今日終於來到今次嘅重要行程啦，一行四人去體驗嘉陽蒸氣小火車，滿足一下兩位鐵路迷嘅心願。　喺呢個行程出發前發現網上搵到嘅資訊比較混亂，連俾遊客去體驗嘅觀光列車始發站同開車時間都眾說紛紜，所以喺分享成個行程之前，等我先介紹下少少相關資料俾將來有興趣去當地打咭嘅朋友參考一下。嘉陽蒸氣小火車其實係指芭石鐵路（芭溝 至 石溪）上運行嘅以蒸氣小機車為動力嘅一款列車。
咁點解叫小火車呢？？，因為芭石鐵路路軌寬度只有749mm，差唔多係標準軌嘅一半，喺上面運行嘅列車自然要細啲，所以俗稱小火車喇 ~~

大家先睇一睇相關地理位置先，芭石鐵路係位於四川省樂山市犍為縣芭溝鎮同石溪鎮之間。遊客列車上車既始發站家陣係位於當地三井社區嘅躍進站，離開成都差唔多200公里。由成都出發，行成雅高速，成樂高速，樂宜高速，途經眉山市同樂山市，自駕車程大概要3個鐘。註：
1. 如果用Google地圖查，到今日為止，建議要輸入 四川嘉陽集團（一定要加埋四川呢兩個字啊）搜尋，唔好輸入 嘉陽小火車 搜尋啊！
2. 如果用百度地圖查，到今日為止，建議要輸入 嘉陽國家礦山公園搜尋，都係唔好輸入 嘉陽小火車 搜尋啊！
3. 暫時唔好信其他遊記話要去石溪鎮既石溪站上車啊。當然萬一有版友想體驗成條芭石鐵路，咁去到石溪站都有車上嘅，不過冇遊客專車，係當地居民坐嘅車，車次時間我就唔知啦。　
4. 如果大家係諗住坐長途車（大巴）到 三井，咁就要預更多時間先得，成都唔同車站都有車去當地。其中石羊客運站就有好多班車去犍為縣，到咗犍為可以搵犍為去三井嘅車。而茶店子車站早上9點有一班車到嘉陽，但我打過電話去茶店子車站問過，職員答唔到我喺嘉陽邊度落車，不過呢班車都會途經犍為。
5. 現時成綿樂客運專線已開通，大家可以係行程中計劃先坐動車去到樂山，睇完樂山大佛，再係當地搵車去嘉陽住宿一晚，瞓醒再體驗小火車。樂山有車去犍為或嘉陽。
6. 「犍」字 用普通話 讀「犍為」呢個地名時要用 qian2，等同「前」字嘅發音，而粵語就要讀  kin4，等同「虔」字既發音，唔好用咗「犍」字既其他讀音。

講咗啲背景資料，咁到開始分享行程啦！上面都提到成都去犍為三井車程要3個鐘，另外由於當時網上搵到嘅資料話第一班小火車係8:30開出，加埋出發當日係星期三，我地架戰車必須係早上7:30前出到去成都市二環之外，結果4隻熊貓4點幾就起身，5點幾天都未光，係披星帶月、飢腸轆轆之下就開車出發喇 ~~

喺車長 Roy 谷盡架慢車嘅性能之下，我地用咗2個鐘鬆啲就趕到犍為啦，見到呢兩個路牌，目標在望。　仲有3公里，嗰時已經係早上7:30啦，4個人好緊張呀，諗緊趕唔趕得切8:30嘅火車 ~~

途經三井社區嘅巴士站，犍為到三井嘅車就係呢度落啦 ~~

巴士站隔離就係嘉陽酒店，唔係自駕遊既朋友，可能要諗諗喺度住一晚 ~~

泊低咗架車之後只係7點9咁上下，就喺停車場隔離嘅街市搵嘢食先，由於實在肚餓，話晒民以食為天嘛 !! 等我出賣下緣人大哥嘅眼神先，我估佢當時喺度諗：「老婆，妳真係食呢啲，得唔得架」？？

緣人大哥決定都係買桔來食，相信生果都係穩陣啲嘅 ~~

食完早餐，緊係即刻去遊客中心買車票啦，不過打咭影相位都係唔可以錯過
嘉陽國家礦山公園，嘉陽觀迎您！！

點知遊客中心仲未開始賣票，當日最早個班遊客觀光專列係 10:30，仲有2個半鐘，4個人即時話早知係成都瞓多兩個鐘好過 ，唔知網上邊個放料係8:30 ~~

不過之後我哋發現，其實呢啲班次真係要睇旺季或淡季而有分別。大家可以留意張相入面嘅鋼牌好多都反轉咗，即係代表唔同日子列車班次會唔一樣，可能仲會視乎情況加開。事後總結，今次行程早到咗兩個幾鐘嘅收獲仲多，否則會錯過好多細節，所以話塞翁失馬，焉知非福 ~~

