走過南美的土地 – PART 3【玻利維亞篇 】

這次去南美洲除了選擇遊秘魯這個國家之外,另一個我們計劃去的國家就是玻利維亞了。 選擇到玻利維亞旅遊的人,十居其九是為了去烏尤尼鹽湖 (Salar de Uyuni),親證「天空之鏡」的神奇。天空之鏡是一大片恍如鏡般倒影天地的絕美景色,早已被愛旅遊人士認定為「人生必遊」的旅行目的地之一。 Salar de Uyuni 位於玻利維亞西南部的Uyuni小鎮附近,海拔3653米,是世界最大最高的鹽湖,東西長約250公里,南北寬約100公里,面積達10,582平方公里,鹽湖面積是整個香港的6倍!

我們挑了2月尾這段時間出發是有以下2個原因的:

  • Salar de Uyuni的天空之鏡只有雨季有一定積水的時候才能看到,雨季是12月至3月。曾經網上見到有人抱怨12月和3月去了但看不到天空之鏡,所以機會比較高的季節是1月和2月,而1月的降雨量通常比2月多,正在下雨的時候也不行,因為必需要平靜的水面才能看到天空之鏡的。
  • 過了農曆新年的旅遊旺季,機票相對會比較便宜。

這一輯Part 3玻利維亞遊記開始之前先貼上一張Salar de Uyuni天空之鏡的preview照片讓大家看一看 ~~

DAY 7 (26Feb2016) —

今天一早8點退了房,然後由酒店安排了一部7人車送我們去Cusco機場,準備飛往玻利維亞的首都拉巴斯 (LaPaz),7人車費是S/.50 ~~

我們一行5人乘搭的是Amaszonas #501號航班,單程機票是US$82.60 ~~

La Paz和Cusco有一小時的時差,La Paz的時間是GMT-4,慢香港12小時。 這一程只是很短的1小時飛行時間,航機早上10點40分起飛,我們抵達La Paz時已經是中午12點40分了~~

以前去玻利維亞旅遊最麻煩嘅就係要申請簽證,過程繁複而且需時,但自從去年開始可以辦落地簽證之後真係方便得多了 ~~

官方網站嘅資料顯示,申請玻利維亞簽證必須打印和準備嘅文件如下 :

(1) Details of accommodation in Bolivia (玻利維亞的住宿資料)

(2) Arrival flight and departure flight (抵達和離境航班資料)

(3) Copy of your credit card and financial proof / salary slip / bank statement (入息證明,例如信用咭副本、稅單等等… )

(4) Copy of your passport (護照副本)

(5) 2 copies of Passport size  (50mm X 50mm) colour photo (彩色證件照片2張)

(6) Yellow Fever Certificate, a copy and the original (黃熱針證書和副本一張)

為了想順利辦到落地簽證,我們出發前跟足官方網站的指示一一準備了以上所需文件,抵達玻利維亞機場辦理入境手續時就交上去申請簽證。 點知原來當日的官員只需要我們每人交出護照,再加上每人美元$92的簽證費用就可以了,就連證件照片亦都係由佢幫我們影,完全睇都無睇過一眼我們辛苦準備嘅所有文件,真係有錢就乜都搞掂晒……徙晒我們嘅心機,之前仲諗住驚資料唔齊無得入境添….哈哈!!

不過我都奉勸打算去到玻利維亞才辦落地簽證嘅朋友最好跟足官方網站嘅指示照做,萬一遇到一個心情欠佳嘅官員就可能會要你遞交晒所有文件㗎,唔好搏呀!! yxh49

取了行李之後搵咗一架7人車載我們去酒店,玻利維亞幣 Bs100 ~~

呢間Casa De Piedra酒店我們會先住1晚,然後Day 10 (2月29號晚) 當我們由Uyuni (烏尤尼)返到La Paz時會再住多2晚,然後再順便遊覽一下呢個玻利維亞嘅城市 ~~

Casa De Piedra酒店是一棟建於殖民時期的建築,配有雕花木牆,富有當地特色。酒店地理位置很好,位於La Paz市中心。 這裏的員工識講英語的,溝通上都沒有問題 ~~

  

美元$96一間雙床房,部份房間有樓梯上閣樓,好特別 !!  房價包簡單美式早餐和免費wifi ~~

   

