**本輯油雞文字由團友Leng負責, 相片由Fung, Carine, 柳Sir提供***

話說本人平時都係去台灣或者大陸多, 對上一次去東南亞就係2002年既新加坡之行…你話幾耐歷史?? 當時年紀太細都無咩印象, 所以東南亞對我黎講可謂完全陌生…

咁點解我又會踏上呢次既馬拉之旅呢? 因為從舊年開始, 我就迷上寫油雞呢個玩意, 係其他版post油雞既時候就好自然同其他網友吹下水, 吹下吹下竟然同某啲網友變左真朋友… 今次馬拉之行就係由其中一位網友Carine吹雞! 其實我識左佢無耐佢就問我去唔去, 大家真係素未謀面, 但係我個刻都冇諗咁多, 好爽快就應承左!  係呀…諗咁多做乜? 我始終相信呢個世界好人總比壞人多~ 就係因為旅行令我既視野不停擴闊, 大不了去到中伏咪搵大使館求救囉 !!

今次既旅程好特別, 全程由馬來西亞地膽Carine安排, 我同男友Fung拍下蘿油就出發~~ 唔使自己諗既自由行都係第一次~ 加上幾位新相識既香討網友 — Carine蝦子餅Ron, 柳sir 同佢太太May, Roy同佢太太, 仲有另外2位朋友Swing同Ka Ling, 究竟同呢班新朋友既旅程會係點呢? 真係好期待 !!

講左幾個月既馬拉之旅, 等到今日終於出發啦 !!

其實出發前都聽過其他網友話Roy嫂係一個奇人, 結果…..聞名真係不如見面….未上飛機就有戲睇….

話說眾人在機場已經入哂禁區出左境, Roy嫂忽然嬲爆黑面…佢話佢要走喎!!! 之後真係拂袖而去….我地呆哂囉!! 望住Roy兄, 佢竟然話:「唔好理佢, 由得佢自己揾路出返去!」喂! 出左境點走呀??!! 但係Roy兄話唔理就唔理, 咁我地呢班閒人唯有滴住汗去登機囉……!!
但係臨上機既時候, 竟然見返Roy嫂現身, 真係…….  

行程&目錄:

Day 1 (27Jun2013) :香港 – 檳城 – Balik Pulau寶盛園(Bao Sheng Durian Farm) – Masjid Terapung水上清真寺 – Batu Ferringhi海灘區 – 逛夜市吃晚飯

Day 2 (28Jun2013) :早上酒店自由活動 – 義香買手信 – 劉榮和茶餐室 – George Town古城遊(Pinang Peranakan Mansion僑生博物館, 張弼士故居) – Teochew Chendul珍多冰 – (路經)怡保晚餐 (老黃海南雞飯&怡保沙河粉) – 吉隆坡 – 阿羅食街宵夜(黃亞華小食店)

Day 3 (29Jun2013) :  Lot 10 十號胡同 – Sri Mahamariamman Hindu Temple – Central Market – Petaling Street 唐人街 – Pavilion Mall – KLCC 雙子塔 – Hakka 客家飯店

Day 4 (30Jun2013) : 吉隆坡 – 雪蘭莪州 – Petaling Jaya – Kayu Restaurant 印度餐 – 永好茶餐室食叻沙 – 參觀currypuff屋企 – 跟currypuff屋企人睇樓 – 1 Utama Mall (Peranakan Place食娘惹菜) – Old Town 興記肉骨茶 – SS2 榴槤buffet – Sunway Pyramid

Day 5 (1Jul2013) : Ho Chak 好吃茶餐室食早餐 – Giant Supermarket買手信 – Secret Recipe@The Curve買榴槤Cheese Cake – Tesco Supermarket買榴槤 – KLIA 吉隆坡國際機場 – 香港

飛機準時08:20am碌出跑道, 好快我地已經係空中啦 !! 雖然影過N次, 但係我真係好鍾意坐飛機見到萬里晴空既景象 ~~

飛機餐A

飛機餐B



如果大家有睇新聞, 可能知道之前印尼有農民非法焚燒林木, 搞到D污染物飄哂去新加坡同馬來西亞! 我地出發前幾日check過馬拉既空氣污染指數依然高企…唉…點解會咁架…我第一次去旅行要預備口罩囉!
經過3小時既航程, 飛機大約在11:45am降落檳城國際機場! 咦…個天又無想像中咁灰喎, 太好啦 !!

機場大堂就見到舊檳城既相片, 又幾靚喎 ~~

其實喱姐(即係Carine)同緣人早一日已經到左吉隆坡, 一來佢地可以早一日同家人見下面, 二來佢地係為左大家既荷包著想~ 因為我地係租車自駕, 租車公司話如果檳城攞車吉隆坡還車會有附加費RM500~ 所以佢地寧願先在吉隆坡取車, 當日07:00am由吉隆坡揸3個幾鐘車去檳城接我地機, 實在太感動 ~~

我地呢幾日就係坐住佢周圍去! 日租RM300, 總之咁多個人除返開每人都係夾RM100 (HK$250), 好抵玩 !!

呢個時候Roy嫂佢落左機之後又嘈住要走 !! 要即刻搭飛機返香港 !! 乜料呀?! 你以為搭的士隨傳隨有咩?!  Roy兄都好勞氣 !!結果要喱姐、May同埋Swing又哄又氹先肯上車 !!

算啦…講返正題, 俾幅檳城既地圖大家睇下先! 其實檳城既精華景點都係集中係Penang Island上面, 好似檳城機場, 同埋我地將會去既榴槤園, 水上清真寺, Batu Ferringhi, George Town…所以我地呢2日既活動範圍就係係呢個島上面啦 ~~

正式出發前往馬拉之旅既第一個景點 !!
但係…我同Fung上左車無耐就…暈車!!!   唉…可能太早起唔夠訓就出事…暈到成pat野咁, 好樣衰呀!!!
救命!! 個景點仲要行啲好兜既山路先去到, 即刻暈多2錢重…!!

幾經辛苦終於黎到位於Balik Pulau既寶盛園! 暈到差啲落唔到車呀 !!

