關西賞櫻慶生6天遊「京都、心齋橋篇 Part 2」 |

Day 3 (6Apr2014) —

今早我們一早8時30分退了房，然後從新大阪站直接搭JR京都線去京都~~

這個Rilakkuma鬆弛熊毛公仔係我去年到大阪出差時買的，今次帶埋佢一齊返佢家鄉嘛，你睇下佢幾開心幾興奮!!

班車開8時45分，好快地在9時20分就到達京都車站了 ~~

京都在794年到1868年是日本的首都，亦係天皇的居住地。現在，京都是全日本第7大城市，人口140萬，面貌嶄新現代。幾世紀以來，京都曾經多次被戰爭和大火摧毀，但在第二次世界大戰期間，京都因其歷史價值，而被排除在空襲目標以外。今日的京都留存了無數的寺院、神社和其他充滿歷史價值的建築物。我們一走出京都車站，微微的抬起頭，就可以望到京都市的地標，京都塔(Kyoto Tower)，這座京都塔屹立在JR京都車站的正對面，塔高131米，係京都的一個象徵。有好多遊客會專程走上去京都塔100米高處的展望室參觀，可遠眺大阪和奈良的風景 ~~

在京都遊覽，可以選擇買當天的地鐵通票或巴士通票，基本上都可以涵蓋京都所有的景點了。不過我覺得在京都搭巴士比較方便，而且又可以睇到京都的街景嘛 ……所以一於在京都車站的綜合觀光案內所買了一張京都市巴士一日券，500yen一張，非常划算。因為在京都搭巴士大多數單程票已經是220yen 一張，所以如果一天內只要坐三次就回本啦 ~~

第一次使用這張巴士票，在下車時將卡插入司機身旁的讀卡機中，第二次再使用卡搭巴士時只需下車時把卡片背面出示給司機查看即可~~

我們在四條河源町站下了車，因為今晚要入住的京都四條河原町超級酒店 (Super Hotel Kyoto Shijo Kawaramachi)就位於這一區 ~~

京都的公車站牌上都有公車的終點指示與所有停靠站的列表，大多是漢字，對於唔識日文的遊客就比較方便一啲 ~~

河原町一帶是指河原町大街與四條大街相交叉的十字路口一帶的中心地帶，四條大街亦係京都的主要購物區，著名的阪急百貨店、高島屋百貨店、OIOI等各大百貨商店、代表流行時尚的河原町OPA等各種時裝店、珠寶首飾店、工藝美術禮品店、銀行、酒店、電影院、咖啡店等均集中在此 ~~

面朝高島屋百貨的方向往前走，直到看見OPA 百貨公司，它門前有一個賣花的攤位，旁邊有一小巷，源著小巷直行到尾，酒店就位於在前方右邊 ~~

將我們的行李寄存在酒店之後，我們就出發去食早餐。在公車站附近求其揀了一家餐廳仔食咗碗湯烏冬 ~~

今日係咖喱妹我的舊曆生日，而今個旅程的Day 6( 4月9日)就是我的新曆生日了，所以今次可以在關西過2次生日，真係超正呀！

就因為這個特別的日子所以我安排了今日去做一項比較特別而我又未試過的事情，就係”和服體驗”了，很期待啊！

在巴士站搭100號在五条坂下車，落咗車之後照著官網列印地圖行，大約10分鐘就到了！建議預約時間在上午10點左右，可以避開人潮，可惜因為旺季我只能預約到中午12點的時間，就是可能因為是旺季的關係，我們11時40分到達「岡本觀光用和服店」的時候店裡面已經有超多客人了，而且很多漂亮鮮豔的和服顏色一早已經被其它人揀晒喇，所以我們唯有揀最貴的豪華全套5250yen，就係款式比較多可以俾我選擇 ~~

