Day 8 (22/6/18) :

兩個小時嘅飛行時間，我哋中午12時50分就安全抵達開普敦(Cape Town)了, 一落機馬上來張大合照先 ~~

經過喱姐寫電郵去包車公司投訴之後，包車公司換咗一位女司機Elise俾我哋，服務態度明顯比早幾日嗰個燥底司機Martin好得多了。 Elise喺開普頓機場接咗我哋之後第一時間車我哋去醫肚先 ~~

食咗7日嘅西餐， 今日轉下口味食中餐 ~~

久旱逢甘露，個幾星期冇食過中餐，呢間中菜館，菜式普通，煮法亦唔見得特別好，但就特別開胃 ~~

下圖就係我哋喺開普敦連續住三晚嘅Park inn by Radisson酒店，三日唔使搬酒店，爽呀！!

今次南非成個行程，緣人都有幫我哋攞行李 ，咁大公無私嘅精神，想唔讚佢都唔得 ~~

行李點齊， 可以入酒店啦 ~~

12位團友一共六間雙人房，順利check-in，yeah !!

話明呢個係豪華團，房間寬敞，廁所乾淨就緊㗎啦 ~~

仲可以坐喺梳化睇電視~

安頓好晒啲行李之後已經係下午4點15分了，就馬上出發去我哋今天開普敦行程嘅唯一景點「Waterfront碼頭廣場」 ~~

微雨過後，天上出現咗一道彩虹 ~~

好奇怪，雖然地面毛毛細雨但係天空上仍然係一片藍色，一啲都唔影響我哋影靚相嘅心情喎 ~~

摩天輪和港灣中停泊的遊艇相映生輝，遠處桌山全貌更可一覽無遺 ~~

呢度又叫做Victoria and Alfred Waterfront，係Cape Town最繁華區域之一

啲團友個個散開晒掛住影彩虹影靚景，而著住情侶裝嘅緣人和喱姐，正向我哋示範乜嘢叫做恩愛同埋幸福，真係令人眼冤呀 !!

趁食晚飯之前仲有啲時間，大家就入咗Waterfront個Victoria Wharf大型商場裡面逛吓 ~~

大型商場戶外戶內亦都裝飾得美輪美奐 ~~

各式紀念品，小店應有盡有~~

呢度連花店都有，女人見到花，結果咪 ……買囉 !!

查實就係喱姐嘅老友兼好姊妹小魚兒見到啲咁靚嘅花，專登買來送俾喱姐以示謝意，多謝佢搞咗呢個南非深度遊，仲留位預埋小魚兒一齊來玩 ~~

啲顏色真係襯到絕囉 ~~

行返去去商場另一邊又有好多靚餐廳 ~~

傍晚6點半都已經開始天黑了，差唔多又係時候食晚飯喇 ~~

所以今晚我哋嘅晚餐都安排咗喺Waterfront呢間咁有情調嘅Cape Town Seafood Market海鮮餐廳解決 ~~

一張長枱坐晒12人剛剛好 ~~

開餐喇 !!!

你睇吓成枱美食幾咁豐富，如果冇食力真係要考慮清楚先好報名參加喱姐團呀 !!

飯後又點少得甜品呢 ?

其實係大家非常唔滿意之前嗰位燥底司機Martin嘅服務態度，所以今早佢送到我哋去King Shaka機場之後我哋決定唔俾小費佢，寧願將啲小費留返俾我哋所有團友飲咖啡食甜品好過啦！所以呢的Häagen-Dazs雪糕係Martin請嘅，多謝晒！

食雪糕或甜品係可以令大部份女人開心㗎，一睇呢張相就知啦，哈哈 !!

連甜品都食埋喇……係時候返酒店好好休息啦……準備迎接明天Cape Town嘅精彩行程，晚安 !!

Day 9 (23/6/18) :

酒店大堂，除咗裝修靚，最大賣點就係有南非人嘅偶像「曼德拉」嘅肖像 ~~

日日慶祝曼德拉日 ? 係唔係唔使做先 ?