 呢個時候緣人大哥發現咗有淡季套票，80大元包車票同落井……參觀，落井唔一定係下石嘅，咁一場來到，緊係要落煤礦睇埋佢啦 ~~

小火車票，右邊印10:30係去程開車時間，左邊印16:30係回程開車時間，我地結果回程改坐另一班當地居民車加掛觀光車廂提早返來 ~~

黃村井參觀票，寫住入井要檢身在此特別提醍各位，落煤礦係危險活動黎㗎 ，如果有朋友睇咗呢個遊記，而又心思思去到嘉陽要落埋個黃村井煤礦，記得問清楚個旅遊保包唔包喎，唔好心口寫個勇字就落井呀，萬一有事，到時就唔係下石咁簡單喇 ~~

先來一張犍為旅遊導覽圖先，就咁睇如果深度遊嘅話，都要兩到三日，不過如果唔係鐵路迷的話，相信一日已經好夠喇 ~~

以上係嘉陽國家礦山公園導覽圖 ~~

中心外面都好多展板提供唔少資訊。8月到10月原來係睇萬壽菊，可惜天氣因素，我地今次睇唔到幾多 ~~

上圖右上角大大個字寫住「全球絕版蒸氣窄軌火車」 ~~

當地仲有攝影協會添 ~~

呢張相正啊

喺遊客中心附近睇得差唔多，跟住就走去躍進站（跃进）參觀下。小火車同芭石鐵路係省級文物。相中後面就係躍進站既站台（內地鐵路術語），藍色塗裝既車廂就係我地一陣會坐嘅 ~~

各位想去嘉陽坐小火車嘅朋友，睇清睇楚呀，呢個就係嘉陽小火車旅遊起點站喇 ~~

附近有裝煤落貨卡既相關建築 ~~

啲煤就係咁樣裝落車度 ~~

呢３位哥哥見我拎住部相機就要求我幫佢哋影相喎，真友善呀 ~~

車站附近就係發電廠，當地應該唔怕停電喇 ~~

呢個斷估係發電廠附近運煤入廠嘅設施，下面有條小溪同休憩公園可以坐下 ~~

參觀完發電廠出面，一行4人就行返躍進站附近，喱姐突然好開心，因為佢發現咗火車……模型

嘩！嘩！嘩！蒸氣小火車啊！拉緊貨喎 ~~

 同一時間我哋見到啲載煤既貨卡已經好長啦，於是我哋估一陣應該有機車會來拉貨。點知，居然捕到嘅係電力小機車 ~~

 我都係呢個時間先發現原來 躍進站到石溪站 區間係電氣化咗，因為個陣先真正留意到架空電纜 ~~

拉煤出站，人多好辦事，可以多一個位置影車，各位朋友自已留意啦，係躍進站有邊啲影車靚位 ~~

再來多一個位置影車，呢個位有凳坐㗎 ~~

當時離上車仲有成個幾鐘，一行四人即刻視察環境，分工合作，各自佔據有利位置準備捕捉蒸氣小火車。苦等咗大概20分鐘，突然見到另一架蒸氣小機車拉住三卡載人車廂朝住石溪站方向行駛 ~~

又來一張唔同位置捕捉到嘅蒸氣小火車 ~~

同時附上當時影既一段片仔 http://youtu.be/1-WU-WDfGyQ

總結來睇，嘉陽小火車最好真係四人行，咁可以係最短時間喺唔同嘅靚位影到小火車。同埋因為我哋今次早到咗兩個幾鐘，先可以有機會喺躍進站影到咁多相，真係瞓少兩個鐘已經賺返晒啦！！

擔當牽引任務嘅蒸氣小機車來啦，準備掛接車廂，以上呢張GIF相就同時捕捉到蒸氣小機車同電力小機車 ~~

車內座位（呢張相係蜜峰岩站換向作業時全車乘客落車後影嘅）

準備出發啦，心情好激動呀！！開車！！　

去片!!  http://youtu.be/ogc_0P4wgIQ  唔好問點解上面個條片咁短既，其實我想講，由於缺乏經驗，為咗拍呢條片，我吸咗好多煤塵，頂唔順，要閂窗
大家如果下次去到相影嘅話，唔該帶定眼罩同口罩

俾多一段片仔俾大家觀賞 http://youtu.be/njhK6674QgU    當然沿途風景相都唔少得都要俾兩張大家睇下，粗粗地交下功課啦！！

小火車一路鳴笛，好快來到行程中嘅全車乘客一定要落車嘅景點「蜜峰岩站」。因為地理原因採用咗詹天佑先生嘅人字形路軌，列車要喺呢度换向，機車改掛。而且呢度開發咗個科普體驗基地 ~~

