曼谷考艾5天遊2018

泰國係香港人嘅熱門旅遊地, 亦都係我哋谷主咖喱姐經常到訪嘅地方之一, 除咗呢度係掃貨勝地,做spa天堂之外,仲有一個鮮為人知嘅原因 ,原來喱姐二哥長期在曼谷公幹,今次泰國之旅還可以順路深入泰國民居,到訪喱姐二哥一家。 如果大家有留意喱姐嘅遊記,泰國遊記至今已經寫過四篇,每一篇都有獨特嘅主題,今次亦都唔例外,我哋會重點去一個新嘅旅遊景點「考艾」。 考艾國家公園係泰國首座國家公園 (1962年成立 ),離曼谷180公里,開車前往約需2至3個小時,公園面積 2168平方公里, 足有兩個香港咁大,並且在2005年列為世界自然遺產。由於考艾景點分散,每個景點相佢距超過十公里,交通不算方便,為咗使到我哋能夠喺最短時間裏面遊覽最多地方,喱姐選擇咗包車,不過只係包頭兩日,完成咗考艾行程後,我哋仲會喺曼谷多玩兩日,第五日便會乘早機返香港。

以下係我哋嘅曼谷考艾五天遊行程 :

Day 1 (3/1/18 Wed) :
香港 ✈️ 曼谷 – 香港航空HX771
– 薩拉武里向日葵田 (Saraburi Sunflower Field)
– Chocolate Factory
– Thames Valley Khao Yai

住宿 :考艾Botanica Khao Yai Resort

Day 2 (4/1/18 Thu) :
Piazza Palio
–  Primo Piazza意大利小村莊
– 美酒佳肴考艾酒莊(GrandMonte Valley Khao Yai Winery)
– The Bloom
– Siam Paragon

住宿 :曼谷Somerset Ekamai Bangkok

Day 3 (5/1/18 Fri) :
– Pratunam Market批發市場
– 水門街批發集中地(Platinum Fashion Mall)
– Asiatique夜市

住宿 :曼谷Somerset Ekamai Bangkok

Day 4 (6/1/18 Sat) :
– Chatuchak週末巿場
– Siam Square One 
– Big C超級市場

住宿 :曼谷Somerset Ekamai Bangkok

Day 5 (7/1/18 Sun) :
曼谷 ✈️ 香港 – 香港航空HX768

喱姐比我哋早一日去到曼谷,因為喱姐約咗佢二哥食飯,所以首先交俾喱姐分享一下佢頭一日嘅曼谷行程 (紫色字) ↓↓

好快又到咗一年一度我嘅例牌曼谷探親之旅喇!今日趁我另外4位團友,細孖、發哥、Jenny 和 Karen未嚟到曼谷之前,我就同蝦子餅緣人兩個先hea一日,而主要嘅精彩行程當然要等埋佢哋4人明天到咗曼谷先一齊去啦,所以我哋兩個今日嘅節目都係無無聊聊,行吓街,行吓商場咁囉 !!
crazy monkey 076

趁我二哥今晚冇其它應酬就約佢一齊食晚飯聚一聚,行街行到傍晚等我二哥收工之後就馬上來接我哋2人去唐人街掃街!😋

世界上所有的唐人街都有中國建築師的建築、餐館、廉價的住宿、生活和銷售場所。但這個曼谷唐人街非常不同,位於泰國黃金市場中心,有很多街頭食物可以選擇。  他們幾乎什麼都賣,海鮮、湯粉、烤麵包、芒果糯米飯、榴蓮等等,所以每個人都能找到一些自己想食嘅美食,大多數攤位都營業至凌晨2點 ~~

呢一檔曼谷地道「豬什胡椒湯粉」係我二哥嘅至愛之一,所以佢專誠帶我嚟試吓,個湯底果然有好香嘅胡椒味,飲落仲有好勁嘅胡椒辣味,都幾好食!

