再繼續今日嘅最後一段路程,104公里之後我哋終於到達咗我哋今晚入住嘅地方Salmon Arm喇!! 今日到訪過嘅幾個小鎮都緊靠著1號公路,而1號公路係往溫哥華的必經之路,所以我安排咗今晚住喺Salmon Arm一晚,其中一個原因都係因為順路 ~~

今晚嘅酒店係Comfort Inn,1晚標雙房係CAD245.90 + 13% tax,有免費wifi,包早餐,亦都有熱水池 以及免費泊車 ~~

↓↓ 左邊係恆溫泳池,右邊係按摩熱水池,我今晚一定都要試吓 ~~onion-head86

上到酒店房間安置好行李之後我哋就開車去附近嘅商場行咗一陣,主要又係去超市買飲品同零食 ~~

今晚嘅住宿係無廚房嘅普通酒店房,所以今晚我哋要外出食晚餐,而小鎮真係選擇不多,都係呢啲……不過味道就麻麻地囉 ,主要係啲肉嘅質感好奇怪 ~~

然後返酒店洗白白、浸熱水池 onion-head102, 跟住就... onion-head100

 

DAY 11 (30/9/2015) —

今早我哋7點半就食早餐,因為今日除咗有兩個Salmon Arm嘅景點要去之外,我哋仲要趕路去下一個地區「Kamloops」 ~~

酒店嘅早餐有部格仔餅機俾我哋玩,自製嘅格仔餅感覺特別好味㗎 ~~ yxh75

Salmon Arm  (鮭魚灣)係個美麗又寧靜的地方。Salmon Arm的得名,緣於這裡是三文魚(鮭魚) 回游生兒育女的地方,每年10月人們都會聚集來此觀看三文魚回游產卵。

我哋一早就去咗遊覽Salmon Arm  嘅主要景區Shuswap Lake (舒斯瓦普湖) ~~

晨早嘅景緻好迷人,雲霧令到個湖區好似仙景一樣 ~~

長長的湖棧道申向湖心 ~~

湖內的捕魚樁 ~~

Shuswap Lake的岸邊有個濕地公園,我哋順便入去行咗個圈參觀一下 ~~

而濕地公園前面的Lakeshore Drive旁邊就會見到呢條火車路軌 ~~

咁啱有火車經過,我就即時停低影咗幾張帶有藝術色彩嘅火車照片 ~~

然後就起程去今日嘅另一個景區「Adams River」~~

Adams River係加拿大BC省賞三文魚 (紅鮭魚)嘅主要河流,而最適合觀賞三文魚產卵嘅地點就係小蘇士瓦湖(Little Shuswap Lake)附近的羅海布朗省立公園(Roderick Haig Brown Provincial Park) ~~

早上10點半我哋來到Roderick Haig Brown Provincial Park嘅停車場 ~~

入園處有三文魚(鮭魚)的解說牌 ~~

鮭魚很特別的,它們在淡水產卵,游到海洋成長。只要產卵時機到來,它們總能找到回家的路。它們對抗強勁的水流游回出生地,在那裡它們產卵,受精,然後死去。它們的屍體漂下河流,成為鮭魚BB的營養,繼而維繫著淡水食物鏈的生命週期。每4年一次的幾百萬鮭魚大回游產卵,它們會游回去加拿大BC省內陸出生地產卵,由銀白色變成全身赤紅的鮭魚順著溪流回游,令到Adams River猶如一條美麗的紅地毯,無限延伸,令人歎為觀止。 而Adams River在每4年一次的鮭魚大回游時,都會舉辦”Solute to the Sockeye” (向鮭魚致敬) 的盛會 ~~

Roderick Haig Brown Provincial Park占地約980多公頃,豐富的林項涵蓋了加拿大特產的道格拉斯杉,以及白楊、赤楊樹等等,流經公園的Adams River,向來都是賞鮭的最佳景點,只要沿著公園的步道漫遊同時向水中探索,就可以觀賞到紅鮭了 ~~

今次為咗安排9月尾去黃刀睇極光嘅行程,所以未能完美地安排到10月中到達Adams River觀賞鮭魚大回游,感覺有啲可惜!!  yxh28 不過幾百萬條鮭魚的大回游產卵係每4年才一次的,既然去年2014係鮭魚大回游,咁下一次應該係2018囉,反正今年2015都唔係鮭魚大回游,咁就感覺唔會太可惜囉 (自我安慰中,嘻嘻 !!)