酒店餐廳 ~~

酒店自助早餐 ~~

麵包加雜果，應該算係清淡早餐卦 ~~

今日嘅Cape Town行程超豐富，一共有五個景點 :

(1) Table Mountain桌山

(2) Signal Hill訊號山

(3) Cheetah Outreach獵豹全接觸

(4) Stellenbosch南非酒莊

(5) Cape Town Sea Point海邊賞日落

早餐後我哋8點鐘就起程出發去第1站 Table Mountain~~

太陽伯伯出來了 ~~

太陽升起之後天色好到不得了 ~~

一去到Table Mountain (桌山)入口處，嘩……!!!  排晒大隊喎 !!!

喱姐第一時間梗係幫我哋去排隊買入場票先啦，排吓排吓好快就排到 ~~

入埸費R255南非盾，貴就貴啲，不過包埋吊車喎 ~~

跟住就排隊搭吊車上山 ~~

呢款吊車好正，一路上山，一路旋轉，使到每一位乘客都可以睇到唔同方向嘅景色 ~~

360度環迴大景觀，正 !!

晴空萬裡，一望無際，直頭係高處不勝寒 ~~

回望山腳，真係覺得好高，連個吊車駕駛員都話 Good !!

桌山海拔1,086米，是一座頂部平坦的沙岩山，由於其頂部異常平坦，且可以俯看開普頓半島，因此桌山成為了南非的一個著名旅遊景點 ~~

山腳就涼涼地，但係一上到山頂，大風兜口兜面咁吹過嚟，個個著晒羽絨都「雪」下「雪」下 ~~

桌山山頂面積好大 ，慢慢行一個圈，差不多要一個小時 ~~
登高遠眺，好有氣勢 ~~

轉一個方向， 往下望 ，一樣咁靚 ~~

一向唔怕凍嘅豪好，今次都要頭載帽，手插袋，口不揚聲。 雖然有陽光兼著晒羽絨，但係寒風吹埋嚟，手背，面額都係赤赤痛 ~~

山頂周圍都係美景，處處有藍天，點樣影都係咁靚~

最後， 喺另一個方向，再影多幾張 ~~

呢個黃金位置，唔好嘥，大家一個一個排住隊，逐個影返張沙龍，首先出場嘅係喱姐和小魚兒 ~~

細孖同埋發哥都包到實咁影返張先 ~~

輪到小冰、Winnie以及緣人出場~

咁凍兼大風，Winnie都笑得咁燦爛，點可以唔俾個like佢呢 ?

仲有呢一舊沙岩石、加上呢個角度、呢個景，咁有feel….團友們又點可以唔影返一張呢 ?

最後係三個黑超型男，加三個黑超型女嘅合照 ~~

山上嘅風光雖然靚，但係實在太凍，我哋停留咗個幾鐘就坐返吊車落山，然後Elise車我哋去到第2個景點「Signal Hill」~

Signal Hill (訊號山) 係開普敦一個很顯著嘅地標。它位於桌山西側，是桌山山脈延伸部分。與位於其左邊的獅子頭山頂連在一起，看起來像是古埃及的獅身人面像 ~~

訊號山依然屬於桌山國家公園嘅範圍，海拔大約350米 ~ ~

呢度冇桌山咁高，亦都冇桌山上咁凍，加上陽光燦爛， 大可喺度慢慢影個飽 ~~

來一張相框大合照先，12人太多坐唔落，發哥同珊姐行得慢，只好靠邊站 ~~

相框中嘅卓山加上藍天白雲咁靚，喱姐忍唔住又要影返一張單人相留念 ~~

video !

行程緊密，離開訊號山之後又繼續去下一個景點「Cheetah Outreach」 ~~

沿途的風景吸引到我哋又停車影相 ~~

豪好專心影靚景，點知成為咗呢張靚相嘅最佳男配角~~

「我都要做最佳女配角」，喱姐就咁 「攝」咗埋嚟， 成為最佳女配角 ~~

今日第三個景點，就係去睇獵豹。 我哋個女司機Elise陪埋喱姐一齊走去買門票同埋查詢，明顯比之前個燥底司機好得多啦 ~~

Cheetah Outreach係去南非開普敦不容錯過嘅一個精彩節目 ，有機會近距離接觸獵豹，大家既期待又緊張。售票處，有圖片同埋文字介紹呢種非洲跑得最快嘅動物 ~~

