川滇。紅葉錯落雪山時【PART 1 – 翁水村、稻城篇】 |

我一直不知道原來中國內地除了雲南、新疆、西藏以外竟然還有如此驚艷的四川地方，直至到2年前的有一日無意中在遊記中見到一輯好毒的秋天稻城亞丁的照片，而且傳說中的318國道亦都一直很令我嚮往。這條318國道總長5476公里，起點為上海的人民廣場，經過浙江、安徽、湖北、重慶、四川至西藏這些中國的省份，終點為樟木的友誼橋。一條路由長江流域下游人口最密集、最先進的一座城市上海，沿路由低至高，經過不同的人文和自然景觀，穿過四川盆地，攀爬川滇藏縱谷、青藏高原，是中國景觀最豐富的一條路。而去四川稻城亞丁要走的路，也是318國道的一部份，那段路屬於「川藏公路南線」，秋天走在這條路上沿途風景真的漂亮到會令人窒息。正因為如此，2013年就開始計劃2014秋天的行程，並邀請了我一班好友一起去川西玩一趟，轉眼間今年10月終於完了我在稻城亞丁的夢。遊記開始之前我先分享一張我在亞丁的照片 ~~

今次我們一行20人包了5架四驅車，連5位包車師傅就一共25人，而我的隊友會在這川西遊記之中的唔同部份慢慢逐一出場 ~~

以下係今次的川西行程：

Day 0 (11/10 ) — 晚上到達麗江（宿麗江）

Day 1 (12/10 星期日 ) — 車隊由麗江出發 –雲南香格里拉的翁水村 –小雪山（宿翁水村）

Day 2 (13/10 星期一 ) — 翁水村—大雪山 — 稻城（宿稻城）

Day 3 (14/10 星期二 ) — 稻城 — 桑堆紅草灘 — 青楊林 — 亞丁珍珠海 — 香格里拉鄉日瓦（宿日瓦）

Day 4 (15/10 星期三 ) — 日瓦 — 洛絨牛場、牛奶海、五色海（宿日瓦）

Day 5 (16/10 星期四 ) — 日瓦 — 熱烏寺 — 海子山 — 理塘（宿理塘）

Day 6 (17/10 星期五 ) — 長青春科爾寺 — 雅江 — 新都橋（宿新都橋）

Day 7 (18/10 星期六 ) — 新都橋 — 貢嘠雪山 — 九龍（宿九龍）

Day 8 (19/10 星期日 ) — 伍須海景區 — 新都橋（宿新都橋）

Day 9 (20/10 星期一 ) — 新都橋 — 成都（宿成都）

Day10 (21/10 星期二 ) — 春熙路 — 寬窄巷子 — 錦里 — 人民公園（宿成都）

Day 11 (22/10 星期三 ) — 嘉陽蒸氣小火車之旅（宿成都）

Day 12 (23/10 星期四 ) — 天台山 — 平樂古鎮（宿成都）

Day 13 (24/10 星期五 ) — 石象湖 — 黃龍溪（宿成都）

Day 14 (25/10 星期六 ) — 成都 — 香港

Day 0 (11OCT2014) –

我和Jane、美兒和鬼榮 4人從香港出發，我們乘搭中國東方航空公司下午5時05分開出的MU 734 班機飛往雲南麗江，中途停昆明清關，然後再原機飛往麗江，晚上9時20分到達三義國際機場 ~~

因為到達麗江已經比較夜而麗江古城裡面客棧又太多，拖住行李搵客棧位置應該都幾麻煩，反正有4個人所以就一早通知咗客棧安排接機， 80元一架麵包車，咁就話咁快就輕輕鬆鬆到咗今晚要入住的麗江花田驛客棧啦 ~~

客棧的親善大使好可愛呀 ~~

標雙房 178元一晚，裝修都幾有古城味道，幾有特色，唔錯 !!

