沙巴亞庇6天喪玩勁食自駕遊

首先介紹一下今次我地嘅10位沙巴團友先!!  由左邊數起嘅係負責駕駛12座van嘅司機Ron (緣人),搞手Carine (咖喱,下稱喱姐),負責寫今輯遊記嘅鑫鑫(Winnie),珊姐,CatCat,發哥,牛嫂(Jennifer),David,Samuel (馬生) , 咦…..!! 點解數來數去都只係得9位團友嘅?  原來仲差一位永遠都唔肯開樣而只鍾意叫人影佢背脊嘅CK,所以俾咗個朵佢叫做「 影後」囉 ~~

馬來西亞沙巴(Sabah)位於婆羅洲島北部,原名「北婆羅洲」,馬來西亞首都吉隆坡位於西馬,而沙巴在東馬。 沙巴係一個比較熱門的渡假聖地,愛陽光與海灘的人必定會嚟過呢個地方。今次能再次參加到喱姐搞的旅行團實在係我的榮幸,喱姐搞的團一向都有信心保證,食好、住好都不在話下,沿途的貼心照顧真係無以為報!我們沿途的爆笑事件薄真係要細心睇以下6日的遊記內容。 而我今次有幸被喱姐邀請我參與寫呢輯遊記,唔係一部份,而係全輯遊記交晒俾我負責寫。 平時睇就無問題,但要寫真係怕會失禮carinekok.com的讀者。 我既然有機會喺carinekok.com留低一條腳毛,我抱著遊記用嚟記錄低我地當時發生過嘅快樂情景,無論當時是開心與否都可以成為我地將來的一個記錄/ 回憶。我並無好好的文筆,希望大家見諒,有時只能做到平鋪直序,希望大家睇過我地呢輯沙巴遊記會同樣感受到我地於旅程當中的快樂啦 !!

yxh43

沙巴自由行,沙巴機票,沙巴住宿,沙巴浮潛,沙巴潛水,沙巴美人魚島,沙巴旅遊,沙巴必買,沙巴遊記,沙巴啾啾,沙巴機場,沙巴7月天氣

今次沙巴的6天行程:

Day 1 (2/3/17 星期四):

– 香港直飛亞庇(港龍航空KA61)

– Wisma Merdeka阿林檳城蝦麵

– 享受渡假酒店設施、看日落

– 華興海鮮樓

住宿 :Shangri-La Tanjung Aru Resort Hotel

Day 2 (3/3/17 星期五):

– 酒店自助早餐

– Mamutik小島浮潛半天團

– 富源地道下午茶

– Marlin Statue

– 享受渡假酒店設施、看日落

– 大茄來海鮮酒家

住宿 :Shangri-La Tanjung Aru Resort Hotel

Day 3 (4/3/17 星期六):

– 酒店自助早餐

– Tanjung Aru Railway Station體驗「北婆羅洲蒸氣火車之旅」

– Imago Shopping Mall

– 酒店免費自助晚餐

– Kama’A spa

宿 : Hotel Grandis

Day 4 (5/3/17 星期日):

– 酒店自助早餐

– Kota Kinabalu City Mosque水上清真寺

– 東星斑粉、沙嗲魚頭湯

– Gaya Street Sunday Market

– 何記(文昌) 正宗海南雞飯

– Giant Hypermart City Mall

–  Big Apple Donut嘆下午茶

– Oceanus Waterfront看日落

– Filipino Market地道市集

– Filipino Night Market BBQ海鮮

– 新記肉骨茶宵夜

宿 : Hotel Grandis

Day 5 (6/3/17 星期一):

– 酒店自助早餐

– Kiulu River Rafting激流

– Secret Recipe下午茶

– Imperial Seafood知味海鮮餐廳

– Jalan Segama榴槤街

宿:Hotel Grandis

Day 6 (7/3/17 星期二):

– 酒店自助早餐

– 豐成急凍海鮮批發店

– 亞庇飛返香港 (KA060)

 

Day 1 (2/3/17) —

我地一早6時45分喺香港機場集合,乘搭國泰港龍的KA061航班前往亞庇。班機準時於上午10時55分抵達亞庇機場 ~~

以下呢部就係我地租用的12座日產van,老老實實部車的外表睇落都唔錯,可以話係金玉其外、敗絮其中,其實就係殘車一部,車內開唔到門,要打開車的窗伸手出車外先開到門 onion-head56最嚴重係鎖唔到車門㗎,天啊 ! monkeys51  點解架車會係咁架 !  所以開車門這項辛苦工作就唯有每次都交由David負責了 ~~

呢2晚我地入住嘅渡假酒店 Shangri-La Tanjung Aru Resort Hotel ~~

酒店內的景觀,好靚、好悠閒,讓我地可以放鬆心情渡過這短短、愉快的假期 ~~

酒店大堂的裝飾富有當地的民族色彩 ~~

因為時間尚早,酒店未能俾我地取房,所以我地將所有行李寄存在酒店之後就浩浩蕩蕩咁出發去食午餐了 ~~

睇下大家幾開心,緊係啦,已經下午1點半大家都已經好肚餓,終於都可以出發去食午餐了 ~~ yxh55

我地喺Wisma Merdeka換完錢之後就去食今日嘅地道午餐 “阿林檳城蝦面” 。 我們到達餐廳之後,喱姐發現走失了一位團友……佢就係全團最曳、最百厭的緣人。 雖然緣人走失咗 ,但喱姐都不忘為我們打點了午餐先。

我地能夠抆到衫尾跟喱姐去旅行實在係太幸福了!onion-head26

喺大家專心享用緊美味蝦麵的同時,緣人仲未搵到我地,而大家都唔擔心得咁多,醫飽咗個肚先至最緊要 ~~

睇吓Samuel (下稱馬生,因馬後砲居多而得此名) 狼吞虎嚥的樣子就知碗蝦麵係幾咁好味啦 !!

yxh86

咁又唔好睇到我地咁無良心,馬生食得咁快都係為咗快啲食完落返去搵緣人,而發哥食完都有落去幫手搵緣人,最叻都係發哥,不過緣人都蠢唔晒,佢行咗個商場幾次都搵唔到間餐廳,最後佢企返喺間找換店等發哥去接佢。話時話點解緣人會走失,佢聲稱自己身上無馬幣,等大家換晒馬幣離開找換店後,佢自己話要換返少少馬幣旁身,咁佢自己去了找換店換錢,當佢換完錢我們已經行緊去餐廳,而緣人已不知所蹤。喱姐係馬拉人,身為一個馬拉姑爺竟然話要換馬幣旁身,講出嚟都無人信啦,簡直係天大嘅笑話!! 仲要係因為換錢走失咗激到喱姐彈下彈下!!

yxh18

咦 ……大家又咁開心何解呢? 原來食完蝦麵之後,呢班大食怪覺得唔夠喉,所以又要勞煩喱姐幫大家轉場再搵嘢食 ~~

之前遊記一開始都介紹過我地有一位特別嘅團友「影後」,影後非常抗拒上鏡,無法啦 …….知名人士、公眾人物去偷食喎!俾大眾知道咗仲得了咩 !!

onion-head2

喱姐好快已經搵到下場去食乜,我地成班人跳咗上車都唔駛兩分鍾又再落車準備食。 究竟係食乜呢?!原來係食咖央多士 ~~

嚟到馬來西亞唔食過咖央多士對唔住自己,不過Old Town的咖央多士味道麻麻 ~~

今日沒有特別的行程,主因係我地入住咗一間咁豪華嘅渡假酒店,咁梗係要享用一下酒店嘅設施啦 !!  鏡頭一轉我地已經返到酒店自由活動了,返到酒店第一件要做嘅事當然係取房同安頓好啲行李先啦 !!

