這篇內蒙的3 part遊記是分別由我們其中四位團友合力去負責完成的,以下不同的文字顏色是方便大家去區分那一段是由那一位團友寫的 ~~
黑色 – Part 1是由搞手Carine負責寫的
綠色 – Part 2 的Day 4是由細孖負責寫的
藍色 – Part 2 的Day 5 & Day 6,以及Part 3的Day 8 & Day 9都是由Winnie負責寫的
橙色 – Part 3 的Day 7是由牛哥負責寫的
Day 7 (28Jun2016) —
黑山頭鎮地處額爾古納市西南部,而西北部與俄羅斯普里阿爾貢斯客區隔額爾古納河相望。黑山頭鎮地域遼闊,人口稀少,是一個以華俄後裔與俄羅斯族為主體,漢族占多數的多民族居住區。 此時正值初夏,日長夜短,只是早午晚溫差較大,這裡清晨四點多已晨曦初露 ~~
喱姐一早執齊五官,帶齊道具在蒙古包旁留倩影 ~~
我們享用當地特色早點,不知是牛或羊的奶品飲料,有粗糙的麵包、雞蛋丶白粥和酸菜,對我們來說是有點不對胃口,但這是旅遊的部分,必須接受 ~~
享用過當地特色早餐後, 黑山頭古鎮王爺包老闆娘楚楚姐叫我們去挑選今晚的羊,
走去挑羊嘅途中,見到在蒙古包附近飼養很多馬,清晨的牠們在覓食 ~~
籠中呢幾隻可愛的羊,其中一隻就係要被挑選成為我們今晚的晚餐啊!
吃完早餐,楚楚姐安排一個蒙古體驗活動俾我哋,由佢帶領去附近草原上去採摘野菜,全團收費200人仔 ~~
車輛要經過這草原前進,這些草原真是一望無際,若在香港有咁大地方一定人山人海,呢度鬼影都無隻。浩瀚的草原,更有野花在其中,我們對着那麽遼闊的草原,頓覺心情舒暢 ~~
喱姐身後的3部車正是我們今次包的內蒙戰車 ~~
剛才四大天王之首發哥俾人影到佢唱山歌,四人齊屙、怕聞到中尿毒又怕俾人發現,戴返個口罩先!! 其實佢有花粉鼻,仲話做田伯光,做採花賊 !!
我們主要採的就是以下這種”黃花菜” ~~
呢種紅色的叫野百合,亦是可食用的野菜 ~~
草原野花 ~~
另一種特別嘅野花 ~~
楚楚姐話我們摘的花可以入饌做今晚的餸,於是我們拚命去做採花賊 ~~
喱姐人在花叢中,緣人摘完花交功課俾楚楚姐驗收………….吓! 咁少? 今晩冇得俾你食呀!
呢度係蒙古,點解有lSlS出現? 採花?? 個蒙古ISIS睬你都傻,繼續影相 ~~
我們辛勞的收穫 ~~
在我們採摘的野花中,發現無數不知名的昆蟲,難道想分一杯𡙡?
採完野花菜後,各人在草原閑聊,突然有人提議草原奔跳。成日搵啲老嘢嚟玩,我呢啲老嘢點跳得起呀?
請細看有啲人雙腳永遠不舉,我和珊姐最是鍚身,最多單腳提起作黃狗射尿狀咁款 ~~
今天採完野菜花後,浩浩蕩蕩全體去到附近河邊,
因為有班嘩鬼响呢度開餐 ~~
在這清涼河水的週邊,又是一望無際的草原,配上陣陣烤肉的香味 ~~
其實在蒙古包旅店的人,全部一人可以在不同時段扮演不同角色,
有羊肉串、牛肉串……………
魚蛋、雞中翼、饅頭……….
尖椒、金菇……..河邊串燒午餐收費¥1130(每人¥94)
小張師傅都幫手,右邊穿格仔衫的就係楚楚姐 !!
其實楚楚姐預備的食物,非常一般,但係大家仍吃得津津有味,山長水遠嚟食啲咁嘅嘢,主要食環境,食氣氛同埋食友情啫!! 不禁想起了 : 人生得意須盡歡,莫使金樽空對月。 所以我們將所有啤酒盡銷,半滴不留 !!
