關西賞櫻慶生6天遊「大阪、奈良篇 Part 1」

每年的三月下旬或四月上旬都是日本大阪一年一度欣賞櫻花的季節,甚至是全民性的賞花活動,日語叫“花見”﹙Hanami﹚。相信很多愛花之人都想在這段時間親身飛往日本賞櫻。可惜櫻花賞期很短,由花開到花落大概2個多星期,而盛放時間更加只有短短數天到一星期左右,所以如果時間掌握不準的話,很有可能去到日本只能看半開的櫻花,或者係已經落得所剩無幾的「禿櫻」了。我們1月中買機票、訂酒店、編排行程的時候,根本未能夠預測到櫻花到底會係邊幾日開始開花,所以只能一切隨緣吧,如果最後去到日本都係睇唔到櫻花既話,咁就當去日本慶祝生日啦!

櫻花在世界各地都有栽培,中國的長江流域、台灣、韓國還有朝鮮等地方都有種植,但以日本櫻花最為著名,共有200多個品種。因此,日本被譽為”櫻花之國”,櫻花也成為日本的國家與民族象徵。由於櫻花的生命周期很短 ,美麗而短暫,因此顯得格外珍貴。 不過今次皇天不負有心人,我終於非常幸運地碰啱櫻花盛開的時候,感覺非常的開心且感動! 如果唔係今年2月、3月的時候日本好多地方都依然落大雪而天氣遲咗回暖的話,可能我今次又無機會見到咁靚既櫻花景喇,雖然櫻花季節係日本嘅超級旅遊旺季,心儀的酒店房難求,而且酒店價格貴到喊,機票又比淡季貴好多,不過今次能夠見到咁靚既櫻花美景,乜嘢都值回票價啦!

yxh55

遊記開始之前先同大家分享一張今次旅程中拍到的櫻花相片 ~~

今次關西賞櫻慶生6天遊的行程如下:

Day 1 (4/4)星期五
– 乘搭國泰航空的CX566班機,凌晨1:45am起飛,6:00am到達大阪關西機場
– 大阪城公園
– 梅田(JR大阪站)
宿:雷母新大阪櫻花民宿

Day 2 (5/4)  星期六
– 奈良公園
– 世界遺產「東大寺」
– 奈良購物大街
– 回大阪
宿:雷母新大阪櫻花民宿

Day 3 (6/4)星期日
– 前往千年古都「京都」
– 和服體驗
– 清水寺
– 浪漫河景「白川」
– 花見小路
– 河原町
宿:京都河原町超級飯店

Day 4 (7/4)星期一
– 單車遊京都
– 嵐山公園
– 渡月橋
– 二條城
– 回大阪「心齋橋」
宿:大阪心齋橋方舟酒店

Day 5 (8/4)星期二
– 難波黑門市場
– 道頓堀蟹宴
– 心齋橋
宿:大阪心齋橋方舟酒店

Day 6 (9/4)星期三
– 前往關西機場
– 乘搭國泰航空的CX567班機,早上9:20am起飛,12:15pm回到香港

 

 

Day 1 (4Apr2014) —

今次選擇乘搭凌晨1點45分開出的國泰航班CX566前往大阪關西機場。Day 1一早6點正就已經抵達大阪喇,比預計降落時間仲早咗25分鐘添,咁早到達我地就有一整天的時間遊覽大阪啦,好嘢!

monkeys33

以下的日本地圖中可以清楚見到我們今次主要遊覽的3個地方, 大阪、奈良以及京都 ~~

取咗行李過咗關之後搭電梯上一層,一出機場大樓直行就已經係關西車站喇!

其實關西大阪的交通非常之發達,不過整個鐵路網絡感覺好複雜, 只係關於行程規劃與交通的問題都搞到我頭都大呀,要選擇買咩類型既車票比較合適都要做咗幾日功課才決定到,好暈呀!在出發之前計劃好行程之後,最後決定買JR west rail 4 days pass係最適合我們的行程和最抵的 ~~
http://www.osaka-info.jp/ch_t/access/

在關西機場的JR Ticket Office購買時,需指定日期並且限於指定日期內使用,多天數票券必須連續使用。使用時,以日期為單位,非24小時制。 JR West Pass 僅能乘坐JR列車,不能使用於各地鐵、私鐵、路面電車、登山車、纜車等。 特急列車,也僅能乘坐Haruka,其他如雷鳥號、白兔號,也都唔能夠使用(自由席都唔可以)。每次入閘出閘都要行有職員查票的通道,出入閘時只要拎個pass出來俾個JR職員望一望就可以架啦!  列車種亦可憑此無限次搭乘上述區域内的「新快速、快速以及普通列車的自由席」。 切記不能用来搭乘新幹線!另外如果要乘坐特急、急行列車時,必須另外補差額購買特急券及急行券。係唔係好複雜呢?

yxh70

我們今次買的JR west rail pass (Kansai Area Pass) 4 days , 6170 yen ~~

買咗JR west rail 4 days pass之後我們坐上了7點07分的Haruka班車直接去到新大阪站(Shin Osaka Station),因為我地頭2晚住的Remm Shin Osaka Hotel就位於新大阪站的上蓋,非常方便!

