Day 7 (24Sep2013) –
今日離開奇旺區要前往嘅下一個目的地係海拔2175米嘅Nagarkot(納加闊), 位於Kathmandu(加德滿都)巿區以東北方向約32公里的一個山坡上, Nagarkot因為視野遼闊所以如果天晴的話, 可遠眺喜馬拉雅山群峰, 而且日出日落景色特別壯觀，所以又係尼泊爾嘅一個熱門旅遊勝地 ~~
早上9點鐘我地食完早餐退咗房之後，Sapana Village渡假村嘅車將我地送到去長途巴士總站 ~~
個車站後面係一大片綠油油的草原 ~~
今日開返去加德滿都嘅巴士都係得5個乘客咋，咁想坐邊個座位都冇問題啦！
巴士9點30分開車，車程同去程一樣都係大約6小時左右，中途一樣會停喺Muglin的一間motel度俾司機休息下順便俾乘客落車食一個免費自助午餐同埋去吓洗手間 ~~
又係呢碟好味嘅咖喱雞飯呀……好似走地雞咁啲肉質彈牙架！不過食完呢次之後相信我地未必會再有機會返黎食喇 ~~
食飽上車又繼續瞓……
唔經唔覺下午3點45分又返到去Kathmandu喇，然後由Harish安排咗車去巴士站接我地去Nagarkot~
車輛需要繞著迂迴曲折嘅山坡路迴旋而上，後半程路的沿途所見到嘅都係民居同梯田景色 ~
Nagarkot山上或山下都有不少蜿蜒小徑，可作短途遠足，亦可從不同角度欣賞到喜瑪拉亞山脈 ~
這層層疊疊的梯田，在夕陽的照射下啲色調顯得更靚 ~
車程約一1小時又40分， 傍晚5點40分終於都到咗今日嘅目的地， 就係Nagarkot山上嘅Club Himalaya酒店喇……感覺今日係由朝坐車坐到天都開始黑先到囉！
而呢度位於海拔 1985 米，最高觀景點 2175 米，在天氣晴朗時係可以觀賞到北面巨大的喜瑪拉雅山脈架 ~~
酒店外觀 ~~
酒店大堂 ~
當地出產的陶器花瓶擺設， 好特別呀 !!
Club Himalaya 有 70 間設有陽台的空調房間， 雖則不是什麼大酒店， 但四周環境清幽怡人， 而且喺酒店天台的暸望台上仲可以欣賞到日出日落以及喜瑪拉雅山脈全景，都算係一間唔錯嘅酒店啦，不過我覺得房價偏貴，房價連2人自助早餐要港幣1041一晚 ~~
取咗房放低啲行李之後就去酒店餐廳食晚飯先 ~~
酒店只得一間餐廳選擇，環境就幾好喇，不過啲菜式嘅味道同賣相都唔多掂喎，好彩只係住一晚咋 ~~
夜晚住喺山上面，除咗返房沖涼休息之外我真係諗唔到有啲咩節目喇，咁貴住一晚而且我地又咁遲先入住，當然要早啲返房嘆返吓啦……..晚安！
Day 8 (25Sep2013) —
一早5點30分起床梳洗便離開房間跑到酒店天台的觀景台去等日出，上到去天台已見有多名住客set好腳架準備就緒喇…..
天色正開始由黑暗轉變為一片朦朦光的深藍色，開始見到一線曙光初露，應該係叫做香港電台收音機節目名稱「晨光第一線」啩 ~~ 
而且個日出仲有雲海為伴添 …….!!
帶有動感的雲海，正緩慢地翻滾著，至太陽高升仍久久不散， 雖然個日出唔算好靚，但我地都收貨啦！
轉去天台的左邊就可以見到喜馬拉雅山喇！可惜又係天氣麻麻地，雲遮霧障下的喜瑪拉雅山又被遮蓋了大部份 ~~
以下呢幾張相片的畫質證明咗我相機支鏡頭有幾cheap啦，一zoom遠少少就朦到咁…….唉！
等到太陽高升之後我地就落去酒店大堂嘅餐廳度食自助早餐喇 ~
食物不算豐富，但其實去尼泊爾旅遊我地完全冇期望過會有啲咩美食，只求飽肚就ok喇！
食飽早餐返到房間， 行出行入個陽台等了數小時，又係除咗雲霧什麼都看不見，好失望呀！
突然間又變得好大霧，啲雲霧不斷咁湧入山谷中同梯田中 ~~
既然大霧到連陽台外的景觀都無法可見， 咁就唯有早啲退房啦，然後早上10點鐘由司機同導遊帶我地去今日嘅2個主要景點，Changu Narayan以及加德滿都的第三大古城巴克塔布「Bhaktapur」~~
55分鐘的車程我地就到達了位於 Bhaktapur 北面山上的小村莊 ~~
整條村都係一啲好有特色嘅紅磚牆的民居，有好多屋再配襯埋鮮藍色嘅木造門窗， 顏色真係好搶眼呀 !!
