白色的元旦在【北京】

DAY 1 (1Jan2010) 天陰, 氣溫攝氏零下7度

啱啱喺檳城過完個暖粒粒嘅聖誕, 跟住又同老公去北京過個凍冰冰嘅元旦喇 ~~

我們搭中午12點起飛的港龍KA908班機, 下午3點半到達北京, 然後再轉搭機場快軌線10號線去到朝陽區”三元橋站”, (機場快線單程票價25元一張)

我們這次住了四晚Novotel Sanyuan Beijing”北京諾富特三元酒店”, 酒店的正門就對正”三元橋站”D出口, 步行約20秒就可到達酒店正門, 而搭地鐵到處去觀光都十分方便……

我們的房間1207, 我很喜歡這間房, 裝修很新淨又舒適, 一入到房間最大的驚喜就是這隻趴在我們床上的大熊貓…真是超可愛 !!!

放下行李之後休息了一陣, 然後大約6點鐘在”三元橋”站買了兩張公交卡, 每張RMB40, 而在北京無論搭幾多個站都只係一律兩元, 非常抵搭 !!! 因為時間唔早, 所以只去了”王府井”站A出口的王府井大街逛逛, 順便食晚餐….

王府井大街 我覺得有似上海的南京步行街, 都係名牌百貨公司林立的一條步行街…..

求其揾咗一間食川菜嘅餐廳, 環境就差, 不過勝在夠平又好食…..

王府井小食街

整條街有好多檔位都賣炸昆蟲….會唔會俾遊客們誤會我地中國人最喜歡食嘅就係呢啲昆蟲呢? 好恐怖呀 !!!

東華門夜市

不過我又相當喜歡這些冰糖水果, 尤其是冰糖草莓 ~

DAY 2 (2Jan2010)
有細雪, 氣溫攝氏零下8度黎到北京先知道會落大雪, 所以一早就趕去西單文化廣場買對雪靴先…..

餐喺“馬大嫂”食手工水餃 2份共36隻, 每份10蚊人仔 + 肉躁茄子手工拉麵, 只係8蚊人仔

然後搭地鐵去到天安門廣場 ~~

由天安門行過去遊覽現今世界上保存最好、規模最大的故宮博物院『紫禁城』,它是由太和殿、中和殿、保和殿所構成, 規模宏大的故宮,建有大小六十多座的殿閣,廳房數俗稱9999室,收藏品達百萬件….

故宮博物院 (The Forbidden City)地鐵1號線到天安門站, 步行10分鐘至故宮午門入口, 門票每人RMB40 (淡季票價)

租了一部掛頸式廣東話自動講解機, 10蚊人仔, 非常有用….我地喺故宮一路行, 部機有自動地點感應器會一路為我地講解身處所在地的景點…..好方便又唔怕會迷路….




















然後去了行街街買嘢






早一日打電話預訂了枱, 晚上6點去”團結湖”站的大董烤鴨店試下呢間個個網友都推介嘅烤鴨店….北京市團結湖北口 3 號樓 (長虹橋東南側)
Tel:(010) 6582 2892 / 6582 4003




試了水晶鴨肝(幾好), 酥不膩烤鴨(唔錯), 糖醋小排(可以接受), 醬爆堅果雞丁(好濃味), 清炒豆苗(冇乜味),  鴨湯 (淡而冇味), 鵝肝炒飯(似捞飯多啲), 及生果…埋單RMB638個人認為”大董烤鴨店”只講究嘅係食物賣相, 份量小但賣相精緻, Fine Dining Concept, 名過於實, 中國人所講嘅鑊氣就欠奉….外國人應該會比較鍾意…..只係個人口味不同….







晚飯之後前往參觀2008北京奧運主場館外觀:鳥巢及水立方,可欣賞這兩個奧運著名建築….地鐵10號線到”北土城”, 轉奥运支線到”奧體中心”站 ~~


鳥巢及水立方晚上10點就會熄燈, 所以要趕喺熄燈之前去到…..




又一驚喜 ! 有間好靚嘅變色聖誕雪屋喺鳥巢及水立方中間呀!!!




DAY 3 (3Jan2010) 
落大雪, 氣攝氏零下10度一早7點起身打開窗一睇….嘩 ! 只見到一片白茫茫, 呢場大雪由昨晚落到今晚9點先停, 周圍啲積雪堆到成尺幾兩尺高…連我地今早去懷柔境內的慕田裕長城計劃都被逼取消….原本前一日已經揾咗架包車約咗今早8點出發去長城, 不過我地真係好好彩臨時見到落咁大雪取消長城行程咋, 因為夜晚新聞報導話因為大雪引至有逾千人滯留喺長城條公路度而車上又無晒油, 返唔到北京市……勁慘呀!!!
所以我地就改行程去頤和園(Summer Palace) , 搭地鐵4號線去到”北宮門”站 ~~







當時落緊好大雪, 我地踩着厚厚嘅雪地先喺附近揾咗間鄉村小餐廳食早餐~~


好好味的小雲吞湯兩碗, 一籠狗不理包子, 兩杯熱豆奶, 埋單只不過係8蚊人仔 ~ 平到我唔信呀 !

頤和園的東宮正門, 門票 RMB20 每人 ~













































由北宮門離開頤和園, 然後我地順路搭地鐵去咗”動物園”站的時裝批發城”韓國城”逛一逛…..