無論雙床房或大床房都一樣咁舒適,仲有個小露台 ~~

既然有自由活動時間,我同馬生又唔想去游水,咁我地就把握時間於酒店範圍逛逛,參觀一下酒店的設施 ~~

誰不知被偷拍了浪漫的沙灘漫步照 ~~ monkeys57

食咗咁多野,識玩一定係游水啦!可以幫助燃燒脂肪嘛,咁一陣間食晚餐時感覺上無咁邪惡之餘仲可以食多啲添 !!  大家睇吓發哥在水中作樂何等的寫意 ~~ yxh75

嘩!眼前一亮 !  眼前4位美魔女,一致甜美的笑容,大家睇相都知我們玩水都開心過人啦! 無份參與嘅你地唯有睇相及餘下嘅遊記止渴吧!yxh55

玩完水之後大家都攤咗喺沙灘椅到hea吓、吹吹風、昅下靚仔及靚女 ~~

喱姐為咗同各位讀者喺遊記分享眼前嘅美景以及今次旅程的點點滴滴,所以佢拎住部相機周圍去影相做紀錄 ~~

雖然有陽光,其實此時正下著毛毛細雨,雨粉隨風打在我地的臉上,正想回室內避雨的時候;我地被一陣打鼓的聲響及一把火炬吸引了過去,好奇心驅使下我們追隨著鼓手及火炬手睇吓有咩活動先 ~~

原來係火炬手燃點起日落酒吧旁的燈壇 ~~

既然被吸引到去日落酒吧,咁我地就搵定個靚位等睇醉人的日落吧! 據聞沙巴的夕陽可是世界三大夕陽美景之一,上網睇過很多人分享的沙巴日落照片都很美,實際要親身在現場大家才會感受得到 ~~

嘩…!!  雨後的彩虹啊!當我見到這條清晰可見的彩虹,我不奇然大叫「彩虹啊!」,大家的目光立即一轉、一起欣賞晚霞映襯着的彩虹。 一些普通的天文現象都令到我地無比的開心,常存感恩的心,其實做人就係這麼簡單!

太陽徐徐的下降,我地期待嘅日落盡入眼廉。 有人會問日落每天都有,好特別? 答案係 : 好特別。  只要在不同的地方、心境都會令到睇日落有一份不一樣的喜悅!monkeys33

椰林樹影,多角度拍下日落的美感!yxh06

睇完日落之後大家一齊行返酒店,呢個時候鬼鬼馬馬的緣人又唔知講咗啲 乜嘢,令到我同牛嫂笑得幾開心 ~~

相信大家參加得喱姐團都知道一定係食好、住好,而一日食8餐亦係等閒事。 今日初到亞庇,唔好咁急進,小試牛刀看下大家的食量先。 喱姐為我地打點晚餐,我地就緊係好似大爺咁坐喺度等食啦,最離譜係食完之後我地乜都唔駛做,食完就可以走得!

今晚我地喺華興海鮮樓點嘅其中的一道菜 “燒魔鬼魚”,喱姐話嚟到馬拉無食過燒魔鬼魚係唔可以話嚟過馬拉,我地大飽口福之餘,地道的食物我們整個旅程都可以一一品嚐。

食完晒枱面上的餸菜,緣人突然彈咗一句出嚟 : “今晚食呢條魚一定唔係東星斑 “,真係R爆頭,餸菜上了枱嚐了一口發覺被搵笨都唔出聲,食到骨都無得剩先至拎出嚟講,真係俾緣人激死!yxh68

今早搭早機大家要凌晨起床一定好攰喇,食飽飽早啲返酒店休息準備明天出島去玩浮潛 ~~

onion-head24  onion-head24  onion-head24

 

Day 2 (3/3/17) —

一早起來享用一個豐富的酒店自助早餐,早餐種類很多,總有一款適合大家的口味吧 ~~

我地選擇坐於戶外享用早餐,望住一片綠油油草地、藯藍的天空、海灘、雀鳥在旁徘徊高歌,彷如置身於郊外。影後(CK)及David 呢張一個正面、一個背面V字手勢的照片好得意 ~~

今日我地係參加local tour,食過早餐後我地於酒店大堂等當地導遊Chiiko 接我地出發前往Mamutik小島,這是我沙巴之旅最期待的水上活動”浮潛”! 喱姐昨天已經為我地安排好,本來local tour 係包帶去兩個小島,但喱姐想大家玩得更hea更舒服,所以於昨天她已聯絡旅行社只需要帶我地到較多珊瑚及魚的Mamutik小島,亦因取消了到另一個島的行程,所以膳食方面未能安排到沙灘BBQ,但喱姐已盡力為我地爭取咗最好的自助午餐。喱姐就係咁勞心勞力為我地呢班只帶個驅殼出發去玩嘅團友,抵錫 !!

Chiiko(下圖照片中穿上黃色 t-shirt 的就是她)散發著陽光氣息、笑容活潑燦爛,她亦是一位愛好潛水的女孩。 或許海底有著一股令人著迷的魔力;或許海底有一份難以言喻的寧靜,所以能吸引到這麼多人到海底探秘!

yxh23

出發前先嚟個大合照! 1,2,3,4,5,6,7,8,9,10…… 咦!影後CK今早唔再做影後?大家今日有幸可以一睹影後的真面目,不過佢要戴黑超先可以出鏡囉 ~~ yxh20

咁靚嘅藍天,一定要影返幾張靚相先得喇 !! monkeys23

我們出發去浮潛前,循例係要簽一份生死狀的,大家簽好文件後就會分獲一條手帶,呢條手帶係入場券,以用作去Mamutik小島上的指定餐廳享用我們今天的午膳 ~~

睇吓緣人幾咁認真戴住條手帶,不過無用㗎!你咁鬼百厭,如果條手帶逃走了咁你去到小島捉啲魚仔食啦!哈哈哈……!!

因為我地入住 Shangri-La Tanjung Aru Resort Hotel,所以我地可以於酒店內的碼頭出發往小島,省了很多時間 ~~

上船喇 !!  出發 !!

緣人做乜咁睇唔開跳船呀??  yxh46   鬼咩 ..!!  喱姐於開船後已即時提醒大家要捉實自己戴個頂帽,如果唔係頂帽會被風吹走。 緣人咪就係唔留心聽書囉,頂帽呼一聲咁就飄咗去水面,要船家停低隻船比佢執返頂帽,你睇下緣人幾狼狽! Chiiko又幾咁擔心佢會跌落水喎~~ yxh73

幾好彩咁都俾緣人執得返頂帽喎 ~~

睇吓呢張相”影後”嘅髮型就可以想像得到船上有幾大風啦,哈哈 !! yxh67

話咁快就去到Mamutik 小島的碼頭了 ~~

島上水清沙幼,遊客並唔多,唔怪得喱姐只挑選於這個小島玩啦 ~~ yxh06

經島上另一位導遊推介下,喱姐、緣人、CK、珊姐、CatCat、David、Samuel 及鑫鑫都參加咗一個深潛體驗班(Scuba Diving Experience Course)嘅自費活動 ,而牛嫂及發哥只係想留喺Mamutik小島玩浮潛(Snorkeling),咁我地就兵分兩路各有各玩!

後來才知道原來深潛係需要坐船到另外一個沙比小島(Sapi Island),原本導遊安排我地10:30am坐船往沙比島,CK趁未出發已經一早爭取時間游到海中玩浮潛睇魚及珊瑚。誰不知突然間又話船要改早即刻出發,臨急臨忙點搵返CK上水呢?

緣人企喺沙灘望住一望無際的大海,而我地不斷咁大叫 “CK 你喺邊呀 !!”,差在未掉個西瓜落海咋,哈哈 !!  最後我地見到海面有一頂黃色的泳帽,認定佢就係CK ,於是就派最叻游水嘅David走去叫返CK 上水,笑位又出現喇…..!我地見到David (下圖中無上裝的背影),只係一步一步咁行過去CK的方向,點呀?又話識游水,咁急的情況下乜唔係游過去咩?水中漫步?咁幾時先可以叫到CK上水呀?呢班團友個個都幾特別 ~~

onion-head48

人齊了,我地就一齊乘快艇往沙比小島玩深潛去~~

馬生為何含蓄地望著救生衣苦笑呢?  馬生喃喃自語 : “只剩下M碼點穿得落呀,我唔識游水㗎 !!”

藍天白雲,天氣太好喇 !! yxh54

話咁快我地嚟到玩深潛的沙比小島了 ~~

深潛呢個活動每位團費係RM280,我地可以潛到約15米水深的水底去睇珊瑚,潛水時間約為45分鐘。 我地呢班燶丁仙都唔仙吓就學人去潛水,好在Chiiko同當地深潛團長有交情,所以肯俾我地玩完之後返酒店先俾錢,安排實在係太好了 ~~

monkeys19

我地跟著教練去到一個換潛水衣的地方,教練先為我地各挑選一件合適的潛水衣 ~~

緣人成日都蝦我,趁有機會要扑暈佢先 ~~

好不容易終於都將件潛水衣穿上,之後又要挑選一對合適的蛙鞋 ~~

潛水衣及氧氣樽都背上之後,我們即將要往海中出發去!