睇完資料我哋12人就浩浩蕩蕩進入獵豹園區 ~~

由於唔可以太多人一齊近距離接觸獵豹，馴獸師要求我哋2人一組， 等候輪流進場 ~~

園區範圍廣闊，每一個訓練場都有一隻獵豹和一位馴獸師。 佢哋用獨特嘅訓練方法，使到獵豹平靜落嚟，可以俾我哋近距離同佢哋合照 ~~

我哋可以自由喺場外拍照，或者去休息亭等待進場 ~~

入訓練場之前，一定要將鞋底消毒清洗乾淨 ~~

CatCat同埋牛嫂首先進場 ~~

雖然有馴獸師在場，畢竟有一定嘅危險性，大家都小心翼翼，所以笑得唔係好自然 ~~

輪到細孖我同我太太Josephine喇 ~~

下一組輪到Winnie同小冰 ~~

再輪到下一組嘅時候隻獵豹已經開始唔耐煩喇，行來行去都唔肯再乖乖靜落來，馴獸師唯有安排另外4位團友(喱姐、緣人、小魚兒以及發哥)去接觸另一隻小獵豹 ~~

探訪小獵豹，雖然冇咁危險，但仍然需要有馴獸師在場 ~~

睇完獵豹，已經到咗中午食飯時間，前往下一個景點Stellenbosch之前經過一個小鎮，所以就決定喺嗰度搵間餐廳食晏 ~~

好喜歡呢啲木雕長頸鹿呀 !!  可惜今天行程緊湊，唔夠時間安排咁大件嘅物品運返香港，唯有下次有機會再買 ~~

我哋為咗爭取時間，決定簡簡單單，喺小鎮搵咗一間墨西哥小店食午飯 ~~

雖然話係小店，但係仍然好有特色，沿著餐廳嘅牆壁，都掛滿咗唔同嘅藝術品同埋油畫 ~~

小魚兒第一時間化身墨西哥女郎，影返張相留念 ~~

小冰話我都唔執輸 !!  借完帽，再借相框， 越影越興奮 ~~

個門口都好有特色，喱姐快啲嚟影番張啦 ~~

餐廳內部嘅擺設雖然靚，但係較為侷促，我哋決定坐喺餐廳門外享用午餐 ~~

食物賣相好靚 ~~

食完午餐，我哋匆匆驅車朝著 Stellenbosch 葡萄園酒莊進發, 從車窗外望，草地遠處，係一望無際嘅葡萄園 ，可惜時值冬季，葡萄睇唔到，只見到 已凋謝嘅金黃色樹葉~

Stellenbosch 葡萄園酒莊係南非最古老的葡萄酒城鎮，十九世紀初，還一度成為法王拿破崙最愛嘅葡萄酒產區，亦都喺1690年時出產咗第一瓶葡萄酒 ~~

Stellenbosch得天獨厚的土壤和氣候，能產出優秀且結實的釀酒葡萄，再加上一路傳承下來釀酒工藝，目前已成為南非第一大葡萄酒產區，每年釀製出十億公升的葡萄酒，除了供應南非境內的葡萄酒需求外，還成為英、德、法、瑞典、荷蘭等國的主要進口葡萄酒供應國 ~~

葡萄園旁邊有一座釀酒廠，裏面附設餐廳同埋試酒室~~

酒莊嘅外型，古色古香，俾人一種認真、嚴格、富有藝術氣息嘅感覺 ~~

酒廠規模好大，裡面有數之不盡嘅酒桶 ~~

我哋每人只需要俾R40就可以坐喺度，慢慢細嚐每一隻唔同嘅紅酒或白酒 ~~

如果試啱邊支啱口味嘅話仲可以買返香港，冇興趣嘅亦都冇所謂 ~~

酒莊外，風景亦都好有鄉郊寧靜感覺，簡簡單單，一草一木都構成一幅美麗嘅圖畫 ~~

香港已經越來越少鄉間田園嘅風景，嚟到呢度有少少懷舊嘅感覺，多拍幾張 ~~

係藍天嘅襯托下，凋謝咗嘅葡萄園依然有一種說不出嘅魅力~

一種外表奇怪嘅果實 ，係乜嘢嚟㗎呢 ?

