穿越無際草原【內蒙呼倫貝爾】 – PART 2

這篇內蒙遊記是分別由我們其中四位團友合力去負責完成的,以下不同的文字顏色是方便大家去區分那一段是由那一位團友寫的 ~~

黑色 – Part 1主要是由搞手Carine負責寫的

綠色 – Part 2 的Day 4是由細孖負責寫的

藍色 – Part 2 的Day 5 & Day 6,以及Part 3的Day 8 & Day 9都是由Winnie負責寫的

橙色 – Part 3 的Day 7是由牛哥負責寫的

Day 4 (26Jun2016) —

現在夜已深,街上盡是漆黑和死寂,想起妳……星星妹妹,我們匆匆拿起拍攝「架生」,直往街角的暗處走~~

月明星稀,原來影星星唔可以有月光,今晚萬里無雲,偏偏遇上圓月,怎麼辦 ?  Eric師傅的答案是等,等月落西山~ 六月的東北草原,日間陽光明媚,風和草暖,入夜後竟然會翻風,氣溫還隨著時間不斷下降。 我哋穿上外套,在Eric引領下,搵到銀河位置,馬上set好腳架,配上快門線,加埋電筒打燈,一張張「銀河戰士」照片,成功出場 ~~

onion-head105

零晨一點幾,月亮落山,我哋鏡頭轉向北方,搵啱前景,準備拍個半鐘的星軌相!咁靜嘅,Winnie呢? 怕凍嘅佢已經雙手插袋,曲腿彎腰,把聲變得温柔甜美,哦……係時候加羽絨啦!於是四人兵分二路,輪流返酒店加衫同抖下。估唔到回氣後傾下笑下,不經不覺已到三點,睇睇相機,大功告成,收隊,懷著滿足和幸福的心,瞓咗半個好覺!

onion-head100

在大草原奔馳了兩天,看盡了「碧雲天,黄花地」的草原風光,魚翅燕窩食得多都會滯,係時候轉一轉台,看看截然不同嘅北國風光。今日我哋將會穿越森林,穿越全國最大嘅森林公園,穿越剛剛開發嘅莫爾道嘎(音加)國家森林公園! 莫爾道嘎國家森林公園佔地57.8萬平方公頃,有幾大?維園19公頃(三萬個維園),佢嘅面積足足比五個香港還要大!全公園93%係森林,絕大部份尚未開發。公園北面連接俄羅斯,南面是呼倫貝爾草原,是中國極北之地,再往北走,就係漠河………一個中國唯一可見到極光的地方!

莫爾道嘎是蒙古語,個名好難讀,聽講係由成吉思汗改嘅。當年成吉思汗遠征歐洲,在此地大喊:「莫爾道嘎」,意思係上馬出征,成吉思汗大獲全勝後,就叫呢度做「莫爾道嘎」 ~~

廢話講得多就會悶,悶親大家就會敗壞喱姐名聲,咁我以後都唔使係度自吹。講返遊記,經過昨晚「追星」,搞到兩,三點先收工,雖然心靈滿足,但肉體實在太攰,我同發哥覺得飽食不如飽睡,决定當喱姐「7:30am食早餐」嘅安排冇到,瞓到最後一刻先拿拿聲執嘢!「餐廳環境就好似酒店咁靚,D早餐就十足監倉嘢咁差!」喱姐邊行邊怨,一路向我哋間房走過嚟,「嗱,醒兩隻可以入口嘅烚蛋俾你哋!」好感動啊!多謝喱姐。

因為淡季,加上景點太新,沿路人少車少,馬路兩傍盡是翠綠小樹林,為咗更親近大自然,我哋開晒D車窗,猛力地吸取這在城市難得一索嘅新鮮空氣。

行唔到半粒鐘,三位師傅齊齊把車泊係路邊,是小休還是小便時間呢?都錯!vano以為是小休時間,來一個金雞獨立伸展筋骨;發哥以為是小便時間,瞬間在叢林中消失,三位師傅卻直往松林中尋寶!

「送您一支玫瑰花,不求結果,只求手中餘香四散!」喱姐手中嗰支唔係玫瑰花,卻勁似玫瑰花。師傅尋的係松果,好靚嘅松果,沒有花香,卻有淡淡松樹嘅幽香!

