加拿大自駕遊 – 【PART ２】洛磯山脈之國家公園篇 |

DAY 4 (23Sep2015) —

今早要離開黃刀前往下一個地方Jasper了。起床食過民宿女主人為我們親手煮嘅早餐之後就執行李準備退房了。11點起程去黃刀機場還車，然後搭飛機去Edmonton，準備開始我們其餘的加拿大精彩嘅自駕遊行程。在黃刀機場我見到地上有一幅好靚嘅世界地圖，我手指住嘅地方就係我現在身處嘅加拿大黃刀喇 ~~

我們乘搭西捷航空WS 109 由黃刀直飛埃德蒙頓(Edmonton) ，1405起飛，下午4點10分抵達Edmonton機場了~~

飛行時間係一個小時又40分鐘，咁短程所以冇飛機餐提供所以落咗機之後喺機場禁區的餐廳我哋買咗熱狗醫肚～～

取過行李之後我哋行過去對面停車場位置嘅租車公司櫃台 ~~

今次好好彩，遇到一個好好服務的租車公司職員，我其實只係訂咗一部普通四驅車，但佢幫我免費upgrade咗去一部好型仔嘅Jeep，而且仲好有耐性地教我哋用架車嘅設備 ~~

下午5點05分搞掂晒一切租車手續，然後就開車出發去我哋今日嘅目的地Jasper。不過呢一程車都幾遠吓，一共係365公里，去到今晚嘅住宿地方都應該好夜了 ~~

喺途中我哋見到有間賣炸雞翼同埋Pizza嘅小店，所以就停車買炸雞翼同炸番薯來做我哋嘅晚餐 ~~

經過呢個閘口，就開始進入洛磯山脈嘅範圍喇………如果要在任何洛磯山脈的國家公園觀光停留，就要買票貼在車窗上面，而每部車裡面的所有人都要收費，我哋一共5人所以選擇咗6日嘅Group ticket，門票一共係CAD117.60

一般門票係依停留日數、人數而計算，所以最好出示你嘅行程俾售票人員幫你計，一旦買了門票，可以用同一張票根進入所有國家公園，當然都包含洛磯山脈的全部。

可以參考網上其它blog嘅詳細資料 :

http://priscill.pixnet.net/blog/post/45299018-201508-%E5%8A%A0%E6%8B%BF%E5%A4%A7%E6%B4%9B%E7%A3%AF%E5%B1%B1%E8%84%88-%E5%9C%8B%E5%AE%B6%E5%85%AC%E5%9C%92%E9%96%80%E7%A5%A8%E8%B3%BC%E7%A5%A8%E4%BB%8B%E7%B4%B9@

進入洛磯山脈嘅範圍咁就要首先了解一下洛磯山脈嘅地理環境。我在出發之前上網做咗少少功課，原來洛磯山脈是一條位於北美洲西部的縱貫山脈，經由一億七千萬年前的侏儸紀至四千萬年前的新生代，數次造山事件而逐漸隆起。洛磯山脈從加拿大延伸至美國西部，北從加拿大的裡阿德河一直向南到美國新墨西哥州的格蘭德河，分佈範圍包含加拿大的Alberta省及British Columbia省，美國的State of Colorado、State of Utah、State of Montana、Idaho、State of Wyoming及New Mixico，共包含美國六州和加拿大二省，綿延超過4,800公里。其中，洛磯山脈的最高峰是艾爾伯特山(Mount Elbert)，海拔高度達4,401公尺。

廣大的洛磯山脈擁有美麗壯觀的景色，像豐富的冰河地形、形狀特殊的山峰、湛藍碧綠的湖泊等；另外豐富的自然資源，包括廣大的針葉樹林，亦是重要的木材資源，冰河的融水也是重要的水資源；許多野生動物棲息於此，因此無論是加拿大或是美國均設立了多座國家公園來保護，加拿大有六個，美國有四個，合計兩國共十個的國家公園：自加拿大北起分別為賈斯伯國家公園(Jasper National Park)、班夫國家公園(Banff National Park)、冰河國家公園(Glacier National Park)、悠鶴國家公園(YOHO National Park)、庫特內國家公園(Kootenay National Park)、渥特頓湖國家公園(Waterton Lakes National Park )；美國境內為冰河國家公園(Glacier National Park，已經和加拿大的渥特頓湖國家公園合併成沃特頓-冰河國際和平公園)、黃石國家公園(Yellowstone National Park)、洛磯山國家公園(Rocky Mountain National Park)、大狄頓國家公園(Grand Teton National Park)。