其實京都有好多影樓店鋪都有和服出租俾遊客著，甚至扮舞妓、藝妓等影相留念又或外出自由散步。費用約 5000yen 至 10000yen 以上。在染匠與岡本兩間名店猶豫咗好耐，但普遍網友說，染匠布料較好，岡本係款式較年輕多樣，不過我只穿一天，布料好壞我不是很介意，款式多反而比較吸引我，以下係岡本的網址 ~~

http://okamoto-kimono.com/tw/index.html

直接上官網填寫預約單→收到確認信→打印出來，不需要事先付任何費用，係去到穿好和服才付款的 ~~

挑選和服顏色、腰帶、配件、提包、頭飾就會花去不少時間，如果要排隊等梳頭則更久。幸好我已經事前在網路搵咗啲喜歡的和服款式，然後請店內的婆婆幫我搵相同的款式，所以就比較快。選定了之後婆婆就帶我們上房間去換和服。首先要脫光到剩下內衣，然後就一層層的穿上打底的白袍，還用上多條毛巾把身體填平到有胸變無胸，有腰變無腰的長方形人，穿了很多層到最後就綁上腰帶。

１，２，３，深呼吸，然後婆婆就把腰部緊緊的勒上腰帶到幾乎要斷氣的程度才收貨，仲要在後腰上加一塊好似係膠板的物體，其實係幫助我們時刻可以保持腰骨挺直，同埋顯得體態靚啲咋 ~~

最後在背後再結上一個可愛的大蝴蝶結 ~~

我覺得穿了和服一定要梳頭先襯得好睇啲，所以加多500 yen請專人幫我梳頭，有三款造型可以選擇喔，連髮飾都可以自己揀㗎！

一小時的裝身，終於搞掂，一轉眼就變成了一個「和服中女」了，哈哈！

出發前在岡本門口先影返一張先！

我們先出發到清水寺，展開今天和服中女漫步京都的第一站，呵呵呵…..!!　

好喜歡我背後的桃紅大蝴蝶呀 ~~

今次好榮幸有蝦子餅的弟婦Shadow陪我一齊癲一齊穿和服遊京都～～

只係幾分鐘的路程就到達清水寺喇 ~~

古老的清水寺，是京都的象徵 ~~

清水寺(Kiyomizu Temple)是日本最有名的寺院之一，亦是京都最古老的寺院之一。始建於780年，屬於日本最古老的佛教宗派法相宗。1994年，清水寺被列入世界文化遺產 ~~

穿上和服在古僕的清水寺漫步，而這一身的裝束配搭實在係天衣無縫呀，和式的打扮亦吸引咗好多外國遊客爭相與我這個”偽日本妹”影相，嘻嘻！所以如果你問我花了5750 yen貴不貴，我會答你一啲都唔貴，畢竟美好的回憶係無價的~~　

等我又偷影一下其它身穿和服的女仔先~~　

今日間中有陽光，趁著有藍天的時間我快啲影多幾張我非常喜歡的靚靚櫻花先 ~~

仲有一啲外型非常特別的櫻花品種「紅枝垂櫻」, 好sharp的深粉紅色和桃紅色，好靚呀 !!

難得第一次的和服體驗喎，而且今日我又係壽星女添，咁當然要多影幾張照片留念啦～～

清水寺這裡可說是初次到京都的人必訪的景點，因為佢除咗係世界文化遺產之外，清水舞台獨特的建築、祈福飲用的音羽名泉等等都一樣深受大家的喜愛 ~~

清水寺的門票係300 yen一人，其實如果要進入主殿才需要買門票，不過進入主殿時係無需撕票根或是蓋章的，所以如果你早上買咗票之後，票還可以留待下午或晚上再使用～～

清水寺的主殿由數百根圓木支撑，建于山坡之上，從奧之院舞台回拍清水舞台是清水寺最經典的角度。但可惜清水寺的修建工程正在進行中，工程由2008年開始至2019年，而奧之院今年正在整修，所以我們沒有走過去，確實有點可惜！！

不過暫時工程不會對遊客構成不便，當最後階段維修清水寺時可能會實施人流管制。以下是2張在網上找到的春天與深秋經典清水舞台照片~~

深秋的紅葉配襯起清水舞台簡直是一絕啊！！

清水寺這一帶的清水坂、二年坂、三年坂的許多特色商店都非常好逛、好買，也因此清水寺才能成為京都最熱門與超人氣的景點，你睇下旺季啲人多到幾誇張!!!

