Day 5 (16/10/2014) —
今天早上9點半我們就退咗房 ，然後將行李放晒上車之後我們就步行去達瓦驛站賓館附近的一間餐廳仔食早餐 ~~
今早的簡單早餐有紹子麵 、 炒青菜和苦瓜炒蛋 ~~
食飽之後10點45分車隊就起程出發去今日的景點了 。完成咗早2日最主要的川西行程 “稻城亞丁”之後 ， 接著這幾天的行程應該都會比較輕鬆同無咁辛苦喇 ！！
今日主要嘅行程同目的地係「理塘」， 從以下的圖見到由稻城縣出發去理塘途中會先經過海子山，路程大約係225公里~~
自駕遊或包車遊都可以享受到嘅樂趣莫過於可以見到靚景時就隨意停低架車喺路邊 ， 然後落車吸下新鮮空氣同影下相 ~~
感覺高原的白雲好似特別低同特別靚咁嘅 ~~
車竟然少到可以俾我地坐喺馬路中間影相 ~~
咦．．．．．仲係無車嘅？？ 咁Leng再表演跳多兩下先！！
來到part 3輪到我要介紹汪堆車隊另外嘅幾位師傅喇 …….左邊係汪堆的叔叔 “七林師傅”, 右邊就係上回已經介紹過嘅汪堆三弟“康巴” ~~
汪堆後面嘅係佢二弟“龍批” ~~
然後我們經過仲堆新村，聽起來就似一個陌生的地方，她離香格裡拉鄉（日瓦）不到30公里，從香格里拉鄉去稻城的方向一路上都是這種石頭堆砌而成的藏式建築 ~~
中午12時15分我們就到了波瓦山腳 (海拔4513m) ，波瓦山藏語意為“英雄、勇敢的山 ” ~~
見到啲白雲咁靚好似一團團棉花咁，所以我們又停低車玩咗一陣，不過唔係打算玩白雲咁高難度呀，而係玩擺甫士影團體相咋，哈哈 !!
翻越了波瓦山之後 ，站在波瓦山的垭口，遠眺南方，群山環抱的一處有白塔與寺廟，那就是始建於南宋末期的熱烏寺，已有600多年的歷史了 ~~
在藏區經幡處處可見，這些色彩繽紛、隨風飄揚的布幡，在任何藏區的民宅樓頂、寺院附近、山頂、聖地、險處、河川等地方都會見到 ~~
到咗稻城縣之後又再見到青楊林喇 !! 
金秋十月，又係夢幻秋色的偉大調色師「青楊」發功的時候喇 ………..萬畝青楊林由綠轉黃，在part 1稻城篇裡面我都已經分享過一片片金黃色美得令人陶醉的青楊林了，今日又有機會再欣賞多一次，真開心呀 !!
我又俾這遍金黃色的青楊樹迷住了 !! 不過今日密雲所以個天無咁藍，如果金黃色的青楊樹配上藍天白雲簡直係一絕呀 !!
咁正嘅環境之下同美少女Leng影返張合照先 ~~
白塔係藏族心中係至高無上的，所以汪堆每次路過白塔必定停車，所以我們都順便影低當係做個紀錄，不過今個旅程我都見過唔少個白塔，恕我唔記得呢個白塔叫乜名喇 ~~
之後再往理塘嘅方向駛去 ，下午2點20分我們去到海子山的 一間餐廳用餐 ~~
呢間藏式賓館兼餐廳叫做「海子山第一莊」 ~~
藏式午飯餐當然唔少得呢壺藏民至愛嘅酥油茶啦~~
May & Leng開心地在等開餐中 ~~
今餐都點咗9樣啱大多數隊友口味嘅唔辣菜式 ~~
午飯後繼續今日嘅行程 ， 下午3點40分我們來到了稻城的邦普寺 ~~
邦普寺是稻城最古老的寺廟，海拔3940米，是藏傳佛教、白教的寺廟。邦普寺始建於公元1178年，距今已有900多年的歷史 ~~
在藏區最常見的石刻藝術就是瑪尼堆 ，它們按不同的形狀疊成尖錐形堆放在路邊 、 橋樑、山上、 河邊、 墓地等．．．．
過了邦普寺之後就來到海子山自然保護區了，它位於理塘與稻城之間，平均海拔4500米，總面積3287平方公里 ~~
海子山是青藏高原最大的古冰體遺跡，即“稻城古冰帽”。其實這裡是一片神奇的石頭山，它是喜馬拉雅山造山運動中的古冰川遺跡，當地人則稱之為海子山是因為它疊疊層層的山體中鑲嵌了1145個高山湖泊(海子) ~~
海子山最獨特的景觀即是大大小小的礫石構成的石河、石海以及形態各異的冰蝕湖（海子），1145個大小不等的海子遍布山間，如千百顆鑽石熠熠閃光，其密度之大為世間罕見 ~~
這裡一整片都沒有樹木、就連野草也只是零星叢生，荒涼奇特的自然景觀，不過我們都只是路過見識一下吧了 !!