而今次我規劃嘅洛磯山脈自駕遊路線主要係去2個國家公園，第一個係Banff National Park，第二個係Jasper National Park。因為順路所以打算先玩Jasper National Park，跟住再去Banff National Park。著名的「湖光山色」是此行的重點 ~~

天開始黑了，夕陽餘暉，好靚！!

終於喺晚上嘅9點55分抵達Jasper小鎮，Jasper嘅時間一樣係GMT-6，所以同黃刀時間係一樣 ~~

去到我哋訂嘅住宿Rockaboo Inn，門上貼住大門的密碼，跟住屋主留俾我嘅指示，開咗大門入咗去之後見到一間好乾淨好整潔嘅屋，仲有個設備齊全嘅廚房 ~~

Jasper的旅館選擇不多，原本想租一間兩房或三房嘅住宿，但可惜搵唔到合適嘅，所以最後揀咗呢間一房、再加一張沙發床嘅民宿，屋主一家就住在後面嘅另外一間屋 ~~

2晚嘅屋租係CAD400，我同蝦子餅就有一間位於樓上的雙人床房間 (上圖)。 Swing 和Wing就瞓大廳的雙人沙發床，但Jane就連沙發床都無得瞓，只有瞓在地上好薄嘅床墊一張………

要咁委屈我啲團友我都覺得唔好意思，所以為公平起見，屋租我付CAD280，而佢哋3個瞓大廳嘅就每人只付CAD40 ~~

唯一的一個浴室同洗手間喺位於大廳旁邊的位置 ~~

放低啲行李之後我同蝦子餅2個就開車出去24小時嘅小型超市隨便買啲明天早餐嘅簡單食材，然後就返民宿休息準備迎接明天嘅行程 ~~

DAY 5 (24Sep2015) —

尋晚咁夜到達Rockaboo Inn，影唔到小木屋的外觀，今日一早補返幾張相先 ~~

鄰居搭建咗一間樹屋，好有趣，可能係俾小朋友玩嘅 ~~

然後就返入屋煮早餐俾我啲團友食 ~~

屋主養嘅狗經常喺窗外偷望我哋，唔知係唔係養來幫佢手監視佢啲租客嘅呢?

早餐之後我揸咗架型仔Jeep，同Jane 2人喺小鎮兜咗個圈，我未試過揸Jeep，過吓癮，順便影吓相！

跟住就出發去遊覽Jasper National Park (賈士珀國家公園)嘅主要2個景點，Patricia Lake and Pyramid Lake ~~

Patricia Lake and Pyramid Lake 這2個湖離小鎮好近，只有7公里的路程，開車約10分鐘就可以到達 ~~

湖邊都有好多木屋仔嘅住宿 ~~

而Patricia Lake的由來則是以維多利亞女王孫女之名(Patricia Ramsay)而命名的 ~~

此湖緊鄰Pyramid Lake(金字塔湖)，因此亦可望見金字塔山 ~~

來到呢啲咁安靜嘅湖邊，最好就係乜都唔好做，坐在湖邊安安靜靜咁思過 ~~

逗留咗片刻之後我哋就開車去隔離嗰個Pyramid Lake，路邊遇到一架同一型號嘅黃色jeep，顏色好sharp仲更加型仔 ~~

位於湖邊嘅呢間Pyramid Lake Resort都係Jasper住宿嘅選擇之一，不過只係一啲普通嘅酒店房間，價錢貴之餘仲要無廚房設施，無得玩煮飯仔，無得一齊開餐無咁開心嘛 ~~

呢間resort有艇仔出租，在湖上划船都唔錯 ~~

可惜今日Jasper天色唔夠藍，雲層好厚，所以今日的照片我影得唔算多 ~~

最鍾意都係呢幾張，有著濃濃嘅秋意，好有層次嘅金黃色一片 ~~

遊覽咗兩個主要嘅湖區之後，我哋就回去Jasper Town逛街，因為佢哋話今次去到每一個地方都要買一啲小小嘅紀念品，好似明信片、磁貼、嘢食、T恤等等喎…..

