世界文化遺產 – 馬六甲古城2天自駕遊

每年的聖誕節我都希望請到幾天假期返家鄉去, 因為母親大人的生日正是聖誕節正日1225日。可惜並不是每年聖誕都有假放,不過今年比較幸運地申請到平安夜24日至到29日一共6天的假期, 所以決定飛返吉隆坡然後帶媽咪和姪仔姪女一齊自駕去馬六甲玩2日。2008年被列入世界文化遺產的「馬六甲」, 英文名稱為 Malacca, 馬來文為 Melaka。於西元 1511 年淪為葡萄牙殖民地, 1641 年後改由荷蘭人接管, 1785 年起則為英國所統治,1957 年時脫離殖民統治, 成為馬來西亞第一個宣告獨立的地區 , 因此整個小城都具有很濃烈的殖民地色彩, 我記得十幾年前曾經去過馬六甲一次, 不過只係即日來回,主要係去行街食嘢, 並未參觀過馬六甲任何一個世界聞名的古蹟或景點, 所以今次出發前做了功課準備好好去遊覽一番 ~~
26Dec2012 (Wed) —
早上730分我們借了二嫂架小型馬拉國產7人車仔,setPapago GPS自動導航之後我地就從屋企出發。其實馬六甲離吉隆坡並不遠,只係158公里,如果唔塞車的話應該2小時左右可以到達馬六甲市區架喇(吉隆坡每個家庭平均有2架車以上,所以車多到經常上下班時間會大塞車),  不幸地當日又遇到公路上有交通意外,一架大拖頭撞到散晒連車頭同車尾分離斷成兩節,所以搞到公路大塞車,結果我地差不多早上1040分先到達目的地呀 ~~



我們的車停泊在紅屋區的露天停車場,呢度泊車係要自己去售票亭買停車票架,每張停車票馬幣
RM0.60, 可泊一小時,如果你要泊3小時就自己畫好3張票然後將停車票展示喺車頭擋風玻璃前面即可。如果怕麻煩的話亦可選擇一些附近有專人看管的停車場,收費亦好平,大約係RM2RM5 per entry任泊,所以馬來西亞自駕遊並唔貴而且比較方便因為當地公共交通配套不太完善,巴士亦不是點對點的,除非你下下搭的士或行路啦!
Monkey Emoticons



泊好車之後我地就先行去雞場街(
Jonker Street)食早餐,其實都差唔多11點喇,咁不如就早餐午餐一次過食飽飽先開始我地今天嘅行程啦!
Monkey Emoticons


呢條飛天彩龍就係Jonker Street雞場街嘅主要地標喇,離遠一望見條飛龍就知道嗰度係雞場街頭喇!
不過點解條咁旺嘅
遊客必到的街叫做「雞場街」咁鬼難聽架??Monkey Emoticons

行過幾間舖就會見到在左邊的呢間1911年的百年老舖「古城雞飯粒」,雖然呢間係由蔡瀾做代言人, 但係並唔係最著名嘅馬六甲雞飯粒,另外一間「中華茶室海南雞飯」就更加出名,門口日日排晒長龍好誇張架, 不過既然我姪女好想食所以我地就入去試下啦 ~~
 

裡面真係好有特色,古色古香的裝修,簡直襯晒古城個建築特色呀 ~~



我叫嗰啲
做波波雞飯, 因為啲飯被搓到一個個3cm大嘅波波咁囉!
其實嗰兩碟雞都唔錯嘅, 咁到底啲波波飯好唔好味呢? 我個人認為啲波波飯嘅口感唔多似飯,膠膠爛爛怪怪咁,反而後來我再叫了一碟傳統的油飯就好食得多喇,起碼食落似飯又有飯味嘛 ~~



不過呢間除咗
雞飯之外仲有其它小菜例如油菜和魚蛋湯等等,另外嗰間「中華茶室海南雞飯」係冇乜裝修而且只係賣雞飯,冇其它小菜或魚蛋湯嘅 ~~

食完雞飯就沿路行過去「大寶小食」食甜品,呢度最有名氣嘅就係榴槤珍多冰(Durian Cendol), 亦有原味珍多冰和馬六甲糖西米(Sago Gula Melaka) 等等…..
Jonker 88 Dessert
大寶小食(88 Jalan Hang Jebat) 營業時間 : 1000-1800