之後我哋3人就行咗去一間舊上海嘅bar飲咗杯野傾吓計 ~~

望一眼企喺bar門口招客嘅呢位我好肯定佢唔係真女人,不過喺泰國好普遍嘅啫,大家明㗎啦!嘻嘻!crazy monkey 096

同我二哥短聚之後我哋就要返酒店休息喇,準備明早出發去曼谷機場接佢哋機,然後就開始我哋考艾嘅2日行程。 Jenny & Karen係第一次跟我出外地旅遊,非常之期待呀 !! 期待同佢哋一齊喺曼谷同考艾共渡快樂嘅時光。 咁以下5天嘅遊記就交返俾細孖繼續用佢一貫活潑生動嘅文筆同大家詳細分享 ~~

crazy monkey 007

Day 1 (3Jan2018) — 

一如既往,喱姐同佢嘅蝦子餅緣人早我哋一日到達曼谷,打點一切。我哋一行四人,乘坐港航HX771 的班機,7點55分香港出發,10點10分準時抵達曼谷機場。 剛出機場, 便望見喱姐, 一句「大家早晨」後, 佢二話不說,拎起手機,為我們來一張大合照, 大家都見慣大場面,不約而同的展示出二號手勢,一號笑容。從右至左,拉著黃色喼的是發哥,跟住係Karen,Jenny 同埋細孖 ~~

加埋喱姐夫婦,一行六人,徐徐登上已在路邊等候的商務包車,開始出發去考艾~~

crazy monkey 148

「㗎車OK嗎?」 喱姐習慣性咁問 ,「好正 !」Jenny 習慣性咁答,確實,車廂十分寬敞, 明亮舒適,好正 !!

呢位泰仔師傅手車,又平穩又安全,大家都好滿意 ~~

話明係美食之旅,自然要留肚,緊係唔食港航嘅飛機餐啦 !!  車行冇幾耐,就到達咗一間好地道嘅美食廣場 ~~

美食廣場裏面乜嘢泰式地道小食都有得食,而且價錢平到估佢唔到 ~~

水果,雞飯,甜品,各樣小食應有盡有 ~~

每人先來一碗泰式魚蛋粉, 然後係白灼豬雜, 牛腩, 香蕉煎餅 ,炸雞翼…… 。魚蛋彈牙嘅, 可惜份量太少, 豬什等其他跟香港食嘅差唔多,冇乜驚喜。 精彩嘅係泰式小食 ,砂糖 ,椰漿 , 椰絲,花生 ,伴著薄薄香脆嘅薄撐, 好食得嚟又唔飽肚 ,正 !!  生果切粒 ,伴埋啲話梅粉嚟食,味道古怪香甜。今餐雖然普通,勝在特別,有8分 !!

我哋嘅主菜泰式魚蛋粉 ~~ crazy monkey 203

我哋嘅特色小食 ~~ crazy monkey 102

食飽咗沿著公路繼續向考艾進發,好快就到咗第一個景點Khao Yai Panorama Farm (巴沖蘑菇農場) ~~

這個巴沖蘑菇農場只有幾個小的種植蘑菇棚,不過唔需要買門票入場 ~~

可能時間唔啱,見唔到食用蘑菇,不過有喱姐, Jenny ,Karen 呢啲咁好玩嘅腳,人肉蘑菇一樣玩得好開心 ! crazy monkey 040

邊行邊玩,時間過得特別快,不經不覺, 下午3點鐘我哋已經進入咗考艾範圍,師傅由大路轉入小路,車速減慢 ,唔使講已到咗另一個景點 ~~

呢度就係著名嘅薩拉武里向日葵田  (Saraburi Sunflower Field) ~~

花田超大,我哋冇辦法徒步行完,師傅將部車停喺其中一個重要嘅打咭位,俾我哋慢慢影,慢慢欣賞一望無際嘅向日葵花海 ~~

為咗令大家有置身向日葵花海嘅感覺,喱姐用佢尊業嘅旁白,為大家拍咗呢段短片,請仔細欣賞 !!

例牌先來張大合照 ~~

Jenny外號女孫悟空,唔跳唔舒服, 有個咁靚嘅台, 少不免露番兩手 ,不過確實又影得幾靚 ~~

有圖有真相, 啲花比個人頭還要大 ~~

為咗方便遊客打咭,花田喺唔同嘅地方,加上幾個人工擺設, 呢部風車就係其中之一個 ~~

男嘅木木獨獨,女嘅笑得自然, 一睇就知邊個係主角啦 !!

美女遇著花,點捨得走,單人,雙人,團體,特寫, 靜態,動態,足足搞咗成個幾鐘 ~~

Jenny同Karen兩個係親戚,大家估唔估到佢哋係乜嘢親戚關係呢?

