【蘭卡威 】上山下海深度遊 – 下集

上集遊記寫到我們4天喺蘭卡威嘅行程點點滴滴,轉眼間今日已經去到行程嘅第5天了,現在又再次交俾筆者Winnie繼續同大家分享一下我們餘下喺吉隆坡嘅精彩行程,如果仲未睇上集遊記嘅朋友記得唔好錯過喇 !!! 【蘭卡威】上山下海深度遊 – 上集

Day 5 (13Jan2019) —

雖然我哋唔捨得離開蘭卡威呢個咁好玩嘅小島,但係都非常期待與另外四位隊員喺吉隆坡會合然後繼續餘下嘅3天快閃行程。 原本我哋今日係乘搭早上11點30分起飛嘅亞洲航空班機,可惜出發前幾個月被email通知更改咗為下午3點鐘嘅航班,咁樣私自更改我哋嘅航班就完全未能配合我哋的行程,所以出發前喱姐寄咗幾封email俾亞洲航空要求更改航班時間,但完全無人回覆,電話又唔通,激死呀!!  喱姐無可奈何下唯有親自去咗兩次機場嘅亞洲航空客戶服務櫃枱排隊要求改番配合到我哋嘅航班時間,最終只能夠安排到早上0930嘅AK6329航班 ~~

Westin Langkawi酒店自助早餐其實唔錯,西式馬拉式選擇多,都算好豐富 !! 原先我們係有足夠嘅時間慢慢嘆酒店自助早餐然後才退房去機場的,就係因為以上嘅原因,所以今早被迫於早上0630快速食完早餐就要嗱嗱臨趕去機場還車然後上機飛去吉隆坡 ~~

趕到氣都咳,終於都嚟到機場,廉航係要自己辦理check-in,由於時間比較趕,加上部機又唔太合作,最後我哋搵咗亞航地勤人員幫我哋做group check-in。 雖則廉航係沒有什麼服務可言,但今次遇著咁幫得手嘅地勤人員好快就完成咗整個check-in程序,都值得一讚 !!

喺候機室等上機時喱姐趁有時間就順便收各團友嘅保護費,保護費(團隊阿公基金)係用作繳付所有行程嘅洗費,包括門票、食宿以及旅遊巴包車服務等等 ~~

Jenny交保護費交得十分之激動,莫非係要求緣人收咗錢之後要全程保護佢? 哈哈 !! 65 Crazy monkey emoji funny gif iPhone Android Emoticons Animoji

終於都開始登機喇…..期待去到吉隆坡與第三及第四隊嘅團友會合 ~~

由蘭卡威飛往吉隆坡的航程只需要短短的35分鐘,因為我哋嘅航班時間被改早咗2小時,所以我們於KLIA2機場的foodcourt百無聊賴休息消磨時間,等接第四隊團友(仁哥和彥哥)的機 ~~

第四隊團友準時落機,佢哋2個一定好感動,相信佢哋從來都未試過有12人喺接機大堂等住接佢哋機 ~~ 53 YOYO Mokey Emoji iPhone Android Emoticons Animoji

咖喱團需要包一部咁大部嘅旅遊車都係第一次!

第三隊團友(Jennifer and Karen)早兩天已經先出發到吉隆坡遊玩,所以下午1320接完機之後我哋大隊就出發前往PJ八打靈區的”長菁海鮮飯店”與第三隊團友會合及食晏 ~~

下午1415嚟到長青海鮮飯店,點好晒餸先來個16人大合照 ~~

下圖係”生蝦麵”,隻蝦有成塊面咁大㗎!

