【蘭卡威】上山下海深度遊 – 上集

遊記正式開始之前咖喱我首先要多謝團友兼好腳之一嘅Winnie!! 多謝Winnie抽出佢寶貴嘅時間幫咖喱手寫呢一篇咁精彩搞笑嘅蘭卡威遊記,能夠再邀請到Winnie參與遊記嘅製作實在係咖喱的榮幸以及所有Carinekok.com讀者嘅福氣,以下文字部份就交俾Winnie去為大家敘述整個蘭卡威上山下海旅程的點點滴滴 ~~

今次的旅程陣容鼎盛,亦都係喱姐第一次帶咁大班團友浩浩蕩蕩咁一齊去玩。 我們分四隊先後出發往吉隆坡,第一隊隊員包括喱姐及緣人夫婦,他們早我們一天先出發飛往老家吉隆坡。 第二隊隊員分別為大隊長 (Albert)、Gary、發哥、細孖、馬生 (Samuel)、David、小魚兒、Jenny、楊仁 (Boyle)及我 (Winnie),我們Day 1於吉隆坡集合後轉機飛往蘭卡威。 而第三及四隊於我們行程第五天才加入行程中最後的三天吉隆坡快閃遊。第三隊隊員有牛嫂 (Jennifer)及Karen,而最後的第四隊隊員有仁哥及彥哥,所以Day 5飛到去吉隆坡時我們團友就一共會有16人 ~~

 

Day 1 (9Jan2019) —

第二隊由大隊長帶領我們10人出發,我們約了早上7am喺香港機場Terminal 1 馬航航空公司D櫃位集合,當日大家都好準時,過程亦都好順利。我們乘搭馬航MH079早上08:45的航班前往吉隆坡與喱姐會合。 飛行時間約3小時40分,到埗後在機場辦理入境手續前要先買張上網咭,Digi網絡於吉隆坡接收的訊號較為好,7日無限上網data咭為馬幣RM20一張。我們10人將電話放在櫃檯上讓職員幫手處理,數分鐘就換好上網咭了 ~~

約30分鐘才辦理完成入境手續,過咗關已經係下午1:30pm,提取咗托運行李之後就喺接機大堂與喱姐同緣人會合, 然後我們一行12人乘搭機場快線前往另一個航廈KLIA2預備轉乘亞洲航空內陸機飛往蘭卡威 ~~

當日選擇坐廉航AirAsia係因為佢航班嘅時間較好,可惜平嘢無好嘢係一個永恆的定律,航班時間被Air Asia一改再改,每次都要喱姐親自到吉隆坡Air Asia counter再改時間。被改動之後嘅航班時間應該會導致到我們錯過了原定於酒店賞日落嘅機會😭! 廉航就乜都要自己搞掂,好在有喱姐,自己托運行李零難度! 寄好行李已經是下午2:10pm了。 肚餓了!要搵食!喱姐帶我們去了機場內的「南洋食苑」食一個較為地道的馬來西亞風味午餐,機場內食到這些美食不過不失 ~~

不消半小時大家食飽了,唔好浪費時間,喱姐就帶我地去機場逛逛。 馬幣按原定行程是明天於蘭卡威兌換,佢好細心知我地無馬幣所以預先每人借了RM100俾我地班「濃丁」濕平。 喱姐先帶我們去了幾間賣衫褲鞋襪的當地牌子店舖逛逛,衣物的價格確實相當之吸引!

最後發現了呢間店的太陽眼鏡做緊大特價RM9一副,平到咁唔係唔買呀?大家都好努力試完一款又一款 ~~

之後再去了一間超市,下個月5號就是農曆新年,超市都擺放了各種的賀年糖果!喱姐極力推薦這個品牌的辣蝦米春卷,我們有理由相信喱姐將會收到豐厚的佣金,所以各人都買了幾盒 ~~

夠鐘啦!要行去閘口準備登機了!抬頭一望屏幕整個屏幕顯示的航班都是AirAsia的航班,細問下才發現KLIA2是AirAsia專用的,實在有點誇張!

往蘭卡威時機上望到呢個地方一層層咁的,實在太靚又特別,不過唔知係邊到呢?

我們乘搭AirAsia下午5:45的航班AK6322,短短的50分鐘航行時間就抵達蘭卡威機場了!

蘭卡威(Langkawi)位於馬來西亞北面,鄰近泰國南部,是馬來西亞最大的一個島嶼,由99個島組成的島嶼地區,當中最大的主島就是叫作Pulau Langkawi (浮羅交怡),因此Langkawi 的中文翻譯就出現了「浮羅交怡」或是「蘭卡威」。蘭卡威是馬來西亞唯一一個免稅的小島,周圍都係免稅店 ~~

落機拎咗行李就去等租車公司安排送架車去機場俾我們。喱姐一見到部車就相當勞氣,同上次去沙巴時的經歷一樣….. 租的車貨不對辦,我們明明係租咗15座的Hiace,但租車公司卻安排咗一輛12座的殘車俾我們,此車殘舊不堪都算,仲要係油缸係無油的(著晒紅燈)真係滴汗!😅  喱姐立即打電話與租車公司的職員激烈理論,最終租車公司答應今晚換一部15座的車俾我們。 無可奈何下!將行李塞晒上車,各團友擠得像沙甸魚般逼在車廂中出發往今晚入住的酒店”Meritus Pelangi Resort”。 下圖點解見唔到Winnie嘅?因為Winnie同咖喱逼住坐喺前座駕駛座位旁邊囉!