其實馬六甲的甜品或者係娘惹糕(Nyonya Kuih) 的靈魂主要就係嗰種啡色的馬六甲椰糖(Gula Melaka), 所有甜品只要加了嗰種椰糖之後個味道就會唔同晒,會變得又香又好味架喇 ~~
Monkey Emoticons

娘惹糕 & 珍多冰 ~~



食飽飽之後我地就搓住個大肚dum周圍逛下影下古城充滿懷舊色彩嘅特色建築物, 順便買少少手信 ~~ Monkey Emoticons

然後行返過去荷蘭紅屋廣場, 其實就喺雞場街飛龍地標一過馬路就係喇 , 真係非常近 ~~

荷蘭統治馬六甲超過150年的期間興建了很多荷蘭風格的建築物, 鮮紅色的基督教堂亦是馬六甲的地標, 它採用了當地的紅色珊瑚石磨成赭泥所建造成的 ~~

荷蘭紅屋廣場Dutch Square Jalan Laksamana)

Gereja Christ Church荷蘭基督教堂, 建於西元 1753 年,係荷蘭人為慶祝殖民馬六甲 100 年而建的 ~~

Clock Tower 鐘樓

Queen’s Victoria’s Fountain 維多利亞女皇噴泉 ~~



The Stadthuys –
為早年荷蘭統治該地時的總督官邸,西元
1982 年改為馬六甲歷史文化博物館, 呢個博物館主要係介紹當年馬六甲成為別國殖民地的歷史 ~~



呢種就係馬來西亞以前馬拉原居民(Malay)住的傳統高腳木屋,在郊區都依然仲會見到好多,不過城市人或華僑都唔係住呢屋,而大多數係住洋房嘅
~~
記得曾經有人問我馬來西亞啲人係唔係住喺樹上啲木屋架?原來有些人誤會了以為馬來西亞人好似Tarzan 咁住森林啲樹屋架,哈哈!!Monkey Emoticons

下午3點我們就先去酒店check-in, 打算放低啲行李再出去繼續遊覽古城其它景點 ~~

呢間Hatten Melaka Hotel我喺Agoda.com網上訂嘅,旺季大約港幣750一晚,房間裝修新淨舒適, 地點方便行街買嘢食飯, 不過我間房係完全俾對面的一座大廈擋住晒所有景觀,由窗口望過去只見到對面大廈的辦公室咋~
Monkey Emoticons
 
而且
只有大堂和泳池健身室嗰層才有免費wifi,房間內有免費internet但要問酒店借cable線,如果想在房間內用wifi只好自備旅行用的迷你路由器router喇!

返上房放底行李梳洗下之後我地就出發去其景點喇 ~~

泊低咗架車喺停車場之後我地沿著條馬六甲河一路向荷蘭紅屋廣場的方向慢慢行返去 ~~



Melaka River 馬六甲河

呢個古城有好多小旅店或咖啡室都係由呢啲過百年歷史老房子改建而成嘅 ~~


好多都好有特色,影相就幾好喇,但如果叫我住就咪搞,我驚驚呀,嘻嘻
……! Monkey Emoticons

Cheng Ho Cultural Museum51 Lorong Hang Jebat) 開放時間 : 0900-1800
鄭和文化博物館館內展示著明朝三寶太監鄭和下西洋的歷史文物, 鄭和曾七次下西洋, 至少有六次在馬六甲駐紮, 代表明朝與當時的蘇丹王建立良好的通商及外交情誼, 並在馬六甲建立官方衙門據點, 作為航海的中繼站及補給站, 也開始了華人移民大舉進入馬來西亞鄭和下西洋是指中國明朝早期一系列由官方進行的遠洋航海活動。1405年(明永樂三年),明成祖命太監鄭和率領二百四十多海船、二萬七千四百名船員的龐大船隊遠航,拜訪了30多個在西太平洋和印度洋的國家和地區,加深了大明帝國和南海(今東南亞)、東非的友好關係

鄭和文化館一共有二層樓, 但我無太大興趣所以無買票上去參觀 ~~


我地行下行下突然間迎面出現咗一大班靚女喎,望真啲原來係來自世界各地的2012年世界小姐佳麗啊!