Jasper Town 位於Jasper國家公園的北邊，整個小鎮好安靜，停車場都係免費的 ~~

鎮上的旅館、餐廳、遊客服務中心及商店街幾乎全部集中在2條街的範圍之中，步行就可以走遍大部分的街道了~~

除咗逛街之外，我仲有影下小鎮啲植物，我見識少，從未見過呢啲咁特別嘅植物 ~~

最後一站一定要去Robinsons超市買食材準備今晚嘅晚餐。其實唔係我超級鍾意煮嘢食，而係自駕遊去到呢啲小鎮，餐廳嘅選擇唔係太多，中餐好多又貴又唔好食，呃鬼佬嘅居多。食西餐我都冇問題，但如果餐餐都要我食快餐，例如漢堡包、薯條、pizza或者係煎煎炸炸呢類食品，咁我寧願自己煮啲簡單嘅嘢食好過餐餐都食呢啲咁冇益嘅食品喇！!

今晚有佢哋四個都好鍾意食嘅煎牛扒，佢哋話美加啲牛扒靚過香港好多喎，而且價錢仲要平好多添，所以就買咗一大塊煎俾佢哋食 ~~

我唔食牛肉嘅就唯有食火鍋啦，超市買到嘅只係一啲冰鮮雞肉、雪藏大蝦、雪藏帶子、蔬菜類呢啲材料，新鮮嘅海鮮喺小鎮就冇辦法買到喇 ~~

食飽仲有咩做？瞓覺囉!

DAY 6 (25Sep2015) —

今早我7點起床準備自製早餐，今朝嘅早餐有雞肉、磨菇、煎蛋、香腸以及生菜做餸嘅湯米粉 ~~

食飽之後我哋就夾手夾腳清潔好個廚房，洗晒啲碗碗碟碟，清晒啲垃圾然後就執行李離開民宿。喺Jasper住咗2晚，今日我哋要出發去下一個景區Banff ~~

0915由民宿離開，由Jasper去Banff係289公里，路經Icefield Parkway (冰原大道)。加拿大沿著洛磯山脈興建的道路稱為冰原大道，是美洲大陸景色最為壯麗的一條公路，同時也是加拿大洛磯山脈中的主要幹道。沿著冰原大道，可以欣賞洛磯山脈的美景，冰河切割的U形峽谷也隨處可見~~

冰原大道，曾被國家地理雜誌評為世界上擁有最美沿途風景的公路之一。反正今日我冇特別安排啲咩行程，所以不急著趕到Banff，一路邊走邊看，沿途路上如果見到有靚嘅風景就唔好錯過。首先路過一個Bow River (弓河) 嘅觀景台，我哋就落車影吓相 ~~

弓河是Banff National Park的一條景觀河流，起源於洛磯山脈的弓河冰川和弓湖，河水清澈碧蓝，蜿蜒流長，整段路程都能夠睇到弓河忽隱忽現嘅身影 ~~

然後又再開車繼續行程 ~~

呢一段路上見到嘅弓河風景，加上雲霧就好似仙景一樣，太靚了 ~~

下一個景點我哋去到Sunwapta Falls，Sunwapta原意為「湍急之水」，水源來自 Athabasca Glacier (阿薩巴斯卡冰河)，於初夏冰融時水勢較盛。此瀑布分上下游兩處，大多數人會好似我哋咁去容易行走的上游處，但是下游處都唔遠 ~~

今日天氣麻麻地，開始落住細雨 ~~

不過今日嘅天氣唔好都唔緊要，但係由明天開始嘅3天行程係我哋今次洛磯山脈景區嘅重點行程，亦都有我非常期待嘅幾個景點，如果遇唔到好天氣，咁就會帶着遺憾返香港喇！!

走在Iceland Parkway，路上風景果然好靚，可惜只欠好天氣，唯有寄望在明天啦 !!