國內人唔興飲冰凍啤酒,好彩河水源於雪山水,將啤酒放入河水,一陣即凍 ~~
咁多烤肉加冰凍啤酒,真係 : 酒池肉林呀 !!
最妙是在草原舖上膠蓆 ~~
各人舉樽盡飲,一滴不剩 ~~
有啲人不甘寂寞玩自焚,自已焚燒食物作狀一番 ~~
BBQ後本想集體玩吓騎馬和卡丁車。其實
供人租賃策騎的馬群 ~~
一些遊客騎馬的馬隊 ~~
但因騎馬和卡丁車的費用貴得有點不合理,卡丁車200人仔一圈10分鐘,而騎馬小圈100人仔,大圈就200人仔,所以最後沒有人去玩 ~~
小張師傅奀挑鬼命的身材,唔夠一百磅,佢引以為傲,唉 !!
我酒後有點睡意,所以和牛嫂先行徒步回蒙古包,來個半醉午睡,
小張同另外2部車帶咗其他10位團友上去一個小坡上看黑山頭鎮的全景 ~~
黑山頭這名字充滿神秘,其實黑山頭是蒙古汗國時期,成吉思汗大弟哈薩爾王的封地 ~~
小坡上睇到嘅風景就唔算好特別,不過山上就大風到好似8號風球咁,睇吓吹到我把長髮好似癲婆咁、連我蝦子餅都就快被風吹到飛落河,企都企唔穩 ~~
半小時過後小張師傅同其他團員都回到蒙古包了 ~~
見大家得閒無事做,楚楚姐又叫大家再做無償勞工,今朝採野花菜,現在去田間割菜為今晚的晚餐做準備,睇喱姐、牛嫂同阿CatCat做義工做得幾開心 !!
這些就是今早我們採摘的野菜,成日叫我們做義工的楚楚姐為我們準備今晚可入饌的黃花菜。真想問吓佢是否有個細妹叫”可憐” ~~
其他人等見太無聊,緣人在餐廳拿出幾副啤牌,提議玩十三張。 此等兒時已懂的賭博遊戲,我自問無一不懂,暗想呢餐無死喇、
開局前個個左推右搪,有啲人話唔係幾識玩,有啲人又話無玩好耐,仲有啲人話根本唔識玩,最離譜係Eric和Tina話完全唔識。緣人提議,佢肯定係箇中高手,我更唔使講,呢啲兒時賭博遊戲我無一不懂。想當年我9歲玩九章,13歳識玩十三張,30歲識玩非洲13張、牌九等………
終於開局玩咗兩粒幾鐘,其間我同緣人由頭黑到尾,
點知玩落去,有啲唔對路喎 !! 我同緣人由頭輸到落尾,輸趴街 !!
細孖和CatCat話唔係幾識玩,但成日報到攞例牌,呢次真係老手遇老千,輸到人都癲 !! 原來話語識個啲係老千 !!
終於捱到今晚重頭戲”全羊宴”。 咦 !! 班侍應又變晒身成為祭師和公主,準備為我們的烤羊做些蒙古當地的儀式 ~~
在全羊宴祭祀儀式前,祭師要我們團友選二人為王爺及王妃,眾望所歸梗係喱姐緣人兩公婆啦 !!
祭師要二人用指尖沾上類似青粿白酒,向上、中、下輕彈三下,代表祭祀了天、地、人,然後二人要各飲3杯,一飲而盡 ~~
(請細看圖中佢兩個表情,尤其是係鬼鬼馬馬緣人)
然後輪到每一位團友都跟住做一次同樣的儀式,搭上一條極之衛生頸巾「哈搭」之後,再每人飲一小杯白酒 ~~
緣人將此莊嚴衛生巾作弄團友,哭笑不得 ~~
最後廚師將全羊推出,並掛上紅絲帶 ~~
接著係由王爺以及王妃主持割羊禮 ~~
儀式完成就可以開餐了 !!