沿途想找個油站入一點油,可惜找不到,駕駛經驗豐富的緣人話唔好理,直接駛車到酒店先,如架車行到無晒油就將架車停喺路邊然後call租車公司嚟執手尾!好彩由機場到酒店只係約10分鐘車程,有驚無險地成功將架殘車泊在酒店嘅停車場 ~~

趕到去酒店剛好係日落時分,喱姐叫我們唔好浪費時間等check-in,行去沙灘睇日落先,佢同緣人泊好車之後就會去沙灘搵我地 ~~

急步衝去沙灘但趕唔切睇日落,算吧!來了就影下剪影及團體照吧 ~~

Meritus Pelangi Resort是我們一連兩天入住的馬拉式風格渡假酒店 ~~

酒店大堂 ~~

酒店晚上有live band唱歌。喱姐辦理好酒店check-in就講解一次俾隊友知酒店的設施、住宿位置、早餐時間等…….

因為我們取房時已經天黑了,所以第二朝早先補番一張房間露台嘅相片~~

安頓好行李,稍作休息就出發去食晚飯。餐廳離酒店大約10分鐘的腳程,車無油而且餐廳又唔係太遠所以大家就散步往餐廳。 我們對呢個蘭卡威小島的飲食不能抱有太大的期望,同吉隆坡、檳城或亞庇呢啲馬來西亞嘅其它地方相比,蘭卡威的餐廳選擇真係算少,我們這幾天的膳食都是喱姐刨了多篇網上遊記才搵到比較有名氣及好味的餐廳 ~~

今晚先去「真浪花園海鮮」食晚餐,餐廳門口放了好大隻的虎蝦及各種新鮮的海鮮!

虛有其表,味道一般,我們親自挑選的海鮮明明係新鮮嘅,但上枱時啲海鮮食落就唔新鮮喎,有偷龍轉鳳之嫌!

晚飯後租車公司派職員駛咗部好新淨嘅15座車Hiace到餐廳接我們回酒店換車,大家見到這部15座的私家車非常之滿意,車夠新又寬躺,明天補影一張相再同大家分享。 各自返到高腳屋酒店房休息,今天早機,有點累,早點休息發個好夢,晚安💤

 

Day 2 (10Jan2019) —

昨天早機出發所以喱姐細心安排今日的集合時間為早上11:00,好讓各人多睡一點叉足電去玩。 喱姐已習慣了早起,趁酒店無乜人時拍低酒店的環境及設施作為遊記的紀錄。這是我們住的馬拉式建築酒店房外觀,樓高兩層 ~~

早起的鳥兒有蟲吃!酒店的沙灘除了睇到日落,還可以睇到日出的 ~~

酒店有中 / 西式早餐,中式早餐開放時間是早上7:00am,西式早餐開放時間是早上8:00am,明天的行程要早出發,所以今天我們先試西式早餐,西式早餐仲有香檳任飲添 ~~

估唔到大家都咁早起床,餐廳一開門大家就已經坐定定食早餐 ~~

餐廳對住個椰林樹影沙灘🏖️,食早餐都份外寫意 ~~

話明香檳任飲!早餐點都要斟杯香檳飲唔好蝕嘛!

Jenny悉心打扮襯番酒店的環境,仙女的造型,美人配美景一絕也,馬生唔執輸搶先與仙女合照📷

食完早餐時間尚早,大家自由活動,有啲團友於酒店四周拍照、有啲就享用酒店設施,有的曬曬太陽休息一下 ~~

酒店內的靚景吸引了我們停下來合照 ~~

泳池邊各猛男先來個合照 ~~

無意間影到大隊長跳落水嗰一刻 (下圖) ~~

喱姐、緣人,馬生、Winnie 4人原本喺度欣賞緊幾位猛男游水,突然間發覺泳池中出現咗兩個內地美女 ~~

以下呢位蘭州美女係其中一個 ~~

2位蘭州美女原本喺沙灘影相,點解突然間潛咗去我哋渡假酒店嘅泳池同一眾男團友玩咗上嚟嘅 ?? 何解細孖笑容咁燦爛?一定有古怪!

大家估吓邊個扮演緊狗仔隊埋伏在草叢中,偷拍最精彩一刻?

人哋話去旅行可以深入了解一個人的性格,呢個旅行大開眼界 ~~

唔係咁猴擒呀?!嚟到蘭卡威第二日咋喎!饑餓到咁? 食(識)女無疆界?點識到呢2個女仔㗎?我相信大家都估唔到!原來係細孖今早於沙灘同一對國內女仔搭訕而相識,再一次驗證了「新疆」遊記所提及一詞「老x🐛」~~

水中嬉戲快樂到一個點,就係乜都拋諸腦後啦!一男護兩女,係乜玩法?(有片有真相)

一向木獨的細孖,玩到忘形時會係咁……(亮點自己找)細孖平時一定抑壓得好緊要,一去到外地靚女當前判若兩人,而高大威猛、風流倜儻的發哥立時被比下去!苦笑置之…..!!

蘭州女子雖以寡敵眾,貌似被欺負,實情是開心無比,合照緊係手牽手影先至夠溫馨。 玩到興高采烈,突然酒店保安過嚟查牌(住客證)我們光明正大的住客就當然無問題,逐一拎出住客證,當保安查問這兩個中國女子時,她們大膽到告訴保安人員她們是我們的朋友。最後事實勝於雄辯!酒店設施只供住客使用,酒店保安人員禮貌地請她們離開 ~~

各猛男都到泳池嬉水,唯獨Boyle玩埋啲小朋友玩意,成個大細路咁 ~~

之後各人回房間梳洗,準備11:00am 集合出發去遊覽景點 ~~

左下圖呢一架就係我哋昨晚換咗嘅15座Nissan Hiace喇!

