DAY 5 (23Sep2012) —
早上8時30分， 我地先去食早餐， 路過一見到阿里巴巴， 我地就即刻再去買多2個“囔”做早餐， 然後再喺隔離試了拉麵 ~~
牛肉拉麵，但係我唔食牛肉所以只叫了碗清湯拉麵 ~~
羊雜湯
早上10時25分， 我地由青年旅舍離開， 搭返接駁巴士出返去喀納斯景區禾木出口處，又一小時的巴士車程， 11時25分返到去喀納斯景區禾木售票處坐回文師傅的越野車， 然後就向下一個景區喀納斯出發喇 ~~
沿途見到靚靚的紅葉所以我地落車影吓相順便又切哈密瓜食 ~~~
其實9月尾北疆的天氣變化和溫差真係好大，中午可能熱到要著短袖衫，氣溫有20幾度，但早同晚又凍到要著羽絨，山區可能只得零下，而且今日前往喀納斯的途中竟然又突然落咗一場大雪添， 咁就趁機會落車影返幾張雪景相啦 ~~ 
下午1時20分終於到咗喀納斯的賈登裕轉乘中心喇 ~~
一般的遊人都會住喺賈登裕的賓館，然後在賈登裕轉乘中心坐區間巴士遊覽喀納斯的所有景點的………..
因為呢幾年喀納斯已經變得好似九寨溝一樣了， 景區內是不容許設立任何接待處或賓館喇， 不過如果係村民自己的訪客或朋友就例外， 就連私家車都唔准駛入景區內，如果係村民朋友的私家車要駛入景區的話, 咁就要識人先搞到許可証喇， 而且仲要打人情牌兼要付2500人仔先可以取得駛入景區的許可證， 所以如果係訪客要入村內就要村民自己的私家車直接由專乘中心的停車場接載啲訪客村內， 而訪客車就要停放在景區轉乘中心的停車場喇 ~~
不過因為我地呢兩天的行程都係在喀納斯的景區內，為咗方便早晚出入景區遊覽唔洗每早都要由賈登裕搭車入返景區的轉乘中心然後再轉車， 而且又可以節省時間， 所以文師傅就安排了我地住喺圖瓦新村佢朋友的家 (哈薩克人的民居)，不過我都見有內地遊客識得搵呢間民宿，所有房間都住滿了自由行的內地遊客 ~~
一到達哈薩克人的民居就見到木屋外有人正在劏羊而且仲非常熟練的將整塊羊皮割出來 ~~~ 
先入木屋內參觀一下呢兩晚將要住的房間先 ~~
其實間房都可以接受, 都算乾淨企理而且有暖風扇， 隔離間房間就民族色彩好豐富，影相就靚喇， 但住就唔會揀喇， 因為無床單只得厚厚的地毡一塊， 咁我估計張地毡唔會洗， 就算有洗都應該只係一年一次, 咁我點敢揀呢間房呀 !!!!
咁我又問洗手間係邊度啦，佢竟然指住距離間木屋和房間大約50米的茅廁喎!!! 唔係啩 ??? 
要我地同啲大陸遊客一齊共用呢間無頂又無門嘅經典恐怖茅廁??????????????? 心諗呢次大鑊喇!!!! 
我住喺呢度感覺自己好似野人一樣，兩日裡面連涼都冇得沖呀， 對於有少少潔癖的我地兩人黎講簡直係超難頂呀， 呢種感受都唔知點形容俾大家聽呀， 今晚仲係我咁大個女第一次落住雪咁喺荒山的冇頂冇門又冇燈的環境下去廁所， 真係漆黑一片連伸手都不見五指的， 個pat pat仲凍冰冰嘅添………. 
如果個電筒突然間唔小心跌咗落個大窿度， 都唔知點算呀….又或者係我唔小心跣腳跌咗落去， 我都唔敢再想像喇， 但係我都唔希望大家落去救我上黎呀， 因為我會臭到連我自己都會嫌棄自己囉!!!
(下圖前方左面的就係茅廁位置喇 )
放低行李之後就去視察一下周圍的環境先 ~~
因為村內根本唔會有任何餐廳嘅， 所以要等食過女主人整的午餐之後先出發， 咁食飽之後亦要等男主人車我地出返去景區， 然後我地就搭返景區內的區間巴士一站一站咁上車落車遊覽 ~~
呢碟就係剛剛劏好的新鮮羊肝喇 ~~
新疆人的奶茶其實係鹹的， 味道似中國茶加了牛奶再加鹽 ~~
午飯後就出發去遊覽喇，其實坐景區內的區間巴士亦會查票的， 所以入村之前一定要買入場票， 無得逃票除非你唔搭巴士靠徒步啦 ~~ 
因為今日到達喀納斯已經唔早喇， 所以今日打算遊覽的景點只係喀納斯湖 ~~
喀納斯湖是著名的淡水湖, 面積45.73平方公里，外形呈月牙狀，被推測為古冰川強烈運動阻塞山谷積水而成。喀納斯湖湖中傳說有「湖怪」出沒，據稱身長可達到10米，咁新疆喀納斯湖水怪究竟是何物?
諸多“湖怪“目擊者都大多認為看到的東西很可能就是大紅魚，水中的黑色影像正是魚的脊背， 亦有科學家推測為大型淡水食肉魚類哲羅鮭~~
黃昏時候天色開始越來越暗喇…..
回程經過條橋見到個伯伯坐住佢自己架馬車， 咁文師傅就問佢俾我地上車試坐一陣順風馬車， 嘻嘻…….!
