南九洲自駕遊【鹿兒島指宿、霧島篇 】

今輯的南九州自駕遊其實只不過係去年3月的北九州自駕遊續集吧了。2015年的北九州自駕遊我只係編排咗5天的行程,主要係玩大分以及長崎的景點,如果要5天?面一次過去晒幾個縣根本就太趕了,所以今年一月份再安排去玩九州南部鹿兒島的指宿以及霧島的地方。今次2016年的南九州自駕遊我除咗期待唔一樣嘅景點之外,另外我今次非常期待的行程之一就係可以趁一月份日本冬季大減價時順便去掃貨喇…….!!

onion-head29以下呢幅地圖就可以清楚地見到我們上次同今次去嘅路線係完全唔一樣,重複的只係福岡呢個地方,因為如果選擇乘搭國泰港龍的航班由香港直飛九州的話就唯有安排由福岡開始行程了 ~~

今次團友方面就比去年多了4人,除咗蝦子餅(團友稱佢做”緣人”) 和我呢2個主辦單位之外,分別仲有之前跟我一齊去過幾次旅行嘅幾位團友,珊姐、CatCat、Carrie、牛嫂Jennifer、豪好,以及第一次跟我出遊的網友Tommy。所以今次我們一共係2車8人同行。其中司機就分別有4位,豪好負責開一部Toyota豐田5座車,我坐前座負責做導航員,而蝦子餅同Carrie就坐後座做乘客。另外一部豐田5座就由珊姐同Tommy輪流負責開,而CatCat同牛嫂就做後座乘客。 不過今次2部車在行程中出現咗多次前所未有嘅「甩車」情況,而且在Day 3途中又突然遇到一場大驚喜喎,到底點解? 先賣個關子,睇完整輯遊記之後答案就自有分曉啦,哈哈!!

yxh75

以下係今次南九州自駕遊的5天行程:

Day 1 (17/1) :

香港 》福岡 》博多駅購物廣場 》博多一番街 》JR Kyushu Hotel Blossom Hakata Central

Day 2 (18/1) :

博多 》指宿 》池田湖賞油菜花田  》指宿海灣露台酒店

Day 3 (19/1) :

指宿黑砂浴  》鹿兒島 Aeon Mall 》天文館 》霧島岩崎酒店

Day 4 (20/1) :

霧島 》熊本 》福岡博多運河城 》JR Kyushu Hotel Blossom Hakata Central

Day 5 (21/1)

博多柳橋連合市場 》天神購物區 》香港

 

DAY 1 (17Jan2016) —

我今次8人分了2組先後出發去福岡,第一組團友 (珊姐、CatCat、牛嫂以及Tommy)當完成了我5天的九州行程之後佢哋4人會繼續另外的4天白川鄉行程,然後佢會由名古屋飛回香港,所以佢4人選擇了乘坐香港快運的航班。 而我第二組 (豪好、Carrie、蝦子餅同我 ) 就乘坐港龍航空KA380班機前往福岡 ~~

我近年已經好少記錄飛機餐,不過港龍呢一次日式雞肉飯不單止賣相唔錯而且又幾好食,所以都影返一張相開心share吓 !!

坐在我左手邊的豪好很專注地食住佢份飛機餐,而我就搞搞震咁叫佢望多幾眼剛才招呼佢嗰位日籍靚靚空姐。 呢張相係我幫豪好同靚靚空姐影嘅假合照,到時等豪好返到去美國時可以望梅止渴吖嘛,嘻嘻!

和去年3月飛福岡一樣,飛行時間只係短短的2小時又40分鐘,航班於上午1150起飛,於當地時間下午330分就已經降落咗福岡機場了 ~~

同上次一樣,過關之後在國際線大樓入境大堂門口有出市區的巴士站。我哋搭前往博多站的巴士,車程約18分鐘,車票每人¥260。 如果搭前往天神地區的巴士車程則約33分鐘,車票每人310 ~~

我哋 425分去到博多車站(Hakata Station) 落車 。 博多車站是九州第一大站,絕對是九州最重要的交通樞紐。 因與博多站直結,且配合2011年九州新幹線開通, 2011年底全新落成的JR Hakata City大樓,可說是九州最重要的地標之一 ~~

因為第一組團友比我哋早到幾小時,所以我哋約好了下午430分在酒店大堂集合。 呢一間酒店亦都係去年我在福岡住過的其中一間「JR Kyushu Hotel Blossom Hakata Central」,今次再選擇住相同的酒店因為我覺得呢間位置很方便,房間比較大又比較新淨,性價比高!

酒店大堂 ~~

房間走廊 ~~

港幣$820一間雙人房,包2人酒店自助早餐 ~~

把行李安頓好之後我就一齊步行去「博多地下街」食我哋南九州嘅第一餐。 博多地下街嘅入口非常之近,一出酒店門口轉左步行2分鐘就到了,而一蘭拉麵原來就位於呢個入口位置附近 ~~

難得重遊九州又點可以唔同大家去食多一次九州拉麵呢?尤其是第一次來九州玩豪好和Carrie更加不能不試一下九州拉麵啦! 而第一組因為中午到達福岡所以已經食過午餐了,所以佢選擇去嘆咖啡等我 ~~

非常濃郁的豬骨湯底加上可以自己選擇硬度的拉麵 ~~ onion-head68

今次南九州自駕遊的行程在明天一早才正式開始,今晚無其它行程,所以我哋晚餐之前就各自喺博多車站內的購物廣場閒逛購物3小時。購物廣場內有阪急百貨、AMU PLAZA、TokyoHands等等…..喜歡購物嘅女士們要打發3小時的話太容易了 ~~

喺日本的購物廣場逛街購物的話,零食、精品以及超市食品都係我和蝦子餅嘅指定首選部門,就算唔買但睇見啲得意而又靚靚嘅包裝都好開心㗎 ~~ onion-head23

然後8點半我哋全組人就順便喺博多車站內的「博多一番街」搵咗呢間餐廳食個日本料理套餐 ~~

好普通嘅日本料理套餐,無乜特別 ~~

食飽返酒店休息之前,我順路帶大家去7-11便利店買呢一隻綠茶雪條當今晚嘅甜品,我真心推介,真係好好味onion-head68

食飽飽要早啲返酒店休息充充電喇,準備迎接明早開始嘅南九州自駕遊行程嘛………各位晚安! onion-head24 onion-head24

 

DAY 2 (18Jan2016) —

美好嘅一天由豐富嘅酒店自助早餐開始…….. 嘩!真係好豐富喎……好多嘢食呀! onion-head25 我地約好咗七點鐘一齊食早餐,不過我哋等咗好耐,都差唔多食完早餐了但都仲未見到Carrie同牛嫂出現喎!結果我就走出去酒店大堂借用電話打上房間搵佢哋2個,原來佢唔知醒呀,都難怪佢哋嘅,張床又真係好舒服嘅,嘻嘻!