離開餐廳時喺門口見到一籮超巨型嘅蟹,我哋得到店員的允許與巨蟹拍照 ~~

食完午餐我哋坐旅遊巴先返酒店攞房同埋安頓行李 ~~

25座旅遊巴坐16位團友,大家都坐得好舒適 ~~

下午1545抵達呢2晚入住的酒店「Sofitel Kuala Lumpur Damansara」~~

酒店大堂 ~~

呢班人攤晒喺酒店大堂休息,喱姐就忙住搞check in手續 ~~

原本講好參加嘅係馬拉快閃三天團,後來第三隊團友(Jennifer and Karen)思前想後,覺得三天的旅程太短,所以佢哋補錢更改了機票提早兩天出發往吉隆坡玩多2天。 搞完機票之後Jennifer及Karen再訂咗兩晚相同的酒店,為免酒店職員混亂,原先喱姐叫佢哋於今天早上退房。礙於要搬房太麻煩,所以佢哋向酒店申請延遲退房時間。當喱姐check in時,酒店職員未能於電腦系統找到佢哋嘅訂房紀錄,擾攘多時終於都找到所有訂單,由於行程緊湊而酒店職員安排房間又比較慢,所以安排大家分批上酒店房整頓一下。懵炳輝竟然大意到將佢個背囊留咗喺酒店大堂,佢返到酒店房間才發現唔見咗個背囊,立時衝去酒店大堂,但係搵唔到喎 !!  呢個懵炳輝聲稱個背囊入面有部手提電話,但佢半點緊張都無,還大安旨意覺得係我哋將佢嘅背囊收藏起來嚇佢喎…..有咁貴重嘅物品喺袋裏但都咁大意,抵佢唔見咗個袋!

喱姐同蝦子餅緣人嘅大床房 ~~

Sofitel酒店品牌信得過,靚裝修再加埋好寬倘嘅浴室,正呀!!  唔好以為咁新咁靚嘅酒店會好貴喎,原來早訂有優惠,折咗都係港幣$650一晚左右咋 !!

大家安頓好晒啲行李之後就馬上出發前往吉隆坡著名打卡點 — 雙子塔( Petronas Twin Towers) ~~

下午1700嚟到雙子塔KLCC商場,途中雨點慢慢的落下,一抵達商場雨開始越落越大,唯有折返去KLCC商場裏面的2間超市購物消磨時間 ~~

我哋相約下午六點再集合然後一齊行出去雙子塔公園影相,但係等到6點鐘雨沒有停下來卻越落越大,無可奈何之下唯有再去逛商場,有啲唔喜歡購物嘅團友就到商場的food court坐低休息吹水。 初初喱姐還很擔心場雨落得咁大,一定會令到馬拉三天快閃團的團友失望,好彩上天憐憫,傍晚7點鐘啲雨終於停了,大隊即刻行去雙子塔公園打卡。 今日本來有一個表演,就是疊人塔(喺蘭卡威玩完覺得好玩,想喺雙子塔下再玩多一次)不過落咗一場大雨大家都冇心機玩了,嚟到吉隆坡的第一個景點一定要影番張團體照先啦,大雨過後有少少藍天及夕陽做背景都唔錯 !!

雨後KLCC公園湖面倒影清晰可見 ~~

原本我哋今晚喺訂咗枱去KL Seafood Market餐廳食海鮮晚飯嘅,可惜今日餐廳全區制水。 要臨時另搵一間就腳又有16人大枱嘅餐廳都唔易,相信喱姐當時都好頭痕,最後 晚上1930轉移陣地去咗雙子塔附近的老字號「客家飯店」食晚飯 ~~

因為唔知餐廳餸菜嘅份量,一開始定咗每人點一款自己想食嘅餸。好在落單時漏咗一個餸,原來每碟餸嘅份量都好大。 全隊雖然男士眾多,但依然食剩好多!抽籤制今次用不上,唔知是誰的鬼主意話今餐自負盈虧,自己負責自己點的餸,呢個時候就係測試彼此友情嘅時候喇…..結果最有義氣的彥哥差不多食光枱面剩下的餸菜,勁 !