沿著公路再走了沒多遠經過位於海子山自然保護區北部的兔兒山 ，海拔4696米 ~~
兔兒山上的兩隻兔耳果然名不虛傳，遠觀兔兒山就好似見到兔子的耳朵屹立在風中 ，山勢十分奇特，長在寸草不生的山峰之上，頗為壯觀 ~~
石河公園 ~~
藏族地區把經文ཨོཾ་མ་ཎི་པ་དྨེ་ཧཱུྃ (嗡嘛呢唄咪吽) 六字真言刻在石頭上是一種獨特的宗教文化藝術表現形式。 藏族人認為山是神的化身，有超人的威力，構成山的石頭是神靈的一部分。在有神靈特性的石頭上刻上經文或“六字真言”，是一種很神聖的事情，而六字真言除了刻在石上，亦多刻在轉經筒上~~
翻過了卡子拉山，就是被譽為“世界高城”的理塘縣了，海拔4014米，是世界上海拔最高的縣城之一。 其實理塘只係我們由亞丁去新都橋的必經之地，
所以我們選擇咗喺理塘住一晚 ，順便去參觀理塘著名的寺廟「長青春科爾寺」。 傍晚6點15分我們終於到達今晚入住的高城賓館了 ~~
180元一間標雙房 ，房間設施係點就大家一睇圖片就一清二楚啦 ~~
啲隊友話重點係無文明廁所 (坐廁) 喎， 隊友們一入到房見到個廁所就呱呱叫 ~~
用完個踎廁鬼榮同Leng就喺我們川西之行的WeChat微訊群組度寫咗段好搞笑的對話 (有圖有真相 ， 嘩哈哈 !! ) ~~
返上房安頓好啲行李之後我地就行路去位於理塘幸福東路108號的「鄭師傅川菜飯店」食晚餐 ~~
呢煲有雞有雜菌有麵條的唔記得係乜嘢名堂嘅鍋，不過確實好好味！！
Day 6 (17/10/2014) —
雖然話理塘係全世界海拔最高的縣城之一，堪稱“世界高城”，縣城海拔4200米，比西藏拉薩還要高300多米，這高度讓很多遊客都不敢在這裡駐留，不過可能行程來到第五天我們已經慢慢適應了 ， 所以好慶幸各隊友都無乜太大的高原反應出現 。雖然話昨晚住宿的縣城算係全程最高㗎喇 ， 不過出奇地係我呢5晚之中最好瞓的一晚，一覺瞓到鬧鐘嚮，感恩呀 !!
今早的早餐集合時間係8點30分， 但我8點之前已經執好行李梳洗完畢了 ，因為我一般都比其它隊友早醒 ， 一來我唔想太趕咁執行李退房 ， 二來又要執返啲眼耳口鼻， 費時嚇親人啦 ， 哈哈 !!
而且我去旅行住酒店時有一個小小的習慣， 就係離開之前都盡量會喺酒店附近行一陣 ，睇吓周圍嘅環境 ， 因為好多時候晚上到達酒店時已經天黑，周圍環境睇得唔清楚，咁早上可以補影返一兩張相放喺遊記又當記錄一下嘛 ~~
從酒店後門行出去過咗馬路有個小廣場 ， 唔知係唔係叫做 “格薩爾王廣場” 呢 ??
影完相之後同隊友們集合出發去賓館附近食早餐 ~~
今早簡單的早點有灌湯包和粥 ~~
9點鐘出發 !! 今日的重點行程係長青春科爾寺， 又名理塘寺，係一個約5OO年的建築 。 “長青春科爾寺” 為藏語譯音，“長青”意為彌勒佛（即未來佛）“春科爾”意為法，“長青春科爾”意為彌勒佛法（標誌著法常轉、妙諦永存）。 理塘寺位於理塘縣城城北山坡上，原為黑教寺廟 ，明朝萬曆年間三世達賴途經該地時改為黃教並為其開光 ，經逐漸擴建之後已成為規模最大的藏傳佛教黃教寺廟 ， 素有“康南佛教聖地”之稱。 此寺在文革期受破壞，近年才復修 ~~
因為今日我們嘅目的地係下一個景區新都橋，時間都比較趕一啲，所以汪堆只安排了45分鐘嘅時間俾我們沿住理塘寺的外圍行一圈轉個大運 ~~
我們落車之後就沿住理塘寺圍牆旁邊的小路慢慢的往上行 ，沿住外牆繞道一圈 ~~
長青春科爾寺佔地500餘畝，坐北朝南，背靠崩熱神山和多聞正神山 ~~
在藏區經幡處處可見，這些色彩繽紛、隨風飄揚的布幡，在任何藏區的民宅樓頂、寺院附近、山頂、聖地、險處、河川等地方都會見到 ~~
整個理塘寺依山而建 ，而寺内珍藏有各種類型的釋迦牟尼鍍金銅像、佛教經典、三世達賴用過的馬鞍、明清時代的畫等珍貴文物，可惜今次無緣得見 ， 只見到一羣的喇嘛正在返回寺廟中 ~~
雄偉壯觀的理塘寺與 “替然尼巴新村” 的民居房屋相接 ~~
穿行在這些寺廟旁的山路上偶爾有零散的喇嘛或善信從我們身邊走過，與我們善意的打着招呼 ~~
這裡是理塘寺的大門，見到寺院好像仍然在復修擴建之中 ~~
可惜我們行得慢，行到返去理塘寺的正門口已經係早上10點了，亦都已經過咗汪堆師傅預定的時間，所以為免誤了今日的行程安排 ，我們就無緣入去理塘寺裡面參觀 ， 直接上車離開了。
10點40分離開了理塘寺，準備前往去新都橋 ，原本打算途經雅江縣時順便食午飯嘅，點知汪堆二弟架車 (下圖) 喺呢個時候突然間出現咗故障，離合器 (極力子)連接波箱的密封墊子漏油 ~~
所以為免阻礙行程 ，汪堆同佢二弟在理塘縣四出搜尋汽車零件，而我們就去咗飯店度等佢地，慢慢食個提前的午飯等二弟架車修理好之後先再出發去新都橋 ~~
終於下午1點40分二弟架車修理好了，咁就快啲起程啦 ， go go go…!!!