網上資料同當地人都話Adams River 的最佳賞鮭魚時間係10月中旬,今日係9月30日所以未到最佳的賞鮭魚季節,所以全程我哋只係見到十多條,河中紅色一團一團移動嘅物體就係鮭魚喇 ~~

Roderick Haig Brown Provincial Park的嗰一段Adams River我哋見唔到好多鮭魚,所以就再向前開車去North Shuswap嘅嗰一段河流試吓 ~~

呢邊有幾條路徑可以行到去河流地區,我哋揀咗行Cottonwood Trail ~~

呢一段河流比較淺水,岸邊亦都可以比較清楚地見到三文魚,不過唔多,只係得幾條咋 ~~ yxh28

見到得意嘅野菌 ,隨便拍一張 ~~

在加拿大釣魚必須嚴格遵守各省的法律。 首先要申請釣魚執照(Fishing license),每次出釣,都必需携帶釣魚執照。 而各省規則不同,每一省內也有依河川、湖泊不同,而有不同的規定。 其他如開放或禁釣的日期、可釣魚的種煩、大小、數量、可使用的釣具、餌及是否需要嚮導等都要依足當地嘅規定,這是爲了避免對魚類的過度獵殺 ~~

如果違反了規定,好可能會有魚警開罰單俾你㗎,我哋當日親眼見識到魚警巡河查釣魚人士嘅釣具以及釣魚執照 ~~

行完Cottonwood Trail之後我哋再開車前往下一段Adams River,呢一段嘅河水好深,無辦法見到三文魚,不過從唔同嘅角度欣賞一下Adams River都唔錯吖!!onion-head68

完成咗今日嘅景點之後我哋下一個目的地係Kamloops,由呢道出發去Kamloops鎮要73公里 ~~

下午2點抵達今晚嘅住宿Scott’s Inn。Kamloops唔算係一個旅遊區,所以酒店住宿嘅選擇好少,呢間算係比較方便而且價錢比較公道嘅一間,可惜雙床房嘅床比較細,佢哋3個女人一房就會比較逼一啲喇 ~~

yxh42

2房motel一晚嘅價錢係CAD$170 + 15% tax,有免費wifi、有個小型廚房,包簡單早餐4份 以及免費泊車 ~~

check-in咗之後我哋去咗鄰近嘅快餐店Wendy’s食晏 ~~

呢個鎮又無乜觀光點,咁就不如去行街購物啦 !!  位於Lansdowne Village嘅呢個購物區有好多店舖,有Coopers’s Foods超市、 London Drugs 、Dollarama 等等.....

既然有Coopers’s Foods超市,咁就一於入去睇吓可以買啲乜嘢食材、簡簡單單煮個晚餐大家一齊食啦,總好過又出去食快餐啦!!

結果我買咗包印度咖喱香料同啲冰鮮雞肉,再加啲蔬菜就整咗5碟咖喱雞飯出來喇!! yxh16

 

DAY 12 (1/10/2015) —

今次嘅14天加拿大自駕遊係由Vancouver (溫哥華)開始,亦將會喺 Vancouver結束,剩下嘅行程就只有其餘2天喺Vancouver市內嘅景點了。 今日由Kamloops開車返去Vancouver市中心要354公里 ~~

Scott’s Inn提供嘅簡單早點有咖啡/茶,橙汁加鬆餅一個 ~~

早上9點半我哋準時退房離開,返去Vancouver之前順道先去一個位於Kamloops嘅大型商場「Aberdeen Mall」俾大家些少時間行街購物,車程才20分鐘 ~~

蝦子餅今日都有收獲,買咗件減價貨嘅North Face風褸 ~~ onion-head68

我都無執輸,買咗2個呢啲cushion ~~ onion-head29

而Jane就買咗好多質地好靚嘅床上用品以及浴室用品 ~~

下一個掃貨熱點我哋又去多一個專賣平價食品同用品嘅Walmart超市 ~~

買、買、買 !!! 最後掃咗好多嘢食返香港 ~~ onion-head2Shopping完畢.....!!! 起程返Vancouver !!!