食完早餐之後返上房執好行李準備退房,因為我、蝦子餅和豪好三人早上八點半要出發去酒店對面街嘅Times Car租車公司取車,而第一組的另外一部車就由珊姐和Tommy自行去另一間租車公司取車,因為佢哋嗰部車係由佢哋自己上Toyota豐田官網訂的 ~~

第一組的戰車Toyota Sienta ↓↓

豪好負責開的第二組戰車Toyota Aqua Hybrid ↓↓  (3天租金HK$1930 + 全保HK$528) ~~

9點15分搞掂晒所有一切租車手續之後,我哋就開車返去酒店門口接其他團友上車然後開始出發去今日嘅目的地,鹿兒島最南端的「指宿」。 由福岡出發去鹿兒島指宿係330公里路程,兩部車的自動導航系統都set好咗同一個目的地之後就正式出發喇!

onion-head86onion-head86

第一組的車係由珊姐負責開第一段路程,一離開咗福岡市好快就會經過上高速公路之前第一個收費站。 佢哋部車因為有預先申請ETC card,其實係一張類似八達通的咭,方便每次經過高速公路收費站的時候可以自動繳費,不必用現金繳費,到還車的時候租車公司會跟據ETC card的繳費記錄而收取總數費用的。 就因為佢哋用ETC收費通道,而我就行另外一條一般的現金收費通道,所以珊姐過咗收費站之後就好快咁超越咗我哋部車了。 而我哋第二組車過咗收費站之後就上咗高速公路往鹿兒島嘅方向行走。 見唔到佢哋部車所以就用微信同佢聯絡,原來…..佢行錯路,未上到高速公路喎……!

onion-head41過去咁多次嘅自駕遊我通常只安排一部車,因為兩部車自駕遊我最擔心就係會有甩車嘅情況出現,今早一開始就已經出現咗第一次甩車情況喇,OMG! ! onion-head87

咁我哋已經喺高速公路上冇得返轉頭,所以唯有同佢哋約好停喺第一個服務區等佢啦!

半小時的路程之後我第二組就已經到第一個服務區Kiyama「基山」喇 ~~

基山屬於日本高速公路的其中一個SA休息站,裡面除咗提供洗手間和停車服務之外,亦有便利店、賣手信以及餐飲服務的區域,選擇都唔算少 ~~

等第一組車和所有團友到齊咗之後我哋再繼續行駛前往指宿 ~~ yxh11

大約中午1245分我哋又經過另一個山江服務區(Yamae) ,所以就泊車俾2位司機休息一下,順便一齊食午餐 ~~

首先用自動販賣機選擇想點嘅套餐,然後用現金付款 ~~

買完食券之後就各自排隊取食物 ~~

呢個服務區啲拉麵套餐又抵食又好食,我點的¥1000 套餐 (右下圖)包括有一碗九州拉麵、一份煎餃子和一碗炒飯,好好味!onion-head68

午餐後又係甜品時間喇 ….!! monkeys29

我哋成班為食團友每人喺便利店揀咗一條雪條,個個企住食都食得津津有味 !! yxh75

食完雪條再繼續今日嘅車程,到達指宿之前再經過另一個谷山收費站 ~~ 

呢一段路一樣係天陰有雨 ~~

路經一個錦江台展望公園時又突然間見到出太陽喎,所以就落車順便影咗幾張相用作記錄一下 ~~ 

 

下午355分終於抵達今日唯一的主要景點「池田湖」了,一到達目的地又立即用微信同第一組車聯絡,亦同時分享了當時我哋第二組車的位置。當時係由Tommy開車而珊姐係負責睇GPS做導航員,第一組回覆佢哋還有20分鐘的車程才到達池田湖 ~~

onion-head54實我哋一路都無超速,而且全程都係簡單直接的公路就會去到池田湖,點解又再出現第二次甩車情況㗎?我好暈呀!!onion-head41

我哋見到湖邊的一大片油菜花田於是就停低部車去花田影相,順便等第一組車到啦 ~~

大家有無留意到以下3人的衣著明顯有幾大對比嗎 ?? 尤其係左邊Carrie的冬天衣著和右邊豪好的短袖夏天衣著,其實當時天氣都幾涼吓, 豪好身體睇來應該真係幾強壯吓喎 !! onion-head48

來到池田湖邊可以欣賞到壯偉的開聞岳與池田湖相對望。 池田湖是開聞岳火山爆發後形成的,周圍長15公里,水深最深達233公尺,亦是九州最大的破火山口湖。 這湖是鮎魚、鰙魚、鯉魚、草魚的棲息地,亦養殖著指宿市的天然保護動物大饅魚 ~~

每年日本的一月份,位於九州最南端的鹿兒島率先回春,溫暖多雨的亞熱帶氣候,讓池田湖成為全日本最早勁放的春田油菜花,而指宿市的油菜花,是全日本最早開花的 ~~

今日沿途天氣都千變萬化,今早由福岡起程時有雨,去到服務區又停雨了,後來接著的一段路又出太陽,再行多一段路又再開始落雨,然後去到池田湖時雨又停了。可能就係因為咁奇怪嘅天氣現象所以我哋在池田湖邊有幸地見到雲層中透出耶穌光,雖然當時雲層好厚而且天色比較暗但個景都有另一番味道 ~~

網上資料指出,自1961年開始池田湖傳出了湖中存有神秘水怪的存在,到了1978年更有指宿市池崎區的20多位居民曾經目擊水怪的新聞而轟動全日本。有人更將這隻神祕的水怪命名為「伊西」(イッシー,Isshi),不過最後這個傳說卻被否認了,有人認為湖中神秘水怪或許只是巨大的鰱魚吧了,但傳說的真實性仍有待查證,至今不明,同時傳說更吸引了大量旅客前來參觀池田湖 ~~

我哋喺池田湖邊影吓相hea咗一陣,20分鐘之後第一組通知話已經到達咗池田湖了,但佢哋又見唔到我哋部車喎,咁當我哋幾個團友一齊開啟微信功能的「位置共享」時,我見到個地圖竟然顯示第一組部車的位置正位於池田湖的湖中央喎………………!!