Day 1 (12Oct2014 ) –

可能因為要早起所以成晚瞓得唔好，一早５點就起咗床，準備7點鐘就要由客棧出發去同我其他16位隊友會合，因為其他16位隊友昨天係由深圳機場出發，比我早到達麗江，而且又約好咗包車師傅今早8點去他們的客棧接大家。所以我又拜託麗江花田驛客棧老闆幫我們4人安排了一部麵包車， 40元一程送我們過去麗江大研古城的南門集合地點 ~~

我們出門的時候仲係天朦光，首先出場嘅係全程帶俾大家無限歡樂嘅鬼榮同佢新婚的老婆仔美兒　~~

去到南門落咗車之後仲有40分鐘才到集合時間，所以一於喺路邊小販檔坐低食個簡單早餐先 ~~

小籠包、蛋包，白粥加豆漿 ~~

我對上一次到麗江係2011年的4月份，轉眼間已經係3年了，清晨的麗江係最靚的，記得上次清晨時段的麗江古城感覺遊人好少而且好寧靜，好舒服 ~~

早上8點鐘集合晒20位隊友，全部人上晒5部包車之後我們就正式起程開始我們期待已久的川西之旅喇 ~~　

今日嘅目的地係我地車隊隊長汪堆師傅位於香格里拉的家鄉 (翁水村) ，而汪堆師傅也是翁水村的村長，厲害吧？

我們會喺佢屋企住一晚，雖然翁水村無乜特別嘅景點，不過可以有機會住進藏族村長的家相信都算係一個好特別嘅體驗啩 ~~

開咗車無幾耐就見到好搶眼嘅一隊保時捷車隊，廿幾架保時捷跑車同時喺條公路上，好壯觀呀!!　

因為修路的關係，途中有一段路係限時放行，如果我們今日下午2點之前未能到達修路閘口的話，咁我們的車隊就要等到晚上7點先可以再次被放行，咁我們到達翁水村就可能係深夜了。　其實呢一次的整個旅途中有好多靚風景都在路上，沿途的自然風光，可謂美不勝收。可惜今日全日都要趕路，所以無乜時間停低慢慢欣賞沿途的風景，上午只係停咗喺虎跳峽一陣間俾隊友去吓洗手間咋~~

呢一對隊友係將整體隊友嘅平均年齡都拉低咗一大截嘅美少女Leng同佢男友阿峰~~　

今日整個早上我們都在趕路，連午餐都係中途隨便搵間餐廳好匆忙地食飽又再繼續趕路 ~~

但估唔到這一餐匆匆忙忙嘅午餐竟然係整個川西行程之中最令我回味的一餐，尤其係嗰碟炒野生雜菌，真係好好味呀 !!

而且苦瓜一啲都唔苦，左下角係用牛奶做成的炸酥餅，都好特別 ~~

下午1點35分我們終於好順利地成功過咗個限時放行的修路閘口喇， yeah！！

過咗呢段路之後我們終於可以鬆一口氣，可以沿途停吓車欣賞吓靚風景影吓相喇 ~~

這片鮮艷紅色的花叫做狼毒花，我從未見過喎，好靚呀　！！　

之後再經過一條小村，難得見到有一戶藏民正在慶祝新屋入伙，所以汪堆師傅就建議大家入去參觀一吓~~

左邊呢位身穿白色Ｔ裇嘅就係我們的隊長汪堆喇，係唔係好高大有型呢？？

跟住就繼續往翁水村進發，海拔一路一路咁攀升 ~~

走咗好長的一段山路，在傍晚５點１０分我們望見遠處海拔３７５０m的小雪山，終於可以停車休息一下～～

而呢３個多小時的車程都係彎彎曲曲的山路，而且又多急彎，我和好幾位隊友都開始暈車浪，再加上少許高原反應，我開始覺得唔多舒服．．．

雖然我個頭暈暈地又痛痛地，但美景當前又點可以唔影返幾張相吖！！　可惜我無影低當時隊友阿峰嘅樣俾大家睇吓，佢一落車時臉色蒼白全無血色，嘴唇好似搽咗塗改液一樣，好可憐呀！！

而Leng就暈到想嘔但又嘔唔出 ~~

再捱多５０分鐘左右我們終於喺６點０５分到達翁水村喇 ! 翁水村海拔係２９４０ｍ，唔算好高，所以喺汪堆家門口落咗車之後見到阿峰嘅臉色終於正常番少少 ~~

而Leng就………….不過嘔完應該會舒服好多嘅 ~~

首先入去參觀一下村長嘅大屋先，其實村長的家亦係一間民宿 “聖地燃木親客棧”，我們今晚被安排瞓喺５間房間裡面 ~~

寬敞的大廳全是藏式原木傢具和裝飾，選用稀有的高原硬木配上簡單的雕刻 ~~

這裡是廚房，我們今晚就係喺呢道開餐喇 !!　而大廚就係汪堆的夫人，她煮得一手好菜~~

好大部份的食材例如蔬菜、瓜類、土豆等等…..都係村內自家種的有機菜。今晚為咗招呼我們晚餐，他們一家準備了野兔一隻，又劏咗自家養的豬一隻。因為民宿都係打開門早生意嘅，無理由要人家免費招呼食宿㗎，所以EC建議大家每人付汪堆150元，包晚餐、早餐和床位一個 ~~