眾里尋她千百度,驀然回首,喱姐卻在葵花稀疏處 ~~

「跪低影靚啲 ! 」 一聽見靚啲,三位靚女立即齊齊跪下,終於拍咗呢張相, 跪低影係咪靚啲呢?

緣人一向低調,求其影咗兩張集體相,百無聊賴,四圍覓食,終於俾佢搵到檔超正嘅椰汁,唔知店主點樣將成個椰青連埋椰肉,抽出嚟放喺杯裏賣,又清涼又好味。一人一杯,嘆住椰青嘗花田,等幾位靚女影靚相 ,又唔覺悶喎 !

由於行程實在太豐富,唔能夠俾三位靚女無止境咁喺花田影相,再三催促下,佢地無可奈何 ,懷著依依不捨嘅心情離開花田,向另一個景點進發。 好快就嚟到今日嘅第4站,朱古力工廠 (Chocolate Factory) ~~

Jenny :「 我嘅膚色,係咪好襯呢間朱古力工廠呢?」(設計對白)

朱古力工廠,並唔係得個名, 入面真係有一個好大嘅工場不斷製作各種朱古力產品㗎 ~~

如果有時間同埋有興趣,甚至可以喺度參加朱古力嘅製作課程 ~~

五花八門的朱古力產品,琳瑯滿目 ~~

輸人唔輸陣,呢度啲朱古力味道好唔好就唔知,但係包裝設計就真係一流 ~~

朱古力果然係魅力沒法擋, 睇返三位靚女影得咁開心,真係後悔當初冇影埋一份 ~~

玩咗成日, 包車師傅知道我哋肚餓,傍晚5點就馬上將我哋送到食晚飯嘅餐廳 ~~

估唔到原來餐廳範圍又大又靚,仲以為去咗歐洲莊園,一場嚟到,梗係要趁著太陽落山前,行個圈,影番輯夕陽下的莊園 ~~

呢張相原本係影Karen嘅,但係細孖同發哥兩個喺前面擋住晒,真係唔通氣,記得下次醒少少 !!

當然呢個電話亭就成為咗靚女們嘅打咭點之一啦!

西式小屋,加埋盞燈,真係好似去咗歐洲咁 ~~

本來毫不起眼的玻璃球裝飾, 在香港商場隨處可見,但放在不同的環境, 和不同的朋友一起, 用不同的心情去看, 效果竟然如此不同。 大家拿起相機,對著自己的影像, 興高采烈,拍過不停 ~~

但係我哋係水晶球嘅大合照, 要放大先睇得見喎 !!

呢的迷宮式嘅園林,係咪好有歐洲風味呢?

喺香港食晚飯,習慣咗趕頭趕命,又要分時段,又要等位,呢度同香港相比,簡直係天堂與地獄,座位又多又闊落 ~~

「呢個位置靚, 幫我影返張 !」 Karen 首先發現呢個打咭位 ~~

Jenny話 :「我又要影」, 喱姐話 :「我都要影」,緣人正想行開,但已經太遲啦,最後都係乖乖地坐埋位,影咗呢張靚靚合照~

我哋揀完又揀,終於揀咗一個對住花園嘅靚位嚟坐,呢啲先叫做識嘆嘛 !!

食物有西式又有泰式,可能已經好肚餓, 唔記得係咪特別好食,但係個環境就真係冇得輸 ~~

食飽後,話咁快就返到酒店,呢間渡假酒店 “Botanica Khao Yai Resort” 係喱姐精心挑選的。房間大得嚟又整潔 ,整潔得嚟又有個大露台,露台外仲有個浴缸 ,可以對住個花園浸天光。可惜我哋到達嘅時間已經天黑,要瀏覽整間酒店嘅設施就要留返明早先喇 ~~

露台下望就係其中一個園林泳池 ~~

今日行程匆匆,只食咗兩餐,以喱姐美食團標準嚟計,係有啲失色,好彩今晚仲有宵夜 ~~

我哋將香港帶嚟嘅兩支梅酒,同埋大包細包小食攞到去池畔開大食會 ~~

池畔餐廳,有枱有櫈,兼有園林美景,但應該已經過咗營業時間,我哋實行搞搞震冇幫襯,係咁倚問下,就大無施樣咁坐喺度開party ~~

飲下,食下,吹下,唔經唔覺,已到咗深夜,第一日嘅行程,就係喺半醉嘅歡樂笑聲中完結 ~~

crazy monkey 073

 