2位蘭州美女得知我們今日的行程係去榴槤瀑布,呢個地方亦係到蘭卡威必到的打咭點之一,所以她們問細孖可唔可以坐順風車一齊去,細孖叫喱姐抄2美女牌再私聊約實時間,她們準時11:00於酒店集合一齊出發。好彩喱姐尋日的激烈理論之後成功換番呢部15座大車,如果唔係今日就無法接待呢兩位靚女喇 ~~

首先去珍南路 (Cenang Road)換馬幣,蘭卡威這個小島的兌換率相對吉隆坡為高,無法啦,點都要換少少錢用,不過今個行程沒有太多購物點所以冇咁傷 ~~

換完馬幣後,開車嚟到蘭卡威漁人碼頭 (Kuah Jetty) ~~

先去旅行社繳交後日Day 4包船出島浮潛的訂金 ~~

喱姐去交訂金,我們就自己四圍逛 ~~

Jenny扮俾鯊魚咬,好明顯交唔足戲,一點恐懼都無!

交咗訂金,由碼頭開車往Eagle Square (Dataran Lang)神鷹廣場,車程約5分鐘 ~~

今日天色好靚,藍天白雲襯托下巨鷹栩栩如生 ~~

“蘭卡威鷹塔”落成於1996年10月,由馬哈地主持開幕典禮後啟用,老鷹雕塑明顯地矗立於海邊占地遼闊的廣場上,主要的含義是希望以老鷹展翅的雄偉之姿,象征著蘭卡威就如高飛的老鷹一般,未來的經濟更加蓬勃發展。 在馬來古文中,Langkawi就是“紅褐色老鷹”的意思,這座塔高45公尺,由大理石雕砌而成的巨鷹廣場,不但是蘭卡威傳奇故事的代表性建築,還隱喻著生生不息的繁榮前景 ~~

今次蘭卡威上山下海之旅團友有12人,如果有一條banner影相就完美了,於是Winnie就上網搵點制作banner,希望可以為團友們留下一個特別的回憶。 香港要印製banner簡單又方便,但必須有一個圖稿。 搵公司設計圖稿Winnie完全無從入手,於是想起萬能的淘寶,果然找到一間製作banner 的商店,商家要求畫出banner的初稿及要印的字,就係咁就促成了Winnie多年來想製作banner的意念。 去到神鷹廣場本來想張條banner交俾喱姐自己打開,等佢有個驚喜,點知我遞俾喱姐時佢話好忙唔蘇我,咁我就唯有自己打開條banner,見到喱姐當時的表情既驚喜又開心,總算無白費到Winnie的心機同一番心意。 驚喜相信係因為banner個主題同喱姐Day 1發喺微信朋友圈嗰輯相片個主題名”蘭卡威上山下海深度遊”係一樣,呢啲咪就係心有靈犀囉!當分享相片後才被發現個banner年份寫錯為「2109」,原來我們去了未來90年後的旅行,寓意大家長玩長有,實在太強喇,哈哈 !!

嚟到蘭卡威打卡景點我們一定要來個大合照 ~~

神鷹廣場外邊售賣紀念品的店 ~~

於神鷹廣場逗留了約40分鐘,已經是下午1:10pm。又熱又餓行出嚟見到有個椰青檔,大家爭相買個椰青解解暑 ~~

蘭州回族美女向細孖展示這幾天佢去過的景點,對住貌美如花的靚女,細孖都被迷得一陣陣 ~~

因為唔知餐廳門口有無位泊車,所以我們步行往餐廳食午餐。而跟我們一起去玩的2位蘭州美女就唔同大家一齊食,佢地喺神鷹廣場附近的快餐店食住等我們一起出發去榴槤瀑布 ~~

今早經過神鷹廣場時馬生話Papparich好食,誰不知我們下午就喺Paparich用餐🍴 Yeah!

嘢飲嚟齊,影返幅合照先!

喇沙湯麵(laksa mee) 、咖也多士(kaya toast)、辣死你媽(nasi lemak)、再加一杯地道馬拉式凍啡,個午餐簡直係無得頂呀 !! 食完午餐,喱姐預留咗少少時間俾我哋行餐廳旁的商場Langkawi Fair Shopping Mall;而她及緣人就返去神鷹廣場接返2位蘭州美女及開架車嚟接我哋去下一個景點 ~~

往榴槤瀑布的路上 ~~

蘭卡威的Gunung Raya北方的山腳下,有一道14層高的瀑布,高達881米,是當地最高的山峰,名為榴槤瀑布(Durian Peragin)。榴槤瀑布被當地居民喻為到Langkawai必打卡景點第三名。這裡非常適合一家大小去戲水野餐,3至5歲的小孩也適合在爸爸媽媽的陪同下嬉水,瀑布最底層正是供這年齡層的孩子戲水之地,讓孩子不再當低頭一族,融入這奇妙的大自然裏! 下午3:30pm我們抵達榴槤瀑布入口了 ~~

入口梯級處未行到喘氣時留影 ~~

沿路上馬騮精Jenny一見到有個吊床就即時衝過去玩!