我哋行駛咗280公里路之後,中途停咗喺Abbotsford嘅Mill Lake Park俾大家去洗手間,順便當去多一個景點囉 ~~

Mill Lake Park其實係一個小小嘅湖邊公園吧了,無乜特別 ~~

仲有69公里就會返到去Vancouver了,繼續進發!! yxh11

過咗呢座Port Mann Bridge大橋之後我哋就差不多到咗Burnaby (本那比)了 。 2人組呢2晚會住喺Wing嘅舅父屋企,不過佢哋明天依然都會跟我哋行程一齊玩多一日 ~~

雖然加拿大被稱為楓葉國,但係原來我哋喺Alberta省係完全冇見過楓葉樹,整個Jasper、Banff、Canmore地區都完全見唔到,反而回到Vancouver地區就隨處都見到楓葉樹,十月初有部份已經轉咗鮮艷的紅色,好靚好靚!

onion-head16

車咗佢地2人去位於Burnaby嘅舅父屋企之後,我地3人組就去食晚餐喇 ~~

今晚揀咗一間我廿幾年前去過的「春秋火鍋」,廿幾年後再去一樣咁好生意,不過唔同嘅係以前食客大部份係1997年之前移民過去嘅香港人,而今次見到嘅大部份食客都係內地人,連侍應都要轉講普通話 ~~

食材一樣好新鮮但係印象中價錢已經貴咗好多了 ~~

食飽之後我哋3人組就開車返去Richmond區,因為呢兩晚我都係揀咗住同Day 1一樣嘅Sheraton Richmond Hotel,房間有兩張5尺大床,所以我哋三人同房無問題。 CAD121一晚,已包稅但無包早餐,不過有免費wifi和免費泊車 ~~

我哋房間的小露台對住內園景,都唔錯!!onion-head68

今天下午開始全程坐車趕路,感覺比行山仲要攰,今晚都係早啲去休息喇,明天仲有一整天嘅Vancouver行程等住我去玩㗎 !! onion-head24

 

DAY 13 (2/10/2015) —

今日嘅主要行程係Chinatown、Gastown以及Granville Island Public Market呢3個地方。 早上8點30分由酒店出發,先去Burnaby接2人組,然後再去Chinatown食早餐 ~~

深秋時節,清晨漫步溫哥華的百年唐人老街,路上遊人稀疏,今日溫哥華天氣麻麻地,天陰有雨 ~~

據統計,溫哥華地區居住著大約四十余萬華人,占居民人口比例19%,僅次于英裔居民數量,是名副其實的第二大族裔人群。 唐人街緊鄰太平洋鐵路溫哥華火車總站,是溫哥華開埠時的市中心,隨著城市的日益繁榮,市中心逐步西移,加上八十年代大量香港新移民湧入列治文,大量的新式商廈迅速崛起,唐人街上繁華不再,只剩下一些孤獨的老人繼續居住在這片老街上,守著祖上傳下來的産業。唐人街已從昔日的華人商業中心,退化成主要依靠吸引外來遊客才能維持的旅遊區,不過,從那些陳舊的樓宇間,你仍然能夠感受到強烈的中國文化氣息。 中國人的溫哥華移民史最早可以上溯到大清乾隆末年,先是跟隨白人淘金者進入卑詩內陸淘金,後來又大批充作太平洋鐵路的築路勞工 (網上資料) ~~

可能因為今日唔係周末,所以街上很安靜,未見有熙熙攘攘的人群 ~~

我哋周圍逛下,見到一間主要賣粥麵嘅餐廳,就決定入去食早餐 ~~

雲吞麵同皮蛋瘦肉粥嘅味道似足香港食開嗰啲,唔錯!!

下一個行程我哋來到溫哥華另一個著名的觀光地區,煤氣鎮 (Gastown), 它是溫哥華的一個老城鎮 ~~

現在的Gastown風貌是於1970年由民間發起的重建計劃 ~~

走在Gastown街道上的感覺,就感覺同歐州或美國啲街道差不多,不過行人路好似更寬一些,而且行人路邊啲樹木又比較多一啲,他們把以前的Water街恢復到原來的樣子, 如鵝卵石小路,磚石建築物,一些懷舊裝飾及一仿媒氣街燈等…………..

來到Gastown看蒸氣鐘固然係重點,但都唔好錯過其它好逛嘅地方喎 !!  此地紅磗地被維多利亞式的古老建築物包圍著, 頗有特色 !!  街道兩旁商店林立,有好多原住民手工藝品店、 紀念品店、 畫廊、 書店、飾品店、鞋店及一些有趣的店舖等…………….. 在這樣懷舊的街道中, 當然亦少不了有特色的餐廳以及咖啡店啦 !!