Haruka列車準時於7時07分開車喇!我們的關西大阪之旅正式開始喇,go go go…..! yxh50

在新大阪站落咗車出咗閘之後,轉來轉去又問路人但搵咗好耐都搵唔到個酒店入口,因為個新大阪站實在太大喇!

原來這間Remm Shin Osaka Hotel的位置是在JR新大阪駅的另外一邊,由”東口”出閘之後,轉右往”西口”一路直行,直至經過咗新幹線的入口之後再轉右向”北口”的方向走,酒店的入口就在麥當勞的對面,酒店大堂位於12樓 ~~

$980港幣一晚的雙人房,無早餐。房間空間好細,連行李箱都無地方放,不過麻雀雖小,但五臟俱全,而且裝修新穎,乾淨企理 ~~

今次同行的仲有我蝦子餅、佢細佬和弟婦,一共4人。 由於我們一早8點幾就到達酒店,所以酒店未有房俾我們check-in,所以我們將行李寄存在酒店,然後先出發去食早餐 ~~

新大阪站內其實都有好多餐廳,小食店和便利店,真係好方便。而且從這裡去我們Day 1和Day 2要去的大阪城公園、梅田、奈良都好容易,在新大阪站搭JR就好快去到 ~~

因為大多數餐廳都開早上10點的,8點幾咁早係冇乜餐廳可以選擇的,所以我們就隨便搵咗一間食蕎麥麵嘅餐廳 ~~

坐低之後先發覺原來早餐餐牌係冇蕎麥面嘅,只有以下這幾款,咁唯有都照食啦!

最好食都係隻溫泉蛋,嘻嘻!

 酒店話要兩點後先至可以取房,所以見仲有咁多時間我們就先出發去第一個景點「大阪城公園」~~ yxh12

我們搭JR去到大阪城公園車站,落車之後徒步約15分鐘左右就來到大阪城公園喇!

我們第一站黎到大阪城公園呢個賞櫻景點,到處都係淡粉紅色染井吉野櫻為主的櫻花樹,好靚呀!

大阪城公園開設於1931年,總面積達106.7公頃,十分廣闊。 園內種植了好多樹木,以染井吉野櫻為主,有約600株櫻花樹的西之丸庭園,約95個品種、1250株梅花的梅林,還有北部的桃園,紅葉綺麗的追憶林等。 公園位於大阪的中央,園內除了有大阪城天守閣等歷史性建築之外,還可以觀賞到四季不同的花卉 ~~

雄偉的護城河,大量巨石堆砌的石垣是德川大坂城固若金湯的象徵。護城河寬達70-90米,其兩側聳立的石垣,高於20米的地方隨處可見 ~~

用花崗岩砌成的石垣總長達12公里,所用的石頭達到50萬-100萬塊 ~~

大阪城外護城河的櫻花牆 ~~

根據日本的歷史和傳统,家家戶戶最喜歡趁着這個春暖花開的好時節,攜家帶眷、呼朋引伴聚於櫻花樹下賞櫻 ,所以我們經過的時候見到很多日本人在櫻花樹下談天和野餐, 非常之寫意 ~~

難得櫻花開得咁燦爛,多影幾張close up櫻花相先!yxh75

就連草地上都鋪滿了粉紅色的櫻花花瓣 ~~

大阪城是大阪最著名的旅遊觀光景點,也是大阪的象徵,它包括十三處被日本政府立為重要文化遺產的建築。 大阪城內城中央聳立著大阪城的主體建築天守閣,巍峨宏偉,鑲銅鍍金,十分壯觀  ~~

大阪城天守閣Osakajo Tenshukaku

今日天氣好奇怪,時晴時陰 ~~

參觀天守閣需購買門票,費用為每人600円,不過我地並無買票入內參觀,因為我這個白痴連中國歷史都搞唔掂,所以對日本歷史更加無乜興趣,此行純粹係觀光同賞花為主咋 ~~ yxh49

盛開的染井吉野櫻……..數量多到感覺超夢幻呀 ! yxh06

另一種品種 「紅枝垂櫻」~~

凡是有遊客的地方,又點會少得賣小食既攤檔呢 ~~

800yen一串既牛肉串燒,佢地話食落去就好似香口膠一樣,而那魷魚串燒又冇乜味,中伏添,哈哈!yxh28

最正常既反而係呢一個150yen既叮噹紅豆餅 ~~

然後繼續往桃園同梅林既方向行去 ~~

大阪城公園真係好靚,不失為一個休憩賞花既好地方 ~~

離開大阪城公園之後行番過去JR森之宮車站搭去大阪站 ~~

於梅田的JR大阪站下車後,我們一路由相連的天橋步行至阪急梅田站,這一帶係大阪多家大型百貨店的集散地,如阪急百貨、大丸百貨、阪神百貨店、大阪三越伊勢丹等……..