潛水衣及氧氣樽都係超級重,背上了之後連行路的力都無 ~~

對蛙鞋要去到海中先可以穿上,因為海中有浮力又有浪,要穿好一對蛙鞋並不是一件易事 ~~

yxh23 首先我地需要練習三組動作,包括 :

(1) 如何於水中呼吸  (2) 呼吸的喉管如果於海底中甩咗出來應該如何於海底放回口中  (3) 於海底如耳朵因壓力而感疼痛如何為耳朵減壓

又細膽又貪玩的鑫鑫,落到水開始慌,佢學咗好耐都掌握唔到個呼吸技巧,Chiiko主動幫手教埋鑫鑫一份,最後鑫鑫都掌握到,於水底無法用口去表達自己的感受,萬一有事只可以用手勢示意,懂了重要的技巧咁我地就往海底出發!

常言道欺山莫欺水,儘管學懂了潛水的技巧,但真係要潛入水底嗰時並唔係每個團友都有勇氣,而我們當中有人早已放棄。 而鑫鑫因為開始潛時太恐慌令到我個人未能向下沉,我不斷咁浮返上水面,我好記得個教練不斷地拉返我落去水底好多次之餘,仲間中會把我往下推,好似必定要我完成這個潛水的活動咁囉 ~~

onion-head87

教練一定係怕緣人水中PK所以拉實佢,定係當佢係馬騮怕佢被海水沖走呢?

水底的照片係教練負責拍同提供的,到了水底已看不清每個團友的模樣,猜猜他們是誰吧!monkeys57

嘩!珊瑚呀!雖然唔算得上係好靚的珊瑚,但見到及觸得到都好開心 ~~

這就是寧靜的海底世界,好多色彩斑爛的魚仔在我們身邊徘徊喲 ~~ yxh06

好不容易,終於都完成了整個活動,上水後是何等的興奮、快樂已經掛在我們的臉上了…………掂!onion-head29

潛完水我地就乘快艇返去Mamutik小島同發哥和Jennifer會合 ~~

繼影後之後,突然又多了一位CD蒙面團友, 點呀! 點解我地啲團友咁特別㗎? onion-head54

然後一齊食自助午餐 。 發哥及Jennifer只玩浮潛,所以佢地已一早換好衫在餐廳等我地返來 ~~

島上的午餐都唔算太差,沒多大的要求就沒太多的失望 ~~

發哥等我地食完飯之後買了雪條請我地食呀!發哥就係咁好人,經常都請我地食野,在此再一次多謝發哥!yxh27

食完午餐,我地就一於玩返今朝早我地未玩的浮潛活動,而發哥因為玩了一朝早,可能佢太攰,所以佢唔肯同我地再落水一齊玩,佢寧願喺餐廳坐吓hea吓 ~~

不過發哥唔參加下午的浮潛原來係正確的決定,因為下午實在太大浪,啲浪沖到啲海水好混濁,根本上浮潛乜都睇唔到。monkeys40  不過為咗體驗同享受一下浮潛的樂趣,我地都玩咗好耐,仲不斷往水底望,我地奢盼能睇到蘇眉,點解只係想睇蘇眉??  因為發哥話今朝早見到好多條蘇眉,咁我地就先入為主以為水底只有蘇眉囉!

緣人同喱姐浮浮下咁,幾咁享受!!  而我就喺佢地嘅不遠處,馬生見到我當時轉下轉下咁以為我玩得好開心,實情係當時因為太大浪,啲浪不斷左左右右咁沖埋嚟,我就不停咁360度反轉再反轉,轉到我頭暈 ~~

onion-head41

既然浮潛食白果,咁不如早啲換衫然後搭船返去亞庇市食下午茶好過啦 !!

今日嘅下午茶時間鐵定為下午4點,經過Asia City商場時見到有一間生果店有榴槤賣,有啲團友已經忍唔住想即刻去食返件榴槤刺身。不過都要先去”富源”食返件咖央多士先,初初大家都只係話食一件咖央多士,留肚去食榴槤,但呢件咖央多士真係好好味,有團友覺得食一件唔夠,要再encore !!

綠色個件係斑蘭蛋糕,好軟綿綿,入口好似食咗一陣風咁 ~~

相信愛食榴槤嘅團友個心一早飛咗去生果檔了,喱姐挑選了一款D24榴槤俾我地試,榴槤入口嗰吓係軟軟綿綿的,而且帶有回甘味,馬拉榴槤的美味就係在於回甘的口味,正呀!! onion-head68

愛食榴槤嘅人,百吃不厭,但不愛食榴槤嘅珊姐、David及緣人已經走到遠處等我地了 ~~

Marlin Statue 是亞庇的打咭地點,亦只係一個拍照嘅地標而已。夕陽映襯下的魚雕像及I love KK顯得份外的迷人 ~~

我們只逗留了約10分鐘左右便返回酒店稍作休息。咁返到酒店做乜好 ? 仲駛問緊係去睇日落啦!有些團友太攰所以選擇返房休息,有些就覺得昨日睇咗日落今日又睇? 正如我先前所講雖然每天都有日落,但不同的時間、心態看到嘅景色都係唔一樣㗎 ~~

一起睇日落只有喱姐、Samuel 以及鑫鑫三人。 我們的選擇是正確的!因為今天的日落比起昨天還要美,看到日落的同時亦看到月亮高高掛,好滿足 !! monkeys33

很美很美的紅霞 !! yxh06

日落之後當然又到晚飯時間啦 !!  今晚試下當地人和遊客都推介嘅 “大茄來海鮮餐廳 ” ~~

今日終於都有條真正嘅東星斑食喇,雖然係得條魚尾,但已經令到愛食魚嘅團友食得津津有味。 昨晚大家嘅表現都唔錯,所以今晚點餸菜比昨晚多,除咗東星斑仲有軟殼蟹、肉蟹、龍蝦、老虎蝦、蒙古雞、沙巴薯仔菜、巴菇菜、滑蛋河、福建麵 ~~

今晚嘅餸好大碟,菜式又多,去到尾段食剩好多,好奸的馬生不斷將枱面食剩的食物分晒俾我地食,最後我地都好乖無浪費到食物。 最後的甜品椰青布甸 (下圖右下角) 好清甜,口感好似大菜糕,依加仲回味緊呢個布甸 ~~

快樂又滿足的一天又過咗喇,繼續期待明天精彩的行程,晚安!! onion-head100

 

Day 3 (4/3/17) —

今早再食多一次個5星級酒店自助早餐之後,我地就要退房了,因為今晚會搬去另外一間亞庇市區酒店Hotel Grandis ~~

喱姐為大家辦理退房手續的同時,另一邊廂緣人搵咗馬生及David去幫手拆咗我地租嗰部車嘅後排座位以便可以安放好大家嘅多件大型行李。 早上9點鐘等緣人泊好車之後,我地就改坐旅行社為我地安排嘅小型旅遊車出發到丹絨亞路(Tanjung Aru) 火車站去體驗蒸汽火車之旅 ~~

這趟懷舊火車之旅只有每逢星期三和星期六運作。 乘坐古老婆羅洲蒸汽火車,時間和背景彷彿回到英國殖民地時代一樣 ~~

呢個就係丹絨亞路(Tanjung Aru) 蒸汽火車站的售票處,我地係出發前經由旅行社代訂門票,所以行埋去售票處就可以拎到車票 ~~

在領取火車證時會有穿著英國殖民時期服裝的站務人員在月台發給每位乘客一本特製的Passport (護照),蓋上出發站”Tanjung Aru”(丹絨亞路)的印章,本Passport內有介紹蒸汽火車的歴史、路線、地圖、 以及集郵用的 ~~

時光倒流的旅程便由那一刻開始 ,大家可以隨便和工作人員、火車等拍拍照。 睇吓緣人個樣幾咁得戚!yxh52  專門搗亂嘅緣人,佢見大家影緊個車站職員影得咁開心,佢就衝咗埋去阻住大家影相,仲以此為傲,真係被佢激死呀 !! 大家心唸”咪阻住晒啦”,無佢辦法之下,唯又幫佢同個車站職員影張相之後打發佢走囉 ~~ yxh90

大家咁認真圍在一起所為何事? 目的只為集郵,Passport 內介紹每一個站,當到站時職員會再為大家於Passport內蓋上地標名字的印章 ~~

大家於火車站內四圍遊覽及拍照,到火車站時只係見到得一列火車的車身在月台中,我地等咗一段時間蒸汽火車頭終於都出現了,火車頭由遠方緩緩的往後倒車,直至與火車身連接 ~~

蒸汽火車係用木燃燒及驅動,我咁大個女都係第一次見到蒸汽火車,原來個運作是這樣的。現在可以坐到懷舊蒸汽火車已經是不容易的事,這個行程確是很特別 ~~

我地於車箱內先來一個大合照先 !!  請大家落足眼力找亮點!至於亮點係乜,咁大家睇到係乜咪乜囉,千祈唔好問我,哈哈 !! onion-head47

我同馬生兩個人,於開車前無野做,無無聊聊咁馬生話幫我影相,點知我地又被偷拍了。 當馬生發現被偷怕,佢話佢嘅生命受到威脅 (會俾人打喎 ! ),所以即刻用手遮臉。其實某某人唔會食人㗎 ,同我影張相無乜咁大不了啫 !!