中途去到剪子灣山的埡口，集體唱歌嘅好機會又到咗喇 ，哈哈 !! 不過我一時唔為意竟然……竟然踩到糞便 (今次認真係踩屎喇!!! ) ，仲要唔係動物的糞便，而係人類嘅糞便，真係臭到阿媽都唔認得呀 ， “踩屎喱”今次大鑊了 ，救命呀 !!!
好努力咁將個鞋底喺沙石地同埋草地面上不停咁擦 ，希望可以擦得乾淨同擦走陣臭味，不過上車之後啲同車啲隊友都依然可以聞到陣陣嘅屎臭味 ， oh my god !! 
唯有叫汪堆搵個地方停車俾我洗一洗隻鞋啦 !!
洗乾淨隻鞋之後 ，應該有運行喇．．．．．
碰上今天都一樣係晴朗的天氣，所以喺觀景台可以遠眺 “貢嘎山”~~
貢嘎山藏語意為“最高的雪山”，所以被喻為「蜀山之王」，7556米的高度，登山難度甚至超過珠峰，迄今為止，登頂的人只有8位，而死在貢嘎山的登山者卻是遠遠超過這個人數 ~~
繼續往雅江同新都橋嘅方向趕路 ，因為今早壞車所以預計要晚上才能夠到達新都橋了 ~~
我們走的就是可通往西藏的318國道，沿路上迎面見到多達幾百部的解放軍車隊正向西藏方向移動 ~~
下午5點40分去到雅江就遇著有一段路還有塌方，所以啲車全部停晒塞晒喺馬路上，心諗都應該要塞好耐要等好耐吧 ~~ 
連啲師傅都落晒車食煙兼等運到 ~~
點知只係等咗20分鐘左右就見到好多解放軍車隊的兵哥哥落車幫手指揮交通 ， 竟然先開路俾前往新都橋的車先過，我們好幸運呀 !!
而前往反方向的車就依然未放行 ， 條車龍仲長到好誇張添呀 ， 唔知要塞到幾時呢 ?? 汪堆就話藏族的習俗相信踩到糞便會帶來好運的 ，唔係吖嘛 !!! 
終於在晚上8點20分到達了康定縣新都橋鎮瓦澤鄉的318連鎖汽車酒店喇．．．．．．師傅話打電話訂咗呢間酒店 ， 但去到318連鎖汽車酒店個職員話師傅訂的係稻城亞丁桃源山莊的318連鎖汽車酒店，並不是訂了新都橋呢間 ， 所以無11間房俾我們喎，唔係啩 !!!
秋天係新都橋的旅遊旺季，臨時臨急仲要咁夜叫我們去邊道搵11間房呀 ?? 以為今晚終於有間似樣嘅酒店住返晚啦，點知又出事添 !! 既然已經咁夜了 ，而大家又肚餓 ，所以就先喺318連鎖汽車酒店的餐廳食咗晚飯之後再想辦法啦 ~~
晚飯後都接近10點了， 汪堆就喺附近啲客棧逐間逐間去問有無房，不過我們咁大班人要11間房就比較有難度囉，主要因為10月金秋呢段時間係超級旺季 ， 大部份酒店同客棧都已經一早被遊客訂滿晒了 ，所以在無辦法之下， 汪堆去咗一間藏民家敲門 ， 個屋主話可以安排我們十多人一齊瞓大廳，咁就唯有接受啦 ， 難道要我們今晚瞓車咩 ??