佢就係園主鄭先生! 佢先帶我地參觀榴槤園~~

噢! 榴蓮樹! 咁大個人都係第一次見咋!
園主話榴槤通常係夜晚先跌落黎! 佢地有眼, 唔會責親人~ 有無咁神呀? 而地下就有好多繩網接住啲榴槤 ~~

太有趣啦! 暈到死死下既我都死頂要影相 ~~

Fung暈到舉白旗~ 佢坐係度等我地返, 好可憐 !!

大家見到榴槤都好興奮咁同佢合照, 呢個未熟透, 不過園主送埋俾我地食 ~~

我地去既時間太晏啦…只係剩返青皮呢個品種~ 不過對我黎講無所謂, 因為我根本對榴槤無乜認識, 極其量只係識貓山王…都係因為呢個trip我先知有紅蝦, 葫蘆, D24, D101其他品種…真係大開眼界~~  

平時係香港只會食到泰國貨, 今次可以試下馬拉既樹上熟榴槤, 機會難逢 ~~
呢2個青皮價值RM100~~

勁飽滿呀 !! 食落口不得了…有濃濃既酒香味! 軟軟糯糯咁滑入喉嚨, 食完仲感受到濃濃既餘香 !! 其實我唔識寫食評….. 總之就好好味啦 !!

好滿足! 如果無暈車會更好…

離開寶盛園就去下一個景點 – 位於Tanjung Bunga既Masjid Terapung水上清真寺。馬來西亞係回教國家, 黎到點都要參觀下清真寺~
離遠睇好宏偉喎, 加埋藍天白雲, 靚呀!!

平時我對宗教又係無乜認識, 更加唔好話入清真寺, 今次有機會參觀感覺好新鮮, 入去要先除鞋 ~~

我地既導遊喱姐 ~~

Ron搞乜?

係咪睇唔出我地其實好暈呢?

間清真寺出面就係一望無際既海 ~~

參觀完清真寺就驅車返我地既resort先~ 途中有找換店大家先停車唱錢 ~~

呢度個rate係RM1:HK$2.5

等佢地換錢既時候, 我喺車上暈到忍唔住嘔囉…好辛苦 !!

終於捱到返酒店…今晚住喺Batu Ferringhi既Golden Sands Resort ~~

間房勁得喎! 一晚HK$1,496 ~~

我同Fung 2個虧人頂唔順要留喺酒店休息…其實嗰時都係4:30pm左右, 其他團友就出左去逛街食Tea ~~

柳Sir同May~~

Roy成個大佬咁, 後面有2個靚 ~~

你地就好啦…無我份 !!

喱姐好好人咁買咗當地既特飲桔仔酸梅俾我救命~ 酸酸甜甜好好飲呀! 可惜…我地擺得唔好, 唔小心倒瀉左一半…
點解今日咁黑架??!!

經過個多小時既休息, 我同Fung都回返魂啦 !!  會合返食完Tea既團友, 6:30pm就行出酒店外面既沙灘睇日落~

酒店設施 ~~

呢度應該係俾人搞宴會既 ~~

其實由酒店行幾步路就係Batu Ferringhi海灘區啦 !! 黎得呢度真係要住間靚resort, 呢啲錢唔慳得架!! 間唔中對自己好啲係應該既 ~~

見到咁靚既海灘, 今日嗰啲頭暈身興即刻冇晒啦 !!

椰林樹影 ~~

堅係有椰子喎 !!

巧Sweet !!!

海灘旁邊嘅草地有長椅任坐, 團友都攤晒喺度吹水歎世界, 簡直係5星級嘅享受 ~~

柳sir你受左咩刺激 ?? 

當日唔算有太多泳客, 好不容易先捕捉到比堅尼美女同大家開心share ~~

我地都係睇返正經野先…海灘有好多人玩呢啲降落傘, 不過我就唔敢玩啦, 巧驚驚呀!!

個日落巧靚喎 !!

連馬都有得騎 ~~

呢個moment緊係懶型咁玩下剪影效果啦 !!

愈夜愈美麗 ~~

呢2條友乜水黎架? 跑到走難咁?! 

個日落巧長呀, 落到7:30pm都未完, 我地就夠皮啦, 於是決定收隊行出大街覓食 ~~

食左呢間我愛你「I Love You Cafe」~~

老闆好搞笑, 咁都肯陪我地癲 ~~
其實馬來西亞人都好nice, 我黎左第一日已經感受到, 同埋呢度既華人好多都係講廣東話, 絕對唔怕溝通唔到餓死你!
不過我又覺得走到咁遠去旅行聽到咁多廣東話好似唔知點咁, 真係好矛盾!!

老闆同我地揀食材 ~~

大家排排坐等食 ~~

有得試馬拉既地道小吃, 「炒粿條」即係炒貴刁 ~~

馬拉串燒 (雞&牛)

魷魚雍菜, 好新奇既一道菜, 不過啲醬怪怪地, 唔係好食得慣 ~~



燒大蝦

燒魔鬼魚

燒魷魚

首次開餐大合照 ~~

話明美食遊, 我地緊係出命食啦! 食完「 I Love You」就繼續掃街, 過左附近foodcourt食食食 ~~

滑蛋河

蝦面

煎蠔餅

海南春卷

燒雞翼

好飽呀!! 要行街幫助消化…..行行下買咗呢個馬拉特有既汽水, 叫做Kickapoo, 佢有個好有趣嘅中文朵「契家婆」, 我覺得有啲似7喜嘅味道, 幾好飲 ~~

10:00pm就返到酒店啦, 原來EXL都有搞榴槤團黎呢度 ~~

我地返到房就飲下酒吹下水, Relax吓 !! 不過馬拉既啤酒都幾貴, 計返港幣差唔多要20蚊一罐 ~~

吹到12:00am大家都眼瞓投降…咁就結束咗愉快嘅Day 1啦 ~~

Day 2 (28Jun2013) —

今日12:00pm check out後先會去下一個景點, 所以團友們有成個早上喺酒店自由活動~
我同Fung兩個虧人尋日暈車浪, 所以今日想瞓晏啲, 9:30am先起身活動…其他團友好早就出動, 享受陽光與海灘 ~~

Roy嫂出場啦! 佢真係尋日今日2個樣, 你睇下佢幾風騷!!!  我有理由懷疑佢學過四川變臉 ~~

佢仲同喱姐講：「今次好好玩呀, 同你地去旅行好開心, 下次都要跟你地去!」喱姐話覺得受寵若驚! 係驚慌個驚 !!