馬路把森林區劃成劃成兩半,極目遠看,上只有蔚藍的天,下只有翠綠的地,雖不是絕色奇景,卻另有一種純樸自然的美!

還有47公里,傳說中嘅莫爾道嘎,我哋嚟啦!

2014年,森林小火車正式開通,由南至北,單綫行車,全長9.83公里,途經五個車站,把莫爾道嘎森林公園最精彩嘅景點,輕鬆帶到我哋眼前 ~~

五個車站,五個景點,八十分鐘車程,一百大元收費,商業設施為乘客帶來舒適,豪華嘅旅遊體驗,卻破壞了大自然,「既來之,則安之」,先享受這一刻豪華,然後再講環保吧!

車站同廣場都好考究,承辦商確實落咗唔少心思!

車票上詳細列明五個車站:

  1. 莫爾道嘎森林公園站
  2. 樟子松林站
  3. 花園臨海站
  4. 林溪水畔站
  5. 森林牧場站

五個車站其實都係景點,火車停站後,讓遊客觀光,原車接回乘客繼續前行,安排可算體貼週到!

小火車外型美觀,好有歐陸feel,它本身已是一個很值得留念嘅景點!

木結構為主的車廂,溶入大自然。普通卡坐40人,豪華卡坐20人。

遊客不多,各谷友大可盡情擺post ,盡情拍照!

Tina、Eric,兩位大師,請放低相機,依家我先係攝影師呀 !

白色衣服的小姑娘不是團友,是車廂服務員,正為我哋介紹沿途風光,甜美的笑容配合著清跪的聲音,雖然唔多聽得明,但又唔覺吵耳,又唔覺悶喎!

開車啦,12嘩鬼獨佔了一號車廂!奇怪,12 嘩鬼分頭而坐,竟然是如斯寧靜!12人包厢,緊係坐得舒服啦,不過旺季嚟就未必咁爽啦!

車上有飲品發售,有嘢賣,發哥點會唔請客呢,一人一支,多謝發哥!

窗外古松來不斷,輕車已過萬重山 ~~

第二站 – 樟子松林

木棧道入口

沿著木棧道上山,太陽雖然猛,天氣雖然熱,又唔多覺辛苦~~

香港也有松樹,但總覺得這裡的松樹,特別整齊,特別多,特別香 ~~

沒圍欄嘅火車軌,可以自由進出嘅火車軌,給我重拾童年時嘅回憶!

第四站 – 林溪水畔以溪流為賣點,入口設計自然以魚為主題 ~~

連接到溪邊的小橋 ~~

這裡沒有幼滑的沙灘,沒有宏偉的建築物,小小一條清溪,在白雲綠樹襯托下,仍散發著它的魅力,仍使人著迷!

來一張到此一遊照,有美相伴的緣人和Eric固然笑得甜蜜,獨行的我和CatcCat一樣笑得消灑開懷 ~~

最後一站 – 森林牧場

又是一道架空的木棧道 ~~

在這裡,蒙古人世代以打獵牧鹿為生,景區嘗試重索昔日居民的生活情況,可惜效果生硬造作,沒有真實生活的人家,感覺跟深圳的民族村沒兩樣!

牧人的家?

好可愛的年青小姑娘,從老遠的南方來這裡打工。我都想同妳拍一張合照,但會唔會食檸檬呢?都係算罷啦!onion-head5

來一張大合照,好不容易一齊旅遊,要好好珍惜 ~~

懷著不捨的心情,告别小火車,再影多張!

火車是單向行走的,三位師傅在尾站接咗我哋,馬上駛去附近的市鎮醫肚 ~~

今日嘅午餐食農家菜,叫「柴火鐵鍋炖」 ~~

餐廳雖說是農家菜,但亦雅緻,客人圍往爐邊排排坐,兩個爐一組,12人一齊食都唔算迫 ~~

腳下越食越熱,若是冬天應是一種享受,六月天就認真麻麻!

我哋叫咗一鍋羊肉,一鍋牛肉,加埋大量蔬菜,薯仔。肉類新鮮味美,蔬菜索咗肉汁,香甜可口,最正係啲薯仔,吸收曬啲精華,簡直係食到唔停得口。這一餐口感遠勝視感,相片表達唔到,文字亦難以描述,只有我哋12條脷先知箇中滋味!

再嚟飯後果?食唔食得落呀,留番消夜吧!