Day 2 (4Jan2018) — 

今日行程緊湊,一共有5個景點 : 參觀義大利村Piazza Palio》 參觀Grand Monte Valley酒莊,喺酒莊享受午餐 》參觀The Bloom花田 》到曼谷享受平靚正嘅海鮮大餐 》 腳底按摩。

一大清早,當眾人仍在睡夢嘅時候 ,喱姐已經拎起相機, 把酒店內外景觀一一拍下,方便日後寫遊記之用,我哋今次呢輯遊記有咁多靚相, 全賴喱姐嘅努力 ~~

終於天光可以望清楚個酒店房露台嘅浴缸喇 ~~

一覺醒來, 發覺Resort比想像中還要大,環境咁優美, 泳池,gym room,一應俱全 ~~

酒店大堂 ~~

從房間到餐廳必經嘅通道 ~~

露天泳池 ~~

除咗喱姐,原來細孖都有早起, 一個人獨佔了整個泳池,優哉悠哉。 又話泰國唔凍嘅,原來1月份只得十幾廿度,差啲冷親添 ~~ crazy monkey 088

健身室嘅設施都好齊備 ~~ crazy monkey 129

餐廳戶外座位 ~~

天氣涼爽,大多數人都選擇在戶外進食早餐 ~~

早餐係中泰fusion混合式,唔算得特別豐富,但係勝在環境舒適,今朝游水消耗大,要食番多啲 ~~ crazy monkey 072

包車遊嘅好處就係一日可以跑多個景點,鍾意幾時停就幾時停,鍾意幾時走就幾時走,慳番好多時間。 講吓講吓,早上1045師傅已經把我哋送到意大利村Palio。Jenny同Karen 第一時間落車,擺出歡迎我哋光臨嘅甫士 ~~

Palio意大利村聽說是模仿意大利中部小鎮拿玻里而興建的。 它佔地廣闊,有無數的歐洲建築物和小店,街道和園林都建造得一絲不苟,包裝得美輪美奐,雖然明知身處泰國,依然有身在歐洲小鎮漫步的感覺 ~~

老規矩,入口處先來一張大合照 ~~

咦 ! 今日細孖同發哥撞衫添,差啲俾人當咗我哋係大細孖 ~~

今日個天好藍,係呢度隨便影都咁靚 ~~

如果遊客想住喺呢個意大利村裡面都可以,Palio Inn係其中一間村內小型酒店 ~~

陽光普照,氣溫只有20多度,在充滿異國風情的建築群裏,大家的心情都特別好,不停咁影靚相 ~~

我哋兵分幾路,自由自在地在大街小巷裏穿梭,行到攰,就在小店坐低,嘆杯雪糕,食件餅,優哉游哉慢慢遊,發哥和我最鍾意慢,啱晒心意 ~~

用iphone手機影全景,喱姐至愛 ~~

一埸嚟到,點都要影番張,乜影得細孖咁似馬雲嘅? 不過似佢都唔錯吖,哈哈 !!

靚女們一時衝上二樓影全景,一時跑落樓下小店shopping, 個個位都係打咭位,個個位都靚,真係影到唔停得手 ~~

小巷小店售賣各種不同嘅紀念品 ~~

小店偶遇 ~~

就連路邊的一張小櫈,都好有藝術性 ~~

集藝術、飲食、音樂、商店於一身的小巷,無論你是男、是女、是老、是幼,都總會找到啱自己睇嘅嘢 ~~

呢個係至靚打咭位,逆光拍,早上陽光拍到個人綑晒金邊,好靚 !!