這一帶賣京都特色的手信店舖到處都係 ~~

仲有一家陶藝體驗的工房 ~~

行咗咁耐又夠鐘覓食喇….!

竟然搵到間好味到暈的烏賊和墨魚丸，堅好味呀~~

仲有牛肉包子 ~~

然後先係我們的正餐”意粉” ~~

仲有必試的京都甜品，雖然天氣都算幾涼，10-13度左右，但來到京都，又點可以唔試下抹茶芭菲呢? 我叫嘅抹茶芭菲 + 抹茶雪糕茶香極重，但不甜膩，好好味！

食完晏之後下一站我們來到祇園白川。祇園白川是指祗園旁的白川南通、東大路至鴨川大橋間四通的祇園 ~~

祇園，是京都過去最主要的花街，也就是藝妓、舞妓們出沒的風月場所，位於祇園附近的白川更是春日的賞櫻景點 ~~

遇見一對日本新人正在取景影相 ~~

我認為白川是我今次京都之行最美的地方，保存著許多江戶時代末期的町家茶屋建築，這種京都傳統住宅，多半為木造兩層樓式，格局細緻外觀風雅，加上櫻花的襯托之下真是太美麗了~~

不過加咗我會唔會大殺風景呢 ??　

祇園白川是京都最古色古香的石疊街道之一，街上的店舖多為江戶時代末期的建築，風雅怡人，加上這裏經常會見到藝妓的足跡，更令街上增添了不少古風。不過可能我們到白川的時間尚早，所以一個藝妓都沒有遇上。而白川通的步道兩側種植著成排的櫻花樹，每逢花開時節，都可看見櫻花與夾雜其中的柳樹，構成一幅春意爛漫的美麗景色，真係好鍾意白川呀 ~~

當地人連狗仔都帶埋去一齊散步 ~~

好得意呀！！

盛開的櫻花垂向白川，櫻花、流水、竹簾與町屋，再加上藍天白雲，交織成一幅美麗的京都風情畫 ~~　

見到這景色，我禁不住嘩了一聲，真係太迷人喇！

所以當時我好急步地走到這橋上舉起相機影相，就在這時候，突然間有一大班的法國遊客和幾個架起了三腳架的遊客從我身後紛紛叫我唔好走開，要我繼續站在橋上充當他們的模特兒喎．．．．可能係因為我這一身的和服打扮同嗰景係個好合適的搭配吧，呵呵！

祇園作為藝妓花街文化的發源地，從四條通至建仁寺這段區間的「花見小路通」更是其中的代表 ~~

在花街全盛時期光是茶屋就高達700間，舞妓、藝妓的人數將近三千人，時至今日雖已盛況不再，但此地仍然是京都最熱鬧的區域之一，亦只有這裡才有機會碰上藝妓的身影，可能又係因為我們到花見小路的時間尚早，所以都係一個藝妓都無遇上，唉．．．！！

不過傍晚的人潮都唔少，可能都係來食飯同睇藝妓表演的吧 ~~

祇園包含了八阪神社、花見小路、新橋白川，一直到鴨川這一塊區域。這裡仍保留了許多日本過去的茶屋 ( 藝妓招待客人的地方) 、置屋 ( 藝妓休息居住的地方) ，在祇園的町造町家路上悠閒的散步，很能感受到京都古色古香的風味 ~~