塊牌後面寫住，呢個四川嘉陽小火車科普體驗基地就係俾大家感受人字形調頭，跟住簡單講下機車換掛過程俾大家知吖 ~~

首先牽引機車要脫掛再換軌，之後喺乘客車廂邊經過 ~~

機車去到另一方向嘅人字形路軌後再換軌 ~~

之後向著乘客車廂慢慢倒車 ~~

大家即刻行埋去駕駛室影下大特寫 ~~

喱姐好勁啊，咁熱既蒸氣都頂得順如果你地唔信啲蒸氣勁，來多張證實下先！！

講完機車換向之後，分享下呢個小火車科普基地有乜正野可以體驗 ~~

嘩！有「上游」大蒸氣機車啊！不過作為鐵路迷，我好奇個標準軌運行嘅大蒸汽機車係點樣運入來嘅 ~~　

老老實實，個人認為，如果大家想睇大嘅蒸氣機車，真係要去北京東郊鐵博，個嗰度有好多呀 ~~

牡丹江小機車，在下唔識，要請資深鐵路迷入來補充資料 ~~

當日好想睇下喱姐同緣人大哥坐上呢架車示範一下 ~~

嘩！咁大嘅鐵路吊車都有 ~~

呢段開始會多咗好多隧道，入面係伸手不見五指 ~~

出返隧道，又有光明啦 ~~

列車上開始售賣紀念品，本人係唯一嘅水魚
呢個紀念品好值得㗎，大家要細心留意上面嘅文字呀，對大家去體驗嘉陽小火車好有幫助㗎 ~~

列車來到亮水沱，居然要停車，趕晒全部乘客落車，點解呢??   原來呢個位係成個車程最精彩嘅部份，小火車喺度會示範放蒸氣　去相　！！

再去片!!!  http://youtu.be/v-ThdOPPHXg

黃村井站打咭相，留意喎，回程火車唔係呢度上㗎 ，要行去1.6km外嘅芭溝站 ~~

列車來到呢度，機車又要換掛喇， 終於俾我地捕捉到掛接列車個一刻~~　

車站放咗架煤礦工人落井坐嘅車，唔知我地一陣有冇機會試呢？

準備體驗黃村井煤礦 ~~

入井前四位團友緊要攞埋礦工帽合影一張啦，團團圓圓，大家懂的 ~~

排隊入井，有專人查票，計入井人數 ~~

入井前其實要先睇下呢張地圖先，睇清楚逃生路線好緊要嘅 ~~

有人定時檢查空氣指標，入煤礦一定要睇清楚呢啲資料，有乜唔妥，要即刻逃生啊，呢張係井入面影嘅，其實係入井前係出面都有，不過四個人掛住扮礦工冇留意啫 ~~

我地喺斜井入口進入嘅，睇落好深下哦，最慘係冇礦工車提供，自備11號巴士。各位注意地面好濕滑，唔好著錯鞋落井 ~~

見到呢個分岔位，就係差唔多到參觀區域啦，入到去唔好亂行啊，蕩失路就自求多福喇 ~~

呢度模擬咗以前煤礦工人嘅辛苦情景，睇到都心酸 ~~

有文字介紹慘況 ~~

入到參觀區，首先會俾大家體驗下猴兒車，各位睇清楚指引先上落車啊 ~~

緣人大哥坐得幾輕鬆自在，冇難度

落車之後就繼續參觀井内設施，喺度分享幾張重點，其他等大家自已去尋寶啦，有機會搵到娃娃魚㗎 ~~

想知呢度係產乜野煤? 大家睇呢張相好過我講 ~~

呢度幾時請咗個靚女礦工㗎 ？？　

出井係坐升降機既，唔洗行不過大家都唔記得影相 ~~

仲要係行返黃村井站呢個告示牌，先發現唔記得影個升降機出入口 ~~

唯有遠遠地影張交功課嘅打咭相，遠方有高台嘅地方就係井口啦，各位到時唔好學我地咁呀 ~~

但另一邊緣人大哥就急不及待出發去芭溝站方向喎，點解咁佢咁急呢？　

原來喺躍進站上車時，列車員兼導遊講，如果想早啲返躍進站可以改坐早一班嘅車，當然要有吉位先得，仲要同人鬥快，話晒要行不少於1.6KM，咁緊係要快啲啦！！

影下沿途景物先！！

小河堰

有間食堂，可惜吉既，不過門口坐住黑絲襪囡囡，唔敢開佢個樣，睇到包你地．．．．

突然見到個水牌，寫住下行200米有博物館 ~~

有冇人啊 ? 有冇人啊?  唉，原來冇開，唔知乜野時間可以參觀，如果有朋友下次到訪呢度，唔該幫手留意下 ~~

呢個就係芭溝站喇，回程嘅車要喺呢度上嘅，不過車站牆上就話係芭蕉溝火車站 。當日回程嘅車次，我地本來係16:30，結果可以改坐預計13:20開嘅車。　如果大家有留意之前嘅紀念品嗰張相上面嘅文字，就會明白點解我話係預計幾點開喇~~