「 呢度ok嗎?」喱姐問,「好正 !」今次發哥答得好快。 對話依舊冇乜新意,但係喺泰國漫遊歐洲小鎮就的確好有新意, 各團友都影到心滿意足地離開呢個意大利小鎮。 意大利村附近仲有另一個要買門票的小景點”Primo Piazza” ~~

Primo Piazza門票是大人200泰銖,小孩100泰銖,五歲以下的孩子免費入場,票價包含一捆用來餵羊的草。 餵養綿羊以及羊駝對小朋友嚟講應該係一個好有趣嘅體驗,可惜我哋興趣不大,所以只喺門口影吓後花園吧了 ~~

不過Primo Piazza嘅後花園都幾有睇頭 ~~

中午時份我哋就去到另一個景點”GrandMonte Vineyard葡萄酒莊”。 考艾地區的葡萄酒,近年在國際間越來越受歡迎 ,而GrandMonte Vineyard酒莊亦係東南亞最大嘅葡萄酒莊之一,年產60萬瓶,近年在許多國際大獎中獲獎,不少外國媒體更將考艾地區譽為泰國的波爾多 ~~

未見酒莊,先見葡萄園,可惜時值冬季,並唔係葡萄盛產嘅季節,不過廣闊嘅葡萄園,依然有另類嘅美,另類嘅吸引力 ~~

酒莊門口搭設咗打咭位,供遊客拍照 ~~

呢啲打咭位喱姐同埋Jenny又點會滿足呢? 佢哋望都唔望吓人工嘅打咭位,就跑咗入葡萄園, 搵呀搵,終於搵到幾株仍然翠綠飽滿嘅葡萄,於是,齊齊脫去外衣,跟葡萄來一張大特寫,係咪好靚呢 ?

人同葡萄,邊一個先至係真正嘅主角?

雖然過咗葡萄成長季節,但我哋仍然可以搵到幾棵晶盈飽滿嘅葡萄 ~~

呢度唔少嘅酒都攞過大獎。 緣人一面品酒,一面同我哋解釋品酒之道,點樣揸杯,點樣飲,原來有規有矩,但係好似冇乜人理佢 ~~

我哋求求其其試飲咗幾隻唔同嘅酒,就走返出去拎起支紅酒影返張扮嘢相,志在返香港呃like ~~ crazy monkey 040

發哥見到支得獎紅酒便愛不釋手,雖然開價過千港元,結果唔使講都買咗。一個得酒,一個得錢,老闆同發哥 一樣咁開心 ~~

然後就行咗過去酒莊另一邊,就係酒莊餐廳嘅位置 ~~

酒莊餐廳旁邊有一條河,現場睇好似冇乜特別,但係影出嚟又幾靚喎 !!

酒莊環境咁靚,梗係要坐喺河邊,一邊嘆番支酒 ,一邊享受呢度嘅美食啦 ~~

睇住美景吹下水,真係好寫意 !  呢啲咪就係咖喱團嘅特色囉 !!

昨晚食咗泰式嘅晚餐,今日午餐改食意大利餐配酒莊出產嘅rosé餐酒都唔錯 !!

「 起程啦,今日仲有好多節目㗎 !」 當大家仍沉醉於美酒佳餚嘅時候,喱姐將我哋從夢中叫醒,還是起程吧 ! !

crazy monkey 157

離開酒莊,車行不久,便到達另一景點 “The Bloom”花田,在停車場遠處,有一排色彩繽紛的小別墅 ~~

呢兩個歡迎公仔,顏色鮮豔好搶眼 ~~

要收費嘅遊覽車,一場嚟到,冇理由唔坐嘅 ~~

The bloom花田都幾商業化,好多人工搭嘅影相位 ~~

又係嗰句,iphone影全景冇得輸 ~~

景點雖然比較人工化但勝在色彩鮮豔,仍然吸引到一眾女團友拍完又拍 ~~

最後發哥終於畀佢哋嘅歡樂童真所感染 ,拎起個大蘿蔔,在太陽伯伯見證下,影咗張笑得燦爛 ,充滿童真嘅相 ~~

夕陽西下,兩日嘅考艾行程,終於結束。 師傅開車送我哋返到去呢3晚下塌嘅曼谷Somerset Ekamai酒店 ~~

Somerset Ekamai 雖然冇考艾度假酒店咁大 ,但係麻雀雖小五臟俱全,一眾酒店設施應有盡有,以下係酒店大堂 ~~

房間都唔細,有一睡房加一個廳 ~~

仲有埋開放式廚房同洗衣機, 可惜我哋行程緊湊,冇機會用到呢啲設施 ~~

我哋辦好check in手續後,喱姐馬上帶我哋嚟到呢間佢極力推薦嘅海鮮餐廳”Laem Cha-Roen Seafood” ~~

呢間餐廳有乜好?平,靚,正囉 !!