唔係吖嘛?onion-head41 乜佢哋部車跌咗落水咩?onion-head48onion-head54咁叫我哋點去搵佢哋呀?onion-head1 個地圖有無搞錯呀? onion-head10

無辦法之下唯有叫佢哋唔好駛開部車,由我哋開車沿著湖邊去搵佢哋啦,後來駛到去池田湖另一邊的停車場見到以下嘅水怪地標,我哋就決定將部車停喺呢個水怪旁邊然後影相發張圖片話俾第一組知我哋身處喺呢道, 第一組見到個水怪圖片就終於搵到我哋了,安樂晒!

onion-head6

等來等去、找來找去,咁又浪費咗差不多一小時的寶貴日光時間喇,唯有趁天未黑之前快手快腳影返幾張油菜花田照片先~~

我哋一行人來到池田湖畔,看到一大片耀眼的金黃油菜花田,景色怡人,頓時讓我剛才煩躁的心情好了起來 ~~ onion-head5

原本今日傍晚仲安排咗另一個指宿砂浴行程的,不過見時間已經不早所以就打算將指宿砂浴的行程改去明早。依家要先直接由池田湖駛去今晚入住的指宿海灣露台酒店,因為今晚的酒店係一泊二食,怕遲到會影響到酒店為我哋安排咗的懷石料理晚餐嘛 ! !

由池田湖開車去指宿海灣露台酒店只係短短的7公里路程左右,上車前大家都已有共識,知道下一站係去酒店的,開車前我亦都已經同Tommy 夾好咗GPS要輸入酒店電話號碼。 十多分鐘之後我哋第二組已經到達咗酒店停車場了,咁又再用微信問佢哋第一組到咗酒店未啦,點知原來Tommy佢部車的GPS係輸入咗錯誤嘅目的地喎,佢竟然輸入咗明早行程嘅砂蒸會館「砂樂」的電話號碼,所以條路線係同我哋完全唔一樣,結果原本短短的7公里路程搞到又要兜一個大圈才可以去到酒店同我哋第二組會合,你話我暈唔暈吖?

onion-head41 onion-head41

無奈地好似以下2隻猩猩咁再呆坐多半小時等佢哋到酒店先一齊check-in取房囉 !!  yxh70 取房時順便拜託職員幫忙安排今晚630分的酒店懷石料理晚餐 ~~

今晚我哋入住指宿海灣露台酒店嘅日式房,一泊二食價格係¥12960 (每人) ~~

指宿海灣露台酒店位於370米的高崗上,由酒店餐廳或客房望出去的景觀,美不勝收 ~~ monkeys36

安頓好行李之後,趁仲有少少時間才到晚飯時間所以我先到樓下周圍參觀一下酒店啲設施 ~~

 

我哋住嘅傳統日式房間係無浴室的,沖涼就要去一樓的公共浴室(大浴池), 男和女的大浴池係分開的 ~~

大浴池裡面有sauna乾蒸室 ~~

仲有呢幾部spa儀器,因為我哋無試過所以不多作介紹 ~~

佢哋返上房休息咗一陣之後,6點30分我哋8人齊齊到酒店餐廳享用晚餐了 ~~

 

以下的懷石料理,每人的份量都是一樣的,每樣菜式賣相都好靚好有特色,不過懷石料理只重質不重量,所以豪好話食完晚餐好想再出去食宵夜喎,不過無人睬佢囉 !! monkeys57

無人想出去食宵夜係因為其實晚飯後仲有一個非常重要嘅節目㗎 …….. 山長水遠來到住溫泉酒店無理由唔去浸溫泉卦! 我哋訂咗晚上9點鐘的兩間小木屋獨立露天風呂,男團友和女團友各一間 。 上次北九州自駕遊我和蝦子餅住嘅係一間位於大分、房間設有私人風呂嘅一泊二食旅館,而今次同一大班朋友一齊所以我就揀咗呢間指宿海灣露台酒店, 因為呢間酒店都幾特別,佢有多間的獨立露天風呂。依家就帶大家由酒店大堂出去參觀一下獨立露天風呂的環境啦!

onion-head86

每間小木屋內各有一個獨立的露天風呂 ~~

我哋5女3男就分別喺兩間小木屋獨立露天風呂一路浸溫泉一路傾吓計,不知幾開心呀 !! onion-head39

浸完皮膚滑一滑而且我一覺眠到明早自然醒,太正喇 !! onion-head26

 

DAY 3 (19Jan2016) —

今早約大家7點鐘一齊喺酒店餐廳食早餐,我6點30分左右梳洗完畢之後從房間望出窗外見到開始有少少紅色和金黃的光從雲中透出,我就知道就快要日出了, 所以我好快地換好衫、帶埋部相機就衝咗落樓下去等日出 ~~

我就企喺酒店正門口的斜路等日出 ~~

等到喇……日出喇……!!! yxh06 其實當時我影咗無數張日出相片,只揀選咗以下幾張比較滿意的開心share !! yxh75

真係好靚呀 !!!  monkeys29

  

欣賞完日出之後就返上去餐廳同大家一齊嘆個豐富早餐先 !! 其實坐喺餐廳的窗邊一樣可以清楚地望到個靚靚日出㗎,實在太正喇 !! onion-head68

食飽早餐我哋就退房了。 其實今次南九州之行主力玩嘅地方係鹿兒島,因為昨天我哋甩車數次而阻延咗少許時間,到達酒店時已經接近黃昏了,所以將昨天的另一個行程”指宿砂浴”順延到今早8點鐘才出發去 ~~

鹿兒島指宿最有名嘅就係砂浴,來到指宿的遊客通常都會去體驗一下。起源於300年前的指宿砂浴,是穿著浴衣埋在加熱的沙堆裡,不但促進新陳代謝、還能排毒美容,因此倍受遊客青睞,尤其是愛美女性無論如何都想要體驗一次,亦都係我今次安排來到指宿一遊的目的之一。 在日本浸溫泉雖然係非常之正但一啲都唔特別,好多人都試過,而穿著浴衣被熱黑沙埋起來蒸砂浴才算係特別嘅體驗嘛!

onion-head83砂浴會館「砂樂」,是公眾的砂浴場 ~~

指宿市、指宿郡山川町到沿岸地區,因鄰近火山群到處溫泉泉湧,高溫的地下水流經砂岸注入海中,海水都是熱的,沙灘往下挖,不到20公分,溫泉就會自然湧出,溫度高達攝氏80度以上。海岸的砂被加熱後意外形成了全世界唯一的天然砂浴溫泉 ~~

 

「砂樂」砂蒸會館營業時間:AM830PM830(晚上9點閉館)   體驗砂蒸費用:大人900日圓/小孩500日圓 網:http://www11.ocn.ne.jp/~saraku/saraku00.htm

 

買了門票然後向櫃檯職員取過毛巾和浴衣之後,先到一樓的更衣室換上浴衣,更衣室內有置物櫃可存放隨身貴重物品同衣物。接著隨著指示步行至海邊, 好期待呀! onion-head29

 

海邊一大片的棚子,棚下就是大家體驗「活埋」的地方了,哈哈 !!