午飯後,三部越野車在大地上朝北面飛馳,這一百多公里的路程,舒適寫意,轉眼就到咗白鹿島的範圍 ~~

登高遠望,眼前一嶺接一嶺,難道是著名景點一目九嶺?應該唔係啦,但景色確實宏偉,就當係一目八嶺吧!

Tina、Eric又點會放過啲咁靚嘅景呢,快門咔嗒聲,此起彼落,影個不亦樂乎!

又是一條看不到盡頭的小河,「黄河之水天上來」,我終於明白,終於看到天上來的河水了!

看見蒼狼白鹿這地標,白鹿島到啦 ~~

這張12嘩鬼騎白鹿,不錯吧!onion-head29

Vano 咁唔小心,孖寶落入猿人手中,重邊有好結果!onion-head2

繼續開車前往白鹿島 ~~

白鹿島係管制區,要落車檢查後,先可以進入 ~~

經過平垣的地面,河流會改道,形成各種有趣的地形。眼前所見,原本與大地相連的河岸,今天化為小島,成為白鹿島地標 ~~

「欲窮千里目,更上一層樓」,何止一層,這座電塔,足足有十二層,為咗影全景,只好爬上塔頂,搖下搖下嘅感覺,都咪話唔驚 ~~ onion-head6

呢張高抄相,要搵命博返黎㗎,係未好靚呢?onion-head23

呢座小樓係餐廳兼辦公室 ~~

沿著河流,可以玩激流,有幾激?睇落平平靜靜,一啲都唔激,加上天氣寒寒地,咪搞 !! yxh49

漂流設施麻麻地,睇人玩好過自己玩 ~~

今晚瞓木屋仔 ~~

我地雙床房,有獨立廁所,仲有電視,不過睇唔到,而且水唔夠熱,唯有趁中午熱,早啲沖涼。有團友話,夜晚聽到凄厲的叫聲,懷疑係牛哥寒夜沖涼時發出嘅聲音 ~~ onion-head108

馬路對面另有兩間小屋,都是大床房,紅色那間係喱姐同緣人住 ~~

紫色那一間那係Tina同Eric住,十足童話世界嘅屋仔,窗外還有河景,祝佢地有一個浪漫同愉快嘅夜晚!

沿著小徑往森林深處走,發哥發現咗幾間超級豪華別墅,成幾千呎,裡面裝修更令人嘩然,深山中竟有如此豪宅,發哥話係高官渡假村,普通人免問。 做高官多好!onion-head26

沿小路兩旁,盡是松木,雖然清幽,但有馬蠅咬人,往來餐廳,幾分鐘路程,邊行邊拍,好不古怪熱鬧 ~~

好大一張餐枱,15人齊座,仍綽綽有餘!

晚餐食物簡約得嚟好味,大家在熱鬧又帶點溫馨的氣氛中吃得飽飽,懷著滿足的心,為今日嘅行程畫上句號!onion-head29

 

Day 5 (27Jun2016) —

呢啲就係我們今天的早餐,點解早餐饅頭會有腐乳送嘅? 好在出發之前已經有心理準備,預先帶了泰國的即食粥,就算無嘢啱胃口都可以食少少即食粥加2隻蛋頂住先,反正下午又會有其它內蒙風味小菜食~~

食過早餐後我們準時9點向「奇乾」出發 ~~ yxh11

「奇乾」其實是軍事管制區,外來的人不能進入,只係被當地村民邀請的外來客才有機會進入這個神秘的小村,不過小張師傅已事先為我們安排好進入奇乾村遊覽及探訪村民的家。 約一小時的車程就抵達奇乾了,沿路上有兩個邊防的軍事檢查站 ~~

奇乾村地處額爾古納河畔,跨過相隔10米的額爾古納河就是俄羅斯。這裡是蒙古族先祖躲避戰亂,休養生息的地方。村裡現在只有八戶人家,旁邊是一個駐軍的軍營,守護著國土的邊境 ~~

時間尚早,我們抵達奇乾後先到界河分支「奇乾河」欣賞當地的風光 ~~

有幾位團友已經打扮到好似ISIS 恐怖份子咁?玩服裝派對?錯呀!之前遊記PART 1 的Day 2已經提及過內蒙夏天會有恐佈的馬蠅出沒……而我們不僅面對著馬蠅的襲擊,仲有成千上萬的蠓不斷圍繞住我們,我整件衫都怖滿著黑色一點點的蠓,真係好得人驚!

onion-head1

馬蠅恐怖但蠓的攻擊能力都唔弱,啲蠓係會亂咁飛,無孔不入。 由於以寡敵眾蠓,有團友不幸被蠓飛入了眼,亦有團友被蠓飛入了鼻內,這時我才明白鼻內的黏液真係有咁大的防護作用,如果唔係啲蠓可以直接飛入我的胃內了。 有見及此都係以ISIS 的打扮就最為安全,記住係要全身包到實連對眼都要包埋先係最安全呀 !!