咁食物係咪好正呀?  其實真正嘅味道,比相片所見的更好,價錢又唔貴,下次來曼谷一定要再試 ~~

飯後再落去Siam Paragon嘅美食廣場試埋泰國必食嘅芒果糯米飯,加上椰汁同埋脆脆嘅綠豆粒,好地道,正呀 !!

仲有呢啲又睇得、食得、玩得嘅綠豆蓉小甜品 ~~ crazy monkey 003

玩完食完,再做返個腳底按摩, 乜嘢疲勞都冇晒 ~~ crazy monkey 076

 

Day 3 (5Jan2018) — 

我哋今日曼谷市內嘅行程 : Pratunam Market  》Platinum Fashion Mall 》Siladon Spa 》Asiatique

由最近酒店嘅Ekkamai站出發,搭BTS去到Chit Lom站,然後慢慢行去尋找隱世嘅地道早餐 ~~

經過兩日考艾緊湊嘅行程,今日係曼谷市內遊, 可以輕鬆吓 ~~

我哋安步當車,沿著鬧市行 ~~

經過曼谷君悅酒店 crazy monkey 168 旁邊就係曼谷最著名嘅四面佛廣場 ~~

今日主要帶大家去濕平同做spa,咁當然要準備大量嘅彈藥先啦,所以第一站先去兌換泰幣。呢間嘅匯率唔錯 !!

然後再經過喱姐最喜愛超市Big C Supercenter,有興趣買泰國零食、醬料、即食麵等等,呢度一應俱全 ~~

繼續沿住天橋行過去水門市場(Pratunam Market)嗰一區 ~~

呢區就係”水門市場”, 一間一啲都唔起眼嘅地道小店,門口竟然排咗長長嘅人龍,我同發哥馬上走去龍尾排隊,喱姐匆匆走過對面馬路為我哋拍下這張歷史嘅見證 ~~

食咗乜嘢?每人一碗豬油撈麵,配上叉燒同埋雲吞,另外加鹵水豬什,好好味 ~~

未完,仲有第二個早餐, 就係隔幾間店嘅地道魚蛋粉, 雖然都係咁好味,但係冇諗過會連續食兩個早餐,真係飽到呢 !! crazy monkey 181

進入水門批發市場, 一路睇一路買果汁、水果 、零食, 絕對係「食力」嘅一個嚴峻考驗 ~~

又熱又口渴,有冰凍嘅鮮搾橙汁,緊係買番支,可以邊行邊飲 ~~

「邊似橙汁?其實我就覺得佢係桔仔 !」喱姐反應快,講咗大家心中想講而口中未講嘅話 ~~

呢隻香水小菠蘿,喺香港買成十蚊個,呢度半價都唔使,唔食就笨 ~~

水門街對面嘅Platinum Fashion Mall先係我哋今日掃貨嘅目的地。由於我哋應承咗香港行山嘅幾個朋友,買一套相同顏色嘅戰衣一齊著去行山。 但係一次過要買咁多件,每件唔同嘅碼,又有咁多種款同顏色要揀, 肯定並唔係 2、3 個小時可以搞掂嘅任務。結果足足用咗成個下午先至買齊晒16件戰衣 ~~

「仲辛苦過去行蚺蛇尖呀!! 」 Jenny邊行邊自言自語 crazy monkey 217

「慢」遊有「慢」遊的樂趣,安步當車,行商場行到攰了, 坐下來嘆杯雪糕,多麽寫意 ~~

曼谷素有東方威尼斯的美譽,市內運河(Khlong Seen Saep),除了有供遊客觀光的船外,還有不少渡輪是曼谷市民上班、上學、的交通工具。 水門碼頭,是乘坐長尾船觀光船的一個熱門轉乘站, 我哋今次冇坐船,喺橋上遠望,依然可以感覺到曼谷水鄉風情 ~~

行行買買食食,好快又到咗中午,水門街海南雞飯咁有名,冇可能唔試。於是乎今日嘅第四餐正式開始,我同發哥有吉隆坡3日19餐嘅經驗,當然唔會有咩問題啦,但側頭一望,見到Jenny同Karen面有難色,知道係時候要出手幫忙 ~~