富有藏族色彩的一個大廳 ， 40元一個床位 ~~
唔係每個隊友都有床瞓㗎，有啲一對對嘅隊友如果要一齊瞓就要打地舖㗎喇 ~~
以下就係我今晚瞓嘅床位喇，其實瞓硬板床一晚半晚都無乜所謂 ， 反正我有帶備睡袋 ，不過最唔方便係呢間藏式民居只有一間踎廁，成20人共用一間廁所， 唔好話沖涼啦， 就連擦牙洗臉的洗手盆都無㗎， 所以住呢啲藏式民居對於都市女士黎講確實係好唔方便 ，而且高原地區空氣稀薄 ， 十幾人齊齊瞓喺一間密封式嘅大廳 ， 暖就夠暖喇 ， 不過我成晚都覺得好侷促 ， 又係無覺好瞓 ，唉 !!!
另外樓下有幾間簡陋的房仔都可以再瞓多6個人 ~~
Day 7 (18/10/2014) —
今早8點半要出發去食早餐 ，我因為怕早上廁所排長龍 ，所以更加要比其他隊友早2小時起床 …….. 擦牙洗臉就要用佢提供嘅盆裝啲水然後自己想辦法搞掂啦 ，好彩去呢啲落後地區我一定會帶備濕紙巾同埋飲用樽裝水 ，今次真係全靠嗰支水用黎擦牙洗臉咋 !!
我們出發之前 ， 屋主準備咗一啲藏式早點俾大家一試 (左二身穿黑色外套的就是屋主了) ~~
有藏民的主要食糧干粑 、 饅頭和酥油茶 ~~
這裡是廚房 ~~
這裡是大廳的另一邊 ， 昨晚師傅們就是瞓喺呢邊嘅大客廳喇 ~~
藏式建築極有特色，房屋大都採用石料建造，朝陽而居，採光極好，每座樓房的每層牆上都開著四扇窗戶，窗檐上用紅、黑、白等色彩描繪著，象徵人丁興旺、五穀豐收之意的日月或者三角形圖案 ~~
我們將啲行李放晒上車之後就出發喇 !!
今早就喺昨晚無緣入住嘅 “自駕遊營地318連鎖汽車酒店” 的對面餐廳仔食肉絲麵~~
大家認住呢間黑店 “自駕遊營地318連鎖汽車酒店” 呀 !! 點解我叫佢做黑店 ??
話說昨晚酒店職員話我們的師傅經電話訂所以訂錯咗分店，咁因為我們明天去完九龍伍須海景區之後都要行回頭路，再俾多一次個地圖大家望一望就會比較容易明白一啲……由九龍伍須海景區去成都一樣要行回頭路，所以打算明晚喺新都橋住多一晚先出發去成都 ~~
所以我就一於上網經Agoda.com再訂多一次318連鎖汽車酒店的房間，上網清楚列明酒店地址同圖片，唔會再訂錯喇啩 !! 咦…! Agoda.com竟然顯示仲有10間房喎 ， 師傅話佢地自己返去住藏民家 ， 叫我們訂10間房就夠了，咁我就用信用咭付款， 然後收到Agoda的email確認信，不過昨晚話全滿但明晚又仲有10間房咁奇怪嘅，既然我已經喺呢道，當然問一問嗰職員安心啲啦，但個職員竟然話無收到我張訂單，而且佢地後日啲房一早已爆了 !! 吓 !!! 我俾晒錢你竟然話無房俾我 ?? 有無搞錯呀 ??
問佢要咗經理的電話打去理論，傾完一大輪都係話無房 ， 咁既然無房點解仲可以喺Agoda.com成功訂到房㗎 ?? 可否想像一下如果換了其他遊客的話 ， 俾晒錢收到Agoda的email確認信，之後以為好安心咁去到先知原來係無房嘅 ， 咁你叫人地臨時臨急去邊道搵地方住呀 ?? 
後來我叫佢通知Agoda.com話佢因為無房提供所以要佢全數退款俾我 ~~
好喇….講完黑店係時候講返今日新都橋嘅行程先 !! 新都橋原來係沒有固定的景點嘅，我們經過新都橋鎮後，便已踏入攝影天堂範圍，到處都是金黃色的柏楊樹，攝影天堂之名，果然名不虛傳，黃樹越來越多，景色便越漂亮 ~~
經過新都橋鎮後，色彩更加燦爛，馬路兩邊全是金黃色的柏楊樹。 原本聽嗰名以為新都橋係一道橋，後來來到之後才發現， 新都橋原來是一個地區，而並不是一條橋的名字 ，難怪上網搵資料時都未曾見到有橋的照片出現過啦 ~~
聽說新都橋的秋天是最美的，的確秋天的金黃柏楊在陽光下很是燦爛，給人無比的陶醉 ~~
傳說中攝影者的天堂，其實係個很小的小鎮 ，新都橋是個適合慢慢走慢慢遊的地方，正好由呢一對才子 + 美少女示範一下先 ~~
新都橋又叫東俄羅，是一個鎮名，而不是一個景區。新都橋海拔約3300米，並沒有突出的標誌性景觀，但沿線卻有10多公裡被稱為“攝影家走廊” ，所以一見到靚景我們就隨時停車影相 ~~
美景當前，全程最搞笑兼合拍嘅鬼榮同康巴又係時候表現俾啲隊友們睇喇 ~~ 
跟住啲師傅話啲車開始肚餓所以要去油站入油先，放低咗大家喺附近隨意行吓影吓相 ~~
喺呢區同樣地見到四處係一座又一座極有特色的藏式民居 ~~
呢間藏屋竟然種咗一棵蘋果樹，樹上仲生咗好多好多個蘋果呀 !! 