10:00 –火車鳴笛出發,終於都開車了,開始沙巴婆羅洲蒸汽火車懷舊之旅,第一個目的地是Kinarut火車站 ~~

沿途的風光 ~~

火車上係有2餐膳食供應,早餐茶點以及特色地道午餐,餐牌已經詳列了今天的膳食,不得不提套茶杯的花紋真的很特別,應該係50年代南洋地區的茶餐廳最常見嘅茶杯 ~~

開車無幾耐就先上咗呢杯凍檸茶,可能係口渴嘅關係,馬生不斷話呢杯凍檸茶好好味,不斷想叫職員添飲,問了職員後原來是免費添飲的 ~~

然後職員為我們奉上一份地道早點 ~~

加上南洋黑咖啡一杯 ~~

一路嘆早點一路欣賞車外風光,爽呀 !! onion-head68

食飽就可以休息一下,趁呢個時間同大家介紹一下北婆羅洲蒸汽火車的歷史 !!

北婆羅洲鐵路是屬於英國統治沙巴時所留下的百年古董,現在的年輕一代可能從未親身坐過甚至未見過這種交通工具。

1880年,婆羅洲發生巨大的變化,當時英國北婆羅洲特許公司派去的管理員和探險者來到婆羅洲時,他們發現自己進入一個未開發的國度,面對廣大的森林和許多未開發的資源,主要交通是羊腸小徑或河流,他們認為建設鐵路以開闢沿線土地供商業化種植是重大經營策略,當然以賺錢為出發點,而當時的董事總經理William Clarke Cowie就負責發起沙巴的第一條鐵路的建設。這條鐵路構建的意圖是開發天然資源,使英國人可以把農作物、木材、礦產出口賺錢。由於亞庇至Beaufort沿線土地資源豐富,土地很快被清除種植水稻,丹南開始種植煙草、橡膠、可可以及咖啡, 而糖、木薯粉、蠶絲、大豆、菠蘿和白米開始被運往亞庇出口。

1896年,英國土木工程師Arthur J. West被任命為建立由Beaufort北部Bukau至南部Weston的鐵路線。 然而,鐵路在1890年完成後,Weston被發現不適合當深海碼頭,所以他決定向西北延長鐵路。 最後一班火車在60年代開出,後來鐵路就被拆掉,現在Weston依然可以參觀當時的碼頭、火車站遺址。

1903年,Arthur J. West繼續把鐵路延長64公里到Melalap,兩年後完成,當時主要的鐵路工人是來自中國的廣東人和客家人,他們承接被稱為是最具挑戰性的任務,建設Padas巴達斯峽谷部分的鐵路。在此期間,從Beaufort到亞庇長達90公里的線路也被修建。

北婆羅洲鐵路局在1914年8月1日成立,1924年開始發展起來,但好景不長, 1930年的大蕭條傳遍世界,到處有工人失業,貿易幾乎停止,至到世界第二次世界大戰時,日本37軍佔領北婆羅洲,在1944年和1945年之間幾乎癱瘓整個鐵路系統。儘管有嚴重的損害,鐵路在戰爭期間繼續提供重要的服務,改裝的「鐵路吉普車」繼續運行。

戰後,北婆羅洲成為英國殖民地,直到馬來西亞獨立後,北婆羅洲鐵路局才改名為「沙巴州鐵路部門」,繼續服務沙巴人民,到了1971年,柴油和汽油動力的機車技術取代了蒸汽機。這條北婆羅洲鐵路於2000年1月22日重新啟動,帶遊客走入婆羅洲的懷舊之旅。

10:40 抵達了第一個站 (Kinarut),當地的店舖是南洋華人在英國殖民時期留下的,是中國下南洋歷史的縮影 ~~

我們可以落車觀光,今個站主要是參觀 “天石廟” ~~

 

天石廟

搞乜呢? 只係一個裝了水的銅盤,雙手放在盤上做甚麼呢? 車站職員告訴我們,用手捽銅盤的柄與水時因震動而會產生出一些清翠的聲音,緣人捽咗好耐只係得啲前後推動的聲音,而職員示範俾我地睇時好輕易就捽到銅盤發出清翠的聲響,有點神奇!雖然係捽但一定係有技巧的,只是緣人未掌握到技巧所以未能成功 ~~ yxh98

11:00 再度由Kinarut站啟程,11:45 到達Papar站,Papar是以前英國人的重鎮之一,又可以再次落車參觀當地的市集和商店 ~~

我地成班人走上天橋等睇火車頭調頭 ~~

火車頭調好頭後,我們又企晒喺度遙望蒸汽火車頭噴煙,原來呢個時候個火車頭係加緊2,000公升水,因為蒸汽火車一定要加入大量的水入鍋爐,用火把水煮成蒸氣,然後蒸氣再射入氣缸推動火車前進 ~~

之後我地趁仲有少許時間就行咗去Papar小鎮兜個圈 ~~

返去Papar車站時見到啲職員正在忙緊運送我地嘅午餐到車箱中 ~~

12:20 重登火車,開始回程返回Tanjung Aru站,並在火車上準備享用特色午餐 ~~~

蒸汽火車上豐富的午餐,於火車上可以食到這個質素嘅午餐都已經算係超值了 ~~

飯後西式紅茶再配上粟米雪條做甜品 , 好滿足!!

快樂的時光總是過得特別快,雖然我地乘的火車比原定時間遲了大約30分鐘才返回Tanjung Aru車站,由早上9點出發,10點開車一直玩到下午2點,感覺非常值得!!

蒸汽火車之旅之後就到我地今日的第二個重點行程,就係濕平啦!!yxh50

我們返酒店取車後就往Imago Shopping Mall 出發。 大家有無發現我地今日部車好似有點不同?不過估中無係無獎的.......yxh56

無錯,呢部車並唔係我地第一日租嗰部車,喱姐第一日收到部殘車已經要求換車,租車公司答應了會於星期六換過另外一部車俾我地,昨晚租車公司的職員親自開了這部車到酒店,這部新款日產van又高又濶,而冷氣亦都凍到不得了,大家坐上了這部新車都非常之開心 ~~

我地入到個商場第一時間就要先搵娘惹餐廳Nyonya House,因為今日我地一定要試下娘惹下午茶 ~~

我地呢班大爺緊係坐喺道等食啦,點咗乜我地從來都唔會過問,因為喱姐大概都知大家嘅口味,佢每次點餸都會因應大家的口味為大家安排膳食,實在係太貼心了。 枱面上的食物全部都係馬拉地道小食,至於係咩名堂我真係唔知,如果無喱姐帶我地嚟食,又真係未必會識得點呢啲小食 ~~

食完下午茶之後,又到我地自由活動嘅時間了,我們約好時間集合,之後就解散購物去 ~~

離開Imago Shopping Mall之後我地就開車去Hotel Grandis。 以下呢間就係我地呢3晚住的酒店,酒店位於亞庇巿中心;而連接酒店隔離就有一個大型的Suria Sabah Shopping Mall購物商場,非常之方便 ~~

房間都算新淨、寬倘 ~~

頂樓有個泳池以及小型健身室 ~~

因為我地訂咗5間房一共3晚,所以今晚酒店送一餐免費自助晚餐俾我地,免費晚餐就唔好期望太高,因為食物的質素很一般,食物的款式亦唔算太多 ~~

食自助餐要影一張合照真係好困難,因為等到牛嫂返埋位,又到CatCat出咗去拎嘢食,咁唯有將幾張酒店餐廳合照併埋一齊就當影咗合照吧 ~~

出發來沙巴之前我們經網上預約好今晚做Spa,晚上8點Spa的職員已經準時於酒店外等候我們,有專車接送。 職員向我們講解Spa的療程,詢問我們哪些位置較攰需要加倍的力度按摩 ~~