傍晚天空逐漸由藍轉暗，這時的櫻花在藍色天空與燈光照映下，相當美麗~~

離開時我們從四條通東端大街向八坂神社的方向走，八坂神社又稱為祇園神社，其祇園祭相當出名，是日本最大的祭典之一。這是八坂神社的西樓門，在陽光照耀下的朱紅西門樓很美 ~~

原本打算夜晚再回去清水寺欣賞夜櫻架，晚間看燈光下的櫻花，也别有風情，可惜入夜氣溫比較凍而且佢地又著唔夠衫，所以就打消咗影夜櫻的念頭喇！其實喺網上睇過資料與照片，清水寺的夜景比白天看起來更炫麗，因為啲燈光照射喺啲櫻花和古建築上係好靚架～～

穿上和服大半天的Shadow她感覺比較辛苦，因為和服裡面有一層層衣物，綁得她非常之緊，也不能大步行，所以逛完今日的3個景點之後我們就決定提早回岡本換衫了。還完和服之後我們就搭巴士返去河原町大街食晚飯，揀咗間食迴轉壽司的餐廳，平靚正!!

我們一共食咗44碟賣單都係8600yen, 好抵呀 !!

食飽就行返去京都四條河原町超級酒店取房。酒店房間較小，而且浴室更細得可憐。不過地點好方便，走到四條通上更是商店和餐廳林立，不怕無得逛。

旺季一晚的房間價格是港幣1270，我看過淡季的價格才不過是港幣650左右，真係貴咗成一倍呀 ~~

Day 4 (7Apr2014) —

京都值得一遊的景點其實都好多，逗留兩日一夜根本無可能遊覽到所有景點，就算可以都只係走馬看花，無咩意思吖！　所以我們都只係精選了幾個自己最想去的，昨天去過了清水寺、白川和花見小路，咁今日打算遊覽嵐山公園一帶。其實遊覽嵯峨嵐山，可以從京都站搭乘JR嵯峨野線在「嵯峨嵐山」下車徒步即可到達，不過我們選擇了另外一種方法，就係踩單車遊嵐山。因為今晚都要踩返去京都火車站還單車，而且又要搭火車返大阪，所以我們決定早上9時30分退咗房先，然後從C巴士站搭205巴士前往京都火車站，再將所有行李存放在火車站的locker中 ~~

這是一部硬幣找換機，方便一啲要用locker而又無咁多硬幣的遊客們，而大體積的locker個價錢係比細的貴一倍，1000yen一個 ~~

到咗京都火車站之後先到站前的Porta 地下商場行一陣，因為要等Porta Dining美食坊11點開門我們先可以去食早餐嘛 ~~

Porta Dining美食坊真係有好多餐廳選擇，非常方便，但如果可以早啲10點開門就perfect喇 ~~

睇完呢位讚岐手打烏冬師傅的表現之後大家一致都話要試下有幾好味喎 ~~

咁就一於入去試下地道的讚岐烏冬啦，果然係非常好味，口感好煙韌兼彈牙 !!

套餐的另外一碗滑蛋豬扒飯都好好食 ~~

食飽飽之後就出發去單車店喇…….!!

我一個月前已經上網預先在Kyoto Cycling Tour Project (KCTP)訂了4架單車，1300yen一架。

http://www.kctp.net/taiwan/index.html

KCTP位於京都車站北邊中心出口處步行5分鐘的位置，出了京都車站之後左轉，在伊勢丹百貨與郵局建築之間的馬路上直走，然後經過Bic Camera之後你會看到APA Hotel在你右邊，然後再繼續往前走到路的盡頭，你就會見到這個停車場的牌 ~~

然後再右轉就係KCTP了~~

值得一提嘅係KCTP的京都區單車地圖，100yen一張，非常有參考價值，建議出發前一定要買一張 ~~

嗱…!! 熊熊你乖乖坐穩喇……..我們要出發喇 !!!