取咗房之後我們就出發去酒店附近的找換店換當地貨幣,玻利維亞幣 (Bs) ~~

然後求其搵咗間皇冠炸雞店食中式午餐 ,最好味嘅係當地出產嘅蘋果汁 (下圖)~~

食完午飯大約4點半左右,所以就在附近閒逛一下,其它La Paz景點就等我們去完Salar de Uyuni天空之鏡之後返到來再去遊覽。 La Paz西班牙語意為「和平之城」,是世界上最高的首都,此為玻利維亞中央政府首都,法定首都為蘇克雷 (Sucre) ,La Paz海拔達4000公尺,比西藏的拉薩海拔還要高 ~~

Mercado Lanza食物市場內外都有賣一啲當地嘅小食,個樣似炸豬皮(下圖),我無試過所以唔知味道如何 ~~ onion-head33

   

今早才由秘魯Cusco飛到La Paz,明早又要凌晨4點半出發去機場飛去烏尤尼(Uyuni),所以大家決定今晚早啲休息,連晚飯都唔使食,又當減肥囉,嘻嘻….!! onion-head24  onion-head24

 

DAY 8 (27Feb2016) —

凌晨4點執好行李退房,因為我們太早出發所以酒店安排咗一個簡單嘅早餐盒俾我們帶去機場食。 今早一樣係由酒店安排7人車送我們去機場,車程大約30分鐘,車費 Bs100 ~~

早上5點去到機場,晨咁早明顯人不多,好快就辦理好登機手續了 ~~

之後我們就搵咗間咖啡店開餐 ~~

我們今早乘搭Amaszonas #300號內陸航班飛往玻利維亞的烏尤尼(Uyuni) ,單程機票是美元$165 ~~

最奇怪嘅係登機閘口和飛機停泊嘅位置相隔好遠,我們由登機閘口沿著停機坪一直步行超過10分鐘先搵到我們要搭嗰架飛機,當時無職員帶路亦無任何指示,真奇怪呀 !!

只是短短的45分鐘的飛行時間,0600起飛, 0645就抵達Uyuni了 。 在機上降落前影到嘅沙漠晨曦照片,好特別呀 ~~ onion-head16

只係好細嘅一個機場,落機之後企定定等啲工作人員將行李送到去抵境大堂/侯機室 ~~

攞齊行李一出到去就見到等緊接我們機嘅當地導遊Janet ~~

Salar de Uyuni會以高原小城鎮 Uyuni(烏尤尼)為基地,因為Salar de Uyuni 基本上是一片荒漠,當然不會有公共交通,所以一般都需要經當地旅行社包車或跟團遊玩,主要可分為最短的一天純遊鹽湖,或者係最少三天的行程,而我哋選擇了後者。 我們今次參加這個三日兩夜鹽湖團的行程非常多樣化,第一天會先到鹽湖,而其餘兩天會到玻利維亞的南部,觀賞不同類型的大自然景觀,有沙漠、大石群、不同顏色的湖泊、地熱等等 ~~

onion-head25  以下係行程簡介 :

Day 1

Uyuni 》cementerio de trenes 》  Colchani (procesadora de sal)  》Colchani 》 Monticulos de sal 》Ojos de agua 》Museo de sal  》 Isla incahuasi (IF accessible, probably not) 

Accommodation : Salt Hotel Luna Salada

Day 2

Valle de las Rocas  》Laguna Hedionda  》Laguna Chiarkota 》Laguna Honda  》Laguna Ramaditas 》Ojo de Perdiz 

Accommodation : Hotel Tayka del Desierto 

Day 3

Ojo de Perdiz 》 Árbol de piedra  》Géiser de Sol de Mañana  》Termas de Polques (Desierto y Salar de Chalviri)  》Valle de las Damas  》 Laguna Verde  》 Laguna Colorada  》 Mina Capina 》San Cristóbal Iglesia 》 Uyuni Airport

一架4驅車坐滿我們5人 + 導遊 + 司機已經 7人了,無辦法放到行李入後尾車箱中喇,唯有將所有行李綁上車頂 ~~

7點22分由機場開車起程 !!   yxh113天團嘅行程其實早上10時才正式開始,所以導遊先安排我們去呢間Uyuni小鎮嘅Nonis小餐廳食個簡單早餐 ~~

見到餐廳貼滿好多遊客留低嘅字跡……..想必所有停留Uyuni小鎮嘅各方遊客都曾到過此餐廳 ~~

食飽早餐距離出發還有少許時間,一於四處走走吧……..Uyuni只是個小鎮,基本上沒什麼特別的景點或是令人印象深刻的地標或建築 ~~

無乜靚嘢影……..咁不如影吓當地啲美女啦…!! onion-head2

今日嘅行程係去烏尤尼鹽湖 (Salar de Uyuni)天空之鏡,幸運地遇上這麼藍的好天氣,多謝天公造美,感恩 !!! yxh12

  

   

終於搵到個似樣嘅鹽造嘅地標影吓相喇……試吓啲鹽夠唔夠鹹先…呵呵呵….!!