喱姐已一早為大家爭取了一個好優惠的價格,這個療程非常之優惠,RM398二人療程,平均每人只需RM199,再多加RM30就可以轉用熱石按摩,有機會去試嘅朋友記住記住一定要多付少少錢做埋熱石按摩,真係舒服到無朋友,整個療程非常之滿意!!

onion-head68

由於酒店今日fully booked,所以每間房只能安排到一張房咭,而spa後馬生想約發哥去酒吧摸酒杯底,飲酒我真係唔識飲,所以選擇瞓覺,但問題出現,得一張房咭咁點算呢? 馬生話喎,鑫鑫咁怕凍就唔需要冷氣,所以佢會袋住張房咭同發哥去飲酒,佢話費時萬一我瞓到死豬咁聽唔到佢按門鐘喎! 緣人聽到馬生咁講,佢好正經咁答話馬山講得好有道理!!! 真係好想即刻扑暈佢地兩個,頂!怕凍唔代表唔需要空氣以及開燈㗎喎,有無常識㗎??

yxh19

Day 4 (5/3/17) —

由於今早的行程已經安排咗食東星斑湯米做早餐,喱姐昨晚已經再三叮囑我地今天酒店的早餐只係淺嚐便可。 雖然一陣間有好野食,但點都要到酒店走個圈,如果唔係點知酒店有甚麼款式的早餐供應呢? 食過簡單早餐我地就開車出發去水上清真寺(Masjid Bandaraya Kota Kinabalu)行下先,多走動目的是幫助燃燒脂肪預留空間俾肚皮多收容一點食物 ~~

我地到咗水上清真寺,因為唔知邊個位影相係最靚,所以我地打算多角度咁四圍影下,緣人最初駛了部車去水上清真寺放下我們四圍走走,緣人泊好車不久,我們影完相本來唸住行去水上清真寺的正門,喱姐唔想我地大熱天時行到身水身汗,佢叫緣人駛部車去到正門等大家,因為只係好快咁影一影水上清真寺,用的時間唔會多,喱姐叫緣人唔需要落車,在車上等我地影完相就跳返上車,我地實在係太幸福,有貼心的安排,多走幾步都唔駛,我地被喱姐寵壞了!!

喱姐每次去旅行為了拍下一張美麗的照片給讀者睇,都會盡心盡力咁去影,大家睇下喱姐影相影到跳咗上個欄杆上邊,為的都是希望讓更多的讀者感受一下的當地的風光而已 ~~

正呀喂!話咁快去到 “旺旺茶餐室”,即係話咁快又有得食,今日重點係食東星斑粉,就係喱姐不斷提我地今朝早餐唔好食咁飽要留肚品嚐的東星斑粉yxh86

一碗粉有大大塊的東星斑,仲要唔駛驚被人搵笨,保證係東星斑。 有清湯底或冬陰公湯底2款選擇,仲有碗超好味嘅魚麵。 雖然今早個行程無乜點樣燃燒到啲脂肪,但係我地係有4個胃的,食對我地10人嚟講係無難度!

monkeys311

食飽真係要行下至得,有4個胃都係咁話…行邊度呢?我地去了加雅街週末市場 (Gaya Street Sunday Market),由於我們來到週末市場都已經11點幾,有少部份的檔攤都開始收檔,但無阻我們行街的興致。今日有點熱,加上烈日當空,幾位怕曬又怕熱的團友已經收埋了自己…佢地去咗邊?都係又叻又精靈的緣人最了解嗰幾位團友,原來佢地去咗附近嘅酒店嘆冷氣 ~~

加雅街是亞庇市區的主要街道,延伸到附近有很多美食小吃、餐廳、住宿都能在這邊找到 ~~

雖然又熱又曬但大家依然好開心努力為戰利品而奮鬥 ~~onion-head104

而我就最幸福,因為喱姐為我挑選了一條我好喜歡的連身裙,無論顏色及款色我都好鐘意。世界上最幸福的事除了有朋友為我們計劃行程、貼心安排膳食、就連旅途上購物都照顧周到,實在太感動了,要好好珍惜!

原來榴槤樹苗都可以喺市場買得到,真係大鄉里出城 !!

天氣實在係太熱又有點焗,呢個時候最吸睛就係眼前呢個水果盅,用新鮮水果打成蓉再加少許冰打碎,咁熱飲呢個水果盅真係消暑解渴 ~~ yxh77

除咗水果盅,市場仲有好多地道零食,想買手信嘅朋友一定唔會失望 ~~

嚟到沙巴咁多日,一直都好想試當地的雪條,但每次行過依然都係行過,未有機會試,今日咁熱又行咗咁耐終於都出手了。 由於有幾位團友去咗附近酒店嘆冷氣唞暑,叫埋佢地一齊嚟食怕佢地嚟到雪條都溶晒,所以今次 “自私食”,唞暑的團友們你地走寶了,條雪條又平又好味 ~~

monkeys19

行咗咁耐街街相信大家又開始肚餓了,繼續去搵好嘢食先!! 於天朗氣清、藍藍天空的車道上,我們向 “何記 (文昌) 正宗海南雞飯” 店出發 ~~

雞……全部都係雞……我地嚟到實在係太晏了,好多款食材包括白切雞都已經售罄,無可奈何下點了燒雞、芽菜、雞雜、油雞飯及油菜。

個油飯好特別佢係一個三角柱體,本來上枱時好尖好靚,但愛搗亂的馬生竟然…唔抵得別人快樂地相機食先,佢用隻湯匙打個油雞飯的尖頂將啲飯壓扁了,可惡!yxh74

喱姐搵到茶室附近有間超巿,食過午飯後我們就向超巿出發,因為大家都想買咖央醬及一些地道的手信,去超巿買就最好不過。 喺沙巴要泊部大van係一件好艱難的事,我地部車不斷兜圈都搵唔到一個泊車的位置,我地一起打醒十二分精神望住邊度有車準備走,車不斷地兜嚟兜去,終於都昅到有部車準備走,咁我地就靜待時機,等部車駛出我地就衝入去個車位到。 泊好車後入到商場,喱姐第一時間話要介紹我地食呢個 “一口吃榴槤泡芙”,喱姐大讚好味,愛榴槤必定要試,一件一口好濃的榴槤味,吃一口已經好滿足! 食過呢個 “一口吃榴槤泡芙” 我們還未夠喉,咁鑫鑫、馬生及CK 再買咗一個榴槤雪糕食,可惜希望越大失望越大,原來榴槤雪糕的味道不及”一口吃榴槤泡芙”,榴槤味唔夠濃而且奶味太重。

咁大間超巿竟然係無咖央醬賣!!  monkeys50 搵泊車位搵咗咁耐,入咗超巿轉個圈加埋都唔夠10分鐘。 深深不忿的喱姐於是又再上網搵吓附近仲有無其他超巿,好快又搵到第二間超巿,點知……又係無得賣!! 原來喺沙巴搵車位泊車難!要買一樽咖央醬更難!

既然行咗兩間超巿都搵唔到咖央醬,我們都係放棄吧! 我們按原定的行程返去酒店隔離個商場去食下午茶,”Big Apple Donuts”又係喱姐強烈推介的。 入到去見到職員吱緊啲 cream於冬甩上,而一個個色彩繽紛的冬甩,由左至右順序排列於櫥窗前,未食但睇見都開心!!

冬甩的外表太靚,靚到唔捨得食,買冬甩之前個個都怕冬甩會太甜唔好食,所以大部份的團友都話只試半個冬甩……最後咪又係要Encore!咁唔駛多講都知道啲冬甩好唔好味啦!!

下午茶過後又到海傍散步幫助消化嘅時候喇 ~~

鑫鑫對住緣人想做乜呢 ?  被偷拍下罪證啦,今次大鑊了!! yxh28

因為今日實在係食咗太多嘢,所以我們決定於海傍漫步往菲律賓巿場。 由於時間尚早,我們可以慢慢行,慢慢欣賞著大大個的咸蛋黃。 大家一路行、一路玩、一路影相, 一大班人一齊玩樂趣多了,氣氛又熱鬧。 我地為咗影一張日落剪影的照片,於海傍喧鬧,嚇到有幾位外藉人士都怕怕走開,呢班港燦真係失禮死人喇!!