晚飯後仲有今日最後一個行程,晚上2130嚟到每逢星期日晚開檔嘅Taman Megah夜市 ~~

落完大雨之後好多夜市小檔都無開檔,對比起去年喱姐帶三個小生(發哥、細孖以及馬生)去旅行的馬拉遊記之中提及的Taman Megah夜市確實有點遜色 ~~

頭先餐晚飯食到咁飽大家個肚都再冇空間掃街,行咗一陣就返酒店休息了。 夜市之後仁哥佢哋幾個上咗去泳池嗰層嘅酒吧參觀一下 ~~

Day 6 (14Jan2019) —

早上出發之前到酒店的泳池區拍照為遊記做些紀錄 ~~

點解今日架車縮咗水變得咁細部嘅? 因為今日唔需要轉酒店,唔需要載16件行李,所以精打細算的喱姐今日book咗架細少少嘅旅遊巴,坐迫少少,又可以慳返少少旅費 ~~

吉隆坡地道美食多,預訂酒店時選取不包早餐的房價,咁樣就可以自己四出覓食。 今天早上0800集合出發前往位於快樂花園的財記飯店食地道”生蝦魚頭米”做早餐。 我們出發前往茶室途中,喱姐已經聯絡老闆,為我們預備16碗生蝦魚頭米,喱姐心知有數位團友比較大食,所以預先安排咗加大碗嘅生蝦魚頭米,實在太貼心了。 唔講唔知老闆係喱姐嘅舊同學,亦是想當年的校草,既然一場嚟到,眾靚女梗係唔執輸爭住同校草影相啦 !!

個個急不及待衝入餐廳準備大飽口福。呢碗粉真係不得了,曾食過的團友都讚不絕口,一致評為嚟到吉隆坡非吃不可的食物之一 !!

大家有冇留意到今日我哋係穿了團隊制服?  因為今日嘅行程係馬拉快閃三天團的主要行程”康情瀑布” ~~

康情瀑布(Kanching Waterfalls)位於雪蘭莪州邊界的,皆因康情瀑布的入口比較難搵,未去過嘅旅遊巴司機因為set錯導航目的地所以兜咗一個大圈先去到正確入口。 喱姐的兩位摯友Sam(榴槤)及Jane知道我哋來咗吉隆坡玩,所以今早千里迢迢由馬六甲揸車嚟到吉隆坡同我哋一起行康情瀑布,實在太有心了。有朋自遠方來,難掩興奮的心情,Sam及Jane一早嚟到入口迎接我哋 ~~

事不宜遲!即刻出發去玩水喇 !!

「特務戇 J」喺蘭卡威嘅任務未完成,嚟到吉隆坡繼續執行任務!65 Crazy monkey emoji funny gif iPhone Android Emoticons Animoji

咁巨型啲樹葉係咪第一次見呢?塊樹葉🍂大過Jenny塊面㗎!

瀑布入口輕易找到Jenny的徒孫 ~~

扮馬騮搶背囊? 幾十歲人成個智障嘅細路咁喺度搶人哋個背囊? 一個大好青年經歷咗一次旅行就搞到咁實在可惜!

Sam知道緣人行完馬西崗山之後腳痛未好,為咗減輕緣人嘅負擔,拖住佢個背囊拉佢上山,呢啲咪叫愛屋及烏囉!

影相最緊要chok!執勤中的「特務戇J」時刻保持英姿 ~~

康情瀑布共有7層,要上到去最高的第7層難度比較高,但水質就較為乾淨清澈,所以越低層嘅瀑布人潮也越多。 話咁快我哋就行到第一層瀑布了,瀑布的水非常冰涼,大熱天來這裏消暑最好不過,而且層層的樹蔭都將太陽擋住了,唔使暴曬咁爬上瀑布頂層亦不覺辛苦 ~~

瀑布有很多表面長滿青苔的石子,加上瀑布的衝力,是要花點力氣才能站穩的 ~~

嚟到第一層瀑布點都要影番張18人大合照先啦 !!

底層瀑布留影後,繼續往第2層瀑布出發 ~~

康情瀑布全係呢啲古老原始的山徑,愛行山的我們十分喜歡這樣的路線 ~~

參天大樹,高不可攀!

