川滇。紅葉錯落雪山時【PART 2 – 亞丁牛奶海、五色海篇】 |

Day 3 (14/10/2014) —

上回文中我提到當日早上我們８點１５分由稻城出發，先遊覽第一個景點 “桑堆紅草灘”，之後又去過了青楊林，接著要去的地方就係今次川西之行最重要嘅目的地，就係“亞丁自然保護區”喇 ~~

今日天氣一樣非常好，天朗氣清 ~~　

點解阿峰可以跳得咁高而且姿勢又咁靚嘅呢 ? 我每次跳到好似隻肥青蛙跳水咁款，笑死啲觀眾呀，所以今次都係影阿峰表現好啲喇，哈哈 !!

我們的車隊繼續向香格里拉鄉進發，仲有百多公里的路 ~~

終於中午前到達了今個旅程最大的重點 “亞丁” 喇 !!

到達了香格里拉鄉之後，首先一定要食餐豐富嘅午餐先，因為今日下午要行山，需要體力嘛 !! 所以先搵間餐廳食個午飯然後再出發去亞丁景區內。

四川省內一般食嘅都係麻辣嘅菜式比較多 , 但因為大部份隊友們都唔食得辣 , 所以EC為我們點的餸都係唔辣嘅為主 ~~

仲有來自新疆嘅哈密瓜做飯後果添 ~~

食飽中午飯之後我們即刻爭取時間入去亞丁景區內，下午1點20分我們去到亞丁景區遊客中心的售票處 ~~

150元一張門票，加上觀光巴士來回票係120元，一共盛惠270元。因為我們今晚會落山返去香格里拉鄉，唔住喺景區內亞丁村，所以如果預先喺櫃台俾職員用証件登記咗的話，咁明天就可以憑今天的門票再入亞丁景區內，唔需要再重新買門票，不過要再另外補多60元的觀光巴士來回車票 ~~

景區內的觀光巴士載我們由亞丁景區入口去到扎崩灌的終點站，車程大約1小時，落車之後需要徒步到衝古草坪 ~~

如果時間不太充裕，我覺得亞丁安排兩天時間就可以了。第一天可以先適應一下這邊的環境，先安排去比較輕鬆的卓瑪拉措 (珍珠海) ，第二天再去最美但又難度比較高的俄絨措 (牛奶海) 和丹增措 (五色海)，所以今天我們都係安排了先去珍珠海 ~~

觀光巴士中途會先停在觀景台俾大家落車10分鐘時間影吓神山。在亞丁自然保護區內有62個大大小小的高山湖泊和40多座高山，當中以品字排開的三座神山 : 仙乃日神山 (5980公尺) 意為觀世音菩薩，為稻城第一高峰。央邁勇神山 (5480公尺) 意為文殊菩薩。夏諾多吉神山 (5950公尺) 意為金剛菩薩。三座雪峰，雄奇壯觀，亦是保護區的核心 ~~

今日出場嘅隊友係另一對夫婦，芳芳 (右二) 同佢嘅先生華仔 (右一) ~~

在盤上公路上轉了接近一個小時，終於看到了山下的亞丁村了。景區內的觀光巴士停在扎崩灌的終點站，落車之後無論要去珍珠海或者係牛奶海都先要徒步到衝古草坪 ~~

徒步到衝古草坪有兩條路線選擇，左邊是舊路，路程比較短一啲，而右邊是新修的棧道，沿路景色比較靚，但路程就長一啲，而我們因為有今天和明天2次入景區的機會所以2條路線我們都一一試了~~

而衝古寺就是位於離開衝古草坪不遠的山坡上，而電瓶車站都是在衝古寺這裡附近。從衝古寺往上走就是珍珠海，它位於仙乃日雪山的下面。這條路上有很多的松樹，林間仲有時會見到小松鼠跳來跳去，很可愛。由於是爬棧道，所以行上去都會有啲攰嘅，在高原上爬山是需要一定的體力嘅，需要經常休息和喘氣。不過今天的路程還算輕鬆，等把明天的牛奶海和五色海的路線走完，你就知道今天有多輕鬆了~~

接住出場嘅係出名行得快又影相靚到無得頂嘅大幫哥喇，睇見佢支鏡就知係好嘢黎啦 ~~

自拍神棍又再次出動喇 ~~

我們繼續行上去衝古寺之前先去衝古草坪影番幾張相 ~~

等咗咁耐今日終於可以親眼見到眼前的美景，嗰種激動我真係唔識得點去形容呀 !! 儘管我有點喘氣，但都不停的舉起相機影相，簡直是美呆了 !!