Roy夫婦嘅恩愛照片好珍貴架!! Roy你尋晚做過咩黎?? 你老婆今日咁開心嘅??

呢啲地方緊係有比堅尼美女係左近, 喱姐好厲害, 影到好似外國狗仔隊啲名人偷拍照咁 ~~

睇住咁多先, 再貼會變左成人版架喇 !!

Roy嫂今日真係好活躍喎…竟然走去玩降落傘 ~~

一切準備就緒, 衝呀衝呀衝呀衝呀 !!!

咪住!!!!!!!!!!!!!!!!!!!
突然風雲變色, 刮起一陣狂風!! 工作人員話好危險, 唔飛得!!!!
吓!! 竟然冇得玩?! 唔通連個天都唔鍾意你 ??

但係人地又飛到嘅 ??

鏡頭一轉, 輪到我同Fung兩個懶人10:00am落黎食早餐啦 ~~

呢間Resort既早餐buffet一啲都唔頹, 中式西式乜式都有! 選擇多到冇朋友!! 我地勁後悔做乜唔早啲碌落黎呢? 搞到而家唔夠時間嘆早餐啦 ~~

食完就碌出酒店hea下~~

12:00pm check out後, 就要同呢間resort講bye bye去下一個景點啦 !!喱姐先帶我地去義香買手信, 呢度有好多唔同既糕餅售賣, 最出名係佢既麻油! 連香港某聲大夾惡, 鬧人唔使本嘅飲食節目主持都介紹過 ~~

柳Sir喺馬來西亞搵返佢嘅失散兄弟 ~~

大家都買得好開心 ~~

下一站就要去食午餐啦 !!呢間「興發茶室」係人氣食店 ~~

不過…我地食咗隔離嘅「劉榮和茶餐室」 其實我地今餐既食物同尋晚個餐幾乎一樣, 不過尋晚既Batu Ferringhi始終係旅遊區, 要尋找最正宗既地道風味, 一定要黎呢啲街邊茶餐室 ~~

又係奇怪既魷魚雍菜  ~~

呢啲就係魷魚雍菜未熟前嘅樣喇 ~~

蝦面, 好惹味! 個湯底係辣架, 唔辣得既我都食到停唔到口 ~~

  煎蠔餅

炒粿條~ 呢碟野係我成個馬拉之旅覺得最好味既食物之一 !! 而家寫油雞仲流緊口水 ~~

又飲桔仔酸梅!! 好好飲呀!! 好偉大既發明 !!



懷舊feel ~~

我地架車俾人係車頭夾咗張咁既野~
放心! 唔係牛肉乾! 呢度興泊車之後開張單俾你夾係車頭, 到走個陣有人會同你收錢 ~~

食飽後我地就向George Town出發啦~

George Town係檳城既首府, 因為佢特有既建築同文化風貌, 2008年7月7日獲聯合國教科文組織列入世界文化遺產! 鍾意睇古蹟同懷舊建築既朋友一定唔可以錯過呀 !!

街上面仲有好多三輪車~~

Old Town White Coffee隨處可見 ~~

旅行既意義除左吃喝玩樂, 了解當地既風土人情更為重要! 所以我地下個目的地就係George Town既Pinang Peranakan Mansion 「僑生博物館」 – 呢度係認識娘惹文化既好地方!

咩係娘惹呢? 其實係指15, 16世紀既華人移民同當地馬來女子通婚所生既後代, 男既叫「峇峇」(Baba), 女既就叫「娘惹」(Nyonya) 佢地既保存咗中國既傳統習俗, 同時亦糅合咗馬拉既地道生活文化, 再加上馬來西亞曾經係英國殖民地, 娘惹峇峇接受西芳教育後更加習染左西方既社交文化禮儀, 所以娘惹係馬拉一個非常獨特既多元文化族群, 而娘惹大多聚居係檳城同馬六甲 ~~

僑生博物館興建於19世紀, 係當時被封為「甲必丹」(Kapitan Cina)既華人領袖鄭景貴既故居同辦公室~ 呢個博物館內藏超過1000件古董同家具, 係檳城典型既娘惹峇峇豪宅~ 而博物館既馬拉文Peranakan就係土生華人既意思, 亦即係娘惹峇峇~~

入場費RM10 ~~

一見呢個天井已經有富麗堂煌既感覺 ~~

中式既屏風, 酸枝木椅, 再加上西式長桌, 水晶吊燈同埋大掛鏡, 充分表現到娘惹中西合壁既文化 ~~

開心大合照 ~~

牆上掛咗好多娘惹峇峇既相 ~~

呢2位就係第二代娘惹峇峇屋主, 佢地既結婚照, 見到男的會著西裝, 女的就著混合左中國同馬拉風格既禮服 !!

我覺得呢位娘惹好靚女呀!! 就連呢個峇峇都幾帥 !!

等我又扮下娘惹先 !!

而上流社會既峇峇都有鋪抽鴉片煙癒, 屋企預備埋煙床隨時抽返兩咀, 而我地有真人示範架, 睇下Roy抽得幾豪邁 !!

柳爺仲厲害! 真係人如其名, 抽到飄飄下 ~~

呢張檯內有乾坤架 ~~

需知道以前啲太太小姐無乜娛樂, 最大消遣咪約下三五知己打牌打發時間囉, 就好似呢4個食飽飯無野做既女人咁 ~~

連金舖都有 !! 係因為以前無金舖, 所以屋主要專登請啲打金師傅返屋企度身訂造一啲金器飾物俾啲太太們同千金們戴架 !!

有兩個偽娘惹係度炒菜 ~~

仲記得導賞員話睇呢個車牌就知屋主幾厲害! 因為P1, 2, 3係檳城既馬拉人領袖擁有, 到P4就係呢個華人屋主啦 !! 你話佢幾威!!

大宅旁邊保存左一個中式祠堂, 用黎供奉鄭氏祖先 ~~

祠堂屋頂有好多蝙蝠, 小心中招 !!