咦….點解呢幾個團友唔怕馬蠅及蠓嘅?點解呢? 牛哥形容馬蠅係專咬「老臘肉」㗎喎 …..咁呢班團友咁後生又點會被馬蠅襲擊呢?  但係數之不盡的蠓,佢地係會亂咁飛,唔通又係會揀人嚟咬?onion-head48

只係短短的時間,呢幾位大細路已經脫了鞋衝咗落河去玩水了。 你潑下我、我又潑返你,幾咁開心 !!

互潑好似有點悶,當然要朝著企喺佢地對面的團友潑水啦,目的只係希望大家都跟佢哋一齊脫鞋到河中一齊玩水。不過大家都懶得脫鞋,只好望著他們玩,而我們就負責影相捕捉著佢哋最美、快樂的一刻 ~~

我們只係逗留了一會兒拍拍照,玩完水之後就速 “撇” !!!  我們要極速逃離這裏,停多一陣生命都受到威脅!其實馬蠅及蠓先至係恐怖分子,睇相都可以知道我地係急速撤退到一個安全的地方避一避 ~~

我們話咁快就逃跑到額爾古納河的右岸去了 ~~

額爾古納河是俄羅斯與中國的界河,額爾古納河的對面就是俄羅斯的邊境,這裏掛起了一個好大的横額「越界要負法律責任」,好危險咁喎!!

小心啲…..千祈唔好踩過界呀!! yxh00

奇乾隨處會見到這些被木珊欄圍著的小木屋,走進了奇乾恍如走進了一個童話世界,這個地方給人一種與世無爭及悠閒的感覺 ~~

我們步行回招待我們的村民家中時,經過見到有一大群牛正在放養,好多不同顏色的牛牛,這個美麗的畫面吸引我們走進牛群中,當我們走近牛牛,牛牛又走遠一點,你追我走……

中間個位(下圖)就係邀請我們入村參觀的村民喇….謝謝你讓我們有機會參觀這個神秘的小村!!

呢2隻咁乖的大狼狗與小狗,係村民飼養的。愛動物的團友立即圍在一起與牠玩樂一番 ~~

這奇乾村民的家門口地下鋪曬著一種黃色的小花,不知道這些小花有何功用呢?  據聞係可以有效地醫治喉嚨痛的 ~~

當我們和狗狗拍完照後,發現大部份團友都消失了,原來佢哋一早已發現了這個避暑的好地方。這間屋好特別的,屋內並沒有冷氣機,但係入到去裡面會有無間斷的冷空氣。 我們都非常好奇於房間地毯式搜索都係找唔到有冷氣機,外邊好熱所以我們成班人坐咗喺屋內傾計及休息等開餐。 巨鵰生雀斑之迷……我之前聽過但唔多明白……但喺呢一刻透過牛哥嘅重新演譯迷底終於都解開了,哈哈…..!!

村民招呼我們來他的家中享用午膳,他給了我們一個很特別的木皮餐牌點餐,餐牌上詳列了各式的家常小菜和價錢 ~~

呢個帳篷就係我們午膳的地方,我們乖乖地入去坐定定等食 ~~

食飯前嚟個大合照先,不過相中少咗負責影相嘅喱姐 ~~

頗有農家風味的小菜,入到奇乾已經見到隨處有一隻隻肥美的走地雞,今天的餸菜又點會少得走地雞呢個主菜呢!! 不過新鮮的活雞是即宰殺即煮的,所以製作需時,等到頸都長終於都可以開飯了 ~~