睇完日落再向前行多10分鐘左右就來到菲律賓巿場,呢幾日坐車都路經菲律賓巿場,每次經過都見到好多嘢食賣,今日終於都可以步進呢個地方參觀一下 ~~

走進窄窄的小巷,可以看到擺賣生果、乾貨海產、工藝品、林林總總,應有盡有 ~~

我們只係行咗一陣,之後就往菲律賓巿場旁邊的海鮮巿場出發,去海鮮巿場就緊係去搵食啦!

我們今晚係食BBQ炭燒海鮮,海鮮巿場除咗有超巨型的海產外,還有一些已經預先燒好的海鮮,睇前已經流晒口水 ~~

我地行咗一圈,見到大部份擺賣嘅海鮮都已經預早燒好晒,然後顧客要的話再加熱,奄尖嘅我地最後決定要自行揀海鮮俾檔主幫我地燒,喱姐用好親切的馬拉話同檔主溝通,我地企喺旁邊看著喱姐望住佢指指點點咁就搞掂晒啦,然後我地又去搵位坐低等食 ~~

海鮮BBQ我們都唔敢叫太多,因為轉頭我地又要去食消夜,個消夜係我最期待的食物~~

再加多每人一隻燒雞全翼 ~~

當時見到太多魚品種嘅時候,唔知點解突然間又諗起Day 2玩浮潛時我地一直尋覓但無緣一見嘅蘇眉魚,所以為咗俾團友少少嘅心靈補償,所以決定今晚食燒蘇眉 (下圖右上角嗰條魚)

鏡頭一轉已經係消夜時間了,轉眼間我地已經嚟到 “新記肉骨茶”,今次又係太夜啦,嚟到時好多食材已售罄,激氣早幾日食海南雞飯又係咁,今日又係咁!monkeys50

算啦,雖然有好多食材賣晒,但既然嚟到,點都要試下啦,等咗一陣搵到張大枱,一次點咗10碗肉骨茶,不過大家對肉骨茶的口味各有要求,咪講笑,我就真係覺得好好味,好重藥材味,我成碗連渣都食晒 ,yeah !!

嚟到沙巴一定要食多幾次榴槤先至得,之前已經提過跟喱姐去旅行一日食八餐係等閒事,呢個並唔係浪得虛名,大家可以數一數今日我地食過幾多嘢!! 肉骨茶已經係今日行程內第8餐了,有幾位團友恐防再跟我地出去食榴槤個胃會爆開,咁我地有10個胃的團友先行出去探下路先,試過好味就明天再一齊去食過。 第一個開的榴槤我地一定要努力影多啲靚相去引下無跟出嚟嘅你地 ~~

今日真係食咗太多嘢,我地今晚只係開咗一個貓山皇淺嚐。 成條橋底榴槤街(Jalan Segama)有好多榴槤檔,街口嗰幾檔做遊客生意為主貴到嚇死人,而我地今次喺中段的榴槤檔開了一個榴槤已經食得好滿足了 ~~

onion-head24  onion-head24  onion-head24

 

Day 5 (6/3/17) —

今早9點半享用過酒店自助早餐之後就出發去另外一個大家好期望嘅重點行程”玩激流” ~~

由酒店出發往九魯河 (Kiulu River)車程約1小時,途中大家無無聊聊依舊都係猜測下今日嘅行程,會去邊度食野,我地就係咁,明明喱姐貼咗好多次個行程上去群組俾團友睇,但係一個二個睇完就唔記得,唯有靠把口問,喱姐都無我地咁好氣~~

yxh70

我地都係自己估下,其實下個目的地係去邊、下餐食乜都唔係重點,重點只係大家猜下估下個種快樂同嘈吵嘅氣氛;期間都唔記得講過乜,馬生突然口快快叫咗發哥一聲做「老豆」,估唔到短短幾日的時間發哥就有一個咁大個仔,而父子關係亦特飛猛進,哈哈 !!

前往九魯河途中可以遙望東南亞第一高峰,神山(Mount Kinabalu),海拔4095.2米 ~~

傾吓計講吓笑話咁快就去到九魯河玩激流嘅起點 ~~

我地去到九魯河的激流中心先換好泳衣,之後穿上救生衣、頭盔、分發船杖,我地穿好晒裝備就浩浩蕩蕩咁出發!!

今日天氣咁曬,下水前先要做足防曬準備,大家有眼福了,發哥的48寸白雪雪的美腿盡現大家眼前 ~~yxh54

個頭盔真係好重要,因為我地個個都顧住玩水,都唔理得其他隊員嘅生命安全,支船杖好重,又下下咁仆邁去前邊個隊友個頭度,無頭盔真係好易被扑到頭爆命都無呀!!

出發前象徵式嚟張友誼之水戰前的大合照先。我地10人自己預先分好組、分別坐兩隻橡皮艇玩水戰 ~~

當日仲有一團來自台灣嘅遊客,加埋台灣隊友就一共有3隻橡皮艇加入一齊玩水戰,未出發先興奮!! yxh50

我們先要跨過一條短短的石澗去到橡皮艇嘅位置上艇 ~~

又係百百厭厭的緣人,佢又蝦鑫鑫,趁鑫鑫行去橡皮艇時從後邊突襲潑水,緣人咁百厭緊係被喱姐話,喱姐一句話緣人就停手了 ~~

玩激流要注意的重點,並唔係緣人腳上的壁虎BB (下圖),重點係上船後緊記要將對腳攝到入橡皮艇呢條縫隙,係要成對腳攝晒入去,一定要攝到實晒,hea做後果自負。

有咩後果先賣過關子,最爆笑的畫面好快會出現,敬請留意 !! yxh51

黑色橡皮艇5位隊員包括:喱姐、緣人、David、Samuel、珊姐以及船夫,而 藍色橡皮艇6位隊員包括:鑫鑫、Jennifer、CatCat、CK、發哥、Chiiko以及船夫 ~~

由於戰況實在係太激烈,我地藍色橡皮艇已經拋離了黑色橡皮艇,佢地窮追不捨,鑫鑫仲拎起佢部電話拍下珍貴的時刻諗住同大家分享,有時真係事以願違……

發哥好認真咁觀察住大家的水戰情況,為大家拍下一段又一段嘅快樂回憶短片 ~~

各位團友加油,追呀 ! 一定要潑到佢地片甲不留!! onion-head105

內扛呀!搞乜呀?船夫係咪敵方的奸細?佢做乜自己人潑自己人,個個都視鑫鑫為敵人係咁潑佢。 話時話點解咁多敵人攻擊鑫鑫,但佢依然都笑得咁開心呢?一定係傻咗,除非唔係 onion-head47

台灣隊友都要加油呀!!

激戰連場水花四濺 ~~

有幾段啲水流都頗急 ~~

咦.....大家嘅目光咁一致究竟睇緊乜呢?明明係激戰中,無中場休息㗎喎,發生咩事呢?

請留意下圖!! 在大家努力潑水嘅同時,鏡頭下發哥笑容非常之燦爛;但係點解水裏邊有個人慌失失咁嘅?到底發生咩事呢? 跌咗落水嗰個係邊個呢?咪就係鑫鑫囉!yxh49

可能大家都好好奇點解鑫鑫玩玩下會跌咗落水……諗返起都覺得莫名奇妙。 玩激流可以同其它艇對壘,同時亦要控制隻橡皮艇的速度及方向,今次鑫鑫跌落水的主要原因係我們隻橡皮艇準備撞向啲大石,其間Chiiko不斷提我地就快會撞到大石,要快啲扒走隻艇,但說時遲那時快,隻艇已經撞咗埋去啲大石度,而鑫鑫亦因為對腳係hea 攝住,所以當隻艇撞向大石時佢坐唔穩,因為衝力大所以佢成個人掉進水裏面。可憐的是成隻藍色艇的隊員都無人察覺到鑫鑫跌咗落水,大家仲依然好投入水戰之中。 鑫鑫跌咗落水只有黑色艇的隊員馬生及緣人目睹到成個過程,等我憶述一下當時馬生及緣人如何描述我跌落水的一刻先: 馬生話當時見到鑫鑫好似個冬瓜倒轉跌咗落水;而緣人話當時見到鑫鑫係好似揹咗氧氣樽準備落水的潛水員咁,個頭往後插落水。大家都係形容跌落水的一刻,何解分別會這麼大呢!