隻羊實在太大,食唔晒,但都多汁好味,下圖是黃花菜以及田園有機蔬菜 ~~
酒肉果然朋友多,小張師傅奀挑鬼命,原來好飲得,酒過三巡,發哥漸頂唔順了 ~~
團友不安好心,仍在灌發哥飲酒,幸得新婚妃子細孖傾身相助,但難免也來合巹交杯一番 ~~
期間突然有隻可愛羊仔闖入,小張用隻空膠樽逗羊仔玩 ~~
發歌酒意重、歌意濃,一展歌喉,不同凡響 ~~
老千拍檔亦來個情歌對唱,郎情妾意,情意綿綿,四目交投,嘴角含春,簡直絲絲入扣 ~~
喱姐徇眾要求,繼老千情侶綿綿情歌後,要喱姐也來一曲”
晚宴氣氛推至高潮,
各人歌意正濃之際,忽然有人大嗌”火燒雲”呀!! 各人衝出餐廳外,繼而哇哇聲四起,遠處天邊,片片火燒雲彩,各人拿出相機手機,
直至落霞盡了,才不捨離開 ~~
我們飯後稍為休息,各人加衣到户外參加楚楚姐為所有遊客準備的”溝女晚會”,
楚楚姐和他表哥又化身大汗和皇后,歌舞一番娛賓。我們團友亦買咗好多道具,化身為蒙古公主和蒙古大嬸 ~~
工作人員點成篝火柴枝 ~~
火炬能拍成心形火舌,好特別的景象 ~~
楚楚隨意高歌,團友跳舞好奔波 ~~
各團友圍着火焰,忘情起舞。雖然姿勢各異,但神情都一樣愉快 ~~
並與其他來自不同地方的旅客,共跳篝火舞,自娛自樂,歡聚了一個冰火的晚上 ~~
五位美女齊踢腿、睇到麻甩流口水 ~~
六位公主大包圍,人人讚嘆美艷齊 ~~
完了篝火晚會之後,由冰凍的戶外回到溫暖的餐廳室內食內蒙出產嘅牛奶雪條,好味!! 這天真的盡興而歸 ~~
Day 8 (29Jun2016) —
昨天的白粥酸菜早餐不太啱大家口味,緣人同楚楚姐提出要求話今個早餐只要簡單的煎饅頭和煎雞蛋,結果楚楚姐照足緣人的吩咐去做,真抵讚!!
喺蒙古包住咗2晚,早餐之後我們執好行李就起程出發往滿州里,不過今天的天色有點灰灰及烏雲密佈 ~~
往滿州里途中會先經過一個景點「186彩帶河」,186彩帶河是位於黑山頭至滿洲里的邊防公路186公里處,而186這個數字是指這裏公路的一座里程碑的數字 ~~
走到山坡上能真正的融入大自然,可以俯瞰與俄羅斯交界的河流呈現九曲十八彎的形態。站在山坡上眺望著遠處的俄羅斯山巒起伏,承托出一幅美麗的圖畫 ~~
美麗的彩帶河,蜿蜒的河水在太陽的光線輝映下,呈現一條彩色的綢帶擺在中俄邊境上 ~~
景點內有一個滑草場,須於購買門票時一併購買滑草門票,只係得四個團友買了門票玩滑草,當大家去到滑草場後,我相信大家副眼鏡已經跌咗落地 ~~
這叫做滑草嗎?瀡滑梯吧!既然買了門票咁就開開心心咁瀡一次重拾回童年的回憶吧!坐在滑梯上的坐位,心情格外的興奮,一顆童心未泯的樣子,職員從後猛力一推,一下子就瀡了去很遠很遠的滑道上,條滑梯又真係幾長,不消一分鐘大家都已經瀡完了 ~~
我們於景點的入口集合,齊人後就上車繼續前往滿州里 ~~
沿路上都是一片一望無際的大草原,綠悠悠的青草,給人一種悠然自得的感覺 ~~
在路上很容易就會見到標示 “邊境地帶” 因為我們大部份時間正身處中俄邊界 ~~
提提大家!小心部手提電話隨時自動轉用俄羅斯的電訊商,而被收取不必要的上網費用,點解我會咁講好顯而易見~~
由早上九時出發,到達滿州里已經係下午一時多了。滿州里的街道上車輛比較多,始終滿州里都算係大城市嘛 ~~
大陸東北滿州里,隨著中俄關係快速發展,已經成為重要邊境貿易口岸。滿州里是大陸「內蒙古自治區」一個縣轄市,1901年當地開通連接俄羅斯「西伯利亞」鐵路,使它成為從俄羅斯進入中國東北的第一站。現在滿州里已經從邊境小鎮,發展成有30萬居民的城市,不但是中俄邊境重要口岸,也是重要旅遊景點,去年有54萬俄羅斯人,跨越邊境進入滿州里觀光或經商 ~~
而這彷彿是一個很新穎的城市,建築大多是俄羅斯哥德式的建築 ~~
我們先到滿州里套娃廣場拍拍照, 套娃廣場獲世界吉尼斯紀錄,是中國唯一以俄羅斯傳統套娃為主題的旅遊休閒廣場 ~~
廣場集中體現了滿洲里中、俄、蒙三國交界地域特色和三國風情交融的特點。廣場主體建築是一個高30米的大套娃,建築面積3200 平方米,是目前世界上最大的套娃,主體套娃内部爲俄式餐廳和演藝大廳。 因為套娃廣場正在維修未有對外開放,在套娃廣場外圍走走拍拍照亦已經很滿足,套娃實在是太龐大,站在遠處已經清楚可見 ~~
點解一個咁靚嘅套娃廣場地磚上會佈滿晒咁多泥濘㗎呢?? 原來昨晚滿州里落咗一場豪大雨引至到整個地區水浸,小張師傅今早仲擔心緊可能會影響到我們今天滿州里的行程,好彩天公造美今早已經停雨而且仲有藍天白雲出現,感恩 !!