以下呢個就係令遊客駐足的著名蒸氣鐘「Gastown Steam Clock 」, 頂部會有蒸氣煙冒出 ~~

佢係世界上第一座以蒸氣作為動力的鐘,每小時鳴鐘一次而且亦會從小煙囪噴出蒸氣氣浪, 而每15分鐘也會發出哨子聲, 因此在蒸氣周圍難得會有清場的畫面, 想要跟它合照請大家排好隊吧 !!

總之佢嘅魅力沒法擋, 大家都爭先想跟它合照及近望內部嘅構造 ~~

然後又入咗一間比較大嘅手信店逛吓 ~~

裡面賣好多加拿大嘅紀念品以及特色食品,例於楓葉曲奇餅、朱古力等等…….

再接著今日嘅下一個景點係Granville Island Public Market ~~

由Granville Island入口駛過去 ~~

我哋架車停泊咗係公共停車場 ~~

用呢部自動售票機輸入個車牌號碼,然後入錢再打印張停車票出來,將停車票放在車頭玻璃即可 ~~

2小時停車費係CAD$7.00 ~~

Granville Island過去本來係個工業區,但後來轉型成一個類似文創區感覺的區域 ~~

我哋今次嘅目的主要係呢個室內市集「Granville Island Public Market」~~

Granville Island Public Market室內市集結合了農夫市場跟美食街,貨品種類繁多,真的很好逛 ~~ onion-head68

從海鮮、肉類、蔬菜、水果、到手工麵條、醬料、蜜糖、芝士、甜點、麵包、湯類、三明治、各類小菜等都有得賣,我覺得一次過可以買齊所有食物,一定好受家庭主婦歡迎喇 ~~

我喺呢道買咗我最愛嘅新鮮海膽,size大過我喺香港食嗰啲好多㗎,一大板才CAD$23,好抵食呀 !! onion-head68

裡面嘅美食街都有好多選擇 ~~

我哋3人組又試咗啲小食,坐低hea咗一陣 ~~

Granville Island仲有一個絕對不能錯過嘅景點,就係下面呢個戶外美術館。 其實佢只係一座水泥工廠,但被一對來自巴西的兄弟在滾筒上加上彩繪改造過後,把本來沉悶又無聊嘅灰色建築物變成了超可愛嘅藝術品,亦令到Granville island變得色彩繽紛,藝術家真係好強,就連水泥工廠都能改造 ~~

除了市集內很有看頭之外,外頭都有許多很有特色的小店和工作室,還有畫廊可以去逛逛,例如有間手工掃把店,專賣哈利波特用的嗰一種掃把,超有趣 ~~

完成晒今日嘅行程之後我哋就開車去溫哥華機場還車了,因為我哋明天下午飛返香港了,而且明天早上只有一個Stanley Park嘅行程,咁如果多租一日車會太浪費,所以明早決定轉搭公共交通工具。  下午4點20分還咗車之後我哋搭酒店shuttle bus返去酒店,然後行路過去對面嘅Richmond Centre購物商場 ~~

今晚Richmond Centre係全程嘅最後購物景點,而晚餐我哋都會喺附近嘅酒樓食 ~~

由Richmond Centre步行5分鐘就有一大型超市,裡面有大量亞州食品同蔬果賣,我哋買咗少量水果同明天嘅早餐,因為我同Jane明早打算爭取時間晨早出發去Stanley Park ~~

今晚嘅晚餐將會係我哋今次加拿大之行嘅最後一個晚餐,所以返到溫哥華之後我哋決定食餐好嘅,最後揀咗呢間「麒麟」酒樓食海鮮大餐 ~~

每人大約CAD$56,好豐富又好味嘅一餐,一定好食過我嗰幾日煮俾佢哋食嗰幾餐多多聲啦 !!yxh75

食飽呢餐之後我哋3人組同2人組就要分道揚鑣喇,因為佢哋今晚都係住喺舅父屋企,然後佢哋2人明天會乘搭大韓航空經首爾飛返香港,而我哋3人組就乘搭國泰航空直飛返香港 ~~

食飽飽就步行返酒店休息,只係好短嘅5分鐘路程就返到酒店了 monkeys54住喺Sheraton Vancouver Airport Hotel真係超級方便呀 !!