我文筆水準有限，形容詞不多，不如直接去片吧，不過相機一般，技術更一般，請見諒 !! onion-head5

鬼榮、美兒同Jane佢地用石頭砌成的 “瑪尼堆” ~~

再行上一段石級就會見到沖古寺了 ~~

過咗沖古寺之後就繼續一級一級的沿住棧道行上去，加油呀……就快到珍珠海㗎喇 ……!!

一步步的越接近雪山，景色就越美 ~~

沿途見到一位喇嘛好誠心地叩拜仙乃日神山 ~~

慢慢的往上走過一段林蔭山徑，下午3點55分我們終於到達了珍珠海，藍天白雲雪山聖湖，永遠是最能震撼人的美景 ~~

珍珠海雖然不大，確有難以形容的秀麗精緻。加上有仙乃日的雪峰作背景，有說不出的靈性之美，從湖邊往雪山望去，真係好靚呀 !!

喺珍珠海逗留咗一陣之後我們就快速地落返去扎崩灌觀光車站，然後再搭返觀光車落返去亞丁景區入口處，上咗車就通知汪堆的車隊喺亞丁景區入口嘅停車場接大家返回今晚入住的賓館 ~~

落山時啲風景一樣咁靚，忍唔住又影咗幾張 ~~

晚上6點半我們返到去香格里拉鄉的“達瓦驛站” 賓館，順便喺賓館食晚飯 ~~

這次旅程上我和EC同房，每晚都見佢好快就熟睡，不知幾咁羨慕佢呀！！明天一早要6點半出發去牛奶海，可能要早起再加上又有啲擔心自己唔知是否能夠應付咁高難度的高原地區徒步，再加上高原反應，今個晚上依然無法入眠…. 這種滋味真係好痛苦…..疲備的身軀…..沈重的眼皮……但是仍是輾轉難眠 ~~

今天一早出發，又上咗去珍珠海呢一個景點，以為玩咗一日又攰又眼瞓一定可以瞓番個好覺啦，點知數綿羊數咗成晚，過咗一個鐘又一個鐘，唉……！！仲未瞓得著，淩晨3點半見EC突然醒咗過來，佢見我咁慘連續4晚都瞓唔到所以擔心我身體支持唔住，堅持起床幫我按摩頭部的穴位希望可以幫助我入眠，嗰一刻我真心感動到眼淚偷偷地從眼角流了下來，我衷心的感激EC，除咗講多謝之外我真係唔知講乜先可以表達到我當時內心的感激呀！！按摩完之後EC仲利用佢嘅手機播住一首音量很輕的佛歌去幫助我入眠，結果好神奇地我竟然真係瞓著咗喎，成功瞓咗1個鐘直至早上5點鬧鐘叫醒我，實在太….太…..太……感動喇 ~~

Day 4 (15/10/2014) –　

早上5點鐘要起床喇 !!! 今日準備要去挑戰牛奶海呀 !!! 　出發前要補充一下體力先，出動我由香港帶黎嘅出前一丁杯麵 ~~

準時6點半由賓館出發去到亞丁景區遊客中心，又係坐景區內的觀光巴士載我們去到扎崩灌的終點站 ~~

喺觀光巴士上我們後座坐了一班來自廣東省的遊客，喺其中一人的手機見到一張相，原來佢地昨天由理塘到亞丁的路上遇上塌方，條公路嚴重阻塞咗12小時，好彩我們行程係調轉走咋，明天我們先會由亞丁往理塘的方向走，逃過一劫好好彩呀 !!

落車之後再行大約20分鐘去到衝古草坪的電瓶車站 ~~

今次要介紹嘅就係好玩得兼餐餐負責用公數幫大家賣單嘅珊珊姐喇 ~~

排隊乘坐電瓶車的人龍好長呀 ~~

電瓶車票價單程50元，往返就80元 ~~

電瓶車站距離洛絨牛場7.4公里，大約30分鐘的車程就到洛絨牛場了 ~~

早上9點55分電瓶車沿河谷來到了洛絨牛場（海拔4150公尺），這裡才是徒步上牛奶海的真正起點 ~~

其實上牛奶海有2種選擇： (1) 乘坐了电瓶車之後再徒步而上，但請考慮自己的體力和耐力；徒步上山當然是最費體力，最費耐力，最耗時間的；從洛絨牛場到牛奶海需要最少3個小時。 (2) 坐馬上去，特種馬幫，共有30匹馬，每天沒有固定的來回次數，票價是300元，不可提前預定，只能現場自己排隊購買馬票，如果非得要騎馬上牛奶海的朋友，請務必早啲出發，爭取搶到第一批或第二批的馬幫，以節省時間。馬幫係早上7:00開始營運，從洛絨牛場到達牛奶海需要1小時左右，期間有一段路很陡峭，又有涉水，所以都要自己爬一段路的，大概20分鐘的路程左右，到達牛奶海後，馬夫會在牛奶海等你，這個時候你就可以去五色海了，需要提醒的是，馬夫會一直催你快啲嘅，因為佢地急着回洛絨牛場做下一班生意嘛，所以催的很煩很煩，有啲人會直接叫馬夫自己先落山，自己玩夠咗先再自己行返落去洛絨牛場 ~~