有好多精緻既雕刻 ~~

用一舊樹根雕出黎架! 好勁 !!

又返入大宅內, 繼續參觀樓上既房間同家具 ~~

新房 ~~

娘惹都有呢個習俗, 就係新婚洞房後, 會放一對公雞母雞喺床下底, 第二日如果係公雞突個頭出黎先, 就代表呢對新人會生仔, 相反, 母雞就係生女~~
我同Fung都係示範下咋…你叫我生舊叉燒好過啦 ~~

呢幅傑作上半部份係畫出黎, 下半部份由刺繡整架! 又係好勁 !!

最後見到呢張奇怪嘅椅, 導賞員話兩公婆鬧完交好啱用喎~~

Ron又黎喇 !! 

話咁快參觀完僑生博物館, 我地又繼續去下一個景點啦 !!
路上既三輪車好有特色 ~~

加埋美女仲正 ~~ 

George Town真係隨處可見呢D老房子, 色彩斑斕好靚架 !!

呢度就係張弼士故居 (Cheong Fatt Tze Mansion)啦 !! 佢又名藍屋, 現場睇外牆真係藍到勁sharp! 呢棟建築物興建於1897年, 係馬來西亞最古老既中式大宅之一,  現時大宅內部已改建為酒店, 只有參加定時既導賞團先可以入內參觀…其他時間閒人唔可以入去架, 我地都係喺門口影左呢張相咋, 想影多2張已經俾人趕返出黎…

睇完古蹟就緊係去食食食啦! 去食店前要經過一條巷仔~ 呢班人喺度做咩呢? 係咪拍緊「黑社會3之馬拉風雲」呀 ??

我地其實係去Lebuh Keng Kwee既「Teochew Chendul」食地道Cendol呀! 即係珍多冰 ~~

原本我地諗住佢係街邊檔要買上車食, 不過原來隔離有舖位喎, 可以舒舒服服慢慢食 ~~

綠色一條條嗰啲就係Cendol,  咬落好QQ咁囉 !! 而個一大舊啡啡地既物體就係珍多冰既精華「椰糖」, 炎炎夏日食住呢碗Cendol真係爽死 !!

呢碟東西就係囉吔 (Rojak), 佢又係用魷魚雍菜啲醬撈落啲水果呀, 瓜呀咁, 結論係我依然食唔慣呢隻醬, 覺得好奇怪囉 !!

食完Cendol同Rojak, 話咁快我地就要同檳城講拜拜啦! 

又俾幅地圖大家睇下先! 而家5:00pm, 我地要由位於馬拉北面既檳城George Town, 向南揸三百幾公里既路, 途經怡保 (Ipoh), 最後抵達Kuala Lumpur吉隆坡,  齋睇地圖都覺得遠…!!

之前都係Roy或者Ron揸車, 今次換左柳sir做司機,  佢手車係飛行模式, 呢次長途車應該好快到~~

檳城橋巧塞車呀 ~~

塞左唔知幾耐終於上到高速公路! 柳sir用佢既飛行模式全速前進! GoGoGo !! 

行左一段時間, 喱姐話呢度係公路休息站, 可以停低去茅廁! 唔係喇啩!!! 個休息站起到成個花園咁! 好靚喎! 本人平時喺大陸見既休息站多數甩皮甩骨, 核核突突, 人地外國原來係咁正…係我見識少 ~~

休息站有好多生果賣 ~~

繼續趕路 ~~

8:10pm我地飛車落到霹靂州 (Perak)既首府怡保啦! 點解專登要黎呢度呢? 為既就係怡保著名既雞飯同沙河粉囉 !!
呢間「老黃」好多人幫襯, 我地就食佢啦 !! 

師傅起勢斬雞切菜 ~~

又黎開心大合照!! 不過見唔見到Swing個樣有啲唔妥? 佢竟然抵受唔住柳sir既飛行模式, 唔舒服作嘔…
佢飯都食唔落, 好可憐呀 !! 

有野食啦!!! 超嫩滑既雞, 好好好好好食!! 配埋油飯, 冇得頂!!

仲有怡保沙河粉 + 飲咗好多次既桔仔酸梅 ~~

馬拉既芽菜同香港係唔同架! 香港個啲又長又瘦, 馬拉就相反, 又肥又短, 咬落卜卜脆! 我都唔識寫啦…總之好好味啦 !!

仲有呢個彈牙肉丸 ~~

今餐真係好正呀! 不過由於要趕路落吉隆坡, 大家唯有食快啲閃人啦…8:45pm又開車, 我地食飽左, 架車都肚餓要食飯啦 !!

揸車既野我就唔識啦, 不過聽佢地講馬拉入油比香港平好多, 大約港幣5蚊一公升 ~~

Ron入油入到好似問米咁 ~~ 

柳sir好興奮又要試下 ~~

之後坐左好耐車, 11:15pm終於去到吉隆坡!! 好野!! 先去我地今晚既酒店 – Hotel 1915放低行李先~~

呢間算係經濟型酒店, RM160一晚, 間房比較細, 梳洗用品要自備, 而且周圍環境比較嘈…無計啦, 想慳錢就要張就下 ~~

搞掂就…緊係唔係訓覺啦!! 係出去繼續食宵夜呀! 油雞叫得美食遊, 絕對唔會貨不對版既~~
我地出發去阿羅食街! 個時已經12:00am, 條街仲超塞車…吉隆坡既塞車問題真係好嚴重!!  塞左好鬼耐終於去到阿羅食街既人氣食店 – 黃亞華小食店

如果大家心水清, 可能會發現明明話10個人去, 但係啲大合照就好似少左1個人咁…你冇撞邪,亦冇計錯數~~ 其實係另外一位朋友Ka Ling喺Day 2先由香港飛往吉隆坡會合我地, 佢而家出場啦 !!

準備好未? 又有引死人既食物照啦!! 黃亞華最出名既燒雞翼 ~~

「福建面」用豬油渣炒架! 好香 !! 愈唔健康既野愈好味 !!

黃金蝦

馬拉串燒

炒啦啦 (蜆)

螄蚶

雖然熟左, 但係總覺得血淋淋唔知點咁 !! 