由於今日實在落太大雪喇…天寒地凍, 所以都以室內活動為主, 下一站去了遊客必到的秀水市埸, 類似深圳羅湖城, 都係賣啲冒牌貨為主….

東方新天地


DAY 4  (4Jan2010) 天晴, 難得一見的陽光同藍天, 開始溶雪, 氣溫攝氏零下16度, 當地新聞報導話今日係北京40年黎同期最凍嘅一次
…而昨日的大暴雪降雪量亦創59年記錄….乜我咁好彩架??? 而昨日的一場20小時長命大雪引至北京機場只得一條跑道可以正常運作, 8成航班都取消晒….真係旅客的一大惡夢呀~~早上11點出發去到”鼓樓大街”站, 然後慢慢行過去”什刹海”……






什刹海是北京中心城區的一個風景區,什剎海位於北海公園北門附近,由西海、前海、後海一帶沿岸名勝古迹組成,景色充滿傳統老北京特式風貌,兩旁設有鐘樓、鼓樓等等….


湖面已經凍到結成冰變咗一個滑雪埸 ~~






我地原本諗住去王菲擺結婚酒個間位於後海嘅”小王府”食晏, 可惜冇開門, 最後都喺後海揾咗一間叫做”南門涮肉”嘅食刷羊肉….





好好味 ~ 羊肉嫩到入口即溶, 價錢合理, 兩人埋單120蚊人仔 ~然後坐三輪車遊胡同, 嗰位三輪車叔叔一路踩一路好細心咁為我地講解老北京以及胡同的背景故事, 又介紹各間著名四合院俾我地認識….佢真係好nice架 !!!一個半小時的行程: 什剎海, 胡同游, 煙袋斜街, 鐘樓鼓樓, 南鑼鼓巷 …..收費每人60蚊人仔 ~








但係坐喺三輪車裡面, 迎面陣陣寒風刺骨, 我啲手脚今日第一次感覺到凍到僵硬, 臉上開始掛住兩行鼻涕….好凍呀 !!!所以我地落車跑咗一陣令體溫回升, 而三輪車叔叔就跟住我地後面繼續講解……















三輪車叔叔載我地去到”北海公園”門口, 但係我地覺得今日特別寒冷所以無興趣入去參觀, 前嗰幾日喺北京氣溫攝氏零下7度我地都仲頂得順, 但今日開始融雪, 氣温只有攝氏零下16度, 仲要長時間喺戶外活動, 所以終於頂唔順要删減行程早啲回酒店取暖休息….

晚上唔想又要着咁多件衫先可以出去食飯, 所以又改咗喺酒店食自助晚餐, 酒店住客有優惠, RMB118 nett每位, 不過食物就好一般 ~






DAY 5  (5Jan2010) —一早7點鐘離開酒店搭機場快線去機場搭國泰航機 CX347返香港喇 ~ 機長在準備起飛嘅時候廣播話, 因為北京嚴寒天氣而引至架飛機的水管結晒冰而整架飛機全程都冇食水或廁所水供應….而引擎過凍亦未能即時啟動而要延遲起飛…..到引擎可以啟動又話北京機場繁忙所以要排隊起飛, 最終班機遲咗95分鐘先至起飛…..

後記:今次元旦的北京旅程真是比較難忘…..由開始計劃都旅程完結, 當中波折重重….原先係我的哥哥想帶3個姪仔姪女加埋我媽咪去天津同北京玩, 話買咗Airasia去天律的特價機票, 俾晒錢又confirm晒, 邀請我一齊去玩, 約咗12月3號喺北京回合我, 點知Airasia無啦啦喺出發一星期之前又取消晒飛去天律的航班直至到2月28號, 搞到我家人被逼要取消這次行程因為3月小朋友要返學嘛, 但係我又book好晒Novotel Sanyuan Hotel兩間房共四晚, 又俾晒錢, 咁點呀? 所以最後又要求酒店俾我改期, 改到期咁又揾邊個同我去呀? 有兩間房喎 ! 又試過喺香港討論區登過廣告希望可以半價出讓多咗嘅一間房, 但係到最後都冇人覆…咁唯有邀請朋友去囉….幾經辛苦終於都揾到一個女朋友又有假期,又想帶爸爸媽媽一齊去, 咁就成功讓咗間房俾佢喇….而我就最後叫蝦子餅請假一齊去, 唔想浪費咗間酒店房嘛……等到1月1號元旦終於可以起行喇….到咗北京之後又遇到大暴雪, 又要更改我用心plan得咁辛苦嘅行程…唉 !!!但係諗真啲又覺得十分好彩,因為如果呢場暴雪遲一日先到, 咁我地就一定要滯留喺北京喇~~



不過整體黎講, 我地覺得北京靚過上海好多…地鐵都覆盖得比上海完善, 大部份景點同商場都可搭地鐵到達, 我地都好滿意同玩得好開心, 只係凍病了…這個遊記都係我喺北京每晚瞓之前同喺飛機上帶病寫的….多謝大家觀看同埋希望大家喜歡這篇遊記啦 !!!溫馨提示給冬天去北京的朋友 :建議買定多啲暖包, 我今次共用了15包, 放在衣袋裡要黎暖手同暖相機, 每次我影完相即刻將相機放落有暖包的衣袋度…咁相機的電池就唔會咁快玩完….北京地鐵站同機埸裡裡外外都冇暖氣架…記得要保暖呀 !

 

 

 

One thought on “白色的元旦在【北京】

Leave a Reply

Your email address will not be published. Required fields are marked *