芭溝站行前少少可以影火車出隧道 ~~

呢架機車就係拖住我地一陣要坐嘅車廂，成架綠皮車 呢班車會去黃村井站換向返轉頭俾乘客上車 ~~

今次坐嘅係加掛觀光車廂，呢個牌仔睇落都好似係加掛嘅 ~~　想坐好位一陣影好嘢，呢個時間一定要鬥快推開人搶住上車㗎 ，當時嘅情況要我排隊上車，咪玩啦 ~~

見到仙人腳站，坐喺行車方向右手邊嘅乘客要準備好攝影器材啦，抹乾淨鏡頭呀。因為你地一定要有準備，坐蒸汽小火車影相，鏡頭包會有好多煤粒 ~~

小小既梯田 ~~

菜子壩站到啦，車廂右邊嘅各位準備好長短火

去片！！　http://youtu.be/1H8K07J2xbE　睇咗就會明白點解萬壽菊點解會得返唔係好多。因為今次唔係辣手摧花，係熱蒸氣摧花，小火車會喺蜜峰岩站換掛轉向，過程唔再重覆交待喇，如果去程錯過咗影相嘅朋友，記得回程補返喇 ~~

終於差唔多3點左右返到躍進站，我地喺三井社區食咗個幾豐富嘅午餐。唔食得辣既朋友最啱食西紅柿(番茄)炒蛋 ~~

食完午餐之後，我地就上車揸返去成都喇 ~~

車長Roy出發之前喺地圖上見到有個渡口，我地就順路去八卦一下 ~~

不過睇到呢隻渡輪，我地架四個轆係上唔到嘅，咁唯有繼續行返公路。由於受車牌限號嘅影響，我地架車唔可以喺20:30之前進入成都二環內，所以我地決定先喺成都外圍搵地方按腳休息下。睇咗地圖，我認為回程路上喺成都外圍最有機會有按腳嘅地方可能係成都機場外嘅雙流縣，於是乎我地就向雙流出發啦 ~~
事與願違，喺雙流搵咗幾間都係桑拿。桑拿係乜地方，大家懂的，而且我地三男一女去桑拿真係唔多方便嘅 ~~

結果見呢間桑拿貌似正規，喺喱姐御準之下，我地就膽粗粗入咗去啦 !!

 輪到咖喱妹我描述一下當晚去按摩嘅少少亮點啦 !!

相信呢間係有牌，但就一定唔係「正」牌囉！點解咁講？ 因為佢地啲囡囡技師全部著黑絲，而且黑色制服連身裙只僅僅遮到個pat pat位，心口個大deep V又開到去個胃度，一上床烏低身幫我按摩嗰時就乜都任我睇呀，所以呢間到底係乜店？一眾男人你們懂的。

我90分鐘的按摩手勢差就唔洗講啦，因為我有理由相信佢地根本都唔識正宗按摩的手法嘅，反而另類服務會稱職一啲囉，哈哈！ 話說當晚我同蝦子餅2人被安排喺一間房度做按摩，而CV同Roy就被安排喺隔離嗰間房度做按摩。 我同蝦子餅按完之後嗰2位女技師就離開咗房間，我同蝦子餅換晒衫就行咗出大廳等CV同Roy。 不過等咗15分鐘都唔見人，大家都係做90分鐘的按摩，咁應該大家做完的時間都唔會相差太遠卦，冇理由咁耐架喎！ 所以我就叫蝦子餅去佢地間按摩房昅吓佢地搞緊乜嘢咁耐都唔出來啦！點知蝦子餅一昅完就話好奇怪叫我又去昅吓，見蝦子餅昅完之後咪咪嘴笑咁我就好奇一於去八吓囉！ 由個玻璃窗仔一望入去房內見到類似係2張床合併埋的1張大床。訓喺床上左邊的係Roy，佢仲做緊按摩，而訓喺右邊的係CV。 但最奇怪嘅係個女技師竟然係訓咗喺CV嘅旁邊喎！個女技師當時都望到我昅緊佢，所以我都唔好意思再昅喇，唯有等CV出來解畫啦，嘻嘻！ 後來CV解釋話係個女技師感冒喎，所以佢俾咗粒強力無睡意收鼻水感冒丸個女技師食，然後就俾佢訓低休息喎…..最最最搞笑嘅係個女技師非常欣賞CV啲腳毛，一路讚啲腳毛好性感就一路係咁不停掃佢腳毛囉！ 呢個版本有幾真實就要當時人先最清楚喇，不過CV用268人仔換來的掃腳毛同陪訓服務，非常超值啦，呵呵！

而且個女技師仲介紹咗我們去附近食個野菜豬蹄湯鍋，可惜我返來唔記得間餐廳叫乜名 ~~

食飽又夠鐘返成都青旅休息喇，早抖 !!