yxh30 yxh30

等我再描述一下鑫鑫墮水後發生咩事先! 當鑫鑫彈咗落水之後,佢不斷往下沉,當時我心諗穿了救生衣應該問題不大,好快可以浮返起,可是我越係大安旨意的同時,我感覺到我不斷往下沉,當時心諗係咪我已經肥到令件救生衣都無法再將我浮起,再往下沉會唔會係我生命終結嘅時候呢?但係我未玩夠喎……於是我拼命的游,好不容易我個頭終於都浮了一丁點上水面!當我浮返上水的一刻氣都未及時吸一口,惡夢又嚟喇....我地隻橡皮艇從我個頭上浮過,正正係咁我又被隻橡皮艇壓返落水底,今次仲唔知飲咗幾多啖水,當時除了驚都唔知可以點,我只係不斷感覺到我頭頂係有野頂住咗,令我無法浮返上水面。 感覺過咗好耐隻艇終於都飄離咗,我終於都可以浮返上水面了,上了水面後驚惶失色,不斷的用力呼吸…… 船夫見到我浮了上水,用力把我拉返埋去船邊,但我實在係太驚,驚到係咁捉實隻艇,好怕再跌返落水再浮唔返起、好怕再要喺水底被迫飲水。 話時話當時緣人及馬生見到我跌咗落水,佢地對我真好,只係觀察住我,並沒有諗過跳落水救我囉!!

去到呢個位置啲水流無咁急,船夫叫我地落水玩一陣,感受一下在水中漂流的感覺 ~~

呢個鑫鑫剛剛才跌落水嚇到面青青,轉個頭貪玩嘅佢又跳咗落水彈下彈下咁玩緊水了 ~~

呢一次落水玩亦都係我今個trip 的第二個惡夢!一個估計唔到嘅意外。 落水玩之前我係用一個防水的電話套裝住我部電話,再掛於頸上,由頭段至中段都好安全,個電話套防水好出色,我都影咗好多相。當隻橡皮艇開始進入水流急的區域,船夫示意我地要上返船,當時馬生亦喺我旁邊,可能大家都覺得我論盡,所以圍在我身邊睇住我啩? 當船夫把我拉返上船嗰一刻,馬生大叫 : “你部電話跌咗落水底”,我當時以為佢講笑,我上返船再望下自己個心口,頸上只剩下條掛頸蠅,可能係船夫拉我上船時太大力拉扯,條蠅個扣斷了,所以部電話跌咗落水。 當時我好傷心,亦再笑唔出了,我只係埋怨馬生見到的時候做乜唔去接住我部電話,任由部電話往下沉,我地隻艇係咁住前飄,而船夫、Chiiko都無表示可唔可以搵得到我部電話,亦都無人敢去搵,我只係想搵返部電話,因為電話內有一些好珍貴的回憶及照片,我當時乜都無諗只係跳返落水搵,我唔想失去……

onion-head4

過了一會喱姐及緣人漂到過嚟,佢地知我部電話跌咗落水底都幫手搵,但水流開始急,我地快將要沖往下一段路,船夫見我咁失望,於是佢跳咗落水用一個人的力量逆水拉住我地艇上6個人返去我跌咗部電話的水域,我地好努力咁四圍望,我呆咗咁坐喺隻艇度望,而牛嫂亦都幫我問船夫如果俾錢佢可唔可以幫手去水底執,但船夫話這個區域的水有15米深,沒有潛水的功具係無可能,我地停留咗都有成十分鐘。 既然失去了已是事實,呆坐望住個水底都無補於事,於是我決定放棄,我決定繼續餘下的旅程,各團友都有問係咪真係放棄,離開咗就無機會再返去搵,與其執著,放棄並唔係一件壞事。 最少,我還可以用餘下的時間繼續開開心心咁玩。 當我冷靜返落嚟再諗返點解馬生只係望住我部電話往下沉無幫我接住佢,其實又唔怪得佢,佢都唔識游水,無理由咁冒險!怪只可以怪自己,玩水就應該專心玩,帶部電話落水做乜呢?

onion-head56

當我地離開了要搜查的水域,我已經收拾好心情繼續玩了,原來喱姐佢地坐艇去到一個水流比較平靜的區域默默地等候著與我們會合。當會合後喱姐係唱咗一首歌,咩歌?我當時真係聽唔入耳,但從馬生的口中應該係陳百強嘅” 眼淚在心裡流 ”囉 ~~

再漂多一段就嚟到呢個石灘,船夫示意叫我地落船上去行下,上邊係有一條吊橋,無特別的風景睇,純粹係比我地落船行下,感受一下行吊橋的感覺 ~~

行吊橋大家各有不同的姿態,從相片中可以見到CatCat好驚、牛嫂好輕鬆仲擺出一副勝利的姿勢、David 好小心及認真咁行,而最奸的馬生點解笑得咁燦爛,行吊橋姐有無咁開心呀,我唔相信係為咗影呢張相而笑到咁囉!好明顯用佢好有份量的體型去嚇人啦,至於點嚇我,相信大家都諗到啦,咪喺條吊橋上邊不斷咁搖囉,平衡力差的人咪驚到尖叫囉!

所以照片中各人的表情有一個強烈的對比 ~~

發哥留在橋底幫大家影完短片先最後一個行上橋去 ~~

連David都就快被馬生搖到跌低,一個男士都被搖到咁,更何況係其他女團友呢?onion-head1

Chiiko見鑫鑫咁驚於是拖住佢一齊行,但係條橋沒有因為有人跌親而停了下來,只是不斷的搖,仲越搖越勁 ~~

鑫鑫佢越驚就叫得越大聲,但係前邊嗰個變態馬生越係聽到人地驚到尖叫就搖得越興奮。 鑫鑫本來都已經唔係企得好穩,再俾一個咁有份量的人係咁搖條橋,佢最後都係企唔穩,終於跌低咗,好在有網圍住,如果唔係鑫鑫成個人由高處飛墮落去都唔知點算呀?

行返轉頭時雖然Chiiko 拖住鑫鑫,但係鑫鑫都仲係好驚企唔穩,雖然被人拖住行,但係都係企唔穩、條橋又搖,鑫鑫又再次跌低了,因為失去平衡再加上好驚,終於都忍唔住喊咗出嚟...鑫鑫無鬼用!咁少事都撐唔住。 喱姐見到我嚇到喊就幫我鬧馬生,叫佢唔好再搖條橋,呢個馬生夠膽做又唔夠膽認,佢堅持話自己無搖過條橋,仲話係牛嫂一人喺度搖條橋,馬生講大話講到真的一樣,自己講自己唔笑㗎喎,好嘢!!  喱姐拖住咗我行遠咗,之後大家都好乖無人敢再搖條橋喇 ~~

行完吊橋我地繼續餘下的激流旅程,又可以開始水戰了,為咗報仇剛才馬生嚇我,我決定要追住佢嚟潑水以發洩心頭之憤。 我地隻艇仲唸住駛近佢地等緣人將佢拉落水….準備好了,要出發去復仇!!

onion-head2

追呀!潑呀!鑫鑫同馬生距離好近啦,佢地兩個不停咁潑,激戰連場~~

發哥同馬生兩仔爺開心對壘,睇下發哥笑得幾開心,呢場水戰真係好好玩,大家潑水潑得好投入 ~~

又輪到緣人攻擊,男士確係有一個優勢,撥一下已經有無限的水花濺出 ~~

藍色艇前方負責攻擊的CatCat 己經無力再潑水,當大家都諗住隨波逐流嘅時候,貪玩嘅鑫鑫又唔甘心未報到仇,所以佢調位坐喺船頭負責再繼續攻擊。人生的旅程就係咁,只要抱著樂觀的心態,盡情投入地玩,享受著每一個時光,縱使失去又如何,總好過因為失去而唔開心而損失了這個水中對壘的美好時光。 尾段大家都玩得超開心,每張相都見到每一位團友燦爛嘅笑容 ~~

而喱姐就全程負責用馬生嗰部防水相機的鏡頭拍下一幕幕精彩嘅激戰 ~~

話咁快我地今天的激流己經到了尾聲,下午1點30分臨上岸離開時船夫都要向我們潑水,好頭好尾吧!monkeys1

是日午餐係於激流中心,團費包咗嘅簡單自助午餐,不過旅行社額外多送了一盤燒雞翼俾我地團友享用 ~~

午餐食得咁普通,轉頭緊係要食返個好滿足的下午茶至得。 返到酒店梳洗完之後我地去了酒店隔離的”Secret Recipe”食榴槤芝士蛋糕。 未食之前都有欵惑,乜芝士同榴槤夾㗎咩?當食了第一口之後……真係不得了,係好吃到不得了,愛榴槤的人真係會好鐘意,好濃的榴槤味混合在芝士當中,感覺又唔會 “留”,唸起又想再食。 唔喜歡榴槤嘅團友就揀咗紐約芝士蛋糕,各有各好味 !!

