在前一篇【PART 3 – 新都橋、伍須海篇】我提到我們返到成都之後將會有另外５日嘅成都自駕遊行程，而呢５日嘅行程將會有４個全新嘅隊友組合，一架小型私家車由 Roy負責駕駛，乘客有CV兄、我蝦子餅 (緣人) 同埋我。 而今次我非常榮幸可以邀請到團友之一的CV代筆為大家帶來呢一篇精彩的遊記，【PART 4 – 成都、嘉陽小火車篇】可以成功外判出去我實在太開心喇 !!
以下所有的黑色字都是CV寫的遊記文字部分，而紫色字係我後加的補充資料 ~~
序言 :
小弟近年經香討旅遊版係筆墨間認識了大名鼎鼎的朱古喱（喱姐），但一直未能有緣一睹芳容。今次有幸獲喱姐誠意邀請共遊四川，真係相逢恨晚，特意寫下此遊記，感謝喱姐嘅盛情。
其實今次行程係我近年出行最輕鬆嘅，因為大部分行程景點都係有既可愛又陽光嘅喱姐計劃，途中亦係由高手大師傅 Roy 負責自駕，仲有喱姐的蝦子餅(緣人大哥)幫手諗方法攞紀念品，而我主要工作就係坐車、睇景同搵唔辣嘅川菜，仲有搵地方掃腳毛 (詳情請睇內文，哈哈哈 !!! ) 今次小弟嘅四川行唔係去香港居民常去追逐嘅川西各大金秋熱門景點，而係一啲香港居民較少去嘅四川景點，行程嘅重點係由團友 Roy 提議嘅嘉陽蒸氣小火車，至於其他景點，大家慢慢睇呢個遊記來瞭解啦 !!
Day 10 (21/10/14) —
記得我第一次到成都旅遊應該係2010年跟旅行團去九寨溝的嗰一次，大家都知道好多時跟旅行團都係走馬看花，趕頭趕命咁去啲旅遊景點嘅，冇乜時間俾你慢慢咁閒逛。所以今次補返數，揀咗幾個地方慢慢行吓hea吓囉！ 今日我們的主要行程係一般的成都市內景點，而我影的亦只不過係一般成都市內的打咭相。
今輯遊記由CV兄操刀，所以我只係負責同大家分享照片啦，嘻嘻！ 今日下午我的幾個川西隊友，鬼榮、美兒、Jane、May佢地就要坐機返香港喇，見上午仲有半日時間咁佢地幾個就join埋一齊去「寬窄巷子」行吓 ~~