隨隨便便一家百貨公司都可以令好多購物狂花去大半天的時間來逛,而且如果真係認真逛的話,可能會銀包大出血添,好彩我們4個都唔係天生購物狂,主要都係行下超級市場或者係美食部買些輻射食物同零食返香港咋,哈哈!

日本的食物最吸引人既係美輪美奐既包裝呀,就算唔買睇下都一樣咁吸引 ~~

我蝦子餅買了呢個蛋糕同埋麵包返酒店試下~~

下午兩點半返到酒店check-in了之後,我們去了一間「龜王拉麵」食午餐,既然大家都未食過咁就一於點招牌叉燒拉麵就一定冇死錯人啦,再加一碟煎餃子,果然好好味!

食完返房休息了一陣,跟住我們晚上又再搭JR出去大阪站行街,順便食晚飯 ~~

大阪JR車站新大樓,新穎、購物、交通集合一身,成了大阪的新注目焦點,今晚的晚餐一於喺GRAND FRONT OSAKA搞掂啦!yxh86

GRAND FRONT OSAKA的美食主要集中在UMEKITA DINING (南館 7F~9F),不論是西式、日式、中式、韓式等世界各國的美食主要都集中在此。值得一提的是,7樓有一條大阪各著名店家所串連起來的美食街,集合了各式庶民料理如黑輪、大阪燒、烏龍麵等等 ~~

我地行咗好耐都唔知道揀邊間,行咗一圈再去埋8樓和9樓先最後決定要試呢間大阪燒 ~~

圖中的海鮮炒麵、炒烏冬、泡菜炒飯、海鮮炒雜菜我都覺得好好味,唯獨是佢既主打菜「大阪燒」我覺得味道怪怪地,唔係太合我口味 ~~

今早搭凌晨機真係冇乜點訓過覺,一早6點鐘抵達大阪就開始玩到夜晚,一食飽就飯氣攻心眼訓到暈,所以就早些返酒店休息喇!yxh92

Day 2 (5Apr2014) —

今日全日既行程係奈良,不過因為已經知道大多數食肆無咁早開門,所以就安排了早上10點先出發去食早餐 ~~

然後搭11點28分開出的JR班車出發去奈良,車程才52分鐘 就到達奈良車站了~~

因為只有大半日的時間遊覽,而奈良佔地甚廣,範圍包括春日山原始林、東大寺、興福寺和春日大社等奈良名勝,所以只係精選了幾個我們有興趣的主要景點,包括奈良公園、東大寺、興福寺以及奈良町 ~~

抵達奈良車站後我們到遊客中心索取地圖 ~~

奈良公園除了四季自然風情與歷史文物聞名外,另一個讓人印象深刻的莫過於這些自由走動的鹿,傳說奈良春日大社的神明就是騎著一頭白鹿來到奈良,因此鹿被視為是神的使者,在奈良自古以來就對鹿非常保護 ~~

啲小鹿同遊人一起過馬路,超有趣呀!

我們來到以鹿聞名的奈良公園當然係要跟小鹿合照一番啦,哈哈!

喺奈良公園內啲小鹿永遠都係鏡頭既焦點 ~~

公園裡這約1200頭左右的梅花鹿更是深受遊客喜愛,你地睇下啲買咗「鹿仙貝」既遊客幾受小鹿群的歡迎 ~~

有不少遊人會買鹿仙貝餵佢地,所以好多鹿都肥嘟嘟 ~~

不過我們這次關西之行的主題係櫻花,所以喺公園見到呢幾棵滿開的櫻花樹,點可以唔同櫻花樹合照一下留念架?下次唔知幾時先可以再咁幸運遇正櫻花滿開架嘛 ~~

行去東大寺既途中,見到有個大嬸在路邊賣烤番薯 ~~

我買了一隻重500g的烤日本番薯,1000yen雖然唔算平,但味道同香港的品種不太一樣,非常香同好甜 ~~

仲有唔同口味的燒米餅,我一樣咁鍾意食 ~~

奈良市內有不少這種另類交通工具「人力車」~~

奈良除了有可愛的小鹿之外還有被列入《世界遺産名錄》的東大寺 ~~

穿過最外面的南大門後這碩大的建築都只係東大寺的中門吧了,再要穿過這中門先會見到宏偉的東大寺 ~~

以下這東大寺是西元728年遵照重視佛教的聖武天皇聖旨建造的。東大寺正面寬度57米、深50米,是世界最大的木造建築。 而東大寺大佛殿內,放置著高15M的佛像,不過大家都話無太大興趣購票入去,所以只在外面影咗一張到此一遊相片就走咗喇 ~~

