我身邊嘅朋友或屋企人都冇一個嚟過巴淡島呢個地方，所以我今次想分享一下！ 如果同大家最熟悉嘅峇里島比較，我個人覺得巴淡島會更加有吸引力，低消費兼可以住好食好，超抵玩！👍🏻 巴淡島上遊客主要係來自新加坡、馬來西亞或者中國，因此所有餐廳食物都係以中餐或者印尼餐為主，啱晒我！😆 峇里島主要係歐洲或澳洲遊客，所以大部份遊客區的餐廳都係西餐為主，而且消費價格高過巴淡島。峇里島的另一個最大缺點就係無論任何時間都超級大塞車，人車爭路超級煩！反而巴淡島嘅馬路係雙線行車，就算係繁忙時間都唔會塞車，而且call grab超容易，我每次call都唔需要等超過5分鐘就即有車到！👍🏻

巴淡島嘅Spa或者按摩中心選擇真係多不勝數，好多間Spa嘅裝修仲要係美輪美奐，而且價錢非常合理，一般90分鐘油按都係大約Rp270k（HK$135 / RM75) ，超值！真係非常之吸引！😄👍🏻 今年6月為咗去行Kelimutu活火山而去過的印尼Flores Island，全程4日3夜冇啖好食，想搵間似樣啲嘅餐廳都冇，住宿差而且全程山路多灣兼崎嶇，非常之落後的一個島。 但今次去過巴淡島之後令我對印尼的小島完全改觀，感覺係一個幾唔錯嘅度假小島！ 不過巴淡島啲水質就麻麻哋，如果想玩水都係建議去大馬啲外島例如刁曼島、停泊島、沙巴啲小島等等，水清沙幼…. 如果去印尼純粹想玩水嘅話都係科莫多島或者龍目島會係更好的選擇。 喜歡購物嘅朋友巴淡島shopping就比較少選擇，主要都係大型商場Grand Batam Mall，但峇里島的旅遊區就比較多嘢買，好多好多路邊小店及boutique，非常商業化，所以呢度純粹係食食食、按摩同去Beach Club Hea吓！ 😁  巴淡島絕對係一個非常好嘅短線旅遊選擇，我的結論就係平靚正 ，強力推介！！😆👏🏻👍🏻