啲車入完油之後我們又開始繼續行程喇．．．．
沿途上見到路邊的山坡上夾雜著紅、黃、綠三色，散落在各處，構成絕美的一幅幅圖畫 ~~
神奇的光線，大片的草原，彎彎的小溪，金黃的柏楊，山巒連綿起伏，藏寨散落其間，牛羊安詳地吃草，新都橋每處就像是一片如詩如畫的世外桃源 ~~
好靚呀！！
途中喺一間餐廳 “沙德飯店”食午飯 ~~
農家小菜味道不錯 ~~
最特別嘅係呢個砵仔白飯 ~~
食飽之後我們順便去咗沙德飯店對面的蔬果店買了些水果 ，天氣乾燥要補充返啲水份和維生素嘛 ~~
啲店舖都係一啲特色嘅藏式建築 ~~
終於見到有條橋喇 ， 不過呢條橋肯定唔係叫做新都橋 ， 哈哈 !!
繼續前往下一個目的地“九龍”，不過又唔係香港嘅九龍半島喎 ， 嘩哈哈 ~~
又係呢啲九曲十三灣嘅公路 ~~
沿途上的風光 ， 隨時都是一幅幅的高原風景畫，正所謂風景在路上吖嘛 ~~
下午5點20分終於到達了今晚我們喺九龍縣城入住的鹽業賓館喇 ，標雙房200元一晚 ~~
話說鬼榮今晚住的酒店房個踎廁唔多掂 ， 塞咗兼且去唔到水 ， 所以佢又喺個微信群組度post咗以下呢段屙K詩 ~~
屎榮經典屙孖beat
難為嬌妻把水喞
急call老板火鉗夾
怒碎巨K水裡洩
又一証明我啲隊友們唔單止係超搞笑 ， 而且仲好鬼有文采添 ， 真係笑死我喇 !! 
今晚的晚飯我們就喺九龍縣城求其搵間餐廳醫肚 ， 然後又要早啲返賓館休息喇，因為明早又要一早出發去伍須海景區 ~~
Day 8(19/10/2014) —
到九龍來的唯一目的就是欣賞『伍須海』的美景。『伍須海』藏語為「光輝燦爛的湖泊」。距縣城25公里，是個冰磯湖，海拔高度3750米 ~~
今日早上7點半集合出發去食早餐 ~~
今朝早餐有抄手同排骨湯麵 ~~
然後8點鐘出發去離九龍縣城24公里的『伍須海自然保護區』，45分鐘的車程我們到達咗景區入口售票處， 我們除咗幾位藏族師傅係免門票之外就每位都要買60元一張的景區門票 ， 21人總共係1260元 ， 但係個售票職員竟然問我可唔可以唔俾門票我，但就只收我齊頭1000元喎，嘩……!! 無本生利，個售票職員咁好收入，佢唔發到豬頭咁都幾難喇 !!
最後我都有答應咗個雙贏方案 ， 我們平咗２６０元喎，不過都有問佢拎返一張門票要黎影相做紀錄 ， 嘻嘻… !!
之後泊低啲車，跟住我們就走過小橋，再穿越一片林子 ~~
今次見到嘅唯一一張伍須海景區地圖 ~~
『伍須海』藏語為「光輝燦爛的湖泊，像一塊翡翠置放在九龍縣北部莽莽的林海中。景區內山巒重疊。群峰、雪山、峽谷、湖泊、森林、草原…大自然的各種奇異景觀應有盡有。這一切使他獲得「貢噶南坡第一海」的美譽。早在1985年，伍須海便與九寨溝，海螺溝等景區同時被列為第一批國家自然保護區 ~~
沒想到穿過樹林來到盡頭是一個藍得發亮、平靜如鏡、倒影清晰的湖面，湖上沒有小船、不見動物，可以說是沒有一點動靜，水中的枯木、岸邊的鮮花樹叢林木、還有雪山倒映在湖面上，這畫面真的美到找不到形容詞了 ~~
伍須海被當地人喻為“仙女梳妝的明鏡”，原始森林和寬闊的草甸環繞湖泊，湖水碧綠透明，環境幽靜 ~~
隊友們個個見到個靚景都輪流影返一張到此一遊相片 ~~
今日去到伍須海呢個川西之行最後一個重要嘅行程， 所以一於喺度影返張全體大合照啦 ~~
然後我拜托汪堆搵馬幫找來了22匹馬 ， 議價之後係60元一匹馬 ， 由馬夫帶住我們騎馬入去景區的另一邊遊覽 ~~
坐穩未呀 ?? 起程喇噃 !! Let’s go…!! 