食飽飯,牛哥要做下運動燒燒脂,做咩運動??  大家記得之前提過的恐佈馬蠅嗎? 馬蠅對老臘肉情有獨鍾,牛哥已經數唔清比馬蠅咬咗多少次,食飯時馬蠅又不斷騷擾牛哥,牛哥食飽飯即時同馬蠅開火,把馬蠅殺到片甲不留…..牛哥一句 “去死啦!!” 同時佢就用佢頂防曬帽狠狠地向馬蠅撲打,牛哥打到啲馬蠅/牛虻落花流水、敵軍失守、屍橫遍野 !! 最後成地都係一隻隻壯烈犠牲的馬蠅

於奇乾逗留了約3小時45分鐘,食過午飯後我們於下午1時45分離開往「太平」出發。由奇乾往太平的車程約2小時,我們又可以於車上眠一眠先 ~~

去到太平村我們先下車到非物資文化遺產博物館附近走走,太平村很寧靜,沒有太多的車或者遊人 ~~

小張師傅停車的地點就在太平的釣魚島傍邊,對面有一條長長的樓梯,見到樓梯大家都好猶豫,上唔上去好呢? onion-head33

上到去又唔知有無甚麼靚景,但唔上去望一望又怕錯過咗靚景會蝕底,人就係矛盾,最後我們都克服了我們的心理關口,上了這長長的梯級。 要拍到靚景當然係要站高一點,我們無懼梯級往上走到去這個亭休息一會先,之後再搵個拍照靚位影相 ~~

站在太平村最高處確實能看到更壯觀的景色 ~~

草原上仲開了好多好靚嘅野花 ~~

之後再多約一小時的車程,我們來到「老鷹嘴」呢個景點 ~~

「老鷹嘴」是因為岩石的外形某個角度酷似老鷹的嘴而得名,當然欣賞時要加少少想像力先可以睇得到啦 ~~ onion-head2

老膺嘴石位於一個好陡峭的山坡下,下邊就是懸崖。小張師傅身手敏捷,好輕易已經落到去老鷹嘴石,他每走一步都叫我們驚心動魄,太危險了!!  可能小張之前是軍人,所以訓練有素,這個小小的山坡對佢來講輕而易舉、一啲難度都無。 我們成團人都沒有人有這麼大的膽量走落去老鷹嘴石,既然小張都企咗老鷹嘴石,咁就一於做我們的model啦,嘻嘻!!

然後再繼續今日嘅行程,沿途草原美景 ~~

最後於傍晚6時我們終於嚟到我們今晚入住的旅店「伏爾加莊園」。 全個內蒙行程最爆笑、最開心的環節就喺呢個地方發生嘅,至於係乜嘢咁爆笑就先賣個關子,遊記好快寫到今晚就會揭曉啦 !! yxh55

伏爾加莊園的房間係由一條條的原木搭建,房內只有簡單的設備,但勝在乾淨企理 ~~

話咁快又到晚飯時間了 ~~

出發之前已經聽聞來到內蒙一定要試吓飲馬奶酒,嚟咗內蒙咁多日都見唔到這款酒,難得今日間餐廳有這款酒賣,發哥第一時間買了一支請大家品嚐,多謝發哥 !! onion-head110

原來馬奶酒係烈酒嚟㗎,枱面上有咁多隻杯,大家都有點擔心…..大家目不轉睛睇住啲酒杯,烈酒嚟㗎咪講笑,唔識飲嘅團友一定係想拎杯最少嘅。 最飲得的原來是小張師傅,因為平日小張要駕車,所以平日是滴酒不沾,但今天晚上大家晚飯後都回酒店休息,今晚小張暢飲了幾杯酒,飲了一杯已經見到小張的臉變紅了,可想而知這瓶酒的酒精成份有幾高呢!

今晚的晚餐真係超級豐富,餸菜又特別,真係飽到呢….肚皮差啲爆開呀!! onion-head74

食飽飽就到今晚嘅餘興節目喇…!!! 出發前細孖答應咗嚟到內蒙會穿民族服拍照,仲要係反串穿蒙古妃子的服飾,估唔到細孖真係講得出做得到。 適逢今晚入住的旅館又有得租借民族服裝,食完晚飯細孖真係找數喎!!  發哥咁貪玩,一早已經自己換好晒衫,等住迎娶蒙古妃子;而細孖對於著女裝有點笨手笨腳,要牛嫂和CatCat幫手穿衣,無法啦,一講到玩大家就好似上咗電咁有無限精力,呵呵!! yxh50