見到街邊有檔賣當地三文治嘅,類似將啲豬頭嘅肉連皮一塊一塊片出來,然後夾喺一個圓型嘅麵包裡面一齊食 ~~

   

   

然後行吓行吓就兜咗入去一個當地嘅街市,當然唔能夠錯過一個可以了解當地人生活和飲食文化嘅機會啦,我喜歡到唔同嘅國家旅遊其中一個原因就係希望可以見識多一啲各個國家不一樣的文化嘛,增廣見聞就係咁解嘛,對嗎 ?

yxh75

因為我喜歡美食,所以我喜歡逛街市和超市。我曾去過好多國家唔同地區嘅街市,我嘅結論就係香港人好幸福,因為香港街市貨品種類繁多,無論各類海產、蔬果、肉類、乾貨等等……都又新鮮又多選擇;而且比起好多西方國家的價錢已經唔算貴,更有啲街市有冷氣,條件真係比好多地方優勝 ~~

玻利維亞當地婦女嘅服飾好特別,我返到La Paz之後會有更多嘅分享 ~~

早上10時我們嘅3天團正式由Uyuni開始出發了 ~~ yxh50

第一個景點我們先來到離Uyuni鎮約3公里的火車墳場 (Cementerio de Trenes ) ~~

    

Cementerio de Trenes 唔係一個什麼特別嘅景點,只係有幾架只剩下外殼、畫滿塗鴉、而又鏽蝕咗嘅火車吧了,不過如果喜歡影相嘅朋友都會覺得好有趣嘅 ~~ onion-head29

喺呢個景點我們影咗好多5人嘅大合照 ~~ onion-head29

我怕高原反應所以我無跟佢哋一齊跳,我只負責影相 ~~ yxh56

出發往Salar de Uyuni鹽湖的中途,會先到Colchani處理鹽的工廠了解處理鹽的過程。原來來自不同鹽湖的鹽,礦物成份都不完全一樣。 以Salar de Uyuni為例,這裡的鹽的不是碘鹽,採集後必須要作後期加工,加入足夠份量的碘才可以包裝出售作為食鹽,而且採集回來的鹽不是馬上就可以食用,需要經過一些處理才可以製作成食用鹽 ~~

我們抵達造鹽工廠,聽完少許講解之後,導遊叫我們一齊入去睇睇工人嘅示範 ~~

嗰個工人坐在火槍前面,很認真地把一包鹽放在火槍口燒一燒,我們滿心期待接下來的步驟,怎料佢要示範嘅就係點樣將這包鹽封口!onion-head41

見佢超認真嘅樣,我仲以為佢要做咩複雜嘅程序添 ……….. 算吧啦,反正呢個工廠唔係行程嘅重點,不過為咗獎勵佢咁認真示範,我們都有幫襯買咗幾包鹽返去㗎 ~~ yxh75

Colchani 的紀念品市集 ~~

我哋買咗唔少當地特色手信,包括羊駝毛製的頸巾 ~~

鹽湖區當然會有鹽做嘅紀念品啦…….我見到咁靚咁特別所以都買咗一個 ~~

之後就繼續出發去今日嘅主要景點,天空之鏡 Salar de Uyuni (烏尤尼鹽沼) !!! yxh55

在雨天過後,鹽湖上的積水彷如一面巨大的鏡子;旱季時,就變成一面碎裂開的鏡子,有另一種吸引力。 Uyuni全年雨量不多,雨季一般從每年 12 月至翌年 2 月,其中 2 月是平均雨量最多的月份。 看「天空之鏡」是需要以下3個完美條件:

(1)  積水 – 地上有僅完全覆蓋地面的積水為最理想,因為積水太多,看起來就不像在天空漫步,而且積水太深的話四驅車就不會冒險進入,據聞一、二月甚至有機會無團出發。

(2) 晴天 – 因為天氣不好沒有藍天白雲,那倒影就不會漂亮,如果遇著下雨水面不平靜就不可能出現鏡面;持續下太大雨的話,路面會變得很危險,很多旅行團甚至會取消行程。