一去到洛絨牛場，「央邁勇神山」英勇的身姿早已躍然面前。我們站在神山面前深感自身渺小，祈求他保祐我們今天一路順利、平安 ~~

央邁勇神山雪峰環繞寬闊的草場，加上色彩斑斕的溪流及五彩繽紛的森林，十分美麗壯觀，好像油畫一樣 ~~

剛開始的一小段路程是在洛絨牛場邊沿着河流逆流而上的，很多小草的，河水有點夢幻的綠，很美很美 !! 草地走上去軟軟的，很舒服，此段路為平路好易行 ~~

中間嗰段路程全為上坡的路 ~~

而且人馬爭路，仲要涉水，但沿途啲風景真係好正呀 !!

以下幾張相簡直就係我這輯遊記的名子「紅葉錯落雪山時」所要表達的意境呀 !!

下圖戴住黑超嗰個就係仲型過周潤發嘅發哥喇，佢好好人㗎 !!

真係好攰呀，而且風都是迎面吹過來的，往上爬的時候走一段就要停下來大口喘氣，腦袋感覺沉沉的，迷迷糊糊的在走，建議身體實在受不了的千萬不要往前走了，如果倒下來，其他人想救你都幾難㗎 ……….而且迷迷糊糊咁跌落山谷去咁就更慘了 ~~

其中有一段必須自己爬上去，手腳並用，因為很陡峭。不斷問落山的行人仲有幾遠路程，大家都話好近了就喺前面，但係前面仿佛遙遙無期。由牧場到牛奶海的路程，由海拔4180米爬升至4600米的牛奶海，這路程如在香港行山，只是小兒科，但喺高原，卻不是那麼簡單了。步行者每走幾百米，都要停下來休息一下 ~~

高原空氣稀薄，是登山的最大困難，心急想要快啲去到牛奶海，但又偏偏唔快得，加上肩上重擔，背曩裝了飲用水，貴重物品，朱古力同自熱飯變得好重，所以我每一步都是喘氣的慢動作，行幾步就要回一回氣。所費氣力如與香港行山比較，對我來講絕對有三倍以上的艱辛，而且我每日都起碼要食2至3粒必理痛去止頭痛。我全程都唔多留意到其他隊友，因為我都自身難保，辛苦到想死呀，不過都從來無打算過放棄唔繼續行上去，因為今次之行目的係為咗要上去牛奶海，如果無去到就等於白來了。而且認真的講 , 下次就算有人貼錢請我都唔會再來了 ~~

這一段都是很陡的爬坡路，或者根本就不能叫路，直接在碎石間爬出來的 ~~

過了一段難行濕滑石斜坡後，山路又開始變得平坦易行一啲~~

此時風勢加劇，空氣更加稀薄。行走其中，舉步艱難，走幾步，就氣喘如牛。每每需要回頭避風及作深呼吸回氣。最後的一小段是平路，歷經艱難的終於望見牛奶海了 ~~

經過3小時徒步上山的艱辛路程之後，視野開始又逐漸開闊起來，終於見到牛奶海在前方不遠處靜靜地躺在仙乃日和央邁勇神山的埡口之間 ~~

在牛奶海前面的山坡上我們坐喺草地上食自己背上來的自熱飯，欣賞著眼前的美景，雖然辛苦但成功上到黎都總算值得啦 ~~

今日係Leng嘅生日，喺今日安排咗個咁艱辛嘅行程，真係過意唔去喇 !! 但係我深信呢個將會係你一生中最難忘嘅生日，喺山上我無大餐可以請你食，只請你食自熱飯一盒真係委屈咗你喇 !!