今早8點半出發去邛崍天台山。話是話，大家識唔識「邛」字既發音呢 ??  我都係查字典先識，讀「窮」，一齊讀就係「窮來」，補充一下，邛崍天台山係佛教聖地黎㗎 ! 呢個景點比較少見到有人係網上分享，所以都係俾大家睇地圖瞭解下方向位置先 。 通常成都出發就行成溫邛高速，不過 Google Map 就話行成雅高速路會遠少少但快啲…. 是日行程我地估計唔趕時間，又唔受限號限時出市區嘅影響，所以早上有時間喺青旅附近搵地方食個早餐先 ~~

今次揀中呢間 “汪四小包麵館”，呢碟包係四川省內旅行常見嘅標準早餐食物 ~~

仲有紅油抄手 & 排骨麵 ~~

話晒今次係自駕遊，都要分享張車內相證實一下 ~~

見到天台山腳嘅遊客中心內呢張地圖，呵呵，我地先發現原來天台山景區好好好大㗎 ~~

有張告示版，提供一日遊同二日遊嘅建議，但我地只係計劃咗半日遊咋，咁唯有隨心啦 !!

如果唔係自駕嘅朋友，景區係有公交車嘅，不過要儲夠人先開車，淡季散客人數真係好少㗎，如果想快嘅，可以包車遊 ~~呢條就係由山腳下遊客中心到山上嘅景區入口既山路喇……車長 Roy 見到呢條路即刻拓海 上身，用咗唔洗半個鐘就由山下揸到去山上嘅入口
好彩我係坐前座，後座嘅一對伉儷嘅刺激感就等喱姐親自形容啦 !!我嘅形容只係得3個字 + 3個字 「好恐怖、無下次 !! 」經過一啲渡假屋就到咗天台山喇…..

來到呢個正天台大門，就唔可以再揸車入去啦。如果可以再揸入啲就好啦，咁就唔洗步行多半粒鐘吖嘛 ~~

我地到個時已經中午時分，個停車場喺斜坡度，都係靠住棵大樹泊好佢，睇落好似穩陣啲 ~~

正天門附近有間雷音寺，前面呢塊係明代既照壁 ~~

睇咗介紹先知原來呢度係宋朝嗰時已經係佛教聖地了 ~~

趕時間，離遠影張大雄寶殿，打咭交功課 ~~

宋代嘅石獅 ~~

嘩!!  仲有一棵千年紅豆杉，據考證，樹齡最少 1500 年 ~~

樹王隔離就係呢條劏人一頸血食街，今次多咗四條水魚 ~~

行入去食街嘅沿途風景就幾好，有人喺度寫生添 ~~

食街有唔少小食檔 ~~

亦都有大排檔咁上下嘅餐廳 ~~

坐落睇周圍環境係唔錯㗎 ~~

望出去嘅風景都幾舒服 ~~

而我地嘅中伏午餐，價錢就唔好提喇….   味道呢??  唉….!!  切記唔好點右下角嘅鮮淮山雞湯呀!!

食完個貴夾唔抵食嘅午餐之後，一行四人就向天台山內嘅景點出發喇 !!

入山嘅道路兩邊有好多參天大樹 ~~

行咗差唔多15分鐘，終於到咗秀水三韵同十八里香草溝嘅入口，我地入到來到呢個位已經差唔多下午2點了 ~~

睇到呢個展板寫住川西玩水第一溝，於是我地就決定今次天台山之旅就入十八里香草溝遊山玩水啦 !!

不過入溝前又要交錢，每人15人仔，坐竹筏先可以入溝 ~~ 

大家係呢張相可以睇到對岸個碼頭只係大概30米之外，呢舖真係5毫子行1米喎 ~~

開船啦，應該係開筏，哈哈 ~~

十八里香草溝入口，初時我地仲以為隻竹筏會撐入去，點知係橋邊就上岸喇 ~~

一入十八里香草溝，緣人大哥就對獨木橋好有興趣咁喎 !! 大哥，你唔係真想試嘛 ?? ，萬一落水，喱姐點救你呀 ??

都係行呢啲穩陣啲 ~~

行咗冇幾耐見到呢個牌，” 滑溪 “， 笑咗 !!

原來係行上去滑返落來，秋天水凍唔好玩我地啦，不過唔玩都要向上行，呢條係唯一上山嘅路，地面幾濕滑吓 ~~

呢條繩就冇人敢玩啦，夏天著泳衣泳褲來玩就差唔多 ~~

之後又有呢啲考平衡力同協調力嘅設施，齊齊玩，好開心 !!