這條村周圍都可以見到一啲當地的手工藝品，例如帶有宗教文化色彩嘅木製木偶、燈籠和面具等…….
仲有村民養嘅走地鴨 ~~
我地到這小村莊係為咗參觀「 Changu Narayan Temple」，這間古廟建於公元四世紀，是加德滿都谷地最古老的廟宇，因此被聯合國選為世界文化遺產 ~~
Changu Narayan Temple的門票每位Rs100 ~~
下一站就來到加德滿都的另一個古城Bhaktapur(巴克塔布)了, 門票每人Rs1100 ~~
一踏進 Bhaktapur 就感覺到有濃濃嘅神秘古城氣氛，好似世界停留於中世紀咁，一個個活生生嘅露天博物館展現於遊客眼前。 Bhaktapur意為「朝聖之城」, 亦稱 Bhadgoan(巴德崗)， 座落於加德滿都以東南 15 公里處， 海拔 1204 公尺， 而 Bhaktapur 更是尼泊爾的前首都，是現在尼泊爾保存得最好的中世紀城鎮， 有大量的寺廟及傳統的建築 ~~
以下是甘尼許(Ganesh)象頭神的雕像，象頭神Ganesh是濕婆神（Shiva）與祂的妻子帕瓦蒂（Parvati）所生的兒子， 在印度教中一般相信Ganesh能夠帶來智慧、消除災禍，被稱作為『幸運之神』、『智慧之神』。就因為在尼泊爾到處都見到象神Ganesh的雕像， 所以導遊就說了個神話故事給我們聽~~
印度教有三大神明， 教徒對三大神明的分別崇拜所以形成三大教派，就是梵天、濕婆和毗濕奴。而林伽派是敬奉濕婆神(Shiva)的一個教派， 特別崇拜男性的生殖力， 稱勃起的男性性器官爲 Lingam(林伽)， 以此作為濕婆神Shiva的化身來崇拜， 認爲它代表生命。
濕婆神Shiva其實是一位男性神並有妻兒，主宰世界的毀滅和重生， 是印度教廣泛崇拜的主神， 而供奉Shiva的廟裡都會豎立一些象徵男性的陽具 「 Lingam」, 以約尼為底座則是象徵女性生殖器, 亦代表濕婆的妻子(Parvati)創造超自然神力， 是宇宙之源和最高力量的象徵。圖下就是Lingam(林伽)了~~
傳說中象頭神(Ganesh)的父親濕婆神(Shiva)有一天離家之後，濕婆神的妻子Parvati即生下Ganesh，因為Ganesh是神之子，出生之後即長的十分高大強壯，Parvati有一天正好在洗澡，便叫兒子Ganesh在外頭守著，不讓外人偷窺。不久濕婆神Shiva回家了，見到有一個高大英俊的小伙子站在門口，誤以為老婆偷漢，心中充滿醋意，就叫那個小伙子讓開，Ganesh堅守母親的囑託，不讓開通路。父子二人就不知究竟就開始打起來，濕婆神Shiva竟不敵兒子，心中十分生氣，就使了奸計，一刀砍下兒子的頭，Ganesh因此身首二處。
濕婆神的妻子Parvati聽見吵架聲，出門來看，只見丈夫砍下親生兒子的頭，痛哭失聲 ，此時濕婆神Shiva才知道做錯了事。為了安慰妻子失子之痛，就去求毗濕奴神，毗濕奴神告訴濕婆神，只要明天往他交代的方向走去，看第一個生物將其頭砍下，安裝在兒子的脖子上，就可以使Ganesh復活。濕婆神Shiva依言去做，結果踫上第一個生物就是大象。於是取得象頭，放在兒子的身上，因此Ganesh就成了象頭人身~~
小巷里這些15世纪的窗，唯獨這扇窗上有最為精美的木雕孔雀。 這「孔雀窗」是Bhaktapur(巴克塔布)的藝術代表作， 被譽為整個加德满都谷地最精美的雕窗，亦是無數明信片和照片的主角 ~~
走進Bhaktapur城中央，首先映入眼簾嘅係一座醒目嘅Nyatapola Temple，5層亭臺的尖頂寺廟建築，亦係尼泊爾最高嘅寺廟和藝術傑作，臺階兩側是形狀各異的巨型動物石雕，他們像保鏢一樣盡職地守護著它，據説越往上走它的神力就越大 ~~
在古城周圍逛吓好快就到咗下午2點喇， 所以導遊就介紹咗呢間最著名嘅孔雀餐廳Cafe De Peacock俾我地去試吓 ~~
整間餐廳都只見到遊客幫櫬咋， 原因只有一個, 就係貴到暈 !!