下午1點鐘我哋路經這間The Crossing motel，見到裏面有餐廳咁我哋就泊低架車食午餐 ~~

呢度賣嘅食物都係一啲三文治、沙律、湯、炸魚薯條或者係扒之類嘅西餐，大家見又唔係好肚餓所以只係叫咗幾樣嘢一齊share嚟食 ~~

食完再開車，但天氣一樣冇好轉，依然係落緊毛毛雨 ~~

去到Banff National Park嘅範圍，又再經過國家公園門票檢查站，不過我哋已經買好呢幾日嘅全票，所以通行無阻 ~~

終於下午五點鐘我哋到咗Canmore ~~

雖然明天開始嘅3天主要行程係Banff National Park，但係我並無選擇入住Banff嘅酒店，因為Banff嘅住宿價格比鄰近嘅Canmore貴好多，尤其是係夏季比冬季的價格大約高出一倍。雖然Banff的住宿不算少，但係在七、八月嘅旺季時節都有可能會搵唔到住宿。呢道嘅住宿大都以家庭為服務對象，所以單人旅客找住宿會非常困難。而我哋呢4晚會住喺距離Banff 僅17公里的Canmore ~~

Canmore Town係一個好細嘅小鎮，呢道的住宿相對比較便宜，餐館都有唔少選擇，又有大型超市，所以我揀咗住喺Canmore 4晚 ~~

去酒店check-in之前，我哋一樣係去咗超市入貨先 ~~

呢間SAFEWAY超市比較大間，貨品齊全一啲，蔬果、肉類及海鮮選擇都比較多 ~~

買完食材就開車前往Platinum Suite Resorts了 ~~

Platinum Suite Resorts 係一間Serviced Apartment，我訂嘅係2套房公寓，有設備齊全嘅廚房，免費泊車同埋免費wifi。我由check-in至到check-out都無見到過屋主或物業管理人。出發之前全數俾咗房租之後佢會發一封email俾我，郵件中佢會提供大門以及停車場嘅密碼俾我，亦都有指示教我點樣去公寓嘅信箱取鎖匙開門 ~~

好大嘅洗手間 ~~

仲有戶外熱水池 ~~

有個咁大嘅廚房煮嘢食都開心啲 ~~

我哋今晚嘅晚飯有洋蔥雞、蒜蓉炒羅馬生菜、香煎三文魚、仲有帶子蝦球炒西蘭花 ~~

飯後水果有蘋果同西瓜 ~~

食飽飽但唔需要我洗碗，我只負責煮，而佢哋輪流負責洗碗，咁我捧住個肚好滿足咁去做豬喇……!!　要養足精神迎接呢幾天嘅精彩行程嘛 ~~

DAY 7 (26Sep2015) —

今早又係安排咗８點一齊食早餐，所以我一樣係７點起床準備 ~~

５個人當然係要煮５份早餐啦~~

早餐後我哋9點30分出發，今日嘅行程就係主要遊覽２個湖區，Two Jack Lake及Lake Minnewanka ~~

由Canmore出發前往Banff National Park係35公里，我哋行Trans Canada Highway，途中經過Bow Valley Parkway交匯處嘅位置，我哋又搵到一處秘景 ~~

火車路軌兩旁嘅樹木有著非常豐富嘅秋天色彩．．．．紅色、橙色、黃色、綠色、啡色，實在太靚喇！！！

呢個地方簡直係今日驚喜嘅收獲呀！！

因為今日要預留多啲時間俾Lake Minnewanka，咁我哋就繼續先開車到範圍比較細的 Two Jack Lake遊覽一下 ~~

Lake Minnewanka 和 Two Jack Lake這一帶據說是大角山羊生態觀察區，遇見大角鹿的機率是100%，還有人曾碰到大角山羊走到車子駕駛座旁，不過我哋只係離遠見到呢隻大角鹿(Megaloceros) ~~

我哋架車繼續前往 Two Jack Lake (雙傑克湖) ~~

Two Jack Lake 係個狹長嘅湖泊，湖面雖小，但湖水又藍又綠，美麗極了 ~~

其實Two Jack Lake 跟 Lake Minnewanka 是相連的，沿著Lake Minnewanka Scenic Drive向北走，好快我哋又經過一個可以停車嘅觀景台，加上秋天的黃葉又係另一個迷人嘅湖景 ~~