棚下分了好幾個區塊,每個區塊大約容納十人 ~~

建議一次的最佳體驗時間是10分鐘,柱子上有掛時鐘,可以依自己的耐熱程度做調配。雖然我哋一早去到嘅時候遊客唔算好多,但都需要排隊,我哋大概等了8分鐘左右,因為我想幫團友們影相記錄低佢哋被活埋嘅過程,所以我選擇排最後一個,嘻嘻!

工作人員會先挖坑,挖好後再請遊客躺下,並將毛巾圍在遊客脖子上和頭部周圍,可以保護同防止搞到成個頭和成塊臉都係黑沙嘛 ,最後將沙覆蓋在遊客身上。 砂溫度大概在5055度,覆蓋全身的重量約20公斤,這麼高的溫度人怎麼能承受呢? 原來砂不同於水,它顆粒粗,蒸氣散發快,加上人們有穿浴衣,所以感受到的溫度大概已經下降到40℃左右。砂浴就是利用這種高溫加上重量的效果,加速人身體血液循環 ~~

由於享用砂浴時必須仰面朝天,壓在全身上的砂將血液擠壓到身體末端,血液流向沒有高低差,砂子重量壓迫人體靜脈、內臟的血液回流,另外高溫使得血管壁擴張,提高心機能促進血液循環。因此,氧氣便能順利到達全身各處,淨化體內老廢物質。10分鐘後,在沙子的熱度和壓力的作用下,全身開始出汗,體內毒素彷彿也隨著汗水全數蒸發,據說對於增強心臟功能,消除疲勞,緩解關節炎、肩周炎、腰痛、發寒等症狀,甚至對減肥都具效果,而且對女性來說,除了健康之外,兼具美容與瘦身效果。而且根據醫學調查,砂浴的療效是一般溫泉的三~四倍,促進血液循環並降低血壓,對於神經痛、腰痛都有十分顯著的改善,故砂浴是當地一項老少咸宜的療法,強烈推介大家有機會一定要去試一下 ~~

大家睇吓豪好個衰樣吖 ↓↓ onion-head2

終於輪到我喇!yxh50  因為我都想睇下自己被活埋嘅樣所以將我部相機交咗俾其中一名工作人員幫我影相,拍完後見佢將我部相機裝進塑膠袋裏以免啲沙刮花相機鏡頭,然後放在旁邊的一張枱上,日本人工作態度認真和處事方式果然夠細心,讚!

 

黑砂、彩傘、人頭,組成奇特有趣的畫面 ~~ onion-head2

當我完全被沙覆蓋後就馬上感到全身血液在流動,被埋了不到三分鐘全身就感覺開始冒汗,其實感覺係好舒服的。由於是躺著,所以只能看到藍藍的天空,一邊聆聽著海浪聲,全身和腦袋完全放鬆,不知不覺就過了10分鐘,最後我大概躺了15分鐘才起身。 把身上的沙清一清後,到會館內浴室再沖個涼,然後換衫同團友們一齊離開砂蒸會館 ~~

離開「砂樂」砂蒸會館時將近中午十二點了,因為附近有一個Aeon Mall和大型超市所以就安排俾大家一小時的濕平時間 ~~

停車場竟然可以望到雪山景 !!! monkeys36

Aeon Mall裡面無論衫褲鞋襪、化妝品、運動用品、超市嘢食樣樣齊,團友們成功掃咗唔少貨 ~~ yxh20

一小時其實唔多夠時間掃貨,不過因為今日用咗上午嘅時間去砂浴,唯有繼續今日嘅下一個行程「天文館」喇 !!   天文館是鹿兒島市最大最繁華的商業街,包含「天文館本通拱廊」、「天文館G3拱廊(千日通)」、「天文館電車通」等3條大道為主的區域。這裡有百貨公司、時裝店、食府及戲院設施均應有盡有 ~~

43km的路程我哋下午2點05分就到咗天文館地區了。 但係……….第一組車又誤會了以為天文館只係一間館而唔係一個地區,所以第4次甩車事件又喺天文館再次發生 !!  onion-head72

由於「天文館」呢3個字嘅名牌由街頭至街尾,甚至整個區域周圍都會見到,如果佢哋話喺天文館門口等我哋,根本無辦法搵到佢哋。

結果又要靠手機內嘅微信位置共享功能,原來又中伏,個地圖老點我哋4個由街頭跑去街尾,一共跑咗4次依然無法正確地知道佢哋嘅位置,因為地圖上顯示佢哋嘅位置不停咁轉移,救命呀 !!!

我終於放棄喇 !!!  onion-head78

後來在天文館本通拱廊嘅入口處影咗一張相發俾佢哋,叫佢哋搵呢一個入口就自然會見到我哋4個了。 原本今日午餐係想來天文館食黑豚火鍋的,可惜又搞到浪費了40分鐘,去到餐廳時已經過咗午市時間好多餐廳都關了門,咁唯有改食其它餐廳啦 ~~

終於搵到呢間食黑豚和牛的燒肉店,就一於食呢間啦 !!

 

今次食唔到黑豚火鍋,但食到燒黑豚以及燒和牛,都算唔錯啦!!

經過多次的甩車事件之後,吸取到嘅教訓話我知原來雖然係租同一個牌子的豐田汽車,但係原來兩部車的GPS系統係完全不一樣的,就算係輸入同一個電話號碼以及同一個目的地,兩部車的行車路線都有機會係完全不一樣的,所以今次問題就出現咗喇………… 而且經大家了解之後發覺原來其實Tommy係無乜自駕經驗的,仍算係新手一名,所以經過3次的嚴重甩車情況之後我開始擔心會再次耽誤我哋今日嘅餘下行程,因為時間已經唔早了,食完燒肉午餐都已經差不多下午4點鐘了,而且仲有餘下的59公里路程才到達我哋今晚入住的霧島岩崎酒店,所以逼不得已決定出動我蝦子餅過去第一組幫手開部車去酒店,因為蝦子餅佢有多年駕駛經驗所以我深信佢能夠緊貼住我哋部車唔會再甩車。 接著的一段遊記我好榮幸邀請到我嘅團友之一、亦都係從未試過寫遊記嘅豪好幫我手寫咗呢一段好精彩嘅突發事件。因為呢一段路係由豪好負責開車,所以由佢親自為大家講述返當時嘅情況係最適合不過了,亦因為當時咁特別嘅情況之下我並無影到任何相片,只能靠豪好支筆去講俾大家知喇,以下藍色字就係由豪好代筆嘅一段 ~~

 

喺未正式開始執筆之前,除咗要先多謝咖喱俾我參加佢嘅咖喱旅行團之外,又俾我參與佢遊記嘅編寫工作。另外我要多謝AK,冇佢在香港討論區招人我亦唔會識到咖喱倆夫婦和一班好玩、好食、好飲的朋友,謝謝兩位美女!!

  onion-head110  講完多謝之後就要自薦同介紹一下自己先, 今次南九州之旅,我嘅職責係其中一位司機。因為我無論電單車、私家車、7人車、自動波、棍波、左軚、右軚,一律都可以應付自如,所以如要請自駕遊司機,可找我 !!  聯絡方法 : 請找我嘅經理人「咖喱」, 賣完廣告就要正式開始入正題喇,唔係會俾總編cut稿㗎 !!