飲左N次既桔仔酸梅 ~~

呢度就係阿羅食街出面, 呢個檔類似街邊打邊爐, 自己淥完逐串計錢, 馬拉好興既 ~~

凌晨點幾鐘仲好多人 ~~

我地真係飽到上額頭…同埋眼訓到行唔郁啦!! 都係快啲返酒店搵周公啦 !!

Day 3 (29Jun2013) —

今日既行程主要係遊覽吉隆坡市中心內既景點, 真係好期待!!

大家約左10:00am集合, 不過未出發前又有大龍鳳睇啦…話說我同Fung落到酒店大堂, 就見到Roy兄同佢老婆吵到面紅耳熱!!! 明明尋日Roy嫂心情勁靚, 今日就玩變臉, 真係估佢唔到……  佢話喱姐幫我地book酒店唔知賺左幾多錢, 又話佢老公跟住喱姐去旅行成隻跟尾狗咁…  係咪好頂癮呢?  但係我地已經見怪不怪, 繼續我地既開心之旅 !!
由於Swing同Ka Ling之前已經黎過吉隆坡, 佢地今日唔會跟我地既行程, 所以只有7個團友繼續出發 ~~

今日我地唔自駕, 改為搭公共交通工具, 因為吉隆坡好鬼塞車架!! 酒店行過對面就有LRT Station,好方便 ~~

我地就係呢個站Masjid Jamek上車 ~~

本地人正常都好少搭公交既, 因為個個家庭都有車, 自己揸車仲使鬼迫巴士地鐵咩!! 所以喱姐呢個本地薑都唔係好識點搭, 佢同我地一樣變左一個無知既遊客 ~~

上月台時見到出面有座清真寺, 好靚! 馬來西亞係回教國家, 清真寺其實到處都有既~

等車 ~~

等等下俾我發現上錯月台! 於是7條慒炳又要搵路過返對面個月台, 原來要行一條長到爆既隧道先到, 明明個月台就喺對面, 奇怪既設計!!

喺Masjid Jamek搭2個站去到Hang Tuah轉Monorail, 不過我地被職員老點!!
佢話要出閘再買飛轉車, 但係我地之後發現有路直通轉車月台, 咁就冇左RM8.4…好蠢呀!! 

再搭多2個站終於到左Bukit Bintang落車啦 !!

今日第一個景點就去Bukit Bintang既Lot 10十號胡同食早餐。 其實呢度係一個雲集左馬拉眾多老字號食店, 如金蓮記, 何榮記, 頌記等等既Foodcourt….. 因為香港食家蔡瀾都幫佢題字同代言, 所以好有人氣架 ~~

食早餐啦! Fung叫咗金蓮記既月光河~

金蓮記另一招牌美食「炭炒福建面」 ~~

我早餐想食清淡啲, 所以叫咗漢記既皮蛋瘦肉粥 ~~

仲有其他團友叫既美食 – 牛腩乾撈麵

豬腸粉

半肥瘦叉燒

魚頭米

ABC雜雪

食飽又來個開心大合照 ~~

跟住就要搵車搭去下一個景點, 導遊喱姐少搭公交, 佢都要搵人求救 ~~

吉隆坡市內景色 ~~

有Monorail經過! 成架玩具車咁 ~~

我地要搭Go KL既shuttle bus~ 佢有Green 同 Purple 2條線, 穿梭於吉隆坡市中心內好多著名既景點, 最重要係呢架車免費架! 真係要俾個Like吉隆坡政府有啲咁好既交通設施!

我地而家等緊Purple線, 顯示牌寫住馬拉文「Tiba」, 即係到達咁解 ~~

但喺Tiba左好耐先到…應該係塞車累事 ~~

我地去到Pasar Seni既總站落車, 行去下一個景點 Sri Mahamariamman Hindu Temple ~~

馬來西亞係一個多元種族國家, 最多係馬拉人, 其次係華人, 跟住就係印度人, 所以除左清真寺,印度廟都有好重要既地位。 而呢間印度廟始建於1873年, 係吉隆坡歷史最悠久既印度廟宇，剩係見到個門口有勁多印度神大晒冷已經覺得好特別 ~~

主祈禱堂 ~~

印度廟都係好colorful~ 對宗教冇乜認識, 唯有從建築角度欣賞呢座廟宇 ~~

虔誠既信徒 ~~

有一種神秘既感覺 ~

呢個時間大家都黎惡搞一番 ~~ 

寺廟出面有售賣祭祀用品既攤檔 ~~

喺同一條街上面見到關帝廟, 就知道乜野係多元文化融合 ~~

我地步行去下一個景點, 途中又見到啲好舊既大廈 ~~

街上面成日見到包到得返對眼既中東女人 ~~

呢間明顯翻新過 ~~

好快就行到Central Market啦 !! 呢棟建築物興建於1888年, 原本係一個街市, 1986年既時候, 政府話要遷拆, 但係有人發起保護古蹟運動, 最終政府同意保留呢個街市, 仲將佢活化, 變成今日一個賣手工藝品既地方 ~~

Central Market既露天地方整得好靚喎 !!

俾喱姐影到我同Fung個樣好遊客 ~~

呢位姐姐賣緊榴蓮雪糕 ~~

個雪糕真係有好香榴蓮味, 好味道 !!

呢度就係Central Market入面啦~ 有好多賣紀念品既鋪頭架, 隨時可以執一兩件返香港做手信 ~

Little India都有? 我鐘意 !!

我買左呢條披肩, RM10~ 有收穫 !! 

連魚魚咬腳池都有得玩?

其實我地黎Central Market除左買野之外, 更加重要既目的就係去Secret Recipe食cheese cake ~~

左面係綠茶cheese cake, 重點係右面個舊榴連cheese cake !!食落口同食緊真榴蓮係無分別, 陣味都係超級濃郁 !!! 繼檳城炒粿條後, 呢個榴蓮cheese cake亦成為我既馬拉美食飛佛!!

不過佢係seasonal供應, 要榴蓮季先有得食架 !! 

再加埋青檸梳打, 真係perfect match !!