離開套娃廣場嘅途中,小張載一號車的團友去到一個滿州里中俄互市貿易區的停車場內,做乜呢??
原來小張係載咗一號車的團友去了一個好簡單的景點「北國第一門」的牌坊前拍照 ~~
由於分開三部車,所以我們另外兩部車未見到小張部車時就停喺停車場附近的一個博物館門外。而我們呢班望天打掛的人當然唔會呆等,我們四圍走走、看看。我們呢班孤寒鬼,只門欄前面偷拍,一早話過千祈唔好信照片拍出來的影像,真係呃得吓人㗎 !
我們觀察咗一陣只係見到有兩部飛機及一部火車放在博物館外,我們靜靜雞偷拍,說時遲那時快,一號車的團友又出返嚟一起舉起相機偷拍了~~
嚟到滿州里已經係下午,剛才飯都未食就去咗套娃廣場拍照,肚子實在太餓了,原來已經是兩點了,快快去食個午餐先!今日午餐食……打邊邊 !
午餐打邊邊好似有點過份,不過旅行就係食、玩、瞓,加上呢個係艱辛豪華團,一定要食好一點。餐廳是師傅為我們安排的~盛世東方火煱城,餐廳的門面好高級,店內的裝潢都同樣奢華 ~~
每人一個小火鍋爐,自己一鍋食得好過癮,湯底可以選自己喜歡的口味之餘,有人喜歡一鑊熟又得,慢慢滾又得,得咗!!
食飽飽緊係要消脂啦!行街就係我們消脂的主要活動 ~~
食飽先有氣力行街,你睇下大家剛剛先打完邊邊,大家又好認真地為消脂做足準備,俄羅斯雪糕又滑又好味!點忍先!!
呢間商場最特別嘅店舖就係賣一啲香港好少見到嘅貂皮 ~~
今晚入住的酒店 “滿洲里飯店” ~~
人不可以貌相係真的,單單看這酒店的外表,很平實,但走到飯店的裏邊,走到我們入住的房間,真的嘩了一聲 ! 好豪華,房間又大,佈置精美,坐在吊椅一會幻想著有錢人的生活樂不思蜀 ~~
酒店check in 後是我們自由活動的時間,我們各自出街逛逛 ~~
然後再集合一齊去食俄羅斯晚餐,入到餐廳後都未行到上去我們的餐枱,大家都企定定唔願郁,點解? 餐廳安排了俄羅斯的舞蹈表演,每個表演環節都好吸引,而最吸睛的環節當然係最後出現的壓軸表演啦,究竟係乜表演先賣個關子先!!
這個表演可以話係吸引全部的食客觀賞 ~~
到底個壓軸表演係乜?咪就係金髮俄國辣妹跳鋼管舞囉,動感、惹艷 !! 個個睇到目不轉睛,尤其是係我哋啲男團友,嘻嘻!!
呢一餐俄國菜不過不失啦,勝在食個氣氛同環境!