喺鹿兒島天文館食完和牛加黑豚肉燒烤做午餐後,就向今晚嘅住宿霧島岩崎酒店進發,go….go…go…..!!!  yxh11整個車程不是很遠,路程大約係59km公里。 當時離開咗鹿兒島就開始上高速,一路往霧島方向行,冇幾耐就要離開高速落去國道行lu……,由於酒店在山區內(咁浸溫泉先至正嘛),所以沿國道再駛去山區內就代表差不多到喇,就在進入山區不久竟然……

嘩……!!! 落雪啊!!! 好靚啊!!! 好開心啊 !!!

onion-head23

每次跟咖喱去玩都有驚喜,今次九州行 (緣人睇清楚係九州行,唔好又諗衰野) 從沒有預計過會落雪,竟然俾我地遇上,上次張家界又係咁,記得當時張家界山上個雪景已經好有日本feel,今次唔洗講啦!唔知下次南非又會點呢? 又會唔會有咩驚喜呢? 好期待!!

其實我地一班人都太大意,由今朝喺宿霧玩砂浴再到鹿兒島天文館,沿途都下著細雨,加上溫度又低,已經有齊落雪嘅條件,只係我地冇為意啫,因為出發之前新聞報導話今年日本天氣比往年暖,大部份北部地區都未開始有雪落,更何況我地現正身處喺日本南部地區,點會諗到春天賞花期仲會有雪落喎!!! 就喺大家興高彩烈邊欣賞雪景邊影相時,我發現由緣人駕駛嘅另一部車原本一路都跟住喺後面,突然從後面失去影蹤而不見了! !  Where are you ? 第2個唔見咗就話啫,緣人喎!緊要等埋佢啦,唔係咖喱係唔會放過我㗎! 反正都係得一條路,就停埋一邊俾大家影吓相同等佢哋追上來啦,好快就見到緣人佢地架車黎到喇 !

原來係團友牛嫂見到雪景太靚太興奮而樂極生悲! 佢伸個電話出車窗外影相時甩手,佢部電話就咁飛跌咗落馬路中間仲要俾車轆過,睇完相大家覺得似唔似以前Nokia出嗰部蕉形電話呢?? 如果你見過,證明你都有ㄧ定嘅年紀!

onion-head2

 

喺路邊初步了解完事發經過和硏究過部電話嘅傷勢之後,又要繼續行車lu…….! yxh11

初初落雪時,啲雪係最白最靚嘅,車道兩旁一棵棵松樹都鋪上一層層白雪,好美哦 !! monkeys36

而當牛嫂部電話死亡之時,惡運原來已經靜悄悄來到我們身邊都唔知添!! 一路行車,雪亦越落越大,見到對面行車線從山?駛出來嘅車身都有一層厚積雪,代表山裡雪已落了一段時間。 我亦開始暗自擔心路面㑹結冰,望吓個GPS導航系統,還有一大段路才到酒店喎,不過已經沒有回頭路,死就死啦,千奇唔好俾佢停,係架車唔係啲雪呀,大佬!!!

onion-head4

繼續去 !!! 行吓行吓,揸吓揸吓,唔係吖嘛………..!!! 最尾的一段路竟然仲要上山,要行斜路,大佬唔好玩啦 !!! onion-head1 我最擔心嘅事終於發生咗,路面開始結冰,車軚開始打滑,之前講過我地係無預計會落雪,所以我地2部車什麼4X4、雪軚、雪鏈,連一件裝備都無,如果路面一結冰就會行唔到㗎 !! 因為雪地一經踐踏就會變硬成冰,我只好盡量行駛一些未有經車軚行過嘅路面上,希望咁樣可以捱到上酒店啦!! 喺呢個時候車內氣氛都開始沉重,連乘客們都開始感受到部車行得怪怪咁……鬼咩,我揸到部車慢一慢但部車都頭搖又尾擺咁嘅飄移境界,傻嘅都知發生緊咩事啦 !!

再經過一個煙霧霾漫嘅右彎後,部車真係行唔到喇….!!! onion-head30我仲要停喺兩條行車線中間添…………講時講,喺未開始上山時,我已經見到在路旁有一塊路牌寫住××××路封閉 ,可能就係指上山呢條路,但我鬼識睇日文咩 !!

 onion-head67 當我一路繼續嘗試開車時,我頭皮真係有發麻嘅感覺㗎! 到底點樣可以帶團友們安全地去到酒店呢? 想到可否把車掉頭然後倒車上山呢?? 倒車上山可以增加車頭重量使車軚抓著力增加而幫助上山,還是冒著大風雪步行上酒店找人幫手呢???  諗住望吓個GPS再決定時…… 就知道乜嘢叫做「禍不單行」喇……乜呢四個字乜唔係只在老夫子漫畫先會出現嘅咩 ?

onion-head48吓……!! 乜我地架車個位置唔喺GPS畫面嘅路面上㗎 ? 個GPS因為大風雪影響到個衛星訊號而失靈呀?? 到底我地離酒店仲有幾遠㗎? 為安全計都係叫咖喱打電話到酒店求助好,就在搵電話號碼時有架巴士正在駛上山喎,可惜俾我呢個不負責任嘅駕駛者阻住條路喎!因為我部車停咗喺路中間嘛…..sorry! sorry!! 好彩巴士上有幾個熱心嘅壯男幫手推開我架車去路邊,不過推完之後就連佢地架巴士都駛唔到上山lu…..都係我害咗你地…..再次sorry!

onion-head77原來架巴士都係去我地間霧島岩崎酒店㗎,知道我地係酒店客人之後就叫我地將部車駛去山下面個停車場,巴士司機話會安排車輛去停車場接我地上去酒店,多磨 !!