又行多幾步就到附近另一個景點, 就係吉隆坡既China town 「 Petaling Street茨廠街」!!  究竟佢既中英文街名係點解呢? 其實以前呢條街係可以通往一個叫Petaling既礦場, 所以英文名好自然就叫Petaling Street, 而因為附近有木薯加工廠, 「茨」同「薯」既閩南話發音相近, 個中文名叫下叫下就叫茨廠街啦 ~~

茨廠街有好多檔攤都係賣衫呀, 手袋呀, 錶呀…個feel有啲似女人街 ~~

點解會有東大門?? 我地係咪去左韓國??

仲有好多生果賣 ~~

紅毛丹呀…去左馬拉5日都無試過, 真係可惜 !! 

我地黎茨廠街唔係血拼, 其實係要試呢個遠近馳名既羅漢果龍眼冰糖燉冬瓜~ 佢真係好出名, 好多人排隊幫襯! 聽聞每日唔知賣幾多百杯, 個老闆一早已經發到變左豬頭啦 !!

其實我覺得杯野有少少偏甜, 不過真係好有龍眼味, 又唔會有羅漢果個陣奇怪既苦澀味, 大熱天時飲一杯真係好正呀 !!

舊建築將呢個城市襯托出一種特別既味道, 唔知呢…我覺得咁樣反而先會令一個城市有生命~

我地又兜返去Central Market~ 因為要經呢度返酒店 ~~

馬來西亞曾經係英國殖民地, 所以有好多建築都充滿歐陸風情 ~~

藍天白雲 !!  

漫步整個城市欣賞舊建築係一件賞心樂事! 從建築物本身亦可以了解更多城市既歷史同文化 ~~

同一地方亦有現代建築, 新舊交融 ~~

好快就返到Hotel 1915啦 !! 大家決定小休1小時先繼續出動, 呢啲咁hea既安排實在太啱我喇 ~~

到6:00pm集合出發啦！

抖足精神又繼續下半part既精彩旅程!  行出街冇幾遠就見到KL Tower, 呢棟通訊塔係吉隆坡既地標之一 

我地又搭GO KL去下一站「Pavilion Mall」, 見到周圍有好多好勁既酒店, 即係JW Marriot, Riz-Carlton個啲, 仲有好多好靚既商業大廈, 已經感受到呢度有幾繁華 ~~

呢張Fung好似禁錯制, 不過張相好自然 !! 

Pavilion Mall好大喎, 仲要有好多名店! 成個IFC咁…我呢啲窮鬼點會係度shopping喎 ~~

不過唔知大家有冇跟到我呢隻油雞既邏輯呢? 好多時我地去shopping既地方根本就唔係shopping,而係去搵食架, 呢度係位於Pavilion Mall底層既foodcourt ~~

呢個foodcourt有間叫「A Slice Of Heaven」既甜品店, 我地專登黎試呢個朱古力榴槤架 ~~

係咪好吸引呢 ??  

啖啖榴槤肉呀, 加埋濃到漏既朱古力…呢件事太邪惡喇 !!     

滿足過後就行去KLCC雙子塔, Pavilion Mall有天橋通過去 ~~

我的超低能+勁搞笑團友 !! 

KLCC下面有水族館, 不過好似成RM80入場費…窮鬼過門而不入 ~~

呢度就係吉隆坡著名地標KLCC雙子塔! 現時係全球第5高建築物! 近距離見到KLCC真係好興奮!! 我地由黃昏等到天黑, 睇住KLCC亮燈, 景色真係好靚 !!

Ron唔只靚仔, 仲好有型 !! 加埋靚女喱姐, 你地好襯喎~~ 

係KLCC hea左好耐呀, 靚到唔想走……但係總要食飯架, 於是依依不捨離開, 行去附近既客家飯店開飯 ~~

間野好多人! 仲有好多美女幫襯 ~~

準備開飯啦 !!!

客家招牌雞

客家梅菜扣肉

要加饅頭一齊食

咸酸菜炒蜆

清炒菜膽

客家咕嚕肉

媽蜜排骨

咸魚煎肉餅

馬拉盞炒通菜

豆腐羹

滑蛋鴛鴦

粒粒炒米粉

係咪豐富到好過份呢? 真係飽到捧住個肚走呀 !!

在橋上見到吉隆坡既塞車景象 ~~

夜晚既Pavilion Mall著左燈又有唔同感覺 ~~

連日本動漫都有??

途經今朝食早餐既十號胡同, 原來同Pavilion Mall好近 ~~

搭返GO KL返酒店 ~~

又係Pasar Seni落車~ 又經過Central Market, 今日第3次行過, 沿途既噴水池好靚 !!

呢間清真寺係今朝喺LRT站見過個間, 夜晚著左燈又係好靚 ~~

返到酒店啦! 早抖! 聽日再玩過 ~~ 

Day 4 (30Jun2013) —

今日喱姐會帶我地到訪佢既家鄉, 位於雪蘭莪州 (Selangor)既Petaling Jaya ~~

雪蘭莪州係馬來西亞13個州入面最富裕, 亦都係人口最多既州份, 唔講唔知, 原來吉隆坡國際機場都係座落喺雪蘭莪州既Sepang區, 而唔係吉隆坡市內! 由吉隆坡市中心揸車去Petaling Jaya好近, 大概半個鐘就到~ 呢啲地方正常既旅行團應該唔會去到啦, 所以今次機會真係難得 ~~

由吉隆坡市一直驅車前往Petaling Jaya, 景色由繁華逐漸變得鄉郊, 開始有好多住宅區出現喺眼前, 感覺好似由中環入咗新界咁, 好快我地就到左Petaling Jaya既Kota Damansara  ~~

黎呢度做乜? 咪係食早餐囉 !! 今日既早餐會試Kayu Restaurant印度餐, 真係夠哂特別 !!

 好多野食咁喎 ~~

師傅表演轉薄餅絕技 ~~

咁大塊既 ??

黎到呢度當然要試下Roti Canai印度薄餅, 堅好食!!

呢個加左蛋嘅 Roti Telur ~~

仲有Nasi Kandar手抓飯, 係用咖哩汁加埋啲配料雞呀, 魚呀, 魷魚呀咁一齊煮, 唔錯唔錯 !!