參觀完酒莊後，已經係近黃昏，夕陽西下，我哋匆匆乘車到今日行程最後一個景點「Sea Point」海角 ~~

海浪不停拍打著岸邊巨石發出巨響 ~~

Winnie冒著寒風，好努力咁捕捉好望角嘅夕陽 ~~

喺度吹吹風，聽聽浪，欣賞海邊日落 ~~

萬裡無雲，南非嘅夕陽顯得有點孤單，束手望天嘅喱姐，似乎若有所思 ~~

近岸，是隆隆的巨浪，遠方，是平靜的海洋，夕陽無限好，只是近黃昏，隨著日落西山 ，我哋今日嘅行程，亦都告一段落 ~~

嚟到南非，點可以唔試下著名嘅南非鮑魚呢?  原來南非人唔興食鮑魚，要食鮑魚嘅話就一定要到中式酒家先至可以搵得到 ~~

我哋今晚決定豪一豪，一人一隻用刀叉食。 呢隻鮑魚每人盛惠港幣二百幾，味道普通，有少少中伏嘅感覺 ~~

除咗鮑魚，自然少不了點一些粵式小菜 ~~

Day 10 (24/6/18) :

今日係南非行程嘅第十日，節目依然非常豐富，我哋將會去下面幾個地方:

(1) Cape Point 開普角

(2) Hout Bay Harbour 豪特灣  Duiker Island 海豹島

(3) Cape of Good Hope 好望角

(4) Boulder Beach Penguin Parade 企鵝天堂

除咗包車，亦有巴士可以嚟呢度CapePoint離好望角好近，同屬於好望角自然保護區，山頂亦有一座燈塔，由於風景好接近，我哋決定只在路口打咭，停留一陣，影張相就往其他景點進發~

著名嘅牛嫂跳~

豪特灣Hout Bay Hourbour，係前往海豹島 嘅碼頭，沿岸邊有街頭音樂表演，有售賣快艇船票去海豹島，亦都可以近距離接觸海豹 ~

沿碼頭海岸，泊滿咗各式各樣嘅遊艇~

當我哋仲喺度遊遊蕩蕩嘅時候，喱姐巳經買齊12張往海獅島嘅「飛」~

排隊上船!  出發啦，船上會好抛，小心暈船浪~

前往海豹島嘅船唔算大，我哋坐定定，望著前方海面，期待近距離接觸海豹~

基本動作， 船上影番張合照~

回望灣內排列整齊嘅遊艇~

影相唔笑嘅，係咪有啲暈船浪呀？

呢個德克島Duiker Island位於開普敦豪特灣外一座礁石小島，距離海岸只有幾百米，搭船約二十分鐘~

你睇，發哥影得幾咁專心~

海豹島，越來越近，岸上嘅海豹隱隱約約可以見到~

海島已經好近，不時聽到巨大的聲響，原來係海浪拍打潮石發出嘅聲音~
啲海浪真係好大㗎~越接近海豹島，風浪越大，船越抛，企都企唔穩~

似乎D海獅好喜歡堆埋一齊，喺石上曬太陽~

海鷗不斷係天上徘徊飛翔，似乎搵緊啲海豹食淨嘅物資~

岸上一座高山，形態奇特，係咪有啲似海豹呢~

返到岸邊，又風平浪靜喎~

岸上街頭四人樂隊，仍然不停喺度演唱~

為咗滿足遊客，岸上安排咗一隻海豹，只要俾小小錢，就可以同呢位海豹明星近距離合照~

睇完海豹，仲可以喺附近嘅小販攤檔，買番啲戰利品~

_{沿住海邊嘅公路直走，我哋朝著今日最重要嘅一個景點好望角 cape of good hope進發~}

_{一路睇住海景，不經不覺又到我哋嘅目的地 ~}

_{好望角最初稱為風暴角，係位於非洲南部非常著名嘅岬角(從山上伸向海邊嘅巨石)，佢係開普敦嘅地標，亦都係南大西洋同埋印度洋嘅交匯處，佢嘅正南方就係遙遠嘅南極洲~ 好望角路標旁邊，係一片大石灘，同我哋見慣嘅海灘有好大分別，風浪非常之大，海邊重有無數巨型嘅海帶~}