蒙古大汗及妃子換好衫先嚟個合照,睇相都知道當晚係有幾搞笑同有幾開心啦!! onion-head47

細孖雖然找數但係佢又不甘只係得佢同發哥2個參與,佢話佢需要一個陪嫁妹仔,但又無人肯陪細孖玩,得Winnie一個唔介意扮陪嫁妹仔一齊玩,雖然無人肯著民族服裝一齊癲,但各位團友都好合作又落力為Winnie挑選了另一套民族服裝 ~~

睇見蒙古大汗”發哥”及蒙古妃子”細孖”換好蒙古服之後大家有幾咁開心吖,當時嘅搞笑場面大家笑到肚痛,一路笑一路不忘舉起相機紀錄呢一刻咁爆笑嘅畫面~~

(以下幾個短片中有更傳神的分享)

蒙古大汗、蒙古妃子以及陪嫁妹仔出場喇 !! 先嚟個出嫁儀式先,乜原來蒙古人出嫁時是這麼有氣勢㗎?? 左一步、右一步,話咁快大汗疊細汗已經去到台中間同咁多位子民見面喇……呢個時候個結婚大典仲未完成㗎,最爆笑的畫面好快就會出現…..大家千祈唔好行開。 先向各子民打個招呼先,搞乜呀細汗?? 係咪接受唔到自己即將成為蒙古妃子所以無眼睇呀?? 連頂后冠都跌咗落嚟遮住對眼,真係名副其實的無眼睇 ~~

onion-head47

 

儀式完成後並唔係好似我哋現代人咁嘴嘴錫錫,而係…..細汗小鳥依人般依靠著大汗的肩膀上。大汗笑逐顏開……嘩哈哈哈!

然後由大汗抱起新婚妃子…….好溫馨喲 !!

一定係建碩的細汗太重磅,所以大汗未成功抱到細汗入閨房已經碌咗落地,陰公豬咯!! 玩到碌晒喺地下都一樣咁開心,細汗跌到雙腳朝天 !!  onion-head47

大汗見陪嫁妹仔瘦瘦地又奀支支咁,唸住佢會好輕,原來係騙局一場,一抱陪嫁妹仔上手,睇下大汗的眼神幾咁驚訝 ~~

咁點算好呢?? 連妃子都無好好照顧好,真係無鬼用,閨門都未入就碌咗落地下,細汗又咁重、奀支支的陪嫁妹仔又係咁重,咁點搞好呢? 算把啦…….投降啦!! 大汗就唯有唔理三七廿一,自己興奮到玩吓射滑梯開心一下先!!

 

等大家睇清楚大家個樣及所穿的服飾,由於細汗無眼睇的關係,需要Cat Cat 幫手將后冠戴返好先!

好喇……現在蒙古婚嫁儀式就正式開始喇,先來個手牽手轉轉圈~~

既然係玩,咁就玩盡啲啦,務求令到大家都能捧腹大笑,無理由只係得大汗、細汗及陪嫁妹仔佢哋3個自己開心㗎 ! ! 原本大家都好抗拒穿蒙古服到最後係點呢…..大家睇相都知我地租嗰幾套衫大家都輪流咁穿嚟影相囉 !! 一定係大家都見到大汗及細汗加上陪嫁妹仔玩得咁盡興,大都都唔想蝕底,個個都要客串一下扮演一下大汗、妃子及陪嫁妹仔拍個照留念,邊個最入型入格? 那個組合最嬌俏? 無論是那一個組合都係一樣玩得咁投入,無論是演大汗、演妃子或妹仔,大家都豁出去咁先至玩得開心㗎嘛 ~~ 

我們於旅館外由天光玩到天黑,喧鬧了一整個晚上,多得大汗叠細汗豁出去,帶領住我地呢班本來打算襯熱鬧,笑吓男扮妃子的細孖,到最後大家都樂在其中。用60蚊人仔租來的這幾套服飾給我們留下了一個好難忘的快樂印記,簡直超值!!!

onion-head68 

今晚大家都帶住好開心的心情入睡,晚安!!!  onion-head26 onion-head24

 