緣人大哥示範點樣安全落地唔濕腳 ~~

喱姐再次登場親自示範，後面兩位唔知討論緊乜呢??

玩咗一陣，又遇到另一段更長嘅上行路段，相當之濕滑 ~~

中途有架人力水車，緊係有人登場示範一下點樣踩水車啦 ~~

呢個係香草溝內最大嘅繩網陣，3位男士冇人願試 ~~

唯有請當日玩得最投入嘅喱姐再次登場示範，佢真係玩得好心喎 ~~

過咗最大嘅網陣，可以見到一間樹屋，可惜唔俾攀爬，否則我估喱姐一定爬上去下有冇泰山住喺上面 ~~

上到龍脊嶺，表示終於上到香草溝最高處同一半路程啦，大家都坐低休息吓。由山下行上來，到呢個位置，差唔多要40分鐘 ~~

喺龍脊庭稍休片刻，要落山回程喇……!!  要落山，首先要經過瘦身坊呢度，唔係個個過到㗎喎 實情係個個都過到，不過唔係行中間穿過啫，哈哈 !!

特別提醒各位，呢度好濕滑，今次有團友有幸示範落水，呵呵 !!

居然有個地方叫天門，我當時諗起李敏鎬同金喜善個套信義신의，唔知穿過呢個天門請唔請到神醫呢??

我地四個人一齊都拎唔起，真係好重 ~~

又來到呢個雙龍會嘅位置啦，我地上山時有經過，今次我地係揀左邊條路上山，右邊條路落返來。大家都可以試下右邊上左邊落㗎 ，不過好似左上右落好啲 ~~

落山快過上山，好快返到來渡口，不過冇竹筏 ~~

原來要大聲叫對面嘅船夫撐隻竹筏過來 ~~

過到對岸，我地先見到呢個水牌。如果早啲見到，今次就可能係去咗睇秀水三韵啦，不過來回又要 8公里。我地當日仲有另一個地方要去打咭，所以結果唯有放棄秀水三韵啦 !!

返回停車場嘅途中，我地見識到兩位行完十八里香草溝返出來嘅女同胞既高踭鞋，佩服佩服 !!

總結邛崍天台山之行嘅經驗，第一要自駕，第二最少要兩日先行得晒各景區，第三帶多啲錢。邛崍天台山景區都幾大，我地都係到此一遊留低腳毛就算 ，之後就驅車前往下一個打咭景點，都係屬於邛崍境內嘅「平樂古鎮 」~~

大家睇吓地圖可以見到兩個景點相距都算近。大概一個鐘咁上下車程我地就到咗平樂古鎮遊客嘅停車場，大字招牌，好醒目 ~~

不過個停車場嘅遊客中心人影都冇一個 ，搞邊科呀 ??

當我地猶疑緊有冇去錯景點個時，俾我地發現咗呢幫木制景區街道圖，個心都定返少少。

不過一路行，見到啲建築都好近代吓 ~~

直至見到呢個街口，先開始有少少舊建築嘅感覺 ~~

鎮內又有一個遊客接待中心，見到售票處幾個字，我地緊係唔行埋去啦，無謂自投羅網俾錢買門票。查實我地都唔知要唔要買門票 ~~

古鎮內都住宿提供嘅，不過呢啲樓我就冇興趣住喇 ~~

反而我比較有興趣係坐吓呢款三輪車，等我回味一下喺曼谷坐 Tuk Tuk 時嘅感覺 ~~

我地當日好似只係沿住閻巷街行到去興樂橋就折返喇，因為睇落鎮內各條街巷冒似大同小異， 而且我地趕時間返成都去食龍抄手， 不過喺興樂橋我地影相用咗好多時間 ~~

喺興樂橋上欣賞白沫江上既飛沙堰同安樂堰點樣將一江分為三水嘅有趣格局。呢度最大既特色就係可以行落江中嘅堰上面盡情影相，去相 !!

呢度嘅治水歷史原來可以追朔到大禹時期 ，真係很久很久以前喇 ~~

來兩張全景相俾大家感受下白沫江，呢條江原來係源自天台山嘅，在此感謝兩位型男模特兒入鏡幫手構圖 ~~

天色慢慢昏暗，喺厚厚的雲層間突然打開咗一個小小嘅窗口，俾我地捕捉到夕陽的餘暉 ~~

再見了，白沫江，再見了，平樂古鎮 !!

上返一張景區導覽圖俾大家參考下興樂橋嘅位置 ~~

美景當前，但民以食為天，我地要趕住去食龍抄手回程時，車長 Roy 繼嬻頭文字 D 模式揸車，所以我地好快就到咗成都春熙路了 ~~

龍抄手總店 ~~

四個人食，緊係點四人餐啦 !!