一碗咖喱魚和什菜咖喱連白飯一碟， 埋單Rs1400， 相信係非一般當地市民能夠負擔得起的價錢， 實屬宰客之地呀 !!
在加德滿都的這個Bhaktapur古城是著名的陶器製品出産地。Pottery Square(製陶作坊)就居住 7-8 户以制作各種陶製品為生活的人家， 他們大多前舖後居，房屋前的空地上堆滿各種製品， 在這裡進行晾晒待定型後就進爐烘烤製成各種陶製裝水器皿作日常家具用品 ~~
喺陶器廣場遇到個可愛小女生 ~~
Bhaktapur 的舊皇宮廣場 ~~
Vatsala Durga Temple ~~
途中見到有個小販賣當地出產嘅蘋果， 所以買咗4個， 兩個請司機同導遊食， 另外兩個我同蝦子餅一人一個， 不過都係好似日本富士蘋果或新西蘭蘋果比較爽脆香甜啲喎 ~~
下午4點半離開咗Bhaktapur之後就由司機送我地去今晚要入住嘅Shambaling酒店 ，去到酒店才發覺原來Shambaling Hotel就是位於Boudha區，就係前文Part 1所去過的Boudhanath Stupa大佛塔附近， 走路過去大佛塔只需10分鐘左右 ~~
這是一間西藏風格的精品旅館 ，每個房間的配色各以藍、白、黃、綠、紅五色為主題，這港幣$589一晚的套房有很舒適的設施，有24小時供電和熱水，而且酒店前還有個小小花園，在加德滿都這個亂糟糟的城市裡面有這麼一個地方都算是一個非常優雅的避風港了 ~~
很明亮舒適的一間套房 ~~
放低行李之後已經喺傍晚5點45分了， 趁未天黑就先出去Boudha區行一陣 ~~ 
在加德滿都的東北面的Boudha區是藏人朝聖禮佛的聚集地，未曾正式踏足過西藏嘅我，這裡令我大開眼界， 藏傳佛教各教派喇嘛廟共數十家圍繞著Boudhanath Stupa大佛塔而建， 形成一個超大型藏傳佛教聚落，西藏文化處處，儼如一個西藏小城，他們在這裡建廟安居，西藏式的建築物隨處可見，宗教氣氛相當濃厚，來這裡朝聖的信徙 ， 多為穿傳統服飾的西藏人， 加上佛塔四周有不少西藏人聚居， 亦有大量賣西藏服飾的商舖, 故有尼泊爾「小拉薩」之稱號 ~
很多時候還可以看到虔誠的藏人以「五體投地」的方式在大佛塔前膜拜， 他們的虔誠確實令人感動啊 !!
既然已經是第二次到訪這裡， 所以就隨便到處走走 ~~
然後見到有網友試過嘅一間位於2樓嘅日本餐廳，亦係我地喺尼泊爾見過嘅唯一一間日本餐廳， 所以就好奇地上咗去試吓囉 ~~
咦…..!! 原來個窗邊座位係對正個大佛塔架…….無敵的大佛塔黃昏景觀呀 !!! 
望過去仲見到有好多信徒坐晒喺大佛塔邊誦經 ~~
為安全起見， 我地並唔敢叫魚生或刺身， 只係叫咗啲普通嘅天婦羅湯烏冬以及滑蛋豬扒飯， 咁到底尼泊爾嘅日本嘢食味道如何呢?? 呢個答案我留番俾大家去想像，
哈哈…..!!