 

DAY 14 (3/10/2015) —

今日係行程的最後一日,昨日天氣麻麻地,間中有雨,所以改咗安排昨天去行街購物,今早才補去 Stanley Park (史坦利公園)。

早上七點半出發,不過蝦子餅話想瞓晏啲,所以今早只有我同Jane兩個去 Stanley Park 拍拖 ~~ monkeys33

求其簡單食咗個杯麵之後我哋2人就起程出發了。 Stanley Park範圍非常大,但規畫得很好,不過只能靠自駕或搭巴士前往。 我哋行路去Richmond-Brighouse站搭skytrain去到Burrard Street落車 ~~

落咗車之後出咗站行幾分鐘就會見到19號巴士站 ~~

19號巴士可直達Stanley Park,票價的話是二區票,今日係平日所以票價係CAD3.25,如果係平日下午6:30pm過後、週六、日或係假期紅日就只要CAD2.25。 上車投現,記得一定要準備零錢喔!!

Stanley Park (史坦利公園) 係由加拿大邦聯政府於西元1888年將突出於英吉利海灣(English Bay)的一個半島開闢而成的公園,並以總督史坦利爵士之名為其命名。Stanley Park位於溫哥華北端,佔地400多公頃,為北美地區第3大的市區公園。 Stanley Park 範圍好大,最好能租架單車來踩,可惜因為落車嘅巴士站無得租單車,所以我同Jane唯有開住Google Map地圖揀咗一條路線,然後靠自己雙腳快速步行去遊覽一下Stanley Park囉 ~~

將原本係昨天嘅Stanley Park行程改為今早果然係明智嘅決定,因為今日天氣超級好,有藍天白雲呀!! yxh06

Stanley Park裡面的Seawall海牆步道,係個可供人散步、跑步、踩單車嘅步道 ~~

Seawall海牆步道一面沿著海岸,一面沿著山壁,全長9公里,沿著步道可以慢慢欣賞呢個喺溫哥華最適合野鳥棲息嘅生態公園 ~~

呢道風景有多優美,我諗我不必用文字描述太多,大家睇睇以下圖片就自有答案了 ~~ onion-head83

我同Jane遊覽咗大半個圈之後就繼續往南行,然後就會行到去English Bay (英吉利海灣) ~~

English Bay在溫哥華市中心旁,亦都係另一個很著名的景點,呢區有好多豪宅,很多住喺附近嘅當地人晚上吃飽飯後都會去海灘散吓步看夕陽 ~~

English Bay這邊有兩個海灘,分別是English Bay Beach和Sunset Beach,其實相連的,所以先到邊個海灘都可以。不過要睇日落嘅話,Sunset Beach應該比較靚,可惜我哋今日要離開溫哥華了,有機會嘅話會再返來睇日落 ~~

今日個天藍得好靚,相片無PS過亦無調過顏色,相機只係減咗少少光就顯得咁藍咁靚喇 ~~ yxh06

因為中午要出發去機場所以我同Jane決定搭的士返酒店,慳咗嘅時間可以食多一個午餐嘛 ~~

由English Bay過馬路行去Davie Street,等咗一陣成功截到一架的士 ~~

由Davie Street坐到返Richmond,的士費大約CAD$37 ~~

上午11點25分返到酒店再趁最後機會多影幾張紅葉照片先 !!

返上房間執好晒行李之後再爭取時間行過去對面嘅「梅園粉麵茶餐廳」食晏 ~~

梅園嘅蠔仔粥、蜜汁雞翼、乾扁四季豆都係我好喜歡食嘅,每次因為工作需要飛過去溫哥華Richmond,我肯定會去梅園食返餐㗎 ~~ monkeys29

最後就搭酒店安排嘅shuttle bus去機場喇,1點鐘由酒店出發,1 點15分就到達溫哥華國際機場客運大樓了 ~~

Jane今次買到滿載而歸,行李箱爆晒,所以連紅白藍袋都要出動埋呀 ,哈哈…..!!

我哋乘搭國泰航空CX837航班直飛香港,班機係3/10/2015溫哥華時間下午3點鐘起飛,飛行時間係13小時又11分鐘,因為有15小時嘅時差關係,所以降落香港機場時已經係4/10/2015嘅晚上7點15分了 ~~ yxh62

 

寫到呢道都已經係3 part加拿大遊記嘅尾聲喇……..今次算係一個好完美嘅加拿大旅程,14天嘅行程都好順利,途中雖然唔係每一日都遇到好天氣,不過在所有的重點行程之中,例如黃刀睇極光、洛磯山脈國家公園嘅5天亮點行程都一一遇到藍天白雲嘅好天氣,我已經很滿足而且非常的感恩了 !! yxh50 希望2018或2019計劃再去加拿大的另外一條自駕遊路線都一樣可以咁順利咁完美啦 !!