Leng 的生日大餐 ~~

大家都說牛奶海是亞丁最美的地方，果真如此。牛奶海有一種不常見的艱澀的美，那種艱澀的味道要親身來過的人才能體會的，是筆墨不能夠形容的。為什麼有牛奶海之稱呢 ?? 傳說每年春暖花開之時，海水會像牛奶一樣潔白如瓊漿，並因此而得名。牛奶海為古冰川湖，狀如水滴，四周雪山環繞，湖水清瑩碧藍，山止成瀑，以其秀雅水色翠藍而得名~~

五色海還需往上爬500米，從牛奶海有指示牌指示前往五色海的路，一個小上坡，大概20分鐘就可以到達五色海了。不過上山原本沒有路，都是驢友踏出來的路，看着牛奶海離得越來越遠，面前係看似好近但卻又觸摸不到的雪山 ~~

加油 !! 加油 !!

到喇….到喇…..終於都到咗五色海喇 !!!!

阿峰、Leng同我開心到相擁起來，因為成功征服了五色海所以超級感動呀……….!!!

有戲睇呀 !!! Leng 即刻通知阿峰將相機鏡頭一對焦先……..咦……哈哈哈…..!!!!

有個傻婆竟然感動到流馬尿呀 !! 因為個傻婆無諗過咁辛苦都死唔去，仲可以成功上到去五色海添，所以心情有啲激動咁啫，今日都唔係第一次喊啦，有乜咁出奇喎 !!

無花無假嘅真眼淚黎㗎 ~~ 要多謝May和峰拍低咗呢幾張咁珍貴嘅照片喔！Thank you ! !

不過一見到眼前個靚景佢又好快笑番喇 ~~

五色海位於仙乃日與央邁勇神山之間，海拔4600米，湖面呈圓形，面積0.7 公頃。由於光的折射，五色海會產生五種不同的顏色，也因此而得名。而站在這位置係海拔5100米，回望五色海，個人認為在五色海看到的三座神山感覺最好，但海拔最高，亦都係最難行嘅一段，上山難，落山更難，對我呢啲無行慣山嘅人黎講可以算係10級難度喇 ~~

站在高山，離天空又近一步，藍天白雲，太可愛了！今次真正體驗到所謂的「身體下地獄，眼睛上天堂」，週遭壯闊的景色，都令人十分震撼 ~~

喺PART 2壓軸出場嘅隊友係一對香港嘅行山高手，幽默風趣、滿肚墨水而且又出口成文的牛哥同佢太太牛嫂喇 ~~

因為我們上到去五色海之後唔係原路落山，汪堆帶我們行一條捷徑落山，但條路好危險，全靠牛哥同發哥2個的幫忙同帶領之下我們幾個女士先可以由五色海好安全咁落山咋 !!

現憶起當時嘅情況，只清楚記得行係我最前面嘅係汪堆，佢帶住EC落山， EC後面就係阿峰拖住Leng落山，跟住就有發哥帶住Jane (下圖)，而牛哥就喺我後面一路咁教我落陡坡的技巧，因為陡坡全係跣腳嘅浮沙石路，根本無從下腳，而May的行山仗又唔夠長，所以無辦法，只好由我用我支較長的行山仗帶頭領路， May就拉住我嘅背囊，我們2人就慢慢一步一步咁側著身子小心翼翼地挪動下山 ~~

牛哥同發哥，好多謝你地呀 !! 請受咖喱妹一拜 !!

上山咁難，以為落山會舒服一啲啦，居然係一樣咁痛苦，因為發現路竟然係咁長咁遠。很奇怪自己係點樣行上去嘅，行到精神幾乎崩潰。因為要趕搭7點半由扎崩灌開回香格里拉鄉的最後一班觀光車，所以想行得快一啲，但已經筋疲力盡而對腳好似唔多受個腦控制咁行唔郁喇 ~~

傍晚行到落去洛絨牛場之後見到有很多不怕生的野鹿到處覓食 ~~

洛絨牛場當然唔少得牛牛啦 ~~

6點半終於捱到去電瓶車站，再要坐30分鐘嘅車程返去冲古寺，然後再跑落去扎崩灌的觀光車站，好好彩都可以喺7點半前趕到 ~~

晚上7點15分上到觀光車之後計一計，發覺今早6點半由賓館出發，然後喺洛絨牛場起點開始徒步上山，來回五色海居然用咗9小時呀 !! 我落到山之後成隻泥鴨咁呀 !!

我咁緊要攰係因為我已經4日無瞓過一覺好嘅，從麗江的第一晚開始計，我每晚的睡眠時間都無超過2小時，再加上今日亞丁牛奶海同五色海的行程之後我返到賓館已經成條喪屍咁完全唔想郁，連晚飯都無同大家一齊食，只想沖涼然後上床休息，因為我覺得如果我再瞓唔到覺的話而又每日由朝到晚行山遊覽景點，我相信我絕對有可能會暴斃喺路上囉 ~~

以下係我們這2晚喺香格里拉鄉入住嘅賓館 “達瓦驛站” ~~