我哋六個人,只係叫咗四個人份量,半隻雞、4碟飯、一碟雞雜再加幾碗湯就算數, 好明顯有兩個人係冇乜食過 ~~

食飽雞飯之後Karen見到街邊賣嘅小菠蘿又忍唔住買嚟食 ~~

Siladon Spa喺另一區,我哋一樣係搭BTS前往,都幾方便 ~~

呢間Siladon Spa係喱姐精選推介,今日仲有買一送一, 我哋六個人剛好用盡啲著數 ~~

室內環境清幽,感覺好舒服寧靜 ~~

呢個泰式油按十分講究,有不同氣味的香油可供選擇,按摩手法也很尊業, 經常問我哋嘅感受而調整力道,按咗冇幾耐,感覺到旁邊的發哥好像已進入夢鄉。做完spa之後,仲有小食供應,如果10分係滿分,我會俾9分呢間spa ~~

做完spa後已近黃昏,我哋朝著今日最後一個景點Asiatique夜市進發 ~~

來Asiatique最方便的方式就是:搭BTS到Saphan Taksin站,再轉免費的Asiatique接駁船!抵達BTS Saphan Taksin站後往碼頭走,一路上就有Asiatique免費接駁船的指標,大約每15分鐘一班,有時候人多要排隊,大約10分鐘船程就可以抵達 ~~

未到Asiatique, 在河上已經俾佢迷人嘅夜色所吸引 ~~

Asiatique 前身為泰國港口,其後當局把荒廢的港口翻新,把舊倉庫發展成今天的夜市。現時有十個倉庫,每間倉庫可以容納近百間商店,當中有大型連鎖店,也有地道工藝品小店。靠近摩天輪的一區,是美食集中地,各式小食、飲品、西餐廳, 應有盡有。在特別的日子,摩天輪區不時會舉辦大型活動, 足以使遊人在此消磨一整個晚上 ~~

呢度嘅T-shirt超抵買,我都唔執輸,買返兩件戰衣 ~~

都唔知點解啲女人咁鍾意睇小飾物 ~~

炸昆蟲,睇見都毛管棟, 你食埋我份 ~~

一輪瘋狂購物之後,大家都腳攰肚餓,係時候到美食區醫肚 ~~

花多眼亂,還是選擇了泰式食物, 除咗冬陰功湯 ,其他菜式中規中矩,唔能夠講有好大嘅驚喜 ~~

晚飯後個個都感覺睡魔急call,一於返酒店休息 ~~

crazy monkey 073

 

Day 4 (6Jan2018) — 

發哥、緣人 、細孖3個一早起身,翹埋對手排排坐,做乜? 原來佢哋要展示昨晚嘅戰利品,呢幾件T-shirt係咪好醒神呢 ~~ crazy monkey 146

今日行程簡單,除咗探訪喱姐二哥一家,主要都係去週末市場購物 ~~

早上8點出發去Thong  Lo嗰區食個地道早餐先,呢間最出名係食泰式海鮮炒金邊粉~~

隔離仲有檔芒果專門店, Karen正餐唔食得多,但係食水果和甜品就好似唔知飽,自然又買,買,買 !!! crazy monkey 079

約咗喱姐二嫂、姪仔同姪女喺週末市場”Chatuchak Weekend Market”見面,咁難得緊係要影番張合照啦 !!

呢個週末市場大到好得人驚,聽講話有N個足球場咁大,只係星期六先至開放, 又係乜都有得賣,乜都有得食 ~~

呢款地道椰子雪糕,賣相新奇,味道可口,連埋個椰青一齊食,一場嚟到唔可以唔試嘅 ~~

由於興趣唔同,我哋男嘅一堆 ,女嘅一隊,各自各精彩 ~~

市場內尤如迷宮,根本無辦法辨認方向,我同發哥跟住緣人,行極都唔知行咗去邊 ,喺又熱又攰嘅情況底下,無可奈何走咗去按腳,抖一抖 ~~

正當按到舒適處 ,喺差啲瞓著嘅時候, 喱姐和其他兩個女團友突然開門進來,點解佢哋三個識得嚟呢度搵我哋嘅 ?  我諗咗大半年,至今仍然係一個謎 ~~ crazy monkey 189

午餐,簡簡單單,地道魚蛋粉 ~~

不過呢檔嘅魚蛋型狀好特別,仲好有魚味添,好正 !!