Day 6 (28Jun2016) —

話咁快又天光了,又要收搭好心情準備繼續今天的行程。 這是今天旅館為我們預備的自助早餐,雖然簡單了一點,但對比起昨天的早餐已經好滿足了 ~~

早餐後喺退房離開之前到伏爾加莊園外拍拍照,見到斜坡上有一堆馬在吃草,加上藍天即構成一幅美麗的風景畫~~

食完早餐休息了一會我們於早上九時啟程往下一個景點「臨江」~~

世界這麼大,但站於中俄邊界距離只是這麼短,只是一河之隔,但係文化差異卻很大~~

位於中俄邊境線的臨江觀景台,隨處都可以見到警告橫額「越界要負法律責任」的字句 ~~

臨江觀景台最美的打咭位就是這間破屋,我們各人都輪流於這個打咭位拍下了很誘人的照片~~

喱姐搞咩呢? 做乜趴咗喺草地上㗎呢? 跌親? 又唔似喎,拎住部相機似係影緊相喎…… 吓!! 影相影到要趴喺度影㗎咩?? 無錯,喱姐就係咁認真,為了要於遊記留下最美好的回憶,辛苦少少喱姐都唔會在乎,因為今次錯過了,要再等下一次都唔知要等多久,可能永遠都唔會再有下一次。所以每個旅程我們應好好珍惜身邊的人和事 ~~

咁辛苦,終於都影到這朵美麗的小黃花~~

影完花花我們當然唔放過花花旁邊的銅馬啦!! 這裏有幾個銅馬,但佢主要的作用係供人觀賞,而我地呢班百厭星,要玩就緊係要玩盡啲,佢地又真係唔識死,呢幾個銅馬本身好跣,又無扶手,佢地成班人竟然可以爬到上去隻銅馬上面,仲要坐到咁樣,好犀利喎!!

影完團體照,大家又各自又再騎上了這幾隻銅馬再繼續影相 ~~

我們要繼續我們的旅程,藍藍的天氣映襯著一條一望無際的高速公路....美!!

這是我們的車隊,二號及三號車跟在我們的後邊 ~~

包車的好處就係我們車經過某些我們覺得靚的地方,我們可以要求停車拍照,今次比較特別,因為一號車見到呢個地方好靚,我們想停下來拍拍照,而二號及三號車跟車有點貼,小張師傅為咗讓我們能安坐車上可以拍照,於是叫二號及三號車一起倒車,於是一、二、三號車好有節奏地一起倒車去到一個我們想拍照的最佳角度才停車讓大家拍照,咁貼心的服務,真係好難得!

一望無際的大草原,因為地型唔同所以出現了多層次的綠色,好靚!! yxh06

繼續係一段又一段嘅山路 ~~

下午一點我們來到烏蘭山,我們於山腳下拍拍照,而愛冒險的小張師傅自己駕車衝上山頂去,小張師傅只係請了一號車的喱姐一起同行,珊姐見到即刻跳上車跟上去 ~~

車好快就爬了上去山頂 ~~

要看到更美的風光要站高一點、站遠一點,於居高臨下的位置必定能看到最壯觀的風景,可惜天色欠佳,如果有藍天的話風景會更美 ~~

喱姐就係我們的代表,無上山頂的團友就睇喱姐喺山上影嘅相當係去咗山頂啦,慳水慳力,嘻嘻...!!

影完相又係時候出發了,我們行的山路其實並沒有明顯的車路,大部份時間都是靠師父的經驗及記憶帶我們住下一個目的地 ~~

而我們坐的2部私家車(2號車和3號車)馬力唔係太大,對於行這些崎嶇的山路真係有點吃力,好多時都被石頭卡住車底,好多驚險的路況,都是於這段路出現 ~~

由於原定要行的車路封了,小張師傅需要再搵過第二條山路通往下一個目的地,四驅車行山路係比私家車輕易一啲,由於二號車及三號車經常被石頭卡著而停了下來 ~~

我們全部人都下車了,目的是為車減磅,好讓師傅能把車衝上高速公路~~

三號車的師傅有點膽小所以每每都不敢往前行,好在有驚無險,最後三號車的師傅都成功把車駛到出去一條正在鋪路的高速公路上,雖然呢條高速公路是封了,但我們要越過路障,衝呀!!