仁哥目賭參天大樹被嚇得目定口呆 ~~

第2及第3層的瀑布,因沒有較大的水池所以遊人不算太多 ~~

繼續往上行,加油 !!

話咁快又嚟到第4層瀑布了 ~~

行到熱熱地,跳落瀑布俾清涼的瀑布水淋一淋成個人精神晒 !!

「特務戇 J」偷襲戰術了得,懵炳輝防不勝防!

第5層呢個位影相又幾靚喎,個個都爭住影番張靚相先 ~~

影完相就繼續行啦….因為今日嘅重頭戲要等我哋去到第6層先上演㗎 !!

快行到第6層瀑布時,可能大家都好想快些表演,越行越快,喱姐亦跟不上腳步,本來找到一個靚位但係呢班人又行到好遠,喝住叫他們停下來……準備表演!  上一集我哋喺蘭卡威嘅沙灘拍咗一條很精彩的草裙舞表演短片,喱姐了解到各團友都好有表演慾,而馬拉快閃三天團嘅4位團友係嚟到吉隆坡先新加入,之前無呢個表演機會,為免佢哋失望所以我哋將草裙帶到康情瀑布讓未曾參與過嘅四位團友表演一番。 因為完整無缺嘅草裙只係得11條,而大隊加咗4位新團友之後總共係16人,為咗公平起見,我哋昨天已進行了抽籤儀式,未能抽中演出的包括Gary、緣人、Winnie、發哥及Jenny。 抽唔中又想表演可以點算?咪求吓可以表演嘅人調換囉!貪玩嘅Jenny成功求馬生讓出佢今日參與演出嘅機會 ~~

參與嘅11人各自拎出自己的草裙出來穿上 ~~

最有表演慾的一位非Jenny莫屬!難得同馬生換到再次演出嘅機會,她開心地盡情擺出各種舞姿 ~~

呢對草裙舞姊妹花嘅笑容、甫士都非常之合拍 !!

Karen及Jennifer首次參與草裙舞演出亦難掩興奮的心情 ~~

著好草裙了,咁大家準備好未? 演出之前影多幾張相熱吓身先!

未能抽中演出的五位團友,負責拍攝短片以及拍照 ~~

著住團隊制服跳草群舞感覺上整齊好多,又有隊形 !!  經驗是累積返嚟,今日一take過就拍好條片 ~~ 65 Crazy monkey emoji funny gif iPhone Android Emoticons Animoji

重新再排過企位,各人落力演出,大衛進步神速,相信是大衛見馬生於蘭卡威跳得太出色,之後每晚臨瞓前向馬山討教舞姿,手部及臀部扭動的力度,哈哈 !!

Boyle做乜無啦啦變得咁嬌俏??

肥版健美先生?

彥哥見先前大隊長喺蘭卡威扮巫師扮得咁過癮!佢又不甘示弱,立即巫師上身咁款 ~~

彥哥一定係被Boyle落咗馬拉愛情👨‍❤️‍👨降!HeHe?行為實在太親匿了……….估唔到原來大家都係咁玩得,玩就梗係一定要盡情啲啦!!

剛才草裙舞表演時間太短了!彥哥有感未夠喉加上又太好玩,跳到唔想停,估唔到彥哥的舞姿如此婀娜多姿,跳得有板有眼 !!

蘭卡威巫師1號 + 吉隆坡巫師2號倆師徒的合照?

都係以下呢個組合順眼啲……呢張相好夢幻,尤如時光倒流般回到過去、想當年的小情侶合照 ~~

Gary喺大家跳舞嘅時候發覺跌咗副太陽眼鏡所以獨自落咗水澗搵,可惜搵唔到 ~~ 65 Crazy monkey emoji funny gif iPhone Android Emoticons Animoji

跳完草群舞、收拾好啲行裝之後就往康情瀑布嘅頂層出發 ~~

行完馬西崗山之後嘅隊友就覺得呢條路線完全無難度啦 ~~

終於都嚟到康情瀑布的第七層了!