沿途會經過一條吊橋 ~~

百厭的Gary嚟一個吊橋跳的驚險動作,嚇得隨後的遊人止步 ~~

踏上了唔知幾多級的梯級,我們終於都嚟到榴槤瀑布的頂層了。榴櫣瀑布是有季節性的,因為一月並非雨季,所以瀑布的水並不是太多及壯觀。大家若想要看見更棒的風景可以在雨季九月或十月到訪,同時還可以看到許多的榴槤懸掛在樹上 ~~

呢班懵炳企定定眈天望地嘅?原來佢地太污糟,對臭腳滿佈死皮,一落水就吸引到大量的魚仔過來啜死皮,當千年臭腳遇上飢餓的魚……懵炳及魚各有各爽!

嘩!嘩!嘩!酒店泳池手拖手合照都未夠,今次仲要整埋個❤️出嚟!咩玩法呀?

我絕對有理由相信左邊橙色衫呢個人唔係我認識嘅細孖😅 我極有理由相信細孖是患有多重人格,呢個一定係「細孖2號」。細孖2號的性格係點大家自己喺遊記細心發掘啦 !!

我哋嚟到個瀑布時有幾個遊客玩水中,就係俾我哋呢班嘩鬼的喧鬧聲嚇到走夾唔唞即刻閃人,我地14人就肆肆無忌憚咁喺個瀑布繼續玩 ~~

影合照當然係由我地隨團攝影師大隊長操刀啦!

大合照一定要齊人先得,但遊客都俾我哋嚇走晒,唯有自己set時間制玩自拍 ~~

既然大家都落晒水,咁又點會少得瀑布底的合照呢 ?

玩完水大家一齊浩浩蕩蕩行返落山 ~~

條吊橋俾百厭嘅Gary跳完之後仲完好無缺,幾位靚女戰戰兢兢喺原位合照,佢哋一定心諗影快啲啦,好驚條橋會斷呀!!

開車回程返酒店了,因為同行的2位蘭州美女今晚要坐機飛吉隆坡,她們要下午5:30pm前返到我們入住的酒店落車,所以我們要加快回程的步伐 ~~

呢間租車公司其實都幾特別,會租一架無油的車俾客用,尋日喱姐要求職員預先幫我哋入了RM30的油,所以我哋今日先可以安心車遊了大半天。回程時油差不多用盡,我們要顧住搵油站之餘,又要顧及能否準時將蘭州美女送返酒店,壓力相當之大。但係時間越急就越是找不到可以入油渣的油站,左兜右兜最後GPS帶我哋駛入了民居的窄巷,最終都成功找到了油站。 眾猛男都圍觀緣人熟練的入油技術,一take過入了RM50油 ~~

本來今日有一個重頭戲上演,因為昨天來到蘭卡威時錯過了日落,今日的行程需調動一下,傍晚要先趕去餐廰看日落,沙灘活動重頭戲明天再安排吧。我們先回酒店休息一會就出發追住太陽伯伯落山的步伐。酒店距離今晚的餐廳頗遠,為免再次錯過今天的日落,我們約好了下午6:15pm出發。誰不知越係急的時候,情況總是出人意表;竟然有人遲到……真係估佢唔到。仲要係非一般的遲到,喱姐最討厭人地遲到偏偏小魚兒、Jenny就遲到10分鐘都未見人,於群組留言又無回應,原來小魚兒、Jenny回房後因睇錯時間所以梳洗中,我們等了15分鐘她們仍未出來,喱姐打了電話給她們,由於時間實在太緊迫,無可奈何之下我們必須要出發去睇日落了,而小魚兒、Jenny就自行乘的士到今晚的餐廳與我們會合 ~~

約35分鐘的車程終於都嚟到今晚用餐的餐廳鷹海灣海鮮坊 (Fish Farm Restaurant),喺車上有一個轉彎位睇到太陽已經緩緩地下降中,心急的喱姐到達餐廳立時衝下車諗住用相機拍下日落的一刻為遊記留下一個精彩片段。 可是太陽伯伯俾一座山遮擋住了,完全睇唔到日落。唉!又食白果!!

餐廳的環境好靚,就係睇唔到日落有點失色 ~~

農曆新年將至,餐廳掛滿一排排的紅燈籠,頗有節日氣氛 ~~

雖然睇唔到日落,但餐廳的環境咁浪漫,影人都唔錯吖~~

由於我們一早訂了位所以餐廳一早預留咗呢張靚枱俾我地,呢張戶外枱向著無邊的海洋,抬頭又可以睇到天上的繁星,正呀 !!

食物水準遠勝昨晚的餐廳,餐廳環境又浪漫,靚景配美食,食得份外開心 ~~

今日最後一個行程,晚上9:30pm嚟到蘭卡威夜巿(Temoyong Night Market) ~~

呢個夜巿規模比較細,無論小食及雜貨等種類都比較少,不過唔緊要啦,先來感受一下夜巿的特色吧!!

各人四圍行,邊行邊睇吓有無啲特色地道小食 ~~

小魚兒話佢今日睇錯時間遲到要團友們久等,所以今晚佢要請食榴槤,當見到有一檔榴槤檔,她想也沒有多想就開了兩個有機榴槤請我哋食,真是十分之豪氣 ~~

行完夜巿飲飽食醉,又係時候回酒店休息了,準備明天迎接今次蘭卡威之旅的大挑戰,登上”馬西岡山”,晚安!