今日我們的目的地係嵐山公園「渡月橋」。我們12時15分由京都站開始出發 ~~

沿著堀川通（Horikawa-dori）北上，途經”西本願寺” ~~

在京都真係有不少人係以單車代步的，因此交通配套做得很好，即使是遊客如我們都能騎得安心。而京都基本上全個城市都適合騎單車，那裡所有的人包括老中青，大人小孩，男男女女，上班的出街的，什麼人都會以單車代步的 ~~

然後一路直踩到去四條通的十字路口 ~~

再左轉入四條通（Shijo-dori） ~~

四條通係一條好長又直的大路，一直去到松尾橋（Matsuo-bashi） ~~

見到有好多當地人一家大小前來野外燒烤，好正呀 !!

樹上嗰2個小朋友的媽媽好好人咁幫我們影咗一張今個trip唯一的4人合照 ~~

沿著條桂川河（Katsuragawa River）一路往嵐山公園的方向繼續踩去 ~~

路過忽然間見到一段很迷人的櫻花馬路 ~~

所以我們就停下單車，然後幫熊熊影咗一輯櫻花寫真，哈哈…!!

然後又繼續前進 ~~

又忽然間見到一個很美麗的畫面，2個身穿和服的日本妹的背影同個景好襯呀，影完個背影之後當然要追上去影返一張正面啦…..

我只係一句“kawaii-neh”，意思係好可愛呀，佢地就笑得好開心喇，唔怪之得啲男人成日話啲女仔好易氹喇 !!

櫻花季節時京都市民都喜歡帶著野餐墊來此席地野餐與賞櫻，我覺得咁樣好浪漫呢!!

亦有人在樹下寫生 ~~

他畫的就是眼前這嵐山美景喇 ~~

下午2時15分我們終於到了目的地嵐山喇 ~~

嵐山一帶的櫻花大約有500多株，每年春天開花之際，就可見到一簇簇的櫻花有如吹雪一般，淡淡地點綴在遠處的山頭和峽谷。多層次的色彩，讓嵐山不只有翠綠的顏色，更充滿了豐富的立體感，嵐山就好似一幅畫般……..如果是賞楓季來，我諗又係別具一番風味 ~~

「渡月橋」是京都嵐山腳下緩緩流淌的大堰川上橫跨的一座橋，據說是因形澌彎彎的月亮跨在河水上一樣而得此名。渡月橋的橋墩用鋼筋建造，而橋面則為木造，古色古香。而渡月橋幾乎可說是嵐山的地標，目前的風貌是1934年以鋼鐵重建的，構造與舊橋相同 ~~

每年到了四月份，京都嵐山便會湧入來自各地的賞櫻人潮，在中之島公園這兒，種了許多不同種類的櫻花，有山櫻、染井吉野等品種~~

仲有春期限定的櫻花味軟雪糕 ~~

好香櫻花味的軟雪糕我都係第一次食，味道好特別，不錯 !!

嵐山區一樣有好多身穿和服的遊人 ~~

我們逗留咗差不多一小時就開始起程踩返去京都火車站了 ~~

我們經過的時候一樣見到很多日本人在櫻花樹下談天和野餐，真係非常之寫意，太羨慕喇 !!!

有啲仲係一班男人在櫻花樹下坐埋一齊燒嘢食 ~~

不得不佩服佢地齊全兼專業的野外燒烤設備，有自備的枱、燒烤爐、大雪桶等 …….

仲要出動埋私家的Asahi 啤酒機，好勁喎 !!