(3) 無風 – 如果有積水但刮大風的話,鏡面的倒影就不會清晰。

好幸運地我們遇到嘅水深其實只及腳掌,又有藍天白雲以及沒刮大風,好好彩,感恩呀 !!!  onion-head26

一望無際的鹽湖,在雨天過後,鹽湖上的積水彷如一面巨大的鏡子,映照著蔚藍的天空和潔白的雲朵,形成天和地連成一線的畫面,腳下是一大片又一大片的白雲,感覺就好像在天空漫步一樣。可想而知,如果沒有運氣是很難看到這麼美的珍貴景色!

onion-head16

搵到個好位置之後導遊同司機就開枱準備我們嘅午餐了,鹽湖上野餐夠晒風味喇卦…!!

膳食唔算好但都算可以接受啦,荒山野嶺,唔好要求五星級的服務好嗎?

至於份量來說,相信一般香港人應該夠飽的,不過如果你是偏食嘅就好難講,因為每一餐只有一至兩種主菜、白飯或藜麥,再加一道沙律,唔啱食嘅話就麻煩自備乾糧喇 ~~

不過如果你覺得午餐味道太淡又無味嘅話,隨時可以就地取鹽加加調味㗎 ,哈哈 !!

食飽就到做柔軟體操嘅時候喇….幫助消化吖嘛….!! yxh50

從鹽湖望向四方八面都係白茫茫一片,無論2個人嘅距離係一米或係十米,都完全感覺不到距離感,所以非常適合影創意錯體相!

我們今早喺Uyuni市集門口買嘅一袋恐龍小道具就係要用來影錯體相㗎喇…. !! onion-head29

影完再駛去其它區再影下鹽湖嘅其它角度 ~~

其實鹽湖中心有個長滿仙人掌的島”Isla del Pescado”,如果鹽湖積水太深的話車就開不進去,太淺水的話又看不了天空之鏡,魚與熊掌但不能太貪心,當時旅行社的電郵中亦有告知2月未必可以上去仙人掌島,最後我們去到的時候水還是太深所以無去到Isla del Pescado ~~

一直逗留到夕陽西下才捨得離開,因為呢個烏尤尼鹽湖我相信我今生只會來一次,所以趁遇著好天時更加要好好珍惜機會影多啲相片啦 ~~

遊完鹽湖幾乎大部份遊客必定會入住鹽酒店,據講我們今晚入住嘅鹽酒店Salt Hotel Luna Salada」係全個鹽湖區最靚、最豪華、最高檔嘅一間酒店,設備比較齊全,好期待呀 !!

顧名思義,鹽酒店就是一間由鹽搭建的酒店,無論酒店的牆壁、地上、床、桌、椅全是鹽 ~~

我從未住過一間咁特別嘅酒店,無論裝飾、傢俬、佈置都好靚,色彩豐富而且充滿特色,果然正 !! onion-head23

因為2月酒店房間比較搶手,而且酒店房間不多,標準雙人房一早已經被旅行團訂滿晒,所以酒店安排咗一間2房豪華間俾Winnie 、 Jennifer 和我 3 人。 豪華間有個大廳和一個大浴室,Jennifer一人住大床房,而我和Winnie就共睡一間雙床房 (下圖) ~~

晚飯前在酒店門口影嘅日落……好靚呀 !! yxh06

當晚除咗我們5個來自香港嘅遊客之外,喺自助餐廳我見到一團日本遊客同住一間酒店 ~~

由酒店餐廳望出去仲可以見到好靚嘅夕陽餘暉 ~~

其實嘢食唔算差,不過我真係覺得南美啲食物太鹹,有啲真係鹹到苦,就算鹽咁平又隨處搵到但都唔需要咁重手落咁多鹽去煮卦…..當地人長期食咁鹹會唔會有3高兼患腎病呀? onion-head48

最穩陣都係食多啲沙律 ~~

 

DAY 9 (28Feb2016) —

早上9點45分我們食過早餐就準備出發了 ~~

前文我都提過今次某啲地方我到過但係印象並不深刻,記得起的我會盡量去寫,記唔起嘅就只能分享照片了,未能詳細分享,抱歉 !!

呢兩天大部份路過嘅地方我都記唔清楚係咩地點,有啲景點名都唔太肯定,導遊亦唔可能不停咁沿路詳細介紹,就算佢有講解但我都記唔到咁多啦…..

