喜馬拉雅山下的尼泊爾之行「Part 3」

Day 5 (22Sep2013) —

尼泊爾的北方擁有世界上最高聳寒冷的喜馬拉雅山脈，而在距離一兩百公里的南方卻擁有炎熱、屬於印度河流域的台拉河(Terai)的谷地平原 ~~

佔地不大的台拉河流域，卻擁有兩個世界馳名、被聯合國教科文組織列為世界文化與自然遺產名錄的倫比尼(Lumbini) 和奇旺國家森林公園(Chitwan National Park)，而我地今日要去嘅目的地就係距離波卡拉約6小時車程的奇旺國家森林公園，所以今天一早5點30分就起床準備要出發去搭長途巴士，收拾好啲行李之後就去酒店餐廳度嘆返個自助早餐先 ~~

食飽早餐退咗房之後個司機就準時地在7點30分到酒店接我地去長途巴士站搭車去奇旺國家森林公園區 ~~

車票係Harish一早幫我地買嘅，車票係20美元一位包午餐〜

不過今日呢班車竟然只係得我地2位乘客，等同包架冷氣豪華大巴一樣，真爽呀，呵呵！

巴士由早上8點開出，車程約6小時，中途11時左右會停喺Muglin的一間motel度俾司機休息下順便俾乘客落車食一個自助午餐同埋去下洗手間〜

唔好睇呢碟咖喱雞嘅賣相麻麻地呀，其實好好味架，我蝦子餅都不知食得幾咁滋味呀！

食飽再上車就繼續瞓下覺，好快就喺下午2點15分到達奇旺區嘅總站喇 ~

一落車已經感覺到個天氣好熱, 因為奇旺位於南方，所以當地的氣溫比其它尼泊爾嘅地區熱，6月底雨季的奇旺，氣溫常飆到攝氏40多度，而9月份下午的氣溫都高達36度 ~

因為我一早已經喺香港訂好咗呢2晚嘅住宿，所以一落車已經見到有渡假村嘅職員喺度等我地然後接我地去渡假村喇 ~

呢間Sapana Village Lodge其實係位於奇旺索拉哈區的一間Lodge，佢並唔係一般的酒店格式，而係建於河邊一間一間好特別嘅黃色屋仔，一共有24間房間，有冷氣同獨立洗手間，港幣430一晚連2人早餐 ~~

上樓梯左邊第一間就係我哋呢兩晚嘅房間喇 ~

返到房間安頓咗啲行李之後就周圍行吓參觀一下渡假村嘅環境先 ~

呢個係一個放鬆嘅好地方，位於叢林附近，好貼近大自然，非常有渡假feel嘅一間lodge ~

又有好靚嘅河景呀 ~

渡假村入面仲養咗幾隻好可愛嘅大象，明天我仲約好咗要同隻大象喺河中一齊洗白白添，好期待呀！

呢個大象家族好快將會又有第二隻小象加入了，因為以下隻大象媽媽已經有咗22個月的身孕了，見到佢嘅肚好明顯地左右兩邊向外凸起了嗎？

Hea咗一陣好快就到傍晚5點喇，職員建議我地行去渡假村後面嘅稻田度睇日落，而且佢仲話喺河嘅另一邊可以見到日出添，所以我地決定明天早少少起床行去河邊睇日出〜

渡假村附近的當地村婦 ~

5點30分就開始夕陽西下了 ~

喺稻田慢慢咁欣賞日落, 好正呀 !!

日落之後都無乜節目喇，咁就一於去渡假村嘅餐廳食晚餐啦 !!

不得不提嘅係呢度個大廚整得一手好菜，無論早餐，午餐或晚餐啲食物都煮得好好味，今晚嘅晚餐有時菜沙拉、忌廉汁魚柳飯、仲有雞扒配薯條~~

明天要早起去睇日出，所以食飽晚餐之後又夠鐘返房去做豬喇， good night!!