最後,讀者可能有興趣知道我哋全程14天行程每人用咗幾錢, 答案係 : 國泰溫哥華來回機票 + 黃刀內陸來回機票 + 所有食宿 + 租車費用 + 景區門票, 每人一共用咗港幣22,000左右 ~~

 

【全輯完】

 

monkeys11monkeys11

 

加拿大自駕遊 – 【PART 1】黃刀極光的舞姿

 

加拿大自駕遊 – 【PART 2】洛磯山脈之國家公園篇

 

 

29 thoughts on “加拿大自駕遊 – 【PART 3】洛磯山脈之完結篇

  1. 雪山, 湖景, 加上結尾的紅葉, 夠晒圓滿。
    遠離煩囂, 渺無人煙, 的確是洗滌心靈之旅!
    睇到這一輯車程都好長, 辛苦晒司機叔叔!﹏

  2. 藍天白雲,湖光山色,加埋冰川、原野、雪山、空氣…………好誘人嘅大自然風光,這正正是我的至愛,羨慕之餘,反覆再看,唯望有日能親歷其境,感受一下!
    住既地方好正啊,又大又有靚景,重可以浸熱水,一定唔平lol,不過人一世物一世,一定要試下!
    14日2萬2千全包?真的嗎?好平喎!*^O^*
    2018三文魚大回歸,再去探訪佢地?帶埋我去,我幫妳煮飯!(⌒∇⌒)

    • 2018我應該會去另外一條路線,一樣有超美的大自然風光,這亦是我的至愛。 下次會由多倫多出發,世界自然遺產之一的Niagara Falls會係其中一個景點,因為我蝦子餅未去過嘛!?
      你肯幫我手煮飯當然好啦,不過2017年你記得要努力儲分呀,因為加拿大自駕遊名額有限,應該只可以帶4個團友,你睇到遊記中我們的住宿就知道唔可能太多人同行。

  3. 嘩!呢一part天氣好好呀!令風景望落更加靚!
    多謝喱姐介紹左呢條咁正既風景線俾我地!希望我有生之年可以去到啦!lol

  4. 靚景之餘最開心係好多日都遇到好天氣~
    有藍天白雲風景差好遠架~
    恭喜你又完成一個咁正既旅程~

  5. Hi Carine,你這趟加拿大遊很精采, 十分實用,所以我已參照你的行程作為我九月中的旅遊藍本。現有些問題請教,希望能提供意見;在租車方面,我曾在綱頁search過一些資料,但有GPS裝備的車欸,選擇很少,請問你當時那些租車公司的情況怎樣呢?

    Dantes

    • 其實如果你租唔到有GPS設備的車款都唔係大問題,因為喺美加地區Google map的GPS係非常之好用而且準確的,建議你安排一位同車的朋友/家人負責做你嘅導航人士,佢負責幫你睇手機的Google Map地圖,而你負責揸車咁就冇問題啦!

      • 謝謝你嘅意見,知道你建立咗行山群組,太太和我倆都喜愛行山活動,未知可否加入呢?

        Dantes

        • Hi Dantes,
          請問你有冇WeChat?因為我哋群組行山活動大多數用微信吹雞的,而且所有活動照片我都會放係WeChat朋友圈度分享的。我的WeChat ID : CarineKok
          請加我,thanks!

  6. 您好,看完你的行程非常心動!想請問你租車由Edmonton 開始,到溫哥華才還車嗎?請問你是向那間公司租?我check 過,回車地點不一,價錢係多一倍🙄

  7. 您好呀 Carine , 我上年年底開始PLAN行程 , 開始上網搵資料就見到樓主妳呢個舊POST, 發現原來同我PLAN既係差不多一樣 , 亦都係9月中去, 只不過我地打算玩左Vancouver 3日先去黃刀 , 黃刀鎮就玩4日3夜 , 後再落Calgary租車玩5日Rocky Mountain之後係Calgary還車 , 最後係Calgary飛返香港 .睇到樓主寫得好詳細, 要比個LIKE妳 ~~

  8. Hello Carine,

    你的blog 寫得好詳盡,相片又靚. 我都 plan 緊 2019年9月中去黃刀鎮睇極光, 玩理 Rocky Mountain, around 14-16 天。

    If you have more details, please share to me thru’ e-mail.

    Thanks a lot!

Leave a Reply

Your email address will not be published. Required fields are marked *