我們繼續都係沿著條桂川河 (Katsuragawa River) 踩返去 ~~

經過嵐山東公園 ~~

沿路上都見到少許油菜花 ~~

仲有我在大阪市比較少見到的住宅區 ~~

中途在四條通搵到一間拉麵店，咁我們就一於停車然後入去食午餐啦 ~~

湯底非常濃同鹹的拉麵和日式煎餃子，都算可以啦 ~~

然後再經過UNIQLO時大家都話有興趣，所以入去行咗個圈，可惜完全無收獲 ~~

傍晚5時05分終於踩到返去崛川通的十字路口，見仲有少少時間先夠鐘還單車，所以就轉咗左線往二條城(Nijojo Castle)的方向踩過去。

二條城是一座位於京都市中京區二條城町的城堡，建設於江戶時代初期（1603年）。曾經是日本德川王朝（江戶幕府）第一任君王（征夷大將軍），德川家康的寓所，1994年被聯合國教育科學文化組織列入世界遺產名錄之中 ~~

6點鐘還咗單車之後，我們就行返去京都火東站。一到達火車站又再次望到這座京都塔，入夜後的顏色燈光照明使京都塔顯得更加的醒目 ~~

火車站有間伊勢丹百貨，我們趁上火車返大阪之前就入去逛一逛 ~~

依然都係超市美食嗰層最吸引我們 ~~

原本想買啲水果返酒店食，不過望吓嗰價錢，唔係卦 !! 10800yen 一個蜜瓜 ??

2個芒果售價係16000 yen?? 我有冇眼花呀 ?? 我自問唔係一個孤寒嘅人，但都無可能買得落手囉 !!

結果我呢個cheap精只係買咗盒399 yen嘅草莓咋 ~~

亦都買咗支sake帶返香港送朋友 ~~

然後就搭JR返大阪，出咗大阪站之後再轉搭地鐵去「長堀橋」地鐵站。因為我們這2晚住的是大阪心齋橋方舟酒店 (Ark Hotel Osaka Shinsaibashi) ，酒店就正位於「長堀橋」地鐵站4號出口處的左手邊，非常容易搵 ~~

標雙房港幣740一晚，酒店鄰近心齋橋和難波等繁華區，附近有supermarket，購物和食飯都十分方便。房間乾淨，不過裝修格局略舊，但可以接受，基本用品齊全，一樣有免費wifi，如不怕麻煩轉地鐵線的話，這酒店確是個不錯的選擇。其實我原本無打算住這間的，可惜因為超級旺貴嘅關係所以心儀酒店一房難求囉，而且這間的價格比較平嘛 !!

安頓好啲行李之後，跟住我們就出發去食晚飯。其實這一區屬於北梅田南難波，這是大阪南北兩個交通中心，商圈也聚集在這裡，梅田的百貨公司都很早關門，大概八九點就關了，所以九點以後到梅田，非常死寂。不過難波的道頓堀晚上依然非常熱鬧，人潮也最多 ~~~

這條就係道頓堀運河(道頓堀川)喇 ~~

道頓堀商圈是沿著道頓堀川南岸的一大繁華街區。日本人常說“吃在大阪”，可見這裏的飲食店之多，還有成片的娛樂設施，是最受大阪市民和遊客歡迎的地方 ~~

一走進大阪市的道頓堀，抬頭一望就可以見到一隻栩栩如生巨大的螃蟹招牌，還用燈光打的十分明亮。這隻大螃蟹就是著名的螃蟹料理專門店蟹道樂「かに道楽」的招牌，幾乎已經成為道頓堀的地標了 ~~

原來單單的這一條街上就有三家店，分別係「蟹道樂本店」，「道頓堀中店」和「道頓堀東店」。第一間就是它的始創店了，其他的是分店。在關西地區共有28間店，關東地區都有13間。它以新鮮的螃蟹料理聞名，有一些基本的菜式一年四季都有的，亦都有隨著季節推出不同的螃蟹料理，在日本各地區的菜單，也稍有不同。既然一場來到大阪，咁我就先訂好明晚的枱，一於在蟹道樂品嚐我的慶生宴吧 ~~

途人幫手影的一張朦查查合照，唉….總好過連一張”到此一遊照片”都無啦 !!　