太偏僻嘅地方連Google map都無法正確顯示到位置,況且我當時又無數據可以上網定到位 ~~ onion-head54

這個小村的名子我已經無法記起了 ~~

前往 Valle de las Rocas火山區嘅沿途中見到一大片彩色嘅藜麥田,我之前從未見過藜麥,又大開眼界了 ~~ onion-head25

再走多一段路大家就見到一大片彷如世外桃源裡的青青草地,還有一條小溪,溪水旁有很多草泥馬/羊駝在休憩 ~~

草泥馬/羊駝可以自由自在地活動,但牠們嘅警覺性很高,我們一嘗試走近,牠們就會悄悄地離開,跟我們保持一定的距離 ~~

所以我們唯有坐在遠處看著牠們一邊吃草,我們就一邊吃午餐,都算係一起共進午餐吧,嘻嘻…!!

有發現 !!  擁有最上級和最名貴羊駝毛的野生Vicuna,其毛柔滑若絲,細於羊毛而被視為上品,從前印加人曾將其專供王族享用。據聞一條Vicuna頸巾就要大約1500美元,而一件毛衣最貴就要30000美元 ~~

終於到Valle de las Rocas火山區了 (海拔4100米),這個火山名叫Volcano Ollague ~~

Laguna Hedionda火山湖, 在Volcano Ollague 火山後面就係智利邊境(Pasa de Leon)了 ~~

幾個火山湖都好相似,而呢個Laguna Hedionda最特別嘅係火山湖面有一大群Flamingo (紅鶴,又名火鶴或火烈鳥) ~~

而呢個到底係唔係Laguna Ramaditas,我就唔太肯定了 ~~ onion-head48

下圖係Laguna Chiarkota (海拔4150米) ,今次我咁肯定因為我有影到個牌碑 ~~ yxh52

今天最後一個景點係美麗嘅內湖「Laguna Honda」,咁中文名係唔係應該翻譯做「本田湖」呢? 哈哈 !!

傍晚6點我們到咗今晚入住嘅一間酒店 「Ruta Tayka」 ~~

酒店位於沙漠上,海拔4600米,我有史以來住過最高海拔嘅酒店 ~~

    

房間正正常常一間標準雙床房,唔錯喎 !!

估唔到咁偏遠沙漠地區嘅酒店洗手間都乾淨企理,比起內地好多酒店都仲要乾淨,讚 !!

酒店餐廳 ~~

晚餐賣相唔錯,但我今晚一啲胃口都無 ~~

沙漠地區光害少而且當晚無雲所以滿天是密密麻麻的星星,晚飯後Winnie搵咗個好節目,就係影星星喇……睇下佢影嘅星星照片幾掂吖 !!  onion-head68

我唔舒服所以今晚早啲去休息,準備明天仲有一連串嘅精彩行程 ~~ onion-head24

 

DAY 10 (29Feb2016) —

酒店嘅簡單自助早餐 ~~

今日係Uyuni 3天團嘅最後一日行程,行程完結之後我們仲要趕及傍晚返到去Uyuni搭飛機,所以今早6點半就退房出發了 ~~ 

今日的景點我唔會作詳細介紹了,因為今日有好多相片我真係唔太清楚喺咩景點影嘅,唯有貼今日嘅行程上來,然後再分享今日嘅照片吧 !!

Ojo de Perdiz 》 Árbol de piedra  》Géiser de Sol de Mañana  》Termas de Polques (Desierto y Salar de Chalviri)  》Valle de las Damas  》 Laguna Verde  》 Laguna Colorada  》 Mina Capina 》San Cristóbal Iglesia 

導遊帶我們去爬 Árbol de piedra  大石群,原來這裡的火山岩石已經有幾千歲,不過這裡沒有風吹雨打,岩石保留得非常完整,顏色仍然鮮紅豔麗,相反,其它地方的岩石受盡風雨侵蝕,變得又走樣又褪色了 ~~

   

這個係 Laguna Colorada ~~

Geyser Sol De Manana (間歇泉)是溫泉的一種,因為地下水變成蒸氣而間歇地噴出而形成,多數在火山地域可以見得到 ~~

我比較印象深刻的一個寶石色湖「Laguna Verde」,因為湖水藍得好靚 。 這裡是三個國家的交界,人稱ABC Border,A代表Argentina(阿根廷),B代表Boliva(玻利維亞),而C代表Chile(智利)
綠色湖泊的背景左邊是一座睡火山「Licancabur」。這火山橫跨智利和玻利維亞,火山頂有接近海拔六千米高 ~~