Nasi Lemak「辣死你媽」, 即係椰漿飯~ 呢個我真係搞佢唔掂, 辣到跳舞呀 !!

再奉上一杯香濃既拉茶 Teh Tarik, 就係一個完美既早餐 !!

其實好戲在後頭 !! 喱姐叫咗呢個好得意既食物俾我地試, 叫做「Roti Tissue」 佢巧長呀…大家都當佢道具咁喪影相!!   呢舊東西係一塊一塊咁搣黎食, 有啲甜甜地又有啲咸咸地, 脆卜卜咁好好味 !!

食飽早餐先去附近既I-Hotel check in 先 ~~

跟住呢…我地又食第2餐啦…黎到永好茶餐室 ~~

就係食呢個叻沙Curry Laksa…其實味道係好食…不過又係衰太辣, 我真係食唔到~~ 

再加雞絲湯河 ~~

飲過N次既桔仔酸梅, 仲有佢既新朋友Kopi冰!! Kopi係咖啡既馬拉文 ~~

呢度有好多點心食, 賣相都OK架~ 不過喱姐話千期唔好係度食點心, 會中伏 !!

小朋友都幫手 ~~

食飽就要去打攪喱姐屋企啦…. 不過去之前要去超市買嘢先 ~~

其實同香港既超市分別不大 ~~

我地要買娘惹糕去喱姐屋企開餐呀 !! 娘惹糕係用椰糖整架, 所以特別香 ~~

嗱嗱嗱! 呢個就係喱姐住既屋苑啦!!  其實一般馬來西亞家庭都係住呢啲 house, 可能香港人會覺得大到離哂譜, 但係對馬拉人黎講真係平常不過 ~~

有機會深入馬拉民居, 係一個好好既體驗 ~~

嘩 !! 個大廳真係好大喎…. 同埋俾我發現佢地既生活都好貼近香港, 因為我見到電視播緊TVB個套好心作怪 ~~

入到屋我呢個大鄉里真係忍唔住周圍參觀 ~~

喱媽知道我地黎就一早預備咗食物同涼茶招呼我地啦 !!  而家先1:00pm我地已經食第3餐……不過喱姐屋企人熱情既款待真係好窩心 ~~

卜卜脆芽菜炒面 ~

原來呢個係木薯! 香港好少機會食到囉 ~~

仲有頭先喺超市買既娘惹糕做甜品,  好好食!!!

喱姐同佢二嫂 ~~

喱爸好安靜咁坐係一旁抽煙….. 實在太有型 !!

仲有佢地另一個家庭成員Bit Bit,  好可愛呀 !!

其實喱姐話佢地都係暫時租2年黎住, 好快會搬, 所以好多野都未拆箱~~

浴室?? 咁似露天風呂既??

喱姐姪女既房間 ~~

喺喱姐屋企hea咗一陣, 之後就有一個好有趣既行程 ~~

話說喱姐一家打算搬屋, 咁啱佢二哥嗰日星期日準備去睇樓, 所以我地就跟埋一齊去啦 !! 去旅行去到睇樓真係好搞笑!!

我覺得咁樣先可以真實了解到當地人既生活情況, 不過個新樓盤好遠喎…坐車坐咗差不多一個鐘先到 ~~

聽二哥講呢棟2層4千多呎既大屋大約值RM2,100,000, 即係港幣5百萬多啲 ~~
嘩…呢個價錢喺香港只可以買到蚊型樓咋陰公 !!

其中一間house既廁所, 已經大過我屋企 ~~

睇完之後喱姐屋企人既結論係…太偏僻, 唔買!!
如果論生活環境, 馬來西亞真係比香港人既蝸居優勝好多~ 不過我覺得又唔需要太羨慕人既, 因為馬拉地方太大, 居民如果要出門買野下下都要揸車…而香港呢個彈丸之地勝在夠方便, 出門行落街乜都有, 呢個亦都係香港可愛之處, 所以每個地方都有好有唔好~ 出去睇多啲呢個世界會有得著~

睇完樓就同喱姐屋企人講
我地下一站要去Petaling Jaya既shopping mall 「One Utama 」,  呢個商場大到爆炸…有幾大呢? 係全球第4大商場!!! 真係行到你腳跛 ~~

韓流入侵 ~~

根據我地去shopping mall唔係shopping既邏輯, 你應該估到我地做咩啦…!!
係呀!! 今日既第4餐「娘惹菜」~

娘惹菜大約係中國烹調方法同馬拉香料既結合, 口味偏濃, 有甜酸, 辛香, 微辣等多種風味, 黎到馬來西亞點都要試下啦,  今次我地就幫襯1 Utama Mall入面既「Peranakan Place」

首先黎個Appetizer 「Pai Tee」沙葛小籃

娘惹羊角豆, 其實係秋葵?? 滑潺潺, 幾好食 !!

班蘭葉包雞

馬拉盞炒巴菇葉

煎蛋角~ 呢個好咸…廚師失左手 !!

娘惹參峇大蝦Nyonya Sambal Prawns

再加杯Ice Lemon Grass同Mojito~~ Nice~~~

其實團友們都會shopping既…大家食飽就出動買買買…..!!

我同Fung就唔太熱衷shopping, 所以都係周圍hea下, 睇下有咩靚野可以影 ~~

又見到藍天白雲 !!

大家樂個朋友, 大家愛?

返香港先食啦 !!

好正既店名 ~~

好親切既店名 ~~

加埋好熟悉既代言人 ~~

混吉完一大輪之後, 我同Fung就搵返啲團友離開1 Utama Mall啦 !!

黃昏時間, 又幾靚喎 ~~

跟住我地既車就向Petaling Jaya既Old Town出發 ~~

好快就黎到下一站 – 大排檔風味既「興記肉骨茶」,  今日既第5餐, Help !!!

不過呢間肉骨茶聽聞在當地好出名, 亦有好多好評, 就算飽到反肚都要黎試……..!!

原來當地人飲茶會加冰, 咁有趣既??