然後逛了成條街最後先決定到晚餐想試呢間鐵板神社的鐵板串燒料理，估唔到竟然都有中文MENU，講真在日本吃串燒料理真的不太便宜，最平的都要２００ｙｅｎ一串，而且我覺得似小食多啲，如果肚餓可能要叫好多串先夠飽，不過今次誤打誤撞無諗到這間鐵板串燒味道都唔錯喎，很好吃！

今日踩咗成日單車，而且搭完火車、地鐵之後又行街，食飽之後都已經攰到暈….返到酒店沖完涼就已經好快入睡喇……

Day 5 (8Apr2014) —

今日我們第一個要去嘅地方係「黑門市場」（くろもんいちば）。在明治末期1869年時，這市場係稱為圓明寺市場，因為附近的圓明寺的東北方有扇黑色大門，所以又被稱為黑門市場，而這名字就這樣被流傳下來。搭地鐵千日前線到「日本橋站」 5或10號出口就可以到達黑門市場了。不過因為我們住的酒店離黑門市場不遠，１１點從酒店大門出發往左邊一直行，大概10分鐘就可以來到黑門市場了 ~~

黑門市場不只是個魚貨批發市場，六百公尺的市場內，包含了鮮魚、蔬果、雜貨、藥妝、調味品、餐飲、服飾等，多達一百七十家店，而黑門市場亦是專業廚師採買食材的地方。今日就讓我用相機鏡頭帶大家去參觀一下啦~~

其實這邊還有很多食店，例如：壽司店、便當店、拉麵店、串炸店等等…….而我們今早到黑門市場係為咗一個好重要的目的架，就是覓食喇，哈哈！

黑門市場有好多鮮魚刺身，其中最受遊客歡迎的就是Toro「大吞拿魚腩」啦 ~~

而呢度亦都可以搵到「河豚」，據說全日本的河豚有六成集中在大阪，而黑門市場又供應大阪百分七十以上的河豚，所以來到這裡就算唔食，都可以來看一看河豚的身影。河豚身懷劇毒，一隻河豚的毒可毒死三十個人，由其肝臟部份，不小心食到會在幾小時內斃命。聽說河豚肝臟相當美味，不過日本曾在1975年發生了一宗關於歌舞伎演員吃了四份河豚肝中毒身亡的事故，所以日本政府便下令禁食河豚肝。雖然河豚有劇毒，不過想嚐鮮的人大可放心，因為販賣和宰殺河豚是需要專業執照，聽說這個執照是很難拿的，必須先拜師學習兩年後，才能參加國家考試，而宰殺後擁有劇毒的肝臟，另有專業的公司來回收處理。若真的想試食河豚的話，其實黑門市場繞一圈，就可以搵到賣河豚的店啦~

我們在黑門巿場行了一圈，最終揀了最多人食的一間”黑門三平”，這裡的魚生和壽司已預先包好，像超級巿場般任君選擇 ~~

而海膽和魚生都好新鮮，價錢都唔算貴。黑門三平主要係賣各種鮮魚刺身和壽司，也有兼賣丼飯，丼飯不外乎是海鮮丼、鮭魚親子丼等等……

當然仲有蟹啦 ~~

結果我們4人瘋狂地揀咗好多樣食物，早餐確係豐富到有點過份喎….!!

有人說：「日本是飲食藝術化」，所以日本料理本身就是一種視覺藝術，光是用肉眼去睇，都已經係一種享受，有時也不免會垂涎三尺。未知你地睇見呢滿枱的日本料理會唔會流晒口水呢 ??