啲碟多到張檯都擺唔晒 ~~

原來我地當晚食咗咁多款 ~~

 

Day 13(2410/14) —

今日出發去嘅景點原定只有一個，就係去石象湖賞花。 呢個景點同之前一日去過嘅邛崍天台山嘅距離，以揸車來計都算好近㗎 ! 又俾張地圖大家參考吓，景點位置喺地圖左下方，揸車出成都市區，行成雅高速好快就到 ~~

由於諗住只係去一個景點，所以出發時間冇之前幾日咁早，我地出發後就揸住架車喺成都市區內搵早餐食 ~~

呢碗好似係清湯雜醬米線 ~~

清湯抄手，我鍾意食 ~~

醫咗肚，咁就出發去景區，路上一切順利，唯獨係成雅高速石象湖出口好隱蔽，好彩當時車長 Roy 眼明手快，急停，硬Cut慢線，又冇被抄牌之下我地就順利進入石象湖收費站喇 !!  

門票60人仔一位 ~~

入到景區見到下面呢張温馨提示 ~~

景區內有付費電動遊覽車，不過唔係呢兩架靚車，佢地係買樓 VIP 坐嘅車。我地去到先發現石象湖附近係地產項目 ~~

呢架先係我地坐嘅車，睇落差好遠 ~~

遊覽車由象山南站開出途經象山古鎮牌坊 ~~

經過象山花區，呢個位點解一朵花都見唔到呢 ，完全感受到愛到花兒也榭了 (註：前面個綠色植物區其實係太陽花，即係向日葵，可惜調榭晒)

原來只要5分鐘就到咗象山北站，1分鐘1蚊，中伏添 !!

影低路牌，避免行錯方向，我地決定先去七星台，石象寺個邊睇下 ~~

貌似劏客食肆一間，冇幫襯，未能證實 ~~

小小市集，但貨物唔多吸引 ~~

 

吸引到我地居然係放係市集側邊既皮劃艇，唔通石象湖可以玩??

原來係七星台碼頭真係有得玩 ~~

隔離有觀光烏蓬船，咁嘅座位，冇興趣坐囉 ~~

行咗一陣，我地發現原來個景區開放咗既區域好細，非花區既景色真係冇乜特色。而第二期仲開發緊 ~~

 

呢條橋就點都要行一行既，點解呢 ??

因為喺橋上先可以欣賞多少少湖景嘛 ~~

眾人頗為失望之下，好快行返象山花區。雖然上面提到象山花區有愛到太陽花都榭了的意境區，其實個象山花區都仲有啲花俾遊客觀賞嘅 ~~

先獻上僅有未調榭嘅太陽花，睇來俾佢嘅愛未夠深喎，去相 !!

景區內僅有嘅一片花海啊 !!

再來張全景相感受下花海嘅\嗰啲啲氣勢啦 !!

之後我地行返去主花區，見到仲有少去百合睇下 ~~

數碼快照 ，我地自已影好過啦 ~~

最後整合當日睇到既各類花卉近景特寫俾各位觀賞下 ~~

離開石象湖行返去停車場時經過的一個小公園區，見到個倒影唔錯所以就影低咗 ~~

由於石象湖賞花行程比預期早咗好多結束，當地又冇乜嘢啱食，而我地又唔想咁早返成都，加上前一日嘅平樂古鎮睇落麻麻地，於是我就膽粗粗建議不如喺回程既路上順路去下「黃龍溪古鎮」醫肚同打咭啦，喺冇反對聲音之下咁要出發喇…..go go go !!!

喺黃龍溪停車場泊低架車，我地就見到呢排單車，好想租來踩吓，可惜唔知點租 ~~

我地冇行捷徑入古鎮，而係跟咗箭嘴指示行咗5到10分鐘去景區入口

呢個就係黃龍溪古鎮入口啦，好似叫做老龍門 。我算係故地重遊，某年某月跟團來過，留下了永久既傷痛 ~~

先行川西民居文化街，隨意影咗幾張相，睇落都係復古野咁噃 ~~

行到街尾就來到呢個叫龍潭廣場既地方，相中高少少既城樓好似係西寨門，過咗西寨門就係鎮龍街 ~~

鎮龍街上有唔少同日常生活相關既工具，以下圖中係水碾 ~~

水磨 ~~

水井 ~~

小鎮流水，樹蔭遮陽，遊人不多，感覺好舒適 ~~

行咗一陣，已經好肚餓，緊係搵食為先啦 !!

今次幫襯呢間「一根面」。門口有師傅示範點樣抛一根面落鑊煮熟佢 ~~

呢度每一碗真係得一根面呀，由於當時好肚餓，味道緊係好啦 !!