 

Day 3 (11Jan2019) —

今日主要的行程就係行馬西岡山,出發前喱姐已經俾咗資料我們睇,要挑戰呢座山係有一定嘅難度,所以要食飽飽先有氣力去行 ~~

集合出發時間是上午08:15am,因集合時間比較早,要食得舒適只可以食中式早餐,亞洲風味餐廳開放時間為早上7:00am;如果唔怕趕又想食英式早餐可以8:00am過去西餐廳食,不過得15分鐘時間,相信係趕唔切的 ~~

大家都好早起床,餐廳一開大家都穿著好團隊制服到來,唯獨是成個乸型扭扭擰擰的馬生,又話件衫細、又話膊位唔啱,死都唔肯著。Jenny 語重心長警告馬生唔好挑戰喱姐底線,嚇得馬生驚到腳都震埋,食完早餐即刻返房換番件團隊衫。原來呢個乸型話件衫好貼身,佢怕凸點喎…..吹脹!咁又係,話明係乸型介意都唔出奇吖!

今日要轉酒店了,我們拎好晒所有行李等緣人駛架車來酒店大堂門口~~

馬來西亞人真係非常之熱情,我哋搬緊行李上車,酒店職員走過來話要幫我哋影合照,但行李未搬好我哋未有埋位影相,誰不知個職員一直站在我哋附近等候幫我哋影相。全隊12人著了螢光黃的團隊衫非常之醒神 !!

車雖然大了,但最後排坐位不能收起,大部份團友都帶了大喼,放行李真係考起大家 ~~

無辦法底下,喼又有咁多個,唯有委屈大隊長用手頂住啲喼。咁我們就按原定時間早上8:30出發往馬西岡山 ~~

早上9:00嚟到馬西岡山的停車場。由於人生路不熟要帶咁大班人到外地行山安全是最緊要,所以我們請了個Guide~Wendy帶我們一同挑戰馬西岡山。 團費是包了輕便午餐,Wendy 先將兩包蛋糕、一個蘋果分發給我們自己帶上山食 ~~

準備開始起步了,先整理一吓行裝及去洗手間 ~~

蘭卡威馬西崗山(Mt. Matchinchang)高度為海拔713公尺,是蘭卡威島上的第二高山,也是蘭卡威三大地質森林公園之一。此外,馬西崗山也因其自然奇觀而被聯合國教科文組織列為世界地質公園。它擁有馬來西亞最古老的地質結構,估計是在寒武紀時期,大概是4億2千至5億5千年前形成的。 蘭卡威攻略中一般建議遊客乘搭纜車登頂,不過如果選擇在蘭卡威的馬西崗山進行徒步登山的話,所能見到和感受到的會更加深刻。徒步上山途中會穿過熱帶雨林、越過小溪、經過瀑布,同時也可接觸及觀賞到大量的動植物,更能夠親近到大自然。馬西崗山壯麗的峭壁、瀑布、小島和岩石海灘都是大自然的鬼斧神工,景色叫人讚嘆。 登上山頂全程大概需要2到3小時,從山腳出發走上階梯約一公里,然後會去到七仙井瀑布。根據傳說因為天上的仙女會下凡來到瀑布的水潭沐浴戲水,所以七仙井的美名便是由此得來。實際上它是一個地理奇觀,是一處山體被截成7段的瀑布,每段瀑布下都有一個水潭,就好像是上天為仙女們準備好的澡盆一樣。瀑布的山水清澈冰涼,是消暑戲水的好去處。據當地人說,在此處的山水沐浴能讓皮膚光滑如凝脂。由於此處的有些石頭長年受到山水沖蝕,會比較滑溜,攀爬時要小心謹慎。再繼續上路,山道也會變得更有挑戰性,之後會來到馬西崗山天空吊橋,也意味著即將攻頂成功。從蘭卡威馬西崗山頂的瞭望台可鳥瞰美得讓人屏息的蘭卡威島風景及蔚藍的安達曼海景,天氣晴朗時甚至可清晰遠眺到泰國南部。

一開始就係數之不盡的梯級……….出發前喱姐話佢雙腳之前做過手術未必能攻頂,而緣人及發哥話自己體能未能應付這個艱巨的挑戰,他們不約而同地說會於七仙井瀑布休息等我們攻頂 ~~

緣人同發哥兩個就互相扶持,佢哋2個約定咗如果喺七仙井嗰度放棄攻頂就會陪住對方停下來,實情係佢2個不知幾想快啲到達七仙井可以休息 ~~

話咁快就嚟到第一站七仙井瀑布。由入口行到七仙井瀑布只係一段好短的路,可能同Wendy 溝通上出了一點誤差,我們當時完全唔知呢度就係一早說好放棄挑戰休息的地方 ~~

七仙井瀑布全景 ~~

行嚟行去都仲未見到七仙井個牌,幾時至到呢?一路行只係見到 “To The Peak” ~~

Gary步履輕盈,睇嚟呢座山對佢嚟講應該無乜難度 ~~

一向少行山的緣人疲態盡現,心裏繼續盼望住快點到七仙井……….井啊井,求求快啲出現啦,攰死我喇!

行咗咁耐原來呢度先至係馬西岡山的起步點,指示牌話距離馬西岡山頂仲有2小時的路程,我們相信以我們的速度一定無可能。當時我們還以為未到達七仙井,各人都說因應自己的體能行到幾多就幾多,如未能挑戰就於七仙井休息 ~~

有盼望係一件好事,行起上嚟會開心啲 ~~

有馬騮精之稱嘅Jenny見到棵樹打橫生長,唔怕危險咁走上去影相,平衡力唔好行呢棵樹絕對有難度,但對於通山跳、通山跑的Jenny 嚟講簡直係易如反掌啦 ~~

厡始森林的樹木好高好高,樹形特別,樹高到見不到頂 ~~

大隊長站在樹下彷彿變成小矮人般 ~~

呢棵巨樹的樹根生到地下,一向百厭的Jenny又要攀爬一下影相 ~~

呢棵穿窿樹要扮爬出來影相先至得意 ~~

展現美腿效果又另一番味道 ~~

枯樹長出了一排好似的靈芝咁嘅菌類 ~~

原始森林的山路都是這樣的,大樹攔路已是小兒科 ~~

奇形怪狀的樹根,好像卷住了喱姐人咁 ~~

本來諗住互相扶持、互借過橋於七仙井休息,點知行極都未到。哎!發哥坐下休息時話會陪緣人繼續行,但佢個樣出賣咗他,唔想再行的意念已經掛在臉上了 ~~

撐住!!加油 !! 七仙井就到㗎喇!!