Day 6 (23Sep2013) —

早上5點40分一於行去河邊試吓會唔會見到日出先 !!

咦……! 睇黎好似有啲機會喎……..!!

真係估唔到喺呢個地方我終於成功地破解到呢幾十年嘅日出魔咒，成功咁見到我人生嘅第一次日出，巧感動呀！

以往咁多年出遊的時候我一有機會就會刻意地安排凌晨上山去睇日出，可惜每次都睇唔到，一係就遇到大霧的天氣，一係就落雨，或者係未出發已經有雷暴警告要取消行程，反而在尼泊爾的奇旺區我並無預料會睇到日出的，但偏偏又給我遇上了，所以這漂亮的日出讓我悟出了一個大道理，就係每樣事只要不刻意去強求的話，反而會有出乎意料之外的驚喜 ~

睇完人生第一次日出之後就帶住勁靚嘅心情返去嘆返個早餐先 ~

坐喺餐廳對住個咁靚嘅河景用餐的確唔錯架〜

其實呢間渡假村的位置都算好好，睇日出同日落真係一流架….不過佢最大嘅缺點係電力問題，喺尼泊爾嘅偏僻地區停電係好正常嘅事。就算渡假村設有發電機但如果每間房都住滿咗旅客而又同一時間開晒冷氣嘅話，啲發電機嘅電力都無法負荷到而導致停電。我哋嘅第一晚完全冇停電嘅問題，因為只係得我地同隔離房來自上海的一對夫婦住喺呢度，不過第二日有一大班由加拿大的遊客入住了酒店之後，我地當晚就經歷了一個非常難挨嘅停電晚上，全晚又熱又焗，完全無法入眠，因為整晚都感覺到有嘢咬，痕癢無比，但又因為停電而無足夠嘅燈光去檢查到底係乜嘢咬我地，夜晚都只係靠支電筒仔去沖涼同刷牙咋……到天光望下大家身上的紅腫粒粒，先知道原來張床同枕頭都係有超多床蝨，好恐怖呀！

原來床蝨係熱嘅氣溫下才活躍的，所以第一晚有冷氣時感覺無咁嚴重，啲床蝨係當我地好夢正甜時就開始追蹤人體發出嘅熱能和睡眠中呼出嘅二氧化碳而吸咬人吸血，咬過嘅位置紅腫極痕，可能痕足數日或數周架！

食早餐時又遇到嗰對上海夫婦所以我又問下佢地，原來大家都一樣慘遭床蝨嘅侵襲，而搞到滿身又紅又腫呀陰公！

吃完早餐之後8點鐘就坐度假村的車出發到森林公園嘅入口去 ~

奇旺國家森林公園佔地932平方公里，是尼泊爾第一個國家公園，也是尼泊爾最大的野生動物園，更是吸引全世界遊人來此的自然生態公園。在尼泊爾語裡：Chi 為心臟，Wan為叢林，所謂Chiwan（奇旺）是叢林的心臟地帶。所以奇旺國家森林公園的意思係進入尼泊爾叢林的心臟地帶 ~~

公園擁有50種哺乳動物、525種鳥類和55種兩棲動物。其中以白犀牛、孟加拉虎最著名。全區可分為草原遍佈的熱帶及亞熱帶森林區、波羅雙樹森林區及河濱森林區等。約有5.2萬戶原住民住在公園裡，從事傳統的農耕，與野生動物朝夕相處，也是公園的一大特色 ~~