呢張相片喺馬車上影嘅 ~~
慢慢行到去橋嗰邊我地就等民宿的男主人黎車我地返去食晚飯喇 ~~~
羊肉那仁飯 (其實裡面有手打粗麵、 羊肉、 洋葱和土豆、 伴羊肉清湯一齊食的)
DAY 6 (24Sep2012) —
一早7時30分鬧鐘叫醒了我， 起咗床之後就要開始擔心梳洗的問題， 唔好奢望可以沖涼洗頭呀，就連洗臉擦牙都成一大挑戰呀， 我同 “比叉燒” 全程同房， 呢一朝早我地就非常苦惱喇， 因為我地每間房只有一壺熱水和兩個面盆， 我地兩人洗臉擦牙梳洗都只係靠呢壺熱水架喇……. 好彩我行李裡面仲有一支我帶埋去的蒸餾水咋 ~~
早上8時20分見仲未有早餐食，咁我地就先出去木屋周圍的草原上影吓晨霧啦， 不過呢兩日我地已經減少影自己的照片喇， 只影風景為主， 因為勁樣衰囉 !!! 
早上要等食過女主人整的簡單早餐之後先出發， 女主人一般都係9點先整好早餐， 咁食飽之後好似昨天一樣亦要等男主人車我地出返去景區，然後我地就搭返景區內的區間巴士一站一站咁上車落車遊覽 ~~
白粥 、哈薩克不爾沙可 、 辣配菜
好多人認為喀納斯最美而且最有名的就是神仙灣、月亮灣、臥龍灣這三個灣, 係國家級 5A 級景區, 但我個人認為這三個地方的景色很普通, 如果係純粹係睇湖景的話相比於九寨溝的景色就差得多喇…….未去之前在好多blog友影的相片中見到喀納斯湖啲水又藍又綠的顏色相信係PS過的 ~~~
第一個灣係神仙灣， 不過如果要影得比較好的全景角度的話，大家就要好似我咁行上山上面影返落去喇， 不過都只係覺得麻麻地咋……!
第二個灣“月亮灣”明顯靚得多喇…..!
為什麼這裡叫月亮灣? 因為河流在此來個大彎， 河中的沙洲就似彎彎的新月， 所以稱為 “月亮灣”… 河內更有兩個小灘， 就像兩隻巨大的腳印 ~~
第三個停車的地方叫做 ” 臥龍灣” ， 四周森林茂密, 其實係湖中的一片小樹林，形成似臥龍的樣子， 但係我地覺得比較似袋鼠多啲囉 ~~
反而我覺得最美的一段風景是從臥龍灣行落去的一段棧道，寧靜的湖水像一面鏡子般，把靚靚的山景清晰地在水面反映了出來~~
中午12時20分已經遊覽完喀納斯的3個灣喇， 咁就搭返區間車去專乘中心食午飯 ~~
我地每人買了50蚊人仔的自助午餐卷， 以為真係好似九寨溝景區內的自助式自選午餐啦， 點知原來係搵笨的乞丐午餐， 係要自己排隊等佢裝俾你的兩餸飯， 其實一共有十幾個餸菜嘅， 但服務員係完全唔會俾你揀自己喜歡的餸菜嘅，佢夾乜你就要食乜的自助餐囉， 食完一轉想加其它小菜但見到條龍長到暈所以放棄了 ~~
飯後文師傅去了售票處打算買白哈巴的車票連景區入場票， 票務員話原來我無回鄉証而只持有外國護照係不能夠進入白哈巴村內的………咁後來文師傅就走咗去找朋友幫忙， 結果搵咗白哈巴鄉長的侄仔, 嗰個人亦係白哈巴村長的弟弟， 所以佢最後開村長的越野車接我地入村內 ~~
不過因為係全程行山路，嗰段一小時的車程拋到差啲連午飯都嘔晒出黎呀 !!! 
沿途的風景， 見到仲有啲殘雪， 咁我地又落車影返幾張相先 ~~~好靚呀 ~~~!
!
終於到咗中國西北第一村「白哈巴村」喇 ~~~
有佢帶住真係方便到連大家的回鄉卡或任何證件都無出示過就已經辦妥了邊防證喇， 不過記住過境的時候不准影相架 ~~~
望住呢個地方，位置非常的特別, 山的北面為俄羅斯，西面為哈薩克斯坦，東面為外蒙古，位置很獨特 ~~
我地一路欣賞吓風景又一路影吓相， 突然間發現有幾個持長槍的軍警在查遊客的證件， 文師傅就即時叫我走人， 免得惹來一身麻煩嘛…….
下午4時45分返到圖瓦人新村喇 ~~~
一返到木屋， 女主人就整咗壺奶茶俾大家飲吓休息吓喇 ~~~
呢位係屋主的小朋友同佢嘅同學仔， 真係好叻擺post俾我地影相架………
因為大家都覺得喀納斯湖並無想像中咁靚， 所以無興趣上觀魚亭睇喀納斯湖的全景， 而選擇了騎馬去”喊泉” ~~~
騎馬途中影的沿途風景 ~~~
呢個”喊泉”好得意架， 只要你向住個泉大叫的話， 啲泉水裡面的沙同泥即刻會起晒泡泡架…..! 
一來一回差不多兩小時之後我地就騎到返去木屋喇， 今晚的晚餐係由文師傅親手煮俾我地食嘅 “大盤雞” ~~
然後就休息準備明早離開喀納斯區往魔鬼城出發去 ~~~ 