行到去頂層又係時候大休同埋浸水降溫嘅時候了 ~~

咁辛苦嚟到第七層先浸下水解解暑,之後一定要張大合照啦,團友中有熱愛香港🇭🇰及祖國的團友,帶了國旗及區旗嚟耀武揚威!

呢張18人的大合照實在難得 !!

其實由第七層再行上去仲有一段好似亞馬遜河森林景嘅一段路,由於這段路需要澗水而行,而且有水蛭(螞蟥),所以大家都決定唔行呢一段。 以下同大家分享一吓2018年4月喱姐首次帶隊去康情瀑布探路嘅幾張相片 ~~

Jenny有幾怕水蛭? 有短片有真相,哈哈 !

鏡頭一轉就返番嚟2019年嘅1月14日我哋大隊喺康情瀑布嘅情景,去片!!

既然唔再行上去所謂嘅亞馬遜河嗰一段,咁就一於開始落山啦 !! 上山容易落山難呀,大家加油 !!

平衡力好的Gary站在這條大樹幹上跑來跑去零難度 ~~

緣人、Boyle and Jenny都唔執輸,上去表演吓雜技先 !!

咦….! Albert呢張相啲配角咁吸晴嘅?

好快就落到去底層喇 !!

除了感恩還是感恩!遊覽完康情瀑布上咗旅遊車無幾耐,車一離開康情瀑布出口就落起滂沱大雨!

行完山係下午3點鐘,大隊都感覺又攰又肚餓喇,旅遊車立即載大隊去到Sunway Pyramid的餐廳用午餐,只看店面覺得這是一間普通的餐廳 ~~

當上菜的時候我們眾人都嘩嘩聲!實在是太震撼了!一隻木船放滿了特色小食,要由兩位職員一起抬上枱,這艘船剛剛好夠位擺放在枱面上而已。 呢隻船的長度一個人都未必捧得起,隻船亦有一定的重量,你睇吓我哋個個都扮大隻拎起佢影先至夠型架嘛! 呢隻船要預早訂的,好彩有喱姐的悉心安排,我們先可以試到咁特別的馬拉嘢食 ~~

食飽飯我們散步去Sunway Pyramid商場的下一個景點 ~~

Sunway Pyramid商場最有代表性嘅就係佢呢個獅子頭建築 ~~

到喇到喇….!登登登登!呢度就係我哋嘅下一個景點了 “Signature HealthLand Family Wellness Centre” ~~

啱啱行完山咁攰,最適宜就係做一個正宗的泰式按摩了。 我們一行16人實在太多人,由於人數眾多,喱姐已預先預約咗16個技師幫大家做全身泰式油按 ~~

喱姐到接待處付款,呢班大細路就自己坐喺度休息及玩樂 ~~

洗完腳就準備上房去按摩了 ~~

因為未有16位女技師幫我地16位團友做全身油按,所以唯有安排兩位團友(喱姐及小魚兒)去大廳做足部同肩頸按摩 ~~

按完摩之後發生咗一段小插曲,事因換好衫後彥哥發現佢部手提電話不知所終,左搵右搵,反轉個背囊,返上按摩的房間再搵都係搵唔到,嚇得喱姐一額汗! 對於機不離手嘅我哋唔見電話確實又有點神奇,仲要喺喱姐推介嘅按摩店唔見咗部電話,喱姐一定比彥哥更為擔心,幸好只是虛驚一場,職員最後發現彥哥部電話遺留咗喺洗腳嘅地方,慌忙執番俾佢!又會咁大頭蝦嘅😅 好彩我哋一行16人一齊按摩霸晒個場咁濟,如果唔係部電話留咗喺洗腳嘅地方成兩個鐘頭實俾其他客人執咗去啦,咁幸運一定要買番張六合彩啦 ~~