_{剛才喺船上搖搖晃晃，海豹島離岸嘅水光山色影得唔係幾好，依家落車企定定影返夠本~}

_{無啦啦，走咗隻大鴕鳥出嚟~}

_{好望角，係非州最南面嘅地方，咁出名，冇理由唔影返張相~ 紀念牌~12人排排企，剛好夠位~}

_{過咗公園管理站，沿著寬闊的行人路往上走 ，就可以到達山上嘅燈塔~}

呢度已經係世界嘅最南端~

_{山頂上嘅燈塔，在藍天下，更加顯得巍峨聳立，團友們點肯執輸，紛紛爭相打卡留念 ~}

_{嚟咗南非咁耐，一路都係天朗氣清，今日亦都唔例外，係燈塔上登高遠望，都唔分得出邊度係印度洋，邊度喺大西洋，邊度係南冰洋 ~}

_{呢度離倫敦九千公里，莉紐約一萬三千公里離………離香港幾多？偏偏就係冇指示牌~}

_{沿途有好多野生嘅狒狒，佢哋會搶遊客啲食物 ，甚至會襲擊人~}

_{狒狒唔同香港的馬騮，大隻好多，我哋見到一個女遊客，被狒狒搶食物導致手臂受到輕傷 ~}

_{今日行程好充實, 我哋行完好望角後, 馬上驅車前往Boulder Beach, 睇著名嘅南非企鵝 ~}

_{我哋就係喺呢間餐廳午 ~}

_{為咗爭取時間，我哋喺景點附近嘅一間餐廳 午餐~ 呢餐又清淡啲 ~}

_{今日嘅尾站係Boulder Beach野生企鵝保護區, 係呢度可以近距離與企鵝接觸，其實也稱不上係接觸，只係就近觀賞啫 ~}

_{西蒙鎮(simon’stown)係一條寧靜嘅小鄉鎮 , 只有萬多伶居民, 但係住咗3500隻非洲企鵝 ~~}

_{企鵝保護區，隱藏喺住宅區前嘅海岸灘上， 遊客必須將車輛停喺停車場，然後步行 通過民居街道，先至可以入內參}觀 ~

_{請不要觸摸，不然會被企鵝琢傷的！}

_{成群的非洲企鵝, 悠哉的趴係海灘, 大石上曬太陽, 東張西望, 怕熱嘅聯群結隊到海裡戲水, 據說到傍晚時分, 出外覓食的企鵝成群回家, 更為壯觀 ~} 

_{為咗避免遊客破壞同埋影響非洲企鵝嘅繁殖環境, 海灘上鋪砌咗長長嘅木棧道, 讓遊客可以深入企鵝居住環境, 細意觀賞 ~}

_{非洲企鵝據聞係唯一一種生活在陸地上的企鵝, 分佈於非洲地區的南非，那米比亞，bouldersBeach更可以講係全世界唯一可以近距離接觸企鵝的地方啊 ! 為怕打擾這些企鵝，好多地方都唔俾拍照, 唔畀近距離接近企鵝, 呢度就冇呢種限制 , 大家可以隨自己心意咁跟企鵝靠近~} 

_{黑色腳掌，眼睛前粉紅色小塊，胸前一道黑線，都係呢D企鵝嘅特色，所以又被稱黑腳企鵝，而這類貌似眼影嘅部分，就係佢哋嘅汗腺~}

_{雖然睇起嚟玲瓏可愛，不過都係要注意安全，不要任意撫摸、觸碰，以免被其利嘴啄傷~}

_{點解企鵝會咁受人歡迎？睇住企鵝行走時, 矮矮胖胖圓滾滾身體, 搖搖晃晃擺動著兩旁的鰭, 就像剛學會走路的小孩一樣趣緻可愛, 讓人目不轉睛, 不知不覺係呢度逗留咗個幾鐘頭 ~}