其實當時我既戰鬥力已大減, 不過又有咁多美食, 唯有催眠自己仲食得落 ~~

排骨

肥美既冬菇  ~~

豆卜… 浸住既湯就係肉骨茶!! 我咁大個人都未飲過架!! 原來入口真係好大陣藥材味, 唔識形容呀…總之就好味啦 !!!

粉腸同埋豬肚

五花腩…. 肥而不膩

再加碟菜….正呀 !!

其實全部都係好普通既食材, 但係配埋肉骨茶竟然有一種化學作用, 令所有食物更鮮味!! 呢一餐實在太好食啦 ~~
興記肉骨茶老闆, 佢話好食就幫佢宣傳下…..好搞笑既一個大叔 !!

再下一站係SS2……其實黎SS2都係…..食食食!!! 

街邊有好多榴槤檔 ~~

今日第6餐 -「 榴槤 」而家唔食唔知幾時再有機會食馬拉榴槤啦 !!

檔主Donald~ 同興記老闆一樣咁搞笑 ~~

Donald知道我地係香港人, 竟然俾咗塊香港區旗我地, 仲叫我地企上台大合照!! 其他食客肯定覺得我地勁嘈同勁白痴, 不過咁樣好好玩喎 ~~

喱姐你做咩 ?? 

準備開餐啦 !!!

我地叫左貓山王, 紅蝦, D24同D101, 邊舊打邊舊我已經唔識分啦, 我只能夠講馬拉榴槤全部都係極品 ~~

Before !!

After !!

食完榴槤緊係要食埋佢既好朋友山竹降火啦 ~~

最後喱姐話要帶我地睇燈飾?! 原來附近一個大型商場叫Sunway Pyramid ~~

 呢度既特別之處係仿古埃及既建築, 夜晚著哂燈好金碧輝煌!!!

正門有隻超巨大既獅子招呼我地 ~~

其實個時都11點幾…商場都關門啦…我地都係時候要返酒店休息lu ~~

同尋晚既Hotel 1915一樣, I-Hotel都係經濟型酒店, RM108一晚 ~~

不過I-Hotel環境寧靜好多, 始終唔係吉隆坡市中心, 遠離煩囂,  可以訓個靚覺 ~~

今日食足6餐真係飽到上額頭…不過試咗好多馬來西亞既特色食物, 真係不枉此行 ~~

聽日8:00am就要集合出發啦…要返屋企啦 !!

 

 

Day 5 (1Jul2013) —

 眨下眼我地既馬拉5天自駕美食遊就快完結啦!! 平時返工啲時間又唔見過得咁快 ~~

因為今日要搭1:30pm既飛機返屋企, 所以都冇乜行程啦…

大家8:00am check out就出發, 黎到好吃茶餐室食馬拉最後之早餐, 其實呢度係正尋日嗰間Kayu印度餐廳隔離 ~~

一個勁似刀削面既板面

豬肉丸河粉

瓦煲伊麵

最後一次飲桔仔酸梅…再加一杯濃滑奶茶 ~~

通常旅程最後一日要做既野就係買手信~ 所以我地去到附近既Giant Supermarket掃貨~ 有名你叫Giant真係超大!! 大過一個足球場 ~~

好多白咖啡呀!! 不過香港都有, 費事抬返去 ~~

成車都係菜, 其實我有諗過買馬拉既肥嘟嘟芽菜返香港架, 結果買左好多零食 ~~

我地其實最想買馬拉榴槤返屋企, 但Giant Supermarket既榴槤檔竟然未開, 於是喱姐拿拿淋帶我地去附近既超市再睇下, 中途又經過Secret Recipe, 佢係馬拉有好多分店架! 我即刻跑入去買左2件榴槤cheese cake, 希望帶到返香港唔會變壞啦 !!

終於去到附近既Tesco Supermarket~ 噢! 有好多pack好既榴槤已經等待緊我地啦~~ 我同Fung各買左1 pack, 柳sir同May幫大家用報紙同保鮮紙包到好密實, 準備偷運上飛機 ~~

到呢一刻所有行程都完結啦, 我地要去機場lu…臨走前要餵飽呢架陪足我地4日既車 ~~

Ka Ling做咩落車呀??  其實佢比我地遲一日先走, 所以係附近既公車站放低佢, 佢自己一個返吉隆坡玩, 再見啦 !!

原本去機場既路程唔算遠, 但我地被GPS老點, 兜左唔知去邊…    Fung又瞓覺 ~~

搞左個半鐘先去到機場…好在預鬆左時間…呢度就係KLIA吉隆坡國際機場 ~~

一早做左online check in, 攞左boarding pass就上機啦 ~~
呢個時候都要同喱姐&Ron講 因為佢地聽日先返香港~ 好多謝你地呢5日既照顧呀 !!

又有Secret Recipe~ 都話周圍都有分店! 不過趕住上飛機冇得買啦 ~~

要搭「無人駕駛火車」去登機大樓 ~~

我地會搭1:30pm既CX722返香港, 其實個日香港掛緊3號風球, 不過我地既航班不受影響, 準時起飛! 點解咁架??
我仲以為返唔到屋企可以玩多一兩日添 ~~ 

勁唔想上飛機…不過要走既始終要走…唉! 再見啦馬來西亞!! 有機會我一定會再黎 !! 

可能當日打風既關係, 架飛機就到香港時喺上空盤旋左好耐, 最終用左4個鐘, chok下chok下咁降落香港國際機場, 我地既旅程亦都完滿結束啦 !!

 

手信篇:

即食蝦面

義香馬蹄酥

義香麻香酥+小豆沙餅

Twisties咖哩粟米脆脆

薑味奶茶

Postcard

後記:

其實從來冇諗過今年去馬來西亞, 就係無啦啦係香討識咗喱姐就成行~
好感激喱姐同Ron呢5日既悉心安排同照顧, 短短既5日之旅非常充實! 整個旅程真係令我了解到好多馬拉既文化, 同埋有機會試到不同既馬拉美食, 真係好難忘! 雖然一日食足6餐都幾係野…我到而家仲好掛住馬拉榴槤呀… !!
另外識到其他團友一齊去旅行都好開心! 希望有機會再同大家一齊玩啦 ~~
油雞就寫到呢度! 多謝收睇! 後會有期~

全卷完 !!