仲有自家製的青稞酒，不過我唔識欣賞，飲落似火酒般灼喉嚨嘅青稞酒，藏語叫做“羌”，是用青藏高原出產的一種主要糧食——青稞製成的。它是青藏人民最喜歡喝的酒，逢年過節、結婚、生孩子、迎送親友，青稞酒必不可少 ~~

以下又輪到另一位隊友Jane出場喇！！

食飽之後我們又上咗樓上嗰層參觀一下，喺樓上坐咗一陣休息下吹吹水~~

樓上係我們其他隊友今晚住的房間~~

而我就瞓喺樓下大門旁邊的第一間客房，因為我們人數太多所以唔夠房間。所以我、May和 Jane就３人一間房，共瞓一張由２張單人床合併而成嘅大床，而我就係火腿三文治中間嗰塊火腿喇！！

從來未試過去旅行要同２個朋友同瞓一張床，所以唔太習慣，怕轉身會整醒Jane和May，所以只好靜靜咁瞓住郁都唔敢郁，所以就成晚瞓唔著囉~~

Day 2 (13Oct2014 ) ─

因為瞓唔著所以我係第一個６點起身換衫梳洗嗰個，然後就去咗廚房拎熱水沖茶~~

見到汪堆和他的３弟“康巴”已經喺廚房為大家煮緊犛牛奶和準備早餐中 ~~

啲新鮮犛牛奶首先要將佢隔咗啲毛髮，然後將佢煲熱才能飲用嘅~~

距離8點半食早餐仲有好多時間，所以我同May、Jane、鬼榮同美兒呢５個早起嘅隊友就去咗翁水村的河邊行吓影吓相~~

翁水村的晨曦，整個村落都感覺好寧靜，雖然係高原地區氧氣不足，但空氣依然很清新~~

原來一定要經過村民的家才有小路可以通往河邊，咁啱見到屋前有個叔叔在門後面餵緊狗仔，所以就大膽地敲門問叔叔可否開門俾我哋行過去河邊，個

叔叔好友善地一口答應了，唔該晒叔叔 !!

今早又輪到我另一位女隊友出場喇，黃色外套嘅係May喇 ~~

臨走前仲用鬼榮帶黎嘅自拍神棍同叔叔和佢嘅仔影咗張合照添！！後來同汪堆提起時先知道原來嗰位係佢親叔叔同親姪仔 ~~

然後8點半返到去汪堆家食早餐 ~~

有酥油茶、饅頭、犛牛奶 ~~

由青稞、豬血和糯米整成的糕，但係我唔記得叫咩名喇～～

酥油茶

除咗犛牛奶之外，其它啲唔係太啱我口味，好彩我有帶備大量零食 ~~

9點鐘由翁水村出發前往今日的目的地，四川省稻城 ~~

這裡就係美麗的翁水村喇 ~~

接住出場嘅係我哋車隊另一位師傅，右二就係汪堆嘅三弟，魯茸康巴。臨走前再影多幾張相之後我們的車隊就開始往稻城的方向進發 ~~

呢一段嘅山路路況一樣係唔多好，不過今日有好多機會停車休息一下睇吓風景影吓相，所以感覺無昨天咁辛苦 ~~

呢一次的整個旅途中有好多靚風景都在路上，今日都係要全日趕路，今晚我們會喺稻城住一晚，所以如果沿途上覺得有靚風景嘅地方我們就會停車影下相順便喺路邊唱吓歌。　其實一路上都好少見到有廁所，除非肯著成人紙尿片啦，否則就要捱到去啲小鎮先會有廁所囉，所以走呢條川西線都預咗要逼自己習慣吓上大自然廁所，好多時啲收費廁所係勁臭，一閉氣分分鐘仲會有高原反應添，最好都係路邊搵個隱敝少少嘅草叢唱歌，所以每次唱歌時間一到，我們幾個女士就會互相幫大家睇水，男士一邊，女士就去另一邊，有時甚至幾個女士一齊集體開演唱會添，哈哈 !!