CatCat 早幾日因為有高反不適所以佢無跟到大隊上去珍珠海、牛奶海以及五色海，今日終於可以喺伍須海景區幫佢影返張相喇 ~~
我一路坐住隻馬，佢一路帶住我行，而我就一路舉機影下沿路的風景 ~~
個湖中倒影真係好靚呀！！
大約20分鐘就騎到過去對岸的草原，又再出現另一幅美麗的畫面。 呈現眼前的是一片廣大的草原，草原的盡頭又是一片林木，右手邊有幾處簡陋的藏居，屋前、周圍散立著許多馬匹，那是提供遊客騎馬到對岸的馬幫 ~~
正前方樹林的背景是高大的白了頭的雪山而天空是蔚藍的，如此的美景已經令人讚嘆 ~~
見到隻馬咁靚仔就個個都爭住同佢影相 ~~
我又影埋一份先！！
我今日就係揀咗坐呢隻白馬喇 ~~
聽說往裡面再走還有一個瀑布，如果要再騎馬去瀑布區要每人再加多120元，不過因為時間嘅關係所以我們就放棄了。 其實伍須海自然保護區內已開發的景點有40處，景區內主要景點有雪山峰、佛主峰、老人峰、十二姊妹峰、神龜與佛主、鎮海石、牛鼻孔、獵人洞、伍須現代冰川、天生橋、七彩湖、伍須海、伍須仙海、伍須天池、伍須溫泉、伍須石林等。 可惜嘅係我無乜資料喺手而景區內亦都無乜指示牌或地圖，又無導遊講解，所以我都唔知到底自己去咗邊個景點囉 ~~
10點50分騎完馬返到去景區入口處之後，我們一眾女士們又搵到個好正嘅大自然廁所喇，個個就咁一子排開踎喺樹幹後面一齊唱歌呀，哈哈 !!
而男士們就咁喺馬路邊唱歌，乜咁open㗎 ．．．．．任睇任影都無所謂㗎 !! 
完成咗伍須海個行程之後又要趕返去新都橋喇 ~~
中途一樣喺昨天的 “沙德飯店”食午飯，因為好好味而且又順路所以大家唔介意再去食多次 ~~
食飽之後又係趕路嘅時間喇 ~~
終於下午５點左右又返到去新都橋喇 ~~
新都橋的傍晚景色 ~~
大家又落車影下黃昏美景先！！
入夜又到咗入住酒店嘅時候了，不過前晚「自駕遊營地318連鎖汽車酒店」又跣咗大家一鑊，而師傅又話無辦法喺新都橋搵到似樣嘅11間酒店房，但係我們實在好怕又要再入住嗰間無洗手間的藏居，所以我同Leng昨天已經用手機上網搵酒店，好幸運地搵到呢間 「新都橋鑫達商務酒店」~~
標雙房１８０元一晚 ，間房雖然唔算係好正，但起碼有個文明廁所嘛 ~~
就係因為呢個文明廁所，牛哥同鬼榮又好搞鬼地作咗以下幾首詩 ~~
牛哥 :
川西住宿好惱人
幸得咖哩展才能
覓得旅館置坐廁
屎榮得解踎塔困
鬼榮 :
房有坐廁真開心
立即除褲屙鑊金
發現頭頂有暖燈
牛哥都會好開心
牛哥 :
今次旅遊遇貴人
咖喱攞料確超能
醫師照顧各人群
珊珊心事細如塵
鬼榮 :
大家都係年青人
細個都睇甘小文
講屎講尿最開心
今晚再屙大長金
牛哥 :
今趟川四旅行團
食埋餐飯就快完
沿途影咗好多相
日後整理齊分享
峰睇完又湊熱鬧加多一段：
咖喱安排好細心
師傅揸車好安心
醫師叫餸頂瓜瓜
川西之行誇啦啦
川西隊友真係好文采 !! 