到達Lake Minnewanka嘅時候已經係接近中午，泊低架車之後驚覺今日天氣竟然係晴空萬里、太陽高掛，運氣不錯喎！！

久違了的藍天白雲呀！！

Minnewanka Lake( 明尼灣卡湖 ) 位於 Banff( 班夫 ) 國家公園內，係洛磯山脈中最大最深嘅湖泊，長 24 公里，深 142 米。Minnewanka 在印地安語言中稱之為「湖中水怪」，相傳此湖住著一隻半人半魚的水怪而得名，但今次我哋只見到小松鼠四處亂竄卻無見到水怪嘅身影 ~~

湖邊處處黃葉，美不勝收！！

風景如畫，實在係太靚太靚喇．．．．．！！

趁今日天氣好，我要用相機嘅鏡頭去細賞唔同角度嘅Minnewanka Lake ~~

有咁靚嘅風景做背景又點可以唔同蝦子餅合影返一張相留念呀？

Lake Minnewanka亦都係著名嘅露營地，湖岸平坦，適合小孩和寵物跳跳跑跑，廣大的草坪上擺了一些桌椅，是個很適合全家大小來野餐的地方 ~~

景區內的公廁好特別 ~~

沿著湖邊有條好輕鬆嘅郊遊徑「Lake Minnewanka Trail」~~

徒步20分鐘左右嘅路程就去到Stewart Canyon上的木橋了 ~~

由木橋兩邊望過去清楚見到好靚嘅S灣 ~~

跟住我哋就行返去停車場取車然後離開Lake Minnewanka湖區了 ~~

下一個目的地係Banff Town，我哋到達嘅時候係下午3點鐘，打算順便搵間餐廳食午餐 ~~

Banff Town係國家公園內最熱門嘅旅遊中心，亦都係加拿大洛磯山最早建立嘅城鎮。到處都係渡假旅館、商店、餐廳、精品店、博物館等，城鎮仍保留19世紀嘅建築特色 ~~

Banff雖然唔大，但卻係全世界户外爱好者向往嘅地方，所以Banff嘅大街上有著世界各地嘅風味餐廳，除了西餐同中餐之外，日餐、韓餐、泰餐甚至尼泊爾餐都能够搵到。

不過今日午餐我哋都係揀咗間穩陣啲嘅西餐廳 ~~

味道ok，又大碟而且價錢公道 ~~

食飽午餐之後又係啲女士們行街購物嘅時間喇．．．．！！

逛吓逛吓好快又到傍晚了 ~~

又係時候返Canmore嘅Platinum Suite Resorts 煮飯喇 !! Canmore嘅住宅區都可以見到有野生鹿出沒？？

今晚嘅晚飯有蜜糖雞翼、香辣BBQ雞翼、蝦仁炒西芹、清炒羅馬生菜同埋昨晚雪櫃剩返嘅另外半塊三文魚 ~~

食飽咗休息片刻之後我哋4個女人就走咗去樓下浸熱水池 ~~

DAY 8 (27Sep2015) —

其實我哋住宿露台望出去嘅風景好靚，好天時清楚見到洛磯山脈。一朝早就見到咁靚嘅藍天令我心情大好 !!

今早都一樣係八點鐘一齊食早餐，尋晚食剩嘅幾隻雞翼，所以今朝一於整雞翼炒麵，搵啲生菜、西蘭花做伴碟，令到碟炒麵同隔夜雞翼望落無咁樣衰，嘻嘻！!

今晚連續兩晚我哋喺Canmore嘅住宿地方並唔一樣，所以食完早餐之後執好行李，我哋九點四十分開始出發離開 ~~

今天一路上陽光明媚，在車裏我都感覺有啲熱，但係唔明點解坐喺車後座嗰三位女士成日都話凍…..凍…….凍……!! 佢哋覺得凍又唔著多件衫，但又唔俾我開冷氣，救命呀！！

我哋架車經過時見到叢林有２隻小鹿出現，其實喺洛磯山脈嘅國家公園範圍內好容易會見到野生動物。加拿大最著名的莫過於美如詩畫般嘅景色，巍峨的雪山配上清如鏡般的湖水，難怪加拿大人如此自豪道：「如果不能出口風景，我們就進口遊客！」　除咗美景，加拿大豐富嘅生態都係一大特色，遊客不必在深山野地裡尋覓，只要在路邊草原就有機會欣賞到野生動物悠閒地覓食 ~~