按完摩之後行咗一陣商場買少少手信,然後就準備出發去夜市掃街了 ~~

馬拉夜市有太多特色小吃,而我哋個個都係眼闊肚窄嘅人,所以喱姐今晚無為我哋安排晚餐,打算俾大家喺夜巿見到乜想食就食乜,最重要係個個都話要留肚食榴槤嘛! 嚟到SS2夜市第一站喱姐原本係諗住兵分兩路搵食,唔食榴槤嘅隊友就由緣人帶佢哋去夜市掃街!點知大家難捨難離,唔食榴槤嘅細孖同大衛都話想跟埋我哋去榴槤檔喎,正所謂唔食都聞吓,唔聞都睇吓吖嘛 ~~

一坐低Karen就急不及待叫檔主開咗一個貓山王,一見到個榴槤放咗上枱面大家笑逐顏開,嗱嗱臨拎番件榴槤試吓有幾好味先 !!

大家開咗好多個榴槤,個個食到鬼死咁開心!

黃肉乾包無得輸!

彥哥一口氣鯨吞了13粒榴槤果肉😍相當滿足的笑容 ~~

唔食榴槤嘅緣人、細孖以及大衛就坐埋一邊食珍多冰、山竹以及飲椰青 ~~

食完榴槤就行返去夜市掃街!

大部份團友感到無米落肚唔得喎,掃完街仲要去食番碗魚旦粉先夠滿足 ~~

食飽飽之後今日嘅行程又完滿結束了,又係時候返酒店休息喇!各位晚安!

Day 7 (15Jan2019) —

時光飛逝,話咁快就嚟到行程的尾聲了!話雖係行程嘅尾聲但我哋今日仲有一個既刺激又暴力嘅重點活動!咁重要嘅環節大家千祈唔好走開,一定要睇到最尾呀!

早上0800我哋準時退房,然後又係由旅遊巴接我哋去食地道早餐。其實今日嘅地道早餐餐廳距離酒店並唔遠,但係吉隆坡上班時間係出名交通擠塞,所以用咗一個小時嘅車程時間才抵達位於Glenmarie嘅茶餐室~~

由於一陣間嘅活動會虛耗大量嘅體力,所以今早大家可以盡情試多幾款地道美食!豬什粉、喇沙、咖也多士、馬拉特濃凍啡等….全部試晒都仲得呀!

呢度就係我哋今次臨別馬來西亞最後嘅一個活動場地。大家懷著一顆興奮的心情,短短廿分鐘的車程就嚟到漆彈射擊野外戰場(Paintball Park) ~~

未開戰先興奮,話明係漆彈射擊⋯⋯子彈無眼大家可能有預感開戰後會反目成仇,開戰前嚟個大合照先,哈哈!

因為大部份隊友都未玩過漆彈射擊,大家都對呢個遊戲沒有太大嘅戒心,見到有重型武器大家搶住要先拍照留影為快。 估唔到有團友精心策劃自己的造形,新一代賊王葉繼孖扮演賊王的造形維肖維妙!

開戰前職員先講解注意事項⚠️遊戲有一定的危險性,大家都好留心聽書。喱姐心知我哋半桶水嘅英文未必能100%理解所以從旁做翻譯 ~~

聽完講解,大家開始穿上裝備準備應戰 ~~

因為活動都有一定嘅危險性,大家都神色凝重地穿起防彈衣及頭盔!

呢袋咁大袋大大粒粉紅色的波波就係漆彈

我哋每人拎住一支氣槍,由職員為我們放入漆彈 ~~

入好子彈,大戰一觸即發 ~~

各人擺好甫士chok住影番張型仔照先!

為了公平起見,我們先進行抽籤分為兩隊,A隊漆彈射擊隊員有8人:Jenny、細孖、Jane、仁哥、Jennifer 、Winnie、彥哥、David

B隊漆彈射擊隊員亦有8人:Albert、喱姐、緣人、Gary、Sam、馬生、小魚兒、楊仁

數嚟數去都好似少咗啲人咁嘅?發哥同Karen去咗邊呢? 原來發哥知道有呢個活動時已事先申請唔參與,係因他家父的影響,潛移默化下發哥感受到戰爭的可怕,所以不參與漆彈射擊;而Karen就擔心自己體力應付唔到所以又放棄 ~~

各人整裝待發!