等食芝士蛋糕其間,我見大家都坐喺道玩電話,而我部電話又唔覺意留低咗喺九魯河底,見到大家有得玩我真係有點葡萄,都係喱姐同緣人最錫我,佢地俾咗佢部電話我玩,等我可以喺微信群組度扮佢地留言,點不知俾好細心的谷友細孖發現咗,佢留意到緣人平時係唔講野,佢覺得有古怪囉,其實係鑫鑫拎了緣人的電話代答咁啫,嘻嘻….!!

食完Tea之後我地又自由活動,真係各自精彩,因為我無咗部電話,為免走散所以鑫鑫跟住喱姐去Shopping,之後緣人仲陪鑫鑫去睇電話,佢介紹咗幾部電話俾我,叫我返到香港再睇下實物。

而發哥同馬生先去了肯德基試馬拉的炸雞,佢地叫了一桶9件炸雞本來諗住其他團友會一齊嚟食,點知最後都係得發哥及馬生兩父子食,兩個人點食9件炸雞?食剩又唔想浪費所以將餘下的請了鄰座的小朋友食。

CK覺得尋晚食的肉骨茶唔係咁啱佢口味,所以今日自己出去搵食,當發哥知道CK去咗食肉骨茶,美食當前,於是發哥又急急腳走咗去會合CK。 咁又啱嘅,如果唔趁最後的機會食,咁就要等下次再嚟沙巴先至有機會食喇,其實我想問大家查實真係有幾多個胃?全部都係肉,點解仲可以食得落?

牛嫂、珊姐、CatCat就好專注咁買鞋。 我地善用了自由活動的時間,仲可以一嚐了由第一日就想食的貓山王雪條,呢條雪條售RM16,唸住咁貴應該會好好味,點知都係希望越大失望越大,雪條的榴槤味唔濃,仲溝了好多的糖水,一路食啲糖水溶了搞到成手好黏 ~~

接住落嚟嘅行程一樣係 “食” ,今晚試嘅係喱姐同事推介嘅 “知味海鮮餐廳” ~~

今晚要試嘅係石頭魚,以下其貌不揚的物體就係石頭魚喇,佢有幾隻顏色,今日見到的石頭魚有紅色、橙色及白色 ~~

今晚呢間海鮮餐廳係我地來到亞庇試的第3間海鮮餐廳,亦都係各團友一致認為最好味、價格最公道而且服務係最好的一間。 可能之前試的2間海鮮餐廳主要做遊客生意,而且座無虛席所以各樣質素都無呢間做得咁出色 ~~

今晚點的薑蔥炒象拔蚌bb、黃金蟹、黑胡椒蟹、清蒸石頭魚、沙白湯、白灼海蝦、琵琶豆腐、等等…都好好味 !!  大家都食得好滿足~~

食過晚飯,我地6天的行程已經接近尾聲了,因為明早買埋急凍海鮮之後我地就要出發去機場準備飛返香港了。 喱姐諗住今晚順路就入埋油之後就將阿公基金餘下的錢分返俾各團友 ~~

點解要影低呢個入油紀錄,咪就係要記錄低緣人有幾叻,因為未入油之前緣人己經估咗係呢個金額,點知真係俾佢推測準確,今次緣人真係好叻叻 !!

咁早分返阿公錢係因為團中有幾位團友唔食榴槤的,咁我地呢餐榴槤消夜就再各自夾錢。 尋晚先頭部隊已經嚟探咗路,亦都品嚐過橋底榴槤,臨返香港前一定要食到捧住個肚至得,我地今晚開了4個榴槤,每個榴槤產自唔同的榴槤樹所以味道都各有點不同,但可惜的是有回甘味而又抵食嗰檔榴槤已經賣晒,我地最後只可以食甜的榴槤,不過甜的榴槤一樣都係咁好味 ~~

食埋榴槤宵夜就捧住個肚返酒店執行李,然後要早啲休息,因為約好咗明早6點半出去食地道早餐 ~~

onion-head100  onion-head100  onion-head100

 

Day 6 (7/3/17) —

昨晚大家都話今早一齊出去酒店附近食早餐,約好了0630酒店大堂等,不見即散 !! 我地講得出做得到,鑫鑫同馬生一早到了大堂等埋喱姐及緣人,而其他的團友一個都無出現,咁我地4個一夠鐘就即撇自己出去搵食 ~~ monkeys54

茶室的早餐選擇唔多,但係大家都好認真咁挑選 ~~

我地4人揀咗砂勞越海鮮叻沙 (Sarawak laksa)、牛肉叻沙、以及炒貴刁,再加幾杯奶茶和涼茶,個叻沙都唔錯,幾好味 ~~

我地酒店出面的貨車擺賣呢啲一盒盒嘅”辣屎你阿媽” ,如果我無聽錯緣人的讀法。 既然見到點都要買一盒帶上飛機當午餐試吓,呢盒”辣屎你阿媽” 好好味,點好味法? 唔識形容,無得食的你地只可以望相止渴。辣辣地啲椰汁飯,配埋魚乾、花生咁又有咬口,唸起又想食!!

食完早餐按原定計劃退房,然後開車去買埋急凍海鮮就要出發去機場還車喇 ~~

我們剛剛到凍肉店時仲未開門,我地係佢第一班客人,大家都好努力搵自己要買的海產 ~~

除咗急凍海產之外仲有盒裝的雪條賣,方便遊客托運返香港 ~~

超大隻嘅急凍老虎蝦,最大隻嘅有12寸長 ~~

各類急凍魚,東星斑、老鼠斑、蘇眉等等…..

仲有鮑魚、帶子、海參等等….

以下係喱姐的戰利品 ~~

急凍海產店的職員介紹了一間附近的豬肉粉俾我地去試,大家聽到話有野食,即時又覺得好肚餓,又話要去試。 個店員好好人,佢用手畫了一個地圖俾我地,緣人根據個手繪地圖就搵到間茶室。泊好車後我地就行入餐廳,點知就已經見到門口有人抄緊牌,我地唔可以臨尾香㗎 ,喱姐及緣人兵分兩路,緣人返咗去部車道等,喱姐就去附近的文具店睇下有無得買泊車的車票,好好彩我地又買到泊車票,仲要係可以只買一張,雖然貴少少,但係我地即將離開沙巴,唔需要買咁多張泊車票,一張泊車票平均是RM1,散買一張都係RM1.2,差少少錢可以換來食得安心嘛 ~~

食飽就真係要出發往機場了,馬生未出發前已有心理準備今天的來臨,唔知佢嗰刻的感覺係咪好似佢咁講咁平靜呢 ? onion-head48

 

又要再講 : 開心的時間過得特別快,係時候又要講Bye Bye !!  今個旅程帶著了愉快及特別的回憶離開沙巴,期待著我們6月的下一個南非旅程~~

monkeys12 monkeys12

我地乘搭國泰港龍的KA06航班飛返香港 ~~

上機了 ~~ 沙巴再見 !!  感謝沿途的你及妳們 !! yxh27

上機做乜最好,大家睇相就知啦……!!  邊個咁無品偷拍? onion-head74 航班中午12點25分起飛,下午3點15分安全抵達香港 ~~

全篇完 !! 感謝收看!! onion-head19

 

 

參考資料 (6天每團友的沙巴洗費) :

港龍來回機票 + 5晚渡假酒店 : HK$3958

6天11座租車費用連保險 :HK$456

膳食 + 浮潛 + 蒸氣火車票 + 激流泛舟 + 油錢 + 當地導遊費 :HK$2100

Total : 每人HK$6514

 

當地團費:

Day 2 Mamutik小島浮潛團 -RM181 (RM170 + 6% GST)

Day 3 北婆羅洲蒸氣火車之旅 – RM380

Day 5 激流團 – RM164 (RM155 + 6% GST)