嘩!好多個都勁靚女呀,個個途人都眼金金咁望到實, 我又嗱嗱聲拎起部相機狂影呀!Monkey Emoticons

今個trip又賺咗喇, 有靚女睇, 好嘢 !!! Monkey Emoticons



在馬六甲古城周圍都會見到呢啲
用彩色花花裝飾到五顏六色的三輪車在街上載住遊客到處去觀光,但我就覺得啲裝飾佈置得有些誇張,因為中國人的傳統總覺得呢啲花車佈置成咁嘅樣好似唔係咁好,試想像一下如果有個人坐在車上,而車頭的花圈中間放上一張人像照片會似乜嘢呢
Monkey Emoticons


但我地行下行下竟然見到有一架裝飾得與別不同的三輪車喔,係一架鮮桃紅的Hello Kitty三輪車呀,車頂係隻大桃紅蝴蝶,車身有多個Hello Kitty毛毛公仔和圖案,就連車輪都係Hello Kitty架!而且個三輪車夫仲要係我地全日遇過最後生又最靚仔架,因為大部份我地見到嘅三輪車夫都係叔叔同伯伯囉,呵呵…..!

姪女見到都話鍾意,咁我地就即刻跳上車叫佢車我地去A’Famosa 地牙哥城門與炮台, 佢開價RM2010分鐘,但係去到景點可以等我地參觀完影完相然後先車返我地去荷蘭紅屋廣場 ~~


Porta de Santiago, A’Famosa 地牙哥城門與炮台 — 

A ‘ famosa 是由葡萄牙將領 Alfonso d ‘ albuquerque 1511 年興建的。整座城堡後來幾乎被荷蘭人毀滅殆盡,只剩山丘上一小部分的要塞, A ‘ famosa 原本安置了許多大炮,可惜荷蘭人於 1641 年接管後,就慘遭破壞 ~~

路經有架古董火車和小型飛機供遊客參觀 , 咁我地就走咗上去玩同影相~~


遊覽完今天的景點之後差不多下午6點喇, 所以我地就返去酒店會合我媽咪然後一齊出去食晚飯。黎到馬六甲不能不試下地道的娘惹菜, 不過成日聽到人話食”娘惹菜”,  咁到底乜嘢叫做娘惹呢

其實峇峇娘惹係指十五世紀初期定居在馬六甲的中國明朝移民後裔,亦包括少數在唐宋時期定居此地的唐人。男性稱為峇峇, 女性稱為娘惹, 大部分的原籍是福建或廣東潮州地區, 小部分係廣府和客家籍, 很多都與馬來人混血, 但峇峇文化具有中國傳統文化色彩, 服飾則是從明代的漢服演變而成的”Kebaya”, 而語言稱為峇峇話~

Indah Sayang Nyonya Restaurant (138, Taman Melaka Raya)

酸酸辣辣的娘惹菜, 好惹味 !!!

食飽飽之後個個都話好攰好眼瞓因為今早好早起床出發, 所以就返酒店做豬喇…..! Monkey Emoticons

 

27Dec2012 (Thu) —
我地今次
5人行,但我地的兩間酒店房價只係包一共4個酒店自助早餐,反正我比較想出去食地道的早餐,所以叫媽咪帶兩個姪仔和姪女落去12樓食自助早餐,  但係
媽咪話佢地3個想食完早餐之後留喺酒店享受吓啲酒店設施,唔想出去又熱又曬喎,咁我就同蝦子餅2人開車出返去雞場街嗰區搵嘢食啦!

早上915分出發,5分鐘的路程就去到停車場喇,泊低架車之後我地就經Jalan Laksamana行返去Jonker Street雞場街搵嘢食 ~~

沿途經過呢個雙塔型哥德式建築的St. Francis Xavier Church,又係有二百幾年歷史的一座教堂 ~~
 

其實今早冇諗過要再食雞飯架,不過一經過見到呢間我之前提過全馬六甲最著名「中華茶室雞飯粒」竟然今早剛開門條人龍仲未出現喎,咁我地趁機會唔洗排隊就嗱嗱聲入去試一試有幾好食先!