當然最好味嘅係吞拿魚腩toro啦（下圖右上角），油脂滑嫩而且分佈均勻，粉紅色的色澤顯得相當新鮮，簡直是入口即化，讓人食咗就忘不了那種極品的美味 ~~

食飽之後我們２pair人就分開行，因為我們想再逛多一陣黑門市場，順便買啲手信返去嘛，而且可能大家要睇要買的都唔一樣，分開行就唔會耽誤大家嘅時間啦，咁我們就約好咗今晚喺蟹道樂一齊食晚飯～～

嘩．．．．．．啲花花五顏六色真係靚得好緊要呀！！　

現在正好是草莓盛產的時節，而我對草莓是超有興趣的，所以買咗一箱返香港做手信，當然都有買咗2盒俾自己食啦，真係又香又甜，正呀！！

逛一趟黑門市場，不但填飽了肚，收獲都算豐富啦！！下一站又再去多一次道頓堀，順便補返幾張白天的相先~~

24小時營業的金龍拉麵~~

元祖大阪章魚燒~~

河豚料理店~~

蟹道樂門口賣的炭火燒蟹腳~~

然後慢慢行到去心齋橋筋，這裡是大阪目前最繁華的街道之一。心齋橋筋周圍有著不少高級名牌、百貨，另更聚集了五花八門、各式風格服飾店、流行飾品、誘人可愛的精品、可說是廉價到高級的全都可在這裡搵到，絕對是可以由早逛到晚，逛到腿軟為止~~

我的二嫂和其中一個老友都係Hello Kitty迷，所以我每次在日本見到呢隻吉蒂貓都會影低同佢地分享一下~~　

除咗影Hello Kitty之外都要影吓日本靚女先~~　

今日嘅午餐我同蝦子餅２人打算試下啲大阪小食，所以一見到咁特別嘅綠茶葡撻，我即買咗件黎試下，又幾好味喎，不過嫌凍咗啲，如果係新鮮出爐相信一定會更好味~~

然後再試咗大阪王將煎餃子，好好味呀　！！

在大阪市或道頓堀周圍都會見到章魚燒，章魚燒的製法係將麵粉加入烏賊後燒熟後，塗上鹹甜的醬汁，然後再撒上柴魚片。不過我試過幾間著名的章魚燒但都依然唔太鍾意嗰種濕濕淋淋嘅口感，唔係唔好食，只係我唔識欣賞啫～　

蝦子餅一見到新鮮出爐香噴噴嘅麵包就忍唔住買咗啲返酒店試下~~

以下係大丸百貨(Daimaru)，經過俾佢嘅門口和特別的建築吸引了我入去參觀了一下~~

逛到晚上６點半我們就行返去蟹道樂食晚飯喇～～

因為近年內地遊客眾多，所以蟹道樂餐廳都請了很多識講中文的侍應。而負責招呼我們的是一名來自山東的女侍應，所以點菜和溝通上並沒有問題～～

第一道上的係螃蟹刺身～～

第二道係凍蟹腳配極品蟹膏醬～～

第三道係炭燒蟹腳～～

第四道係非常香口嘅炸天婦羅蟹，好味到我們要叫多一碟呀～～

個蟹鉗好大隻好多肉呀！！

最後係招牌料理螃蟹鍋套餐，這螃蟹火鍋，有鮮美的蟹肉、豆腐、讚岐烏冬及各種蔬菜，再加上特別的湯底，那味道真的是令我回味無窮呀！

我們食到最後，侍應把鍋內剩下的少許高湯，加入一碗白飯，慢慢的攪，然後再打一個雞蛋進去，拌成稠稠的稀飯，每人分得一小碗，小吃多滋味嘛！

仲有水果添，正好讓這一餐慶生宴劃下一個完美的句點～～

餐牌上的其它招牌料理螃蟹鍋套餐～～

這餐滿足的慶生宴係今次大阪之旅的最後晚餐喇，因為明天一早就要飛返香港喇，所以食飽之後我同蝦子餅２人就去咗「激安殿堂」再行吓先返酒店休息。激安殿堂是日本有名的便宜商店，分店更是分佈各地。而道頓堀分店最大的特色就是上方的摩天輪，營業時間係到凌晨五點的，啱晒嗰啲可能下午買得不夠痛快嘅遊人可以半夜再來繼續瘋狂購物～