點會估到今日我做得最啱嘅事原來就係阻住架巴士上山。onion-head2好喇 !! 係時候慢慢把部車溜後落山,點知呢個時候都一樣出咗問題,部車唔識自己轉彎喎,要團友Tommy sir出手相助,黎多次壯漢推車先可以轉向,可以想像到當時路面有幾咁濕滑,幸好最後都可以安全去到停車場泊車。在等車上酒店時仲要俾緣人大哥取笑,話佢地4人喺後面架車食住花生睇住我部車唔上唔落不知幾過引喎 !! 佢地4個只係顧住食花生,又唔幫咖喱手影返幾張相做記錄,因為無相片所以搞到佢要我親自用文字交代呢一幕咁慘呀 !!

onion-head31

當然佢只係講笑啦,當時不只我一個擔心如何上山,其他7位團友個個都擔心的。你地會發覺呢段經歷係冇乜相片提供,所有人都沒有去影相,就連要寫遊記嘅咖喱都唔例外,咖喱都無落車去影相就知道當時情況有幾咁惡劣、大家有幾咁徬徨啦!不過這些經歷真係有錢都買唔到㗎!不過牛嫂當時可能好想影相㗎,只是佢影唔到咋,如果你地唔知點解就要由頭睇多次我之前寫乜喇!!  我寫到呢道為止,都係時候交返俾咖喱去繼續另一part喇……!!

以下呢一張照片係由Carrie提供嘅唯一一張珍貴照片,俾豪好擋住去路嘅酒店巴士後面嗰部正是由我蝦子餅駕駛嘅車喇 ~~

好彩途中遇到貴人相助,終於都能夠安全地抵達酒店。亦都覺得好好彩我哋明智嘅決定取消咗今日另一個霧島火山湖大浪池(Onami Ike)的行程,因為計過時間都應該唔多夠,而且中途開始落雪更加唔可能上到去大浪池啦,可能因為大雪而要困在山上添呀……再次感恩!

onion-head28取房時都已經係接近傍晚6點鐘了。咁啱當時酒店有位來自上海的女職員,佢用普通話同我哋溝通,又向我哋介紹酒店的房間和溫泉設施,又幫我哋手推行李上房,服務態度很好而且感覺很親切 ~~

標雙房一泊二食,價格係每人¥10700,雖然房間稍微舊了一點點,整體來說還是值得來此住一晚因為佢嘅溫泉池好正㗎 ~~

我哋上到房間時外面依然仲落緊大雪 ~~

今晚我哋打算去浸一轉溫泉先,然後才去食晚餐,所以通知咗酒店將我哋個晚餐安排喺8點半。我哋8人上到去房間換好晒浴衣然後一齊行去溫泉區,不過酒店溫泉池就男同女係分開的。室內有2個大浴池,而室外又有另外幾個露天溫泉池 ~~

我今次會選擇住呢間霧島岩崎酒店一晚其中一個原因係為咗綠溪湯苑。綠溪湯苑總共有八個溫泉池,而溫泉池沿著溪流所建,沒有太多的人工雕琢,佢到底有幾吸引?以下佢嘅官網有詳細介紹和圖片

http://kirishima.iwasakihotels.com/zh-tw/hotspring/

不過因為今日落大雪,所以最後一班來往綠溪湯苑的酒店專車在四點鐘已經停駛了。今次冇機會去體驗一下真係有點可惜 !! monkeys40

我從未試過落大雪時浸溫泉的,今次好想感受一下,不過職員話出面太大雪而且地面積雪太厚,唔建議我哋赤腳兼赤裸裸咁走出去「 御山之泉」戶外溫泉池,因為對腳一踩上去啲厚雪度真係超級凍,我試過行幾步想行出去露天御山之泉但係真係頂唔順,腳板底係凍到痛㗎 !!

http://kirishima.iwasakihotels.com/zh-tw/

唯有放棄露天溫泉池而改去浸室內嘅大浴池喇!

初初以為可以好似指宿海灣露台酒店嘅小木屋風呂咁,大家可以偷雞著泳衣入去浸溫泉啦,點知呢個大浴池係有個好惡嘅睇場阿姐㗎,佢一見到有客人唔剝光豬就攔路唔俾入場,就連毛巾都唔准帶呀!今次係我第一次同幾個女性朋友赤裸裸咁肉帛相見,都咪話唔難忘呀!唔認識的還好,認識的朋友我覺得仲尷尬,始終我哋唔太習慣日本人的文化,要我哋個個剝晒光豬一齊沖涼一齊浸溫泉真係好鬼尷尬㗎嘛!但係冇辦法啦,想要浸溫泉就一於要豁出去啦!

onion-head54浸完溫泉特別肚餓呀,大家準時八點半去到餐廳等開餐 ~~

今晚喺酒店食嘅都係好精緻又好味的懷石料理,不過好意外地見到我哋今日午餐食唔到嘅黑豚火鍋,每人一鍋再加其他菜式,份量多過昨晚。另外叫咗兩支梅酒一齊飲,大家食得好開心!onion-head68

晚飯後外面依然落緊大風雪,大家都擔心明天唔知會唔會有機會繼續落大雪而未能開車趕返去福岡,因為明晚係行程嘅最後一晚我哋會住喺福岡 ~~

落大雪仲係著短袖T-shirt ?? onion-head67

其實擔心都無用啦,明天再作打算,一切隨遇而安吧!所以就準備返房去休息 ~~

返上房之前先經過酒店大堂呢間小小便利店,佢哋見到剛才食飯時飲過嘅梅酒 ~~

便利店門口仲竟然有得試飲添,但負責嘅職員已經收咗工喇…….不過呢班香港賊仔一樣照偷酒飲,飲完一大輪之後先肯返上房去休息呀! 有圖有真相,哈哈!

   

雖然唔知道酒店有無安裝CCTV拍低呢班賊仔罪行,不過我為咗補償返少少酒店嘅損失,決定用阿公錢為每位團友一共買8支迷你版嘅金裝梅酒onion-head2

既然大家一致覺得咁好飲就各帶一支返香港做手信啦!

 

DAY 4 (20Jan2016) —

今早起床時雪已經停了,所以一早6點半趁個天未光就再次去露天御山之泉體驗一下。御山之泉與大自然融為一體,再加上晨曦的雪景,實在太美了!yxh06

總算試咗呢間酒店嘅御山之泉,不枉此行了!monkeys23

酒店位於海拔800米的霧島山中。浸完溫泉返到上房,喺房間露台望到嘅景觀都一樣係美不勝收 ~~ onion-head16

8點鐘落去酒店餐廳享用自助早餐 ~~

落完一場大雪之後今朝開始放晴,如果唔再落雪嘅話咁今日應該可以跟原本的行程開車返去福岡了 ~~

為免再耽誤時間,我哋食完早餐執好行李之後就九點半退房離開。今早有藍天又有雪景,離開之前團友們都忍唔住喺酒店前玩咗一餐、影咗幾張雪景相留念 ~~

  

因為我哋兩部車都泊咗喺半山嘅停車場,所以要由酒店安排專車接載我哋落山去停車場取車,然後才啟程返福岡市 ~~ yxh11

乜豪好今早停咗雪反而要著大褸咩 ?? onion-head48 奇人一名!!