Day 9 (25Sep2013) –
早上7點15分在酒店戶外花園的餐廳享用了一個西式早餐 ~~
酒店職員話這段時間尼泊爾咁啱遇著禽流感肆虐， 所以暫停雞蛋供應 ~~
今日係我們尼泊爾行程的最後一日，吃過早餐後早上9點便坐的士出發去兩個主要景點，Swayambhunath (猴子廟Monkey Temple) 以及Patan Durbar Square(帕坦) , 我地包嘅的士停泊咗喺半山下的停車場等我地~~
其實要去到Swayambhunath廟只得2個方法，一係乘車到半山上的前門徒步拾級以上，二係從後門山腳攀爬 365 級樓梯，咁懶行樓梯嘅我當然係揀用的士車到我地去半山上的前門啦 ~~
Swayambhunath廟坐落在加德滿都以西 3 公里處的一座小山崗上，比加德滿都谷地約高 77 米，從這裡可俯瞰加德滿都谷地全貌的美景，今日天氣依然好好, 天朗氣清下的景色很怡人 ~~
Swayambhunath廟是佛教徒的一個重要朝聖地，並以加德滿都河谷最古老的遺跡而引人注目。相傳釋迦牟尼曾親臨此地。每年佛祖誕生日時這里都要舉行盛大的法會 ~~
此廟又名猴神廟(Monkey Temple) ，已有 2500 年歷史, 因此於 1979 年已被聯合國教科文組織列入《世界文化遺產名錄》。據說建造此廟的中國文殊菩薩曾在此削去三千煩惱絲，削下的頭髮變成樹， 而頭蝨就成為咗聖猴喇 ~~
入場票價： 每人Rs 200
這座佛寺除了在廟內隨處走的猴子外，最著名和引人注目的是四面都繪有佛陀的眼睛，象徵佛眼無邊及佛無所不在，亦有洞察一切之意 ，而這對佛眼已成為尼泊爾國家的象徵及標誌 ~~
佛教創始人釋迦牟尼雖然在尼泊爾誕生，但由於後來印度雅利安人移入傳播了印度教，所以信奉印度教的人逐漸達至人口的 8 成之多，但佛教與印度教是同存的 ，有些廟宇在構造上也常常是和佛教和印度教混合一起 ~~
這裡是賣紀念品的地方，都是售買一些寶石、銅器飾品、油畫等……
啲油畫真係好靚呀 !!
如果猴子真係當年文殊菩薩的頭蝨變成嘅， 咁就證明咗啲頭蝨嘅繁殖能力相當高喇， 啲猴子仲經常成群地表演飛越佛塔去娛樂啲遊客添 ~~
逗留至中午時分我地就離開咗猴子廟, 然後就繼續去我地最後一個景點Patan Durbar Square(帕坦) 了~~
加德滿都其實主要係由三座古城組成的：加德滿都「Kathmandu」、巴卡塔布爾「Bhaktapur」以及帕坦「Patan」。 Patan Durbar Square一樣有很多古廟群，但分別應該係一個幾乎全用木砌出來的古城，Durbar Square 其實是 Patan 市區一部分，行人、車輛川流不息，好繁忙嘅一個古城 。 不過昨天買完Bhaktapur的門票每人Rs1100之後, 今日Patan Durbar Square的門票竟然又要再收Rs500，感覺有啲貴，但除非你長得或穿得像尼泊爾人，否則查票的人一看見你就自然會叫你買票，不過其實可以經很多小巷逃票進入古城的。 因為我們在Day 2已經到過加德滿都皇宮廣場(Kathmandu Durbar Square)和昨天又才剛參觀過富有特色嘅古城 Bhaktapur了， 所以對於這個佔地面積略小的Patan Durbar Square就興趣無咁大喇 ~~
結果我地就決定經另一邊的小巷逃票進入古城快速地逛個圈參觀下就算 ~~
然後搵咗間位置比較高嘅餐廳(Durbar Cafe)食午餐， 咁咪可以俯瞰Patan Durbar Square的全貌囉 ~~
我地行咗上去餐廳嘅4樓露天座位用餐， 景觀確實唔錯喎 ~~
叫咗簡單嘅尼泊爾雞肉粒炒飯和什菜Mo Mo， 味道都算唔錯， 而且價錢不貴 ~~ 
之後回程就吩咐的士司機將我地送去Thamel區，呢區就係加德滿都最旺又有最多購物店和餐廳嘅地方， 好似毛毯、高山羊絨披肩Pashmina、紙燈籠、尼泊爾特色的T恤、富有民族色彩的手工藝品， 手工製作的各類飾物，琳瑯滿目。而當中最多的就是賣登山用品的店舖，而這些著名的登山用品品牌例如The North Face, Columbia, Lafuma 等可能都是在尼泊爾製的A貨，價錢比香港要便宜一半以上，但是手工和質料感覺真的不錯。所以我們都打算為明年秋天的四川之行添啲裝備 ~~
今晚搭飛機離開之前的最後Shopping時間到喇…….加油呀 !!!! 