食完晚飯,我們去到酒店對面的手信店買手信,最特別係啲有俄羅斯特色嘅彩色牙簽筒,又平又靚!! 仲可以溝淡佢,咩意思?? 聰明的你一定明。睇下喱姐溝淡咗之後笑得幾開心 ~~
買完手信一袋二袋當然係拎返酒店先啦,休息一會後大家相約了外出睇滿州里的夜景。街道上隨處可見為吸引遊客而來的俄羅斯金髮碧眼美女 ~~
滿州里的夜色,絲毫不像一個中國的城市,而是充滿了俄羅斯風情。發哥和細孖今晚可謂艷福不淺喇,咁多俄羅斯美女主動想同佢哋合照,乜真係咁筍?? 哦...原來係要收小費嘅!
Day 9 (30Jun2016) —
落餐廳嘆個酒店自助早餐先,食過早餐之後又要準備執行李退房了~~
今天返去海拉爾之前我們仲有3個景點要去,起程之前出咗去酒店對面啲商舖最後衝刺買手信 ~~
這個和俄羅斯相鄰的內蒙滿州里,當地滿街賣的特色手信都是一些富有俄羅斯風情嘅套娃,木材雕刻而成的套娃,彩色或原木色的各有特色。 大大小小的「套娃」,一個包著一個,少則7樣一組,多的甚至達到50個。咁我就一於買一個返去留念啦!!
早上十點出發前往猛獁象公園 ~~
這是猛獁象公園的入口處,我們下車時已經即時被這兩座仿俄羅斯建築物吸引著。大家已經忍唔住舉起相機影相了 ~~
猛獁象公園是滿洲里的一處標志性景點。因為中國東北有個叫扎賚諾爾的地方,當時開發煤礦而連續發掘出猛獁化石,所以依地而建成了現在的猛獁象公園,亦是來滿洲里不應錯過的一個景點 ~~
猛獁象公園內共有古生物雕塑93座。其中最大的猛獁象王高度15.77米,長15.9米,寬4.4米 ~~
今日藍天白雲,天氣好好,多角度拍這座仿俄羅斯建築物啲顏色都特別靚 ~~
之前每餐都食得太豐富,今餐我們要求師傅為我們找一間餐廳只食水餃及湯麵。今天點了羊、豬、魚肉3款水餃,清清地都唔錯吖,雖然兩碟水餃望落都差唔多樣,但係個餡料係不相同的 ~~
食飽午餐下一個景點我們就嚟到「呼倫湖」,本來小張師傅想車我們入到去景點內,誰不知票務員要收取師傅的入場費,師傅為免我們浪費金錢,所以於景點外面讓我們下車,我們自行步行到呼倫湖參觀 ~~
呼倫湖,又名呼倫池、達賚湖,亦稱札賚諾爾(英語:Dalai Lake),意為「海湖」,位於呼倫貝爾草原西部新巴爾虎左旗、新巴爾虎右旗和滿洲里市之間。 舊時呼倫湖北與海拉爾河相通,湖水外洩入黑龍江,現已斷流成為內陸湖 ~~
呼倫湖是中國北方數千里之內唯一的大澤,面積2339平方公里,是內蒙古第一大湖、中國第四大淡水湖。話時話,呼倫湖這個淡水湖除咗超大之外我真係唔覺得有咩特別,景色真係麻麻,12人的呼倫湖門票共¥480(每人¥40)我覺得太貴,有點不值。
用相機很難拍下一張全景照片做紀錄,因這個湖實在係太大,大到看唔到盡頭,我們只好拍下地標的石碑吧 ~~
逗留咗一陣就離開呼倫湖繼續前往下一個景點「巴爾虎蒙古部落」了 ~~
巴爾虎蒙古部落就是我們今個內蒙旅程中最後一個景點了~~
巴爾虎蒙古部落是一家以展現原生態巴爾虎民族、民風、民俗為特點的民族風情旅遊景點。這裡在夏、秋兩季,綠草如茵,牛羊肥壯。遊客如果住在這裡的蒙古包可以感受到原汁原味的蒙古族牧民的生活,穿上蒙古袍、騎上蒙古馬,奔馳在草原上。夜晚,可以在篝火中欣賞蒙古民族歌舞,還可以體驗草原寂靜的夜晚。乜咁似我們在黑山頭住蒙古包的情景咁嘅?
一於周圍參觀一下先!!