因為由霧島開車返去福岡一共係265km的路程,所以我哋決定中途先停喺熊本食個午飯,然後再繼續行程。今日第一段係由霧島開去熊本的 145km車程 ~~

今早個天好藍呀 !!  onion-head23

落完大雪之後今日天氣變得特別的好,加上有藍天白雲,沿途嘅雪景靚到不得了。 嗰一場大雪係一個驚喜、係一個體會、係一個經歷,而沿途眼前一幕幕嘅美景係一個恩賜,呢一啲雪景係我哋今次南九州之行完全冇預料會睇到嘅,令到我哋今次的旅程變得非常的難忘 ~~

離開咗霧島之後我哋都無再見到雪景了 ~~

途中停咗喺Miyahara「宮原」服務區讓團友們去一去洗手間 ~~

不得不提的係日本服務區啲洗手間真係保持得好乾淨,我真心佩服日本啲國民教育以及人民質素之高!又靚又大嘅洗手間就好多國家都有,但係可以保持得咁乾淨嘅公共洗手間就唔係每一個國家都做得到喇,不得不讚一下 !!

Kumamon「熊本熊」係日本最火紅的吉祥物,接近熊本縣所以服務區都見到好多熊本熊 ~~

 

之後再繼續行程,好快就到咗熊本市元三町。我哋要去嘅迴轉壽司已經距離唔遠喇,加油!onion-head104

下午一點四十分就到咗我哋午餐要試嘅100円熊本壽司店了 ~~

話明係100円壽司店就梗係每一碟都只係100円啦!咁平咁抵食,仲唔博晒老命去食咩,哈哈!

因為午餐之後仲要爭取時間趕路,所以懶得等佢逐碟逐碟咁慢慢轉過嚟,我哋索性一次過用部點餐機,點晒所有我哋要食嘅壽司同甜品,叫到成張枱滿晒,食都食唔切,嚇死隔離枱啲食客呀!onion-head2

價錢雖然平,但係食材好新鮮、好好味!onion-head68

就連甜品都唔錯,有水準!!

食飽之後下午2點30分起程,仲有120公里路先至返到福岡市。終於下午四點三十五分返到去福岡市,先去油站入滿油之後先至開去租車店還車 ~~

今晚在福岡住同一間酒店 JR Kyushu Hotel Blossom Hakata Central。 將行李安頓喺酒店房之後我哋步行10分鐘去博多運河城(Canal City Hakata)。

博多運河城是一座結合賣場、電影院、劇場、遊樂場、二家飯店、展覽場地及辦公室等複合式的超大型商城。博多運河城內有約250家的商店,多以日本製品為主,販賣包括流行服飾、化妝品、生活雜貨,及伴手禮…..等等商品,在這裡都可以慢慢逛個過癮 ~~

裡面可以看到運河流經運河城中央,還有動態的噴水秀可以邊逛邊欣賞 ~~

各自購物之後我哋一齊步行去食今晚嘅蟹宴「蟹通」~~

不過座位就冇我上次去大阪嗰一間蟹道樂坐得咁舒服,今次獨立房間嘅座位要大家屈住對腳咁坐喺度食有啲唔舒服 ~~

蟹通的長腳蟹和各樣菜式味道都OK,不過我都係覺得食物的賣相、座位舒適度以及服務質素都係大阪的蟹道樂優勝一啲 ~~

食飽之後沿著河岸步行返酒店,經過博多運河城的路旁,就會見到福岡最有名的「屋台」,不過我哋人多就算想食宵夜都好難搵到八個位俾大家一齊坐 ~~

十多分鐘嘅路程好快就行到返酒店了。 今晚要好好休息一下,特別係兩位司機豪好和珊姐今日開咗成日車一定好攰了,今晚要好好咁充一充電喇,晚安!

onion-head100  onion-head100  onion-head100

 

DAY 5 (21Jan2016) —

好快已經到咗我哋南九州旅程嘅最後一日了,今日上午的行程係由柳橋連合市場開始,然後再到天神地區的天神地下街跟新天町逛街買藥妝。完成咗今早嘅行程之後,我哋八人就會分道揚鑣喇!第一組嘅四人下午會搭火車去到名古屋繼續佢哋嘅白川鄉行程,豪好和Carrie 2人將會搭今日下午嘅港龍班機返香港,而我和蝦子餅2人今日會繼續福岡嘅掃貨行動 ~~

柳橋連合市場可以說是福岡的中央廚房,位處博多市中心,距離酒店1.5km,其實乘搭一程巴士就可以到達,但今早我哋見天氣唔錯所以選擇由酒店步行過去,由酒店行去柳橋連合市場只需要18分鐘。 到達柳橋市場時都未夠八點鐘,網上資料話啲鋪頭好早就開門,其實我哋去到有一部份都未開門,尤其係我哋想食早飯嘅「吉田鮮魚店」原來早上十點鐘先開始營業,網上啲blogger資料唔正確!

onion-head72

這裡麻雀雖小但應有盡有,包括麵包店、咖啡店、鮮魚店、茶葉行、現炸配菜、蔬果店、鮮肉店、食堂等….

  

既然要等吉田鮮魚店10點鐘開門,我哋唯有喺附近周圍行下逛下。柳橋市場的對面都有一個Sun Road商店街,短短的不是很大,大概就有一些生活用品、蔬菜水果之類嘅嘢賣 ~~

又見到有一袋袋的日本番薯仔,我以前都試買過日本番薯仔返香港,蒸熟之後又香又甜,今次只賣100円一袋,我同CatCat呢兩個師奶仔又點忍得住唔買呢!

Carrie同我順便買咗哈密瓜和士多啤梨返香港 ~~

時間尚早,無無聊聊行埋呢一條街都唔知去邊好,當時天氣又凍,所以求其喺附近搵咗間Calton Hotel Cafe坐下打發時間,自助早餐才每人¥750,雖然嘢食種類唔算多,但係可以坐低休息一下而且咖啡任你飲都抵啦!