到了中段大休的位置,Gary拎咗小魚兒尋晚喺夜市買的龍眼出來同大家分享 ~~

去到呢個位大休時,Wendy話俾大家知七仙井一早已經過了,發哥心裏沉了一下,打坐冷靜一下,面對攻頂的現實 ~~

休息完就要開始行埋最後一段,亦係最高難度的一段了,攻頂在望!

舉步維艱

呢一段路開始需要手腳並用了,由於路段太陡峭,相中可以見到有條繩俾登山人士拉住上落 ~~

對Gary嚟講行馬西岡山只係碎料,為配合番個劇情,扮吓辛苦是必須的 ~~

發哥心諗Jenny你就笑得出啦,難為我呀…… 說好的七仙井呢?

終於都嚟到600米,距離攻頂又邁進了一大步了,繼續加油!

緣人苦笑中,被老點的攻頂活動~~

嚟到呢個位已經可以睇到部份風景,但係登頂最斜嘅一段就喺前面~~

都未攻到頂已經攰到面容扭曲 ~~

從相片同短片中看得見的辛苦難行、舉步維艱⋯⋯

大隊早上9:15am開始登山,於中午12:45pm全隊人攻頂成功 ~~

咁艱難終於爬到上頂,各人都於地標打打咭先 ~~

見到山上的纜車站嗎?這是另一個攻頂方法,不過同徒步個感受一定大不同 ~~

成功攻頂拎埋條Banner出嚟影返張大合照先!

上山容易落山難,部份隊友動作緩慢地落山中。 落山比較論盡的Winnie,好彩有一班猛男從旁指導,Gary指導佢腳踏那一步會站得穩及安全,跟隨著Winnie下面仲有個自稱係「行山專家」嘅緣人,一個理論派的專家,講得出又實踐到👍🏻,佢教Winnie點拎住條繩彈吓彈吓咁落山,佢彈落山又真係彈得幾快喎!

彈落山時可能彈得太快,搞到隻鞋都甩底,緣人一臉無奈,心諗我咁可靠點會甩底㗎! 鞋又甩底咁點算呢?山路又有一定難度,話明係行山專家又點會難到佢呢!緣人即時換咗另一對行澗鞋繼續彈落山 ~~

落山分了兩批人,第一批快腳落返去七仙井等齊所有隊友,然後再一齊行落去停車場 ~~

Wendy就喺呢個位置等齊隊友再落山 ~~

落山行得快嘅幾個隊友喺七仙井玩水,玩到攰就瞓低休息一下 ~~

細孖二號魅力沒法擋!喺七仙井又同另一班女遊客搭訕,一齊嬉水….樂透!

終於都行到落山,出口附近有一群馬騮,馬騮精Jenny見到啲徒孫當然要來個合照啦!

下午5點鐘整個馬西岡山的行程終於完成了,開車前往今晚入住的另一間渡假酒店(The Westin Langkawi Resorts)。 咦…!乜司機唔係緣人咩? 點解變咗Gary嘅?行山專家行到尾段時不斷話腳痛,去到停車場時話腳痛到無辦法操控到棍波車的極力子,好在有後備車手Gary,如果唔係我哋都唔知點樣返酒店呀 ~~

傍晚6pm到咗威斯汀渡假酒店辦理入住手續 ~~

酒店房間 ~~

酒店的環境及設施 ~~

昨日的酒店重頭戲原本係改咗今日,但大部分團友話攻完頂之後太攰,喱姐順應大家的意願,酒店沙灘活動又再押後…… 細孖又話好攰,但係又有精力打乒乓球嘅?

押後酒店沙灘活動,咁行吓沙灘影吓沙灘夕陽都唔錯吖!

泳池與海好像連在一起 ~~

入黑之後就出發去食晚飯,晚上7:30pm嚟到Wonderland Food Store,呢間餐廳沒有奢華的裝潢,只是路邊的大排檔,但估唔到啲食材新鮮、鑊氣又夠!每款食物的味道都遠勝早兩日的餐廳。 餐廳老闆又老實,我地點了某幾款海鮮,老闆話食材唔新鮮唔建議我哋點,第一次外遊遇到咁老實嘅人 ~~

今日喺馬西岡山上無食過一餐正式的午餐,大家可能太肚餓所以覺得晚餐特別好味,各團友像餓狗搶屎般,餸菜一上枱就被掃清 ~~

晚飯後喱姐知大家行完山對腳好酸軟,所以細心安排了按腳呢個環節 ~~

晚上9時就嚟到AlunAlun Spa,我們一致挑選了90分鐘的按腳套餐。 我哋咁大班人同一時間來到,按摩店沒有咁多按摩櫈,所以有一部份團友被安排入房享用按摩床,瞓住覺享受舒適的按摩服務 ~~

按完腳成個人輕晒,然後返酒店休息,準備明天的另一個重點精彩行程,各位晚安!