其實很久以前，動物數量及種類繁多的奇旺，早就是尼泊爾皇家最鍾愛的狩獵區，連英國皇室成員及達官貴人也蜂擁而至，前來狩獵 ~~

1951年，皇家奇旺公園成為尼泊爾皇帝的御用獵場。

1961年，為了保護生態環境，開始正式禁止狩獵。

1962年，國王馬亨德拉在此建公園，保護熱帶景觀的生態環境，及瀕臨絕種的獨角白犀牛。

1972年後，設置軍隊，在公園內日夜巡邏，保護野生動物，讓珍稀動物不再被偷獵者捕殺。

1973年，為了保護瀕臨絕種的100頭獨角犀牛和不足20頭的老虎，奇旺被列為尼泊爾第一座國家公園。

1984年，聯合國教科文組織將它列為世界自然遺產，撥專款，並派專人定期巡邏，確保森林自然景觀與生態不受破壞。

1972年，初成立公園時，全園僅有100頭犀牛，現在犀牛數已超過500頭，還需遷移到西部的巴地亞國家公園，足見生態保育的成功。

現在奇旺被譽為亞洲管理最好的國家公園之一，是遊客最嚮往的野生動物樂園。所以到奇旺最令我哋期盼嘅活動就係騎著大象到原始叢林裡去探訪各種瀕臨絕種的野生動物 ~~

背著木框座架的大象已在等候我地喇……! 四人一組登上高架台，依序坐進一個木座架裡，興奮地等候出發了~~

Go go go ….!!! 坐在象背上，搖搖晃晃地越過草地，開始進入叢林 ~~

坐在大象上探險全程係穿梭在原始森林裡，尖銳粗硬嘅樹枝有時會刮傷皮膚，所以最好係穿長袖和長褲及包腳鞋, 而且在叢林間行走時，千萬要噤聲不語，因為動物耳朵尖得很，稍有風吹草動，早就逃之夭夭了 ~~

不過當日有一大團強國旅客又係同一時間參加咗elephant jungle safari呢個活動，佢地坐嘅幾隻大象咁啱就係跟住我地隻大象後面，而佢地成班人鬼殺咁嘈，大大聲講話又唱山歌，嘰嘰喳喳地相互喧嘩叫鬧著，真係驚死啲動物唔知佢地入咗個原始森林度咁，啲動物仲唔嚇到走晒咩！

好彩行咗一小段路之後個象夫醒目地搵咗第二條路行，避開呢班強國人之後大家先可以耳根清靜地享受一下寧靜的原始森林的探險之旅咋~~

今次我地運氣都算唔錯喇，雖然一如預期咁無見到老虎，卻見到許多沒預期見到的動物：例如梅花鹿、彌猴、野豬、豚鹿和一些不知名的動物 ~~

過咗個多小時都仲未見到最想見嘅白犀牛，以為真係俾班強國人嚇走晒，突然間象夫回首向我們遙指前方的泥水窪，原來係有兩隻犀牛正在做泥浴喎 ~~

體貼的象夫急速咁趕去泥水窪前，俾我們近距離影相、觀望、睇個夠 ~~

或許已經習慣了被人觀浴的場面，啲犀牛既不走避，也不緊張，依然故我地悠然泡在泥水窪裡 ~~

運氣都算唔錯，前行無幾分鐘，又再喺另一泥水窪裡睇到另一隻大犀牛泡澡洗浴。同樣地，佢一點警覺性都無，繼續享受佢嘅spa, 哈哈！

犀牛在水中一副遲緩笨拙狀，其實它的奔跑時速可高達百多公里，龐大的身軀，加上比匕首還尖銳的牛角，連老虎都要讓它三分，所以在山林裡可橫行霸道，唯一不敢惹的，就是比它體積更龐大的大象，因此，原始森林的探險之旅必須借助大象代步, 因為騎大象逛叢林，除了可以防犀牛攻擊外，也可防孟加拉虎的襲擊~

尼泊爾人稱奇旺附近的廣大草原為Pagmara， Pag 為老虎，mara為殺害，Pagmara就是屠殺老虎的地方，可見當年有許多老虎在此出沒，不過現在因為老虎嘅數量實在很少，加上警覺性極高，喺奇旺要見到老虎實非易事。象夫都話只見過三次野生老虎咋！

聽講話喺草枯野獸易現形的二月或三月晨昏時分，才有機率見到孟加拉虎 ~~