來到下一個景點「Aguas Termales」,其實就係浸溫泉嘅地方 ~~

其實我們都無打算要浸溫泉,雖然知道溫水一定舒服,但脫和穿的過程實在太痛苦了⋯⋯因為這裡沒有完善的更衣和沖水設施 ~~

導遊安排我們喺Aguas Termales 的一間小餐廳食午餐 ~~

啲罐頭吞拿魚又係鹹到無法入口,好彩仲有一碟沙律~~

來這個旅程之前只知道Uyuni有鹽湖,其實整個三日兩夜鹽湖團,鹽湖只佔其中的一小部份,一心只想來看天空之鏡, 無諗過餘下的兩天行程竟然會令人驚喜萬分。 玻利維亞的地形相當奇妙,由一望無際而平坦如鏡的雪白鹽湖,至到五顏六色的高原湖泊、還有千奇百趣的野生動物、沙漠奇石、火山噴泉,全都是其他南美國家沒有的奇特風景,非常值得一遊。 呢2天讓我進入咗只會在電視中看到的國家地理頻道(National Geographic channel)那些景一樣,真係好特別嘅景色,值得推介 !!

onion-head68

傍晚6時15分趕到回Uyuni機場, 正式完成今個鹽湖的三天之旅,而呢一程我們係乘搭Amaszonas #309號內陸航班飛返去La Paz,單程機票是美元$162 ~~

降落前影到嘅La Paz夜景 ~~

晚上8點幾返到去Casa De Piedra酒店之後大家都好攰,所以就留喺酒店食晚餐 ~~

DAY 11 (1Mar2016) —

又係好簡單嘅酒店自助早餐 ~~

今日早餐後我們打算遊覽一下呢個南美洲第一貧窮國家中最繁榮嘅城市「 La Paz」~~

La Paz是西班牙人在1548年建立的,當時是為從波多西銀礦到秘魯利馬的車隊提供歇腳之處,因為地處山谷內,人們選擇這裡來暫時躲避高原嚴酷的氣候,續漸就慢慢發展起來了。 玻利維亞的人口中,有三分之二是純血統的印地安人(Aymara及Quechua),幾乎沒有白人,算是與阿根廷正好相反。 在西班牙語中,La Paz是和平的意思,但實際上La Paz並不和平,玻利維亞獨立後的100年間,這裡經歷了190次政變、更換了近70名總統。 玻利維亞今天是南美最窮的國家,但這裡的銀礦曾多得富可敵國。而這裡的銀礦,則是集中於離La Paz大概10小時車程外的銀城波托西 (Potosi)。銀礦究竟有多少?根據史學家估計,當年的產出量可以讓西班牙殖民者搭建一座從波托西通往西班牙的銀橋,因此波托西亦是當時世界上最富裕的城市之一。 可惜玻利維亞在一百多年前數次戰爭失敗後,紛紛喪失了濱海的土地,而成為南美唯一一個內陸國,她的中南部是一大片高原,土壤非常貧瘠。 而今天的波多西,一片哀敗破落。唯一的經濟支柱基本上只靠旅遊業。而當地旅遊團去的景點則是到當地已接近廢棄的銀礦參觀,所以我哋行程亦無安排去波多西 ~~

在La Paz海拔近4000米的坡上逛街非要有好腳力不可,因為當地幾乎找不出一條平整的路,到處都是斜坡,即便在繁華的街上行走,也如攀山一般費勁,而且高原的含氧量比平原少30% ~~

雖說玻利維亞被稱為南美最貧窮的國家,但係當地建築卻有特色,酒店也很乾淨。相較於遊客不斷的秘魯,玻利維亞才剛開始放寬旅遊簽證接受遊客,所以未來玻利維亞可能會變成第二個秘魯 ~~

當地婦女戴高帽是已婚婦女的標誌。拉巴斯不僅海拔高、房子建得位置高,連婦女戴的帽子都很高。有趣的是,通常帶高帽的婦女屬於已婚者,而尚未出閣的印地安婦女則不可以戴高帽,據稱這是印地安人的傳統。高帽多由羊駝毛製成,下麵搭配著豔麗的披肩以及肥大的長裙,腳下則配一雙彩色塑膠涼鞋。據瞭解,這種裝束並不是土著人原有的習俗,其雛形形成於17世紀西班牙托萊多地區,後來傳入玻利維亞,到20世紀20年代才最終成為現在的樣子。因此這種服飾本身也是西班牙殖民統治的明證,但玻利維亞青年受現代文明的感染越來越大,穿傳統服裝的人已經少了很多 ~~