前面提到沿鎮龍街行入古鎮，轉眼就來到下面呢個地方 ~~

地圖話呢度叫黃龍擺尾，相中離遠就係個條龍尾啦 ~~

見到唔少人行石礅影相，喱姐當然都要落場影返張靚相 ~~

石礅有好多唔同形，例如相中既石龜同石青蛙 ~~

條龍尾係錦江邊，係江邊可以遠眺錦江廊橋 ~~

有時間既可以行埋過去啊，不過我地當日要趕住5點前返到成都市中心，所以冇行過去 。 跟住我地沿住錦江附近既正街步行去東寨門，呢度就真係有古鎮古街嘅感覺 ~~

正街上有幾間寺廟，例如鎮江寺、潮音寺，信佛嘅人士如果有興趣就要預多少少時間參觀喇 ~~

有當舖，不過當時冇野要當 ~~

好快行到來錦江邊 ~~

東寨門對出嘅古碼頭，有快艇，有觀光船，不過吸引唔到我地去坐 ~~ 

再沿正街行，街尾係古龍寺，好似係鎮內最大既寺 ~~

我地冇入寺參觀，而係轉咗入旁邊個嗰條魚鰍巷 ~~

呢條巷睇落好窄哦，有啲懷疑古時呢度真係魚市場 ??

地下嘅排水口成個銅錢樣，唔知以前有幾多銅錢跌咗落去呢 ??

魚鰍巷入面有間大茅屋，好似叫唐家大院 ~~

呢種花外型好似燈籠，顏色又鮮艷，好靚呀 !!

行出魚鰍巷來到仿清街，見到一間重門深鎖既舖頭。請留意入面牆上寫的字句 ~~

呢啲當地花椒麻辣味嘅臘肉臘腸 ~~

鎮內最大客棧 ~~

可以登高臨溪休閒地坐吓 ~~

呢兩架水車係電動既

其實客棧就係黃龍攞尾條橋既另一邊 ~~

跟住行返鎮龍街出古鎮 ~~

沿途都有唔少特色小食 。青稞粟米餅，老細拎住個帶餅，我好奇買咗來食，味道就一個字，淡 !!

又見到鍋魁，不過啱啱食咗野，唔買啦 !!

就此告別黃龍溪喇，由於需要係5點前返到成都市中心還車，所以喺黃龍溪到此一遊，我地未夠下午三點就驅車返成都了。一路順利，未夠4點半就到咗租車公司還咗車。 因為時間尚早而大家又未想食晚餐住，喱姐於是提議不如去人民公園參觀吓喇 ~~

喺人民公園地鐵站出來，首先見到嘅係呢個好有歷史嘅紀念碑。辛亥保路運動，近代史上重要一頁 ~~

好快行到去人民公園，嘩……原來係近代中國嘅第一個公園黎㗎 !! 公園內有個大茶壺，凸顯當地嘅飲茶文化，不過粉紅色呢枝唔知係乜東東來㗎呢 ??  我估應該係遊客留低嘅…..

講明係公園，自然有園藝嘢可以觀賞下，斷估呢隻似孔雀啩，嘻嘻…..!!

原來人民公園係成都嘅大型避難場地 ~~

行咗一陣人民公園，體驗一下當地市民嘅生活之後，我地決定慢慢步行返青旅食晚餐。 由人民公園行返春熙路，自然要經過市中心既天府廣場 ~~

成都天府廣場面積唔細哦，以前係皇城所在地 ~~

除左地面嘅廣場，仲有地下既叫下沉廣場 ~~

呢個下沉廣場嘅地標建築，夜晚喺燈光效果之下仲好睇，不過我地冇影到，因為未天黑我地已經走咗喇…….!!

喺天府廣場打完咭，我地就返青旅喇。 呢一餐係今次行程中我同其他三位團友係喺成都嘅最後晚餐，好豐富但又好傷感啊，因為喱姐佢地明天一早就要坐早機返香港喇，而我就一個人留喺成都玩多一日 ~~

以下就係我們今次住咗5晚的「成都拖板鞋青旅」，係咖喱妹第一次喺中國大陸住青旅喎，感覺有啲新奇又有新鮮感，嘻嘻 ~~

無編排到行程嘅朋友去到成都可以參加青旅搞的團，又容易搵到旅伴兼識到新朋友，住青旅都唔錯㗎 ~~

以下就是我同蝦子餅住咗5晚的雙人房喇 ，好簡單的設備，港幣216一晚，勝在乾淨同抵住 ~~

廁所就差啲，但一同川西啲廁所比較的話就覺得呢個好好㗎喇……

青旅樓下大門口旁邊就有一個小街市，非常方便鍾意食水果嘅我呢5日隨時落去補貨 ~~

如有閒情的話，夜晚無聊可以上青旅頂樓天台坐吓嘆吓茶食吓水果㗎 !!

再次多謝CV幫我手寫咗呢隻咁精彩嘅油雞「成都、嘉陽小火車篇」，Thank you !!

【川滇。紅葉錯落雪山時】Part 1 至 Part 4 全篇完畢，多謝收看 !!