就係因為忙於shopping， 而且走在這條狹窄的馬路上， 人多車又多， 所以只影得以下一張相咁大把咋 ~~
買完嘢之後就截咗架的士返去Shambaling酒店， 因為今早出門之前先退咗房， 然後將我地啲行李寄存於酒店， 所以要返去拎返啲行李， 而且今晚8點半先前往機場， 仲有大把時間留喺酒店嘅花園度hea吓先 ~~
我地乘搭港龍航空晚上11時30分的KA191班機直飛返香港， 結束咗我地今次這個特別難忘而又有好深刻體驗的尼泊爾之行 ~~
飛機於Day 10(26Sep2013)的早上6時20分安全又準時地降落咗香港機場喇 ~~ 
今次行程很順利，每程的航班和巴士沒有延誤，每個導遊和司機都準時和盡責，全程大部份天氣晴朗，每天都見藍天白雲，只可惜上到山上遇著雲層太厚而遮蓋了大部份的喜馬拉雅山景。 最不慣的是走在尼泊爾的路上都是響按聲充斥著整條大街，印象中只有在中國、印度和尼泊爾才有這此起彼落的道路協奏曲，人車爭路，感覺上市民都缺乏交通安全的意識。 不過我還是覺得他們很可愛, 因為尼泊爾是多民族國家，老百姓普遍淳樸友善。我想尼泊爾人的友善，謙讓，禮貌等等絕對與宗教信仰有關係。他們對神十分敬畏。神，無不知，無不曉，法力無邊。人一旦做壞事，沒人看到也不敢，因為老天或者諸神都知道 ~~
尼泊爾旅遊小貼士：
– 尼泊爾氣候4~9月為雨季、10~3月為旱季。
最適合旅行的時間是每年九月至隔年三月，氣候相當舒適。12月到2月是冬天，略為寒冷，白天要穿薄外套，晚上需要厚外套。
春天 (3-5月)：加德滿都波卡拉氣溫大約25-30度左右；五月中之後就由春轉夏了，開始會下雨，雲層變厚的機率變高，看不看得到喜馬拉雅山就要靠運氣。
夏天 (6-8月)：氣溫30度左右，雨季！全年65％以上的雨都在這時期下。內陸飛機延遲的機會很大。
秋天 (9-11月)：雨季結束，秋高氣爽，是尼泊爾最適合旅遊的季節。
冬天 (12-2月)：氣候較為寒冷乾燥，下雨機率很低，但是霧也很大，看不看得見喜馬拉雅山，要靠緣分
-以休閒輕便服裝及舒適的鞋子為主。當地早晚溫差大，請攜帶外套、帽子、手套級禦寒衣物。氣候炎熱可自備遮太陽用具，帽子、雨傘、太陽眼鏡、防曬油、護膚霜。空氣塵沙多，可自備口罩
– 目前匯率大約：US$1=RS100 (盧比) (匯率隨時會調整，以出發前為準)
– 請自備胃腸藥、感冒藥及個人使用藥品。
– 尼泊爾受印度教的影響，不殺生，視牛為神聖，以左手為不淨，請勿以左手單手遞送或收授物品
– 拍照或休息時，請勿騎坐在神像或神獸上
– 在機場出境時, 記得要填寫出境紙先前往去排隊
– 尼泊爾之時差是慢香港2小時15分
– 尼泊爾之電壓均為220伏特 / 雙圓孔插頭。如有手提電話、數碼相機或電器用品等需要充電的話，請記得攜帶變壓充電器及轉換插頭
「全篇完」