_{出番收費站，原來有一條小路，引領遊客到沙灘嘅另一端，喺呢度可以從另一角度觀賞企鵝嘅千姿百態 ~}

_{到南非旅遊時, 別忘記來拜訪這個唯一生活在非洲土地上的的黑腳企鵝啊 !!  離開企鵝小鎮 , 我哋有坐車返返市中心, 眼前所見又係一幅以桌山, 訊號山為背景嘅美麗圖畫 ~~}

_{今晚坐大圓枱, 食物有生蠔, 燒雞, 喺Cape Town 嘅最後一晚食得豐富啲 ~}

_{Day 11 (25/6/18) :}

_{今日已經係day11，我哋下晝兩點先至坐飛機去約翰尼斯堡， 所以仍然有半日行程~   一早起身，馬上坐車去呢度好著名嘅Green Market Square掃貨~}

_{Greenmarket Square以女人衔模式小販攤檔而著名, 然而開普頓有好多呢D同類型市場, 亦都有好多買同樣貨品嘅地方, 所以我認為呢度冇乜嘢特別, 真正同其他市場有唔同嘅地方, 就喺度周圍嘅歷史建築物, 無論你買唔買, 喜唔喜歡這些攤檔, 你都值得一嚟睇一睇週邊嘅建築物. 感受一下 週邊嘅歷史 ~~}

_{不過話返轉頭，女士們嚟到呢啲咁嘅小販市場 ，又點會唔血拼呢 !!}

_{於是乎， 兵分幾路, 各有各睇, 各有各買 ~~}

_{睇見女谷友們，一大袋，一小袋，面上流露著滿足嘅笑容， 都好戥佢哋開心 ~}

_{晨早天氣寒冷，我喺小販攤檔行咗一個圈， 乜都買唔到，係附近睇下建築物，適當時候會合番大隊，完成呢個購物之旅~}

_{尚餘少許時間, 司機車我哋到附近一處好有特色嘅街道, 每間屋都塗上不同嘅顏色, 喺桌山同埋藍天嘅襯托下, 耀目搶眼 ~}

_{有開篷旅遊巴士經過，唔使講呢度都係遊客必經之地 ~}

_{在坐車前行幾分鐘，出現咗一個市區中嘅城堡，有護城河，有大砲 ~}

喺CapeTown玩咗三日，今日我哋坐兩點鐘的航班飛約翰尼斯堡 (Johannesburg)， 早咗少少，喺機場嘅快餐店，嘆番個輕鬆嘅下午茶先~

呢個trip，大家食大咗個胃，講明係輕鬆下午茶，都叫咁多嘢食~

BA6416，飛johannesberg，冇錯，係呢班機喇~

雖然只有兩個鐘頭嘅食航程，大家都爭取時間休息~

我哋會連續兩晚入住離機場只有37km嘅The Maslow Hotel~大堂好靚~

房間亦都好靚~

Check in後，已經日落西山，我哋今晚唯一嘅節目就係參觀賭場~

呢間 Montec Casino位於sandton市中心， 規模都好大~ 室內有人造天幕，看似小鎮戶外，其實係處身於大型商場裏面~

最後，俾喱姐發現咗呢間泰式餐廳，期待可以有啲粉麵飯落肚~

餐廳人唔多，寧靜舒適，最緊要係有張大枱，可以12個人坐埋一齊~

食物味道一般，最正係有啲湯粉麵，亦算係滿足嘅一餐 ~

我哋又兵分幾路，有啲入賭場玩番幾手，有啲喺商場大街，四圍逛，各適其適 ~

Day 12 (26/6/18) :

晨早起身，補影番幾張酒店環境靚相~

簡簡單單食D早餐，我哋就出發去期待已久嘅重點節目……Horse Riding  Safari~

大夥兒落車後，去到接待室，聽完briefing，簽埋同意書，戴上騎師帽，戰戰兢兢，刹有介事咁，行去馬場， 搵自己嘅坐騎~

呢度嘅負責人好好人，又細心，幫我哋影完相，就教我哋點樣同自己隻馬相處~ 「手機唔可以較靜音，萬一騎馬時跌咗落地 ，有聲音係比較容易搵得番。」呢D咪係細心囉~

出發前，例牌影番張大合照~

咁靚嘅環境，咁好嘅天氣，仲有咁多動物做背景，梗係搏命影多啲相啦，但係原來騎住馬，係冇辦法幫自己影嘅，影團友亦都只能影到背面，好彩喱姐同埋兩位領隊不斷喺我哋前面，回頭幫我哋影靚相~