好嘢!! 得咗!! 大家都好興奮,可以繼續出發去食午餐了 ~~

經過艱險的山路, 沿路都係一片又一片的荒蕪大草原,我們終於下午約一點半嚟到我們今天用膳的「六卡飯店」,飯店很簡陋,所以別對今天的午餐抱有太大的期望 ~~

飯店外的蒙古包有點殘舊,位於屋外的廁所仲係開放式、無遮無掩的。

就係下圖右下角呢個寫有”女”字的鐡皮廁所,無錯!呢個得幾條木方加幾塊鐡皮半圍著的就是女廁,在這裏唱山歌真係好驚險吓!!onion-head41

今天飯店有新鮮的魚供應,有幾新鮮? 就係老闆帶著我們到河邊,之後親自落河撒網即時捕獲鯰魚煮俾我們食 ~~

這盤魚就是剛剛老闆落河捕捉到的魚獲,小張師傅拎起呢條魚好肥美,睇見都留口水,呢條魚即將係我們今天午飯的其中一道餸菜喇!!

大家坐定定等食午餐,這間簡陋的飯店,我們點完餸菜後即時煮,雞及魚係即時宰,所以同上次喺奇乾村食午飯時一樣製作需時,我們只好吹住水等食,不過上菜真係好慢、好慢,由唔餓等到肚餓都未有得食。喱姐一早預計了今天這餐午餐的餸菜製作時間會比較長,所以今天少點了幾款菜,怕的只是為了食而延誤了餘下的行程 ~~

等呀等……有得食未呀??  等了一個多小時我們終於都可以開餐了 ~~

食過午餐後已經是下午三點半我們又係時候起程了, 因為修路需要改道所以由地膽的餐廳老闆帶路,他駕著電單車,帶著我們的車隊離開六卡地區 ~~

離開時見到路旁有幾隻騾仔與我們一起趕路 ~~

沿途仲見到草原上有隻可愛的馬BB依偎在馬媽媽的身旁 ~~

傍晚5點15分我們終於都抵達黑山頭了,呢2晚入住嘅「古鎮王爺包」,亦都係我們嚟到內蒙最期待嘅特色住宿,嚟蒙古無住過蒙古包點可以叫嚟過蒙古呢!! 

我們今次入住的蒙古包好豪華,我們一去到見有幾間蒙古包的門開了,我們唔理三七廿一,即刻衝入去參觀一下,睇混晒區內的蒙古包,相信我們今日入住的蒙古包是區內最豪華的 ~~ onion-head23

我們住的豪華蒙古包是用磚蓋造的,所以晚上唔怕會有風吹入包內。 這是蒙古包內的佈置,好寬敞又乾淨。其實現在的蒙古包已十分現代化了,有熱水沐浴、電視和Wifi,但我們入住後發現除有熱水沐浴外就乜都無,據說早兩天通訊天線遭到雷擊而失效 ~~

只係洗手間有點簡陋,而屋頂上的彩色布幕有點似馬戲團的感覺,不過都幾特別 ~~

呢個係古鎮王爺包的私人菜園。我們今晚食的菜都係來自呢個有機菜園,我們放好行李後,喱姐約我們有興趣自己親手摘菜的團友於菜園集合一起摘菜 ~~

大風吹到頭髮亂了,但無阻喱姐及牛嫂摘菜的心情,話咁快又摘夠了今天晚上要食的份量,摘好菜要同戰利品合照留念是常識吧 !!

這是黑山頭的日落,但今日天氣不是太好,看不到醉人的日落,雖然有少少失望,或許不要帶著一份期盼的心,意想不到的景象就會自自然然地出現吧!! 

餐廳內有卡拉OK,餐廳的老闆楚楚姐,她的表哥(本來是餐廳侍仔)突然又變身為歌星,為我們獻唱多首民族歌曲歡迎我們來到蒙古大草原,他的歌聲雄渾悅耳,原來他年青時是藝術學校出身,曾參與很多電視節目的演出,難怪有如此水準。之後牛哥亦不甘示弱,大展歌喉唱了一首”青藏高原” ,我們都聽出耳油 ~~

大部份的餸菜都上了,我們又係時候嚟個大合照先!!

好豐富的晚餐,今晚我們只是點一份羊肉淺嚐,草羊的肉唔”穌”,好味,大魚大肉的一餐好滿足!!onion-head57

今日車程較長所以大家都好攰了,食飽之後各自回蒙古包好好休息準備繼續迎接明天嘅黑山頭行程,晚安!!

onion-head24 onion-head24

 

穿越無際草原【內蒙呼倫貝爾】- PART 1

穿越無際草原【內蒙呼倫貝爾】 – PART 3