   

   

喺街上仲可以見到啲咁舊式嘅收費電話,彷彿時光倒流幾十年 ~~

仲有傳統榨果汁機 ~~

唔會有便利店,只有舊式士多 ~~

蛋糕真係好似小朋友畫出來的夢幻生日蛋糕一樣 ~~

而呢款小食個外型就十分似馬來西亞嘅小食 “咖喱角” ~~

市內的復古懷舊小巴士,看似很可愛,但噴出的廢氣很刺鼻 ~~

我們今早步行來到La Paz主要景點之一的火車站 (FFCC Train Station) ~~

   

我們來火車站並唔係坐火車,而係想坐市內新建的纜車「Mi Teleferico」,纜車全長11公里,連接La Paz 和 El Alto(埃爾阿爾托)兩大城市,只要安坐車廂,便可欣賞到安第斯山脈及沿山而建的泥紅色貧民窟的樓房。 對遊客來講,纜車只係觀光之用,但對La Paz市民來講這可是日常代步的交通工具 ~~

我哋一於買票體驗一下 ~~

來回纜車票才每人Bs6 (大約港幣$7) ~~

坐在纜車上放眼望去整個視野都是密密麻麻的貧民窟,無論是由山谷到山頂全部都是樓房,山邊的成千上萬的貧民窟,看似沒有邊際無窮無盡,如火柴盒般地緊密相連,排滿了整座山坡。 城市最高和最低點相差近1000米,溫差可多達10度 ~~

   

纜車每條線站數都不多,單趟從頭坐到尾大約20min左右,坐一次來回都唔會花太多時間 ~~

去到總站我們落車出去逛咗一陣 ~~

    

然後就再坐纜車返落去La Paz市 ~~

喺纜車站附近截咗架的士車我們去下一個景點「 Mirador Killi Killi」~~

Mirador Killi Killi 係一個觀景台 ~~

我們現身處Mirador Killi Killi 觀景台,放眼望去整個La Paz城市都聚滿了密密麻麻的樓房,許多樓房都蓋在陡峭的斜坡高處 ~~

  

喺市中心我們搵咗一間餐廳食午餐 ~~

午飯後我們往Plaza Mayor嘅方向步行去San Francisco教堂 (Iglesia de San Francisco),呢個係La Paz的主要景點之一。 當地人喜歡聚集於教堂前面嘅廣場,教堂旁邊有好多找換店、小攤攤,而後面亦有好多販售圍巾及編織物等紀念品的店舖,不少tour agent都設於此,是主要遊客逛街的集散地 ~~

這條Sagarnaga街 (Handcraft Street), 和Santa Cruz街及一帶的橫街都係購買手信的好地方 ~~

   

附近都有一間中型超市 “Supermercados Ketal” ~~

今晚大家又係選擇唔食晚餐,打算早啲休息因為明天一早凌晨4點又要出發去機場搭今個旅程嘅第7程飛機了 ~~

onion-head100 onion-head100 onion-head100 onion-head100 onion-head100

 

DAY 12 (2Mar2016) —

今早凌晨4點又係酒店安排 7人車送我們去機場,準備飛返去秘魯利馬 (Lima),7人車費是Bs 100 ~~

今程我們乘搭嘅係LA2569號航班 (LAN Airlines) ,單程機票US$436,這一程只係很短的1小時飛行時間,咁嘅價格巧貴呀 !!  onion-head30

航班原定起飛時間係早上6點,後來延遲到早上7點45分先起飛 ~~

我們抵達Lima機場係早上9點,Lima和La Paz又有一小時嘅時差,Lima嘅時間是GMT- 5,又要將手表時間調返慢香港13小時 ~~

 

走過南美的土地 – PART 1【秘魯庫斯科篇 】

走過南美的土地 – PART 2【馬丘比丘篇 】

走過南美的土地 – PART 3【玻利維亞篇 】

走過南美的土地 – PART 4【利馬篇 】

 

 

 

 

 

26 thoughts on “走過南美的土地 – PART 3【玻利維亞篇 】

  1. 好靚,好靚!鹽湖, 天空之鏡真係好靚,
    有藍天,白雲,有倒影, 天衣無縫,
    使我們忘記舟車勞頓, 高海拔的痛苦。
    靚境真是旅遊最好的回報。
    睇番D相, 我們五個真係玩得好開心, 難得是好的遊伴,
    好多謝 Joelle, Carine, Vano & Winnie,
    有妳們一起, 旅程生色不少, 南美之旅更加難忘。
    很多謝Carine 寫下咁精彩的遊記, 令旅程更添色彩。

    • 其實我覺得整個行程唔算辛苦了,因為為咗慳時間所以我哋選擇搭飛機取代咗好多程長途巴士,只係嗰4程長途機最難捱咋,因為齋坐又無靚景睇,好悶!!