開戰前,我哋一行15人都係決定槍口對外,對付口臭兼嘴賤嘅Samuel馬生,每人有400粒子彈,每人一發射馬生幾槍佢都肯定死得,但係劇情峰迴路轉……

大家異口同聲話要圍剿馬生,聽完briefing後馬生知道漆彈嘅射擊力係如此恐怖😱 嚇得面青兼腳震震,立時退避三分 ~~

漆彈大戰即將開始,由於我們沒有射漆彈的經驗,負責人兼教練先建議我們到體驗區感受一下射擊的實況 ~~

整個漆彈射擊場共有四個射擊場地,下圖就係一個為入門級試玩體驗區嘅場地,於體驗區試玩一局後就可以轉玩其他場地了。體驗區的規則是只要身體任何部位中槍都要離場(即係輸咗一局)。 由於漆彈的射擊力極大,當進入射擊場後,我哋係絕不能把面罩脫下以免眼部受傷 ~~

各人進入場地後先找個有利位置,槍林彈雨有殺錯無放過 ~~

雖然只是體驗區的射擊,但各隊員都嚴陣以待 ~~

入場開戰前馬生知道我哋15人會對付佢所以嚇到面都青!又話槍口對外一起射爆馬生嘅?佢仲安然無恙龜縮地躲避漆彈喎 ~~

場地尤如電視劇的場景,各人認真上演?

係鬼咩!個個都怕俾敵方射中就真!

雖然Karen及發哥冇參與,佢哋於場地外觀戰同樣興奮 ~~

第一局試玩,毫無部署,見人就射,中彈出局的隊友拍到以下呢條既搞笑又精彩的影片 ~~

事因仁哥想掩護Winnie出去射擊敵方,同時間Jenny又走咗過嚟,咁啱佢支槍又突然間射唔出漆彈,為咗與隊友共同進退唯有守候喺Jenny身邊保護佢(攬炒),所以仁哥叫極Winnie但佢都唔走出去,咪就係因為咁囉!

最後Winnie同Jenny俾個反骨仔楊仁近距離射咗幾槍,而呢個反骨仔亦涉嫌違反遊戲規則,佢哋已經示意投降但反骨仔好似食咗變態佬藥咁死都唔放過佢哋,不停連還發炮🤬

可憐的Winnie被射中後苦不堪言⋯⋯痛到行都行唔到😥 反骨仔射到Winnie皮開肉綻😭 睇見都心痛!

而佢就扮晒投降,其實內心係一個極度暴力兼變態嘅人,可能反骨仔楊仁佢好討厭Winnie 😤 趁機將心裏面抑壓多時嘅憤怒一次過爆發晒出嚟 ~~

玩完第一場體驗戰,職員為我哋嘅氣槍充氣及補充漆彈。 大獲了!乜解究北韓領袖肥仔金(金正恩)嚟咗嘅?再睇真啲,原來係穿上戰衣嘅彥哥,側面驟眼睇又真係幾似肥仔金喎!

第一局體驗射擊就搞到部份隊友傷痕累累!嚇得上一回合嘴角中槍嘅牛嫂Jennifer決定退出戰線!牛嫂心諗:命仔緊要、安全至上,體驗過就滿足了 ~~

馬生笑得幾咁開心!呢個細膽鬼知道我哋打算圍剿佢,佢一被漆彈擦中就即刻投降出局,實行三十六計……走為上計!以圖避過被圍剿嘅風險,佢講就牙斬斬,一玩起上嚟就細膽到無人信呀!

以下呢幾個就係第一回合的死剩種,無中過槍個樣幾咁得戚⋯⋯睇吓下一回合點先?極有可能被射爆,小心睇路呀!