週末市場啲女團友買到一袋二袋, 行到傍晚連鐵人喱都嗌攰, 仲邊有心情四圍搵食吖!! 好彩喱姐早有安排,跟住佢去到Siam區再搵食 ~~

我哋今晚嘅晚餐就喺Siam Square One嘅5樓呢間舒舒服服嘅餐廳搞掂 ~~

知道發哥鍾意食雞, 呢隻泰式燒雞,希望滿足到佢啦 !!

食飽飯就輪到今個團嘅最後一個節目”深入曼谷民居家訪”” 。 喱姐二哥一家就住喺Ekammai區一間由公司提供嘅豪華住宅 ~~

頂樓係住客會所,從會所下望, 市中心夜景,一覽無遺 ~~

會所內部,亦都裝修得美輪美奐 ~~

家訪完後,我哋今次嘅曼谷快閃四日遊,亦都差唔多完結,明天一早就要搭飛機返香港喇~~

 

Day 5 (7Jan2018) — 

退房之後坐的士去機場, 我哋乘搭香港航空HX768班機,早上0850起飛,下午1240返到香港, 曼谷考艾之旅亦都順利完成 ~~

而喱姐同緣人就搭國泰航班飛回香港 ~~

結語: 曼谷考艾2018,係喱姐第五篇泰國遊記,好多謝佢安排咁好嘅行程俾我哋,讓大家留下美好嘅回憶。喱姐熱愛旅遊,carinekok.com  亦都係佢多年嘅心血,今次有幸能參與其中,再次感謝佢嘅信任,希望日後仍能繼續共享旅遊樂趣,繼續再此跟大家見面 !!

 

crazy monkey 192

 

13 thoughts on “曼谷考艾5天遊2018

  1. 第一次同咖喱去Trip正到不得了,唔駛用腦, 大小事務安排周到,今次去泰國考艾啲朋友睇完相都話我唔似去咗泰國 ,考艾呢個地方真係好正,天氣又好,一啲都唔熱,而且風景又靚。 估唔到細孖嘅文筆在咁了得👍 總之呢個旅程住得舒適、玩得招積、食得出色。

  2. 雖然短短的五日旅程,依然行程豐富。
    考艾真係一個好有特色嘅地方,值得一遊,在細孖流暢筆下描述,彷如置身其中。
    在此更要多謝喱姐在旅程中抽空替我們精心挑選的蘭卡威戰衣。

  3. 曼谷都去過無數次,一般都是去shopping同hea。今次有幸能跟咖喱團去不一様曼谷考艾團感覺好充實, 可以舒服咁包車去到考艾,自由自在去到邊停到邊,又無唸過泰國可以有咁多特式旅遊景打咭點。好多朋友都問我考艾在邊架?好靚喎,介紹下!跟住回到曼谷咖喱又帶我哋去食地道美食,真是好高興又好運氣可以認識到咖喱!另外團友發哥、緣人我都是第一次認識,都是好玩得之人。由細孖寫遊記及咖喱靚相片令我又可以回味一番。 期待吉隆坡之旅又可以一齊玩過食過,正呀!

  4. 短短的5日4夜行程!行程緊湊!集遊覽、購物、按摩、家訪、品酒、美食放旅程當中。
    考艾這個地方好靚完全唔似泰國!睇喱姐遊記增廣見聞!
    下次去泰國又多一個地方可以去了!

  5. 睇番遊記,考艾的相好靚,色彩繽紛,而且景点都很有特色,非常值得推薦這地方,希望有機會重遊。我知道點解我哋去了咁隱敝嘅按摩店,仍然被人找到,一定係喱姐装咗GPS係緣人身上。還記得我打包醬汁返香港,酱汁非常好味,海鮮平靓好味。各位朋友,自己组團去啦。好回味

  6. 各位好,

    可以提供包車資料嗎.. 考慮9月跟喱姐行程去 考艾玩下.
    另外,18年11月話喱姐介紹, 去台灣找劉師傅包車去宜蘭. 劉師傅真係無得頂.
    好細心,我們一家老中小都玩得好開心. – 再次多謝各分享, 另我可在這裡找到實用資訊.

Leave a Reply

Your email address will not be published. Required fields are marked *