咦!呢間啲波波飯同昨天嗰間古城雞飯粒啲波波飯比較真係有油香喎,好味好多喎,雞肉都好滑而且都有雞味添唔怪之得日日門口排長龍啦!我地一食完行出門口已經見到有人開始排隊等位喇,我地果然有食神呀 !!!
Monkey Emoticons

剛才啲雞飯只係頭盤咋,試完波波雞飯之後我地死都要去試下昨天冇食到嘅馬六甲喇沙(Baba Laksa)和乾撈麵 ~~ Monkey Emoticons


又點可以少咗我愛嘅峇峇珍多冰呢!Monkey Emoticons

然後行去參觀Maritime Museum海事博物館(Jalan Quayside) 開放時間 : 0900-1730
該博物館係仿照葡萄牙帆船 Flor De La Mar 號所建。據說該船載滿從馬六甲掠奪而來要運回歐洲的財寶,但於途中沉沒在馬六甲海峽 ~~
 


今日天氣比昨天好
, 不過又熱又曬, 所以行完海事博物館都要食吓小時候食過嘅砵仔雪條消吓暑先
!! Monkey Emoticons

在郭陳禎祿路(Jalan Tun Tan Cheng Lock)上,有著一整排19世紀海峽華人的店屋及古老屋子, 這些巴羅克風格的建築物是當時典型富裕華人嘅住家。我去參觀的是一間峇峇娘惹博物館, 這峇峇娘惹博物館是一位曾姓華裔的故居, 兩層高長型的屋子, 屋內又非常寬敞, 裏邊有一個天井, 可以容許陽光及雨水進入屋內。那些厚重的木制家私, 皆是以中國的紅木製成的, 其設計則融合了中國、英國維多利亞及荷蘭風格。有些華麗的傢俱是以珍珠貝鑲崁成櫻桃花及鳥類圖案的, 而屋裏的陶瓷則是這些海峽華人當時特地向江西省及廣東省要求定制而進口的,館內陳列了第二次世界大戰以來峇峇娘惹的生活用品及歷史遺物。從遺物當中, 可了解到峇峇娘惹家族的生活方式及文化 ~~

The Baba & Nyonya Heritage Museum峇峇娘惹博物館48-50 Jalan Tun Tan Cheng Lock)
開放時間 :1000-1230, 1400-1630, 入場費 : RM15

我覺得這個博物館非常值得參觀, 屋內所有遺物都保存得好好, 尤其是屋內的地磚, 好有特色好靚…..!
不過博物館內不准影相, 全程有人跟住架, 但我都忍唔住要偷偷地拎部相機出黎用幾秒時間快速地偷影返幾張同大家分享一下 ~~  Monkey Emoticons

11點15參觀完畢之後我地就返酒店執嘢退房喇,不過我地將行李擺晒上車之後都冇開走架車,因為住客可以免費泊酒店商場,而且我地今日下午的節目都係打算喺附近的大型商場行下街咋 ~~

大多數店舖都做緊聖誕大減價, 逛咗3個幾小時商場之後因為佢地話想早些返屋企所以話提早4點再食多一餐娘惹菜,然後就開車返吉隆坡,但可惜我地想食的Ole Sayang Nyonya Restaurant又無開門,  而且大多數的娘惹菜館都係晚上6時先開始營業嘅,所以最後逗咗好多圈先搵到呢間娘惹菜 ~~
Monkey Emoticons

以下呢間太辣, 我覺得無昨晚嗰間咁好食所以唔介紹俾大家喇 ~~

不過我想推介呢間台式嘅Black Ball Dessert俾喜歡食甜品嘅朋友, 超好味呀 !! Monkey Emoticons



馬六甲是一個被葡萄牙、荷蘭、日本、英國統治過的殖民地
,  亦是一個建築、文化和食物都充滿特色的地方, 其實2日真係唔多夠,有些景點例如夜間野生動物園、聖保羅教堂 (St Paul’s Church) D-Paradise Melaka熱帶果園、馬六甲植物園、青雲亭和幾個大型購物商場等等我都冇時間去,所以建議想細遊馬六甲的朋友應該預3天時間好啲 ~~

可能由於聖誕節都係新加坡的假期, 所以無論酒店大堂排隊check-in的時候或是在景點周圍都見會到大量的新加坡人, 在馬來西亞消費對於新加坡人黎講簡直係平靚正呀, 因為兩國的食物、文化和語言又相似, 因為在1965年星加坡獨立之前都係同馬來西亞一樣屬於英國殖民地。 由於新加坡幣值大好多, 新加坡紙$1 =  馬幣RM2.47, 所以佢地就好似港人愛北上自駕遊咁, 而且由新加坡開車去馬六甲只係需要3小時左右, 所以無論停車場或街上都見到好多車都係掛住S字頭嘅新加坡車牌 ~~

(全篇完畢, 多謝觀看!! )

參考資料 :

路費Toll fees = RM38
油費Petrol fees = RM50
停車費Parking fees = RM9
*
匯率 = (Exchange Rate on 26Dec2012)
RM1 = HKD2.53