一般說到日本古都就會連想到京都,而事實上奈良比京都更早成為日本的首都 (在西元710年) ~~

興福寺最著名的就是這高聳的五重塔了,五重塔也是奈良的象徵 ~~

我們龜速的慢遊,所以這次並沒有將整個奈良逛完,今天最後的行程我們去到奈良町 ~~

具有奈良代表性的鹿仔燈箱 ~~

大家估下佢地望緊乜 ?

就係呢間親愛幼稚園…….

其實係呢間親愛幼稚園…………嘅靚女教師就真 !! yxh78

最後在奈良町用呢餐美味的日式咖喱飯和甜品去結束我們今日在奈良一天的遊覽 ~~

 

關西賞櫻慶生6天遊「京都、心齋橋篇 Part 2」

 

 

 

 

 

 

 

 

 

20 thoughts on “關西賞櫻慶生6天遊「大阪、奈良篇 Part 1」

  1. 嘩…櫻花原來係咁靚架 😀
    諗起當年去武漢睇櫻花>.<
    梅田個間超級市場我都有行過,似五星級酒店多過似超級市場,好豪華~
    櫻花好多地方都有,不過我最愛就係日本既淺色櫻花
    可以係櫻花盛開季節欣賞櫻花真係好難得
    再加上日本咩都咁靚,呢個trip一定好開心~

    • 櫻花真係好靚架,望住D櫻花令到我人同心都醉了,好開心!
      日本好多超級市場都好豪華,啲嘢食嘅賣相又靚到暈,我每次去日本必定要行超級市場或者美食廣場,反而其他購物廣場唔行都無所謂~
      你上次去武漢睇唔到櫻花唔緊要,下次一於去櫻花國再睇過啦!:-D

  2. 櫻花最正係盛開時數量多到真係好震撼既個種感覺. 但開花期短真是個问题. ticket & hotel 都貴, 好矛盾呀!
    日本食品的味道有時真係so &so,但勝在賣相靚, 就好像你映D 相咁, 見到會流口水. 奈良未去過, 但小鹿同遊人一起過馬路又真係幾有趣呀! 等著看你的part-2!

    • Part 2已經在製作中了,多謝你的支持先!
      旺季去日本係一定貴好多架喇,但為咗要睇到咁靚、咁震撼而且又畢生難忘既櫻花美景,洗多少少錢我覺得係值得既~

  3. 睇完, 令我諗起當年同大人HONEY MOON時到大阪, 奈良, 京都自由行.
    當時, 我們住SEMI-DOUBLE, 間房應該比你們果間還細.
    我們有入天守閣, 係裡面行左個幾鐘, 東大寺好似都有入到去。

    • 哦!唔講唔知,原來馮兄同Dor Dor係喺大阪渡蜜月既,好正喎!
      可能因為我們對日本的歷史和古蹟冇乜認識,所以冇興趣上去睇囉,都係嗰句,全為了櫻花而去的,嘻嘻!

      • 個人喜好, 無問題!
        我地HONEY MOON 係半自由行, 先跟團去北海道, 之後自由行東京, 大阪, 奈良, 京都. 所以之後唔駛再去日本, 哈哈!!!

        • 嘩,好正喎,一次過玩晒咁多個地方,一定係一個開心又難忘既honeymoon啦!
          下次可以去埋九州,都係一個好值得去既地方,我打算明年5月中帶媽咪去賞鬱金香~

  4. 終於睇完喱姐既大阪油雞!! 非常精彩!!
    櫻花好靚! 奈良小鹿周街行好搞笑喎…仲有我見到其中一張相係Rilakkuma蛋糕!! 超得意呀!! XD
    講返正題, 日本既風景俾人一種好優雅既感覺, 特別有櫻花襯托就更靚! 你既相片完全表達到個種美!! 要俾100個Like!!
    不過要夾到花期去真係好高難度…唉…真係要慢慢研究下…><

  5. 對於自己沒有去過的地方,看咖喱批姐姐的遊記就是一件賞心悅目的事,無論文字及相片都好吸引,看完就感覺像自己去過一樣,但又失去了一個地方的神秘感。

    雖然日本不是我想去的地方,但是看了咖喱批姐姐的油雞,就會突然對一個地方感興趣,莫非這就是咖喱批姐姐的魔力??

Leave a Reply

Your email address will not be published. Required fields are marked *