安頓好啲行李之後我們就喺新都橋鑫達商務酒店樓下嘅貴賓房享用晚餐 ~~
Day 9 (20/10/2014) —
今早７點離開之前又喺酒店附近行咗一陣 ，睇吓周圍嘅環境 ， 都話咗係我去旅行住酒店時的小小習慣㗎啦，因為昨晚到達酒店時已經天黑，周圍環境睇得唔清楚，咁早上可以補影返一兩張相放喺遊記又當記錄一下嘛 ~~
原來啲建築係咁靚㗎！！
同隊友們食咗碗簡單嘅湯麵做早餐之後，８點半我們就開始出發去成都喇 ~~
去到折多山呢一段路發覺突然間落咗一場細雪 ~~
隊友們興奮到落車影相，不過啲雪一粒粒好似發泡膠粒咁唔多真實嘅 ~~
然後再經過一個觀景台
中午時我們途經康定順便食我們川西行程嘅最後一個午餐 ~~
大幫哥仲喺飯後為大家高歌一曲添，睇吓牛哥笑得咁開心就知呢餐午飯大家食得幾happy啦 ~~
食飽飽就繼續趕路，不過由天光坐到天黑都仲未到，因為其中一段高速封咗路所以要被迫改行國道 ~~
今早８點半起程趕路去成都，晚上９點４０分終於捱到去成都喇，坐咗成日車真係人都癲呀！！ 
我返到成都之後將會有另外５日嘅成都自駕遊行程，而呢５日嘅行程將會有４個全新嘅隊友組合，一架小型私家車由 Roy負責駕駛，乘客有CV兄、我蝦子餅加埋我就剛剛好，佢地３人已經一早喺拖板鞋青旅等緊我喇，一放低晒啲行李我地就即刻出發去對面間袁老四食宵夜 ~~
一行２０人來到成都就兵分兩路，因為有２架包車會繼續佢地嘅西藏行程，佢地８人就無跟我地住拖板鞋青旅，而其他３架包車啲川西隊友們因為明天要飛返香港了，所以大家就一齊去食麻辣火鍋當係慶祝川西行程順利完滿地結束囉 ~~
辣到嘴唇會變大孖腸嘅超級麻辣湯底，唔食得辣嘅朋友千祈咪試呀！！
川滇。紅葉錯落雪山時【PART 4 – 成都、嘉陽小火車篇】
現分享我於出發前搵到關於預防高山症的一些資料 ~~
急性高山症：頭痛﹑頭暈﹑煩燥不安，失眠多夢﹑胸悶心慌﹑ 全身軟弱無力﹑噁心﹑嘔吐﹑口唇乾燥﹑心跳加快等。
肺水腫：極度疲乏無力，嚴重呼吸 困難，持續性咳嗽，夜間加重，不能入睡，喀粉紅色泡痰沫，面色蒼白或灰土色， 皮膚濕冷，心跳加快。
高原昏迷：多表現為進行性劇烈頭痛，嘔吐頻繁，表情淡漠，反應遲頓，視力障礙，嗜睡以致昏迷，大小便失禁，大多發生於進入高原後數小時，或 2-3 天 內。
《發作原因》
1. 環境氣壓下降：空氣稀薄，肺部換氧效率降低，造成動脈含氧下降。
2.運動氣壓下降：人體在海平面運動時，動脈內含氧會輕微上升以供應運動所需。但在高海拔運動，動脈內氣壓反而會下降。
3.睡眠氣壓下降：在高海拔睡覺，呼吸的換氧能力在睡眠中會明顯下降很多。有句諺語說：「睡得愈低，爬得愈高」，因為在愈高海拔睡覺，睡眠的低氧現象愈明顯，所得到的休息愈沒有效。
《預防之道》
一般說來，活動的海拔愈高、爬升的速度愈快、活動量愈大、高度適應做得愈少、過去愈常發生高山症的人，愈容易出現「高山症」的症狀。出現高山症與否反倒與身體強不強壯無關。
預防高山症之道可從以下幾個方向來著手：
1.充分休息：
出發前一定要有充分休息，千萬不要過份緊張 !!!
2.適時補充水份：
在登山過程中活動量大且呼吸快，水份流失增加，加上在高海拔「口渴感」會變得比較遲鈍，所以主動補充水份很重要。可以 1 小時 1 口水 。
3.藥物的預防及治療：
黨參多糖有助降低血黏度
一般人進入3,000米以上高原，24小時內都會發生不同程度高山反應，過度疲勞、寒冷、飲酒、上呼吸道感染為誘因，頭痛、頭暈、氣促心跳、食欲不振、胸悶腹脹、咽乾、手足寒冷，進入第一、二天最明顯，以後逐漸減弱，一周內消失，少數人症狀持續到離開高原。
以往藏藥「紅景天」被用作預防或減輕症狀，以致被採掘過度，面臨絕種，隨著近十年中藥業現代研究的發展，西洋參，針刺玉加，黨參相繼開發，其中以黨參多糖，有顯著增加器官流量，降低血黏度，促進紅細胞生成、增強免疫力等作用，而成為首選預防藥物，乙醇浸出片及口服液，市面均有出售。
●「Diamox」●香港很多有 ® 字在門口的都有售 , 大約 $ 2.5 一粒，是一種很弱的利尿劑，也用來治療癲癇和青光眼，被廣泛用在急性高山症和高海拔肺水腫已十多年了，它可以在一天之內透過造成「高氧性代謝酸血反應」來刺激呼吸。在一般的高地適應中，「高氧性代謝酸血反應」要五天的時間才能達成，正確的預防劑量長年以來一直有很多爭議，比較被大多數醫師接受的作法是：從爬升前二天開始，每8至12小時口服250mg，共服用五天。一些人對這個藥物有一些胃腸不適，唇舌、下肢感覺遲鈍的副作用，所以對仰賴觸覺活動的人(如盲人)要謹慎使用。最要緊的是，這個藥物的結構和磺胺藥很類似，對磺胺藥過敏或有腎臟疾患的人，絕對不可以使用。