 

Day 4 (12Jan2019) —

早上酒店沙灘的日出景色 ~~

話咁快就嚟到Day 4,亦都係蘭卡威最後一天的行程了。今日的行程無昨天咁辛苦,但都需要一定的體能,所以要食到飽飽先出發。威斯汀酒店的自助早餐食物、飲品種類較多,正!

今日的主打行程就係包船出海去芭雅島海洋生物保護區(Pulau Payar Marine Park)玩浮潛。早上9am旅行社安排了車到酒店接我們到碼頭上船,雖然部車有點細,逼逼地但一樣坐得開心。 行山專家今早個樣咁呆滯,相信佢隻腳應該仲係好痛囉 ~~

嚟到碼頭旅行社安排緊我們出海用的船,未出發先興奮 ~~

心智未成熟的「特務戇J」見到賊眉賊眼的疑犯即刻掃射 ~~

呢隻就係我地租用的船,因為機件出咗點問題,等咗好耐隻船都仲未能開出 ~~

隻船個摩打放唔到落水,所以職員駛船去較淺水的地方修理一下,我們望住職員修理隻船,有點不安,引擎未有關上就修理,真旳很容易發生意外 ~~

幸好,成功修理好隻船,我們9:45am開始登船前往芭雅島,上船前不忘影番張合照 ~~

上齊人大家揀好個靚位先 ~~

大家穿好救生衣之後準備開船喇!!

下圖就係蘭卡威碼頭Kuah Jetty同芭雅島嘅位置同埋距離 ~~

船開得很快,又大浪,隻船好拋,團友們靜默下來以防暈船浪 ~~

約45分鐘航行時間就嚟到芭雅島 ~~

海水好清,珊瑚清晰可見 ~~

站在芭雅島上個個都心急如焚想快啲跳落水睇魚、睇珊瑚。但係嚟到芭雅島無番張團體照又唔得喎 ~~

一個人拎住條Banner影相仲型喎,當日好大風要拎到條Banner仲要清楚見到啲字有一定難度㗎 ~~

唔好浪費時間,快快手手9秒9影完大家就衝落海了 ~~

搞乜細孖俾緣人撳咗落水底?咪係為咗幫手影多些水底的靚相放上遊記分享囉!人有浮力如果無人撳住好易又會浮返上水,細孖有時都好抵得諗,要兼任咁辛苦的拍攝工作 ~~

在水中拍攝對於唔識游水的喱姐嚟講係有一定的難度,加上浮潛的喉管又不斷咁入水,她不知飲了幾多口鹹水才可以影到咁多靚相,辛苦晒!

芭雅島的海洋生物有過萬個品種,魚兒會游到淺水區,非常之容易就可以睇到魚兒,仲有機會見到鯊魚BB添 ~~

咁淺水的地方都有咁多魚,真係好難得 ~~

芭雅島超多魚,真係正到不得了!

順提一下,就係Jenny用佢個防水手機袋搞到佢嘅手機過熱overheat ~~

中午12:30上返岸食午餐,餐盒及蘋果係由旅行社提供,有咁靚的景及魚睇,食差少少都無所謂啦!食完午飯就係呢個時候Jenny再用手機時發現電話冇乜反應 ~~

簡單午餐後船長見島上太多人,建議載我哋去另外一個無人島繼續玩浮潛,包船實在太貼心了,連太多人在島上的因素都考慮埋 ~~

Gary受喱姐所託,所以佢高難度潛落唔同嘅珊瑚石洞中幫手影靚相 ~~

仲有大隊長Albert影嘅呢幾張小丑魚以及水中短片簡直係一絕呀!

剛才的無人島實在太大浪,所以又轉場,呢個島水深好多,魚就無芭雅島咁多,但睇到的魚兒種類又有少少不同 ~~

Boyle見到船家潛了去水底拎咗隻螺上嚟,唔怕羞的我們問個船家借咗隻螺爭相影相,個個見到隻螺都好心急搶住影,好似怕影唔到咁。先影先享受,遲影影都無 ~~

緣人好辛苦先喺馬生手上搶咗隻螺到手,影一張相點會夠,咁難先搶到手,死都唔俾其他人影 ~~

我哋都未影完隻螺,個船家又拎咗另一隻椎形螺上嚟,Jenny好快將兩隻螺拎上手影相,玩得開心得滯一不小心隻螺又跌返落水底。芭雅島是保育區,任何的海洋生物都唔能夠帶走,隻螺跌返落海底當然無問題啦,只係大家未影夠啫~~

玩了一天的浮潛活動已經完結,開船回程了。感恩呢3日天公造美讓我們所有嘅蘭卡威主要行程順利完成,因為天氣預報話今日蘭卡威會落雨 ~~

特務戇J最鍾意玩,佢拎住支水搶四圍射人,遇著一樣咁貪玩嘅馬騮精就最啱key ~~

Jenny想搶佢支水槍,可惜只係搶到支槍身但就搶唔到水壺。以下片段含有暴力鏡頭,需家長指引~~

回程的途中,去到一個位突然間船開始減速,船長大聲呼叫留意有鯊魚出沒,未幾有一條巨鯨在海中跳躍,鯨魚跳了上水兩次,但我們未能趕及拿起相機拍下重要的一刻,實在有點可惜!但這珍貴的一幕永遠留在我們的腦海中 ~~

返到酒店之後有啲團友返房間休息,有啲去泳池游水,而有啲就喺泳池邊hea,大隊長著住件浴袍去泳池游水造型好chok ~~

喱姐及Gary換咗衫就馬上出去為我們的下午茶張羅,留喺酒店嘅小魚兒喺池邊霸了一個靚位等食下午茶 ~~

下午4pm返咗房午睡的細孖及發哥出嚟食下午茶,正所謂午後睡一睡,好過做元帥。睡了一會精神爽利,稍後的壓軸重頭戲沙灘活動一定大發光芒 ~~

啱啱拎起件咖央多士放入口,雨點就開始灑下,過了一會雨越下越大,我們移師到酒店大堂繼續食!