最想八卦嘅一定係巴爾虎蒙古部落蒙古包嘅內佈置,因為想同黑山頭古鎮王爺包比較一下,睇吓邊一間豪華啲先!!
參觀完一圈之後搵個蒙古特色亭坐低休息一下 ~~
時間過得真係好快,已經在返回海拉爾的路上了,預備明天飛回北京轉機返香港~~
回程的路上風景一樣係一幅又一幅的內蒙草原美景、牛馬成群 ~~
下午4點半終於返到去海拉爾市了。這是今晚入住的酒店「嘉世豪酒店」~~
房間同樣的豪華,呢個內蒙團絕對係一個超值的豪華團,全程都食好住好 ~~
我們於酒店稍為休息一會就出動去食晚餐。由於我們的內蒙包車行程去到海拉爾已經結束,所以3位師傅唔再需要車我們去吃飯,而我們再三邀請三位師傅與我們一起吃飯但都被拒………
今次晚餐的地方「藍莓小鎮」係喱姐上網搵的,我們一起步行去呢間餐廳,餐廳與酒店的距離只係步行約十分鐘左右就到 ~~
這間餐廳每碟餸的份量十足,但價錢又唔貴,可是我們的肚皮唔爭氣,真係投降食唔落了 ~~
今餐發哥將他早幾天買的冰酒與我們一齊分享,發哥就係咁好人咁豪爽,每次旅行都會送些小禮物或請食野。在此代各團友再次多謝發哥支冰酒及多謝喱姐無私的付出,於整個旅程的貼心照顧,令旅程如此順利!!
Day 10 (1Jul2016) —
今早嘉世豪酒店自助早餐的選擇都唔少,但今早食早餐的時間比較匆忙,用15分鐘的時間食個早餐就要撇喇…..我們今早要趕住去海拉爾機場飛返北京轉機返香港 ~~
第一程飛機我們乘搭中國國航的CA1126號班機由海拉爾飛往北京,然後在北京轉乘CA115號班機飛返香港 ~~
喱姐今次內蒙帶返香港最大嘅手信莫過於留喺佢手上的傷疤,這是之前被可惡的馬蠅咬到後的傷口,可惡的馬蠅搞到喱姐隻手花晒 !!
內蒙團費用(每人):
包車費¥2000 + 住宿¥2400 + 阿公費用¥2087 = ¥6487
(大約HK$7575)
總數 = HK$11025
(HK$7575 + 來回4程機票$3450)
內蒙阿公費用 (人民幣¥)
Day 1:
– 金帳汗門票¥240(每人¥20)
– 午餐 ¥564 (每人¥47)
– 晚餐羊排 ¥1131(每人¥95)
– 4箱水 ¥72 (每人¥6)
– 額爾古納濕地門票¥780 (每人¥65)
– 電瓶車票¥180(每人¥15)
Day 2:
– 恩和小村午餐 ¥616(每人¥52)
– 哈烏爾河門票¥600(每人¥50)
– 室韋串燒晚飯¥1470(每人¥123)
Day 3:
– 莫爾道嘎國家森林公園¥1200(每人¥100)
– 小火車野生藍莓汁¥120(每人一支¥10)
– 鐵鍋炖 ¥1218(每人¥102)
– 48支水¥40(每人¥3)
– 白鹿島晚飯¥640(每人¥53)
Day 4:
– 奇乾村午飯¥720(每人¥60)
– 臨江伏爾加莊園晚餐¥1110(每人¥93)
– 馬奶酒¥80 (每人¥7)
– 租民族服裝3件¥60(每人¥5)
Day 5:
– 六卡飯店午飯¥670(每人¥56)
– 黑山頭蒙古包晚飯¥966(每人¥81)
Day 6:
山上採黃花菜¥200(每人¥17)
河邊串燒午餐¥1130(每人¥94)
牛奶雪條¥75(每人¥6)
烤全羊¥2955(每人¥246)
篝火晚會¥240(每人¥20)
(是日消費共¥4600)
Day 7:
彩帶河門票¥360(毎人¥30)
火鍋午餐¥1520(每人¥127)
俄羅斯餐¥2617(每人¥218)
Day 8:
呼倫湖門票 ¥480(每人¥40)
餃子手擀面¥490(每人¥41)
藍莓小鎮晚飯¥990(每人¥83)
3部車師傅小費¥1500(每人¥125)