《症狀出現時》
如果症狀出現了，就來不及做任何預防措施。這個時候最有效而且保險的方法是下降(Descend)，登山界流傳一句很有意思的玩笑話，說對付高山症的三大策略是『3D』，即『Descend，Descend，and Descend』(下降，下降，再下降)。一旦下降，幾乎所有人的所有症狀都會馬上緩解。但我們都知道其實在某些狀況下是無法馬上下降的，若無法下降高度，而必須挺進時，才考慮藥物處理。
1.叫醒病人，讓他在空氣流通的地方走走或坐著休息一下。每隔 4-6 分鐘作 10-12 次深呼吸；嚴重且急性時，強制休息，並給予氧氣，必需連續呼吸氧氣 15分鐘以上，才對病人有所幫助。給病人好好睡一覺，常常是最不智的處置。
2.對病人的頭痛可以給他服用止痛藥，但要避免使用阿斯匹靈，因為阿斯匹靈會降低血小板的凝血機能，增加高海拔視網膜出血的機會。也不要用鎮靜安眠藥，它們有呼吸抑制的效果，加上睡眠低氧現象，足以把一個單純的急性高山症弄成肺水腫或腦水腫。
3.在此時給病人氧氣會很有效，幾乎可以立即改善症狀。
4.可以繼續或開始服用Diamox，它除了預防外，也有治療的效果。
5.最新式一種手提的 Gamow 增壓鎗，相當有用，高山症患者躺 在筒中約兩小時即可減除症狀。
在高海拔地區，比較可怕的是腦水腫及肺水腫，它們可以單獨發生，也可以伴隨著急性高山症。
肺水腫是因為缺氧造成肺血管收縮，肺動脈壓上升。打個比方來說，是肺內充滿了過多的水，此時換氣能力大大地降低。病人會有明顯的呼吸困難、呼吸時可能有氣泡聲、不斷咳嗽且可能咳出水樣氣泡物、最後甚至有意識障礙。
腦水腫則是在缺氧後，血管內的水份外移到缺氧細胞和組織間隙中，導致水腫。
腦部的水腫可以造成動作失衡、幻覺、意識障礙。這兩種疾病都會昏迷而死亡。
領隊要在隊員發生高山症時，必須能夠正確地判斷是否有肺水腫或腦水腫的現象發生。一旦有一絲絲的懷疑，不管確不確定，絕對要馬上下降，遲疑常常就造成死亡。
氧氣及高壓袋在此時都只是暫時的作用，若有這些裝備自然可以在下降途中使用，但不可以因此而延誤下降。
●以下情況者請注意●
現今最新是高壓氧治療，可迅速控制肺、腦水腫，一般治療一次即有效果，重症二、三次，每日進行二次治療，病情穩定後改為每日一次，以下情況應盡早治療，可避免不可治的後遺症。
1.迅速登上4,000米以上高度出現症狀者
2.年紀在45歲以上
3.本身有心、肺、腦疾病
4. 藥物治療沒效者。
女仔一般都無咁易中招，不要做過分動作，口服黨參作預防或一線治療；治療無效，除吸氧外，加口服DIAMOX或CORTISONE ACETATE作二線治療，若未能減輕症狀，必須下山。 出現嚴重高山反應，肺水腫症狀，咳嗽、呼吸困難、血性泡沫痰、紫紺、不能平屆腦水腫症狀、劇烈頭痛、耳鳴、惡心、嘔吐，視力減退，昏睡，反應遲鈍，需進行高壓氧倉治療。
PS：
請帶備必理痛Panadol、Diamox、朱古力和得力素。出發前一定要有充分休息，千萬不要過份緊張 !!! 女仔一般都無咁易中招，不要做過分動作，口服黨參作預防或一線治療；治療無效，除吸氧外，加口服DIAMOX或CORTISONE ACETATE作二線治療，若未能減輕症狀，必須下山。
出現嚴重高山反應，肺水腫症狀，咳嗽、呼吸困難、血性泡沫痰、紫紺、不能平屆腦水腫症狀、劇烈頭痛、耳鳴、惡心、嘔吐，視力減退，昏睡，反應遲鈍，需進行高壓氧倉治療。
以下是中醫師提供的防止高山反應方法：
1. 沿途要多飲水，不要怕上廁所麻煩，排尿是減壓方法
2. 坐車途中，要多說話，多唱歌，多咀香口糖，勿不作聲，太靜易入睡
3. 上高海拔時，不要睡覺，同伴們要互相提醒，往下低海跋才作小休
4. 穿衣要謹記把衣服拉練拉上或扣緊衣紐，打開易受涼，高原最怕着涼
5. 在高海跋時盡量降低自我衛生標準，沖涼，洗頭易耗氧及着涼
6. 晚上睡覺最好戴帽，減低睡眠中失溫症出現
7. 沿途多飲酥油茶，此茶可減少高反及提供油脂給皮膚，皮膚乾燥，易感冒
8. 生活在平地，到高原一定有高山反應，無的人，是很少數。認真地，如有不舒服，要對司機說
9. 沿途的餐飲可能不合胃口，可改吃多些水果，蕃茄，薯仔，補充維生素C