  2. 睇完這篇遊記,又回味一次這個旅程,天空之境實在太美!感恩去到每個景點天氣都恰到好處😄讓旅程變得完美。
    仲有多謝喱姐教我影星星……第一幅影星星相,真係好開心,又滿意😊
    仲有玩得又捱得的旅伴,大家爭相坐車尾……拉人下車爭住坐車尾😂真的難得!其待南非之旅😁

    • “天空之境實在太美!感恩去到每個景點天氣都恰到好處,讓旅程變得完美” 呢句完全係我心中的說話,like 呀 !! 哈哈 !! ^^
      南非之旅又有你和牛嫂相伴,深信又會係一個難忘嘅旅程,期待中!!

  3. 嘩…真係好好好靚丫
    估唔到可以係湖上對住個咁靚既景開餐
    而且一班人去玩得仲開心呢~
    又會南美既野食咁咸既?見街市賣既野都好正常@@
    唔怪得平時未見過有美南餐廳啦@@

  4. 睇克PART 3, 每個地方景點都很獨特, 特別是火車墳場 (Cementerio de Trenes 同埋天空之鏡, 真係amazing.
    期待 PART 4

  5. 天空之鏡好靚呀x10000000000…. XD
    睇到咁靚既風景一定係人品極好先可以做到~ lol
    估唔到除左天空之鏡之外其他地方都有咁特別既景觀,La Paz既城市風光都好吸引! 多謝喱姐咁有心機介紹咁好既地方俾我地認識~

    • 呢啲地方又真係幾特別嘅,所以我都盡力將我所見所聞寫在遊記中同大家分享一下,我真心推介你去南美一趟,趁你仲後生先去晒所有艱辛嘅長線旅行,以後才慢慢再去啲舒適嘅hea遊行程嘛…lol !!

  6. 呢part D相真係好靚,猶其是天空之鏡嗰三日,怪唔得Eric 都恨到流口.水,點解D相冇其他路人嘅?

    原來海拔咁高,患上感冒會好危險,好彩妳地平安大吉,能有此經歷是福氣,係妳地前世修返嚟嘅,羡慕之餘,再次恭喜!

  7. 天空之鏡,名不虛傳,加上天氣配合,人間仙境,兩個字~靚絕!五位靚女,在鹽湖上的柔軟體操合照、創意錯體照,為遊記中最為吸晴部分😍😍😍,有趣非常!其他照片,也愛不知名的小村,草泥馬/羊舵的如畫般漂亮的青青草地!未能同行,唯只能萬分羨慕,十分同意豪好所言~只有睇左相當去過😁😁😁

    • 多謝留言支持先!! 原來Carrie妳的文筆咁好,下次再有機會與妳同遊我一定會邀請妳幫手寫一日遊記,唔可以再走寶!😁😁

  8. 你好,你嘅遊記資料好豐富

    有一條問題想請教:
    請問你鹽湖三日兩夜團跟邊間旅行社呢?價錢是多少?因為我見你兩晚酒店都好唔錯,但見其他BLOGGER哥啲情況好唔理想,第二晚係冇得沖澡嘅…咁當然佢地嘅團費係好平,但冇得沖澡我又唔係好接受倒…所以想請教你跟邊間旅行社可安排比較好嘅酒店

    先感謝回覆

    期待最後一篇遊記

  9. 謝謝你們的南美旅遊分享,除了得到很多寶貴的當地自由行資料,更欣賞你們的自由旅遊策劃能力。我們夫婦2人都想於7月中往鹽湖參加3天旅行團,可否告知收費及該旅行社的可靠性?

    Mrs Kan

    • 我已經將全個旅程的所有費用一一列出在Part 4利馬篇的最後部份,鹽湖3天團係每人US$600

      那間旅行社都算是可靠的,不過能否遇到好嘅導遊與司機就要睇彩數了~

Leave a Reply

Your email address will not be published. Required fields are marked *