  

  

坐到夠鐘又行返去柳橋連合市場,雖然柳橋市場內都有好多間賣魚嘅店舖,但是可以堂食嘅就只有呢一間,所以唯有等佢10點開門啦 ~~

樓下賣鮮魚,食堂位於樓上 ~~

肥美嘅吞拿魚(Toro)再配上新鮮即開的海膽是本店大熱之一,店家還會淋上香甜的醬油,鍾意食海膽嘅朋友食過之後一定會回味無窮,而且價錢非常抵食。今早沒有安排酒店自助早餐,就係為咗呢一碗刺身飯 ~~

上午10點40分食飽之後2組九州團友要正式解散了,返酒店之前我哋第二組先步行去天神區掃貨,而第一組就會返酒店取行李然後搭火車去名古屋 ~~

天神購物區其實有好多地方可以慢慢逛,如果認真要購物的話預留一天的時間可能還不夠。從地圖可見,以JR天神站、西鐵天神站為中心,附近共有12家大大小小的百貨公司或購物商場,轉個彎還有Bic Camera、Apple Store、Tsutaya書局等,可說是福岡最精華最繁榮的購物地段 ~~

11點鐘一去到天神地下街,首先爭取時間同豪好去咗大丸百貨以及三越百貨的勞力士專門店搵佢想買嘅手錶,可惜佢想搵嘅型號已經售罄,既然無貨咁豪好咪可以慳返好多錢囉,嘻嘻!

然後我同蝦子餅就去咗大丸百貨嘅家品部逛咗一陣  ~~

見到有好多好靚嘅貓貓圖案貨品,心諗如果當時愛貓之人CatCat都有跟來的話可能會忍唔到手喎 !!

因為佢哋2人今日下午飛返香港,所以我哋下午1點20分離開天神區搭巴士返去酒店取行李 ~~

由博多車站前往機場嘅巴士開2點40分,去到車站只係1點50分,見仲有少少時間可以食多個午餐先去機場,所以就帶咗豪好同Carrie 去博多車站樓上食手打烏冬 ~~

我最愛的手打烏冬,好好味!!

然後就送佢哋落樓下巴士站搭機場巴士 ,而我和蝦子餅就繼續行程。團友再見喇,下次一齊再玩過,一路順風,bye bye!monkeys12 monkeys12

我出發之前2個星期才決定同蝦子餅多留一晚福岡繼續購物,因為太遲做決定所以無辦法訂到多一晚平靚正嘅JR Kyushu Hotel Blossom Hakata Central酒店。唯有改訂另一間Hakata Tokyu Rei Hotel,酒店一樣係位於博多車站對面,一樣好方便,不過價格貴啲 ~~

HK$829一間雙人房,但沒有包早餐 ~~

Check-in之後爭取時間繼續我嘅掃貨大計!!onion-head105

我多留一天主要係想去Abercrombie & Fitch的outlet特價區掃貨,今個月大減價可能折完再折會更平更抵買呀!!

  

結果比我預料中更加便宜,我哋總共買咗11件,加埋稅只係¥20,134,我覺得好平好抵買!onion-head68

掃完貨返到去博多站我哋又去咗博多地下街食晚飯 ~~

呢間「多幸橋本店」嘅炸雞真係好食到停唔到口,我第二日去機場之前再去買咗一盒外賣上飛機食 ~~

另外叫咗一個雞肉湯鍋都唔錯 ~~

最後當然又要去便利店買雪條食下啦,咁先至算係完美嘅晚餐嘛!

 

DAY 6 (22Jan2016) —

我訂的Hakata Tokyu Rei Hotel房價沒有包早餐的,所以早餐要另外買早餐卷,¥1000 一人。食物選擇唔算多,都係JR Kyushu Hotel Blossom Hakata Central的酒店自助早餐好食好多,食物種類又多選擇 ~~

今日上午係返香港之前嘅最後一次掃貨時間,我哋由博多車站搭巴士去到天神站落車 ~~

喺呢間Tenjin Core購物商場我哋買咗好多嘢 ~~

特別係商場裏面呢間GU,啲大減價貨品真係好平 ~~

啲毛毛靴一對 ¥900就有交易 ~~

然後我喺新天町買咗兩盒士多啤梨返香港 ~~

最後出發去機場之前我哋食咗個九州拉麵午餐,蝦子餅話九州拉麵咁好味,佢要食多一次先夠本喎!

返酒店取行李之後就步行過去博多車站搭機場巴士去福岡機場了 ~~

今次全程都搵唔到去年夏天在東京食過超好味嘅芒果雪條,不過喺上機之前照豪好嘅吩咐試咗佢極力推薦嘅藍莓雪條,味道果然唔錯,咪就係藍莓雪條有藍莓味囉,哈哈!

我哋今日回程係乘搭國泰港龍嘅航班KA381 ,下午4時35分起飛,返到香港係晚上七點二十五分 ~~

返到屋企展示一下我哋今次嘅戰利品,當然我嘅戰利品係佔咗大部份啦!onion-head29

順便分享一下我哋今次喺日本用過嘅漫遊流動數據儲值咭,鴨寮街賣HK$150一張,簡單易用,速度又夠快!

 

以下係今次記錄俾團友嘅九州5日行程的洗費 :

Day 1 –

機場巴士票每人¥260

一蘭拉麵每人 ¥790

博多一番街晚飯(¥9154)

每人¥1145 7eleven 雪條 (¥1592)

每人¥199

 

Day 2 –

山江服務區拉麵餃子午餐每人¥1000

私人風呂 每人¥500

 

Day 3 –

黑砂浴 ¥9600,每人¥1200

黑豚和牛燒 ¥10130,每人¥1266

梅酒一支 ¥1070(每人¥135)

溫泉稅8人 共¥1200 (每人¥150)

 

Day 4 –

8支梅酒 ¥4752

迴轉壽司午餐 ¥11000,每人¥1375

蟹宴 ¥73250,每人¥9156

 

Day 5 –

酒店coffee ¥6000,每人¥750

刺身飯 ¥21600,每人¥2700

手打烏冬午餐 ¥950

機場巴士 ¥260

 

Toll費 : ¥620 + ¥6000 + ¥320 + ¥630 + ¥1070 + ¥1070 + ¥3210 = ¥12920 (每人¥3230)

天文館停車場 ¥500 (每人¥125)

油錢 : ¥2800 + ¥1600 (每人¥1100)

 

酒店費用(每人日元):

Day 1 – JR Kyushu Hotel Blossom Hakata Central¥6550

Day 2 – 指宿海灣露台酒店 ¥12960

Day 3 – 霧島岩崎飯店¥10700

Day 4 – JR Kyushu Hotel Blossom Hakata Central¥6050

 

Total yen = ¥61656 (HK$4100) + 租車費用 每人 HK$615  + 機票 :HK$4280

團費總數= HK$8995 (所有費用包括機票、酒店、食宿、交通,除咗購物之外)