第一回合之後飲吓水休息過後我哋就轉去第二個場地玩,呢個場地以樹林為背景更加刺激 ~~

吸收咗第一局嘅經驗,A隊由仁哥統領,仁哥開始步署嚟緊呢局的射擊策略。正所謂有仇不報非君子,第一局Winnie及Jenny慘敗,被射到遍體鱗傷,呢局經過精心部署,實行以牙還牙、以眼還眼!

而開局前Jenny唔抵得個反骨仔無遵守遊戲規則,強烈要求踢佢出局,唔俾佢玩!話明要報仇嘛,如果唔俾個反骨仔繼續玩又點報仇雪恨呀? 最後,還是放佢入場等我哋再多一個機會射爆佢 ~~

精心佈局後喺開戰前打打氣、雄心壯志射到對方片甲不留 ~~

Gary見我地A隊商量得有板有眼⋯⋯B隊都有樣學樣商量戰略 ~~

時光飛逝!轉眼之間已經嚟到戰事最後一局,戰局中剩下嘅死剩種已經所剩無幾,而我哋必須留守到戰事最後一刻,務必趕盡殺絕!

Winnie喺最後一局被A隊同隊嘅其中一個隊友從後射咗四槍!又話槍口對外?又話圍剿馬生?點解?點解?偏偏係Winnie!太近距離連還四槍,Winnie痛到躺在地上動彈不得,加上當時天氣太熱面罩已經全是蒸氣,Winnie想回頭望吓邊個係二五仔都無能為力 🤬 以下呢張相證據確鑿,二五仔係邊個?一目了然啦!呢個二五仔事後完全無承認過自己嘅所作所為,繼續保持沉默,直到目擊者Jane透露事情的始末佢才認係佢支氣槍上咗漆彈之後自動射出嘅流彈,可憐的Winnie !

呢啲都係遊戲帶來的烙印!睇見都覺得痛呀!

漆彈戰場距離喱姐嘅媽媽屋企只係5分鐘車程,所以喱姐安排咗全部隊友去佢媽媽屋企梳洗。 而喱媽知道我哋玩完漆彈後會家訪,預先煲定一煲糖水俾我哋解暑,還切了一大盤水果招呼我哋,實在太感動了~~

於喱媽屋企梳洗完稍為休息咗一陣,下午1430就出發到附近嘅餐廳”林師傅”食午飯,呢間係喱姐食開嘅私房菜,喱姐同老闆好熟,所以喱姐托老闆搵咗一啲地道嘅食材煮俾我哋食,最深刻印像就係嗰條馬拉先食到嘅巴丁魚 ~~

食過午飯就已經要開始出發往吉隆坡機場區嘅最後一個行程了,就係上機前去”Mitsui Outlet Park”購物城最後衝刺 ~~

女仕們對衫褲鞋襪情有獨鍾,好快就有戰利品 ~~

啲貨品無日本或美國嗰啲outlet咁多著名品牌而且價錢唔算太平,所以無乜太多戰利品帶返香港,反而今次帶咗好多戰績「傷口」返香港,哈哈!

行完outlet之後我哋今個上山下海的旅程就正式結束了,喱姐同緣人2個為咗送完我哋機之後可以方便自己返喱媽屋企,所以佢哋自己駕車而無一齊坐我哋架旅遊巴去機場,佢2人會逗留多三天先飛返香港。 喺旅遊巴上爛玩嘅Jenny化身導遊珍反串一番,片段中有講喱姐壞話🤫想知內容就要睇晒條片啦,哈哈!

旅程圓滿結束⋯⋯多謝喱姐悉心安排、多謝緣人充當司機,更多謝各玩得嘅團友全程投入、團隊精神以及不計較嘅心態,令整個旅程增添咗如此多嘅難忘快樂時光!期待未來可以再一齊創造更多更精彩嘅開心旅程 ~~

 

Thank you for watching! 65 Crazy monkey emoji funny gif iPhone Android Emoticons Animoji