壓軸活動的場地必須於沙灘進行,因天雨關係又要再押後,喱姐決定將所有道具帶回吉隆坡於康情瀑布上演。既然個天都唔想我地玩壓軸活動,咁我地就慢慢嘆個下午茶先。 邊吃美味的下午茶,Jenny念念有詞說佢部手機放咗入去防水袋無關上屏幕導致手機overheat,所以個手機壞咗。專家上身的緣始人對Jenny部電話壞了甚感興趣,誓要找出壞機的原因,緣人將Jenny部手機的SIM咭拎了出來,發現SIM咭槽有水點,認為是手機浸了鹹水,而Jenny就堅持是overheat,各執一詞、熱烈議論之後,緣人大力凳了手機一吓即時有更多的水流出來,更大的理據支持緣人的說法,此時Jenny臉色一沉,但仍堅持是overheat,既然Jenny 咁堅持都無謂爭拗!你咪理,overheat就係overheat啦!

食完下午茶大部分團友回房休息之際,我們發現雨停了,叫住班無良心的衰人(包括:成日扭扭擰擰的馬生、發哥、細孖)出去玩佢地竟然越叫越走。 喱姐無奈地講算啦!帶返去吉隆坡先玩囉!我哋望住咁大袋嘅草裙,由香港帶到去吉隆坡,再由吉隆坡轉機帶到去蘭卡威,無理由浪費喱姐一番心意吖。 於是Jenny 逐間房去拍門叫番呢班衰人出嚟玩今日嘅壓軸活動”跳草裙舞” 。由未出發已經講好要玩跳草裙舞,但嚟到蘭卡威之後壓軸重頭戲沙灘活動一改再改,終於今日都可以達成喱姐的計劃。 以下內容必定笑到噴飯,請食飽先收看!!

我哋喺沙灘搵咗個無乜人睇到我哋嘅靚景,拎晒啲草裙出嚟,喱姐難掩興奮的心情,笑得好開心。大家就各自揀自己喜歡的草裙顏色,臉上流露出欲拒還迎的表情 ~~

大隊長戴上草裙後,搔首弄姿!勁爆笑!

古靈精怪的Boyle唔想著條草裙上身,佢將條草裙當假髮咁戴,諗住可以逃過跳草裙舞,點知草裙戴咗上個頭又幾掂吓喎,成個土著咁,跟住大家都爭相仿效做法 ~~

大家發揮無限的創意穿著這條草裙,令大家的造型各有特色。緣人長鬍子造型同樣趣怪,呢個時候各人的造型都咁好笑,細孖都唔知仿效邊個好 ~~

現場就好似鬼馬派對一樣,各出其謀將自己變到最爆趣 ~~

Jenny個造型就顯得太正經了 ~~

大隊長都忍唔住笑自己的造型,他的舞姿有如《咕嚕咕嚕魔法陣》的結他老伯 ~~

大隊長充當馬來西亞大巫師,在酒店沙灘舉行作發大典,開壇作法想為團友搞場法事逐邪逐鬼 ~~

大巫師助手 ~~

此刻大隊長有如大巫師般,念起咒語來,大巫師的助手從旁協助,大巫師即席為團友驅邪逐鬼,各人將祭品獻上 ~~

開壇作法完畢之後就正式開始我們的沙灘草裙舞表演喇....首次表演完全無綵排,拍片是Free style咁玩,但片段效果都幾爆笑。 我地跳的時候吸引了酒店的住客拍片,個住客邊拍片邊笑我地搞笑 ~~

草裙舞的背景音樂是印尼民歌”梭羅河之戀”,呢首歌,大隊長用了好幾個月的時間不斷搜尋,因有太多版本,左挑右選最後揀咗這個版本。跳完part 1 free style 大家覺得好好玩,咁正式穿好草群之後再跳多一part ~~

估佢唔到!扭扭擰擰的馬生跳起草裙舞上嚟原來係最姣嗰個 ~~

臀部的扭動、手部的動作如此自然,相信馬生一定係秘密練兵多時,大衛見到如此熟練的舞姿都目瞪口呆!

演出成功之後梗係要影番張大合照啦!

跳完草裙舞之後,椰林樹影下再試下玩四人層層疊,又唔難喎,一陣就砌好,果然勁!

沙灘活動笑到反轉之後又係時候出去食晚飯喇,車經過神鷹廣場時見到太陽落山中,我地即刻停車跑過去睇,呢個日落景令蘭卡威之旅更圓滿 ~~

今晚晚餐都係去返尋日間餐廳Wonderland food store食。唔駛問點解啦,有鑊氣,堅好味!

晚上9:15pm食飽飽再去蘭卡威最大嘅夜市掃街 (Kuah Night Market) ~~

嚟到夜市又見到榴槤檔,今日無特別嘅理由但係小魚兒都再請我哋食榴槤,多謝晒!!

呢個夜市比尋日嗰個大少少,因為明天又要好早起身搭早機,所以逛了一會就返酒店休息了 ~~

 

【蘭卡威 】上山下海深度遊 – 下集