首先出場嘅係長頸鹿~

跟住係非洲斑馬~

同坐車唔同，騎住馬，啲動物好似覺得你冇咁大威脅，唔會即刻走開，所以就可以更近距離咁觀察啲野生動物~

呢度啲馬好純，兼且訓練有素，我哋呢班人，好多都唔識騎馬，甚至從未騎過馬，但係嚟到呢度，都可以輕鬆咁係大草原上面奔馳~

然後有小鹿斑比~

喺咁靚嘅大草原上面騎馬，本身已經係一種好高嘅享受，一面騎一面可以慢慢欣賞非洲草原嘅風景，當遇到成群嘅動物時，更加令人喜出望外~

之前我哋經歷過七次safari，見齊曬的big five，亦都喺濕地Safari見過成群河馬，但係今次騎著馬睇依然有新鮮感~

歡樂嘅時光過得特別快，兩個鐘頭嘅safari好快就完結，係喱姐同小冰跟呢度嘅黑人 帥哥拍照留念後，我哋上午嘅節目完滿結束~

“呢一個1day tour係我有史以來參加過最好玩嘅團”。 兩年前，喺喱姐嘅遊記裡面，睇過一句咁樣嘅評述，的而且確。喺圖片裏面，見到喱姐同幾位同事騎著馬，喺大草原上面奔馳，追蹤各種類型嘅野生動物，估唔到今日可以願望成真，身存處其中，兼且有一大班好朋友同行，一齊分享個中樂趣~

今日中午嗰餐。原本打算去食雲吞麵，點知搵極都唔搵唔到網上嗰間鋪，應該已經執咗，唯有又係快餐店~

行程已近尾聲，係時候買番啲紀念品，同埋手信返香港。Rose Bank  Art and Craft Market 係我哋馬上要去嘅地方~

呢個market好大，專係買啲富地方色彩嘅手工藝品同埋紀念品~ 無論你幾唔鍾意買嘢，嚟到呢度，你都會忍唔住手~

睇完工藝品，又轉攻超市shopping，今次我哋嘅目標係 Sandton City~

主攻什麼貨品？酒，南非酒咁出名唔買點得~

結果，喱姐數量最多，發哥價錢最貴，大家都滿載而歸~ 今年嘅BBQ， 肯定不醉無歸~

食埋呢餐晚飯，聽日就回程，食多啲~

一如既往，check out之後，我哋就係繼續休息玩樂，喱姐就要埋數，忙到不亦樂乎~

Day 13 (27/6/18) :

食埋早餐，直往機場，14日南非深度遊，行程完滿結束，再次感謝喱姐，不辭勞苦 為我哋安排呢一次咁精彩嘅行程 ~

南非後言

衷心感謝喱姐安排這次南非之旅。這亦是我一生中難忘的旅程體驗之一，筒中樂趣，新的體驗難以筆墨形容。在14日内緊凑行程，與野外猛獸，馴良得意的企鵝近距離。與海獅和濕地公園的禽鳥、動物的遠距離觀看。再加上南非海岸綫的美景，站立在南美洲最南的地標好望角勾起明朝鄭和下西洋的思緒。酒店更是有特色，舒適，托喱姐鴻福，有多晚更提升獨立房，商務房等。這次從在北至南，中途在東面的St. Lucia遊玩。可想而知，喱姐費盡心思安排。用餐亦非常有心思，除南非地道食物，還安排中餐，泰餐，寿司等以解思鄉之情。安排旅遊車，門票，機位编排，觀光與用餐等事情亦拿掐得緊湊，没有浪費時間。這十四天真真正正地看到喱姐的真本領，佩服之至。再次衷心感谢喱姐。退出的是一生遺憾，補上的一生美好回憶。是由衷之言。

 

 

南非深度遊 – Part 1【Dullstroom 】 | (carinekok.com)

南非深度遊 – Part 2【Kapama Buffalo Camp 】 | (carinekok.com)